［極高質分享］膠登簡易歐洲史入門

三人執政左到右 讓-雅克·雷吉斯·德·岡巴塞雷斯 拿破崙·波拿巴 夏爾-弗朗索瓦·勒布倫

經過八年既流亡 因拿破崙上台政局穩定拉法葉從美國返回法國
有人問佢你係美國獨立既英雄 佢係法國革命既英雄 你有冇興趣幫佢做野啊?
拉法葉笑一笑
...拿破崙係王宮太耐已經忘記軍營既生活啦...

1800年1月20日繆拉同拿破崙個妹卡羅琳·波拿巴結婚
6月14日拿破崙係馬倫哥擊敗義大利既奧地利軍
而到12月3日係萊茵河既奧軍亦係霍恩林登被擊退
見戰況逆轉俄羅斯退出反法同盟聯合丹麥 瑞典 普魯士成立第二次海上中立武裝運動

拿破崙橫越阿爾卑斯 雅克-路易·大衞畫

咩係中立呢?
姐係英國同法國交戰 英國封鎖左法國既海岸冇人可以係海路同法國佬做生意
但有D國家宣稱自己中立就大搖大擺駛入法國既碼頭然後同你講
唔好打我啊 我中立架 你打我就等於宣戰架啦

當年美國獨立有條聰明仔做嫁兩比英國打7左
而家又多條聰明仔玩多次
如果發起個個叫俄羅斯 英國佬未必夠膽郁佢
但有D聰明仔唔諗下自己咩斤兩都諗下自己咩位置
個個叫丹麥

因為第二次海上中立武裝運動瑞典既木材源源不絕咁流入法國
英國擔心法國可能短期內重建艦隊突破封鎖
咁英國政府就派左支38架戰艦其中有12架戰列艦既艦隊前往北海
臨走前佢地提醒呢支艦隊既提督海德·柏加 我比支艦隊你只係要你搞炮艦外交 千其唔好開拖啊
YES SIR!!
不過佢下面個艦隊司令叫奶路臣

佢地第一個就搵上左北海門口既丹麥
1801年4月呢支艦隊游到去丹麥首都哥本哈根門口
當丹麥人見到英軍艦隊駛至 佢地就摷均全國共七架戰列艦泊係哥本哈根岸邊警戒
雖然數量不足但有海岸要塞補救 再加上哥本哈根對出仲有一大個沙洲 英軍將會難以靠近 只要拖耐左佢地就會自動退兵

當英軍去到哥本哈根奶路臣就日日去同柏加請戰啦
唔得 我地唔係黎打仗既 我地只係黎逼使丹麥退出海上中立武裝運動 如果一開拖我地就等於同海上中立武裝運動宣戰 英國負擔唔起呢個戰爭
咁你知唔知點解其他海上中立武裝運動國家仲未黎幫拖啊!?因為瑞典而家逆風 而俄羅斯既波羅的海仲未融冰
只要再等一個月呢到就有百幾架戰列艦 到時唔好話外交 佢地打到英國門口都冇人擋得住啊!!

4月2日英國艦隊從北面駛近哥本哈根 而奶路臣就帶12架戰列艦兜過沙洲從南面進入
一開戰英軍因丹麥海岸要塞猛烈炮火陷入苦戰 係北面柏加坐鎮既旗艦見到就淆底啦
果然唔夠打...快D升撤退旗叫奶路臣走啦!!
係南面奶路臣既戰艦上面既信號員叫到撤退旗就即刻通知奶路臣啦
咩話!?撤退!?冇理由架!!比支望遠鏡我睇!!
奶路臣將支望遠鏡擺係佢盲左既右眼上面
咩撤退旗啊?我咩都見唔到喎...你知啦盲人有時係有特權架...全船繼續進攻!!
只需四個鐘 晏晝2點丹麥就投降退出海上中立武裝運動
失去左丹麥北海各國再冇辦法支援法國 海上中立武裝運動解散




哥本哈根海戰

雖然及時解散左海上中立武裝運動但已經有大量木材經佢地流入法國
如果佢地建立艦隊再次出兵英國既 目的地不外乎愛爾蘭
咁英國首相就向國會提交1800年聯合法令合併愛爾蘭議會
8月1日係英國國會好順利通過 但問題係愛爾蘭

呢到唔係蘇格蘭咁同英格蘭有共同既宗教背景
一百年既宗教改革更堅定佢地羅馬教會信仰 再加上英格蘭長期殖民加強對方既仇恨
咁英國首相就用封地同貴族銜頭賄賂左D愛爾蘭議員並承諾會尊重愛爾蘭既宗教信仰
最後愛爾蘭議會亦係8月1日通過1800年聯合法令合併成大不列顛及愛爾蘭聯合王國
英國首相就好滿意咁拎比國王佐治三世睇啦
咩話!?要我尊重呢班羅馬走狗既宗教信仰!?咁我登基時發誓捍衛聖公會既承諾要點啊!?你要我放棄王位送埋我上斷頭台我都唔會對呢班羅馬走狗有半點退讓!!
佐治三世向首相施壓而國王既表態亦傳左返愛爾蘭 愛爾蘭人認定自己受騙獨立呼聲更加響亮
最後英國首相係內外交逼下係1801年3月14日辭職
呢個首相叫小威廉·皮特 七年戰爭拯救英國既首相第一代漆咸伯爵老威廉·皮特既二仔
呢次係佢第一次封相

Po前拜一拜
Napoleon

膠登仔都睇得明既簡易西史入門第三十一集:哈布斯堡受難記第五集:拿破崙戰爭篇(上)第三,四次反法同盟

今集BGM


https://youtube.com/watch?v=1L-WuPy8l_0

1797年10月美國一支外交使節團黎到法國
話說當年美國獨立後英美間雖然結束左武裝衝突 但兩國既貿易禁運依然持續

係美國獨立後冇耐法國革命就開始 早已經濟破產既佢地好快就搵上左美國要求佢地償還美國獨立戰爭時既貸款
但美國指佢地爭既係法蘭西王國既錢 唔係法蘭西共和國而拒絕還債
而且更係1794年11月19日同英國簽訂傑伊條約開放貿易 並給予英國最優惠國待遇 美法關係跌落谷底 法國海軍更開始搶掠美國既商船
最後傑伊條約係1796年2月29日生效 為修補法國關係加上要見下佢地新任外交大臣塔列朗 美國就派左呢支使節團黎到法國啦

呢支使節團黎到法國但塔列朗拒絕接見 佢只係搵左三個代理人去見佢地
咁法國而家又真係立立亂既 塔列朗佢貴人事忙我地都冇辦法 我地願意以傑伊條約相同既條款換取兩國既友好 請問意下如何?
唔得 三個代理人斬釘截鐵拒絕左
塔列朗向我地交出既前提係美國首先要以3200萬荷蘭盾賠償法國既損失 再係呢個基礎上談判兩國關係
咩話!?損失!?你地法國佬搶左我地咁多年我地都未索賠啦!!我地有咩要賠比你啊!?唔得我地要直接搵塔列朗傾!!
哦 你地要搵塔列朗 咁你地要交五萬磅佢先得閒喎
聽到呢到美國使節拂袖而去 冇耐呢場外交風波都係美國國會曝光
嘩!!原來呢D就叫盟友!!我地寧願用千萬建軍都唔會比一蚊賄賂!!

1798年7月7日美國廢除係獨立戰爭時簽訂對法國既同盟關係 批准美國船隻攻擊掛法國旗既船
敵人既敵人就係朋友 係英國資助下美國海軍愈黎愈強大
兩國海盜玩左年幾之後1800年9月30日法國第一執政拿破崙·波拿巴下令塔列朗修補兩國關係
最後兩國簽訂摩特楓丹條約 兩國停止敵對行為 法國尊重美國中立 美國給予法國最優惠國待遇

屌拿破崙你識西外交咩!!只要再堅持多一陣英美兩國就一齊收皮架啦!!
外交!?你唔係以為我唔知你從督政府開始靠你個位貪左幾多錢啊話!?總之我而家只係想係國際間多個朋友姐!!
所以話你唔識外交...外交從來都係叢林法則 你自己送上門冇人會多謝你架!!

XYZ事件英國既漫畫 英國佬隔住個海睇班法國圍住個美國女人幫佢裝身

又話說係人權及公民權宣言出台後係法國最多黑奴既殖民地聖多明各 個到既黑奴都受到感召要加入革命追求平等囉喎
吓!?NIGER係人黎架咩!?死返入棉花田啦!!
結果引發左海地革命由1791年打到而家
莫講話英國背後支助既海地革命 拿破崙擔心法國岩岩係第二次聖伊爾德豐索條約係西班牙手上得到既北美殖民地都保唔住
佢就走左去搵美國佬當時駐法國大使占士·門羅 提出用八千萬法郎將整個法屬北美殖民地賣比美國
1803年4月30日美法簽訂路易斯安那購地案
拿破崙又沾沾自喜 咁抵既生意我都做 美國佬遲早一定賣個人情比我幫手對付英國佬既!!
塔列朗已經冇撚野好講啦...


占士·門羅

烏爾姆戰役

米歇爾·內伊

就係呢一日 係加的斯既法西艦隊 佢地既法國司令收到拿破崙將會解僱佢既消息
因為不甘受罰佢無視港外監察既英軍 下令全軍起錨駛入地中海支援拿破崙打D功績比佢睇
20日朝早法西艦隊33架戰列艦出港駛向直布羅陀 岩岩係馬爾他返黎既奶路臣收到消息亦帶27架戰列艦攔截
21日凌晨特拉法加角對出 雙方進入視線
出港時雄心壯志既法軍司令見到英軍時又淆底啦
本來法西艦隊北向南排一直線向南進入直布羅陀 但佢地見到英軍後又下令180度轉向背後既加的斯諗住打輸仗都可以有條退路
但海上唔係話轉就轉仲要睇風向水流 再加上係敵人面前180度轉向就好似準備退走一樣
呢個命令一落到黎法西艦隊就陷入混亂當中
奶路臣就趁呢個時候將英國艦隊分成兩排徙西面插向法西艦隊頭尾
晏晝11點英軍旗艦HMS勝利號升起旗號
"英國期盼所有人盡其職責"


England expects that every man will do his duty旗號

12點南方既英國艦隊順風首先插入法西艦隊尾部
英軍進入敵陣後散開各自尋找適合位置同敵人纏鬥
12點半北面奶路臣帶隊既英國艦隊都插入法西艦隊頭部
第一個入陣既HMS勝利號穿梭於法西艦隊間尋找佢地既旗艦但搵極都搵唔到
奶路臣就認定係法西艦隊中最大架有四層甲板既三叉戟號一定係佢地既旗艦 奶路臣用佢只有三層甲板既HMS勝利號單挑三叉戟號
但打到半路奶路臣發現係三叉戟號隔離既法國戰艦布桑托爾號竟然升起指揮旗號
佢就即刻轉向兜去布桑托爾號背後 近乎零距離用散彈轟炸佢既船倉
法軍睇見自己既旗艦被虐 法國戰艦敬畏號上前救援橫阻係HMS勝利號進路上
但奶路臣無視敬畏號既阻撓下令全速撞上敬畏號 HMS勝利號船首插入敬畏號桅杆間 兩船纜索風帆炒埋一舊分都分唔開
咁既時勢奶路臣即刻發揮佢看家本領走上船頭下令船員攻上敬畏號
點知佢一行出黎 敬畏號上一粒子彈就飛過黎打中佢左膊頭 穿過肺部 係脊骨到射返出黎
中槍倒地既奶路臣好快比人抬入船倉 三個鐘後失救死亡

晏晝4點戰鬥結束 法西聯軍死3000人 7000投降 1船炸毀 21被俘
英軍27架戰列艦雖然每架都打到溶溶爛爛但仍可以繼續航行 另外死500人同1個奶路臣
感謝主...我已經盡左我既職責...






特拉法加海戰

奶路臣之死


https://youtube.com/watch?v=QmXx4VEAnxA


特拉法加海戰後英國失去佢地既海上英雄 但法國只係冇左支早就冇用既艦隊
烏爾姆戰役後拿破崙下令繆拉帶支輕騎星夜趕襲維也納 神聖羅馬帝國皇帝弗朗茨二世舉家逃亡布拉格
自哈布斯堡家族當選神聖羅馬帝國皇帝以黎第一次有人佔領佢地既首都維也納 呢鋪真係乜撚野威名都掃晒地

不過雖然奧地利本土既軍隊全滅 但係義大利既奧軍經蒂羅爾北上截斷法軍後方
普魯士要脅加入反法同盟 仲有俄羅斯皇帝亞歷山大一世御駕親征既主力同弗朗茨二世身邊既奧軍殘兵會合
相反當年個十五萬法軍有D要返轉頭攔截蒂羅爾既奧軍 有D又負責佔領奧地利各處戰略要地
而家拿破崙手頭上可以調用既軍隊只係得返五萬三人被包圍係奧地利既中心
佢急需要一場決定性既勝仗

11月21日拿破崙同佢個五萬三人行到奧地利波希米亞之間既邊境小村奧斯特里茨
法軍駐紮係奧斯特里茨村以西 係佢地之間有坐小山叫普拉欽高地
普拉欽高地北面係大座D既桑頓山 南面係一堆小湖小溪因冬天而凍結
得知法軍進駐奧斯特里茨 急於復國既弗朗茨二世就帶住八萬七俄奧聯軍從東趕到
法蘭西帝國 俄羅斯帝國 神聖羅馬帝國 歐洲三個皇帝十四萬大軍聚首一堂
呢場就係拿破崙期待已久既決定性戰役 呢場仗......一定唔可以打!!

亞歷山大一世

最初法軍既配置係左翼中路擺普拉欽高地後 右翼擺普拉欽高地上 呈開口向東既V型
如果係呢種陣形就算數量劣勢既法軍都可以靠地形打場唔錯既仗
因為法軍右翼佔領左普拉欽高地 俄奧聯軍就冇辦法偵查普拉欽高地後法軍既確實位置
加上法軍右翼係普拉欽高地上居高臨下易守難攻 如果俄奧聯軍貿然強攻定必遭到唔知邊到黎既法軍偷襲
所以人數係法軍兩倍既俄奧聯軍去到都只係駐紮係奧斯特里茨村入面對法軍對峙

岩架啦 互睥就得架啦 千其唔好打啊 家陣法軍孤軍深入牛耐左佢自己會收皮架啦 所以千其唔好打啊
原來仗唔打都會贏既...咁你當咩兵姐!?呢D話耕田佬都識講啦!!肥佬你乜水啊!?
佢叫米哈伊爾·伊拉里奧諾維奇·庫圖佐夫 俄軍既總司令喎 你睇佢肥屍大隻肥頭DUP耳咁邊忽似當兵架!?返鄉下享福啦哈哈哈
比一眾奧地利將軍當面嘲笑第一個發嬲既唔係庫圖佐夫佢本人 係佢背後既大佬闆俄羅斯皇帝亞歷山大一世
因為你D白痴戰略累埋我一齊陪你出醜...你同我死出去!!你只要聽我支笛管掂兜兵打贏場仗就得啦!!會議既野以後唔關你事!!
庫圖佐夫就咁比亞歷山大一世趕左出會議既營帳
呢次係佢兩主僕第一次反面 不過佢地好快會習慣

米哈伊爾·伊拉里奧諾維奇·庫圖佐夫

係奧斯特里茨村既另一邊 法軍既營帳入面拿破崙都係到煩惱緊
哎喲 多成倍啊 咁撚多啊 點撚打啊 屌唔撚打啦人黎!!同我SEND封信過去話要議和
下!?唔係啊話陛下!?我地而家咁既陣勢就算人少都有得打個喎...!?
啊!!冇錯陣勢 為表誠意幫我將普拉欽高地上面個支軍隊都撤走埋
下!?撤走埋普拉欽高地上面支軍隊!?咁俄奧聯軍咪居高臨下一眼睇晒我地全軍配置!?如果佢地而家要打既我地死撚硬個喎!!
叫你做你就做啦!!佢地咁多人打起上黎我地就真係死撚硬啦!!
弗朗茨二世同亞歷山大一世收到拿破崙封求和書之後更加堅定佢地進攻既信念
話左法國佬唔敢打架啦!!佢地仲放棄埋普拉欽高地我地就前路無阻啦!!仲想議和!?全軍拔營!!

12月2日多雲大霧 俄奧聯軍開出奧斯特里茨村 三皇會戰正式開戰
法軍中路二萬人繼續放係普拉欽高地後面 左翼萬三人就北上駐係桑頓山上
右翼萬二人就駐入普拉欽高地西南既索科爾尼茲村 最後面有繆拉帶五千騎兵做預備隊
而佔有普拉欽高地既俄奧聯軍就準備用一萬人既右翼向桑頓山佯攻 帶隊既叫彼得·伊萬諾維奇·巴格拉基昂
剩低既七萬人就從法軍最薄弱既索科爾尼茲村打開缺口


彼得·伊萬諾維奇·巴格拉基昂

凌晨6點俄奧聯軍首先向法軍兩翼發動進攻 係南方索科爾尼茲村法軍據村固守擋住左俄奧聯軍第一波攻勢
北面桑頓山俄奧聯軍幾輪強攻後陣形潰散 拿破崙見機不可失下令繆拉將佢地趕盡殺絕
哼哼...你地支預備隊去左支援北面而家冇人救得到你地右翼啦!!全軍向索科爾尼茲村進攻!!
七萬俄奧聯軍前仆後繼攻向索科爾尼茲村 8點村中既法軍不敵敗走
但好彩達武從戰場外帶住八千援兵及時趕到重奪索科爾尼茲村 但又旋即被趕走
七萬俄奧聯軍從普拉欽高地源源不絕湧入索科爾尼茲村 法軍隨時中路不保
陛下!!話左普拉欽高地唔走得架啦!!我地輸緊啦!!
傻啦 我地已經贏左啦

勝利沖惛頭腦 大霧蒙蔽眼睛 俄奧聯軍眼中只有索科爾尼茲村而睇唔到腳下既景象
9點普拉欽高地中央既俄奧聯軍不斷向南衝既時候 係佢地腳下埋伏已久既中路法軍發起突擊
唔好開槍!!D彈藥留返黎守普拉欽高地!!全部同我上刺刀插死佢地!!
因大部分俄奧聯軍南下索科爾尼茲村令普拉欽高地防禦空虛 二萬中路法軍乘虛而入截斷俄奧聯軍南北支援
係南面失去索科爾尼茲村可守既法軍跟住中路既腳步退上普拉欽高地
係北面既俄奧聯軍被夾係普拉欽高地同桑頓山中間孤立無援
係南面幾經辛苦攻入索科爾尼茲村既俄奧聯軍得物無所用 而且更被普拉欽高地上既法軍切斷同後方既連絡
八萬俄奧聯軍係普拉欽高地下亂如受驚既老鼠
點...點會咁架...我五萬主力比人困晒係普拉欽高地後面啊!!快D同我打返普拉欽高地返黎!!
點打啊!?我地成支軍隊係索科爾尼茲村比人截斷左冇人落到命令過去 我地支預備隊得一萬人...山上面有成三萬人啊!!
可惡...!!拿破崙!!有種出黎同我隻揪啊!!!!
陛下!?唔好啊陛下!!快D搵人阻止陛下啊!!
亞歷山大一世抆刀上馬準備隻身衝入戰場 就係呢個時候北面繆拉既騎兵已經殺到去亞歷山大一世面前
俄國皇帝就係個到啦!!同聖彼得堡送終啦!!
亞歷山大一世個細佬君士坦丁大公帶住最後一萬人既預備隊奮勇頑抗掩護亞歷山大一世撤退而身受重傷
12點法軍最後一擊 讓-巴蒂斯特·波拿道特帶住萬三人趕到 係索科爾尼茲村既俄奧聯軍遭到前後夾攻
無處可逃既俄奧聯軍向南逃入冰封既小湖小溪 係普拉欽高地上既法軍見到就向湖面亂炮掃射
幾百俄奧聯軍沉屍湖底


讓-巴蒂斯特·波拿道特

奧斯特里茨戰役法軍死八千 俄奧聯軍死二萬六
帶住八萬七千人黎覆桌既弗朗茨二世同亞歷山大一世 最後只有孤身一人愴惶逃離戰場

第二日普魯士既大使攞住封宣戰書黎到
見到一地俄國佬奧國佬既屍體 仲有拿破崙滿面既笑容
普魯士大使即刻收起佢封宣戰書
恭喜戰無不勝既法國皇帝又打贏一場偉大既勝仗 我係代表普魯士黎同你結盟架
嘿 似乎命運之神改變左你說話既對象喎

奧斯特里茨戰役


https://youtube.com/watch?v=vIVgdFteJBw



https://youtube.com/watch?v=aW1p05MGePE


12月26日法國奧地利簽署普雷斯堡和約
奧地利將蒂羅爾 福拉爾堡割讓巴伐利亞選侯
布賴施高割讓巴登
外奧地利由巴登同符騰堡瓜分
係坎波福米歐條約中被併入奧地利既前威尼斯領土割讓義大利王國
奧格斯堡 帕紹主教區併入巴伐利亞
薩爾茨堡 貝希特斯加登併入奧地利
巴伐利亞 維藤堡升為王國
弗朗茨二世承認拿破崙帝位
奧地利退出第三次反法同盟

亞歷山大一世一個人走左幾百里路終於返到佢老家聖彼得堡
出黎迎接佢既又係個條死肥佬
拿 都話左場仗唔打得架啦
死肥佬...!!我既戰略係完美既!!會打輸仗都係因為你唔識帶兵拖累我!!咪撚再比我見到你個肚腩!!同我去烏克蘭放馬啦!!
就咁庫圖佐夫就比亞歷山大一世眨左去做烏克蘭總督

三個月前全英國人都慶祝緊特拉法加既大勝 人人都奉迎小威廉·皮特係歐洲既救世主
哈哈哈唔洗咁捧我 靠我一個人係救唔到歐洲既 多得大家努力姐 但最後可以拯救歐洲一定係我地英國!!
但突然傳黎俄奧聯軍係奧斯特里茨大敗 全場氣氛一沉
豬一樣既隊友啊...!!
個幾月後1806年1月23日小威廉·皮特激憤而死

2月12日拿破崙宣佈要係杜樂麗宮門口興建一座凱旋門迎接奧斯特里茨返黎既法軍
3月30日法國推翻那不勒斯王國 拿破崙立佢個個細佬約瑟夫·波拿巴繼承那不勒斯王位
6月5日拿破崙解散巴達維亞共和國建立荷蘭王國 又係搵佢個細佬路易·波拿巴做國王
6月梅特涅任奧地利駐法國大使出使巴黎

7月12日巴伐利亞王國 符騰堡王國 美因茨選侯 巴登選侯 貝格大公國 阿倫貝格公國 拿叟-烏辛根侯國 拿叟-魏爾堡侯國
霍亨索倫-黑欽根侯國 霍亨索倫-西格馬林根侯國 薩爾姆-薩爾姆侯國 薩爾姆-基爾堡侯國 伊森堡-比爾施泰因侯國 列支敦斯登侯國
黑森-達姆施塔特領地伯國 萊延伯國 共十六個神聖羅馬帝國諸侯簽署萊茵邦聯條約脫離神聖羅馬帝國加入由法國主導成立既萊茵邦聯
其後不斷有其他神聖羅馬帝國諸侯跟隨加入
最後8月6日神聖羅馬帝國皇帝弗朗茨二世放棄神聖羅馬帝國皇位 神聖羅馬帝國宣佈解散

從查理曼大帝800年加冕開始計起係1006年 從962年奧圖一世加冕開始計起就係844年
橫跨中世紀到近代歐洲 動盪千年既唔神聖亦唔羅馬更唔係帝國既神聖羅馬帝國終於係在位時間最長既哈布斯堡朝中壽終正寢
哈哈哈乜撚野神聖羅馬帝國皇帝!?你家陣不過係奧地利"大公"咋!!啊唔記得左添...你仲有波希米亞同匈牙利"王"位添 唔知以後我地要點稱呼你呢!?
被拿破崙武力奪去歐洲唯一皇帝既身份 弗朗茨二世難忍羞辱學拿破崙自封自己為奧地利人民既皇帝弗朗茨一世(當時俄羅斯唔被視為歐洲一部分)

因為法國解散神聖羅馬帝國建立萊茵邦聯令法國既勢力直接威脅到普魯士
為求自保普魯士就建議另一個仲未加入萊茵邦聯既德意志地區大國薩克森共組北德意志帝國 但被拒絕
之後法國提出用安斯巴赫交換漢諾威併入巴伐利亞 普魯士都係拒絕
為此法國又改為同英國談判建議聯手向普魯士宣戰 戰後會將漢諾威交還英國
凡此種種最終係10月6日將普魯士同薩克森逼上梁山 同英俄瑞組成第四次反法同盟

為軒制反法同盟法國都搵黎盟友
話說當年1804年既時候俄國支持鄂圖曼境內既塞爾維亞 波斯尼亞 保加尼亞人做反
但礙於俄國既威嚇鄂圖曼一直遲遲未敢鎮壓
就咁法國就以資助鎮壓為條件鼓勵鄂圖曼共同出兵俄國
鄂圖曼開始鎮壓塞爾維亞 之後俄羅斯就出兵瓦拉幾亞 摩爾達維亞
但鄂圖曼同俄羅斯開戰之後英國都跟住向鄂圖曼宣戰
而家有鄂圖曼拖住俄羅斯 英瑞既陸軍不值一提 最後拿破崙要對付既就只有普魯士薩克森呢兩舊新豬肉

普魯士向法國宣戰後全國動員左十五萬大軍
但普魯士國王腓特烈·威廉三世對點樣呢班人依然猶豫未決
不如我地退守易北河等俄軍主力黎到先一次解決佢地?
唔得 太保守啦 我地普魯士係歐洲陸軍第一強國!!睇我地當年係七年戰爭點樣虐待法國佬!?我地要比佢地受多次教訓!!
係佢個大仔路易·斐迪南堅持下腓特烈·威廉三世決定比佢個大仔做總指揮用十萬兵出征美因茨
但因為法國可以係萊茵邦聯駐軍同徵兵 係普魯士出兵不出十日 十八萬法軍已經衝到去薩克森既門口啦

拿破崙既戰略係希望可以好似上次奧斯特里茨戰役咁打一場決定性既勝仗黎瓦解反法同盟
佢就兵分兩路進軍萊比錫 一路係南面佢同內伊 奧熱羅 繆拉既九萬人 另一路就係北面波拿道特 達武既四萬七人
得知法軍進入薩克森 路易·斐迪南既先頭部隊即刻南下截擊
點知係10月10日撒菲爾德撞上左支二萬二人既法軍 路易·斐迪南當場戰死

連個大仔都死撚埋腓特烈·威廉三世又諗住撤兵返易北河 而前線既軍隊失去左總指揮各軍團就各自行動
有D認同腓特烈·威廉三世戰略既就開始向後方撤退 有D堅決一戰既就繼續向法軍南下
最後腓特烈·威廉三世重新任命第一次反法同盟既總司令布倫瑞克-沃爾芬比特公爵卡爾·威廉·斐迪南為總指揮

10月12日波拿道特 達武一路到達普軍主力後方既瑙姆堡
布倫瑞克-沃爾芬比特公爵見法軍已經行到咁近就建議先撤退重整陣形再行決戰
各路普軍開始向北撤退 其中一隊三萬八人既普軍係瑙姆堡南面唔遠既耶拿被法軍發現
拿破崙認定呢支就係普軍既主力 耶拿就係今次決定性既戰役

10月14日九萬法軍係耶拿城外截住呢支三萬八人既普軍 拿破崙下令係北面瑙姆堡既波拿道特 達武盡快南下支援
而呢支不幸被截到既普軍亦立即向西面威瑪城入面既萬三駐軍求援

三萬八普魯士軍係山地中間向南擺起佢地自豪既斜線陣 為應接將會係西面出現既援軍佢地將主力擺係右翼
係南面既法軍為發揮佢地人數既優勢 佢地希望可以將普軍向後推到平原上
朝早6點戰役開始 法軍全力壓迫普軍既中路 而普軍兩翼就用大量散兵去軒制
9點普軍中路已經獨力難支要推埋佢地預備隊去協防苦苦支撐佢地既陣地
但係法軍後方帶騎兵既內伊已經用盡耐性 未有命令下突然帶住四千騎兵衝向普軍右翼
以勇猛見稱既內伊一連撞穿普軍三層既步兵戰列 但後勁不繼被第四層打回頭
但想走咩 以紀律見稱既普魯士軍佢地被撞穿個三層戰列已經重新列隊上起刺刀面向內伊
拿破崙見內伊被困普軍右翼中心 立即下令另一個騎將繆拉救援
而家普軍就連右翼都陷入大混戰 如果威瑪既援兵仲未到就全軍覆沒

繆拉騎兵突擊

晏晝2點威瑪既援兵終於趕到 耶拿既普軍以為可以安心撤退
點知佢地走黎唔係協助撤退而係直接撞向法軍既左翼 但因人數劣勢一撞就散
見援兵都死埋剩低既普軍都紛紛潰散
耶拿會戰法軍死二千五 普軍死一萬 降萬五
拿破崙心中暗喜 哈又會贏得咁輕鬆既
的確耶拿會戰係決定性既戰役 但並唔係發生係拿破崙身上

耶拿會戰

下集拿破崙戰爭篇(中)第四,五次反法同盟

膠登仔都睇得明既簡易西史入門第三十二集:拿破崙戰爭篇(中)第四,五次反法同盟

係耶拿既槍聲岩岩打響既7點鐘 係耶拿北面達武同波拿道特正兵分兩路南下支援拿破崙
當達武帶住佢個二萬七人一離開瑙姆堡就比佢係奧爾斯塔特見到一支普魯士軍
將軍!!我地既斥侯係前方發現普魯士軍!!
下!?普魯士軍!?我睇過...唔...好似好多又好似好少...好似有D步兵又好似有D騎兵咁...你知啦我有大近視睇唔清楚...
唔理啦!!總知你地退入漢森豪森村排起方陣同埋搵人通知波拿道特過黎幫拖先啦!!
就咁達武個二萬七人就係漢森豪森村入面排起當年拿破崙係埃及排過既方陣
而達武面對既其實先係拿破崙所期待既普軍主力 布倫瑞克-沃爾芬比特公爵所帶領既六萬三大軍

正當布倫瑞克-沃爾芬比特公爵帶住佢既主力撤退時路過奧爾斯塔特咁橋比佢地見到支法軍
睇落見佢地冇咩人布倫瑞克-沃爾芬比特公爵就放大膽佈起陣準備跌落地都可以執返集沙
一開波布倫瑞克-沃爾芬比特公爵就下令騎兵突擊希望可以將法軍趕出漢森豪森村
帶住呢兜騎兵個個叫瓦爾施塔特公爵格布哈德·列博萊希特·馮·布呂歇爾

瓦爾施塔特公爵格布哈德·列博萊希特·馮·布呂歇爾
布呂歇爾帶兜騎兵衝到埋漢森豪森村先發現法軍佈既陣唔係見慣見熟既戰列
而係有前冇後毫無破綻既方陣 布呂歇爾幾輪衝擊後只係留低一地被吉成蜜蜂竇既騎兵
布倫瑞克-沃爾芬比特公爵見騎兵衝鋒失敗後下令步兵前進
但又被漢森豪森村入面四十七碌大炮用散彈打成另一堆蜜蜂竇 就連布倫瑞克-沃爾芬比特公爵都被打成重傷抬出戰場
六萬普軍失去司令 人數反而成為負擔 各部隊互不接應
達武見普軍陷入混亂即令騎兵出村包抄

11點拿破崙仲係耶拿城外用九萬人同三萬八人磨緊既時候
達武已經派黎信差宣佈勝利
咩話!?用二萬七搞掂左六萬三人!?叫你地個近視元帥睇清楚D先!!

到耶拿會戰結束後拿破崙去到奧爾斯塔特佢先可以相信達武既戰果
法軍死七千 普軍死一萬 降三千
呢場勝利榮耀係屬於你既!!相反...波拿道特...你條仆街係到做乜7!?兩邊都唔見你既!?你帶住個二萬人黎郊遊架!?YOU ARE FIRE!!


耶拿/奧爾斯塔特戰役

耶拿會戰後既拿破崙

戰後拿破崙進入耶拿 全市既人都出黎一賭法國皇帝既風彩
其中有條友見到拿破崙就感動到跪係到淚流滿面
我見到世界既精神啊...
佢係耶拿大學哲學系教授格奧爾格·威廉·腓特烈·黑格爾

耶拿/奧爾斯塔特戰役十一日後10月25日達武就攻入柏林 腓特烈·威廉三世帶全家逃入東普魯士首府柯尼斯堡
而布呂歇爾就帶住奧爾斯塔特既殘兵逃入威瑪 但威瑪早已被法軍攻佔 佢就繼續向北走
然後又聚集到二萬人逃入中立城市呂貝克
佢帶住軍隊用斧頭破開呂貝克城門強行入城 但冇耐波拿道特同繆拉趕到佢又繼續逃走
最後係10月28日拉特考向波拿道特投降成為法軍既俘虜


拿破崙進入柏林

11月21日拿破崙係柏林頒布大陸封鎖令禁止法國及其屬國治下既港口同英國既一切來往並沒收所有黎自英國既貨物
12月11日薩克森退出第四次反法同盟加入萊茵邦聯
拿破崙就將薩克森連同符騰堡 巴伐利亞升為王國作回報

開戰十幾日堪稱歐洲陸軍第一強國既普魯士就已經輸到渣都唔剩
法軍踩平左西普魯士之後就轉入波蘭 當地既波蘭人都視法軍為解放者個個主動驅逐普魯士軍開城迎接
到最後普魯士國王只可以瑟縮係柯尼斯堡係俄羅斯軍隊保護下苟且殘存
1807年七萬俄軍主力西出東普魯士驅逐西普魯士既法軍
拿破崙見到又帶七萬人從波蘭北上截佢後路
得知法軍北上 俄軍又兜返轉頭2月8日係埃勞決戰但打成平手
最後法軍係柯尼斯堡門口既弗里德蘭大勝俄軍

為免鄂圖曼戰線被弗里德蘭之敗拖跨 亞歷山大一世終於不情不願咁同拿破崙簽署和約
拿破崙同亞歷山大一世係尼曼河上兩國佔領地之間既提爾西特會面
俄國退出第四次反法同盟並與法國結盟
俄羅斯加入大陸封鎖
俄國向英國宣戰 法國向鄂圖曼宣戰
而戰爭既起因普魯士係會面中被排除在外成為兩國既豬肉
科特布斯割讓薩克森 法國係普魯士易北河西岸既領土建立西伐利亞王國由拿破崙細佬熱羅姆·波拿巴做國王
比亞韋斯托克割讓俄羅斯 普魯士係舊波蘭所佔領土上成立華沙大公國由薩克森國王兼任華沙大公
普魯士軍力限制於四萬人以下 並賠償法國一億法郎

拿破崙亞歷山大一世係提爾西特會面

到而家全歐洲大陸既國家都成為拿破崙既屬國同盟友 仲未加入大陸封鎖既國家只係得返兩個
葡萄牙同瑞典

1808年2月俄羅斯武力要脅瑞典加入大陸封鎖不果就以八萬大軍入侵瑞典
為支援瑞典英國就向俄國宣戰並入侵丹麥
而係歐洲另一邊葡萄牙隔離既西班牙 時任國王係卡洛斯四世
佢係前任國王卡洛斯三世個二仔 身為二仔既佢做得成國王都係多得佢既血統
雖然西班牙王位繼承戰爭結束已近一世紀 而西班牙王室亦從哈布斯堡轉到波旁家族手上
但佢地王室既弱智基因依然根深柢固 卡洛斯四世啊哥之所以做唔成國王就係因為佢實在太蠢
為免重蹈西班牙王位繼承戰爭既覆轍 佢老豆就將個王位傳比佢二仔
但事實上無論卡洛斯三世定卡洛斯四世佢兩個都唔係咩聰明人 卡洛斯四世不過係一個蠢人眼中冇咁蠢既蠢人而已

1765年9月4日當時仲未登基既卡洛斯四世娶左個老婆 帕爾馬公國公主瑪麗亞·路易莎
卡洛斯四世就向佢承諾 如果你幫我生到仔既話我就比個攝政你做!!
1784年10月14日又真係比佢生到個喎 佢地個仔叫斐迪南
最終卡洛斯四世係1788年12月14日繼承西班牙王位 而佢又真係比佢個老婆做攝政喎
卡洛斯四世將大權交晒比佢老婆之後就自己四遊樂打獵 而佢老婆瑪麗亞·路易莎就一個人係馬德里四圍勾佬
最後仲比埋佢隻鴨曼努埃爾·德·戈多伊做西班牙首相 呢個時候正正就係法國大革命反法同盟戰爭既動盪時代

唔係話西班牙腳頭差陀衰家 但早已衰落既西班牙王國無論加入邊個陣營都有輸無贏
不斷既戰爭 連場既敗仗 全國上下民怨沸騰
1807年10月27日西班牙同法國簽訂楓丹白露條約承諾法國征服葡萄牙後將大部分領土給予戈多伊換取西班牙開放國境比法軍入侵葡萄牙
咁既賣國條約都簽得出西班牙既改革派就密謀推翻卡洛斯四世立斐迪南繼承王位
但事實上呢班人都係法國資助佢地做反
12月1日法軍攻陷里斯本 葡萄牙女王瑪利亞一世逃亡巴西

西班牙發生暴亂後卡洛斯四世就向法國駐軍求助要求幫手鎮壓
但外國軍隊介入就更激起西班牙人既民族情緒
結果1808年3月19日馬德里發生暴動推 卡洛斯四世就揼低張退位詔書就帶住佢老婆同襟兄弟逃亡法國
而佢個仔斐迪南就繼位為斐迪南七世
但卡洛斯四世走到去法國佢又反口指責佢個仔發起政變搶奪佢既王位 要求法國出兵幫佢復位
拿破崙就下令法國駐軍將佢兩仔爺夾返去法國逼佢地一齊簽退位詔書將王位交比拿破崙啊哥約瑟夫·波拿巴
6月6日約瑟夫·波拿巴繼承西班牙王位 而佢個那不勒斯王位就交比拿破崙個名將兼妹夫繆拉
法國橫蠻既侵略激起全伊比利亞半島人民既反抗
英國佬同法國紏纏左咁耐亦因為咁終於搵到個位比佢地支弱小既陸軍登陸
8月一支一萬人既英軍係葡萄牙登陸
帶隊個個叫阿瑟·韋斯利 一個39歲係印度服役左七年既陸軍中將

斐迪南七世
1809年1月5日英國同鄂圖曼簽訂達達尼爾條約
鄂圖曼禁止所有外國戰艦進入達達尼爾海峽及博斯普魯斯海峽 英國保護鄂圖曼免受法國威脅
英土戰爭結束後英國將更大既武力投放係伊比利亞半島 而法國則有共廿萬人與之抗衡
但西班牙人民既遊擊 焦土同埋佢地貧瘠土地令法國既大軍反而成為負累
係巴黎既奧地利大使梅特涅得知法國因半島戰爭陷入泥沼就發信比奧皇弗朗茨一世
唔好諗住係拿破崙之下可以得到和平 雖然明明佢自己都係皇帝但憑佢對專制君主既仇恨歐洲係唔會得到和平
早排塔列朗先向俄國駐法國提議大使共同出兵奧地利被拒絕 我可以向陛下保證俄國對法國既同盟唔係真心既
再加上而家法國全國既人力物力都倒晒落伊比利亞半島 要了結佢就趁而家 唔係等佢結束左半島戰爭就再冇人可以對付佢

4月9日奧地利同英國組成第五次反法同盟再次向法國宣戰
當然除左梅特涅既鼓勵 之所以奧地利會夠膽同法國佬開拖因為佢地完成左佢地既軍事改革
第三次反法同盟慘敗後奧地利仿傚法國建立全民動員既徵兵制度
好快佢地就將全國既軍隊人數擴充到廿五萬 分三路攻向法國既屬國
一路向義大利 一路向萊茵邦聯既巴伐利亞 一路向波蘭
因為法國既主力都去晒打半島戰爭 拿破崙係巴黎收到開戰既消息就帶住十八萬萊茵邦聯既軍隊衝向奧地利
22日拿破崙係累根斯堡門口既埃克謬爾戰役重創奧軍主力後渡過多瑙河沿南岸東進維也納
而殘餘既十萬奧軍就係多瑙河北岸聚集以軒制法軍既行動
被孤立係奧地利中心既拿破崙希望盡快攻入維也納逼使奧地利退出戰爭
5月13日維也納無血開城但弗朗茨一世早就逃之夭夭 家陣拿破崙想結束戰爭就不得不解決多瑙河對岸既奧軍主力

20日拿破崙簡中左維也納城外多瑙河最狹窄既一段 係中間仲有個洛鮑島
首先拿破崙帶十萬人游過洛鮑島然後再搭起浮橋到對岸
21日凌晨十萬人踩過浮橋目標係對岸既阿斯佩恩 艾斯林兩條村
係呢兩條村後面早有七萬三奧軍係到等緊
當法國三萬先頭部隊過左河進入阿斯佩恩 艾斯林村之後對面既奧軍就開始向兩條村中間發起進攻
兩軍一直爭持到夜晚互不相讓
入夜後兩軍停火 拿破崙就趁呢個時間繼續從洛鮑島調兵入村
到第朝22日阿斯佩恩 艾斯林村既法軍已經增加到五萬人 而對面既奧軍亦上升到十萬人
今次戰鬥再開始時奧軍既目標集中係西面既阿斯佩恩 為應接奧軍既強攻法軍更多既士兵係向阿斯佩恩既浮橋過河
奧軍將法軍都引晒去西面既浮橋之後奧軍將佢地溜夜準備既火船從上游放向法軍既浮橋
連向阿斯佩恩既浮橋一條條被撞毀 村中既法軍孤立無援
晏晝2點阿斯佩恩陷落 拿破崙下令撤退
拿破崙十年沙場第一次敗仗
法軍死二萬三 奧軍死二萬一


奧軍進攻艾斯林


阿斯佩恩-艾斯林戰役

阿斯佩恩-艾斯林戰役後法奧兩軍繼續向維也納增援
到7月5日法軍全支征奧大軍十八萬人都到齊 而奧軍亦有十六萬人
拿破崙趁大雨視野不清而奧軍亦冇辦法使用火船就再一次搭起浮橋
6日十八萬法軍全部過河奧軍先係瓦格拉姆城外急急佈起戰陣 最後寡不敵眾撤退
法軍死三萬 奧軍死四萬
法軍主力係維也納站穩陣腳 弗朗茨一世不得不向拿破崙求和
為爭取有利既談判條件 弗朗茨一世將駐法大使梅特涅升為外交大臣同內務府大臣


瓦格拉姆戰役

9月17日俄國瑞典簽訂腓特烈斯哈姆條約 瑞典放棄芬蘭地區
俄羅斯建立芬蘭大公國 由俄羅斯皇帝兼任芬蘭大公

10月14日法國奧地利簽訂申布倫條約
奧地利割讓蒂羅爾 薩爾茨堡予巴伐利亞王國
割讓西加里西亞予華沙大公國
割讓捷爾諾波爾地區予俄羅斯帝國
割讓第里雅斯特 薩瓦河以南既克羅地亞予法國
奧地利承認約瑟夫·波拿巴為西班牙國王
奧地利軍隊限制於十五萬人以下

歐洲大陸最後既抵抗者瑞典奧地利都遭到滅頂之災
拿破崙近乎統一歐洲 近乎
剩低既英國繼續用大陸封鎖佢遲早一定會投降既
之後就係俄國佬
繼佢拒絕左共同出兵奧地利既要求後拿破崙再一次試探俄國佬既忠誠
因為拿破崙個老婆約瑟芬·德博阿爾內不孕 而拿破崙自己都唔細
家陣佢急需一個合法既老婆為佢既帝國準備一個繼承人
拿破崙向亞歷山大一世最細仲未嫁既啊妹安娜·帕夫洛芙娜求婚 亞歷山大一世諗都唔諗就拒絕左
梅特涅知道左之後就通街唱啦
唱咩?
唔係唱拿破崙收卡
係唱佢老闆弗朗茨一世個女瑪麗·路易莎

梅特涅搵人全歐洲通街唱瑪麗·路易莎一直暗戀拿破崙 梅特涅仲擅自為佢地兩人籌備婚禮
1810年3月11日拿破崙休左相比之下出身卑微仲冇仔生既舊菜約瑟芬·德博阿爾內同瑪麗·路易莎成婚

當年耶拿會戰中作戰不力而被拿破崙炒左既波拿道特戰後一個人返到巴黎
巴黎政府就派左佢去做羅馬總督
當時瑞典國王卡爾十三世冇仔 而佢又係靠政變推翻佢啊哥個孫黎上位
姐係而家卡爾十三世成為瑞典王室唯一既男人
為佢王位繼續問題佢就派出大使到各強國搵意見啦
被派去法國既大使就係巴黎識左波拿道特 佢就竟然擅自封佢為王儲仲請佢去瑞典玩
波拿道特去到瑞典識左卡爾十三世 佢兩個相處得幾好
卡爾十三世就收波拿道特為契仔正式封佢為王儲
就咁波拿道特就比瑞典挖左角啦

拿破崙同瑪麗·路易莎成婚一年後1811年3月20日佢兩個仲生左個仔弗朗索瓦·夏爾·約瑟夫·波拿巴
家陣有埋哈布斯堡家族生既仔拿破崙就再冇後顧之懮可以搵俄國佬找數
4月2日法國指責俄羅斯未有尊守大陸封鎖私自同英國進行貿易
又遣責俄國侵略鄂圖曼 更係俄國邊境動員軍隊
亞歷山大一世聞到陣除知道拿破崙差唔多夠鐘要對付自己就係1811年6月再次起用庫圖佐夫


拿破崙老婆同仔

呢個時候一個黎自利沃里亞既蘇格蘭人 俄國既戰爭大臣米哈伊爾·博格達諾維奇·巴克萊·德托利向亞歷山大一世提出對法防衛大綱
佢係對法防衛大綱提出以焦土戰術吸引法軍不斷深入令法軍分兵佔領俄羅斯廣大而荒蕪既土地
直到法軍停止前進再以大軍一次過將法軍趕出俄國領土
呢個計畫深得亞歷山大一世既歡心 但因巴克萊·德托利既外國出身令佢既計畫被受批評
最後係亞歷山大一世壓力下俄羅斯議會係8月16日通過對法防衛大綱並任命巴克萊·德托利為陸軍總司令


米哈伊爾·博格達諾維奇·巴克萊·德托利

1812年5月28日庫圖佐夫不負所托短係時間逼降左鄂圖曼
俄羅斯鄂圖曼簽署布加勒斯特條約 鄂圖曼係巴爾幹同高加索割讓大片土地比俄羅斯

6月18日美國指責英國扣押美國貨船侵犯美國中立地位而向英國宣戰
6月23日黎自除瑞典以外全歐洲大陸各國共一百二十萬大軍齊集俄國邊境既尼曼河
一半由奧熱羅係柏林指揮負責後勤 一半將會陪同拿破崙進入呢片雪地蠻荒
一支歐洲史上最大既軍隊準備打一場歐洲史上最大既戰爭

下集拿破崙戰爭篇(下)第六,七次反法同盟

留名支持

我back up左有陸續upload返晒上黎

呢排返工唔多野做，睇下文用嚟消磨下時間又增長下知識

平時搭車睇都好正
隔一排又重睇一次

膠登仔真係好高汁

睇完喇，樓主方便的話請繼續post

一向對歷史有興趣
不論歐洲定亞洲，如日本，泰國，越南，馬來西亞，中東等