[帶住班人自由行]9日關東關西跳板之旅

涉谷呢度15分鐘就完事
之後就係去台場既日本科學未來館
因為佢地想睇啲日本科技野
今次就去JR涉谷駅搭埼京線
大部分班次會同臨海線直通運轉
係東京テレポート駅落就得
呢度一出站就係VenusFort
之後沿著個公園行就會到DiverCity


第一次黎既時候就見到元祖高達
但係今次黎撞正真空期
元祖高達拆左但Unicorn未砌
所以冇野睇




係車站經DiverCity行去未來館都要20分鐘
不過全程都係行公園，都幾舒服
如果唔想行咁遠仲有另一個方法
就搭台場另一條鐵路線 - ゆりかもめ線
搭幾分鐘去テレコムセンター駅行5分鐘就到
不過咁短路程收我200yen車費我就唔搭喇


叫得做日本科學未來館
裡面既主題都係圍繞住日本科學既發展同對未來既實踐
當中世界知名既就係機械人同太空科技
早於1970年日本已經開始研究機械人
不過就只係行啲簡單Program俾佢跟住郁
時至今日發展到有埋Automation同AI System
除左行得走得，仲識聽識講識答
有一個展區剩係留空一條罅俾你望入去
入面坐住一個得閒會講下野既機械人
最恐佈係佢講野有表情，仲要極度真實
如果啲皮整得再好啲眼神再銳利啲
基本上你都唔覺佢係機械人



日本公司整既零件全世界都知佢高質
好多火箭引擎既核心組件都係產自日本
係少有既地方可以做到自主研發製而唔駛靠入口
我冇針對任何國家，唔好拉我


未來館個設計好前衛
上層去下層既通道係一個弧形既道道
中間吊左個地球係度
有時會show時間有時就會show地球全貌

關西會好啲
東京啲名店好多都好細間
如果要咁多人一齊食又要食到好野就真係難

行完未來館就行番去Divercity
啲女人未黎到，我地就行下呢個男士唯一既樂土
就係Gundam
地下有Gundam Cafe，商場有Gundam Front
入面都幾多限量版
不過我唔得閒砌所以就冇買到



好快啲女士就黎齊哂
就去左商場入面個美食廣場食晚飯
因為易搵位又乜都有得食
我就食はなまるうどん
呢間野係吉野家集團其中一個品牌，專食烏冬
叫餐方法同香港既丸龜一樣
同廚房講要乜野烏冬，之後自己夾野，最後俾錢
如果以味道同質素我覺得好過丸龜



家姐就食久臨既沾麵
佢話幾好食，但係鹹得滯
沾麵係鹹啲架啦


老母識貨，食金子半之助既天丼
之前我都食過，確實幾好食
天婦羅用麻油炸，好香口好脆
自此佢就愛上日本既美食廣場
點解唔係愛上間舖
旅行緊仲問我之後仲有冇得去美食廣場
今次行程所限就冇，之後輕井澤終於帶到佢去
番到香港都剩係記得美食廣場好正
啲fd問佢有乜野好食，佢都係答美食廣場
姐：媽，美食廣場啲野好cheap架咋


之後就係女士們既行街時間
我地啲男士都係跟住佢地
不過呢度都幾多位坐
所以老豆佢地都可以坐低等
佢地行左2個鐘終於買完野
今次就搭ゆりかもめ線返酒店
呢條線起點係新橋
經汐留，彩虹大橋，台場
終點係豐洲，姐係築地市場搬去嗰度
我地行去台場駅上車，中間個view都幾靚
彩虹大橋+東京鐵塔夜景


富士電視台大樓夜晚都有燈光匯演
啲窗會有唔同顏色咁閃閃下
有時又會好似走馬燈咁郁，都幾特別



台場駅返酒店好快，唔駛15分鐘
係汐留駅一出站行30秒就已經係我地酒店

Day 3
以下抒情長文

呢日行程都幾趕下
所以我預8點就要出發
但早餐都係要食既


今日第一站係去江之島
位於神奈川縣既湘南地區，鐵路交通好發達
私鐵黎講去新宿搭小田急可以去到片瀬江ノ島駅
係離江之島最近既站，5分鐘就行到
不過小田急本身又係同其他路線直通運轉又唔同總站
都幾容易上錯車，去左小田原就大件事
我地住汐留，近新橋駅，搭JR會好啲
不過就唔可以直達，點都要轉一次車

新橋駅搭JR極度方便
除左新幹線同特急唔停之外
其他列車路線都係必停站
酒店又冇上野同品川咁貴
東京站就更加唔駛提
之前住first cabin都差唔多300蚊晚
係呢度去湘南地區有3條線去到
分別係京浜東北線，横須賀線同東海道線
但東海道線停最少站最快到
大家都一樣錢，梗係搭快啲嗰架啦

日本同香港既繁忙時間差唔多，都係9點前
啲人都係由周邊城市搭車去市區返工
日本有個名詞叫做通勤，就係指呢樣野
除非想體驗社畜既一天或者好似我咁趕行程
如果唔係係呢段時間搭車係攞苦黎辛
我地8點幾到站，上到月台就知瀨野
個月台唔係好闊，但係企滿哂人
排隊既人大約係大圍站朝早繁忙時間既幾倍
有車黎到落左一批客，都唔覺架車少左人
排隊啲人好似屍殺列車咁死都要上到架車
啲駅員又真係會幫手推你入車箱推到閂到車門為止
本人對於咁盡責既駅員同咁想返工既打工仔表示敬佩
如果8個人想一齊係同一條隊上哂，基本上係冇乜可能
於是我同各位團友宣佈解散
：記住大船駅落車，上到車就上左先，不見不散
之後就兄弟爬山各自排唔同隊努力逼上車

等左2班車我終於成功上到車唔係買樓
可能日本人對於Rugby比較熟悉
啲人落車之後我都未開始行
就已經俾後面啲人由月台頂左入車箱中間
係橫濱之前既站基本上我個人係冇企直過
因為真係逼到我成個人拗腰打側左咁企
想知我點企可以google"ナナナ"
然後得1隻手揸住拗腰方向既吊吊揈吊環
靠住手臂既力頂住等自己唔好成個訓低
不得不提日本火車啲吊環同體操嗰啲差唔多
唔怪得日本體操隊咁勁啦

湘南地區係東京地區其中一個後花園
因為呢度擁有好長既海岸線同沙灘
搭JR或者小田急係東京地區過黎都係1個鐘就到
一到夏天就會勁多人過黎沙灘玩
其中一套我最喜愛既日綜月曜から夜ふかし
前幾年好鍾意去嗰度訪問沙灘啲人
嗰度充滿住外形古怪同舉止異常既人
大部分都係想溝靚女既柒頭同想溝靚仔既八婆
氣氛十分淫亂，搞到當地個朵臭哂

多人去就自然會有Pass
JR有一張鎌倉／江之島通票
係湘南地區既JR站售票機就買到
除左包江之島周邊JR任搭之外
即係藤沢駅 - 大船駅 - 鎌倉駅
仲任搭江之島電鐵同湘南單軌電車全線
張飛人人都買得，買票當日有效

不過張飛2020年頭之後就冇再出
可能因為好多人買小田急嗰張江之島─鎌倉周遊券
除左藤沢駅-片瀬江ノ島駅同埋江之島電鐵任搭之外
仲包埋東京-藤沢駅來回小田急普通列車，係幾抵
但係我地陣間去橫濱唔啱路所以用唔到

我揀大船駅落車有個好大既原因
就係有唔同既交通工具滿足我
呢度可以搭湘南單軌電車去江之島
行完江之島之後就搭江之島電鐵去鎌倉駅
全程張Pass包哂1蚊都唔駛俾
單軌電車站係大船駅西口附近，好快行到


呢個單軌列車最大既特色係用懸掛式
其實就姐係海洋公園啲纜車咁
但唔係用鋼索而係固定左
係湘南地區多山同地面缺少空間既情況下
橋墩可以唔駛起咁大，但做到鐵路既效果
但壞處就同海洋公園架纜車一樣
一大風或者少人坐既時候就會吊吊揈
再配合埋路線成日又上又落啲山坡
坐起上黎好似坐緊過山車咁好過癮



車程好短，15分鐘就到總站湘南江の島駅


出左站向南行會經過江之島電鐵江ノ島駅
站出面條欄杆好出名，上面有4隻雀
唔同時期過去會有人幫佢地著唔同既衫
不過都係唔夠天笠鼠車車咁得意



天氣唔錯

如果唔想迫餐死，可以加錢坐JR 頭等車廂（green car)

我試過8am係上野上JR坐去大船，就係加錢坐JR頭等車廂

見上年開始部份地區嘅交通pass 都無再出
希望只係因為疫情關係所以廢事出啦

單軌好似幾正
不過住東京嘅話應該都係揀小田急去藤澤出發算

湘南單軌電車好正，去開嗰頭一定要坐

仲係第4日

嗰時太天真以為東京好似香港咁
新界出港島多人返轉頭冇人
但我忘記左橫濱都係好多人返工

我都check過呢期啲pass冇哂

第一次去江之島梗係想搭多啲交通公具啦
如果之後再去應該就揀小田急

江之島係一個島，有條橋連埋陸地
所以自駕既朋友揸黎呢度都好方便
係湘南江の島駅行到去個島大約15分鐘



呢度離富士山大約70km
但因為呢頭冇乜高樓大廈同建築
如果天氣好既話
係條橋向右望會見到富士山
今次好好彩見到個山頂
冬天少啲水汽會清楚啲


去江之島橋既出口就係好窄既參道
左右都有唔少舖頭，多數都係賣野食


其中一間出名既就係朝日堂既龍蝦仙貝，600yen一塊
係食券機買完交張飛俾個店員就會換到張籌
其實就係普通撥扇冇左撥嗰個位
佢用伊勢龍蝦，加啲粉放上鐵板
之後拎另一塊鐵板壓扁佢，將佢由3D變成2D
因為佢夾扁左，燒完變左成塊地板咁大塊
至於味道就冇乜特別，就係四洲蝦片咁既味
中間龍蝦個位就硬少少，但都幾香口
肉就唔係好食到，可能因為燒到硬左
第一次黎可以試下打個卡



參道最尾就係江島神社
供奉宗像三女神，保佑海上交通安全
江島神社同廣島既嚴島神社有淵源
姐係日本三景之一嗰個海上鳥居
大家都係拜同一個神

江之島唔係一個平地既島
成個島都充滿住梯級要走上走落
呢度沿山起左幾條向上既扶手電梯
如果唔想行幾百級樓樣上去可以搭
不過係要收錢既
可以買張套票包足全程又得
唔係上到頂既都可以逐段買又得
另外因為上面觀景台庭園同岩屋都係要收人場費
佢就出左張Pass賣1000yen，平左500幾yen
包哂呢3個景點加所有扶手電梯
係江島神社隔離第一段電梯售票處有售
我見到前面有班紅帽子同胞旅行團個領隊唔買Pass
叫啲團友一齊行樓梯


可能因為去過明治神宮同伏見稻荷大社
江島神社入面啲宮冇乜特別
所以就冇影到相
嗰度有個觀景台望番逗子市，但冇乜特別


之後就行到去個花園，拎張Pass出黎就入得
如果冇買Pass但剩係想去觀景台，你永遠不會成功
因為個觀景台係個花園入面，要硬食花園入場券
如果計埋扶手電梯費其實已經貴過張Pass
入面有啲花咁，但範圍好細好難影



呢度特別有祖國贈送既傳統涼亭一個
因為呢度係偉大既國歌作曲家聶耳既遇難之地
當年日本成功建立滿洲國政權，打緊入中原
國民黨大佬蔣中正提出安內攘外
簡單黎講就係勦清國內既共匪
因為驚打仗既時候佢地幫日本人
乘機打遊擊奪取政權
聶耳秘密入黨本身冇人知
但之後佢同共產黨既人越行越密
黨員田漢係俾人拉之前交低左風雲兒女既主題曲俾佢作曲
作完曲佢驚自己瀨野，於是諗住經日本去蘇聯避風頭
點解係經當年中華民國既敵人日本呢？
不過佢就係呢度附近既海邊遊水遇溺身亡
死後有好心人幫佢設立紀念碑
深受中國人民感動，為中日友好釋出善意
於是係1981年同聶耳既鄉下昆明締結友好城市

江之島風景真係一般般

之後就黎到江之島觀景台
因為形狀似蠟燭，所以又叫做Sea Candle




觀景台有2層，搭電梯到嗰層係有玻璃既
行樓梯上多一層就係露天既
不過奉勸一句，真係好大風，吹到頭都甩咁滯
今日天氣麻麻地，望出去湘南海濱唔係特別靚
相中間遠處有一幢特別高既建築物
係Google Map計過角度
疑似係20km外既日本第二高廈橫濱地標大廈


向南望就係相模灣同太平洋
一望無際咁又係冇野睇
如果好天海水藍啲應該會靚啲


下面就係頭先行過嗰個花園


長輩們最鍾意呢啲風景野
所以賴死係度影唔停
家姐話冇野睇，想去下面影花花
所以我就陪佢落下面
今次就唔搭電梯，行樓梯
佢係外面螺旋形沿住中心咁轉
行落去個感覺就好似大河道條天橋咁
一大風就會吹到條樓梯震震地咁好恐佈

番外篇 - 江之島岩屋
今次長輩遊去完觀景台就離開江之島
但其實仲有個岩屋冇去，Pass都有包
不過實在要行太多梯級，免得佢地辛苦
仲有唔計岩屋入場費張Pass都仲係平過分開買

去岩屋既路好輕鬆，因為全部都係落樓梯
所以行番轉頭係會想死






岩屋入面分開左2條路
行其中一邊因為好少燈，所以好黑
雖然唔係完全睇唔到，但佢會借盞燈俾你照明
相機係完全影唔到入面


另一條路就係沿海邊去第二個岩洞
嗰個就光啲，唔駛用電筒
中間可以望下浪，好似睇緊東映片頭咁
但其實2個洞我都唔知自己睇左乜



第二個岩洞出面有條簡陋既小路
可以俾你行出去岸邊
通常都係啲阿叔係度釣魚
同埋好似我呢啲遊客望下阿叔做緊乜




結論：唔去都得

張保仔洞？

唔去都得

江之島扶手電梯剩係得向上
回程離開都係要靠番條樓梯
行番落頭先神社隔離個觀景台
而家天氣先至好番，屌


長輩們就去頭先參道買手信
我就去橋口屌番個波子汽水味雪糕
都幾滑口，係個顏色奇怪啲咁解


佢地買完哂野就離開江之島
今次就搭江之島電鐵
姐係之前講過有4隻雀既欄杆嗰度
江ノ島電鉄2000形


江之島電鐵由藤沢駅去到鎌倉駅
今次就由江ノ島駅搭去鎌倉駅
不過因為全段路都係單線
得幾個站有雙月台待避線
所以班次都唔係好密，大約1個鐘5班車



中間有段路係沿海而建
可以睇到好靚既湘南海濱

天氣唔好去江之島真係幾慘
景色差咁遠

番外篇 - 鎌倉高校前

本身湘南海岸同一般既海灘一樣
都係假期時候走過黎曬下太陽玩下水咁
同香港既淺水灣石澳差唔多
但一套動畫令呢個地方變得唔一樣
仲令其中一個無人站爆紅上黎
成為全世界動漫迷既朝聖之地
呢套動畫就係差唔多30年前首播既男兒當入樽
櫻木花道係江之島電鐵平交道等過馬路
列車經過後見到迎面既赤木晴子同佢打招呼
赤木晴子：離さない 揺るがない
櫻木花道：Crazy for you
動畫OP既呢一幕就係取自鐮倉高校前駅附近

江ノ島駅搭2個站就會到鎌倉高校前駅
如果係路痴或者係唔識字既朋友
架車轉完個大彎見到海濱既第一個站就係
第一次黎就梗係要過黎呢度打卡啦
呢次同長輩們黎就唔去了，悶死佢地
一落車個view當然係十分之靚
個站離個海好近，車路同路軌都係沿海岸線咁起


鎌倉高校前駅得單邊月台
去鎌倉駅方向或者藤沢駅方向都係嗰度上車
所以要注意列車方向同車頭寫既總站
影個站要小心，因為站後面就係一堆墓碑



係個站行前少少就係OP出現嗰個平交道
呢度係赤木晴子既視角


呢度就係OP既視角，望出海邊
OP入面係平交道出現嗰架列車真係江ノ電黎既
你睇下個顏色係一模一樣
我後面大約聚埋超過20個人為左影列車經過呢一幕




因為啲車都幾唔密
列車經過之後都會見到一堆人衝番去上車


我就唔急，啲人上左車再慢慢影下相
係個站向西望可以望番去江之島
如果天氣再好啲都可以睇到富士山
SeaCandle遠睇都幾似蠟燭


呢個站因為靚景同動漫聖地
所以列入關東車站百選

番外篇 - 鶴岡八幡宮

去完鎌倉高校前之後就一炮過搭去鎌倉駅
本身諗住行下小町通就算
點知見到應該係修學旅行既學生們
於是就跟左佢地行到尾
就去左一個隱藏既景點 - 鶴岡八幡宮
其實我過黎昅女架姐



有咁多學生妹係度姐係代表呢度係文化歷史景點
鎌倉確實就係一個歷史上留名既地方
源家作為武將，信奉八幡呢個戰神
設立日本第一個幕府之後
就將八幡由京都遷移到鎌倉呢個根據地
就係而家既鶴岡八幡宮
其實我過黎昅女架姐




因為我冇做過research就走左黎呢度
所以當時完全唔知原來有個國寶館
結論：好多女

女女圖

講番今次跳板之旅
本來想帶佢地去高徳院睇鎌倉大佛
但係我地係江之島既行程delay左
本身plan係嗰度食吻仔魚飯佢地又唔啱
如果去埋大佛就會冇飯食+去唔切橫濱
所以就變成直接去鎌倉駅搵食


江之島電鐵個出口同JR連埋但係隔住入閘機
如果就咁買江之島電鐵單程飛既話
就只可以出番佢唯一一個出口，姐係JR西口
行番去鬧市既JR東口就要行個大圈行隧道過去
而我地嗰張鎌倉／江之島通票係兩者通用
所以可以直接入閘出番東口


日本啲車站好多都會有紀念印
JR或者有錢既私鐵除左有個standard印之外
有時有啲品牌合作活動都會出限定印
除左俾人留念之外仲吸引啲人過黎制霸
JR東日本就出左個喪心病狂既Pokemon限定企劃
暑假1個月內儲東京周邊55個站限定印
我獨遊嗰陣都經常係個站度搵印
不過鎌倉呢度就比較溫和少少，每個月唔同印
本地人就話姐，遊客要儲齊咪最少要黎6次


係鎌倉駅西口隔離就係小町通リ
基本上就係一條商店街，乜都有
Style上有少少似竹下通，但係冇咁潮
呢啲行街地方又無理由集體行動
於是我又解散大家，想食飯就食飯行街就行街
今次姑姐一家就自己行，應該就自己搵埋飯食
仲好啦，4個人易搵位好多




行左半個鐘咁上下正當諗住搵野食既時候
姑姐們whatsapp我地話佢地搵唔到野食
咁多野食都話唔啱食
咁好啦，又係去Google Map搜尋餐廳既時候
我嗰陣都唔係太識日文，唔想去啲要開口落單既餐廳
所以都係諗住搵下快餐店，點知就係哂大船嗰邊
橫掂張Pass都包埋呢程，就搭JR過去
結果都係揀左はなまるうどん黎食
不過長輩們話好啱佢地食，讚不絕口
其實駛乜食咁貴，佢地咁樣已經好滿足