[帶住班人自由行]9日關東關西跳板之旅

姬路以前係令制國播磨國既首府
早於日本戰國時期100年前既13世紀中葉
播磨國既坐館赤松家就係呢度既小山丘上面築城
因為個山叫姬山，所以叫做姬山城 (第一代城)
係之後200年間呢度都由赤松家或者佢頭馬啲家族做城主
到秀吉接手左個城就再將內城改建
改埋名叫姬路城 (第二代城)，大約就係而家內城既規模

過多20年關原之戰後，大局已定
德川家統一天下，豐臣勢力逐漸收皮
德川家康既女婿池田輝政分封左過黎姬路
因為皇親國戚同戰功唔錯而令佢分封到52萬石
以單一大名黎計算係數一數二多
石呢樣野文獻上有好多計法
一般係指糧食出產量或者兵力
石越多代表國家越富足勢力越大
可能因為有錢得滯，佢開始大規模改建姬路城
將天守由三層改建成六層
姐係你而家見到既姬路城木造天守 (第三代城)
然後再擴建個城池形成螺旋型佈局
分為內城中城外城，總面積超過2平方公里
而家得番護城河入面嗰忽內城冇拆到
姬路駅去到護城河就係以前外城既部分


入場費方面姬路城係1000yen
如果去埋旁邊既好古園都係1050yen
咁梗係去埋啦


姬路城既內城保持得好好
佈局幾乎同池田當年設計既一樣
裡面啲路又好曲折又多掘頭路
入侵者好難搵到正確既路去到天守
平時睇古裝劇打仗場面，啲攻城武器通常都大大舊
攻城既話一係搵幾條友拎碌大木助跑撞開道城門
一係就拎火炮射爆道城門，但呢度就用唔到
因為碌木太長碌炮太大既話會轉唔到彎入唔到城
就算入侵者轉用火攻都冇乜用
因為姬路城天守同城牆都上左層自色既防火物料
自建成以黎呢度都冇大型既火災紀錄就知佢幾堅
接近天守既石垣又高又直，基本上爬唔到上去
但天守入面啲人又好清楚知道入侵者既路向作出對策
所以呢個城既防守力都係相當充足




除左用於防守既建設之外，進攻既都唔少
姬路城係建係小山丘上，天守就係山頂
上天守既路就之字型咁起到好似迷宮咁
而迷宮既牆就有好多唔同形狀既細洞
其實就用黎放暗箭同暗槍
因為係高處做Sniper，所以好易射中目標
啲人射中就會訓低阻住後面啲人
啲路又窄又暗斜又曲折
想行前又阻住，想退後後面又唔知仲向緊前行
一混亂好快變人踩人
下面啲人想反擊又好難瞄準咁多個細洞
所以可以拖慢敵人進攻速度

推返上去

やよい軒 味道如何 ？

有一年去左姬路城睇櫻花真係幾靚

我覺得唔錯 幾好食

正，下次可以試吓佢哋嘅日式早餐

當年我去姬路城上到天守就落狗屎

やよい軒既家常菜係唔錯
去個long trip發覺冇點食過菜既話
我會叫個炒雜菜定食，味道唔錯
不過炸野既話松乃家會好食啲

留名等睇古苑

越接近天守條路越黎越難行
點解咁講呢，睇睇呢幅姬路城內城3D圖
紅色橙色線就係正常既攻城路線
爬石垣係最快，不過有冇命到就唔清楚
紅色線路段離天守比較遠
而姬路城底座係姬山，大約45m高
敵人由低向高既遠程攻擊比較難奏效
然後橙色線路段大部分都係上山
啲路窄多彎多樓梯，完全好似迷宮咁兜黎兜去
明明個城就係面前但行極都去唔到
城主基本上重兵佈防係天守以西既高處就足夠
啲敵人行到黎當靶咁射就得


實地現況圖就係咁
有窿既地方都可以放暗器
未上到去都應該變箭豬


呢個路段間中經過啲L形既小城樓
城門既高度就連糖妹小儀都要烏低身先過到
假如有人係暗角放箭射鳩你都絕對睇唔到
不過我唔排除以前日本人矮到咁既可能性
啲城牆都唔係亂咁起，互相都有高低差
個高低差又唔至於少到可以俾人爬上去



天守最底嗰幾層有好多細窗
同牆洞一樣都係做遠程攻擊
而好多向下既窿就係用黎打近身戰
士兵會係度掟石倒滾油放火
令到入侵者唔可以接近天守爬梯勾繩上去
之前去過大阪城都有呢個設計


因為啲暗斜同樓梯對於長輩們都係個考驗
由大手門計起我地行左45分鐘先行到過黎天守邊
姬路城係木造建築
為左防止你啲鞋踩爛個地下同保護文物
去到天守門口工作人員就會叫你除鞋
之後俾個膠袋你裝住抽住黎行
所以去呢啲城最好就著番對襪
踩到突出既釘位同木刺都冇咁痛
係天守閣1樓望出去環境已經極度開揚
左邊起緊樓嗰度就係姬路Daiwa Roynet酒店個工地
獨遊關西同埋帶住父母去旅行都住嗰度
2018年尾先起好，所以都幾新淨


去天守閣每一層既樓梯都係咁既款
又窄又高，膝頭差啲都行唔到上去
而啲木板已經俾人行到平滑哂，唔扶實好易仆街


姬路城既屋脊有隻魚狀物體既守護神
其實大部分天守閣都有
嗰隻野唔係新加坡嗰隻魚尾獅
真正個名就叫做鯱，姐係魚尾虎
寓意失火既時候會噴水救火



係天守西南面望過去就係咁
個迷宮一目了然，全部睇到哂


再堅實既城牆都有被打爆既一日
天守每一層既牆上面都有位放架生
方便有敵人攻到上黎既時候打佢老母
而日本作為忍者既國度，暗器機關最拿手
窗邊，樓梯底，柱邊附近有唔少窿
叫做武者隠し，睇名就知係用黎匿埋士兵
有人殺上黎既時候先彈出黎攻其不備

姫路城既高度係歷代天守閣中排第六
但係頭五位唔係燒左炸左就係廢城令拆左
而家就排第三，係大阪城同名古屋城後面
但係嗰兩個城都係用鋼筋水泥重建
除左有冷氣嘆有𨋢搭就冇乜特別
呢度就係建成以黎就冇更改結構
真係完全用木搭成，勁好多
呢個模型用1:20比例重現姫路城真實結構
大部分都係平行既長木搭建成
內部靠貫穿天守六層既東大柱同西大柱支撐大部分結構
只有城既邊角用斜角支撐
望落好似好流咁，其實十分實淨
1995年神戶發生7.3級大地震
離震央40km既姫路市錄得4級地震
但姫路城絲毫無損，除左平時保養得宜之外
榫卯同木結構都好重要
容許個城每個接駁位有少幅度變形吸收震蕩
先令到個城400年不倒



係個城入面都行左半個鐘就行番出黎
頭先入去就係行迷宮入
出就係天守前既備前丸廣場出
頭先參觀既係右邊既姬路城大天守
左邊仲有兩個向西矮啲既細天守
後面向東仲有一個，總共有三個
大天守有通道可以通到過去
除左防禦用途之外仲用黎儲糧同兵器
係西邊過黎既敵軍攻擊基本上傷唔到大天守分毫




姫路城既正面望落冇側面咁霸氣


行番落去會見到一個好特別既井 - お菊井戶
相傳第十代城主小寺則職既家臣青山鐵山想篡位
有一個忠臣派左佢妾待阿菊去青山家做侍女打探
但青山成功奪位，仲搵到阿菊係臥底
屈佢偷左青山家傳家之寶十隻碟既其中一隻
於是就折磨死佢，條屍掟左落井
從此有守衛夜晚行過井附近就會聽到
「一隻...兩隻......九隻...一隻...」無限loop
好多人唔知頭唔知路掟銀仔落個井度
小心夜晚有野搵佢地


行過少少就睇到姫路城唔同時期既鯱
明治時代嗰個手工好精細
魚鱗雕得好有層次，見到係一塊一塊咁
虎頭同魚身明顯，都叫做睇到係乜
昭和時代嗰個就有啲失色
先不論啲魚鱗是旦刻個U字就算
個魚頭俾佢搞到成個舞獅啲龍頭咁
平成時代簡直慘不忍睹
雖然沿用昭和時代設計
但線條更加簡單，好似用機整出黎咁
魚鱗都係U字，但唔夠密，搞到好核突
話就話掛係高處遠望睇唔到既
但係你擺得出黎見到咁大對比
現代人交唔足貨囉

明治果條靚咁多

本身預姫路城都係類似維園咁
係個有天守既大公園，3個鐘點都行得哂
仲諗住12點幾行完就搭鐵去神户食神户牛
避過哂繁忙時間可以唔駛等咁耐
老豆唔食牛，佢話擺低佢係松屋就得
點知都真係好多野行，行極都行唔完
長輩們好鍾意呢度
乜野角度既天守都影一餐
但既然一場黎到，無理由阻佢地興致啦



行完天守就行去西の丸既化妝櫓
西の丸顧名思義就係姫路城以西
個入口就係上天守條迷宮路另一邊
但因為嗰條路剩係俾單程上山唔俾相反方向行
所以我地要行番落去內城門口再行番過去
呢度都係國寶之一，所以都係要除鞋


櫓其實就指城樓，規模比天守細
通常架設係城牆既角位或者中心點
用黎做哨站，瞭望台同武器庫
渡櫓既渡解作渡過，姐係通道
將櫓拉長成一條通道用途既長屋就係渡櫓
佢比一般城牆好既地方就係有屋頂
係兵力調動既時候防止敵人高空攻擊，減少傷亡
另外渡櫓下方有大量儲藏空間存放武器，方便攻擊

渡櫓同起屋差唔多
如果係用作城外圍既防衛工事就需要額外加固
雖然多用途，但成本比起一般城牆貴好多
姫路城呢度超多渡櫓，短又有長又有
剩係西の丸化妝櫓同相連既渡櫓總長度就超過200m
可見當年池田既財力係幾咁驚人

不過唔打仗既時候櫓會用黎做倉庫同一般房間
西の丸係千姬既地頭，嫁左過黎之後就住左係度
渡櫓比較寬既地方就間做侍女既住所
化妝櫓就係用左千姫化妝既地方


呢度離天守咁遠都做足防禦
難怪冇人想過黎打個城


又係嗰度留多半個鐘，終於行完姫路城
諗住行番去車站附近食飯
姐：細佬，個好古園未去喎
：哦

好古園唔係姫路城內城一部分
要行番出櫻門橋向西行先到佢門口




入到去就有路牌教你點樣行
雖然唔係好大，但都有幾多園景睇




御屋敷之庭入面有個小湖
個湖本身好淺，所以好清楚睇到啲錦鯉
突然間個阿叔拎住支大水喉走黎淋花
嚇走哂啲魚




呢個位望落同栗林公園有啲似





另一邊既淺池就有啲似後樂園


彼岸花

好古園食鰻魚飯好過啦

係好古園行左半個鐘之後終於可以食飯
今次就行左去山陽百貨店上面其中一間洋食屋
不過睇tabelog好似執左
我就叫左個set lunch，有沙律有湯有主食
沙律好新鮮，淋左啲果醋係面
所以食落好fresh，冇芝麻醬咁濃遮哂啲味
湯就係洋蔥湯，望落好似水咁其實係好甜
可能日本人唔鍾意有洋蔥渣掛


主食我就叫左咖哩牛肉蛋包飯
味道幾好，個咖哩汁有少少湯咖哩feel
雖然偏甜，不過撈飯食又唔錯
牛肉就唔硬，不過咁薄就食唔到牛味
不過份量太少，比較適合女仔食



因為真係唔多夠食
所以我同家姐額外叫左個芭菲同pancake
不過兩樣野都普普通通
因為我都唔記得左係乜味



食緊飯既時候同家姐plan之後點算
因為本身plan去神戶食神戶牛，之後行下神戶
最後就返難波完成呢日行程
但而家食完飯都3點，返難波又好似早得滯
佢地又好想去神戶，睇夜景又好似早得滯
Google左一輪就變左而家呢個爛到不得了既行程
姫路 -> 明石海峽大橋 -> 神戶 -> 難波
點解去明石海峽大橋？因為我想去囉

去明石海峽大橋既話JR同私鐵都搭得
搭JR就去舞子駅，搭山陽電鐵就去舞子公園駅
兩個站係連埋一齊，所以就睇邊條線快啲到
JR去舞子駅要搭第二快既快速先停站
快速既話去到某啲站會停係月台耐啲
等後面既新快速超車先會開車
當然你想快就可以搭一段新快速
之後落車去另一個月台轉快速，咁就快少少到
但一黎唔係差太多時間
二黎帶住好多人勁煩唔想搞轉車
而山陽電鐵搭最快既直通特急就到
大家價錢差唔多，又未搭過山陽電鐵
就揀佢黎搭

去睇大橋＝爛行程?

山陽電鉄本線同JR山陽本線係競爭關係
係姫路至大阪兩條線基本上係平排
最遠都係隔幾條街，又有唔少站有得轉乘
就好似舞子駅同舞子公園駅咁
係大家車費差唔多既情況下
如果要爭客就只有鬥快
新幹線開外掛唔算數

因為搭直通特急
唔駛40分鐘就去到40公里外既舞子公園駅
係天橋行過去就見到條橋
黎到已經4點幾，已經準備黃昏
本身諗住去橋の科学館
但係5點收，就算入到場都行唔到啲乜
所以算數




呢條就係明石海峽大橋
係連接本州同淡路島既唯一陸路通道
以前冇橋既時候就只有定期船航行
因為發生過嚴重既沉船事故
所以政府決定採納民眾意見起橋
連接淡路島北面同本州既明石
亦因為呢個海峽超級繁忙
京阪神港口大部分都係靠呢度通行
為左航道暢通同容許大船進出海峽
呢條橋係全世界最長跨度既懸索橋
4公里長既橋只係得2個橋塔
橋面離海平面66m，高過青馬大橋
設計上可以頂到黎克特制8.5級地震
神戶7.3級大地震既時候條橋啱啱駁埋未通車
雖然離震央只係4公里，但都冇斷到
而且仲成功破紀錄，將跨度再拉長1m
足以證明條橋講得出頂得到
雖然鋼材係由造假醜聞既神戶製鋼所出品
但因為呢個project當年係國家級工程
所以物料都係如假包換真財實料既



橋底其中一角有間歐陸風情既別墅
由移日富商吳錦堂所建
佢為革命出心出資出力
曾任同盟會以及國民黨神戶支部部長
1913年，時任中華民國臨時大總統既孫中山訪日
係神戶既宴會就係呢度舉行
為左紀念佢，呢度之後就變左孫文記念館
不過因為太夜所以已經落閘
孫文同日本既淵源都好深
當年革命失敗著草左黎日本都好多年
係呢度籌集左唔少資金貢獻革命事業
仲係呢度結過幾次婚


因為天氣又好，又有啲風吹下
係度坐左成粒鐘睇日落超舒服
不過因為仲要去神戶
所以唯有忍痛離開

新夕陽景點

夕陽無限好

仲要係日本夕陽

推