65 Like
9 Dislike
我唔係訓嚟頸
2017-04-26 21:50:55
化鬼龍
2017-04-26 23:28:29
等多一陣,岩岩唔小心刪左篇文,依家重新寫左
化鬼龍
2017-04-27 00:29:32
學校聖誕聯歡會果日,大家都去左搵熟悉既人影相,而文老師就每人買左份禮物送比大家,都仲講左好多鼓勵既說話。
大家食下飲下,傾下計,悲喜交集咁就過左依一次亦係最後一次既聖誕聯歡會。
聖誕節正日既時候我都無約阿彤出街拍拖,因為大家既假期同樣充滿補課,就算出街我地兩個都係去附近既自修室溫書。
當我地互相見到大家都戴住中二送比大家果份聖誕禮物,我地不相而同都有種窩心既感覺。
依份禮物可以話係見證住我地又離又合,好彩最後都係番埋一齊。
如是者,經過日日補課既日子,連新年假期屋企人叫我出去拜年我都留左係屋企或者番學補課,都唔知收少左幾多封利是。
到左二月中,校內中六級畢業試都考完,但我地都無放慢手腳,依然持續去溫習。
好快就到左我地既惜別會,雖然話就話惜別會,但係我地仲需要番黎補課,都仲會有機會見到大家。
果日上晝到下晝都照上堂,但老師都唔會要我地操卷,反而同我地傾下自己啲野或講解下DSE要注意既野。
通識堂果時黃sir同我地傾左陣計就帶我地落小食部請我地飲可樂,仲同我地影左好多相,中學生涯有一個咁既老師我都好滿足。
第二個小息既時候大家都落哂去禮堂影相,分班影完就全級中六一齊影,記錄我地中六既相片。
放學既時候我地全級中六又落哂禮堂,開始每一班所準備既短片同派幾個代表上台講下感受。
我地6A班係第一班打頭陣,當代表既同學講左幾句就開始播片。
望住一張又一張中四到中六既相,我地有啲女同學都眼濕濕,我都有少少。
唔經唔覺咁就三年,好似眨下眼就過左,大家都由一班散沙變到團結起黎,令到大家都非常感觸。
代表同學同文老師影完相之後就輪到下一班。
每一班總有同學係播片或者老師對我地講祝福說話既時候喊左出黎,睇黎大家都投放左好多感情係依三年。
當整個惜別會完左之後,我同阿彤就去左學校唔同既地方周圍影相,用依次機會留低最美好既回憶。
令我地最有感觸既地方就係圖書館出面條走廊,依到係我地既開始。
「喂,即影即有相機得返最後兩張啦,你想去邊到影呀?」阿彤問我
我乜都無講就拖住阿彤上左三樓。
「記唔記得依到?對我黎講最多既回憶就係依到。」我講
「緊係記得啦,我都好有印象,果時你仲好遲鈍。」阿彤微笑住講
「咁就照番我地四年前咁影架啦,真係最後兩張啦。」阿彤講完就準備好
我亦都埋位,跟足番哂四年前既姿勢。
影完兩張,我一張,阿彤一張,相機就無哂相紙。
「唉,如果重新黎多次,我會更加珍惜依三年,大家好似岩岩熟絡就要分開。」阿彤講
「無計啦,時間無得倒流,我地亦都要成長,大家畢左業可以再約過出黎既,唔洗咁灰。」我同阿彤講
「嗯,到時一定要一大班人一齊食放題,霸哂幾張枱。」阿彤講
「一定可以,到時再算啦。最緊要考好DSE。」我講
「嗯!!你都要加油。」阿彤講
今日一別,何時再會,如果可以我都想重新黎過一次高中生涯。
不過,我地依家最緊要面對既係DSE,無時間比我地回憶。
化鬼龍
2017-04-27 12:49:07
up,今日大結局
雞毛鴨蒜
2017-04-27 20:28:52
快
化鬼龍
2017-04-27 22:51:29
跟住落黎就係study leave既時間。
依段時間係比中六既學生留係屋企溫習既時候,到時候跟番自己張准考證上面既時間日期同地點去到唔同既學校考進行文憑試。
有部份課堂老師會要求學生返學校補課,廢事有啲同學留係屋企hea過。
我同阿彤亦都作最後既衝刺,定立左時間表係唔同日子溫唔同既科目,有時就返學補下課,為既就係為自己既將來。
我所考既第一科係中文科,我唔知自己係唔係第一批考,但我睇其他同學既考試時間都比我遲一個星期左右。
雖然我考試間學校都係同原本我所讀既學校同一區,但係我無咩點去過或者經過果到,所以我都提早左九個字出門口。
好彩間學校唔太隱蔽同難搵,我好快就搵到間學校,好多考生已經到左並係到等待入考場。
見到黎自唔同學校既學生同陌生既學校加上又無識得既朋友,唔多唔少都會有少少緊張。
入到考場果種莊嚴感更加令到我有啲壓迫。
考哂兩節之後終於可以離開,老實講其實我已經習慣左考場果種感覺,好多時都係自己比壓力自己。
返到屋企我就whatsapp下阿彤,同佢講下自己對DSE既感覺。
佢覆我話第一次考唔多唔少都會緊張,第二,三次去到試場就開始習慣,我都幾同意阿彤既講法。
我地經歷左三至四個月既DSE磨練,將依六年所學所溫所教既野全部都放哂落依一次文憑試裏面定生死。
其實我覺得依個教育制度真係好唔公平,我地只可以無奈地接受。
五月頭基本上好多考生都完成哂DSE,我地學校亦都係,大家都放低心頭大石,終於唔洗日又補課夜又溫書依種生活。
而五月尾就係我地真真正正既畢業禮,應該係全級中六最後一次齊人既一次。
由於要彩排既關係,所以我地要下晝番到學校再等到黃昏先正式開始畢業典禮。
母親大人同老豆仲興奮過我自己,為人父母望到自己個仔畢業應該都會好有感觸。
今次亦都係我地最後一次着住校服既一次,好彩之前惜別會無比人簽名係校服到,唔係又要買多件淨係着一日。
我梳令個頭,換好哂衫同父母講今晚再見就出門口。
今個下晝我約左阿結阿阿彤一齊食lunch。
我接埋阿彤就一齊去餐廳,而阿結就去左攞位先,
「我地兩個幾耐無見過?」阿彤問
「都有半個月啦,無計啦,大家都要溫書,依家開始就可以成日見啦。」我講
「但係...................無野啦,太耐無着過校服有啲唔慣添。」阿彤好似想問我野但好快就轉移話題
「係囉,我都唔係好慣,不過今次真係最後一次着校服,幾唔慣都要珍惜。」我講
我地兩個互相傾下考成點,好快就到左餐廳,入到去見到唔止阿結一個人,佢隔離多左個女仔,而個女仔係阿靜。
「咁遲架你地!」我一坐低阿結就講
「你地早到姐,阿靜又會係到既?」我問
「係呀,咁岩見到咪叫埋佢囉,你唔介意架可?」阿結問我
「點會介意呢,無見一排你又MK左喎,個頭仲啡啡地。」我笑阿結
「仲好啡咩?我尋日先染番黑。」阿結講
「唔緊要既,點都唔會唔比你畢業既,唔好講啦快啲叫野食,我唔想連畢業禮都遲到。」我講完就叫阿姐過黎落單
食完野行返學校果段路,我同阿彤都見到阿結同阿靜都非常親密,我地兩個都FEEL到佢地兩個有啲野,不過無講到出口。
番到學校見到自己班啲人都有一份格外既親切感,話哂大家都咁耐無見。
大家聚下傾下計,過左陣老師就叫我地上禮堂準備彩排。
彩排既過程都係做番啲老套野,幾時要鞠躬幾時要拍手咁,大家以前都做慣哂。
講完一大輪陣間典禮需知之後,我地就上左二樓既課室,去接收番啲成績表同通告果啲野,最緊要係着起我地年畢業袍。
我見到大家着起畢業袍之後都幾襯,證明大家都成熟左。
收完成績表同通告之後,大家係課室等左陣就落禮堂正式開始畢業典禮。
我地係第二班落到去,已經有唔少既家長坐左係到等緊。
一班又一班咁進入禮堂直到全部班別入齊黎,家長亦都坐得七七八八。
典禮開始,最先由校長講番啲客套說話,講到咁上下副校長就出黎宣讀我地既名,五個五個咁上台拎畢業證書。
一批拎完就到另一批,當到我既時候我心情都有少少緊張,上到台望住自己啲同學同家長仲更加緊張,我見到老豆拎起相機幫我影左張相。
當全部同學都拎齊哂證書,大家就落到地下,搵番自己既父母影張畢業相,我同阿結互相幫大家影幾張家庭照,兩邊父母亦都幫我地兩個影左張合照。
當然我都去左搵阿彤影番張畢業相,阿彤父母見到我之後都問左我一聲係唔係阿東,問完就幫我同阿彤影左張相。
化鬼龍
2017-04-27 22:51:39
我同阿彤正想搵其他人影相既時候,竟然見到一個熟悉又陌生既人,佢係阿禧。
「hi!阿彤阿東,我地都三年無見啦。」阿禧個樣成熟左唔少
「你個死仔,唔讀書去左邊呀?仲等我唔敢搵番你。」我打左佢一下
「因為我屋企有啲事,所以出左去做野幫補下家計,唔好講依啲啦,搵埋阿敏影番張四人照啦,我好難得先拎到假番黎架。」阿禧講
我地係人群之中穿梭搵阿敏既身影,搵左五分鐘終於搵到佢。
「喂,阿敏我地四個咁耐無聚埋一齊,過黎影張相啦。」我講
本身阿敏見到阿禧都唔太願意,但阿彤再三請求之下佢都肯影。
影完相阿敏好快就行開左,得返我地三個人,傾下閒計之後,我同阿彤亦都夠鐘還畢業袍,阿禧亦都有事走左先。
好多同學還完畢業袍就同屋企人番屋企,我同阿彤道別完都跟父母走。
一路上,父母問我準備好過外國未,我無答到,我內心其實唔係好捨得佢地,重有好多既朋友,最重要既係阿彤。
化鬼龍
2017-04-27 22:52:07
明天真大結局
我唔係訓嚟頸
2017-04-28 01:16:07
Salamence
2017-04-28 01:41:41
希望幾位都有個好既結局
離地健心
2017-04-28 03:48:42
唔訓都要追哂成個故
雖然中學生涯係青春純樸
但係事實上又點會有呀彤呢啲女仔會等個冇乜突點專長既男仔兩年咁耐
仲會即刻應承同番呀東一齊
同埋又點會有呀靜呢啲女仔 自己初戀同人散完咁快就可以同人做番朋友
唔係駁故只係覺得好多野剩係可以係故事入面發生 現實要預到係少之有少
睇故要駁故
2017-04-29 05:22:25