【愛情/校園】當年我曾經追到一位女神,但我竟然飛左佢。

我叫做阿東,由細到大都係得依個花名。可能我太小朋友既關係啦,加上我又係一個怕羞仔。更加令我錯過同失去好多野。


喂,阿東今年又同你坐啦。佢係我由小學識到依家既同學阿禧。

小學個陣時同佢玩得唔係好埋,但唔知點解上左中學就熟左落黎。

混混噩噩咁樣讀完中一,今年升左上中二仲可以同到個（熟人）一班。

簡直係一件高興既事。驟眼睇係依一班裏面我熟既人一隻手都可以數得哂。



「喂呀阿東比啲反應黎啦!!」正當我俯視緊依一班既時候,阿禧不停係隔離聊我吹水,但係我依舊無理到佢。

識左咁多年阿禧一樣咁多野講,我心諗。

根據我目測,上年同我一班既同學有超過一半都同我同班。

其中更加有三個成日恰我,睇黎今年又要受苦啦..............

我坐既位置偏中,望完前面既同學當然留意埋後排既同學。



哇一望後面,坐我後面個位女同學黑到好似非洲人咁,搞到我呆左一呆,佢見我望住佢,講左句『未見過令女咩』。

我當堂差啲連隔夜飯都嘔埋出黎。當然我只係心裏面咁諗,由於我係個怕羞仔比佢串我都無反擊。

而佢隔離竟然係一個皮膚非常白樣子甜美既女仔,我地就係咁出現第一次眼神接觸,望左唔超過一秒,大家就立刻另開。

估唔到有咁高質又怕怕羞羞既女仔坐我斜後面。同佢隔離個黑妹比簡直係天淵之別。




【我地之間既相遇,就係依一刻開始。】


當我仲留意緊有咩識既人個時。

一位女老師入左黎課室,佢係一位年約25-30歲,身材肥胖,時著老套既老師。

大家好,我叫陳老師,我負責教你地音樂同科中文,今年第一年入黎依間學校教書,如果有咩教錯既地方,請多多包容。

「果然係一位文人,講野方式非常有禮。瘦番少少就完美啦」。阿禧係我隔離細細聲講。

「唉老師你都岩,你既品味我真係睇唔透啦! 」我回應番佢。

我諗番起頭先同個女仔既眼神接觸,個心突然就會跳得好快,依種就係心動既感覺?



「你地既坐位就暫時咁坐住先啦」。陳老師話

為左方便我認識大家,你地每個輪流出黎自我介紹。

「唔係阿咁鬼老套阿!」班上面對於自我介紹都非常抗拒。

好多同學都各有各講,無理會老師講既自我介紹。

「阿東不如我地兩個包剪揼輸左就出去自我介紹」。阿禧係我隔離講

「好阿,不過你輸緊喎。」我回應番佢


憑我多年猜包剪揼既經驗,我試過最多9連勝,依次完全無輸既想法。



「好耶,快啲出去啦無膽鬼」。阿禧非常得戚咁講

大鍋啦今次,竟然會輸左仲要係咁多陌生同學面前自我介紹,淨係諗到要出去就即刻淆哂。我心諗

「快啲出去啦死薯頭!」後面個非洲黑人好大力篤我背隻講。

「關妳咩事喎」。我同番佢講

願賭服輸死就死啦！！我好快咁行左出去企起黑板前面。



「咦?同學睇黎你好想比其他同學認識下喎」。陳老師講

突然成班同學靜哂咁注視著我。我隱約見到有人陰陰嘴笑,搞到我依個怕羞仔有啲唔好意思。

同學你可以開始介紹下你自己啦,短短地講下個名同興趣就夠。

我叫做夏至東,你地可以叫我做阿東,興趣係打羽毛球同打機。

講到依到愈黎愈多同學望住我係到笑,老師都有啲尷尬仲笑埋出聲。



究竟咩事全部人都望住我係到笑呢。

「阿東你唔記拉褲鏈阿!」中一惡霸阿權大大聲咁講出黎

我快快手另去黑板個面拉番褲鏈,依一刻我塊面已經紅到可以整熟一隻雞蛋,班上面笑聲無停過。

陳老師一時控制唔到場面就叫我番埋坐位先。

依一刻我尷尬到極點。

返到位阿禧同黑妹不停笑我,我都無作出回應,我個腦空哂完全諗唔到野

但係我見到我斜後面個白滑女神望住我微微一笑,我個心就好似融化左咁。



佢仲同我講「阿東原來你叫做阿東,乜你咁大頭蝦,我叫做阿彤」。

我估唔到佢會主動同我講野,估唔到一件咁尷尬既事竟然會變成左一個契機



【如果當時你無同我傾計,可能就唔會變到今日既局面。】

非洲黑妹同阿彤係我中二第一對認識既朋友

佢地兩個原來都係由小學識到依家既朋友

佢兩個之間既事又係另一個故事

同我同阿禧一樣

自從我自我介紹個次大事件之後,



我地4個就係咁熟左,

如果唔係個件事,我諗我都識唔到依位女神。

「不如一齊食lunch囉」。阿敏話

阿敏係非洲黑妹個名,同佢熟左之後發現阿敏份人其實好易相處

本來以為佢係一個兇神惡殺既女仔,所以話真係唔可以以貌取人。



而我女神阿彤係一個笑點好低既人,阿禧平時講啲冷笑話都可以引到佢笑一餐。

有陣時真係好羨慕佢地兩個有咁多話題,只好怪自己係無膽鬼。

我同阿彤既話題日日都圍繞 做左功課未阿？下午食咩阿？

通常都一句起兩句止

唔知點解對住自己鍾意既女仔,個腦都會突然空左。



「好阿食番上次個間茶餐廳啦,啲野食都唔錯。」阿禧講

「就咁話啦」我地三個一致讚成。

由於我有中文功課上既問題,所以留左係課室問陳老師。

而佢地三個就去老地方先。

由於lunch關係,全部同學都出哂去食野。

課室得返我同陳老師,當我問完功課上既問題之後。

陳老師就同我閒聊左幾句

「自從個件事之後,你同阿敏阿彤玩得埋左喎」陳老師話



「都唔知係好事定壞事啦,搞到大家對我印象衰哂」我回應番老師

「咁咪幾好多左人識你,仲有,同佢講多啲野啦,好多時人地都等緊你開話題」陳老師依句究竟咩意思呢

我諗左五秒都無,陳老師就叫我快啲去食lunch唔係就無時間啦！

我望下隻錶,原來已經過左十分鍾,唔該陳老師之後我就急急腳去餐廳會合佢地。

行緊途中我再諗番起陳老師頭先句說話

係唔係暗示我應該識多啲同學呢?算啦可能到左一個時候就明。





【係妳令到我由怕羞變到大膽,多謝妳唔討厭我係怕羞仔】

「咁遲架你,問功課定溝老師阿你。」阿禧講笑說

「我唔似你,咁重口味既野留番比你啦!」我好認真咁回應番佢

「我地叫哂野食啦,幫你叫埋你最鍾意既餐蛋麵!」阿敏笑笑口咁講

「果然係同我小學識到依家,連我鍾意食咩都知。」我搭住阿禧膊頭講

「下唔係我幫你留order架東仔。」阿禧向我打左個眼色

依到四個人唔係阿禧仲有邊個知我口味,斷估唔係阿敏佢唔會咁細心留意我！

「死蠢!阿彤幫你叫架,仲等佢驚你餓親,唉!」阿敏諷刺我咁蠢

我望到阿彤失落既眼神

「唔....唔....唔該哂妳阿彤」我對住阿彤依然咁口疾疾

嗯。阿彤用一個字答覆番我。

埋完單之後,阿彤阿敏兩個去左廁所。

而阿禧亦乘機同我講

「阿東你唔好咁遲鈍同咁蠢得唔得阿!眼色都打埋啦!!」

「識左你咁多年,你鍾意咩類型女仔我最清楚,追女仔最緊要放膽,唔好怕出醜。」

「阿彤都做到出哂面,你唔好浪費人地對妳既心機先得架！」

「拿唔好話我唔提你,阿彤係我地依級係女神級數,好多人都想追佢,睇你識唔識做啦！」阿禧教訓我咁講

我更加諗起老師個句說話

我比阿禧鬧左鬧之後,我決定要改變,唔可以再咁怕羞,要大膽啲。

阿彤同阿敏一去完廁所出黎,阿禧就話要買啲野,叫阿敏陪佢去。

叫我同阿彤兩個番學校先。我心裏面默默咁多謝阿明。

行返學校路程需時7分鍾,真係我有7分鍾時間同阿彤單獨相處。

「係呢點解妳又知我鍾意食餐蛋麵既?」依種開場白好似唔係幾好,我心諗

「次次見妳係學校食飯都叫餐蛋麵,我諗你出到黎都係食番同樣既野,好彩無估錯」阿彤笑住咁講

估唔到阿彤竟然會留意我,睇黎係一個好既開始。

「其實識左妳幾個月,都未知妳既花名同興趣喎」我鼓起勇氣咁問阿彤

「花名,唔.......不如得妳同我個時叫我做檸檬,興趣係睇書」阿彤好苦惱諗左一陣答我

「檸檬,檸檬,都幾順口,我會記住架啦!!」我對住檸檬講

檸檬?有咩意思係裏面呢?

「就黎聖誕節不如一齊出去玩下,我估妳都無約人架啦!」檸檬話

我估唔到阿彤會咁主動,今年聖誕終於唔洗留係屋企打機!我心諗

「點阿妳應唔應承阿,定你約左人阿!」檸檬唔耐煩咁問我

「當然無問題啦,難得有人約我」仲要係妳添,依句我無講到出黎

突然佢捉住我隻手,依個舉動搞到我即刻縮開隻手,插番入褲袋

我見到檸檬尷尷尬尬咁同我講

「唔洗咁敏感喎,我地勾手指尾啦,到時唔准反口架啦!!!」檸檬雙眼凝視住我

我立即伸番隻手出黎,擺出一個勾手指尾既手勢。

『一言為定啦！！！』

唔經唔覺就番到學校,依段路程我絕對唔會忘記。


【有時男仔唔主動係因為怕羞,女仔既主動會推動男仔。】

up

up

「依排見妳同阿彤玩得好埋喎!」中一惡霸阿權係走廊同我講

「少少咁啦，一齊食lunch仲算?」我以少少囂張既態度答番佢

比著以前既我,我應該只會答佢唔係之後就走開。

「同阿彤食lunch你知唔知係好多人夢寐以求架事」阿權身邊三個人其中一個阿桐鄙視住我

「你汁到啦,大大個女神同你啲咁既人食飯,又唔打得又唔睇得,拉左褲鏈未阿?」另一個叫阿日亦都串埋一份



「唔好同阿彤玩得咁埋阿,唔係你就小心啲」阿權威脅我咁講

哈哈哈哈哈................佢地一行四人開始恥笑我


我無理到佢地慢慢咁行入課室,睇黎阿禧無講錯,真係有好多人鍾意阿彤,仲要係所謂既惡霸MK仔。

過左一段時間終於到聖誕節。我苦惱左好耐送咩禮物比【檸檬】?

「一睇就知妳諗緊送咩比阿彤啦」阿敏得威講



「世事比妳看透啦敏姐,有無貼士比我阿」我哀求阿敏

「我識左阿彤咁耐呢,佢最鍾意人地親手整既野,貼士就咁多,其他自己諗啦」阿敏講完就行開左

我決定親手織條頸巾。

為左慳番啲錢,我唔報興趣班學織頸巾,而去請教我母親。




「織比女朋友仔阿?好少見你咁比心機學一樣野喎。」母親大人一語中的

「仲未係女朋友,我都希望係阿。」我好概嘆咁講

「比心機啦,放膽去追唔好比自己後悔,聖誕節係一個表白既好節日」母親鼓勵我講


【如果當時我無追妳,妳會唔會同其他人更加開心咁過?】

「lonely~lonely~Christmas」五音不全既阿禧唱住Lonely Christmas

今日係學校既聖誕聯歡會,我亦都帶左親手織既頸巾送比檸檬

「你又唔洗整野食,做咩帶多個袋,收埋啲咩咁神秘阿」阿禧笑淫淫咁問我

「你唔記得左今日我地班有交換禮物活動咩?」我問番阿禧

「係喎,大鍋啦今次唔記得左買禮物添。」阿禧企左係到

「我諗到啦,陪我去一去超級市場。」

阿禧急急腳同我一齊去左附近既7仔

阿東睇黎你真係變開放同大膽左,比著以前既你會怕羞到學都唔返,而今年你竟然準備埋禮物

「唉,都唔明點解學校日日都要係朝頭早集隊,個個都未訓醒」周圍既同學係到講

我間學校一年三百幾日都要係操場集隊聽老師分享,可以話係一件多餘既事

起完身返到學校,差唔多個個都未訓醒,仲要聽老師分享,點聽得入耳。

「好啦,同學過黎集隊準備上禮堂聖誕祟拜」台上羅主任叫大家集隊

「又可以去禮堂訓陣,之後係課室玩番餐。」阿禧打住個喊露講

歷時一個半鍾既祟拜終於完結,各班有秩序輪流上課室。

「喂,東仔買左禮物交換阿」後面同班女同學阿阿兒問我

「係阿」我答番佢

「一定唔係同我換啦」阿兒有啲失望咁講

同阿兒傾計個時我留意到阿彤亦都帶左個袋

以我所知佢無份整野食,睇黎佢個袋係裝左份禮物。

自我介紹之後,多左同學主動聊我傾計。

我地班交換禮物比較特別,你可以選擇性同一個人交換,更加可以聚集一齊隨機抽。無帶既就無份。

上到課室,枱櫈已經擺好哂

枱就貼邊,櫈係枱前面,中間再有6張枱放食物

陳老師仲叫左三個pizza,非常之貼心。

當然我,阿敏,阿彤,阿禧四個一齊坐,有同學邊影相邊食野。

阿敏都拎左部相機出黎,我地四個就影左第一張合照。

食完野玩完小遊戲之後,就到左最期待既交換禮物環節。

正當我想同阿彤交換禮物個時,佢行左出去同陳老師講左幾句就拎左自己袋禮物出左課室

我去一去廁所,佢細細聲同我講。

點解去廁所要拎埋成袋野呢?我諗左陣

依個時候陳老師行左埋黎同我講左句

「你仲唔去阿?」

我拎起自己袋禮物,同陳老師講「我去過廁所」就衝左出去

臨行前我隱約聽到陳老師話「加油,唔好令自己後悔。」



【唔好令自己後悔,錯過左會失去】

課室示意圖

「好彩你都蠢唔哂！」阿彤微微笑咁同我講


我地課室係位於三樓升降機隔離,依一層得兩間課室,中間係圖書館

阿彤就企左係圖書館出面走廊等我

「緊係啦,邊有人拎住袋野去廁所架!」

「送比你架檸檬」我係個袋到拎左條白色既頸巾出黎

佢見到條頸巾開頭有啲驚訝,之後就對住我會心一笑

依個笑容就好似自我介紹個次咁,笑得好甜美。

「依到咁凍我幫妳戴帶上頸啦」說罷我就幫佢戴左

檸檬雪白既皮膚再襯埋條頸巾簡直完美。

「多謝你,條頸巾好暖好令,妳親手織架?」檸檬問我

「sure,係出面買唔到咁暖咁令同充滿心意既頸巾架！」

我唔知邊到黎既自信講出左依一句

檸檬笑左一笑就係個袋拎左一對又係白色既手襪出黎

「之前捉住妳隻手個時,明明個陣時大熱天,你隻手仲可以凍冰冰,伸隻手出黎啦,幫你戴埋阿」

「廢事之後你拖住我個時隻手凍冰冰啦！」

依一句令到我塊面紅哂,檸檬同我表白?

雖然涼風陣陣,但係依個時候我覺得好暖,成個世界好似得返我地兩個人咁。

當我想追問佢個時,佢係裙袋拎左部手機出黎。

「識左一段時間,我地都無影過相,依家影番張啦。」檸檬擺好哂姿勢等我

「咁曳架妳唔交手機都有。」我講

「影唔影架你快啲啦,等陣比老師見到就死。」

我係鏡頭到見到檸檬笑得好燦爛。

「陣間放學再send番比你,快啲番課室啦,睇下佢地換到咩禮物。」

檸檬講笑就行先一步,我就你後面諗番佢頭先個句

「做咩呀?」檸檬見我突然捉住佢隻手有啲嚇親,即刻另轉面望住我。

「其實我鍾意左妳,可唔可以同我一齊」我鼓起人生最大既勇氣同檸檬講

「傻佬,點解妳仲係咁遲鈍架。」檸檬依一刻另番轉面講

佢另番轉頭個時,我見到檸檬眼有淚光好開心咁答我

我地正式開始就係依一刻




【我送給妳的禮物,妳還留着嗎?】

隔左一個星期之後,終於到左聖誕節正日

我一早起左身梳洗,簡一套令衫,jer個令頭

整整下唔經唔覺就到左黃昏。

我著好衫,帶埋手襪,準備出門口。

「對手襪咁令既,女朋友仔整架?」母親大人問我

「係呀,聖誕禮物黎架！」我答番母親

「幾時帶佢黎屋企玩阿,我個仔咁怕羞佢都接受到,真係想見下佢真人。」母親講笑咁講

「總有機會既」我hea答母親

「唔好咁夜番啦,小心睇車阿」

母親用平時每個阿媽最常講既野同我講bye bye

我地今日行程先去旺角食晚餐,再去尖沙咀鐘樓影相行下。

我地約左係旺角地鐵站a出口等

檸檬同我住得比較近

所以我地約左係東鐵線大埔站等

「我到左啦七號月台等啦😚」檸檬whatsapp我講

「就入閘等等smiley」我都加個表情覆番佢

搭電梯上到月台,我已經見到遠處既檸檬

黑色上衣再配上灰色裙再加上黑色絲襪,最重要既係佢戴左我條白色頸巾

簡直係完美

「咁早到既檸檬,好彩我平時都會早到。」我拍下佢膊頭

檸檬好似一早注意到我咁

「係呀,我一向都會早到十五分鐘,廢事要人等」檸檬話

「妳今日著得好令喎,完全同著校服個LOOK唔同哂。」我同檸檬講

「你鍾意就好啦,你今日都唔差阿,同我一樣黑衫,黑褲。」檸檬尷尬咁講

「唔係點顯得出我地係一對恩愛既小情侶」我摸住檸檬個頭講

列車即將到站,請勿超越黃線,多謝合作

列車到站之後,我就拖住檸檬隻手步入車箱

依次係我同檸檬之間第一次出街,甚至可以話係約會。



【你仲記得我第一次拖住妳隻手既感覺嗎?】

up

up

係旺角會合左阿敏同阿禧之後,我地好快食完晚餐就搭地鐵去尖沙咀

「阿東你覺唔覺阿敏同阿禧呢有啲唔同左」係地鐵到檸檬細細聲問我

「我都覺,成日都有身體接觸咁,你估佢地兩個會唔會......」我係檸檬耳邊細細聲回應番佢

地鐵到站之後,阿禧話想同阿敏兩個去另一到，兩個就急腳出閘行左去。

得返我同檸檬。

「不如去海旁行下囉,吹住海風幾舒服。」我講完之後就拖住檸檬行去海旁

我除左手襪拖住檸檬隻手,周圍有好多情侶,但我覺得我地先係最登對

【我既世界只有妳,妳既世界只有我】


「浪漫就真係幾浪漫既,不過啲風吹埋黎就好凍啦」檸檬挨住我講

我除低件外套,嬲住檸檬上半身。

「你真係愈黎愈細心,前排既你一定唔會咁做。」

「其實我小學到依家都好多人追,但我全部都無應承」

「第一次同你眼神接觸同相處過之後,我開始鍾意左你。」

「雖然你份人好蠢好遲鈍好大頭蝦,但係我真係鐘意你咁純真,咁你鐘意我啲咩」

檸檬一口氣講左一大堆對我既感覺,我一時唔知點樣應佢好

「我鐘意妳夠細心,我鐘意食咩妳知,知我就手成日凍就整對手襪比我,咁好既女仔我唔知邊到再有機會遇到。」

我講完之後我地兩個互相望住大家。

我打則個頭慢慢將嘴唇靠近佢,檸檬亦都合埋左對眼。

原來初吻既味道係咁甜,彷彿成個世界停左係依一刻。

檸檬部手機突然響起,我亦都縮番開。

CUT線之後檸檬話阿敏打黎叫我地去鐘樓影張相

臨行之前,我問左檸檬一個問題，究竟依個花名有咩特意思?

佢答番我你總有一日會明


3,2,1笑

影完相之後我地就行番去地鐵站搭地鐵番屋企

我問阿禧你地頭先去左邊

阿禧話阿敏想去睇聖誕樹,咪陪佢去囉。

雖然知道無咁簡單,但我無追問落去。

道別左阿禧同阿敏之後

又得返我同檸檬轉乘東鐵線番去

「呀!唔記得比你添。」檸檬係銀包拎左張細細地既相比我

張相係我地係學校互相表白個張

「唔好唔記得我地點開始喎」檸檬補充多句

「咁重要既一日點會忘記,妳都唔好唔記得今日喎」

檸檬面紅紅咁另開左

我將張相放左係銀包,等自己幾乎每日都可以睇到。

我亦都希望我地兩個可以永遠咁係埋一齊。




【你地仲記唔記得初吻既感覺?】

阿彤外傳:



仲好記得係小三至小六都有唔同性格既男仔追求我。

但係我覺得小學時期拍拖係一件絕對唔多久既事。

大家心智未成熟,為拍拖而拍拖,當然上左中學都有機會係。

但係小學時期諗野比較單純,男既見女令女就鍾意,女既見男型仔既就鍾意。

完全無感情可言,一段愛情無感情點稱得上係愛情。



「其實妳眼光會唔會太高呢?個男仔其實幾型運動又得讀書又係全級20名」小六時期既阿敏問我

「妳唔明架啦,妳又唔熟人唔知佢既性格係點，唔清楚一個人就愛佢實在太蠢」我答番佢

「講到咁深奧我點會明呀...」阿敏擺出思考既姿勢

臨小六畢業之前阿敏同我講番

阿彤妳講得岩,原來之前我話運動讀書勁同幾型既男仔



原來佢好花心架,我有個朋友岩岩比佢飛左,原因係佢鍾意左另一個女仔。唉

阿敏好失望咁講

「睇黎妳曾經都好鍾意過佢喎」我同番阿敏講

「係就係但係我我咁既樣點識到人,邊似得妳美貌如花」阿敏非常羨慕我

「其實妳性格好好,妳願意幫人又有義氣,總有一日會有得睇得到」我安慰番阿敏



「係就好啦,邊會有男仔睇得上我,不過多謝妳阿彤」阿敏笑番

依段小學時間完全無遺憾,升左上中學又會有啲咩事等緊我呢?




【愛情係雙方互相了解先可以持續】

up

點解會冇人
樓主加油
青春

點解會冇人
樓主加油
青春

第一次試寫故,寫到好亂,所以無咩人睇
BTW thank 盡量一日三篇以上啦!!

自從比肥施同阿權話完我之後,我對住阿彤多左份自卑感

加上愈黎愈多人問係唔係同阿彤一齊左。

咁都岩既,我份人無樣野叻,而阿彤唔同,學業,樣貌,性格都好好

或者我將佢交比另一個男仔會更加好。

依家我每個夜晚都諗點樣對阿彤會襯啲

思緒不斷阻擋著回憶播放 灰濛濛的夜晚睡意又不知躲到哪去

我諗起左周杰倫首《回到過去》

我同阿彤既未來,我完全唔清楚,更加唔知點解面對佢。

叮叮叮.......我部手機有訊息既聲音

「難得聽日教師發展日,不如我地去睇戲囉。」阿彤問

我諗左陣覆

「好呀,反正我好耐無睇過戲」我答

「咁聽日下晝5點半火車站等」阿彤秒回

「OK👌」我答完就熄左部機

我拎左個銀包出黎

望住銀包我同佢張合照,忍唔住喊左出黎。


「套戲個男主角好慘呀,最尾都同唔到個女主角一齊」阿彤可惜咁講

「嗯。」我應佢

我地兩個本來拖住手,但阿彤突然鬆開左隻手

「你今日做咩阿,我問咩你都淨係答嗯」阿彤略為大聲咁講

「無野呀,有啲唔舒服炸」我死死氣咁答佢

「夏至東,其實你由上個月開始已經對我冷淡左,其實你係唔係已經唔鍾意我」阿彤眼有淚光咁問我

因為我地睇戲既地方係旺角,阿彤個舉動令到不少人圍觀


「阿彤.......對唔住,不如我地分手啦,我唔係唔鍾意妳,只係我覺得我無資格去鍾意妳」我忍住淚水

「夏至東,睇黎你已經唔記得哂我同你講過既野啦,咁好啦我地分開冷靜下啦」阿彤諗都無諗就跑走左


我望住佢既背影,眼淚終於忍唔住流左出黎

我相信妳會搵到個比我更加好既男仔



【佢選擇同你一齊,就說明左佢唔介意你既缺點。】

個日夜晚返到屋企,母親問我做咩咁早番,我無答佢就入左房訓左係床上面

我個腦好亂,我咁做會唔會太衝動?我咁做岩唔岩?我係唔係飛左一個鍾意我既女仔?

我唔知,腦裏面不段諗番起由九月識到依家三月我地之間發生過既所有事。

第一次既眼神接觸,第一次比佢約,第一次同女仔勾手指尾,第一次表白,第一次拖手,第一次合照,第一次初吻

全部既事不斷係個腦湧哂出黎,個心痛到好似唔屬於自己,眼淚不停咁流。亦都諗起一首歌,

我忘了怎麼愛你 也忘了手下留情,熱戀忘了爭吵 分手忘了和好 《MP魔幻力量 忘了怎麼愛妳》

係我唔記得點解愛你,定係我從來都唔了解妳?喊下諗下好快就進入左夢境


「阿仔你仲唔起身?七點半啦」阿媽一路敲門一路叫我起身

我起身入廁所梳洗,照鏡見到隻眼腫哂,尋日喊得太西利。不過都唔理得咁多

刷完牙洗完面,我好快咁拎埋書包出門口。

「哇你兩隻眼做咩呀?比人打黎?」阿禧邊講邊笑

「比蚊針姐,有咩好笑。」

「針到腫哂?睇黎依家啲蚊變種囉」阿禧見氣氛唔對路就收左聲

上到課室,我先發覺佢無返到學。

「少有喎,阿彤竟然無返學,平時佢就算幾唔舒服都會死撐,為既就係唔想MISS左任何一堂。阿敏妳知唔知佢咩事?」阿禧講

「應該係有個傻仔,激嬲左阿彤,激到連學都唔番,一定好大件事」阿敏一語中的

佢地兩個見我無回應亦都無再討論落去。

lunch既時候我無跟到佢兩個一齊去食,我唔想再去間茶餐廳,我連野都唔想食。

啲同學出哂去放lunch既時候,我去左廁所照鏡,睇下自己依家咩樣

一入到廁所就見到阿權,佢一見到我就即刻禁我埋牆

「夏至東,你對阿彤做過咩你最清楚。」未講完佢已經一拳打左落我個肚

我痛到訓左係地下,但依種痛完全同心痛無得比。

「我唔理點解阿彤會簡你,但你竟然親口同佢講分手,仲要係你把口到講出黎。唔係個日咁岩行過見到,我都唔知你係個咁既人」

「你知唔知你自己咩料呀,有女仔鍾意你就汁到啦,依家你同人講分手?」

「依家佢一定係屋企喊得好西利,多得你條垃圾」阿權愈講愈激動

「你咁勁你咪去追佢囉,反正我同佢分左手」我上氣唔接下氣咁講

「唔洗你講我都會做!!」臨走前佢再踢多我一腳

我起身行埋塊鏡到,夏至東你依家似啲咩,明明係你飛人先,點解個心會痛?搞到自己人唔似人鬼唔似鬼。仲要比人打左鍋

放學返到屋企,母親見我件校服汚糟哂問我做咩黎。

「快啲換衫,見你咁既樣就知你未食野,等我煮啲野比你食」

我依家已經又餓又痛,只係想訓起到抖下。

「拿,煮好啦慢慢食睇熱呀。」母親當我仲係小朋友咁講

我行到埋張枱,見到枱上面碗餐蛋麵,我既眼淚再一次不停咁流。

「唔洗餓到喊」,阿媽見我咁樣就嘲笑我。

「食完隻敷下雞蛋啦,你隻眼腫得好西利。」

母親講既依句令我喊得更加西利

母親見我咁樣都無再騷擾我。而我就邊食邊喊。



【失去左既野,無得你後悔】

支持,同我一日出三篇
利申:恭喜你上左頭二十

留名

有人同我講過,中學拍拖唔會長久,大家都係貪初戀味道或者為拍拖而拍。

新鮮感到左之後,男既對女既會開始冷淡,直接啲黎講就係玩厭。

當然總有一兩對中學情侶可以拍到結婚,但依一兩對情侶絕對唔會係我地。

我同阿彤分左手已經有兩個星期，但只要諗起曾經同佢發生過既事,我個心都會乸住乸住

【時間會沖淡一切?我答你...........唔會...】

仲記得三個星期前我留意到佢番番學個樣係好似無左靈魂,我連望佢第二眼既勇氣都無。我送比佢條頸巾都已經唔再戴住。

到左今日佢已經勉強笑番,但佢既笑容已經變左。

今日放學如堂既班主任節,陳老師氣憤憤咁入左黎課室

「全班靜一靜」陳老師嚴肅咁講

「依排好多老師都同我投訴,你地上堂個時好嘈,我已經幫你地整左坐位表,依家跟住依個位去調。」

陳老師將坐位表貼左係告事板。

大家都爭先出去睇自己既坐位,最重要係想知同邊個坐。

「估唔到我地四個都有分開既一日。」阿禧嘆住氣講

「又唔係生離死別,調個位姐。」我同阿禧講

阿敏同同彤無出到聲，上三個禮拜後,我地四個既關係愈黎愈差。

阿權行去阿彤身邊講,我叫左陳老師調我同妳坐,咁妳就可以教我做功課。

阿彤亦都露出左好耐無見既笑容,不過唔係對住我,而係對住阿權。

唔知點解見到依一幕,我個心痛左幾下。

阿權番埋位汁野個時望左我一眼。

我見出面既人潮散左我同阿禧出左去睇自己坐邊。

「yes,同返阿敏阿彤坐,不過阿東你調走左.....」阿禧由本來興奮變到失望咁講

「無所謂啦,你地玩得開心啲」我講

而我就比陳老師發配邊彊,調左去近窗口個行最尾一個位自己坐。而前面兩個係全班考第一同第五既女仔。

我唔知係陳老師專登定無意,但依個位可以比我靜下。

調完位之後,陳老師再補充多句,依個位唔會再調,坐到我地升上中三。

我既中二就係咁帶著遺憾咁過左。



【分手之後,男方會愈黎愈後悔,而女方會慢慢放開】

支持,同我一日出三篇
利申:恭喜你上左頭二十

盡量啦

留名

多謝支持