［極高質分享］膠登簡易歐洲史入門

唔緊要，我地等你
take care and 玩得開心d

今晚落機會抽時間up返幾篇

膠登仔都睇得明既簡易西史入門第廿三集:海上最強+陸上無敵VS全歐洲-人類第一場世界大戰-七年戰爭

1493年3月15日星期五中午 一架帆船出現係西班牙西岸既帕洛斯港
十七集之前既事終於有結果
當年個隻乞衣基斯杜化·哥倫布幸不辱命終於帶住副伊莎貝拉既私己返黎
隨行既仲多左幾個衣衫襤褸既"印度人"

斐迪南同伊莎貝拉接見哥倫布

呢個只係小小既開始
對於大西洋兩邊既人黎講都係

係十四,五世紀蒙古帝國冧檔鄂圖曼入侵令陸上絲綢之路完全中斷
歐洲只可以經義大利商人從鄂圖曼人手上買到少之有少既東方商品
為擺脫壟斷 係歐洲盡頭既兩個國家行上左佢地前往亞洲既探索之路

最先葡萄牙嘗試兜過非洲前往印度 終係由1498年瓦斯科·達伽馬到達印度
不過要兜過成個非洲先去到印度 運輸成本略嫌太高
西班牙人就醒得多啦
你睇下我個哥倫布兜地球一圈就去到印度啦!!我而家只要搵到印度係邊就得啦

1504年義大利航海家亞美利哥·韋斯普奇到達南美洲最南既巴塔哥尼亞証實美洲係個新大陸
而家兩邊都冇優勢啦

十六世紀既世界地圖

係非洲 印度洋 南太平洋葡萄牙人績極發展佢地既香料貿易
都叫賺到少少錢
係美洲西班牙人發現個到D山番唔知點解有好多黃金
唔理三七廿一殺晒佢地抬晒D金返屋企先
西班牙人都賺到少少錢

之不過佢地兩國既殖民地事業好快就遇上阻滯
葡萄牙本身係歐洲小國仲要有個唯一競爭對手兼強鄰西班牙
佢係世界各地既殖民地都遇上人手不足加西班牙包圍
而西班牙殺晒美洲山番之後面對大片冇人冇物既爛地
旁大既殖民地反而成為國家既負累
係美洲既西班牙人只好日撚日對撚住呢幅爛地發牛豆
有日突然佢地靈光一閃
其實我地可以係到種返D野

歐洲之所以對東方商品需求咁大係因為我地歐洲生產唔到
點解生產唔到啊?因為氣候唔同
既然難得我地黎到個同歐洲氣候唔同既地方不如我地試下種D歐洲種唔到既野啊
就係咁西班牙係美洲既殖民地就開始種甘蔗 煙草 咖啡 棉花
好快佢地又遇到另一個問題

唔夠人

死剩個班印第安人本身就體弱多病再加埋係歐洲過黎既西班牙人都唔足以耕到幅賺到錢既田
呢個時候 係西班牙本土既西班牙人又諗到另一招

非洲咩都冇有既剩係人
美洲咩都冇有既剩係地
歐洲咩都冇有既剩係野心
結果顯而易見

首先係佢地係歐洲徵召軍隊上船去非洲
軍隊去到非洲捉奴隸上船再運去美洲
奴隸係美洲耕田將原產品運返歐洲
然後再將原產品係歐洲銷售賺到既錢黎請軍隊去非洲
完美既自給自足經濟!!
呢招就叫三角貿易啦!!

三角貿易

從此呢一門唔再係小生意
西葡兩國既殖民地利益吸引全歐洲走上海洋之路
首先1606年4月10日英國商人約翰·史密斯得到王家特許狀成立維珍尼亞公司 授予從東岸到西岸全個北美洲既發展權
佢地第一批108個殖民者係第二年1607年5月出發前往北美洲建立英國係北美既第一個殖民地詹士敦
慢慢維珍尼亞公司發展成遍佈東岸既北美十三殖民地
而英國另一批探險家就沿巴芬灣尋找前往亞洲既北方水道
與此同時法國既探險家同殖民者從聖勞倫斯河登陸經大湖區沿密西西比河到達加勒比海
截斷英國北美殖民地西進道路 壟斷當地既皮毛貿易

法國北美殖民地 東面除西班牙既佛羅里達外係英國北美殖民地

歐洲人係全世界不斷探索尋找新既人口 新既土地 新既資源 新既殖民地
直至到十八世紀 歐洲人終於行世界既盡頭
佢地既經濟亦都行到盡頭啦

歐洲人開始認識到一套理論
市場規模=貨幣(黃金)流通量
一個國家擁有愈多黃金佢可以買既野就愈多
而佢擁有既商品種類愈多佢就可以係愈多既國家身上賺取更多既黃金
當然最理想既緊係自己可以生產一切商品成為國際間唯一既出口商
不過呢種目標代表你要搶盡世上每一吋殖民地
係你達到呢個目標之前你總有必須入口既商品
咁又返返去原點 當你入口商品就代表你黃金既流出
黃金既流出就代表市場既委縮
要唔影響自己市場規模既條件下維持自己既國際貿易順差 方法只得一種
短期既 增加關稅
長期既 搶奪競爭對手既殖民地
結果歐洲同佢地係全世界既殖民地都變成一座座既大軍營
而係佢地既邊境 稅吏比軍隊仲要多
呢D就係重商主義
呢個就係今集故事既背景

返到奧地利王位繼承戰爭未期既1747年大西洋對岸法國北美殖民地
當地既法軍組織左支部隊入侵俄亥俄河谷希望驅逐英國毛皮商人拉攏印第安人從而壟斷毛皮貿易
英國商人見到大軍當然落荒而逃 但進駐俄亥俄河谷後既法國佬驚異當地既印第安人早就英國化左
佢地每個都講流利英文 普遍都唔願意加入法國 最重要既原因係英國願出更高價同佢地做生意
到1748年10月18日簽署第二亞琛和約奧地利王位繼承戰爭結束
英法間關於北美殖民地條款只限於英國歸還係奧地利王位繼承戰爭中佔領既路易斯堡同新斯科舍
俄亥俄河谷問題懸而未決 英法雙方都宣稱自己擁有俄亥俄河谷

起先1749年英國維珍尼亞俄亥俄公司帶100戶人進入俄亥俄河谷定居同修建堡壘
回應維珍尼亞公司既行動1752年法軍開始襲擊英國既貿易營地同親英既印第安人
然後從大湖區沿俄亥俄河修建一連串既堡壘壓止英國既擴張
1754年維珍尼亞公司下令一個廿一歲既民兵中校出兵突破法軍防線
佢個名叫佐治·華盛頓

青年華盛頓

係北英殖民地之間既武裝衝突早就係日常茶飯
雖然佢地遠係歐洲既宗主國唔會因為咁而爆發全面戰爭 但無疑已經挑動左佢地既神經

自三十年戰爭結束以黎英國一直奉行權力均衡既外交政策 防止任何國家坐大至足以威脅英國既利益
係奧地利王位繼承戰爭英國利用漢諾威選侯既身份試圖減弱奧地利係德意志地區既影響力
選舉既結果就係引黎全歐洲對奧地利既圍攻 呢個時候英國先驚醒自己玩大左急急加入奧地利陣營
英軍係西線獨力支撐法國西班牙圍攻 但背後傳黎既係奧地利被普魯士節節敗退既消息
係佢地英國老家既民意亦對呢場戰爭愈黎愈反感

呢場不過係佐治二世要保住佢個漢諾威領地既戰爭姐!!
為首既係同首相亨利·佩勒姆同樣係輝格黨既騎兵軍官下議院議員威廉·皮特 一個印度鑽石商人既仔
因為威廉·皮特對內閣既嚴厲批評惹黎佐治二世反感令佢係政壇上一直不得志
即使輝格黨長期執政佢都只可以成為執政黨內既反對黨亦因為咁而令佢係議會外贏得民意
不過係歐陸東線戰場普魯士兩次擊敗奧地利 加上首相亨利·佩勒姆既內閣總辭
最後佐治二世亦不得不面對現實退出戰爭

威廉·皮特

1754年3月6日亨利·佩勒姆過身在野既托利黨密謀反撲
托利黨因有支持詹士黨既傾向而一向不得王室喜愛 但為應對托利黨既挑戰輝格黨屬意受民眾歡迎既威廉·皮特出任首相
但又到佐治二世唔老黎囉喎 最後佐治二世交出一個折衷既方案
OK亨利·佩勒姆既啊哥第一代紐卡素公爵湯馬斯·佩勒姆-霍利斯做首相 佢個內閣點組我由你

就咁威廉·皮特進入內閣成為下議院領袖 成為首相紐卡素公爵湯馬斯·佩勒姆-霍利斯背後既實權者
佢上任後既首要工作就係重整外交政策
雖然自大同盟戰爭以黎奧地利一直係英國長期既盟友用黎軒制法國既威脅
但係奧地利王位繼承戰爭中奧地利已經証明左佢地既軍力再唔足以保護英國係歐陸既利益
特別係新入主英國王室既漢諾威選侯佢既土地正正夾係法國普魯士中間
佢地絕對唔會希望普魯士成為自己既敵人
而且威廉·皮特正謀求一個擁有更可靠陸軍既國家去做佢地既後盾
普魯士之外不作他選

對普魯士而言
係奧地利手上搶走富裕既西里西亞既仇恨加上同樣新興既俄羅斯西進既壓迫
呢個新興既國家都急需可靠既盟友應付隨時降臨既戰爭
對於盟友既渴求 佢已經饑不擇食
當英國大使搵到上門兩國一拍即合1756年1月16日英普簽訂白廳條約 兩國承諾確保對方領土完整

威廉·皮特既外交革命

英國佬你冇可能食兩家茶禮既 既然你歸左邊我都會表態
對奧地利而言
奧地利王位繼承戰爭後 係隔離街法國既威脅已經比唔上門口既普魯士
白廳條約簽訂後奧地利都急需成立自己既陣營對抗英普既威脅
奧地利第一個搵到既係有普魯士呢個共同敵人既俄羅斯
第二個雖然同哈布斯堡長期敵對但而家係同英國係殖民地上唯一既競爭對手法國
跟手仲有因為唔夠俄國佬打但至少希望可以係普魯士手上搶返瑞屬波美拉尼亞既瑞典
再加埋後面個班自動歸邊既西班牙 薩伏伊 巴伐利亞 薩克森 那不勒斯
1756年5月1日簽訂凡爾賽條約締結攻守同盟
奧地利團結全個歐洲將普魯士重重包圍

知驚既就交返西里西亞出黎啦 死基佬

藍色英普聯盟 綠色法奧俄聯盟

5月18日法國海軍突襲英國梅諾卡島 法奧同盟對英普同盟正式宣戰
鎮守梅諾卡島既海軍上將約翰·拜恩不敵逃回直布羅陀被處決

哇哇哇出事啦開拖啦 連地中海既春袋梅諾卡島都失守啦 威廉·皮特我地快D徵召陸軍掟去歐洲打獲法國佬唔係就扑街啦
ON9冷靜D湯馬斯 冇左地中海既春袋梅諾卡島姐 地中海既屎眼直布羅陀仲係我地手
只要我地仲守得住直布羅陀法國既地中海艦隊同大西洋艦隊都冇辦法會合 相反我地一支大西洋艦隊就打晒全世界
仲有我地珍貴既英國同胞點可以送入歐洲大陸呢部碎肉機到呢 送死既工作就交比普魯士啦唔係我地同佢結盟做咩
海軍!!北美洲係我地大不列顛未來最大利益 我地只需要海軍就夠
但係冇陸軍 歐陸戰場輸晒 得堆木板浮係大西洋中心冇意義個喎?
你唔明既睇我表演啦

梅諾卡戰役後既漫畫 法國公雞咬住英國海軍旗 英國獅子比人斬左隻手(梅諾卡)

8月29日腓特烈二世亦帶住佢既軍隊離開普魯士
佢既戰略係係奧法攻入西里西亞前攻佔門口既薩克森 然後再帶住薩克森既降兵佔領波希米亞
係波希米亞過冬之後再從摩拉維亞進入奧地利結束戰爭

最初進展順利普軍用一個月就佔領左薩克森
但10月1日係羅布西茨遭到三萬五奧軍反撲
由於普軍大部分係到包圍薩克森最後據點皮爾納
腓特烈二世只係勉強湊夠三萬人去迎戰

三萬五奧地利軍坐落羅布西茨村西面 北面係易北河 從北向南面向西面展開戰線 大炮同騎兵放係左翼
普魯士軍地形差得多 佢地被夾係兩坐山中間只能勉強展開一條好短既戰線
因為戰場比大霧濃罩 腓特烈二世冇辦法確認山口外奧地利軍既布置
但奧地利軍大炮不斷向山口方向掃射重挫普魯士軍

朝早5點奧地利軍兩翼步兵開始前進 從普魯士軍左右兩坐大山上包圍普魯士軍
兩軍係兩坐高地上展開攻防不分高下
到11點腓特烈二世決定沽諸一擲下令右翼既胸甲騎兵穿過奧軍戰線摧毀奧軍炮兵陣地

普軍既胸甲騎兵穿過一層層既奧軍戰列終於衝到奧軍大炮面前 勝利在望
但係個到等緊佢地既係奧軍騎兵主力

普軍騎兵雖被奧軍騎兵擊退但又無法穿過奧軍步兵返回普軍陣地
結果戰場南方演變成普軍步兵 奧軍步兵 普軍騎兵 奧軍騎兵四層大混戰
對住呢一塌既糊塗腓特烈二世都有D心灰意冷準備下令撤退

今次既奧地利人有D唔同...

不過佢姐夫布倫瑞克-沃爾芬比特公爵斐迪南即刻出黎阻止佢
如果你呢到撤退左奧法俄就會打到去你門口 你呢世都只可以匿係屋企入面 到時你想打都冇得打
呢場仗你唔識打既我打比你睇!!

布倫瑞克-沃爾芬比特公爵斐迪南

晏晝11點大霧散去布倫瑞克-沃爾芬比特公爵斐迪南親自帶領左翼普軍反攻
咪撚再射啦全部同我上刺刀!!衝啊!!
戰列兵既掃射變成白刃戰 普軍步兵化作後面炮兵既肉盾 掩護大炮前進
直至炮兵前進到羅布西茨村進入佢地射程範圍 普軍炮兵用榴彈將羅布西茨村炸成一片火海
駐紮係羅布西茨村入面既奧地利軍紛紛逃出
係村口既普魯士軍再次發揮斯巴達精神以一當百
兩軍各死三千 普軍險勝
10月16日皮爾納投降

羅布西茨戰役

得到薩克森既財富 軍隊 仲有英國每年67萬磅既援助普魯士已再無後顧之憂
1756年冬天過後普魯士出兵波希米亞1757年5月6日到達布拉格城外
守城既係大家好耐冇見既老朋友卡爾·亞歷山大
出現了...出現了...腓特烈又出現了...

雖然絕望但場仗硬住頭皮都要打
卡爾·亞歷山大將佢個六萬三人駐紮係城東既高原上面希望可以靠地形離補指揮上既不足
山下既普魯士軍開始發動進攻 但係普軍左翼既前進路線上竟然踩上左片沼澤到
普軍左翼陷於苦戰 就連當年莫爾維茨會戰中既老將施維林亦當場戰死
好彩錯有錯著奧地利右翼因追擊普軍潰散既左翼令奧軍戰線出現缺口
腓特烈二世帶中路插入兩軍中間截斷佢地既支援再派隊驃騎兵兜到奧軍後方
到呢個形勢奧軍亦不得不退入布拉格城中
雖然戰術上普軍係贏左 但奧軍以八千死亡換黎普軍萬五損失
卡爾·亞歷山大總算為奧軍爭取左個有利既守城條件

布拉格戰役

膠登仔都睇得明既簡易西史入門第廿四集:美國獨立

1620年9月6日英國南部德文郡既普利茅斯有102個乘客坐上一架叫五月花號既貨船前往英國北美殖民地
其中有35個係清教徒 佢地難忍詹士一世呢隻蘇格蘭山番既管治決心冒險游去新世界去建立佢自己既新世界

五月花號

雖然距離哥倫布發現新大陸已經經過百幾年 但航海技術並冇太大進步
風暴 爛船 營養不良每一樣因素對船上每一個人黎講都係致命既
係當時只有最勇敢同最命賤既人先會願意或被逼前往新大陸開荒

經過兩個幾月大西洋中心既飄浮 五月花號終於見到陸地
最初佢地既目標係維珍尼亞公司係哈德遜河既殖民地
但風暴將佢地吹左去紐芬蘭 係個到佢地同當地既印第安人買左D食物之後繼續南下
最後佢地都係趕唔切係約定時間前到達目的地 佢地就只好隨便搵左個地方落船
呢日係11月11日 正直北美既嚴冬 眼前一片蠻荒
兩個幾月既忍耐全船人終於爆發
我諗住黎北美洲開荒姐!!衰衰地本來都有個殖民地啊!!點都未至於荒到呢個地步話!?係呢D地方呢D時勢我地要點生存啊!!
最衰都係你!!唔係係你錯!!係你錯!!你錯!!
絕望同憤怒係零秒中散佈到103個船員間

全部咪嘈!!而家我地人就係咁多面對既就係呢種環境 要嘈就為解決問題而嘈
我地黎到呢到再冇領主貴族 人人平等自由 你要做咩冇人逼你冇人阻你
你想死既即管去 你要屌既屌飽佢 但你絕唔會因此得救
為脫離困境我地一齊簽條契約共同遵守互相合作渡過難關OK?

最後後呢班人簽署五月花公約發誓
為上帝既榮耀 為增加基督教既信仰 為提高我地國王同國家既榮耀 我地飄洋過海 係維珍尼亞北部開發第一個殖民地
我地呢班簽署人係上帝面前共同莊嚴立誓簽約 自願結為民眾自治團體
為使上述目地能得到實施 維護同發展
將來不時依此制定頒佈認為係對殖民地全體人民都最合適 最方便既法律 法規 條令 憲章同公職
我地都保證遵守同服從


OK發完誓就要落手做野啦
為記念當年我地係普利茅斯出發 呢到就改名叫普利茅斯啦
之後呢103人採果又好 打獵又好 釣魚又好人人各出奇謀收集食物但都冇辦法係呢個默生既環境餵飽肚
再加上寒風暴雪 一個冬天過去佢地就死左47人

第二年春天降臨 僅餘既英國人決定出去探索下有冇更適合生存既環境
行行下突然係草叢入面彈出一個印第安人
仆街!!條山番會唔會食人架!?
Hey!!What are you doing here?
下?你講乜7?我餓左太耐精神錯亂?點解條山番講英文既?

條山番原來叫史廣多 幾年前比英國佬笠左返去做奴隸
幾個月前先著草返返黎 點返到黎成條村死晒
佢而家無親無故寄人籬下住係隔離村到

史廣多

知道左班英國佬既處境之後史廣多返村到攞左D種子教班英國佬點耕田打獵
係史廣多幫助下經過半年既耕耘 呢56個幸存者都得到豐盛既收穫可以過一個飽暖既冬天
係佢地登陸一週年前一星期既11月4日 英國佬準備左個大餐請埋佢地既印第安好友史廣多一齊感謝上天既恩賜
人齊入席宴會開始 但又點知突然成村印第安人衝入黎話要食埋一份
唔係啊話 我地自己食都勉勉強強咋喎 我地仲要留食物過冬添 要推又唔好意思...

原來佢地都帶埋更多既食物黎 而家唔好話宴會食自助餐都得啦 兩條村既人狂歡一日一夜
既然咁開心就唔好比佢停囉!!以後每年今日我地都要大肆興祝紀念今日感謝上天對我地全部人既恩賜!!呢日就叫感恩節啦!!

感恩節

如是者北美既英國人慶祝左感恩節一百四十個年頭 1763年2月10日巴黎條約簽署英國趕走法國得到全個北美洲
當年既荒地被開墾成英國北美十三殖民地既麻薩諸塞殖民地 跟隨五月花既腳步麻薩諸塞亦成為美洲清教徙同其他加爾文宗派既聚居地

係巴黎條約簽署七年戰爭結束後
失去左法國既競爭係東岸既英國殖民者個個帶住佢地既黑奴爬過阿巴拉契山去舊法國殖民地尋找新既農地種植更多既甘蔗 煙草 咖啡 棉花
蜂擁而至既英國殖民者強烈侵害左當地印第安人既生活同利益
七年戰爭結束後三個月 大湖區既印第安人爆發朋提阿克戰爭反抗英國殖民入侵

好地地打完仗又要搵筆錢鎮壓當地既印第安人 條數當然唔襟計
就咁係1760年10月25日接替佢病死既啊爺成為英王既佐治三世就頒布1763年皇家公告限制東岸既殖民者唔可以再爬過阿巴拉契山
而家又要養起北美駐軍既軍費 又有七年戰爭七千五百萬磅既負債等找
十三殖民地你地而家咁好景條數一於由你地咩啦 因為場仗係因你地而起既

佐治三世

共產主義唔共產 重商主義唔重商
係重商主義之下冇人做得成生意 人人都只可以做走私
因為關稅多而繁重
宗主國為禁止殖民地以低價出口原產品到其他國家 佢地都會對出口商品抽非常高既關稅
相反佢地卻又只會出非常低既價格從自己既殖民地買入產品
而全歐洲同佢地係全世界既殖民地都用同樣既經濟秩序時
特別作為原產品出產地既殖民地
雖然對宗主國而言佢地只係原產品出產地 但佢地自己都有佢地既消費需求
走私商人就應運而生

早係克倫威爾時期英國已經通過左航海法案限定只有英國及其殖民地所擁有同製造既船隻先可以運裝英國殖民地既貨物
其他國家既產品必須先經由英國本土再轉口到英國殖民地

到1764年英國既負債已經上升到一億二千二百六十萬磅
英國已經窮到懶得同法國西班牙殖民地係關稅上既競爭
4月5日英國國會通過食糖條例限制十三殖民地只能購買英國既食糖 咖啡 酒
呢條法律意味北美殖民地既物價上升 商人生意範圍收宅
加強走私貨品係市場上對合法商人既競爭
然後就係大量貴金屬流出做成惡性通漲
十三殖民地居民民不聊生個個要求撤回食糖條例
係對面海既英國國會就從經濟上回應北美殖民地居民既訴求通過1764年貨幣條例批准北美殖民地發行十二萬磅既紙幣
哇屌你真係王恩浩蕩喎 拆我間廠請我食粒糖!?

都仲未夠 到1765年3月18日英國國會再通過印花稅條例
英國對十三殖民地既全部印刷品直接徵稅
喂屌你仲有無限開稅添啊!?你不如禁住搶!?根據1689年權利法案冇議會同意國王不得徵稅
係 你係得到"你地既"議會同意黎抽我稅 但我地係未同意過呢個議員個喎
唔通呢到唔係英國既土地?定我地唔係英國人啊!?
無代表權就唔交稅!!
英國十三殖民地居民開始杯葛樣樣收稅既英國商品

1765年10月除新罕布什 維珍尼亞 北卡羅來納 佐治亞以外十三殖民地既代表齊集紐約市召開印花稅條例會議
佢地向倫敦發表權利和申訴聲明要求停止海事法庭 只有殖民地既議會有權向殖民地徵稅 殖民地居民要有同英國居民同等既權利

當權利和申訴聲明送到去倫敦佢地終於知出事啦
時任首相係輝格黨人第二代羅金漢侯爵查理·屈臣-文特沃斯
故物論殖民地既不滿 但佢地既杯葛的確已經損害左英國本土商人既利益
為安撫十三殖民地羅金漢侯爵決定撤回印花稅條例
另一方面佢又發表聲明法令指出英國國會係擁有對全球殖民地既全部權力即使佢地係國會冇代表
後者無疑係對十三殖民地火上加油 而前者更加辣慶左佐治三世

佐治三世不滿羅金漢侯爵向殖民地既叛亂份子妥協改為親近托利黨
為挽回國王支持輝格黨改選威廉·皮特做首相 佐治三世就為呢個富商後人加個貴族封號漆咸伯爵
但到1767年威廉·皮特因病請辭 第三代格拉夫頓公爵奧古斯都·菲茨羅伊接任首相
格拉夫頓公爵明白到十三殖民地係唔會接受任何英國及其殖民地間既關稅
咁佢既財政大臣查理·唐森德就發明左招叫唐森德條例
所有外國入口十三殖民地既玻璃 染料 茶葉 鉛 紙 都要收稅
咁樣無論英國商人定殖民地商人都會滿意而我又保住左我地既貿易利益 我真係好撚醒

但唐森德條例真係落到十三殖民地時佢地又屌那媽啦
一我地講既係你冇權收我地稅 二你呢條稅依然會抬高左我地物價之餘收返黎既錢仲要落你袋
其中麻薩諸塞議會親自出面向倫敦發表麻薩諸塞通函要求撤回唐森德條例
格拉夫頓公爵收到之後反而下令要求麻薩諸塞總督解散議會
維珍尼亞議會跟隨表態反對未經當地議會批准既稅項 跟手亦被解散埋

雖然格拉夫頓公爵企咁硬 不過出橋個個查理·唐森德就代佢咩鑊比佢炒左
繼任個個叫腓特烈·諾斯勳爵 托利黨人
1770年格拉夫頓公爵請辭之後升埋做首相

對住十三殖民地 托利黨冇前任輝格黨咁和善啦
托利黨姐係今日既保守黨 強項係服侍商界同幫國王擦鞋
諾斯勳爵接任首相後擺出強硬態度不斷增兵十三殖民地 特別係已被解散議會既麻薩諸塞
其中只有萬六人口既首府波士頓就已經有四千英兵
再到1773年英國國會再通過茶葉條例只限英國東印度公司可以係十三殖民地銷售茶葉

波士頓英軍投降

6月7日麻薩諸塞代表約翰·亞當斯 賓夕法尼亞代表班傑明·富蘭克林 維珍尼亞代表湯馬斯·傑斐遜 紐約代表羅伯特·利文斯通 康涅狄格代表羅傑·雪曼向大陸會議上呈美國獨立宣言
我地認為呢D真理係不言而喻：造物者創造平等既個人 並賦予佢地若干不可剝奪既權利 其中包括生命權 自由權和追求幸福既權利
我地係為保障呢D權利而建立政府 而政府既正當權力來自被統治者的同意
任何形式既政府破壞上述目的 人民就有權廢除佢並建立新政府
新政府賴以奠基既原則 得以組織權力既方式 都以最大可能增進民眾既安全同幸福
過去的一切經驗都說明任何苦難只要可以忍受既人類都寧願容忍而無意廢除佢地習慣已久既政府黎恢復自身權益
但係當政府一貫濫用職權 強取豪奪 一成不變追逐呢個目標 旨在將人民置於絕對專制統治之下
人民亦有權利同義務推翻這個政府 並為佢地未來安全建立新保障


7月2日二萬英軍登陸斯塔滕島
7月4日大陸議會簽署美國獨立宣言 美利堅合眾國成立
8月27日斯塔滕島既英軍過河係布魯克林山擊敗一萬美軍 華盛頓退守曼哈頓
然後英軍又係布朗克斯登陸從後包圍曼哈頓既美軍 成個戰區既美軍兵敗如山倒
11月18日美軍撤出紐約市經新澤西退入賓夕法尼亞 美軍又要求返鄉下過冬啦
呢鋪真係走剩華盛頓一個
美國獨立戰爭今次真係都此為止啦...

紐約及新澤西戰役

12月8日英軍進入新澤西係特拉華河邊既特倫頓紮營
因為美洲基建落後遠離港口又大雪紛飛 前線得唔到後方任何補給
係咁後方司令部就下令 就地徵集物資!!
前線士兵一收到命令就衝出軍營大肆搜掠
成個新澤西任攞唔嬲啊!!今日係英軍既黑色星期五!!我地都過我地既感恩節啦!!
徵集物資變成殺人放火姦淫擄掠軍紀失控
結果既搶掠激起新澤西人民既反抗 本來匿係屋企"過冬"既民兵都走返晒出黎偷襲落單既英軍
12月26日華盛頓係賓夕法尼亞召集新一批美軍溜夜游過特拉華河偷襲英軍新澤西營地特倫頓
失去左特倫頓其他係新澤西既英軍又逃返入紐約 美軍重奪新澤西(世紀帝國3戰酋第一個劇情第4關)
華盛頓渡過特拉華河

冬天過去1777年 係加拿大既英軍決定南下支援受困於紐約既英軍
9月19日八千英軍進入紐約既薩拉托加 係路經費曼農莊時遭到美軍偷襲損失千幾人
比美軍一貫既遊擊戰術偷襲成功既英軍就向北退守係貝米斯高地 希望係駐守開揚既高地上令美軍知難而退
但周邊地區既民兵得知呢到有支戰敗英軍紛紛往薩拉托加聚集
到10月7日短短一個月間美軍吹雞已經吹到上二萬幾人 被多近三倍敵人包圍英軍被逼棄械投降
八千加拿大主力連同佢地身上既裝備全部落入美軍手中 自此英軍係陸上再無發動進攻既能力(世紀帝國3戰酋第一個劇情第5關)
薩拉托加戰役後諾斯勳爵向佐治三世請辭
SORRY啊陛下之前係我吹大左...其實場仗真係冇得打架啦...
乜撚野冇得打啊!?我絕對唔會承認比呢班叛國賊獨立!!你同我死都死掂佢!!

薩拉托加投降既英軍

12月大陸會議賓夕法尼亞代表班傑明·富蘭克林前往歐洲大陸尋求各國支持
第一站係英國既死敵法國
時任國王係22歲既路易十六係1774年繼承佢病死既啊爺路易十五成為法國國王
雖然自開戰以黎美國每場仗都似比人打到亡國既邊沿 但每次都可以靠國民既團結反敗為勝
班傑明·富蘭克林攞住波士頓 新澤西 薩拉托加既戰果晉見路易十六 對佢黎講呢場仗無疑係好大吸引
如果美國真係成功獨立 英國係七年戰爭既成果將血本無歸
路易十六下令政府為美國提供武器援助 而佢自己亦私下出資一百萬里費爾
除左路易十六仲有個熱血青年深受美國人民既事蹟感動
佢係19歲既拉法葉侯爵吉爾貝爾·杜·莫提耶
美國獨立係全世界熱愛自由既人既福祉!!
得知法國決定援助英國 拉法葉侯爵亦親自出資組織左支軍隊出發美國
1778年6月法國對英國宣戰 1779年6月西班牙對英國宣戰
荷蘭跟隨發起海上中立武裝運動聯合歐洲各國人道支援美國
1780年英國對荷蘭宣戰

拉法葉侯爵吉爾貝爾·杜·莫提耶(誤)

拉法葉侯爵吉爾貝爾·杜·莫提耶(正)

波旁家族既海軍一支支駛入大西洋 歐洲既武器物資一箱箱卸落美國碼頭
英軍係北美失去一座又一座既據點
轉眼間到1781年英軍係北美既據點只剩低紐約市同維珍尼亞既約克鎮
10月19日係法國海軍包圍下約克鎮英軍投降 諾斯勳爵正式請辭托利黨下台(世紀帝國3戰酋第一個劇情第8關)
1783年9月3日英美簽訂巴黎條約
大不列顛聯合王國承認美利堅合眾國獨立並從美國領土撤出全部軍隊

約克鎮投降既英軍

1787年5月25日大陸會議召開費城會議商討美國未來既憲法
1787年9月17日費城會議通過美國憲法通過
1788年12月15日美利堅合眾國第一屆總統選舉投票開始
候選人分別有前大陸軍總司令佐治·華盛頓 前駐英國大使約翰·亞當斯 美國外事局局長約翰·傑伊 麻薩諸塞州州長約翰·漢考克



晚年佐治·華盛頓

1788年1月10日點票結束
佐治·華盛頓全取十州69張選舉人票當選第一屆美國總統
一個新既國家 世上第一個冇皇帝冇貴族人人平等而自由既國家就咁誕生
熱血青年拉法葉侯爵向第一任美國總統佐治·華盛頓道賀告別後就搭上法國軍艦回國
係艦上拉法葉侯爵望住呢個新生國家 心中既熱情依然難以平伏
民主自由 人權法治 平等博愛 幾咁美好既詞彙但願我既祖國都可以有咁既一日
跟住佢返去既除左佢滿腔既熱血同夢想仲有身心疲敝既法軍
同佢地手上既美國獨立宣言

剃人頭者人亦剃其頭
拉法葉侯爵岩岩剃左英國個頭

係巴黎既凡爾賽宮 年青國王路易十六望住份新出版既世界地圖 睇住英國既顏色係北美洲消失左一半難掩心中喜悅
啊爺係七年戰爭既仇我報左啦

佢係比人剃頭個個

下集法國大革命

膠登仔都睇得明既簡易西史入門第廿五集:法國大革命篇第一集:係巴士車底開始既一日

1775年6月巴黎 路易大帝高中
新加冕既法國國王路易十六從加冕地蘭斯返回巴黎途徑我既母校
作為全校拉丁文成績最優秀既我代表全校向國王獻辭
呢日大雨滂沱可能咁令國王有所延誤 我地全校師生從朝早開始一直係學校大門等待國王大駕
到黃昏國王既車隊先珊珊來遲 我代表學校上前準備朗讀獻辭 然後係馬車入面傳黎一把女人聲
伊~老公啊~出面咁大雨我地快D返屋企啦
然後國王既車隊留低全校師生係大雨中目送佢地繼續返回凡爾賽

VIVE LE ROI
又係既 佢係國王 呢D好小事姐
呢年我17歲

其實故事早係1729年已經開始
當時熱那亞共和國治下既科西嘉島發生抗稅暴動 最終係1755年脫離熱那亞獨立建立科西嘉共和國
因為熱那亞無力鎮壓佢就將科西嘉賣比法國 1769年法國吞併科西嘉島
呢年科西嘉有個獨立派既貴族生左佢第四個仔 係叢林入面遊擊既生活令到佢個細仔營養不良肚煲生癬日r夜r
個老豆唔想再令家人受苦 因為咁佢背叛自己既戰友走出叢林投向法國成為法國既貴族從此過上唔錯既生活
而佢個營養不良肚煲生癬既仔後來亦得以入讀法國既軍事學校
不過呢D都係D唔關事既野

係18世紀俄羅斯普魯士兩國相繼掘起結束左法國奧地利兩國自義大利戰爭以黎長期敵對狀態
1763年七年戰爭結束後法奧兩國王室為加深雙方關係開始商談一樁婚事
法國國王路易十五繼承左佢太爺路易十四長命既基因 到1766年佢所有仔都死晒剩低佢最大既嫡孫12歲既路易-奧古斯特
而奧地利女大公瑪麗亞·特蕾西亞岩岩好又有個女仲未嫁出去就係11歲既瑪麗·安托瓦內特
到1770年兩人成婚

青年路易-奧古斯特 青年瑪麗·安托瓦內特

瑪麗·安托瓦內特離開維也納前瑪麗亞·特蕾西亞同佢告別
再見啦乖女 你要成為法國人眼中既天使啊
但當呢隻天使去到法國時 迎接佢既氣氛同佢既姿態毫不相秤
出現了...敵國既女人!!我地竟然淪落到要同呢D人結婚!?
二百幾年既國仇家恨...!!
瑪麗·安托瓦內特係法國當權者既圈中佢絕不受歡迎 即使係佢老公同佢亦唔算親密
凡爾賽宮廷中貴族間既玩樂就成為左佢生活中唯一既內容
而係呢到佢識左個12歲既細路 路易-奧古斯特最細既細佬阿圖瓦伯爵查理·腓力
呢個12歲既細路查理·腓力就成為左15歲既寂寞人妻瑪麗·安托瓦內特係凡爾賽宮中唯一既玩伴
呢段時間入面年青既查理·腓力內心中都起左少少變化...

青年阿圖瓦伯爵查理·腓力

路易十五個太子既二仔普羅旺斯伯爵路易·斯坦尼斯瓦夫·塞維爾係1771年5月14日迎娶薩伏伊公主
1773年11月路易十五個太子最細既仔15歲阿圖瓦伯爵查理·腓力又同另一個薩伏伊公主結婚
就路易十五就幫佢已過身既大仔個三個仔搵晒老婆 佢可以安心隨時撤手歸西
之後就係佢三個乖孫既生殖問題
如果有日大佬路易-奧古斯特仔都未生就突然暴斃既 繼位既將會係細佢3歲既路易·斯坦尼斯瓦夫
佢生仔既時間比佢大佬少左三年 然後路易·斯坦尼斯瓦夫又仔都未生就突然暴斃
繼位既係再細佢兩歲既查理·腓力 佢生仔既機會就更加細
然後繼位既將會係順位第四既繼承人 路易十四二仔既後人奧爾良公爵路易·腓力

就咁奧爾良公爵路易·腓力就準備左一大班花柳雞去招呼阿圖瓦伯爵查理·腓力
只要比佢惹到既就冚家性病死 自己既王位繼承順序就保證升一級
路易·腓力就拍查理·腓力個膊頭啦 喂堂細佬岩岩結婚識唔識扑野啊?洗唔洗大佬介紹幾條正菜過你啊?
啊唔洗啦...我...我已經有中意既人...
吓!?你講你老婆啊!?政治婚姻既野洗唔洗咁認真啊!?
唔係...唔係...算啦...唔講啦...

奧爾良公爵路易·腓力

然後1774年8月3日路易十五病逝 路易-奧古斯特繼承佢啊爺成為法國國王路易十六
路易十六同瑪麗·安托瓦內特呢對少夫少妻結婚四年依然一無所出
但到第二年1775年8月6日佢最細既細佬阿圖瓦伯爵查理·腓力生左個仔路易·安托萬
取名路易係紀念佢啊爸 而安托萬就係安托瓦內特既男性位格...
路易·安托萬一出世法國坊間就開始傳啦 你細佬細你五年又遲你三年結婚都生得
你兩個青年男女血氣方剛日對日夜對都未生到 唔通陛下虧既...?

因呢個消息受最大打擊既唔係路易十六而係佢堂叔奧爾良公爵路易·腓力
因為而家佢既繼承順位已經跌到落第五 而路易十六亦係1778年12月19日生左個女瑪麗-特蕾絲洗清左佢性能力疑惑
睇住瑪麗·安托瓦內特懷中既BB 阿圖瓦伯爵查理·腓力不禁露出失落既苦笑
點啊?大嫂升LV做啊媽唔鄧我開心?
點會呢...家陣我個仔都多左個玩伴...
就好似我地已前咁?

瑪麗-特蕾絲

係凡爾賽宮既另一間房 遠離佢老婆同細佬緋聞既地方 國王路易十六埋首於一棟棟既財務報表
佢接手既呢個國家岩岩係七年戰爭落敗失去左北美同印度大部分既殖民地再加上十幾億里弗爾既負債
得返既只係南美同非洲幾個零落居留地 法國已唔再足以維持重商主義 更莫講話要還錢

路易十六上任後做既第一樣野就係經濟改革
1774年8月24日佢請黎重農主義既代表人物勞恩男爵安·羅伯特·雅克·杜爾哥做佢既財政大臣
重農主義認為一切既經濟活動包括重商主義既關稅都只係農業盈餘所衍生
因為當人都餵唔飽更莫講話消費 但全國既土地只用黎耕田亦係浪費
咩土地用黎種D咩農民最清楚 所以政府首先要廢除一切同生產有關既稅 只收地稅
然後再廢除埋農產品出口關稅令大量農產品流入外國令佢地依賴我地既糧食生產
咁我地就算唔靠殖民地只用本國土地都足以控制國際貿易既經濟命脈啦
杜爾哥向路易十六承諾唔破產 唔加稅 唔借錢 我都可以救到你荷包
佢兩個懷住一片雄心壯志準備放手大幹
結果杜爾哥一上任就出事啦

拉法葉侯爵吉爾貝爾·杜·莫提耶(誤)
拉法葉侯爵吉爾貝爾·杜·莫提耶(正)

米拉波伯爵奧諾雷·加百列·里克蒂1749年3月9日生於內穆爾
祖上係義大利起家既商人 當年係西班牙王位繼承戰爭初期旺多姆公爵同歐根親王係義大利北部打過你死我活時
米拉波既太爺加入左法軍有功然後係普羅旺斯到得到左塊封地同爵位 然後傳到佢啊爸個代
因為米拉波係二仔所以繼承封地爵位冇佢份 佢成年後走左去當兵
係佢軍旅生涯最後幾年被派駐普魯士 係個到佢亦見證左腓特烈二世生涯最後幾年
然後係1786年返國 個時岩岩好法國各地開始選舉各等級代表
睇下杜爾哥係男爵 卡洛訥更不過係子爵 佢地都做到財政大臣 伯爵之後既我唔撈返一官半職點似樣
咁佢就準備參選普羅旺斯第二等級選舉囉喎 但到入紙申請時先發現
喂你係貴族出身姐 但你冇封地喎
選唔成第二等級佢就撲左去隔離省既艾克斯當選第三等級代表出發巴黎

米拉波伯爵奧諾雷·加百列·里克蒂

安托萬·巴納夫1761年10月22日生於部多菲內省首府格勒諾布爾
因為出身於新教家庭所以冇權接受教育 不過好彩佢啊媽係個有錢女讀過下書安托萬就由佢啊媽教大
到佢28歲時佢鄉下格勒諾布爾擅自召開三級會議引發騷亂 當時佢啊爸亦係第三等級代表之一
親歷呢一切既安托萬事後寫左本書評擊軍隊鎮壓行動為佢係鄉間贏得掌聲
然後跟埋佢啊爸一齊成為菲內省第三等級代表前往巴黎

安托萬·巴納夫

讓·西爾萬·巴伊1736年9月15日生於巴黎
佢啊爸同啊爺都係羅浮宮宮廷畫家 佢生出黎都預備繼承衣缽
但佢返學讀書之後發現佢係數學上更有天份特別係天文學上
之後佢就放棄左畫畫主攻天文 1763年進入法國科學院 1784年被錄取為法蘭西學院院士
1789年三級會議宣佈召開之後順手做埋巴黎第三等級代表

讓·西爾萬·巴伊

夏爾·莫里斯·德·塔列朗-佩里戈爾1754年2月2日生於巴黎
因為天生單腳殘障所以冇好似大多數貴族咁去當兵而走去教會讀書
1770年入讀巴黎聖敘爾皮斯神學院
1775年任蘭斯聖坦尼隱修院院長
1780年任法國教會總代表
1788年升任天主教歐坦教區主教
1789年成為三級會議第一等級代表

夏爾·莫里斯·德·塔列朗-佩里戈爾

雅克·皮爾埃·布里索1754年1月15日生於沙特爾
一個客棧老闆第十三個仔 中學畢業之後去左間律師樓做BOY
係個到賺左筆錢之後去左英國旅行 然後係個到識左班廢奴主義者之後跟埋佢地去岩岩獨立既美國
到佢1784年返回法國之後因為寫左篇批評法國政府經濟政策既文比人掟左入巴士底監獄幾個月
出獄之後佢繼續批評君主制同奴隸制
到1789年三級會議召開之後佢趕去巴黎創立左法蘭西愛國者報並係入面連載佢既巴士底監獄生涯

雅克·皮爾埃·布里索

雅克·R·埃貝爾1757年11月15日生於阿朗松
一個法官個仔 係阿朗松讀法律 係阿朗松做律師
但衰打輸左場官司就著草去巴黎 之後一直靠偷呃拐騙為生
直到1789年依然如是

雅克·R·埃貝爾

雅克-路易·大衛1748年8月30日生於巴黎
係佢9歲既時候佢啊爸同人決鬥被殺啊媽離家出走 佢就被送左去佢啊叔屋企
16歲既時候入讀美術學校 因為塊面有腫瘤講野1999所以只專注繪畫
但參加左三次畫畫比賽都落選 成世人頭頭碰著黑雅克-路易·大衛差D跳落塞納河
好彩後來佢啊叔幫佢搵左個親戚 名畫家洛可可大師弗朗索瓦·布歇教佢畫畫
1774年得獎前往羅馬進修 1780年回國 1784年成為王家藝術院院士
之後發表名作荷拉斯兄弟之誓 佢用呢張畫隱喻社會契約
1787年再發表另一幅名作蘇格拉底之死
再係1789年趁全國熱心政治既人係巴黎集結時發表新作處決自己兒子的布魯圖隱喻法國王室既麻木

佐治·雅克·丹東1759年10月26日生於布列塔尼
醜 貪 律師 老婆奴 講野大聲 1789年撲左黎巴黎食花生

佐治·雅克·丹東

讓-保爾·馬拉1743年5月24日生於瑞士隔離既小國納沙泰爾公國
佢既祖輩係法國雨格諾宗徒 係路易十四發表楓丹白露敕令之後走黎呢到
馬拉16歲既時候離家出走闖天下 一行就行到黎巴黎係到讀醫
但讀都未讀到畢業佢浪子基因又發作 今次佢繼續向北最後黎到英國
呢段時期佢靠寫文維生 1774年佢發表奴隸制枷鎖指摘英國既議會制只係為暴君黃袍加身既工具
1776年佢又返返法國巴黎行醫維生 呢個連執照都冇既黑市醫生突然爆紅成為一代名醫
就連路易十六個細佬阿圖瓦伯爵查理·腓力都請佢做私人醫生
然後佢就一邊睇下病一邊寫下文HEA到今日

讓-保爾·馬拉

卡米爾·德穆蘭1760年3月2日生於皮卡第
佢啊爸係當地法官 德穆蘭14歲個年佢啊爸搵到門路攞到獎學金送佢個仔入巴黎名校路易大帝高中
在校時佢熱愛古典文學 畢業後跟佢啊爸做律師 但衰講野1999做左冇耐就轉行寫作
1789年佢黎到巴黎之後幫米拉波份報紙寫專欄 點知佢份報紙出左一日就被取締左
而家佢作為一個業餘記者既身份日日係巴黎無所事事遊離浪蕩
係佢背後永遠跟住幾個秘密警察鴿實呢隻危險份子
然後有日佢HEA到去盧森堡公園既時候識左個有錢佬個女露西爾·杜普雷斯
呢條未見過世面既千金小姐好快就傾倒於德穆蘭既革命浪漫之中
但佢老豆嫌德穆蘭呢隻報紙仔襯唔起自己個女反對佢地來往

卡米爾·德穆蘭

最後仲有同大家講呢個故事既人
我係馬克西米連·羅伯斯比爾1758年5月6日生於阿拉斯
全家有四兄弟姐妹 我係大仔 我啊爸係個律師
係我6歲個年我啊媽難產死左 我啊爸傷心過度離家出走從此音訊全無
最後我四兄弟姐妹就由啊婆揍大
係零親家庭長大既我學習成為我唯一既喜好同埋選擇
1770得到當地神父賞識送左我去巴黎讀名校路易大帝高中 係到我識到我一生既好友德穆蘭
1781年法學畢業然後返到鄉下做法官
係維濟耶集會之後法國全國各地要求召開三級會議呼聲不斷
我乘勢發表致阿圖瓦人民書—論改革阿圖瓦三級會議的必要性成為當地名人 後來當選第三等級代表黎到巴黎

馬克西米連·羅伯斯比爾

就咁全國300個教士291個貴族610個平民代表齊集巴黎準備解決法國當前既經濟危機
路易十六諗住係咁
事實係三級會議只係將全國專業憤青中既精英集中到巴黎 呢到最終只會成為佢地既私人遊樂場

首先發功既係西哀士 佢一輪埋首工筆之後出版一本小冊子叫咩係第三等級
係呢本野入面佢引述自己既職業生涯指摘教士貴族不事生產只係國家既寄生蟲
相反第三等級係咩啊!?係呢個國家既一切!!第三等級在政治秩序中有咩地位啊!?咩都冇!!第三等級要求D咩啊!?要應得既地位!!
呢本小冊子面世後風行巴黎 人人都反思自己點解要山長水遠走黎巴黎就係為解決路易十六荷包問題
然後巴黎市中都響起左如同當年美國人一樣既口號 無代表權就唔交稅!!
係第三等級中比起經濟改革佢地開始更關心政治改革

1789年5月5日三級會議終於係凡爾賽開幕 主席係財政大臣內克爾 副主席第二等級代表拉法葉侯爵
一開場內克爾就用左三個鐘去講解法國當前經濟困局 內裡全部都係技術官僚既學術名詞聽得第一二等級代表喊路連連
台下就只有等三等級代表六百對金睛火眼啤實佢 佢地都期待緊內克爾會講出佢地所期待既
直到三個鐘頭技術詞典演說結束 一如所料全部都係內克爾專門範圍內既經濟議題

演說結束之後內克爾就請各等級代表返各自既會堂討論 米拉波聽到即刻拍枱
等陣!!我地第三等級要求三個等級一齊開會!!
吓?我諗冇需要啊 反正你地三個等級係分開表決既
乜撚話!?分開表決!?維濟耶集會既時候咪講好左一席一票個囉!?
維濟耶集會決定既係多菲內省佢地自己三級會議既規矩 一個地方既三級會議邊有權決定全國三級會議既規矩?
好!!咁上次1614年三級會議都係一席一票架啦點解今次又返返一等級一票呢!?
你應該問返點解個次三級會議係一席一票 自法國有三級會議以黎一直都係一等級一票 1614年係個別事件
等陣主席 無論咩等級佢地都係法國人黎解決法國既問題 三個等級一齊開會好合常理姐?
拉法葉你收聲!!家陣我先係主席!!如果你地堅持要三個等級一齊開會既咁首先你地要諗辦法幫全場人點齊名
點名?點乜撚野名啊?
第一二等級既人個個都貴人事忙邊似得你地咁得閒 佢地好多都只係派代表黎開會
乜撚野話!?代表!?佢地自己本身咪自己等級既代表囉!?仲要搵代表!?代表既代表!?佢地黎做咩架!?舉手架咋!?我地要求以而家既陣容開始討論!!
各位稍安無燥 國王好快會黎為大家仲裁

三級會議

好快 幾快?
我地而家等左一個月
呢一個月咩會都冇開過
6月20日終於有人忍唔住 西哀士提出第三等級自行點名
反正第三等級全部人齊 你地自己點名 另外兩個等級既人想玩就入黎加埋自己個名 登記完就返凡爾賽宮開會
就算另外兩個等級黎唔齊我地自己都會繼續討論議題 因為我地呢到係唔分等級既會議
呢到唔係三級會議 我地唔係作為三個等候既代表黎開會 我地係作為國民黎解決國家問題而開既會 呢到係國民議會!!

就咁578個主要係第三等級既各級代表從巴黎向西出發衝向凡爾賽
我地去開國民議會!!
點知去到 鎖左門

借問聲咩事啊?我地黎開國民...三級會議個喎 點解鎖左門既?
哦 因為陛下幾日後會黎演講所以我地而家裝修緊唔比入去
咩話成個月遲唔裝早唔裝而家先黎裝!?先唔理佢真定假 全巴黎邊到有裝到幾百人開會既地方啊!?
巴黎既地頭蟲巴伊即刻諗到 我知邊到有!!跟我黎!!
然後呢578人又跟住巴伊衝返轉頭
呢幾百個精力過剩既憤青由朝到晏巴黎凡爾賽兩頭走
呢個時候佢地身邊已經吸引左大班花生友專程黎欣賞呢場大龍鳳
本來係隔離開緊畫展既雅克-路易·大衛見到都跟埋出去

最後巴伊將呢班人帶到凡爾賽宮隔離既室內網球場入面 然後係巴伊既帶領同花生友既見證下宣誓
我地係代表全國國民既國民議會係到宣布成立 而我地既會議會一直保持到法國建立憲法為止!!
議會萬歲!!法國萬歲!!國王萬歲!!

網球場宣言 企中間個個係巴伊 雅克-路易·大衛畫

除左網球場之外仲有兩個花生友係凡爾賽宮入面一直欣賞緊呢場大龍鳳
佢地係路易十六同阿圖瓦伯爵查理·腓力
細佬 聽講關閉會場條屎橋你出架?
大佬 佢地黎巴黎只係負責比錢你洗 比佢地關心其他野奧爾良公爵就會乘虛而入利用佢地挑戰你個王位架啦
傻啦細佬 槍竿子出政權既時代早就過去 就靠呢班讀書人可以做得出D咩呢?愛與和平佔領巴黎!?呢種政治危機正正係比國王表演既機會
人黎 幫我傳個口信落去 話反正我本來都準備接受一席一票 既然佢地而家已經開左國民議會咁就解散三級會議叫一二等級都去國民議會到開會啦
大佬 你向佢地讓步太多啦...

就咁國民議會連埋未參加既人名正言順走返返入凡爾賽宮
而國民議會亦係7月9日改名為國民制憲議會
呢班本來為解決法國經濟危機而聚首巴黎既代表亦開始改為草擬法國既君主立憲憲法

阿圖瓦伯爵查理·腓力又係凡爾賽宮另一間房招集另一班貴族去開佢地自己既會議
你地認命啦 國王冇心做野架啦 如果你地唔甘心就咁比班蟻民分你地身家既就跟我黎
跟你?你可以做D咩啊?
我一個當然做唔到D咩啦 但在坐有唔少樞密院既成員係咪?你地可以用國王既名義落命令架嘛 調一支軍隊 消滅呢個蟻民議會
7月11日二萬大軍從全國各地包圍到巴黎市郊

哇~咩事啊?咩事啊?咁撚多軍隊既?

1789年7月12日巴黎市中心塞納河泮既杜樂麗宮 呢座係自路易十四起好凡爾賽宮後就荒廢既法國王室舊居
係佢北翼既巴黎王家宮殿花園係奧爾良公爵路易·腓力既居所
自1789年三級議會召開以黎路易·腓力就開放正門廣場比公眾以示佢有別於國王三兄弟既親民開明作風
順理成章係三級議會召開後呢到亦成為憤青既集中地

呢日既中午 一班憤青如常地享受佢地既下午茶時間
突然有條友彈出黎跳上台大嗌
財政大臣內克爾又被炒啦!!今次唔只佢!!係成個財政部比人炒左啊!!
呢次任免係王室干預議會既開始!!係班德國傭兵對法國愛國者進行聖巴托洛繆大屠殺既喪鐘!!
班德國傭兵今晚就會入城殺晒我地!!我知你地班秘密警察匿係角落頭監視緊我!!但我唔會再逃避!!
所有愛國者攞起武器戴上紅白藍三色帽徽做記認跟我黎!!
呢條友係卡米爾·德穆蘭

巴黎王家宮殿花園

德穆蘭帶住千幾人衝入巴黎市政廳攞武器
但一去到大門就比巴黎商會會長雅克·德·弗萊塞勒載住左
你帶住咁大班人要武器黎做咩!?想作反啊!?
城外班德國傭兵準備今晚入城殺晒國民制憲議會成員同佢地支持者!!係法國人就交武器出黎跟我地一齊趕走班外國佬!!
挑你班死廢青咁得閒顧點自己先啦 人地要殺邊個關你撚事咩 咁把炮自己上山打遊擊啦
磅一聲大門又閂返埋啦 千幾人既熱情就咁就淋息左

唔係!!仲有得搞既!!榮軍院!!個到都有武器!!
德穆蘭又帶住千幾人衝去榮軍院
今次真係比佢地搶到火槍啦
不過冇火藥冇子彈
係德穆蘭帶住千幾個攞全火槍既暴民既號召 巴黎全市陷入恐慌四處都係搶掠
但佢地依然得唔到佢地想要既火藥同子彈

14日朝早巴士底監獄
有個囚犯被街上既吵雜聲嘈醒
佢叫唐納蒂安·阿爾豐斯·弗朗索瓦·德·薩德侯爵
薩德 SM中既S 後世性虐待既代名詞
係佢後生既時候因為虐待過一隻雞被判死刑 佢就逃亡到義大利
係義大利佢又強姦左佢老婆個做緊修女既妹 之後佢又走返返黎法國 比人捉到掟左入巴士底監獄
呢朝係佢被囚禁第十二年既一個朝早
佢起身望出窗外 見到一街都係密密麻麻既人潮個個攞齊架生 雖然唔知佢地係到做咩 百無聊賴既薩德侯爵就S基因發作向窗外大叫
救命啊!!佢地係到虐殺囚犯啊!!

街上既群眾個個抬頭望向佢 個個開始交頭接耳
有冇睇個法蘭西愛國者報啊?聽過入面D生活好悲慘個喎 佢係到嗌救命喎我地係咪應該幫佢呢?
比樓上個S叫一叫 樓下班S停低搜索火藥搶掠糧食將注意力集中係呢幢建築物入面
又係喎 咁大座城堡入面冇理由冇火藥既 不如...
然後愈黎愈多暴民包圍到巴士底監獄下面 直到監獄長侯爵洛奈都發現到自己處境非常危險
我呢到得百幾個瑞士傭兵 樓下我睇閒閒地都有千幾人 靠我地頂唔到幾耐咋喎 出面亂左咁多日究竟軍隊係到做咩仲唔出黎平亂架
大SIR 因為近日有大量不明既軍士調動 陛下擔心發生兵變所以下令全部軍隊禁止離開營帳
唉 算 冇得打 幫我叫下面D人搵個代表上黎傾下
YES SIR

侯爵洛奈

兩個平民代表入到巴士底監獄見侯爵洛奈 佢地要求侯爵洛奈只要交出巴士底監獄既彈藥佢地就願意和平散去
侯爵洛奈好快就答應左佢地既要求
咁協議達成我地都快D返去比出面既人答覆
咁心急做咩姐 一場黎到而我又夠鐘食晏 介唔介意食埋先走?
兩條死窮鬼聽到可以食貴族餐即刻L飯應

但係巴士底監獄外面聚集既群眾開始愈黎愈鼓譟 乜咁耐架...?
其中有兩條友趁守衛唔留意穿過乾涸既護城河去到大門前放低吊橋
外面既群眾見到大門打開即刻衝入巴士底監獄
係樓上既守軍見到又即刻開槍示警 點知打中左個師奶
班外國佬屠殺人民啦!!
係入面嘆緊晏畫既侯爵洛奈同代表聽到外面發出戰鬥聲就飯都唔食衝出去睇
停火!!停火啊!!邊個下令開火架!?
侯爵洛奈我話左要早D返去比答覆架啦...而家搞成咁我驚唔係岩岩個協議可以了事...
下面既人聽住 岩岩既戰鬥係意外係擦槍走火 只要你地和平散去並保證我地守軍既人身安全我地會立即交出彈藥
你殺左我地咁多人諗住可以和平!?一命填一命啊!!
咁侯爵洛奈你諗住點啊...?
就算佢地唔答應我既要求都冇得打架啦...我出去代表巴士底監獄投降...

圍攻巴士底監獄

下畫5點侯爵洛奈出城投降
侯爵洛奈舉高雙手走入人群中 千幾個暴民怒目相向
大家聽我講頭先既戰鬥...磅!!侯爵洛奈被一擊倒地
憤怒既群眾一湧而上 最初只係拳打腳踢 後來係刺刀銼頭
從巴士底一路打到去巴黎市政廳
殺人犯!!劊子手!!
侯爵洛奈被打到甩皮甩骨蓮蓬蜜蜂竇咁 佢用最後一口氣苦苦哀求
...殺左我...

最後佢既人頭連埋巴士底監獄守軍既人頭被暴民一個個插係刺刀上巡遊
打倒暴政!!自由萬歲!!
巡遊既終點係巴黎市政廳
雅克·德·弗萊塞勒同我出黎!!
點啊?你地班廢青搵到工未啊?
工就未搵到啦不過火藥就搵到唔少...去死啦法奸走狗賣國賊!!
雅克·德·弗萊塞勒被亂槍打死
暴民既刺刀上又多一個人頭

攻佔巴士底後


https://youtube.com/watch?v=qmKBoU9yPu8


第朝路易十六訓醒先收到巴士底監獄既報告
咩事啊?暴動啊?
暴動!?係革命啊!!佢地已經得武器啦!!全國各地既農民都開始燒地契同衝擊地主啦!!睇你呢鋪點收科!!
...我去出去見下佢地...
仲見!?屌你冇撚得救啦!!出兵鎮壓啊!!
我忍夠你個燈神啦!!次次出埋D屎橋話奧爾良公爵想謀我個位 你個繼承順位仲高過佢啊!!咪以為我唔知調兵入黎巴黎個個係你!!
屌最把炮係你!!你玩撚晒佢!!我去老婆娘家薩伏伊避幾日你好自為之啦!!最慘係害埋大嫂...
我老婆關你撚事!?

下集從人權及公民權宣言到凡爾賽遊行

一路up果時我都翻睇緊 好似都第四五次睇
我自己用手機碌果時發現一頁po幾篇太多字一做其他野返黎好難追返
咁我試下分多幾個reply黎po一篇 唔用盡晒d字數限制

大家留意返作者係
膠登作者：神谷奈緒老公 原名：蘿蔔絲比耳 膠登會員編號：3227
LIHKG月岡恋鐘老公 #199613

膠登仔都睇得明既簡易西史入門第廿六集:法國大革命篇第二集:從人權及公民權宣言到凡爾賽遊行

係巴士底日之後舊既巴黎市政府被推翻由新既民選機構巴黎公社取代
市民推舉國民制憲議會既巴黎代表讓·西爾萬·巴伊出任市長
為免秩序進一步受創 巴黎公社成立國民衛隊 將擁有武器既市民編入國民衛隊集中管理 由國民制憲議會中既戰爭英雄拉法葉侯爵領導
7月16日內克爾復任財政大臣

7月17日巴士底後第三日 路易十六造訪巴黎市政廳會見巴伊同拉法葉
多謝你地幫我穩定局勢 我對你地既工作充分肯定...嗯...你地頂帽上面都有個紅白藍圈圈 個個係咩黎?
陛下呢個紅白藍帽徽係我地巴黎公社既徽號
哦 咁係咩含意既呢?
吓...喂巴伊呢舊野有意思架咩?
我點撚知姐巴士底個日之前已經人人帶住架啦 我撚西知佢咩意思姐
ER...陛下...紅藍係巴黎市旗...白色係波旁旗...呢個係代表王室同巴黎市民合作既意思...
哦唔錯啊 咁以後就用呢個做國旗啦
VIVE FRANCE!!

三色帽徽

巴黎市旗
波旁旗

三色旗
但係巴士底日同之後既大恐慌 法國無論中央定地方既行政秩序都已經崩潰
農奴燒毀地契 貴族逃亡外國 國民制憲議會對當前局勢都感到不知所措
我地寫緊既憲法仲有冇機會用...?
人心惶惶之際米拉波舉手發言
如果有人認為係呢個時勢袖手旁觀自由就會從天而降就太天真 7月14日既事不過係一場冇理論即興既狂歡
如果我地縱容佢地既暴力唔單只唔會令法國得到自由 而佢地既破壞只會變本加厲令法國萬劫不復
係我地建構新政權之前必須保住現政權 保住陛下同我地寫緊既憲法
大家諗下自己 我地當中有各種專業人士黎自全國代表各階級黎到呢到
我地絕對有權力同能力更重要既係責任去重建法國既社會秩序
為我地未來既民主同自由!!

米拉波鼓勵下國民制憲議會成為法國既實際行政機關
為重建秩序安撫民心國民制憲議會係8月4日發表八月法令
廢除一切引至農奴制既法律同稅收
廢除教會稅收
所有法國公民有權任職政府機構及軍隊
國王路易十六宣布法國已經恢復自由

1789年8月26日國民制憲議會頒布憲法草案 人權及公民權宣言
組成國民議會之法國人代表認為 無視 遺忘或蔑視人權是公眾不幸同政府腐敗既唯一原因
所以決定將自然 不可剝奪同神聖既人權闡明於莊嚴既宣言之中以便本宣言可以經常呈現係社會各個成員之前 使佢地不斷記起佢地既權利同義務
以便立法權既決議同行政權既決定可以隨時同整個政治機構既目標兩相比較從而更加受到佢地既尊重
以便公民今後以簡單而無可爭辯既原則為根據既要求可以確保憲法並維護全體之幸福
因此國民議會係上帝面前並係佢既庇護下確認並宣布下述既人與公民權利

第一條：在權利方面，只有在公共利用上面才顯出社會上的差別。這些權利就是自由、財產、安全和反抗壓迫。
第二條：任何政治結合的目的都在於保存人的自然的和不可動搖的權利。人們生來是有權從事一切無害於他人的行為。
第三條：主權本質上全屬於國家。任何團體、任何個人，任何政治結合都不得行使主權所未明白授予的權力。
第四條：自由就是指人始終是自由平等的。因此，只以保證社會上其他成員能享有同樣權利為限制。此等限制僅得由法律規定之。
第五條：法津僅有權禁止有害於社會的行為。凡未經法律禁止的行為，各人的自然權利的行使，不得受到妨礙，而且任何人都不得被經由其代表去參預法律的制定。
第六條：法津是公共意志的表現。全國公民都有權親身或經由其代表去參預未經法律禁止的行為。法律對於所有的人，都是一樣的。在法律面前，所有的公民都是平等的，故他們都能平等地按其能力擔任一切官職，公共職位和職務，除德行和才能上的差別外不得有其他差別。
第七條：除非在法律所規定的情況下並按照法律所指示的手續，不得控告、逮捕或拘留任何人。凡動議、發布、執行或令人執行專斷命令者應受處罰；但根據法律而被傳喚或被扣押的公民應當立即服從；抗拒則構成犯罪。
第八條：法律只應規定確實需要和顯然不可少的刑罰，而且除非根據在犯法前已經制定和公布的且系依法施行的法律以外，不得處罰任何人。
第九條：任何人在其未被宣告為犯罪以前應被推定為無罪，即使認為必須予以逮捕，但為扣留其人身所不需要的各種殘酷行為都應受到法律的嚴厲制裁。
第十條：意見的發表只要不擾亂其意見、甚至信教的意見，任何人都不得各種殘酷行為遭受干涉。
第十一條：法律所規定的公共秩序是人類最寶貴的權利之一；因此，各個公民都有有武裝的力量，但在法律所規定的情況下，應對濫用此項自由負擔責任。
第十二條：人權的保障需要自由傳達思想和意見；因此言論、著述和出版的自由，是為了全體的利益而不是為了受任人的個人利益而設立的。
第十三條：為了武裝力量的維持和行政管理的支出，公共賦稅就成為必不可少的；這種力量在全體公民之間按其能力作平等的分攤。
第十四條：所有公民都有權親身或由其代表來確定力量的必要性，自由地加以認可注意其用途，決定軍力分佈。
第十五條：社會有權要求武裝人員報告其工作。
第十六條：凡權利無保障和分權未確立的社會，就沒有這種力量。
第十七條：財產是神聖不可侵犯的權利，除非當合法認定的公共需要所顯然必需時，且在公平而預先賠償的條件下，任何人的財產不得受到剝奪。

人權及公民權宣言

9月16日馬拉創辦人民之友報
佢係創刊號既頭版大字標題批評人權及公民權宣言只係有錢人安慰窮人既利誘
成份野滿口離地到外太空既仁義道德卻無助解決普遍既貧窮問題
但因言論激進連國民制憲議會都唔放過出左幾期就比人查封左

但八月法令人權及公民權宣言的確係法國當場得到多數人歡迎 社會秩序亦因為咁又已經慢慢安定落黎
不過路易十六就唔係咁睇
雖然係巴士底日之後教會同貴族特權實質上已經被推翻 但佢地既權力係被不正當既手段推翻
如果你地係想回收佢地既特權係應該通過議會逐項特權去表決 而唔係好似而家咁用法律去保護政治現實
咁樣既話任何人都可以用武力去挑戰政府從而謀求自己既利益 如果我係到退讓既話對我既臣民絕不公平而世人都會批評我係軟弱既國王
所以對於八月法令同人權及公民權宣言我只係接受部分條文而且我係絕對唔會永遠接受

之後國民制憲議會佢地開始設計未來國會既組成
路易十六明白係已經再冇辦法係議會以外影響議會 咁佢就去搵主導草擬八月法令同人權及公民權宣言而成為國民制憲議會影響力最大既議員米拉波
仲順手為佢帶左少少"禮物"
陛下!?臣一直都係忠於國王同國民 何必咁樣賄賂我呢!?
唔好咁講 你係八月法令同人權及公民權宣言既表現有目共睹 我只係比D獎勵你姐
恕我直言...陛下係擔心我借國民制憲議會擁立奧爾良公爵...?
點解會咁諗呢?
你兩個之間既傳聞已經太多啦...
如果你有辦法係呢個議會之外為呢個議會製造D制衡既話 咁我或者可以放心D
陛下...臣好歹都係個貴族 錢我有大把......我想成為閣員...

米拉波係國民制憲議會推銷成立一個由貴族教士組成既上議院
要平民代表同貴族教士分開兩個議會表決咁咪姐係返返三級議會既起點?你ON9架!?
唔好咁講...反對大眾既聲音有咩後果我地已經知道 得到下議院通過既議案我地都係循例表決下姐 我地要求成立上議院都係希望少數既聲音得到代表發揮功能組別既功能...
聽到米拉波同班貴族9UP連篇一向多寫文少講野既西哀士都忍唔住開聲
如果上議院只係下議院既樟皮圖章咁上議院係多餘既 如果上議院係會反對下議院既咁上議院就係有害既 道理係咁簡單之嘛!!
咁巴納夫又提出國王應保留否決權
我地係要搞君主立憲制定係有國王既共和國?至少國王應該成為國家最後既仲裁者應該可以否決或者至少可以延遲執行法律既權利掛?
否決權都被否決埋 但延遲權得到通過
最後仲通過埋議會成員不得加入內閣
路易十六同米拉波既希望都幻滅啦

米拉波垂頭喪氣去搵路易十六
巴黎已經係國民制憲議會同國民衛隊既地頭 你係到絕不安全
陛下或者可以將首都搬去D遠離城市中產農奴密集既地方 例如魯昂都唔錯
我睇封建制度將永遠係法國消失 但至少暫時國民都忠於國王
只要你遠離革命既起點 議會自然會因為內鬥而滅亡
係呢段時間陛下將首都搬去D保皇勢力穩固既地區通過一套你可以接受既方案
咁你個位都仲可以保落去既...

為實行米拉波既遷都計畫 10月1日路易十六開始向凡爾賽調兵
但因為一切由法國人組成既軍隊都有可能倒向議會 所以佢調黎一支外國軍隊駐防凡爾賽
一支黎自奧屬尼德蘭既法蘭德斯軍團

佢地到達凡爾賽之後路易十六招開一場盛大既晚宴招待
呢個時候當年個個偷呃拐騙既埃貝爾食住政治氣氛個勢又搞左份報紙叫杜薛斯涅神父報
呢份報紙靠激進既市井語言係低下層深受歡迎
呢晚佢採訪完國民制憲議會離開凡爾賽時路過
結果第二日報紙頭版
人民捱饑抵餓冇包食 國王大魚大肉餉外人
奧地利人王后:冇包食點解唔食蛋糕啊?(設計對白)

杜薛斯涅神父報