我不是地球人
2019-05-28 21:12:53
返到市區後,意味著我地要再次同現實生活接軌。亦代表我地嘅生活會回歸平淡。
其實係升中六嘅暑假我地好多時候都要返學校補課。
我每一日都係補課,練波,再唔係就係留喺artroom到做sba。
而佢呢,大致上嘅生活都係同我一樣,但佢用我做sba嘅時間去返part time。
我地比起一開始嗰時少見咗,一星期可能只係見三至四日。但就算見面個時都係各自各做野。
不過有一個突破嘅位就係我係佢屋企已經可以自出自入,而佢爸爸對我都好好,當正我係佢半個女咁,成日問我夠唔夠食讀書辛唔辛苦,最搞笑嘅係會問阿其佢有無蝦我。
我都幾鐘意去佢屋企hea,有個機會俾我感受下家庭溫暖。
其實,我爸爸媽媽都好錫我。
佢地無生咗我出來就唔理我,起碼有供書教學,教我判斷事非,做人嘅道理。
我以前身體唔好,夜晚成日咳到透唔到氣,都係佢地連覺都唔訓咁漏夜送我去醫院吸氣。大概,呢啲就係我僅餘中細個嘅回憶。
仲有一件事就係,我小四暑假個年,係客廳做緊暑期功課時,聽到佢地係房嘈得好勁,爸爸之後係拖埋喼走。
阿哥個時只係中二,但佢拍一拍我個頭講,「佢唔會再返來啦。」
個時我並唔了解發生緊咩事。
到大個後我先知道我爸爸出面收埋咗女人。
雖然,佢地因為我同阿哥無離到婚,但個一日開始,我地已經家不成家。
雖然好似講得有啲遠,但某程度上我覺得我唔太相信愛情唔多唔少都係因為以前屋企背景嘅問題。
嗰晚,同阿其食完晚飯,我坐係梳化望向係書枱埋頭苦幹緊嘅佢,不禁係到諗,我同佢可以走到幾遠呢?