我不是地球人
2019-06-22 23:07:35
我都唔清楚當時係因為咩原因驅使我去做咁不智嘅行為。
明明當初block哂任何social media聯絡途徑就係想令佢快啲忘記我,但現在又係我重新聯絡返佢,將埋藏咗係腦海深處中嘅記憶喚醒返出來。
我見到佢拖住新女朋友嘅時候,心中沒有丁點不爽嘅感覺反而係為佢感到開心。
因為佢做到我最後要佢答應我嘅事情。
入到大學,見識呢個世界,搵一個比我好嘅人。似乎,佢做到啦。
過咗一段時間後,佢覆返我message。
「我女朋友同我講見到你,我今日無帶眼鏡無留意到。sor(笑喊)。」
咩話,佢竟然同現任講我呢個前度。
我陰謀論咁諗咗一諗,佢女朋友係唔係試緊阿其咋,應該無女仔會唔介意前度呢個角色吧。
嗰日,我地text咗全日。
都係交代下大家呢幾年嘅近況。
我記得阿其填jupas時,係aim神科。講緊a1係攞HKU/CU 嘅law。
點知,佢dse失咗手。入咗同我同一間u,不過佢讀緊個科已經係我嗰間u嘅神科。
我本身都奇怪明明大家同一間u,點解會一次都無見過佢,佢就講,
「其實,前幾個月halloween嗰時,我已經喺hall嘅鬼屋撞過你一次,嗰時女朋友都係到,仲要俾我發現你roommate係我女朋友嘅同學。所以唔係好方便同我相認。」
我真係嚇一跳,個世界唔係細撚到咁掛。
咁大大話話我都住咗hall 3年,就順道問下佢有無住,畢竟前幾日我都係喺hall樓下撞到佢。
嗰時先發現原來佢今年要出placement,所以先reg咗hall住,仲要俾人分咗去最摺嘅hall,佢話無嘢玩,common又臭。
講講下,佢提議既然現在大家又變咗鄰居嘅關係,不如搵日落街食碗糖水。
我又無拒絕到佢,覺得幾年無見catch up下都好嘅,同埋一直我都以為佢好憎我,難得佢現在又向我釋出善意。
第二晚,我放咗工後啱啱到樓下地鐵站嗰時咁啱就收到佢message。
「放工未?我啱啱返到hall,食糖水?」
嘩,咁即興嘅。佢琴日講,今日就成事。
「好啊。芝麻綠豆等。」
我到咗十分鐘後,都未見到佢,就message佢問係邊。
「我咪係門口囉,唔見你喎。」
「頂,我係源味,講錯咗,你行返過來啊。」
見到佢嗰時,佢塊面有少少泛紅咁行路又左搖右擺咁。以我推斷,佢應該係飲咗酒。
但係落街食糖水姐,洗唔洗又著到咁行,又好似啱啱返完倫敦金放工咁。佢一見到我又撘住我膞頭,「要我行咁我多路,點罰你好。」
我突然唔識點應對佢好,好似闊別幾年,有一種既熟悉又陌生嘅感覺,覺得佢口花花咗,好似呢幾年多咗好多溝女仔嘅經驗咁。
仲要10點幾嘅時候,已經飲到醉哂咁。
去到糖水鋪門口,入面滿座,我就提議不如買外賣返去食。
本身我係打算喺common食,點知佢話想去我房睇下,我見roommate今晚應該返咗屋企訓,就俾咗佢入去。