我都係由番交通著手
除左近隅田川呢邊既地鐵站同東武站之外
向西邊行番10分鐘都有個浅草駅
就係連接筑波市同秋葉原既筑波快線
遊客正常黎講唔會熟呢條線
因為佢的確唔係接駁旅遊點
我就梗係唔會去筑波
係搭去秋葉原
出左站行番東西自由通道就會去到電氣街
秋葉原唔駛大家介紹啦，世界潮人集中地
不過對於長輩們黎講呢度冇乜特別感覺
除左我老豆
-----------------------------------------------------------
：秋葉原係咪好多電子野賣姐
：電子野？唔係毒野咩？細佬鐘意嗰啲？
：(...) 電器舖有既，但係Yodobashi唔駛係度行啦
：去大阪先行啦，嗰度仲多間
：唔係喎，我見電視話呢度有電子零件賣架喎
：(Googling...)哦啲舖係橋底，我帶你過去啦
：家姐你帶啲女士行下，我帶啲男人過去
：OK(過到去睇左唔夠5分鐘)
：都幾貴架喎，啲電批他錶計番都貴香港2倍
：唔買喇，之後去邊度
：(你唔係諗住咁Hardcore係度買野當手信掛，咪又係made in China)
：哦，咁我叫番家姐過黎，反正佢都唔啱行-----------------------------------------------------------
本人對於日本有興趣相信大家都好清楚
當然包括傳統野
每一次去唔同地方我都會擺啲文化景點落去
因為我覺得去旅行唔止係行街食野睇風景咁簡單
了解當地既文化先至會令個行程有得著
今次當然唔例外，就係去江戶東京博物館
係JR秋葉原駅搭總武緩行線去両国駅行過去就得
両国係國技館既所在地，日本國技姐係相樸
車站大堂擺左個場地出黎，都幾得意
一出左站望番去後面就會望到個博物館
因為個外型都十分宏偉
係站行5分鐘就會到
但老豆對於呢啲知識性既野好冇興趣
：我唔行喇，你地幾個行完落番黎搵我啦於是佢自己係下面，我地7個買完飛走左上去
故名思義，呢個博物館就係介紹東京係江戶時期既野
例如建築，文化，娛樂，經濟活動等等
啲模型顯示番以前東京既街景係乜野樣
有啲仲專登整到1比1咁大
俾你了解下當年啲舖面係點樣
我就做左導遊用廣東話聲音導航
睇完個簡介
行行下聽到樓下播緊啲傳統音樂
就咁睇就好似有班老人家睇另一班老人家跳老舞
個老舞係點呢，就係跟住個節奏郁下拍下手咁
睇落似係祭典既時候會跳嗰種
呢啲係咪就係日本既跳舞群組
家姐發現老母唔見左，唔知行左去邊
搵下搵下原來佢係洗手間隔離啲位度坐低訓著左
橫掂都行左1個鐘多啲，我地都唔行咁耐喇
橫掂夠鐘checkin，落去正門接埋老豆就返酒店
唔怪得whatsapp極佢都唔應機
本身揀呢度做行程隨左了解日本文化之外
仲因為我呢度返酒店快
両国駅有2個，一個係頭先秋葉原搭過黎既JR站
一個就係正博物館隔離，1分鐘就行到既地鐵站
呢度搭大江戶線15分鐘就可以直達汐留駅
出左閘直上扶手電梯1分鐘就到酒店，異常方便
行去蔵前駅都係搭大江戶線17分鐘就到汐留駅
我上次食完淺草壽喜燒跟google走左去坐巴士去skytrree. 巴士幾好，唔洗行返去鐵站 又可能好近skytree先落車
