[帶住班人自由行]9日關東關西跳板之旅

點解唔食松屋

JR東日本都算係同動漫有好多合作
今次就係High School Fleet
係神奈川東部9個站儲限定印可以換野


食完飯之後就係去橫濱既中華街
係大船出發有2個選擇
唔想轉乘既就直接搭横須賀線去石川町駅
不過中華街範圍好大，核心區係東面
石川町駅係西南面，要行差唔多15分鐘先到
所以今次我就搭番東海道線去橫浜駅
之後轉みなとみらい線去元町・中華街駅
呢條線同東急東橫線，東京地下鐵副都心線直通運轉
向北分支仲有西武池袋線同東武東上線
所以係池袋新宿涉谷過去一程車到好方便
雖然轉線車費貴左，但車站一行出黎就係
點解左邊會有間中國風既SEGA



橫濱中華街係日本三大中華街之首
另外兩個就係神戶同長崎
都係日本早期開放既港口
最特別係好多呢類既牌坊，好有中華文化特色





東青龍南朱雀西白虎北玄武各有一道門
除此之外仲有啲係標示路既牌坊


呢度都好多廟，有關帝廟同天后宮
成個設計同佈局都好似台灣嗰啲廟
因為呢啲廟的確係台灣有份起既



雖然呢度係景點，但遊客唔算多
但嗰啲所謂手信舖其實係類似雜貨舖咁
例如話有李錦記，老干媽，豆瓣醬嗰啲調味料
或者係燒賣呢種已經

係日本行中華街確實有點兒那個
等於去外國幫襯茶餐廳一樣



如果俾我選擇多一次
我寧願係江之島附近玩一日都好過去橫濱

頭先禁錯掣，補番先

雖然呢度係景點，但遊客唔算多
但嗰啲所謂手信舖其實係類似雜貨舖咁
例如話有李錦記，老干媽，豆瓣醬嗰啲調味料
食物就係燒賣呢種已經係日本落地生根既食物
手工藝品就多數都係筷子匙羹嗰類野
好似去左山頂赤柱咁樣專係俾遊客買
事後發現係日本行中華街確實有點兒那個
等於去外國幫襯茶餐廳一樣


呢度連汽水機都有中華特色


咁啱見到有兩位美麗既姐姐黎拍野


中華文化黎講食佔左當中好大比重
中華街就自然有得掃街啦
不過我發覺黎黎去去都係得肉包，燒賣同炒甘栗
如果想入餐廳食就最好唔好
一黎日本既中華料理已經被localize得好緊要
甚麼天津飯，唔辣既麻婆豆腐絕對令你大開眼界
而且仲好貴，類似外國食酒樓中餐咁貴
俾我揀就食松屋



總括黎講呢度冇乜野行
如果俾我選擇多一次
我寧願係江之島附近玩一日都好過去橫濱

去完中華街就去紅磚倉庫
我地就行番出海邊，沿著山下公園行過去
中間會經過橫濱海洋塔，冇乜特別


山下公園有個石階舞臺，都幾靚
而且開左好多好大舊既繡球花



個像後面隻船叫冰川丸，1930年啟航
本身類似鐵達尼號咁行長途航線
二戰既時候被徵用做醫療船
戰後諗住劏左隻船但橫濱市民希望保留
所以就留左係度做博物館



行左差唔多15分鐘終於見到個倉庫
呢度有條橋可以行上去
唔駛行下面慢慢過馬路

紅磚倉庫就係紅磚砌既倉庫
同PolyU係一啲關係都冇
係黑船事件之後橫濱成為其中一個外國人聚居地
之後更成為日本其中一個最繁榮既港口
需要更多既倉庫用作儲存貨物
所以就用左當年最時興既紅磚做建築材料
係新填海地上面起一堆倉庫
紅磚又防火又耐震，外形又夠顯眼
係海上面望上去好容易就知呢度係港口



之後因為太舊，呢度慢慢就荒廢左
搞到好似以前啟德咁係市區無啦啦空左塊地咁
諗住拆左佢既時候橫濱市民又出現了
於是就配合活化海濱工程改變用途
而家變左好似大館咁既文青區
有Cafe有展覽廳有公園有個超大既廣場



雖然環境係幾靚
望出去睇到哂成個橫濱天際線
最高嗰幢就係橫濱地標大廈
但文青野實在唔啱我行，長輩們就更加係
所以留左半個鐘就走


紅磚倉庫呢度交通麻麻地
行去最近既鐵路站都要10分鐘
本身我諗住行去桜木町駅轉根岸線直接返新橋
但係因為我睇地圖行錯路
行左去合味道紀念館同個遊樂場嗰邊
結果就要行去みなとみらい駅
搭みなとみらい線去橫浜駅轉東海道線
車費都差成200yen，差唔多夠食個松屋



總括黎講，除非你好得閒或者腳力好夠
否則都唔駛plan去橫濱
景點中間雖然唔係遠，但都唔係近
為左唔駛行咁遠而搭1個站200yen又唔划算
結果就係辛苦自己隻腳行足3km

橫濱個中華街幾搞野
佢地扮d扮d既中國野好似好搞笑

返到酒店都只係7點半
但大家都行到攰哂唔想出去搵野食
梗係啦，江之島又行，鐮倉又行，橫濱又行
嗰日計步數行左成30000幾步
呢晚仲要執行李準備第二日checkout
於是我就帶佢地去便利店買便當

日本既便利店舉世知名
除左數量之多可以做到梗有一間係左近之外
食物既質素同數量都係十分之出色
除左凍食既飯團同甜品之外
仲有可以叮熱食既便當，味道大部分都唔錯
當然仲有啲炸雞蒸肉包嗰啲即場整既野
酒店呢度係商業區，便利店都超大間
而且同我去過嗰啲便利店比有啲唔同
呢度超過一半面積都係賣食物同飲品
應該係方便啲上班族OL買飯返公司食


佢地係Family Mart買完就自己返酒店叮黎食
我就去埋7-11睇下仲有乜野食
係便利店黎講佢一定係皇者，分店數目最多
食品種類都係壓倒性地多，出好多自家產品
本身佢係一間係美國發跡既便利店公司
1991年拎左日本專營權既伊藤洋華堂食左總公司
之後就變左日資，慢慢融合一個巨大既企業王國 - 7&I Holdings
佢既業務非常多，除左便利店之外仲有銀行
所以先勁多錢投資落去研發食品
另外好多常見既百貨公司都係佢既子公司
例如西武百貨，崇光百貨，Loft
不過中港台既崇光百貨俾其他公司買斷左，唔關佢事


行到攰攰地唔想食飯
所以走左去買甜品同奶
日本啲奶好飲相信大家都冇異議
奶黎講除左明治おいしい牛乳之外
我第二推薦就係呢隻雪印メグミルク牛乳
兩隻飲落都好滑，奶味香濃但又唔會有臭味
香港啲奶會唔知點解會有牛羶味同粉味


之後就係期間限定芒果新地
唔記得左邊間野買，但我記得係超級好食
芒果味唔假之餘個雪糕仲好滑


呢個就咁睇圖就知係什果乳酪
但係個人唔太建議，因為真係甜到糖尿
食完呢啲奶野第二日去得好順暢


Day 3完

Day 4
日本天氣預報準確度都好高
今日起身睇新聞話陣間會有雨要帶遮
望番出窗面又真係有舊乳暈雨雲係度
不過冇計，今日唯一既戶外行程要book先有
冇得唔去，所以點都要頂硬上


最後一日食呢度既早餐，好唔捨得


拎哂啲行李落黎checkout再放係酒店就出發
今日唯一一個行程就係皇居
位置就係東京站西面，咁梗係搭JR過去
我地去嗰陣係要網上預約先可以入去參觀
分左2個session，朝早10點同下午1點半
上番宮內廳個網，打番名同Passport嗰啲資料就可以
最後印番確認書去番集合地點俾保安check就得
集合地點係桔梗門，係東京站丸の内出口向西行10分鐘就到
而家walkin都得，集合時間前半個鐘派籌，先到先得


我地揀左10點，但其實9點半就要到
一黎要排隊俾保安check確認書
二黎入去皇居要做安檢過機
所以千祈唔好帶行李去行，會好麻煩
之後就會去到窓明館俾你坐低等出發
有幾部好細既電視播啲皇居介紹影片
不過應該係90年代拍，濛到睇唔清楚
呢度可以借導覽機俾外國遊客
仲有locker你俾你放背囊唔駛行得咁辛苦
最重要係呢度有手信舖，都幾多野賣
書籤，飾物，模型都有
食物既手信雖然都係外面有得賣既名店
係得皇居賣，公司背景同味道都有一定要求
但係外面包嗰張花紙係寫明係宮內廳
部分仲係皇居特別版，有日本皇室既菊紋
所以買黎送禮一流，盡顯皇者風範
結果我地8個入拎左3個locker擺手信

10點正準時出發，跟住啲帶住大聲公既人行就得



第一個chcekpoint就係富士見櫓
皇居呢個位置就係以前江戶城既一部分
所以護城河，城牆嗰啲呢度都會見到
至於天守，因為係100年入面燒左3次
將軍發覺唔多老黎所以最後就唔起番
富士見櫓就成為城入面最高既建築

之後繼續行就會見到宮內廳Office
宮內廳係日本負責管理天皇同皇室事務既部門
因為日本係行君主立憲制
天皇名義上係國家元首
只係將統治既權力下放俾內閣
所以宮內廳係政府部門當中處於超然地位
作為外局之一直接隸屬內閣府
係二戰既時候天皇既居所明治宮殿被空襲燒毁
呢度就曾經因為咁成為臨時宮殿
左邊條橋就係駁去之後新起既天皇宮殿


之係沿著斜路行上去會見到個好長好闊既建築
有名你叫長和殿，全長163m真係好長
係新年同埋天皇生日皇居會俾一般民眾過黎見天皇
而天皇同一眾皇室成員會係呢度見大家
通常下面啲民眾會舉旗仔



行過少少就係南庭，係皇居其中一個園景
今日天氣麻麻，所以望落冇乜特別


再行前啲就係二重橋本體
通常啲人就係皇居出面個外苑影上去
我地就企正係度阻下面啲人影相
因為以前試過有人係下面掟炸彈
所以長期就有警察望實




二重橋個view好靚，好多人唔想走
但因為個tour有時間限制，呢度得10分鐘停
所以啲大聲公阿叔同啲職員會趕人走
啲外國遊客屌哂鬼咁


行番落去就唔係原路折返既
落左斜路轉左行去豊明殿門口
呢度入去就係皇居最大既宴會廳
天皇招呼國賓都會係呢度舉行

回程其實已經冇乜野好睇
因為大部分時間都係叫你觀賞城牆同內護城河
行行下仲落雨添，好彩有帶遮


去番窓明館拎番啲手信就離開皇居
本身諗住之後行去外苑影番二重橋
最後行番去影番東京站
但係而家落狗屎又揸住一堆野好麻煩
所以今次兩邊都冇去到
拿拿聲搵個地鐵站口行落去避雨
東京站地底同尖沙咀地底一樣駁哂啲商場地庫
你只要落到下面你就可以行番去東京站



我家姐想買Post Card之後寄出去
所以帶佢地行左去KITTE地下既東京中央郵便局
日本郵政已經民營化左，唔同香港係政府部門
作為私人企業既佢商業化味道比較重
但我估唔到既係郵政為賺錢都去得好盡下
當我見到郵票有Lovelive，SAO，黑執事，點兔既時候
我不禁倒抽一口涼氣，又引毒撚課金
同埋乜毒撚會寄信架咩


下一站就係去東京站一番街
位置係八重州北口既地下自由通道隔離
KITTE係丸の内南口隔離
同一番街中間隔住JR東京駅收費區
因為我地又冇買JR Pass
所以冇得用外掛入閘再出閘穿過去
好彩東京站有3條自由通道俾人穿過個站
係丸之內北口既地面同地底各有一條自由通道
另外南面京葉線地下大堂都有一條自由通道
不過嗰度偏離左東京站主體
又遠，又係地底好深位置，好少行嗰度


當年國鐵民營化分拆做唔同JR公司既時候
政府既前題係想盡量拆到業務均勻
每間分部可以自力更生幫政府還番啲舊債
東海道新幹線橫跨東中西日本，理論上要拆3段
但咁樣分法會郁一郁條線就要搵哂3間公司傾
為免麻煩，政府索性成條俾哂JR東海算數
況且JR東海管理既地區在來線一向冇錢賺
所以留條賺錢線俾佢打番勻都好
JR四國同JR北海道就冇咁好彩，根本冇賺過錢

就係因為咁，JR東海好似變左特權階級咁
零零舍舍可以踩入日本最賺錢既地段
JR東日本就係東京同品川站
JR西日本就係京都同新大阪站
於是佢意識到自己可以食住上
分豬肉嗰陣就飾演豹頭同上頭講數
「(東海道新幹線佔有既地段)我要哂」
意思姐係除左新幹線車站月台同路軌既上下延伸
包括車站大堂，地庫同上蓋物業之外
新幹線鐵路橋橋底既業權都係歸JR東海所有
所以係東京站呢度佢佔據左東面3分一面積
包括八重洲出口同地庫既東京站一番街
而呢個結果就令JR東海利潤為JR各分公司之首
東海道新幹線及其相關收益佔總利潤9成
名符其實JR東海道新幹線
新幹線冇停新橋站，但就因為有一段路軌跨過個站
所以JR東海霸左車站大堂中間一忽開便利店

去到一番街又係食飯時間
呢度我又解散團友自由活動食飯行街
老豆老母跟姑姐佢地，我就同家姐行
我就對行街冇乜興趣，都係食左野先
呢度有條拉麵街，全部都係禁食券既
啱哂我呢啲唔想講野又想食野既人
我就根據排隊既人數揀左塩らーめん専門 ひるがお
家姐就叫左招牌既塩らーめん ひるがお盛り
湯底係海鮮同雞湯鹽味清湯底
飲落好鮮甜，鹹得黎又唔會口渴嗰種


我就要辛味白湯塩玉らーめん
湯底明顯濁少少，又有舊辣醬俾你攪勻
飲落其實差唔多味，但膠質比較重雞味比較濃
叉燒個樣好似香港燒臘舖嗰啲
雖然瘦但食落都唔會韌
辣味就唔太突出，好似譚仔十小辣咁唔多覺
麵質就一般，但比較索湯，所以都幾好味

番外篇 - 晴天的皇居1

第一次去皇居既時候天氣極好
仲有小智同你講早晨


到桔梗門既時候都係9點
仲有大把時間，所以就去左睇二重橋先




桔梗門行去二重橋嗰條路係皇宮外苑
基本上就係一大片一望無際既石地空地同松樹林
離丸之內既寫字樓都相隔幾百米



而家影到呢條係正門石橋
二重橋係佢後面，呢張影唔到


呢張就係二重橋
參觀皇居既時候就會帶你行呢條橋

番外篇 - 晴天的皇居2

第一次黎東京同呢次早兩年
皇居個參觀路線都係冇變過
首先都係富士見櫓
中間呢個大聲公人會講述景點既資訊
而其他保安就會用啲日式英文講個number出黎
其實就係導覽機關於嗰個景點既編號
Level同不能笑大西講英文差唔多，都係好難明
家姐借左一個導覽器諗住聽下係啲乜
點知都未聽完就去左下一點，又講下個number
基本上都係廢既



呢度就宮內廳Office


呢度就係南庭既園景
果然天氣好影出黎真係唔同啲


之後就係二重橋本體
可以見到下面真係好多人
可能嗰陣仲未有得walkin參觀，啲人唔熟手續
睇到有啲人指住我地
疑似驚歎緊乜原來可以入到黎



除左自己上網booking之外
有啲團體係直接同宮內廳入form申請
所以一團分分鐘有幾百人都唔出奇


都係嗰句，你對番前面同一個位影嗰幅相
天氣差同天氣好影相真係差好遠


呢次豊明殿有西裝友入去
會唔會天皇而家就係入面
嗰陣仲係平成時代

今次行程最難既唔係要拖住7條友自由行
而係東京去大阪呢一程既交通
因為選項實在太多，有平有貴有快有慢

第一個俾我剔除左既就係夜行巴士
平到痴線，3000yen就可以由東京直達難波
而且仲可以慳番1晚酒店
夜晚10點係東京站上車，第二朝7點幾就落車
不過我怕老人家訓唔著同埋啲鼻鼾影響其他人
第二日又好似行程第一日咁會訓著
所以BAM

第二個就係內陸機
ANA同JAL分別都有外國人優惠
7700yen就可以由東京去大阪
機程只係1個鐘，班次又多
東京就由羽田出發，酒店過去都係半個鐘
大阪仲可以揀近市區既伊丹機場
計哂搭車checkin其實3個鐘可以到難波
不過我都係冇揀呢個選項
主要因為驚佢地買既野過唔到國內線安檢
到時8個人有人俾人截停左真係唔識處理

所以就得番最後一個選擇 - 新幹線
買左飛直接落月台上車就得
唔駛排隊checkin安檢之餘行李仲可以跟身
班次方面唔駛擔心，最密3分鐘一班
兩個半鐘內可以由東京站直達新大阪站
計番都係大約3個鐘就可以到難波
但係唯一一個缺點係車費真係好貴
單程要超過14000yen，係來回東京大阪機票既價錢

有啲人可能會問，遊客冇優惠咩
而答案就係，呢條線冇多餘既運量應付遊客
剩係做本地客已經坐滿9成
唯一一張可以坐東海道新幹線既Pass係全國Pass
但唔可以坐最多班次停最少站既のぞみ
雖然係咁，但年中都有唔少好似我呢啲遊客
寧願搭貴火車都唔搭平飛機
因為火車真係正啲，舒服得黎又有得睇風景
真係抵JR東海會發達

竟然係新幹線
松屋既你竟然帶佢地坐新幹線，跌哂眼鏡

估唔到新橋站有一part 係東海

國內線可以俾拿水搭飛機就知

東海: 路軌下面都係我主權
https://www.youtube.com/watch?v=rWjrAoozJZw&t=240s&ab_channel=%E3%81%8A%E3%82%8A%E3%81%B2%E3%82%82

講咁多野 原來係新幹線

笑咗

買新幹線飛唔算難
係是旦一個JR站新幹線售票機買就得
基本上就係揀站揀時間揀位就俾錢
入面最難既就係在來線同新幹線轉乘既問題
例如我第一程新橋站出發去品川站係JR東日本在來線
第二程品川站去新大阪站係JR東海道新幹線
售票機係可以出哂一張飛，用佢搭哂兩程車
因為我搞唔清楚，所以就用左最保險既方法
就係買品川 -> 新大阪，包冇事
如果都真係唔識咁你去みどりの窓口排隊人手劃位
不過好多人，通常都要排差唔多半個鐘

我第一日黎日本已經預先買定飛
雖然即日買都有飛，但就未必買到8個連位
然後諗住去完皇居行完東京駅之後
就去番酒店拎行李再去品川駅上車
唔駛行回頭路之餘又去下另一啲站
點解唔直接帶埋行李去東京站，咁咪唔駛走黎走去
答案係窮呀DLGH，咁多行李寄存分分鐘要6000yen
再計埋張車飛，想我去到大阪食松屋都冇錢咩

雖然我地張飛係寫住新幹線
但其實只要係品川駅入閘就得
所以可以入JR東日本閘機去在來線區域
最後先用番同一張飛入落番新幹線閘口去搭車
至於可唔可以新幹線在來線大堂反覆橫跳
又或者出在來線閘再入新幹線閘，我就冇試過
JR東日本嗰邊勁多商場閘外有atre，閘內有ecute
勁多野食買，擺明係俾轉車客買便當同買手信
新幹線品川站就比較寒酸，舖頭都冇乜


品川駅同東京駅都係兩鐵共構車站
當年國鐵都有計劃起呢個站
但後來因為財赤同要分拆所以冇起到
本來國鐵同JR東日本講定左
到時優惠價賣品川站隔離貨場塊地俾JR東海起站
但JR東海過黎傾嗰陣JR東日本話冇咁既事
可能因為分餅仔大細超單野懷恨在心
堅持要市價先肯賣俾佢，於是大家不歡而散
直至日本經濟泡沫爆破，日元同土地都貶值
精甩尾既JR東海見平左咁多就話OK，最終傾得成
不過塊地四圍都係JR東日本地頭，冇得踩過界
又因為通風同景觀原因唔可以起太高既物業
所以今次到JR東海捉蟲，搵唔到錢
月台都真係幾窄下，仲衰過地鐵站
不過呢度係必停站，列車又密
係上落車嗰陣迫啲，其他時間都冇乜問題



今次我係搭東海道新幹線最快嗰架のぞみ
只停東京品川新橫浜名古屋京都新大阪
最快2個半鐘內就可以到
不過都真係幾多人，全卡車爆滿
第一次搭新幹線俾我既感覺係好舒服
一黎個位好坐，二黎車箱好靜冇乜人講野
出面風景又靚，唔似飛機又嘈又冇景睇





係架車無聊冇野做就梗係食野啦
頭先係ecute買左個鰻魚便當
除左有鰻魚同鰻魚汁炒飯之外
仲有炸蝦雞肉丸子同玉子
雖然係凍食，但味道係十分之好
呢個便當當年60幾蚊我覺得貴貴地
但而家香港呢個價錢邊食得到



7點40分準時到達新大阪駅
但因為架のぞみ停2分鐘就開車，影唔切
拎隔離月台JR西日本嗰架頂住當先
大家都係N700A，不用分得那麼細
長輩們十分興奮，係度影左成15分鐘
又solo影又群體影又send上朋友圈，十足十鐵膠

當年好似係東京站月台分唔勻先反面

大阪方面我就揀番之前黎過兩次既難波
因為啲街比較好行同交通方便
之前住開都係近道頓堀嗰頭，感覺麻麻
一黎近購物區酒店就會好貴
二黎嗰度夜晚紅燈區好雜
朝早成日見到啲醉酒佬攤屍訓係條街
不過間唔中都有啲正妹睇下既
今次咁合家歡，費事揀嗰頭住嚇親佢地
所以就揀左近難波，係堺筋邊既SARASA HOTEL NAMBA
呢邊就靜少少又冇咁雜，附近都有野行
最重要係平，雙人房每晚都係700蚊
叫平架喇，嗰陣難波酒店閒閒地過千
我地係新大阪轉地鐵係難波站行過黎大約10分鐘


雖然間房好似好細咁，但勝在企理
因為係向路，所以夜晚都有少少車聲但唔嚴重
門口都夠位攤開2個大喼


黎到大阪呢個美食大都會梗係多好野食
而係大阪既第一餐晚餐就係鼎鼎大名既松屋
因為checkin完都8點幾，第二朝又要好早起身
無謂行咁遠去道頓堀嗰頭食
咁啱係難波站行去酒店途中
俾我無意中發現附近勁多快餐店
松屋，松乃家，吉野家，すき家通通有
なか卯直頭係酒店隔離，肚餓落黎食一流
作為松屋既打手，係東京一直搵唔到機會食
呢度見到我就梗係推薦佢地去先啦
今次食番我認為松屋最強料理 - 蔥鹽燒豚肉飯
車淑梅.gif
呢個飯既食評實在寫得太多次
想知味道可以睇番我以前啲遊記
我冇記錯次次都有食呢個飯


酒店附近1分鐘路程有齊7-11，Lawson同Family Mart
路口間Lawson仲要係勇者鬥惡龍主題店
除左有周邊賣之外其他野都一樣
所以買宵夜買甜品又係好方便
今次就買左個豆漿雪糕黎試下
食落就係豆漿味，唔係好食得出呍呢嗱味
不過唔甜，都幾啱臨訓前食