話說喺Belize嘅San Pedro初嚐浮潛嘅樂趣之後，我哋就由只屬於遊客嘅城市，去到幾乎冇遊客嘅Belize City。呢個地方最出名嘅係靚女。未聽過伯利茲靚女嘅都唔好同我講你鐘意去旅行
不過其實我當時都未聽過，如果唔係相信老婆就唔會同我去了
當時會去Belize City嘅唯一原因，就係唔想走回頭路。
眾所鳩知中美洲堆國家以前同中國都冇邦交，拎住香港特區護照都係入唔到境，嗰陣時喺冇簽證嘅情況下我哋只能由Belize返Mexico。當然隨住中國崛起，呢堆濕鳩國都爭住同中共建交，可能遲吓就全部都免簽了，只係唔知到時香港人仲拎唔拎到護照
當時返去嘅方法有兩個，一係坐返嚟嗰架船，一係就坐去首都Belize City再經陸路走。時間充足嘅我哋就揀咗後者了。
雖然係同一個國家，但Belize City同San Pedro嘅分別，就好似昂坪市集同東涌嘅公屋噉。相比起見慣遊客嘅San Pedro生意佬，Belize City嘅住宿老闆拎住我哋本護照揭嚟揭去，問我哋Hong Kong係咪即係泰國人
到而家都唔敢話比老婆聽，其實我喺嗰間Hostel見到幾隻小強爬嚟爬去。
去到Belize City時夜已深。都冇咩時間周圍探索。其中比較深刻嘅一件事，就係落街幫襯小販買嘢食時比幾個後生嘅黑人圍住，佢哋明明應該係講英文，但口音好重我又唔係好明，總之就有少少不懷好意。當我仲喺度諗緊係想搶錢定做咩嘅時候，又有另一個當地黑人幫我哋鬧走佢哋，叫佢哋唔好噉對遊客。
之後佢哋就動真格打起上嚟
我哋呢啲瘦撚即刻走先，都唔敢留喺條街度，拿拿林返房休息。感覺到呢一度治安麻麻。旅行咗五個月，本來開始對世界少咗戒心，呢一刻又再度謹慎起嚟。之後兩日喺Belize City街頭，都唔敢拎手機同相機出嚟影相。
第二晚我哋冇再幫襯街邊，入咗一間寫住有中餐嘅餐廳。入到去，老闆見我哋膚色，直接用普通話問我哋邊度嚟。知道咗我哋香港人之後，佢仲用廣東話同我哋傾偈。原來老闆兩公婆係台山人，幾乎成世人都係喺度住。佢話因為非常少喺呢度見到香港同中國嘅遊客，所以都好開心，但就特別提醒我哋要小心啲。我見佢櫃台同廚房都上晒鐵欄，好似啲檔舖噉，就問佢哋係咪成日有搶劫。佢就話當然有，不過都慣晒啦。間唔中會有人揸槍入嚟搶嘢，所以一定要閘住。我哋食咗咁耐，都冇見到有第三個人入嚟幫襯。我諗佢哋平時都係拍烏蠅。究竟係咩驅使佢留喺呢度做生意呢？係愛定係責任？
之後嗰日我哋都見到幾間廣東人開嘅舖頭，不外乎係啲士多同餐廳。好多見我哋講中文都會傾多幾句。估計佢哋喺度嘅原因同古巴華人街都大致相似，都係早幾代人嚟咗做苦工之後落地生根。其中有間士多個掌櫃同我哋差唔多大，細個嗰陣仲跟屋企人去過中國讀書。問佢鐘意Belize定中國多啲，佢唔使點諗就答咗Belize。佢嘅原因係呢度啲人比較簡單，做生意都冇乜呃呃氹氹，又冇壓力。香港人移民都係英國澳洲加拿大，究竟點先算係一個居住嘅好地方呢？
最後一日留喺Belize City，氣氛同前兩日截然不同，因為佢哋搞緊啲好大型嘅活動。
就係選美
呢位佳麗戴晒后冠嘅仲唔係冠軍
阿姨我不想努力了
亦都因為有好多政府車同白警巡邏，加上成街氣氛都十分之好，我諗拎返相機出嚟影相都安全
靚女喺度繞場一周嘅同時，猛男就喺車上面勁歌熱舞。冇乜期望噉嚟咗Belize City，又出乎意料都有少少驚喜噉離開。
短暫停留喺Belize幾日，我哋又再次坐車返Mexico。
希望無辜嘅人可以快啲出得返嚟
我哋一心想搵個龍尾嚟排，但見條龍轉吓轉吓又會駁返去中間，正諗住放棄之際，就有啲墨西哥人Amigo Amigo噉嗌我哋
