（青春/甜）有人走，有人前來

頭先排版唔係咁好，想你地睇得舒服啲，重post！

第一次係連登寫故，文筆唔係咁好。

如果鐘意呢個故嘅話可以share俾其他人睇，

like，留言，評價都會係我繼續寫嘅動力，多謝支持！

《《序》》
大家好，我叫miko林海韻，今年year3。

啱啱完咗sem，考完final買個頹飯就返到hall。

基本上無野做自己一個嘅時間就係上連登睇下故聽下歌咁。

呢排都係追緊羊格嘅《《女神故》》，每次都會睇到入哂神，除咗故事情節吸引到我外，更重要係令我覺得文字係一個幾好俾自己宣洩情緒嘅途徑。

諗諗下都讀咗三年大學，無論喺自己定人地身上發生過幾荒謬，幾令人後悔嘅事都有聽過，就趁呢個時候記低佢。

LM 支持下

《《一，初戀》》
故事就要由我中五個時講起，我讀嗰間中學平庸，連男同學嘅外表都唔算

特別出眾，平平無奇咁。係十六，十七歲嘅時候，一班女仔都開始會傾下打扮化妝，希望趕得切着住校服去拍拖。

咁啱我間學校就係一間傳統男校隔離，

「喂！！快啲啦！」

佢地咁放學咁趕唔係要去補習。

「佢地就快開波啦！」

而係要去人地間學校睇仔。

「得啦得啦，洗唔洗咁心急，佢地咁多fans點都唔會認得你地啦。」

「你睇下，10號好正喎，就咁睇目測起碼有米八五，攬住佢一定好有安全感啦。」

「係正嘅，但我嘅男神bb都係嗰個隊長，對眼好似識放電咁。」

我聽住班friend咁熱烈討論但我搵唔到插嘴嘅時候，又唔係話唔喜歡打扮，識男仔嘅，只係無動力，懶去做呢啲事姐。

雖然已經中五，但每晚返到屋企食完飯就會入房打機。嗰時基本上每個人都迷上咗玩《英雄聯盟》，包括我在內。

「我得啦，你開房啦。」我同緊電話聽筒另一邊嘅基哥講。

基哥係我嘅小學同學，佢就係讀我中學隔離個間名校，所以大家上到中學後都有聯絡。

「我今日同唔到你雙排。」

「點解啊。」

「因為佢要support我。」聽筒嘅另一邊有一把陌生嘅男仔聲。

「佢係阿其，我同班同學，同埋我地一起打。放心，佢好勁架，你可以無腦打，會 carry哂我地架啦。」

果然打咗兩場，對面都二十投。望一望個鐘，都十二點啦，基哥就話要訓覺。我都未反應得切佢就收咗線。我估佢要同女朋友交人就真。

電話入面就得返我同阿其，係我諗緊點收線時佢就話

「你訓未？再打一場？」

我有啲愕然嘅，又唔識佢，但另一方面又覺得佢咁勁同我打rank升下牌位都好。

咁就開始咗另一場，但我地都無講過野，好尷尬啊。

打到差唔多兩點，真係有啲眼訓，就同佢講我要訓覺啦。

點知佢係個game嘅chat room同我講早抖，但我無覆到佢。

到等第二日放lunch時，收到一個message。

有無人睇！
今晚再up多幾篇

「你琴日咁夜訓，今日有無唔知醒？」

我按入佢icon睇，雖然好細粒，但都隱約見到係一個好高大嘅男仔做緊投籃嘅動作。

「你係？」

「琴日carry咗你幾場，咁快就唔記得咗我。」

頂啊，一定係阿基又話要幫我出pool俾咗我電話佢啦。今晚要話下佢先得。

「無唔知醒嘅，現在放lunch囉。」
我有啲hea咁覆，因為實在唔擅長同男仔打交道。

「係喎，你平時鐘意食啲咩架？」佢好積極咁諗話題。

「前面街口轉角位嗰間上海野！又平又大碟」

「我都好鍾意食個間，不如搵日放學去食？」

下，佢咁樣係唔係約我啊？單獨喎？我地又唔知對方咩樣？到時出到來會唔會好dead air架？

短短幾秒，腦海已經彈出無限個可能性。

我決定唔秒回，隔幾個鐘先覆佢。

「都可以，叫埋阿基啊」

幾日後，我班女仔friend又叫我去睇波，我今次出奇地拒絕咗，佢地都好疑惑。

一出校門，見到阿基同一個好高大嘅男仔。我諗佢就係阿其。本身我對佢都無咩幻想，點知見到真人真係嚇一跳。

完全係標準名校男仔樣，緊身白色恤衫配一條窄腳西褲，再加上一對令到反光嘅尖頭皮鞋。

成個人完全唔似一個中五學生，同人講佢已經出來做野撈緊保險都無人會質疑。

本身佢已經高大加上呢一身裝扮，將佢d優點表露無遺。加上梳咗allback頭，加金絲眼鏡。有陽光氣息外亦散發出陣陣書卷味。

我諗我現在應該成個痴漢咁望實阿其。

「林海韻，唔怪得今日放學你急急腳走啦，原來唔聲唔聲收埋咗啲仔！又唔介紹俾我地識。」

「我地識做啦，唔阻你地啦。」

呢刻個氛圍變得異常尷尬，為咗打圓場我就笑笑口咁同阿基佢地講

「我班friend係咁，唔好介意啊。好肚餓啊，去食野啦！」

坐低在係餐廳到，我坐係阿基隔離，阿其就坐係對面。我真係好怕生，所以成餐飯局都係阿基做主導，不斷咁諗話題。

我都係簡唔中笑吓和應一兩句。諗返起，阿基由小學開始都係我地班朋友嘅中心，又識搞氣氛。我都想成為呢一類人。

「喂，你嘴角仲痴住粒飯啊。留返今晚食？」阿富汗其指住我大笑，作勢幫我抹，我本能反應下避開咗。

我好靦腆咁向佢笑咗一笑，同時望到阿基回報我一個好邪惡嘅笑容，我知道佢將呢一切都睇入眼內。

推！！
夜啲仲有！

好似幾有趣
真人真事?

LM 支持 

食完野返屋企，先知原來阿其同我一樣都係住北角。一上到巴士，我望一望上層嘅「司機位」，有一對父子已經坐咗，唯有睇下後面仲有無剩餘嘅兩人位。

「由細到大，我都鐘意坐司機位，可以喺最佳嘅角度睇街景。」我轉身同阿其講。

尤其是黃昏嘅時候，望住一幢幢大廈嘅單位開始著燈，萬家燈火嘅景像總係叫人暖心。

再望下街上嘅人放工放學，辛苦咗一日準備返屋企，食住家飯，甚至去約會。

自己會有種置身事外嘅感覺，因為我無一個完整嘅屋企，我係一個孤獨嘅人。但其他人永遠唔會知呢個事實。

但今曰坐係我隔離唔係陌生人而係識咗幾日嘅阿其。

「做咩發呆啊，落車啦。」阿其拍一拍我膞頭

「我行呢到啊，拜拜」我向佢笑咗一笑然後道別。

返到屋企無耐，一如概往，一個人都無。靜到連蚊飛過都聽到。

相反，隔離鄰舍嘅屋企就顯得特別熱鬧，歡笑聲，小朋友嘅叫喊聲傳遍成條走廊。

我平時就算係房休息緊，都會開住部電視或者播歌，起碼間屋都會變得有生氣啲。

都算係逃避寂寞嘅一種方法啊。

叮～電話𥚃頭顯示有一則新訊息

推一推，今晚文嘅份量會比較多。

睇捚落去會知。
多謝支持

原來係阿其send過來，影住三餸一湯。

雖然就唔係話好豐富，家常便飯咁。但有我最鐘意食嘅梅菜蒸肉餅。

下面個caption寫住
「你食咗飯未？」

令我諗返起，每逢星期六我都會去婆婆屋企食飯。

自細同佢地關係都好好，因為爸爸媽咪要返工，就係公公婆婆照顧我嘅起居飲食。

次次去親佢地到，第一句就係問我食唔食野。有次，我講肉餅好好食，我就食足一年。

雖然食到好厭，但代表佢地真係好錫我，會將我嘅喜好放喺心中。

「嘩，你有住家飯食啊？好豐富啊！」
我真心用羨慕佢嘅語氣講。
然後影住一張杯麵嘅相send俾佢。

「。。。？咁近，你無飯食上來我地到食都得。我地成日都煮多咗。」

我心中係感激佢嘅好意，但覺得進展得太快啦，所以禮貌地拒絕咗佢。

輕輕一推

推

LM

推

有無人睇緊！

開始覺得呢個男仔幾好人，幾關心自己。

所以慢慢會同阿其講多幾句野。

我地晚晚都會text，講下自己讀咩科，學校邊啲老師出名西，食下身邊朋友嘅花生。當然會carry下我打機啦。

就咁樣傾咗大半個月左右，佢會借d意過來等我放學，然後一起食啲野就返屋企。

有一晚，同阿基雙排，我隨口問。
「係呢，你同阿其好熟架？你覺得佢點？」

佢冷笑咗下
「見到你地呢排咁frd都估到有啲野架啦，點姐，有無機啊？出pool飯唔少得啦。話哂都係因為我介紹你地識。」

我feel到自己個時面都紅哂，連忙係到解釋。
「痴線啦，識咗唔係好耐，可能佢對個個女仔都係咁呢？唔好ff咁多先。」

經過呢晚後，我對阿其了解好似加深咗少少。

聽講阿其成績幾好，雖然未到狀元嘅程度，但入大學甚至半神科都一定無難道。仲要係學校嘅籃球隊骨幹成員。

係中學生嘅層面黎講，我諗呢啲就係所謂嘅「人生贏家」。

呢一刻，我自卑感又作崇。我成績一直喺自己個班都係中游分子，猛車邊先可能入到大學。可能本身自己個人又懶散加上三分鐘熱度。

大部分興趣都得半桶水。鋼琴考到六級；溜冰學到轉兩三個圈就停咗⋯⋯

唉，放棄咗嘅事多到自己都數唔哂。

阿其又點會對我呢d人有興趣啊，睇來都係同佢太close產生錯覺姐。嗯，至少我個刻係咁諗。

Here

多謝支持！
不過我係唔係識你架？

如果你講緊現實，應該唔識
不過你個名同我好耐之前睇過既一本書一樣，所以吸引到我
同埋我好鍾意呢啲故

個故會有啲長，希望你會睇落去啦！