有冇人到而家仲玩扭計骰

其實有玩過扭計骰嘅人就會知，忘記就係一切

識人有個 U甜微版扭計骰

PLL 都唔太多
可以記埋

玩到忘我境界
今日上網睇片睇菲神扭，真係好勁

其實最難反而係cross同F2L，因為PLL同OLL只係靠公式，但Cross十字同F2L好多時要靠經驗，要扭得多先知原來咁做可以快啲，通常十字要盡可能七步至八步就已經要扭完，同埋更重要嘅係F2L要扭四組，所以要look ahead先可以更進一步，即係話扭十字嘅時候已經要睇埋第一組點扭，扭第一組嘅時候已經要睇到第二組甚至第三組，扭到第三組嘅時候要知埋第四組點扭，要觀察同預測先可以去到sub 10嘅地步

所以Cross+F2L同OLL+PLL唔同嘅係，Cross+F2L要盡可能觀察、預測同經驗三樣合而為一，而OLL+PLL就係望兩眼一睇到個樣就已經知道係用嗰個公式扭（任何人都係，連菲神都唔例外，佢都會疾一下，但由於平時練慣連熟，所以觀察時間已經係縮短到極限），如果用電腦嘅角度嚟講，就係一早已經喺個腦度有一個Key-Value structure嘅HashMap，只要有個Key（即係觀察到嘅嗰個情況）input去嗰個Map度，之後個Map就已經可以幫你即時Mapping返去相對應嘅Value（嗰條公式）度作為output之後應用返落個扭計骰度扭完

所以點解速解扭計骰會好玩，除咗係因為要背公式，經驗都好重要

Yes，真係好勁，佢哋呢啲高手其實唔止剩係CFOP嘅地步（當然其實好多時都係CFOP嘅），佢哋重會學識六面都可以做底，正常一開始學通常教學會用白色做底，但係如果係高手，可以做到唔同色做底添，因為比賽嘅時候前面有15秒觀察時間，佢哋會盡可能搵邊一面做底會容易啲快啲做到十字嗰一步（不過我諗佢哋應該都會有一面係慣用面嘅），我都未做到呢一點，我只能用白色做底，因為我唔習慣用其他顏色去扭，可能我已經習慣咗白色做底嗰隻配色，所以用其他色就會唔慣扭得慢

同埋除咗CFOP之外，重有人會記埋ZBLL（就係完成F2L之後，如果最上面已經型成咗十字，就可以用ZBLL嘅公式直接完成OLL同PLL）但由於公式超多，所以我諗除咗啲非常熱愛扭扭計骰嘅人先會記，正常去到CFOP就算

另外重有VLS，即係Valk Last Slot，聽個名就知係Valk創出嚟，就係如果F2L完成之前，最後一個pair如果已經黐埋一齊，唔好完成F2L住，因為可以順便利用埋呢個pair輔助去做OLL，但係有成200幾條公式，由於太多，所以亦有人整咗一樣叫Winter Variation嘅嘢，去應對一啲比較常見嘅case，如果唔常見可以直接用返本來OLL公式就算

不過呢啲都係進階扭法，我諗都係啲高手再進一步提升進步嘅做法，如果普通人正常用CFOP練到極致應該都已經可以去到sub 15甚至sub 10，如果要去到世界級高手嘅程度，例如參加比賽已經去到樽頸位，先會考慮上面啲做法，例如話sub 7之後

其實係，仲有好多唔同嘅method
不過真係要好有心學先得
自問自己雖然鍾意玩，但未去到咁嘅情況
所以覺得佢地：菲神，Valk 果啲真係好勁

琴日凌晨已經背完啲公式 2:26
跟住今日成日喺度扭 頭先再計時 1:56
快咗唔少但係都係勁慢

點會咁快，起碼要一排先會練熟，用最簡單嘅LBL練到熟通常可以1分鐘內扭完，甚至40-50秒左右，要再快啲就要學少少CFOP，可以入30秒內

7X7
粒骰好大，家中最大係4X4

睇起嚟會好kick
想買粒，不過4x4都唔識解

37秒玩完

係淘寶買左gan460m
都係260 hkd
希望好好扭

因為係反斗城個d 黎 好似都百幾蚊
但扭落去好實 同 會卡
有d 位扭快d 先記得 一慢就會load 唔到
一快就卡 一卡就用力 最後入面斷左
然後諗住拆開佢拎番斷左個條野就黎
點知啪番入去個時 斷埋第邊
正式報廢

其實想快應該要打好基本功 起碼你要練每轉一個step都係90度先唔會令你轉轉下卡住 pll同oll記常見個幾個已經可以好快 反而我覺得想大幅度進步應該要練搵十字同好好理解f2l

其實玩具反斗城嗰隻先係原版官方扭計骰rubik's cube，不過就比較重同卡同大嚿，冇做過啲咩優化

香港有無實體店賣 想平平地買個ok既

西九龍中心上面啲格仔鋪，搭電梯上去就見到

旺角奶路臣街同女人街交界 見過有一檔有賣

唔該晒樓上兩位巴打 睇左人扭好耐但自己一直無都扭

本人都覺玩具反斗城果啲唔好扭
而家果啲3X3 都要成70幾蚊（好似）
心諗咁嘅價錢已經可以買到好扭嘅

如果平平地就有隻叫聖手
都okay 順
果啲格仔舖都應該有