我自己係Mazda2 17年車主,揸下揸下做埋mazda fans,不如就分享下揸過新mazda 3嘅感覺。
新3 sedan同hatchback都揸過,外形黎講hatchback真係好靚,企係側邊睇啲反光線條會覺得架車識畫畫咁,對比度好大,又唔係鏡面咁反射週邊環境就算,好有動感!反而sedan就絲文好多,好似一架迷你嘅VW 房車咁。
上幾張圖係我上年去廣島個博物館影,講到內裝真係無得輸,到係香港試完車我先知有幾正。先講中控台個mon,無左touch screen但移前左好多,個頭要望個mon只需要眼部移動就得,舊款你點都要拎一拎頭,新款無疑係提高安全性。標版多左個LCD,雖然都仲係無乜花巧野,但嗰三個實體外框又幾配合到個LCD mon,幾高貴。左右兩邊有自己專屬嘅出風口,感覺好爽。
另外左右兩邊門啲修飾係車頭組件嘅延伸,成個內籠設計好有心思!
駕駛感方面,就反而有讚有彈,我自己係香港同日本旅行揸過mazda2,15同17年嘅mazda 3同19 mazda 6,基本上全部都好易適應,轉向睇位都好準,操控同自己部mazda2好一致。反而去到新一代mazda3有野要適應,個軚重左,個brake要好大力踩先有反應,而唔係平時掂一掂就有反應。佢係要大力踩,但又唔係踩到好深,有急事要踩break時要特別注意。當然其餘轉向嘅準確性同埋軚盤回饋都同以前相約,揸開mazda就明。除此之外,其他改變都兩大讚,車廂靜左,左右後視鏡移後左,睇位好左,我以為hatchback個C柱會好難睇,咁岩嗰日左後個位有坐人,我就發覺左後個人根本就係C柱個範圍,盲點其實無減少到,個側鏡反而仲令盲點再少左,值得一讚!
1.5同2.0個分別係1.5真係力不從心,1.5行平路個波箱不嬲都較得幾好,線性得黎低轉都幾去,但一想扒頭同上斜大油,就feel到佢力不從心。2.0就無呢個問題,反而感覺幾似揸mazda 2,反應幾快,真係想去就去。
令外,避震都比上一代舒服左,連埋張改良過嘅櫈,坐駕駛位個感覺真係幾好,車仔細細,避震少硬但吸震有進步,畀到房車嗰種寬躺舒適嘅感覺。
講到尾,抵唔抵買?代理一向都好海鮮價,等得就等X,唔等得都等到年尾減價先買,唔洗急。鍾意駕駛感同在意反應嘅就買2.0啦,1.5係舒服嘅,但浪費左部正車囉。