[帶住班人自由行]9日關東關西跳板之旅

仲有行到你仆街 老西咁大

留個贏名追故
好想快啲可以去日本

番外篇 - 秋葉原 3

一講秋葉原好似就唔見左我家姐
原因係佢知我一定行好耐，佢又唔啱行
：我唔阻住你睇學生妹去女僕Cafe喇
：唔會囉，學生妹駛乜專登去嗰度睇
所以係前一個景點東京駅之後我就同佢分開行
佢去新宿行街，我去神田明神
但問題係佢本人係一個路痴
好彩我同佢都係搭中央線，可以帶埋佢上車
我就出御茶ノ水駅
我叮囑佢去新宿駅落，認實JR站係邊
因為我都未去過新宿，我都唔識路
佢去左啲奇怪地方我都唔知點搵佢

因為第一次去東京係我第一次plan行程
預每個景點停留既時間預到錯哂
所以先要分開行等大家各自想去既地方可以留耐啲
行程定落啲餐廳好多都冇去到
本身秋葉原係黎食lunch，最尾變左係東京站食
我行完老秋見肚餓，於是將呢餐當下午茶
事後我冇話俾我家姐知我去左偷食

いきなり!ステーキ係食立食牛扒
嗰陣只係開左年半，唔係太多分店
但因為大件夾抵食兼好食所以紅左
間野係過左萬世橋第一個街口轉左，都幾易搵


我4點幾去到
但呢個時間居然都有5-6個客
好彩有客咋，間舖冇客我唔敢入
入到去其實冇人招呼你
自己搵個位坐企，嗰度係冇凳既


枱面放左本menu俾你揀食乜
當年冇乜野好揀，得4種扒揀
呢度係段gram枰，最平6yen/g肉眼排
去到最貴都係10yen/g既熟成國產西冷
但係都唔可以話切塊肥牛咁薄黎試
每隻扒每次order都有最低重量要求
因為切得太薄會影響肉質同口感
我就剩係想試少少，200g得2種有得叫
一場黎到，梗係食最貴嗰隻啦
叫200g都唔駛2舊水，靚扒黎講好平



呢度唔係松屋，冇得粒聲唔出禁禁禁就坐定定有得食
所以獨遊有樣野好緊要，就係要有良好既摩擦力同模仿力
因為你要係個店員面前扮本地人開口落單
落錯單俾貴左事少，唔好食你真係會記一世
我而家仲好記得係姫路食嗰個明石燒難食到癲
咁啱見到有條女落單，就當然係昅實佢啦
我意思係睇佢點樣落單，之後跟機

同香港食舖頭Pepper Lunch一樣
拎枱面個號碼牌去煎扒位落單就得
同廚房個妹妹仔講番要乜野牛要幾重
佢就會係個凍櫃拎舊肉出黎切俾你
而佢就咁拎舊肉磅都冇磅
就咁目測一刀切一舊出黎放上個磅度
唔通佢係好似食戟十傑嗰啲有技能睇到舊肉幾重
不過一切都係多慮，佢不幸地切多左20g出黎
佢有問我駛唔駛幫你切番啱重量我估
我都唔識聽，咪閪佢囉，佢又同我講多謝喎
之後問我要幾熟我估，我要咪啲鴉moo呢呀
之後就禁收銀機，姐係俾錢啦
之後印左張單叫我去番個位等我估
仲以為切多左佢唔計錢添
不過20g都係多左港紙20幾蚊姐，算啦


我個位對正個妹妹仔廚房，可以睇到佢點整
塊扒每邊都撒左啲鹽同黑椒就夾上個扒爐度燒
但奇怪既係人地又係200g我又係200g
點解我嗰塊巨形咁多(後面嗰塊)


等左5分鐘件扒就送到上黎
未落汁就已經jar jar聲
鐵板同扒中間放左粟米同洋蔥
唔怕塊扒繼續煎住越食越鞋
水壺放住牛扒汁，鐘意倒幾多就倒幾多
枱面有紙巾俾你倒汁時擋擋
塊鐵板熱到啲汁倒左落去消失哂



平時去扒房食扒我通常叫生啲
因為塊扒離開左個爐其實都仲有餘溫煮緊佢
侍應由廚房送塊扒到你張枱都有段距離
況且人地唔係剩係serve你
咁塊扒黎到變左Medium就啱哂
雖然違反商品說明條例
但呢度唔同，一燒完就即刻上鐵板俾我，全程少於30秒
所以我叫Medium rare就真係Medium rare
就算塊扒咁厚，切落去都係好軟熟
裡面既肉呈現好靚既淺粉紅色
本身怕太生會食到血腥味，但呢舊又唔會
因為係熟成既關係，牛味比普通扒濃
肉汁亦比較少，食到最後都唔會成碟水
姐係代表牛肉既精華全部濃縮哂係啲肉入面
加埋牛扒面既蒜味牛油同蒜片一齊食，好惹味
唔駛加牛扒汁都已經好夠味
底下啲粟米同洋蔥jar完變左有少少燶，食落好香口
不過唔好就係張枱矮左少少
所以要成日彎腰食，費事啲汁滴到衫

真係好撚遠

呢間嘢正到 我嗰次都好似係去呢間分店
不過我去嗰次個收銀好似係女大學生嚟 英文幾好 溝通冇問題 (仲幾靚女添)
最後仲俾咗張會員卡我

睇到都想食

做親子旅行都ok嘅，有麵包超人館，合味道杯麵博物館，Cosmo world，八景島
成年人去可能悶啲

留名
有時間我都要出吓遊記

講番正題，經過3粒鐘休息之後
全部人都回哂血出發睇夜景
東京夜景黎講東京鐵塔必定排頭3
不過就唔係上個塔度睇夜景
而係去高層觀景台望番個塔
可以近距離望東京鐵塔既觀景台就得2個
第一個係六本木Hills，係六本木
另一個就係東京世貿中心，係濱松町
既然又近酒店，入場費又平啲，就揀佢啦
不過因為要重建，今年1月尾就會關閉
所以往事只能回味

酒店出發搭1個站地鐵去大門駅就到
佢地話搭1個站好似好貴，想行過去
因為我地酒店大樓既平台同其他大樓連住
所以都可以好輕鬆一野行到東京世貿中心對面
都係5-10分鐘路程
呢度係離東京鐵塔最近既觀景台
睇完夜景想行過去近影都係10分鐘
個塔左邊就係六本木Hills


入到大樓就會見到有觀景台大堂
有部自動賣飛機入錢買飛
買完搭直達電梯上到40樓觀景台就得
620yen有360度夜景，抵到爛
六本木Hills張飛貴3倍，包埋美術館門票
如果想上多層去室外觀景台仲要加錢
直接向西面進發，個塔就係你面前



不過仲未天黑，東京鐵塔未著燈
所以行去另外幾面睇
北面就望去新橋同東京站方向
下面就係JR路軌同Monorail路軌
路軌右邊黑色凹落去嗰幢就係我地酒店



東南面就係望台場，但係都幾遠
圓形有光嗰度就係摩天輪


到差唔多天黑既時候呢度會專登tune黑啲燈
所以影相既時候可以避免出現反射
當年呢度係俾腳架，所以吸引啲攝影人士過黎影
六本木Hills係唔俾帶
第一次去東京我都係黎呢度睇夜景
但今次多左個吊雞頂住左左邊
呢幢樓既落成令到呢個觀景台大打折扣








搞搞下都係度留左成2個鐘
本身仲諗住話去食飯
姑姐佢地話頭先休息嗰陣食左麵包
而家未肚餓，唔駛預佢
咁我地就帶阿爸阿媽去酒店樓下7仔買野食
啲相已經唔存在了
食完就訓覺，第二日又要早起身

Lm

而家多左野食又有凳坐
咁多年冇食過可以考慮下食多次

Day 2

呢間酒店好多樣野都好，房又大交通又方便
但唯獨是附近冇乜野食，便利店就大把
隔離有個商場，但大部分都係高級餐廳同甜品店
要食啲平平地既正餐一係行去新橋一係行去濱松町
可能酒店自己知自己事，所以係包早餐
上次獨遊本身諗住揀番呢間黎住
不過價錢又貴左早餐又冇包，不了
食早餐既地方就係酒店大堂，位就唔多夠
好彩我地今日7點半就落左黎所以都有位坐既
正常酒店早餐有既野呢度都齊，都幾好食
例如麵包，湯，玉子，沙律，奶等等
我懷疑姑姐一家前一晚食啲麵包係呢度M返黎



食完早餐8點準時出發
點解咁早？因為今日係星期日實好撚多人
唔早啲去景點一定迫到仆街
第一站就係去明治神宮
行番去新橋駅搭JR山手線去原宿駅就到
呢個木造站體係東京最悠久既在用鐵路建築
不過因為過唔到消防例同埋不敷應用
最終係上年8月關閉拆卸
係圖左邊既行人路空地興建新站體取代
右邊好多妹妹仔排隊去唔知乜野餐廳


出左原宿站轉右就會去左一個森林地帶
見到個木製大鳥居就係佢南面既入口
上面既三舊金色菊花係有名堂
就係代表日本皇室既十六瓣八重表菊紋
因為呢度係供奉明治天皇同佢老婆皇后既地方


行過大鳥居就會行入一條好闊既林蔭大道
好難想像東京有啲咁開揚既地方
以東京23區計呢度係繼皇居之後第二大綠化帶
答案好簡單，邊個夠膽拆皇室啲野


行到中途會見到有一堆酒桶
有日本酒桶，都有紅酒桶
因為明治天皇好鍾意飲酒
尤其係維新之後同外國貿易緊密左
紅酒都成為左佢既最愛
所以唔同企業都用酒去祭祀佢
順便係桶面印公司名賣埋廣告

明治神宮條林蔭大道好闊落，試過平日一早8點幾去到，無乜人行得好舒服


酒桶前一個人都無

啲樹原來咁高大
上次去都無留意到
好有森林feel

過左堆酒桶之後就會有個分叉位
右邊係繼續向北行，去到代代木
左邊有個超大鳥居，就係去本殿既方向
呢個鳥居望落同門口嗰個差唔多
但呢個大少少，高12m，闊9m
係日本最大既木製鳥居


就咁睇呢幅相你唔會覺得呢度係日本市區
15分鐘路程內可以去到日本最繁忙既地區
例如新宿，涉谷，表參道，etc


正常既神社表參道，鳥居，本殿係成一中軸線
但明治神宮既佈局就好唔同
表參道係東西向，入正門鳥居就向北轉
去大鳥居又向西轉，臨到正殿又向番北轉
見到個細既木鳥居就代表終於行到本殿
可能因為呢度係皇室既地方
呢度比一段既神社大超多
所以就算佢位處東京又超多遊客
其實都唔會覺得特別迫



2棵大樹中間夾住既就係本殿
不過可惜既係本殿維修緊，見唔到真身
就咁笠左塊大布幕遮住
不過又整得幾逼真喎衰鬼


除左參拜，結婚儀式都係十分出名
因為呢個地方係日本人既聖地，地位超級崇高
雖然類比得唔好，但等同於香港既新人去半島四季擺酒差唔多
而且嚴格按照神道教儀式舉行，你見到都好大陣象
新人前面就由神官巫女帶領，後面就係賓客
男既著傳統和式服裝，女既著白無垢
後面仲有個神職人員幫新人擔遮
要咁多人咁多服裝去hold成個儀式
相信都要有錢人先至負擔到

係呢度結婚，好似主題樂園表演者咁，勁多人望

樓主個行程幾吸引

原宿除左有明治神宮之外
仲有一個好受年輕人歡迎既地方 - 竹下通
位置就係正JR原宿駅對面
計好哂時間啱啱11點到
大部分舖頭都係啱啱開門
但係我點都估唔到咁撚多人



竹下通有啲似老銅同弘大咁
Target後生女市場，所以消費都比較平
所以極多JK，大學生同OL
啲舖頭細細間咁，行1間絕對唔夠你行
不過勝在夠哂多唔同既舖頭
食店都唔少，基本上全日留係度行都得

作為一個男士，我當然好明白呢度咁多野行
所有女人都會入左結界咁，唔會睇時間
上次同我家姐行，佢行左3個鐘
為左唔悶死班男人，我呢度分開左行程
總之5點台場見
女：竹下通 -> 新宿 -> 台場
男：竹下通 -> 涉谷(路過) -> 日本科學未來館 -> 台場
雖然我家姐係路痴，但同佢講搭乜野線去乜野方向都識既
呢頭講完就大家散水，lunch就各自各搞掂

係Google搵竹下通，頭幾個result一定都係講可麗餅
因為日本食可麗餅既潮流係呢度帶起
可麗餅(Crepe)本身係法國野，用麵粉蛋奶製成麵糊
之後倒上鐵板度煎，熟左之後就加生果糖漿食
40年前日本戰後經濟起飛，好崇尚啲外國野
有可麗餅店係度開舖
Gimmick上為左方便人食住行街
係煎既時候就將配料放埋上去
之後卷到好似一束花咁
以前冇IG打卡，靠年輕人口耳相傳就紅起來
同珍珠奶茶熱潮一樣，開到總有一間係左近
而家基本上就變左竹下通名物之一


呢度都幾多可麗餅店，我就揀左Angels Heart
冇乜特別原因，因為名店得黎又唔駛排隊
門口放左啲食口模形俾你睇下有乜料
計過都差唔多有成100種味
雖然每間店都有啲特別既限定menu
但其實大部分都係水果+Cream類
除左甜都有鹹，例如吞拿魚沙律
不過我覺得Crepe都係做甜品好啲



我就要左個士多啤梨+雪糕+cream+朱古力醬
好似500yen咁上下，唔算太貴，全部都即叫即整
不過啲員工可能受過嚴格訓練，真係整得好快
由落單煎麵糊加料卷餅到交俾我都係2分鐘就得
外觀望落個餅皮好薄，啲朱古力醬係透底
咬落去就係平時食班戟既口感
個餅皮仲係暖暖地，啲cream同士多啤梨就係凍既
冰火個感覺食落都幾得意，但味道唔係太特別
不過又咁講，呢種配搭好難唔好食既
呢個捲餅方法食完唔駛洗手，都幾方便
之後偷雞去左對面間7-11掉左張紙


之後都係行下食下當食左lunch
食食下都真係會食飽
呢度有當年香港未有既Calbee+可以食即炸薯片
仲要係扭紋薯片，咬落去真係咔嚓聲

可麗餅未食過，曬左個胃d位

我本身對行街冇乜興趣
就算行都係行outlet，因為多運動牌子
呢度仲要因為有超過一半都係女性向
咁就更加唔啱我行
不過呢度都幾多新派野食
好似棒棒泡芙，可麗餅嗰啲，都消磨到時間
但啲男性長輩就對行同食都冇興趣
我排隊買野食嗰陣佢地就係路邊等
佢地可能昅女昅飽左，唔駛食

行左1個鐘諗住帶佢地去涉谷睇十字路口
點知佢地話肚餓要食飯
我諗住佢地會掃街，點知唔會，估算錯誤
本身諗住係度搵野食，但撞正食飯時間
每間餐廳都排到傻左
突然間我靈機一觸，閃過其中一間舖
於是就帶左佢地搭JR去新宿食飯


食乜呢，就係食松乃家
呢間野係第一次黎東京既時候發掘到
如果睇過我前幾次遊記就知我好撚鍾意食呢間野
因為佢係松屋旗下專食炸豬扒既品牌
600yen有找就食到個炸豬扒定食
雖然係平，但味道絕不失禮


食完就搭車去涉谷睇十字路口
正常搭JR就方便快捷
但我嗰時正值交通魔童既摸索階段
所以想每次都搭唔同車
於是我揀左一個最複雜既方法去涉谷
就係行去新宿三丁目搭副都心線
不過個站真係深到不得了
係涉谷駅上地面瘋狂轉扶手電梯轉到頭暈

我地啲男人唔行街
黎涉谷真係打個卡就算
第一個位就係忠犬八公像
唔係右邊個八公，而係左邊隻狗
差唔多100年前有隻秋田犬叫八公
每日傍晚都會去涉谷駅等主人一齊返屋企
有一日主人返工期間去世，冇再返黎
但八公仍然每日係同一時間去涉谷駅等
呢個忠犬故事傳左開去，好多人都好感動
於是係站前廣場整左個像紀念


第二個地方就係涉谷駅前十字路口
呢度係世界上最出名最繁忙既路口
一綠燈嗰下就好似人類大遷徙咁
有電視節目計過數最多有3000人同一時間過馬路
基本上好難睇到個路口係冇人
除左今際之國的有栖

又松屋

睇樓主遊記無“松屋”就唔安落，而家安落哂

帶長輩遊日本，係咪應該食好少少

松屋松松屋，就係咁簡單