[帶住班人自由行]9日關東關西跳板之旅

樓主成家去應該有唔少笑料

有無偷偷望日本妹先

我都估內陸機

入到酒店，姑姐一家已經坐係大堂啲梳化等緊我地
我地係reception放低行李就出發
嗰陣係當地時間朝早6點半，咁早去邊度？
當然就係東京清晨必去景點 - 築地市埸
係酒店樓下既汐留駅搭大江戶線，1個站就到
不過時間太早，啲班次極疏，下班等成10分鐘
所以我地決定行過去，都係15分鐘咁上下
：當晨運都OK呀
：遠唔遠架，老豆好眼訓
：行啦，唔行你仲眼訓呀

首先帶佢地行左場內市場先
呢度係成個築地市場既核心區
除左係全世界規模最大既漁市場之外
仲係一個綜合批發市場
除左海鮮之外仲有生果，乾貨，廚具批發等等
勁多小型起重車係度穿穿插插，都幾危險

另外唔少壽司店都開左係呢度
因為食材新鮮，又唔駛運黎運去
直接係度買完貨拎返舖頭就做得生意
其中一間俾Blogger捧到上天既壽司大就係呢度
但因為黎到已經7點，條龍已經超過50人
啲人轉場食其他舖，都搞到周圍排哂隊
但就算你最早班機過到黎6點都係要等位
呢度已經係2018年尾搬左去豐洲
大部分舖頭都有搬到過去，環境好左
位置近台場，搭海鷗線去市場前駅就得





因為一早同哂全部人打定底講冇可能食到壽司
：如果要食你地自己朝早4點起身行過去食
本身佢地都懷疑係咪真係多人到咁
但事實擺在眼前，佢地都唯有放棄排隊
之後我地就行番出去場外市場
姐係核心既外圍
呢堆舖頭就冇同場內市場一齊搬去豐洲市場
所以通番關過到去都仲會係番度
有冇執笠我就唔係太清楚
但好肯定少過場內市場未搬嗰時


呢度我就放大家自由活動1個鐘
我好貼心咁印左個行程表俾每個團友
有列出呢度推薦既舖頭
可以跟住個list食又得
望到啱食去食又得，得左
姑姐一家就自己行
老豆老母當然跟住我同家姐啦
我地去左山長食左串玉子
多汁得黎又香甜，都係100yen，抵到爛
呢度仲可以買一底玉子燒做手信
成條免切叉燒咁長可以番香港奶
不過因為實在太多汁既關係
唔建議放隔夜，夏天一定好易變壞


因為我同家姐都黎過
所以帶住父母兜左1個圈就算
佢地都睇唔啱買乜，剩係樣樣都話好貴
之後搵下姑姐佢地去左邊
原來去左井上食拉麵
不過睇番Tabelog間野好似已經執柒左
呢間野超多人排隊，包括外國人同本地人
你估好似香港人去明將排隊食屎咩
老母托排緊隊既姑丈要多2碗
我地就幫手去佢舖面前面霸枱(其實係立食)
碗野黎到我就係老母嗰碗M左一啖黎試
正常既醬油豬骨湯底，口味偏淡
麵就麻麻，係公仔麵嗰種質地
叉燒就唔好講，雖然大塊但係鞋
但佢地話個拉麵好好食，仲好食過香港嗰啲
唔知係咪我食得好野多所以高要求得滯
我心諗，去到大阪你地咪發癲

番外篇 - 築地本願寺

第一次黎東京得2個人，梗係行多好多野
其中一度就係築地本願寺
可能你地會覺得奇怪
呢個唔係佛寺黎架咩？點解咁西既
其實個寺原本係傳統既木造建築
就好似本山京都西本願寺咁 (自己Google睇)
但大正年間既關東大地震就火災燒清光
個主持搵左佢個fd東大工學部教授伊東忠太設計
於是起左一個充滿古印度寺廟風格既建築
要知道佛教其實係係印度起源
傳到中原經過一段時間演化先傳到日本
印度風反而比傳統木製更加接近傳統
不得不佩服日本人思考領域

上兩次去築地
我都係銀座酒店行過去，好過坐車轉上轉落

I lined for fifteen minutes outside the Ramen restaurant in Tokyo.

睇見壽司好想食

食完拉麵就去淺草
又係另一個第一次黎東京必去既景點
搭地鐵去浅草駅就得，銀座線同淺草線都去到
上次已經試過行去東銀座駅搭淺草線
今次就去左日比谷線築地駅
Google Map會教你搭去上野駅轉銀座線
但嗰度係閘外轉乘，好似尖東站同尖沙咀站咁
費事自己唔識搞到扣多左1程錢
所以穩陣起見都係閘內轉乘
就係搭去銀座駅轉銀座線去浅草駅
地鐵口一行上去就係
不過明明只係9點半，點解會多人到咁...


淺草最著名既就係淺草寺
包括寺前面既表參道仲見世商店街
同埋掛住個超大紅燈籠既雷門
個個都霸住呢個位影大合照
出面仲有好多黑黑實實大隻佬拉客
唔係sell你做gym，而係拉人力車兜下附近
但價錢唔係一般人負擔得起，不了





仲見世商店街同一般表參道一樣
都係做遊客生意賣下啲特色手信
好似印左景點既T-shirt，鎖匙扣同筷子等等
外國遊客對呢啲野好著迷，一買買一大堆
見到有幾個買完啲T-shirt
即刻著上身以顯示自己對日本既愛


一群人係啲咁迫既地方行真係行唔到
所以我又放大家自由活動時間
今次老豆老母跟佢地行，我同家姐就自己行
唔駛睇住佢地，舒服哂
淺草同東京晴空塔只係隔左條隅田川
所以呢度向東望可以好輕易望到佢



淺草寺建於公元七世紀，係供奉觀音
係二戰末期既東京大空襲
盟軍係東京唔同地方投下燃燒彈
淺草作為重點攻擊地帶
燃燒彈將成個區接近燒清光，包括呢度
而家睇到既樣全部都係二戰後重建
而家係鋼筋水泥興建，好實淨


1個鐘頭後集合之後就去左雷門對面
外觀好奇怪既淺草文化觀光中心
頂層有觀景台俯視淺草景色
不過就唔係好高，睇唔到朝日集團大樓
姐係係Skytree隔離屋頂有個叱咤903咁既火
不過係金色既

我地加埋有成8個人
好多市區既食店都裝唔到咁多人
分開2家人食又好似好衰咁
主要係驚佢地唔識講唔識叫
所以我都盡量揀一開門就入去食
或者過哂食飯時間先去食
睇過我其他遊記既人應該都好清楚
我係好少會走去食啲好貴既野
今次都唔例外，就係食性價比極高既鰻魚飯
就係而家係香港都有開既宇奈とと
香港貴勁多，不了

11點一開門我地就衝入去，嚇死個店員
因為呢個人數已經係旅行團既數量
好少會黎呢啲舖頭食飯
間舖得20個位，我地坐左佢一半
Menu好簡單，剩係得鰻魚
全部都係即場炭燒，仲係望住佢燒
1碗1塊鰻魚飯只係500yen，2塊1000yen
仲會送一碗肝吸い
鰻魚既製法係關西風，姐係劏完之後
串起佢塗上醬料之後直接燒
呢個整法係最香口，魚油都會比較多
佢都有番咁上下厚，食落好滿足
不過就略嫌唔夠汁，撈唔到飯
肝吸い姐係鰻魚肝清湯
同鰻魚飯一齊食可以解滯
其他人評語：
：好似食到有啲幼骨，麻麻地
：唔係呀，不知幾好食，咁平
：媽，好食同平唔係同一樣野黎架
：(500yen係咁上下啦，又唔係唔好食)

樓主連出2篇 寫得咁快
唔洗返工，wfh？

樓主淺草都影到咁多張相，勁呀

番外篇 - 東京晴空塔

淺草呢度交通方便
除左地鐵之外，仲有2條私鐵
所以作為行程中轉站係個好地方
上一次去左淺草之後就去左東京晴空塔
有2條路線可以去到，都係5分鐘就到
1. 地鐵淺草線 浅草駅 -> 押上駅
2. 東武伊勢崎線 浅草駅 -> とうきょうスカイツリー駅
我揀左2，除左車費平啲之外仲冇咁易搭錯車
嗰陣對於"直通運轉"同"特急"呢類詞語有戒心
淺草線之前講過有京急京成電鐵直通運轉
怕上錯左車唔知去左邊有車長黎查飛要罰錢
點知回程搭地鐵冇留意到真係搭中左飛站車
驚到下一站淺草站落車等番架正常車



日本係21世紀正式向數碼電視發展
而家仲有4K 8K台測試
而高清電視既頻寬比舊有既類比訊號高
容易受到高度同密集限制引致訊號減弱
隨住東京啲樓起得越黎越高越黎越密
作為市區發射站既東京鐵塔矮得滯
令到市區好多地方都難以收到訊號
所以唔同電視台聯手想起個新電視塔
仲要高到可以覆蓋關東大部分地區
於是東武就聯同佢地係舊貨物站空地興建新電視塔

作為全球最高塔同第二高建築物
係日本呢個頻繁地震帶起到出黎都算係奇蹟
我地就冇上到去觀景台，因為嗰日啲霧都幾重
費事上到去乜野都睇唔到又浪費錢
所以就係下面影相就算
呢張彎腰影

呢張趴係地影


有人講過個塔好似有一邊特別斜咁
月曜から夜ふかし問過專家同驗證過呢樣野
其實因為個塔底係三角形
延伸向上收窄變圓撐住個塔
如果唔係對正個角望過去，就會產生錯覺
以為有一邊直啲有一邊斜啲咁
如果個塔唔係對稱就好易冧


塔底係商場，但其實同台場嗰啲差唔多
所以今次唔帶佢地去喇，去第二度好過

feel到交通魔童陣味

江之島去多幾次都ok

江之島係幾正既
不過而家多人識搞到成日好多人
而家識路就會去遠啲，好似天橋立嗰啲
橫濱去完就真係屌出聲
上網講到好值得去但原來冇野睇

淺草去skytree竟然唔係行路

但樓主上左淺草線快特就驚到要落車
要去到果個境界仲有D距離

另外上野轉線係唔會計新一程既
https://www.tokyometro.jp/ticket/guide/transfertime/index.html

好多電影電視劇去江之島取景
宜家變晒fans打卡位

試過非假期上午9點幾去到冮之島
好少人好舒服

想知橫濱伏係邊
plan左舊年去東京有日夜晚去，但武肺取消左