［極高質分享］膠登簡易歐洲史入門

膠登仔都睇得明既簡易西史入門第十八集:宗教改革番外篇:大公教VS長老會VS清教徒既英國內戰

1605年既英國 三十年戰爭爆發前十三年既11月5日
登基兩年既英國國王詹士一世係上議院主持開幕典禮
但係上議院既地下室 一位太平紳士收到線報入黎突擊檢查
佢一入到黎見到既係裝滿整個地下室既火藥
同埋一個痴線佬


Remember remember the fifth of November
gunpowder treason and plot
I see no reason why gunpowder treason
should ever be forgot

經過嚴刑迫供後知道 原來唔只一個痴線佬
背後仲有一大班大公教既痴線佬 佢地為左復興大公教既英國
密謀係國會開幕典禮中炸死英王詹士一世同一眾議員
然後迎立詹士一世個女 嫁左比普法爾茨選侯腓特烈五世既伊麗莎白·斯圖亞特為女王

Guy Fawkes Guy Fawkes
twas his intent
to blow up the King and the Parliament
Three score barrels of powder below
Poor old England to overthrow
By God's providence he was catch'd
With a dark lantern and burning match
Holloa boys holloa boys make the bells ring
Holloa boys holloa boys God save the King!
Hip hip hoorah!

或者有D人睇左某D電影會以為佢係D咩自由鬥士
但係當時英國人眼中 呢場陰謀只係提醒佢地一件事
羅馬教會既魔爪從未離開過我地

A penny loaf to feed the Pope
A farthing o'cheese to choke him
A pint of beer to rinse it down
A faggot of sticks to burn him
Burn him in a tub of tar
Burn him like a blazing star
Burn his body from his head
Then we'll say ol'Pope is dead
Hip hip hoorah!
Hip hip hoorah!



https://youtube.com/watch?v=LF1951pENdk


1567年蘇格蘭貴族趕走詹士啊媽 蘇格蘭女王瑪麗一世 立詹士為蘇格蘭國王詹士六世
1603年英國女王伊麗莎白一世逝世 詹士六世繼位為英格蘭既詹士一世

詹士一世同前任一眾英國都鐸朝國王唔同
呢隻蘇格蘭山番冇辦法理解英國既政治文化同傳統
佢既任意莽為而又不負責任 君臣互相猜忌
到最後實際工作就落左係佢寵臣第一代白金漢公爵喬治·維利爾斯 同詹士一世個仔查理身上

1623年對面海既三十年戰爭打得如火如荼
呢個時候詹士一世既妹夫普法爾茨選侯腓特烈五世已經係荷蘭牛左十一年
就算佢唔關心對面海既戰況 佢都擔心佢個妹既安危
為此佢諗到條好橋 就係拉攏西班牙

詹士一世就派左喬治·維利爾斯去西班牙傾兩國聯姻既事宜
咩話?聯姻?憑你?更正教國家?同我?
因宗教改革同地緣政治 英國同西班牙係伊麗莎白時代起已經係世仇 西班牙人當然唔會有好面色比佢睇啦
OK你想要我塊西下嘛 比個條件你啦 第一查理必須轉宗大公教 第二成婚後佢要作為人質住西班牙一年
喬治·維利爾斯比西班牙玩到拍枱走返英國
比佢返到英國就緊係要公報私仇啦

喬治·維利爾斯提出出兵西班牙
雖然呢個提案當然好岩國會口味
但國會就撥款內容同喬治·維利爾斯拗起上黎啦

就係佢地兩方拗緊既時候 詹士一世已經搵到另一塊西啦
呢塊西叫法蘭西 法國國王路易十三個妹亨利埃塔·瑪麗亞 一樣係大公教徒
國會嘩然
話撚左呢隻蘇格蘭山番架啦!!佢就係存心要整死聖公會!!
雖然查理向國會承諾唔會放鬆對大公教既管制
但呢樣已經成為佢地兩方既第一條裂痕

1625年3月27日詹士一世逝世查理繼位為查理一世
1625年5月11日查理一世同亨利埃塔·瑪麗亞成婚

查理一世

詹士一世死後查理一世同國會又返返去討論出兵西班牙既問題
國會提出請支海盜打劫西班牙船隊
嗯 理性務實
但查理一世又諗到另一條橋
不如我地直接出兵西班牙本土啊?
國會又再嘩然

乜你真心黎打仗架!?我諗住黎打劫架咋!!你唔睇下對面海打到咩環境!?呢個潭邊個填得起啊!?
最後拗左一大輪國會只係批左十四萬磅比查理一世
十四萬!?我整隻黃鴨都唔夠啦!!唔得 我要加稅
加稅?加咩稅啊?
噸稅同磅稅

噸稅同磅稅係愛德華二世發明既野
每噸西班牙同葡萄牙入口既酒同每磅出入口既貨品都要抽稅
簡單D黎講姐係關稅
對國會入面呢班生意人黎講當然唔可以接受啦
OK你抽囉 根據英國法律 所有稅款都要經國會批准先可以抽 呢筆稅而家我就要你每年黎同我續期

1625年10月喬治·維利爾斯支艦隊終於出海啦
然後到12月終於返返黎

點啊?打成點啊?打劫到幾多野啊?
嗯 西班牙紅酒唔錯
咁打劫到幾多野姐?回唔會到本啊?
不過食物就差D
我問你D錢啊!!D錢去撚晒邊啊!?

因為呢場失敗既遠征國會彈劾喬治·維利爾斯
但憑查理一世同喬治·維利爾斯長期既交情 查理一世緊係死攬佢啦
點攬?直接解散國會咪得囉

解散國會係保住左喬治·維利爾斯
但英國所有稅項都要經國會批准 但而家冇左國會咁點算呢
查理一世又發明左一樣一聽就明既野啦
強制借款

1627年11月有條友叫達內爾 因為佢拒絕邀交強制借款而比查理一世既稅官帶兵闖入佢屋企將佢收監
事後佢向法院申請人身保護令 結果法院裁定強制借款遺法
如果到而家查理一世都仲想用強制借款賺錢既話咁佢要拆埋座法院先得啦

1628年饑寒交迫既查理一世重開議會
國會食住上提出權利請願書 呼籲查理一世改過自新 唔可以再未經國會同意就徵稅
唔可以對公民強制戒嚴 唔可以未經法律程序就將公民收監或係公民屋企駐紮軍隊
哦 好啊

下巴輕輕 到1629年又出事啦
有個議員因為交唔起噸稅同磅稅而被沒收貨物
國會認為權利請願書中既:唔可以未經法律程序就將公民收監 係包括公民既財產 動議撤回噸稅同磅稅
查理一世又唔撚老黎又再次解散國會 今次仲順手斬左八個議員

就算廢左國會你依然要食飯 依然冇權收稅
不過今次查理一世決心要靠自己開飯 佢就開始摷法律LA啦 一摷就摷到兩條
第一條叫騎士扣押法 一條十三世紀既法律
根據騎士扣押法每個年收入多過40磅既人都要成為騎士為王室服役 唔係既就要罰款
立法到而家過左成四百年 年收入多過40磅既人一街都係
第二條係船稅 愛德華一世時期既法律
所有船停泊沿海港口都要交稅 查理一世去盡D 內河港口都收
好快查理一世就係呢兩到呃左大一筆啦

1633年前任坎特伯雷大主教死左
查理一世就放做件佢既親信威廉·勞德去做
威廉·勞德係個虔誠既聖公會神父 而查理一世亦唔似佢啊爸 佢自己本身都聖公會教大既
咁呢個背景都應該好穩陣啦 應該

威廉·勞德

雖然英國既國教係聖公會
要知道當年英國既宗教改革係出於亨利八世一人既任性
聖公會係教義上同羅馬大公教冇乜分別
但到而家係英國傳播最廣既係加爾文主義既清教徒

威廉·勞德一上任就開始對付清教徒啦
係佢眼中既然聖公會係英國國教 咁任何遺反聖公會教義既無論你係羅馬大公教定其他更正教教會 你都係異端
威廉·勞德開返伊麗莎白時期既宗教裁判所-星室法庭去對付清教徒啦

搞完英國佬佢又搞另一個 蘇格蘭
同樣 查理一世就覺得既然我係蘇格蘭既國王 咁蘇格蘭都應該跟返我既信仰啊
咁查理一世就攞聖公會既公禱書逼蘇格蘭人用囉喎
但信加爾文主義長老宗既蘇格蘭人就冇你咁好氣啦
1638年蘇格蘭貴族直接推翻政府 以長老宗貴族重新組織個新政府 然後起兵進攻英國引發主教戰爭

哇屌你 而家我連自己都養唔起 仲要打仗!?
查理一世認定蘇格蘭做反因為有法國佬撐腰 但佢自己又冇錢打仗喎 咁就緊係要搵法國既世仇幫拖啦
查理一世走去搵西班牙幫拖 一般黎講英國同西班牙係世仇 但今次可以介入英國既宗教事務就唔同講法
西班牙好快就搵左一大支艦隊帶住一大筆錢浩浩蕩蕩咁游水去英國 結果游到半路遇到班乞衣 荷蘭既

唐斯海戰

1640年求助無門既查理一世又重開議會 愛爾蘭既
查理一世係愛爾蘭國會到乞左18萬磅同九千兵返黎
當然呢筆數唔會夠用啦
然後1640年4月13日查理一世又重開英國國會 諗住籌埋剩底筆數
國會一聚埋就屌9查理一世呢場仗係佢疚由自取 仲引入外國大公教勢力干預英國內政
最後國會得出結論係你肯收返船稅我就比65萬磅你
而查理一世得出結論就係你攞65萬磅返屋企攝枱腳啦!!
5月5日查理一世又又解散國會

不過查理一世同英國國會鬥完氣返黎依然冇錢冇兵
查理一世只好同蘇格蘭認衰簽左瑞彭條約 英國割讓諾森伯蘭郡同對衡郡另外要每日比850磅養住蘇格蘭軍
呢鋪查理一世真係破產都唔掂 1640年11月3日又又重開國會

話開就開話散就散 你當呢到咩地方啊?法國既三級議會?
一路揮之則來呼之則去既英國國會今次對查理一世都冇咁好氣 佢地開始做D更根本性制度化既野去限制國王權力
國會通過三年法案 規定每三年至少召開一次國會
1640神職人員法 解散聖公會主教制度 宣佈騎士扣押法同船稅為非法
之後國會開始清理查理一世身邊既刷鞋仔 其中威廉·勞德被控叛國罪收監等斬
另一個係愛爾蘭總督第一代斯特拉福德伯爵托馬斯·溫特沃思

就係國會批鬥得查理一世好開心既時候1641年10月23日愛爾蘭人起兵做反
愛爾蘭同英格蘭蘇格蘭唔同 佢地係大公教徒
愛爾蘭一直都係歐洲最落後既角落 係世俗君主到達愛爾蘭之前首先到達既係天主教既傳教士
要到十二世紀英國先開始係愛爾蘭拓展勢力 羅馬教廷基於政治現實先"恩許"英國王室得到愛爾蘭既"統治權"
但理論上愛爾蘭仲係教廷既財產
然後到亨利八世開始左英國既宗教改革 拒絕承認羅馬教會 英國王室先開始自帶愛爾蘭國王銜頭
但愛爾蘭人依然信奉大公教效忠羅馬教會
當蘇格蘭得到"半獨立" 英國國會處死前總督第一代斯特拉福德伯爵托馬斯·溫特沃思
愛爾蘭人開始驚啦
對面島既邪教徒要對付我地啦!!

而對面島既邪教徒佢地既反應係
首先係法國跟住係西班牙而家到愛爾蘭 查理一世次次都痴埋大公教到 佢真係要整死聖公會復辟大公教啊!!
不過陰謀論還陰謀論場仗都係要打既 查理一世問國會籌錢出兵
仲想我比兵你!?比你同班邪教徒裡應外合啊!?你想要兵啊嘛!?得!!支軍隊要向國會負責!!
國會提出國民軍法案

如果比著以前既查理一世 佢會又又又解散國會 不過呢招連佢都玩到嫌
所以今次佢做左樣更過份既事
帶兵攻入國會

約翰·皮姆 約翰·漢普頓 登齊爾·霍利斯 威廉·斯特羅德 亞瑟·黑塞爾瑞格 奧利華·克倫威爾我要呢六個人!!
查理一世攻入國會準備逮捕呢六個反對派議員
下議院院長就回答佢:請陛下原諒 作為下議院既僕人 我只為下議院服務 對於你既要求我只可以話 我見唔到 見到都唔話你知
屌!!我D雀仔飛走晒啦!! 係下議院院長包庇下查理一世兩手空空離開國會
其實查理一世要求個六個人早係佢攻入黎之前已經走晒 除左最後一個 奧利華·克倫威爾

奧利華·克倫威爾

當年亨利八世搞宗教改革時其中一個推手湯瑪斯·克倫威爾 佢既後人因為佢既功績得到貴族既地位
然後傳到一百年後既而家終於傳到奧利華·克倫威爾頭上

奧利華·克倫威爾1599年4月25日出生
作為湯瑪斯·克倫威爾百年後人 佢身上已經睇唔到半點貴味
奧利華·克倫威爾直到40歲為止佢係佢故鄉亨廷頓一路過住默默無聞既農村生活
然後到1636年佢靠佢家族背景入左伊利聖三一主教座堂到做野 從此開始踏入政界
到1640年查理一世又又重開國會既時候 一個堅定既清教徒奧利華·克倫威爾成為主要既反對派議員
當1642年8月22日查理一世於諾定咸起兵討伐做反既國會 英國內戰開始
奧利華·克倫威爾就親自組織同帶領支私家騎兵"鐵甲軍"連連戰勝查理一世既保王軍成為議會軍既英雄人物

1644年10月27日議會軍直逼查理一世停駐地牛津 終戰在望
議會軍雖然係牛津門口既第二次紐伯利戰役戰勝保王軍
但議會軍中長老會同清教徒之間不和令查理一世成功逃走
就咁國會決定改組軍隊 軍隊唔再係國會搵人去帶 而係由固定一個人全盤負責
1644年12月19日國會通過獻身法令禁止議員帶兵
1645年1月6日新模範軍成立 由奧利華·克倫威爾帶領

英國內戰過程

1646年6月24日新模範軍攻陷牛津 查理一世逃向蘇格蘭向蘇格蘭投降
查理一世向蘇格蘭承諾如果蘇格蘭可以恢復佢既王位佢會比長老會建立為期三年既政府
結果蘇格蘭軍被新模範軍擊敗 連蘇格蘭議會都被廢除埋 查理一世被搭返英國



https://youtube.com/watch?v=Phz5AADXXM0


1648年12月1日英國國會以129票贊成83票反對 重新迎立查理一世為國王 其中投支持票既大部分係長老會既人
今次唔係國會嘩然 係新模範軍
場仗打得辛辛苦苦先搭到查理一世返黎原來你地又捧返佢上王位架
以清教徒為主既新模範軍不滿投票結果逮捕長老會議員
再到16月6日國會就審判查理一世進行表決 新模範軍駐紮係國會門外只有支持審判查理一世既先可以入去
最後結果1649年1月4日國會通過以叛國罪審判查理一世
今次新模範軍滿意啦 但議案被遭上議院否決
唔緊要 你已經阻唔到我地

審判查理一世

1月20日查理一世被59個下議員判決有罪處以死刑
1月30日查理一世處死 查理一世家人流亡歐洲大陸
2月6日下議院宣布廢除上議院 次日宣布廢除君主制
2月14日宣布成立國務會議為國家政府 奧利華·克倫威爾出任首任國務會議主席
5月19日英國宣布成為英格蘭聯邦
1653年奧利華·克倫威爾解散國會自封護國公
如果用現代既詞語去講呢個叫軍政府

查理一世處斬

然後到1658年9月3日奧利華·克倫威爾過身 佢個仔理查·克倫威爾繼位
理查·克倫威爾繼位護國公後重開議會 但好快比國會趕走流亡法國
1660年3月29日國會迎立查理一世個仔查理為查理二世
兜一大個圈查理又返返黎
係蘇格蘭有個作家湯瑪斯·厄克特聽到呢單新聞當場笑死

查理二世

大家都希望查理二世可以吸收佢父輩既教訓生生性性做人
結果1662年查理二世迎娶葡萄牙公主大公教徒布拉干薩的凱瑟琳
國會嘩然
話撚左呢隻蘇格蘭山番架啦!!佢就係存心要整死聖公會!!
查理向國會承諾唔會放鬆對大公教既管制 仲簽左條統一法案將英國既信仰統一係聖公會之下
結果受害既唔係大公教徒 係長老會同清教徒

雖然查理二世結左婚 但佢兩夫婦遲遲未生到個王位繼承人出黎
英國人開始愈黎愈擔心 因為而家既最高順位繼承人係查理二世個細佬 公然信奉大公教既詹士
1673年詹士同摩德納的瑪麗結婚
義大利...大公教...義大利...大公教...大公教徒既王儲同個義大利既大公教徒結婚啊!!
一切一切都太令人似曾相識 英國人都希望眼前既事實不過係既視感既幻覺
但事實始終係事實...

Remember remember the fifth of November
gunpowder treason and plot
I see no reason why gunpowder treason
should ever be forgot

為舒解廣大聖公會教徒既疑慮1677年詹士將佢個初生女瑪麗嫁比一個更正教徒荷蘭王子威廉
但英國國會仲未滿意 1679年國會提出王位排除法取消詹士王位繼承權 查理宣布解散國會
到呢個時候英國人已經再分唔清呢個查理究竟係一世定二世

Guy Fawkes Guy Fawkes
twas his intent
to blow up the King and the Parliament
Three score barrels of powder below
Poor old England to overthrow
By God's providence he was catch'd
With a dark lantern and burning match
Holloa boys holloa boys make the bells ring
Holloa boys holloa boys God save the King!
Hip hip hoorah!

1685年係查理二世未有合法子女前就死左 而且在佢臨死前佢仲皈依左大公教
而繼位既最終都係佢細佬大公教徒詹士二世
1685年11月詹士二世解散國會

詹士二世

A penny loaf to feed the Pope
A farthing o'cheese to choke him
A pint of beer to rinse it down
A faggot of sticks to burn him
Burn him in a tub of tar
Burn him like a blazing star
Burn his body from his head
Then we'll say ol'Pope is dead
Hip hip hoorah!
Hip hip hoorah!

羅馬教會既魔爪從未離開過我地
聖公會既敵人從來都係英國入面!!

下集光榮革命同大同盟戰爭
西班牙王位繼承戰爭
大北方戰爭
奧地利王位繼承戰爭
七年戰爭
美國獨立
法國大革命
拿破崙戰爭
維也納和會同梅特涅體制
1848歐洲革命
克里米亞戰爭
義大利統一
德國統一戰爭
巴黎公社
第一次世界大戰
今次真係冇下集啦

膠登仔都睇得明既簡易西史入門第十九集:光榮革命同大同盟戰爭

1648年三十年戰爭結束 歐洲各國同神聖羅馬帝國簽訂西伐里亞和約 但和平並冇因此降臨
係西伐里亞和約後法國同西班牙仍然繼續佢地兩國間既私鬥
為左維持戰爭法國政府同班大媽沙借左大筆錢但又唔知點還

咁簡單啦 首相馬薩林批准班大媽沙係各地親自收稅
咁就出事啦
平民就嘈啦:我平時已經要交稅比班貴族地主啦而家仲要養埋班大媽沙!?我邊到黎錢啊!?
而貴族亦同樣不滿喎:喂我領地入面既人係我既私產黎家嘛 佢地有錢都係比我啦 幾時到你黎收稅啊!?

呢個政策塞住左班大媽沙把口 但亦代表政府失去稅收
馬薩林又諗到第招啦 唔出糧比法官咪得囉

而家馬薩林已經得罪晒全法國人 相信大家都會想像到佢最後會點樣死無全屍
1648年8月20日憤怒既暴民用投石器(係SLING唔係CATAPULT)襲擊馬薩林屋企 投石黨亂開始

10月22日馬薩林帶住十歲既小國王路易十四逃出巴黎
比佢地逃出巴黎又點呢?全法國通街都係暴徒摑緊呢對婚君讒臣
馬薩林同路易十四係自己國家入面過住流亡既生活到1月30日終於收到個好消息
對面海既英國...佢地既國王查理一世...比佢自己既人民...推翻...然後...處死!!!!!?!?!?!!!!??!?!
唔好話屎佢地兩個當堂嚇到連成個消化系統都痾埋出黎

法國既戰爭英雄 當年個個二世祖昂基安公爵路易二世·德·波旁係1646年繼承佢啊爸孔代親王既稱號
成為第四代孔代親王路易二世·德·波旁
法國對神聖羅馬帝國既戰爭結束令佢可以係前線帶住佢既軍隊返黎鎮壓投石黨亂 馬薩林同路易十四返回巴黎
1649年 革命既時代同歐洲人擦身而過

然後直到1653年投石黨亂先完全結束 呢年路易十四十五歲
小國王路易十四就係呢種環境之下長大成人
長大後佢決心要成為獨攬大權既絕對君主"一個國王 一個法律 一個上帝"冇人再可以挑戰佢既地位
1661年路易十四既最佳助手法國人民眼中既暴君馬薩林壽終正寢 廿三歲既路易十四開始親政

路易十四

有日路易十四去佢財政大臣屋企玩 點知一入到去
哇屌你仲靚過我屋企 當官既夠膽有錢過國王!?去死啦!!
路易十四斬左財政大臣之後就買左塊爛地 請起財政大臣屋企個建築師幫自己起過座新王宮
塊爛地叫凡爾賽

雖然西班牙係三十年戰爭中被打殘左 而西伐里亞和約之後神聖羅馬帝國亦被打散成一堆小國唔再對法國構成威脅
但對法國而言西班牙依然係佢最大既威脅
法國西面係西班牙本土 東北係西屬尼德蘭 東南係弗朗什孔泰
要擺脫西班牙既包圍首先向東擴展
1659年三十年戰爭既法西戰線以比利牛斯條約結束
路易十四娶西班牙公主瑪麗·泰蕾莎 另外西班牙係加泰隆尼亞同西屬尼德蘭到割左忽比法國
未得 仲未夠 好快第一個機會就黎啦

1665年9月17日西班牙國王菲利普四世死左 路易十四靠佢老婆既血緣要求繼承西屬尼德蘭
1667年法國入侵西屬尼德蘭 權力轉移戰爭爆發 西班牙軍節節敗退
孔代親王路易二世帶住佢表弟盧森堡公爵弗朗索瓦·亨利·德·蒙莫朗西-布特維爾攻佔弗朗什孔泰

盧森堡公爵弗朗索瓦·亨利·德·蒙莫朗西-布特維爾

只要踩平西班牙歐洲再冇人可以阻止法國佬 法國將會取代哈布斯堡成為歐洲霸主
明眼人都睇得出路易十四既野心 1668年英國瑞典荷蘭加入戰爭支援西班牙
隻抽就夠抽姐圍抽就唔掂啦 法國佬頂唔順同西班牙簽訂亞琛條約結束戰爭
法國放棄西屬尼德蘭繼承權 交還弗朗什孔泰 然後西班牙又係西屬尼德蘭割多幾忽比法國
雖然目標未達到 不過都叫不過不失 仲有機會既

第二個機會好快又黎啦
1670年5月22日路易十四同英王查理二世簽訂多佛密約
查理二世以王儲詹士改宗大公教換取法國支持英國出兵荷蘭
雖然條約就簽左啦但要點履行呢?英國絕大大大大大大大大大大大大大部份人都係聖公會教徒
查理二世諗到條好橋啦 查理二世發表信仰自由宣言放寬對大公教徒既限制
拿 我冇話改國教啊 我只係搞宗教自由姐 對面海個荷蘭都係咁啦 又唔見佢變成大公教國家?大家應該要理性包容D如果唔係我地會比歐洲大陸邊沿化架
話口未完1672年3月英國對荷蘭宣戰 4月法國連同瑞典進攻荷蘭

比三十年戰爭三大戰勝國圍毆既第四大戰勝國荷蘭節節敗退
荷蘭人推舉奧良治親王威廉三世做聯省執政帶領荷蘭共同對抗敵人
同樣為抑制法國既擴張 今次連荷蘭立國既死敵西班牙同神聖羅馬帝國都企埋佢個邊
1679年雙方簽訂奈梅亨條約 今次法國終於攞到自勃根地公國冧檔以黎一直想要既弗朗什孔泰

對於法國係法荷戰爭既擴張路易十四緊係高興啦 但法國既勝利為佢既盟友查理二世惹黎大麻煩
因為王儲詹士改宗大公教同查理二世幫助大公教法國入侵更正教荷蘭令英國出現又再大量大公教陰謀論
當然英國人唔知道多佛密約既存在 如果唔係反應一定會更大
英國社會氣氛就好似返到內戰前夕一樣
而當時既國會亦分成兩派
一班係堅決反對詹士繼承王位既"狂熱蘇格蘭長老會教徒"人稱輝格黨
另一班係為避免內戰重臨只要王室願意妥協就咩都有得傾既"反王室愛爾蘭人"人稱托利黨
對於兩派既爭論查理二世用左種非常查理式既方法回應
1681年國會解散

又返返去歐洲大陸 為壓止鄂圖曼係東歐既擴張 1683年奧地利加入大土耳其戰爭
對路易十四黎講第三個機會又從天而降
因為奧地利 西班牙 部分神聖羅馬帝國諸侯既軍隊都調左去東面參加1683年既維也納之圍
1683年9月1日法國乘機入侵西屬尼德蘭 1684年西班牙同法國簽訂拉蒂斯邦條約休戰20年
到而家國際秩序已經企係法國個邊
西班牙廿年停戰 奧地利同神聖羅馬帝國受困於東歐 英國係自己既親密好友
路易十四首先調轉槍頭對付自己既人民

1682年路易十四搬入凡爾賽宮
吸收左當年投石黨亂既經驗 唔只路易十四佢自己 佢仲拖埋全國既貴族跟佢一齊搬埋入凡爾賽宮
法國既貴族從此就日日係凡爾賽宮入面飲飲食食不問政事
而佢地自己既封地就由路易十四派遣既公務員去管理

興建初期既凡爾賽宮

搞掂左班貴族之後 下個對付既係平民
自雨格諾戰爭以黎雨格諾宗偶然都會做下反 威脅國王既權力同國家既穩定
1685年10月18日路易十四發表楓丹白露敕令 廢除自雨格諾戰爭南特敕令以黎既宗教自由 以羅馬大公教會為唯一信仰
全國二十萬雨格諾宗教徒被驅逐出國
而佢地首選既目的地就係全歐洲宗教最自由既荷蘭

自八十年戰爭獨立以黎荷蘭一個小國夾係英國西班牙神聖羅馬帝國中間 好彩呢三大國中間仲有個同病相憐既法國
荷蘭一直利用法國黎平衡三國既勢力 除左係法荷戰爭時無端百事比法國佬塞左鑊之外 荷蘭外交政策上都係個親法國家黎
但自法荷戰爭奧良治親王威廉三世成為聯省執政以黎佢就開始擔憂法國對荷蘭既威脅已經超越另外三國
特別係權力轉移戰爭西班牙冇左弗朗什孔泰同半個西屬尼德蘭之後係西歐既影響力已變得無足輕重
不過長期既親法政策令荷蘭無論平民定貴族係法國都有大量投資 佢地普遍唔願意改變對法態度
但突然十幾萬既雨格諾宗教徒湧入荷蘭之後情況就改變啦

1685年5月26日普法爾茨選侯卡爾二世冇仔生就死左
不過好彩佢仲有個細佬腓力·威廉海姆 而且唔只有個細佬 佢仲有個妹添
佢個妹伊麗莎白·夏綠蒂就嫁左比法國國王路易十四個細佬奧爾良公爵腓力一世
路易十四就以伊麗莎白·夏綠蒂年紀大過腓力·威廉海姆主張伊麗莎白·夏綠蒂繼承普法爾茨選侯
而家法國佬終於惡到踩上神聖羅馬帝國頭頂啦

神聖羅馬帝國現任皇帝係結束三十年戰爭既斐迪南三世個二仔利奧波德一世
係鄂圖曼帝國身上泥足深陷既利奧波德一世主導下奧地利 巴伐利亞 勃蘭登堡 薩克森 西班牙結成大同盟抑制法國既擴張
民意已經轉向威廉三世支持荷蘭加入大同盟對付法國
然後威廉三世就將目光轉向英國啦...

利奧波德一世

1685年2月6日英王查理二世過身
對於佢既王位繼承人問題係佢解散國會之後再冇任何正式既討論直到佢去世為止
最終佢既大公教徒佢細佬詹士成為英王詹士二世 1685年5月詹士二世重開國會
岩岩重開以托利黨為多數既國會為表達將來談判既試意 佢地批左筆比平時多既生活費比詹士二世
然後當輝格黨同托利黨準備就詹士二世既信仰問題開刀既時候
有個人靜應應從對面海既荷蘭登陸英國啦...
個個人係邊個?
冇錯就係個個人
大家一齊黎嗌個個人既名啦!!

蒙默斯公爵詹士·史葛!!
邊撚個詹士啊!?你邊撚到詹士啊睇過!?哇屌你真係占到成身都係屎喎

蒙默斯公爵詹士·史葛 聖公會教徒 查理二世最大既私生子 係詹士二世繼位前一直都係取代詹士二世最有力既人選
當詹士二世真係繼位時 係荷蘭當緊兵既詹士·史葛即刻游水返英國
1685年6月11日詹士·史葛登陸英國宣佈自己先係合法既王位繼承人得到唔少英國人既支持
佢地攞住鐮刀鋤頭跟住詹士·史葛操向倫敦
就係佢地行到半路就比個名不經傳既低級貴族約翰·丘吉爾搞掂左

約翰·丘吉爾

馬爾博羅公爵約翰·丘吉爾行軍

目標係舍倫堡
舍倫堡係多瑙河上游北岸一座係三十年戰爭時由古斯塔夫二世·阿道夫興建既堡壘
約翰·丘吉爾目標要係巴伐利亞屋企門口建立據點從而逼使巴伐利亞退出戰爭
如果佢堅持抵抗既亦可以作為大同盟軍既前進基地

因為為求機動性約翰·丘吉爾既軍隊並冇準備大炮
如果長期圍困既就必會遭到法巴聯軍既大規模反撲
但只靠步兵強攻既又必然損失慘重
好彩約翰·丘吉爾亦早有準備 係佢軍中既主要兵種係擲彈兵

7月2日夜晚 岩岩趕到舍倫堡既英荷聯軍未經休整就向舍倫堡北面發動強攻
擲彈兵冒住猛烈既炮火接近舍倫堡向山上既堡壘投擲手榴彈
經過兩輪既進攻舍倫堡既防禦冇絲毫減弱既跡象
但因聯軍集中攻擊堡壘既北翼 守軍亦相應抽調人手加強北翼既防守而令西北出現缺口
約翰·丘吉爾發現缺口立即派人爬過城牆
當守軍發現敵人已經攻入城堡紛紛向南門逃亡
而舍倫堡既南面係多瑙河 河上面得一條爛木橋
萬幾逃兵一湧而上應聲折斷
萬三守兵死五千 三千投降 英軍只死千幾


舍倫堡戰役

舍倫堡戰役後法巴聯軍退出多瑙河退守萊茵河
約翰·丘吉爾會合歐根親王既軍隊合共五萬二人乘勝追擊係布倫亨追上五萬六人既法巴聯軍
兩軍係布倫亨村以西布陣 戰場係一片岩岩收割完既麥田
大同盟軍坐北向南 左翼係約翰·丘吉爾三萬六人既英荷聯軍 右翼係歐根親王萬六人既奧地利軍
法巴聯軍坐南向北背靠多條小溪同一片沼澤 左翼係巴伐利亞軍 右翼係法國軍 其中法軍布置左一小支伏兵係布倫亨村入面
朝早8點戰爭以法巴聯軍既炮擊開幕
歐根親王因為受森林阻擋未能完成佈陣而陷入苦戰
中午英軍左翼向布倫亨村既法軍發動進攻 但遭到法軍既集中炮擊
中路步兵渡河進攻亦被擊退 右翼歐根親王既軍隊亦只能勉強支撐

約翰·丘吉爾同歐根親王既追擊

到下晝 法軍左翼步兵向右移動支援布倫亨村令法巴聯軍中路出現空缺
約翰·丘吉爾見到下令加強對布倫亨村既攻勢 吸引更多既法軍進入布倫亨村
法軍為填補中路既空缺下令騎兵突擊
法軍騎兵雖然無法衝散英軍右翼戰線 但右翼英軍因指揮官戰死而撤退
約翰·丘吉爾見到即刻親身帶住援兵接手右翼既指揮
歐根親王見到法軍左翼步兵同騎兵接連失誤立即下令騎兵進攻
法巴聯軍既戰線從中路開始被撕開
配合歐根親王騎兵攻勢 約翰·丘吉爾下令全軍總攻擊
法巴聯軍右翼既法軍徹底潰散
係佢地逃走既正前方等緊佢地既 又係多瑙河
大同盟軍死四千幾 法巴聯軍死近二萬人萬四人被俘
布倫亨戰役後大同盟軍一舉征服巴伐利亞
家陣巴伐利亞選侯馬克西米連二世·伊萬紐爾可以返西屬尼德蘭乖乖地做佢既西屬尼德蘭總督啦



布倫亨戰役


https://youtube.com/watch?v=BvaVh6WGPE0

兩個丘吉爾

打完多瑙河戰線又返返去義大利
雖然由約翰·丘吉爾同歐根親王坐鎮既多瑙河戰線守得好穩陣
但冇左歐根親王睇場既義大利情勢汲汲可危
如果法軍爬過亞爾卑斯山攻入維也納 戰爭一樣可以結束
而要解救義大利最有效既方法唔係陸軍 係海軍

得到葡萄牙既支援 從水路入侵西班牙既方案又提上台面
英荷今次目標唔係見慣見熟既加的斯 而係法軍係地中海兩個主要軍港西班牙既巴塞隆那同法國既尼斯

但當英荷艦隊去到同為反法勢力既巴塞隆那時竟遭到當地居民反抗
既然冇辦法建立據點咁就只好繼續東行 點知行到半路就遇到法國艦隊
如果係法西勢力範圍內既地中海打輸仗咁就真係死無葬身之地
英荷艦隊只好行返轉頭啦
點知行到半路比佢地見到舊礁石 一舊係伊比利亞半島最南面突出黎既一舊狹長既礁石 一舊名不經傳既礁石
直布羅陀


英國佬行過就心諗 如果比我係到起個海軍碼頭咁我咪可以好輕易封鎖地中海出海口囉
而且呢到地形狹長陸路都易守難攻
8月1日英軍係直布羅陀北面登陸包圍直布羅陀要塞
8月4日直布羅陀要塞投降

布倫亨戰役後約翰·丘吉爾同歐根親王分別返返去各自既主場萊茵河同義大利戰線
係布倫亨同直布羅陀之後形勢明顯倒向大同盟一方
法國係義大利既"忠實"盟友薩伏依公國義大利基因發作 繼大同盟戰爭後又跣多法國佬一鑊
1704年11月8日薩伏依公國又再次加入大同盟

1705年5月5日神聖羅馬帝國皇帝利奧波德一世過身佢個仔奧地利大公約瑟夫繼位為約瑟夫一世

1706年法軍再發動新一輪攻勢
目標係西屬尼德蘭境內萊茵河下游支流摩澤爾河邊小鎮拉米伊
5月23日六萬法軍背靠拉米伊坐西向東展開陣勢 左翼係一片沼澤所以以步兵為主 騎兵集中係右翼既大平原
前面隔住條小溪對面係約翰·丘吉爾六萬二英荷聯軍 約翰·丘吉爾無視地形將騎兵平均分配係兩翼
1點兩軍開始炮擊 約翰·丘吉爾下令右翼步騎前進 回應英軍攻擊法軍集中向英軍右翼進攻
當法軍右翼騎兵前往支援左翼結果令右翼既步兵暴露係一片大平原上面
呢一切都係約翰·丘吉爾既計謀 當法軍右翼減弱後約翰·丘吉爾下令自己右翼既騎兵撤退調去左翼
暴露係大平原上面既法軍右翼步兵突然遭到英軍騎兵既總攻擊 法軍戰線從右到左全線崩潰
英軍死一千法軍死萬三降六千
之後英軍一舉收復整個西屬尼德蘭

左邊綠色係法軍右邊紅色係英荷聯軍

拉米伊戰役

拉米伊戰役後英荷聯軍既追擊同法軍既撤退

1707年5月1日英格蘭蘇格蘭議會通1707年聯合法案
兩個合併成大不列顛聯合王國

係義大利戰線法軍係1706年5月14日開始圍困薩伏依公國首都都靈
到9月7日遭到歐根親王帶兵偷襲得以解圍 大同盟軍順勢收復整個義大利
從此係義大利法軍被孤立於米蘭一帶
1707年無後顧之憂既歐根親王帶領薩伏依反攻法國南部主要軍港土倫
但因亞爾卑斯山阻隔補給困難而失敗

1708年5月旺多姆公爵帶住路易十四個王太孫勃根地公爵路易同八萬五人係西屬尼德蘭再度反攻
勢孤力弱既約翰·丘吉爾極力避免同法軍發生戰鬥
英軍忍讓既結果令法軍奪得位處多條河流交界既交通重鎮根特
7月8日旺多姆公爵離開根特向南移動
約翰·丘吉爾緊隨其後 一路追到去奧德納爾德同歐根親王係漢諾威帶黎既援兵會合 入面包括漢諾威選侯個仔格奧爾格·奧古斯都
7月11日當旺多姆公爵行到去奧德納爾德城外時先發現大同盟既八萬大軍早已係城內集結

1點鐘兩軍惚惚列陣 3點兩軍開始交戰
王太孫勃根地公爵路易眼見大同盟軍仲未組織完成認為係進攻既好時機下令全軍進攻
雖然旺多姆公爵多番警告正因為對方未完成列陣先最危險 但王太孫路易一意孤行旺多姆公爵只好親自指揮右翼發動進攻
本來大同盟軍背向奧德納爾德列陣 但係旺多姆公爵強攻下大同盟軍左翼節節後退
而家變成法軍右翼側面對住奧德納爾德 背後有坐小山
約翰·丘吉爾睇準戰況帶住城內剩餘既騎兵從城西出發兜過法軍背後既小山 然後一沖面下
背後遭突襲旺多姆公爵急忙指揮撤退
大同盟軍死三千 法軍死萬五


奧德納爾德戰役

約翰·丘吉爾表現完一連串歐陸無雙之後法軍已經失去晒進攻既能力
而家佢準備緊一套入侵法國本土進攻巴黎既計畫
歐根親王比左佢一個意見:要打巴黎先攻里爾
里爾-萊茵河左岸一坐由法國名要塞建築師沃邦設計既要塞化都市
8月6日大同盟十萬大軍從布魯塞爾出發 其中三萬五人由歐根親王帶領包圍里爾
剩底既七萬幾人由約翰·丘吉爾帶領防範北面匿係根特入面既旺多姆公爵同南面黎自法國本土既反撲
9月4日大同盟軍開始圍城
旺多姆公爵為斷絕大同盟軍補給 係大同盟軍補給路線多個重鎮同約翰·丘吉爾發生戰鬥
12月9日里爾陷城 旺多姆公爵不得已從西屬尼德蘭僅餘既據點撤退

1709年9月約翰·丘吉爾同歐根親王從里爾出發開始法國本土既攻勢 9月7日八萬六人開始包圍蒙斯
呢鋪路易十四火燒後欄啦 佢手頭上雖然有兩大名將維拉爾同旺多姆公爵
但兩個都係小氣鬼黎一個辣著左巴伐利亞選侯馬克西米連二世·伊萬紐爾 另一個就辣著左自己個王太孫勃根地公爵路易
不過旺多姆公爵岩岩打輸仗 咁今次就用你啦維拉爾

9月8日維拉爾拖住臨時拉夫既七萬五人到達蒙斯南面既小鎮馬爾普拉凱
維拉爾係兩座森林中間展開陣形 將兩翼匿係森林入面 森林前面建立壕溝
9月11日蒙斯既圍城軍趕到 中路同左翼由約翰·丘吉爾指揮 右翼由歐根親王重兵駐守
佢地既戰術係希望可以靠右翼壓倒性既攻擊或左翼薄弱既防禦引走維拉爾中路既部隊從而突破法軍既戰線
朝早9點兩軍開戰 發展完全超乎兩人預期
右翼既歐根親王完全無法取得優勢 而且左翼既部隊幾輪掃射後全面崩潰
約翰·丘吉爾親自指揮本來用黎突破法軍中央防線既預備騎兵將法軍右翼推返入森林
大同盟軍左中兩翼失利後維拉爾親自指揮左翼給予歐根親王最後一擊 但比奧軍既齊射擊中左腳比抬離戰場
約翰·丘吉爾趁法軍失去指揮帶住僅餘三萬騎兵強行突破法軍中央
法軍左翼退出森林救援中央 邊戰邊退

upload住一半20集先
有d因為字數限制我要分兩個reply po出黎
d圖係word copy唔到過黎就算了

樓主

睇完啦sorry我晏d po埋

多謝樓主

高質po
一路返工一路睇

膠登仔都睇得明既簡易西史入門第廿一集:窮家子VS二世祖-大北方戰爭

係好耐好耐以前 耐到一個已經比歐洲人遺忘既時代 係一個比歐洲人遺忘既角落
係公元8世紀民族大遷徙其中一支蠻族斯拉夫人黎到東歐 係諾夫哥羅德建立佢地第一坐城市基輔羅斯
然後佢地不斷南下 到9世紀打到入烏克蘭既基輔成為最強大既斯拉夫人國家

但到1169年另一個斯拉夫人國家弗拉基米爾公國攻入基輔自封基輔大公
而基輔羅斯既老巢諾夫哥羅德亦獨立成諾夫哥羅德共和國
最後基輔羅斯亦分裂成一大堆既羅斯公國
到最最後呢堆分裂既羅斯公國全部比拔都同佢既金帳汗國一掃而光

11世紀既基輔羅斯
歷史永冇如果 未來永冇最後
係13世紀當整個東歐都化為蒙古人既殺戮戰場既時候
係一個被歐洲人所遺忘 蒙古人所忽略既角落
一個被叢林同沼澤所包圍既最深處個到有條小村莊
佢叫莫斯科

經過長年既營造 由小村莊莫斯科變成莫斯科公國再變成最強大既羅斯公國
係佢地既蒙古主人手中得到弗拉基米爾大公既銜頭 代表蒙古人去管理一眾羅斯公國
然後莫斯科大公伊凡三世·瓦西里耶維奇趁金帳汗國內亂既時候領導羅斯各國趕走佢地殘暴既蒙古主人

1390年至1530年間莫斯科公國的領土變化


1453年5月29日君士坦丁堡陷落拜占庭未代皇帝君士坦丁十一世·帕里奧洛格斯奮戰至死
佢既侄女佐伊·帕萊奧洛吉娜走難去到羅馬得到教宗保祿二世保護
後來將佢嫁去比最強大既東正教國家莫斯科公國 佢地既大公伊凡三世·瓦西里耶維奇


從前有一個羅馬 佢已經冧左 然後又有一個羅馬 佢而家都冧埋 而你就係第三個羅馬

呢個亡國女人佐伊·帕萊奧洛吉娜日日就咁樣教導佢既老公同仔女
第三羅馬從此深入莫斯科人民心中

1533年伊凡三世·瓦西里耶維奇個孫3歲既伊凡四世·瓦西里耶維奇繼承莫斯科大公
到佢17歲宣佈親政既時候 佢竟然宣佈放棄莫斯科大公既爵位

因為我唔係莫斯科大公
我係羅馬帝國既皇帝 我係第三羅馬既凱撒
我係沙皇

即位沙皇既伊凡四世1552年消滅喀山汗國 1556年消滅阿斯特拉罕汗國 1557年入侵西伯利亞汗國 1572年擊敗克里米亞汗國
伊凡四世東面將蒙古人徹底趕出歐洲 南面抗擊鄂圖曼
伊凡四世將沙俄變成東歐最強大既國家後人稱佢為伊凡雷帝
或者恐怖伊凡

伊凡四世·瓦西里耶維奇

當伊凡四世平定左東方同南方之後佢就將佢既野心倒晒落西方
當時丹麥 瑞典 波蘭都想染指利沃尼亞王國爭取波羅的海出海口
三面受敵舉目無親既利沃尼亞王國只好投靠沙俄
經過廿五年既利沃尼亞戰爭丹麥 瑞典 波蘭終於得到勝利瓜分利沃尼亞王國
但沙俄既介入提起左波蘭既介心
原來我既鄰居已經咁強大 睇黎我以後要多D關心佢先得啦

1619既波蘭-立陶宛，黃色部分為利伏尼亞

關心既機會話黎就黎
係利沃尼亞戰爭結束第二年1584年3月18日伊凡四世就過左身
係伊凡四世生前生左兩個仔
大仔叫德米特里·伊萬諾維奇 係1歲時沈船意外中死左
細仔叫費奧多爾·伊萬諾維奇 弱智既 不過弱智既都有西屌
而佢老婆仲有個啊哥叫鮑里斯·費奧多羅維奇·戈東諾夫
費奧多爾繼位後大權就落係鮑里斯·費奧多羅維奇·戈東諾夫手上
到1598年1月17日費奧多爾·伊萬諾維奇死後連皇位亦去埋鮑里斯·費奧多羅維奇·戈東諾夫到
就係呢個時候波蘭佬就搵左條友話佢係德米特里·伊萬諾維奇要出兵幫佢奪回皇位

1605年4月23日鮑里斯·費奧多羅維奇·戈東諾夫病死埋傳位比佢個仔費奧多爾二世·鮑里索維奇·戈東諾夫
個幾月後波蘭人就攻入莫斯科殺左費奧多爾二世冊立德米特里為沙皇
但幾個月後佢地又比俄國貴族瓦西里·伊萬諾維奇·叔伊斯基趕返走 仲順手殺埋德米特里然後自封為沙皇瓦西里四世
結果波蘭人又再出兵攻入莫斯科殺埋瓦西里四世

到呢個時候俄國政局已經混亂到冇人夠膽坐皇位啦
окэ́й波蘭佬你地想要我個皇啊嘛比你囉
俄國貴族就選左波蘭王子瓦迪斯瓦夫·瓦薩做沙皇啦
但今又到佢老豆波蘭國王齊格蒙特三世發功囉喎
齊格蒙特三世要求俄國佬歸依天主教
俄國佬反指應該要瓦迪斯瓦夫要歸依東正教
兩邊相持不下
最後1613年2月21日俄國貴族推左個主教米哈伊爾·費奧多羅維奇·羅曼諾夫做沙皇
羅曼諾夫朝就咁就開始啦


米哈伊爾·費奧多羅維奇·羅曼諾夫

1632年4月30日今次又到波蘭國王齊格蒙特三世拉柴囉喎
又話說係齊格蒙特三世之前瑞典同波蘭既國王都係瓦薩家族繼承既
當年大公教徒既齊格蒙特三世繼承瑞典王位之前承諾會尊重瑞典既更正教信仰
但佢啊叔卡爾號召瑞典全國各地既教士驅逐包括其他更正教會在內既一切非路德教會信仰
結果佢啊叔卡爾被捧為瑞典國王卡爾九世
雖然兩國依然係瓦薩朝 但已經分為兩個家族去繼承

而家瑞典國王古斯塔夫二世·阿道夫趁波蘭國王新喪 但佢自己又沉迷於三十年戰爭當中
咁佢就煽動沙俄出兵收回係1618年波蘭趁沙俄內亂時搶走既斯摩棱斯克啦
當時既沙皇係米哈伊爾一世個仔 1629年登基既阿列克謝一世
但經過兩年既圍城波蘭既無法驅逐沙俄 沙俄亦無法攻陷斯摩棱斯克
最後雙方簽訂波爾亞諾夫卡條約 沙俄賠償二萬盧布 波蘭國王瓦迪斯瓦夫四世放棄沙俄皇位

俄波兩國總算和平落黎旋即亂事又起
1648年烏克蘭既哥薩克人係赫梅爾尼茨基帶領下反抗波蘭既管治攻入基輔建立哥薩克酋長國
赫梅爾尼茨基求助於同為東正教國家既沙俄 1654年沙俄再次出兵斯摩棱斯克
趁俄波兩國又打起上黎瑞典亦緊隨係1655年帶埋普魯士同丹麥向波蘭宣戰
到1660年係四面夾攻下波蘭向各國簽訂奧利瓦條約
波蘭放棄瑞典王位要求 割讓全部利沃尼亞比瑞典 承認普魯士公國獨立
1667年再同沙俄簽訂安德魯索沃條約割讓烏克蘭比沙俄
至此波蘭已經完全失去中歐霸主既地位 開始左佢地亡國前最後黃昏-大洪水時代

博赫丹·齊諾維伊·米哈伊洛維奇·赫梅爾尼茨基

1676年1月29日阿列克謝一世駕崩
佢死前同兩個老婆生左三個仔一個女
第一個老婆瑪利亞·米洛斯拉夫斯卡婭生左大仔費奧多爾三世
不過佢係短命種 做左六年就死左
大家姐索菲亞·阿列克謝耶夫
二仔伊凡 弱智既
第二個老婆娜塔莉·基里爾洛夫娜·納雷什金娜就生左三仔彼得

到1682年大仔費奧多爾三世死左之後沙俄貴族屬意10歲既細仔彼得做沙皇由佢老母娜塔莉·基里爾洛夫娜·納雷什金娜做攝政
點知佢異母家姐索菲亞·阿列克謝耶夫娜帶射擊軍做反 軟禁娜塔莉 推伊凡為正沙皇伊凡五世
而佢個異母細佬彼得就做副沙皇彼得一世 而佢自己就成為沙俄既實權者

索菲婭·阿列克謝耶芙娜·羅曼諾娃(理想)

索菲婭·阿列克謝耶芙娜·羅曼諾娃(現實)

彼得一世·阿列克謝耶維奇·羅曼諾夫

1689年呢年彼得一世17歲理應親政既年紀
不過索菲亞完全冇還權既意思 甚至準備靠射擊軍既支持自立為女沙皇
但係沙俄貴族威脅下索菲亞只好交出權力自己出家去做修女

1694年彼得一世啊媽娜塔莉·基里爾洛夫娜·納雷什金娜過身 1696年正沙皇伊凡五世死埋
呢個時候彼得一世終於可以成為真真正正大權獨攬既沙皇準備去大展拳腳啦
佢第一樣要做既係咩?

出國旅遊

彼得一世明白陸權既時代已經結束 今後係海權既時代
沙俄需要一個出海口 但沙俄呢個內陸國家周圍既出海口都把持係周邊既強國手上
鄂圖曼既黑海亞速海 瑞典既波羅的海
沙俄要發圍既就需要西方既支持同造船技術
但西歐兩大國法國同奧地利都正為西班牙既王位磨刀霍霍無意挑起新既戰爭
彼得一世係西歐食飽左檸檬大餐之後只好調頭返鄉下...
...既時候路過荷蘭 彼得一世就把心一橫索性就化名係造船廠入面打工

作為一個技術工人係荷蘭打工打得不亦樂乎既彼得一世 1698年佢既老家傳黎消息
射擊軍又再次造反準備勇立索菲亞做女沙皇
彼得一世收到消息即刻溜夜趕返屋企平亂

今次索菲亞比人斷到正唔係出家可以了事
佢人生剩低六年時間都被"硬禁"係修道院中渡過
而多次造反既射擊軍下場就悲慘得多啦
事後彼得一世以極刑處死左二千人 而呢種半農半兵既軍事制度亦徹底被西式常備軍取代

北方同盟圍攻瑞典

返到瑞典本土既卡爾十二世 一個大意敗盡家族百年霸業
而家既瑞典又返返去三十年戰爭前 只有鯡魚罐頭可以食既地步

我唔夠英國抽 我唔夠俄國抽
但我只少可以塞鑊丹麥你條仆街

1718年12月11日卡爾十二世出兵丹麥既挪威既腓特烈斯登
佢企係山上面視察敵情
然後一粒流彈

今次終於玩完

卡爾十二世遺體回國

1721年9月10日沙俄同瑞典簽訂尼斯塔德條約
瑞典割讓整個利沃尼亞予沙俄

自彼得一世登基以黎佢一直至力於改造呢個國家
將呢班鋪住白人皮既蒙古人改造成真正既歐洲人
係大北方戰爭勝利後佢終於可以完成佢最後一項改革
佢唔再用俄國風格既沙皇царь 而係用西方既皇帝Император
從此沙俄變成俄羅斯帝國 取代瑞典係北歐同波蘭係東歐既霸權
從此歐洲人永遠記得呢個國家 再冇人會輕視呢班鄉下佬

呢年奧地利公主瑪麗亞·特蕾西亞四歲

下集奧地利王位繼承戰爭

膠登仔都睇得明既簡易西史入門第廿二集:哈布斯堡受難記第四集:腓特烈無雙-奧地利王位繼承戰爭



https://youtube.com/watch?v=f_6AQA4uzD0

今集就聽住普魯士軍樂去睇啦

係十二世紀既神聖羅馬帝國 霍亨斯陶芬家族同韋爾夫家族鬥過你死我活
最終兩個家族都以滅族收場
係霍亨斯陶芬朝最後一個皇帝腓特烈二世死後 神聖羅馬帝國皇位由一個盧森堡家族既皇帝短暫擁有過
之後1328年 維特爾斯巴哈家族既巴伐利亞公爵路德維希四世成為佢地家族第一個神聖羅馬帝國皇帝
然後經歷兩個盧森堡家族既皇帝之後神聖羅馬帝國皇位就落入左哈布斯堡家族手上
自此神聖羅馬帝國皇位就如同佢地家族私產一樣

路德維希四世

至今為止大家已經見過好多場因繼承權而引發既戰爭
繼承戰爭可以話係歐洲歷史既特色產物
但點解呢?點解其他地方冇咁西利?歐洲係特別多既呢?
所有原因只環繞一句話

婚姻係神聖既

廢話婚姻當然係神聖架啦 都講到尋啦
唔只婚姻仲有選票仲有好多野都成日比人話係神聖既
有冇人諗過點解咁撚多野都比人話係神聖既呢?
如果比你返到歐洲或者耶撚既世界佢地就唔會咁講

係耶撚既世界只有教會可以叫神聖
天主教認為上帝賜獨生子耶穌降生教化世人 然後收得十二門徒
其中大弟子聖保祿創立教會流傳至今
故羅馬教廷乃係上帝授權普世牧首 上天係俗世既代行者
而男女既結合需經教會代表上帝既見證同祝福
婚姻之所以神聖

既然婚姻咁神聖要離婚當然要尋求教宗既授權啦
但如果我老婆生唔出又或者生出黎全部養唔大而我又唔考慮離婚既我可以點呢?
不孝有三無SEED後為大
中國理論上都係一夫一妻制既社會 但如果老婆生唔出而納妾 而個妾侍生得出而升佢為老婆係冇問題既
呢種玩法去到西方又點呢?

係西方如果你係平民 你唯一可以流傳後人既就只有你農奴既身份 真係唔生好過生
但貴族唔同佢地有咁大個國家 死後要歸邊個手你唔擔心你身邊D人都同你關心
所以歐洲貴族要嫁女娶老婆唔係隨便合眼緣就算
中間一定經過大量政治計算 確保生出黎一定合乎兩家族利益
不過結婚還結婚男人一定中意玩女人 特別係有權有勢既
D貴族係老婆後面搵一大堆MARY黎屌 甚至仲生埋幾隊足球隊都係等閒事
但返到屋企老婆竟然生唔出咁點呢?不如求其升隻MARY當生左?
咁問題又黎啦 做得你MARY既都唔方係咩大戶人家 同你門當戶對既飛機杯都嫁晒比其他肉棍
就算佢係貴族出身都高極有限 如果你將個位傳比你同佢既後人
你死後你家族既成員會點? 你係其他家族既親屬會點? 你既平民親家保得住你個位?

1711年4月17日卡爾六世係炮火聲中繼承神聖羅馬帝國皇帝
佢一生環繞三場王位繼承戰爭
西班牙王位繼承戰爭係第一場

卡爾六世

係西班牙王位繼承戰爭 哈布斯堡西班牙支系絕嗣
而奧地利支系既神聖羅馬帝國皇帝利奧波德一世剩係生得兩個仔
大仔約瑟夫一世已經係西班牙王位繼承戰爭尾聲死左
而家既皇帝卡爾六世就成為哈布斯堡九代單傳長子嫡孫
哈布斯堡家族遺傳事小 哈布斯堡家族遺產事大
如果到我死我都生唔到個仔
奧地利公國 匈牙利王國 波希米亞王國 神聖羅馬帝國呢堆野要點啊?
卡爾六世已經感受到佢背後眈眈既虎視準備同佢分身家啦

1713年卡爾六世頒布1713年國事詔書宣佈我既遺產全部可以由女性繼承!!而神聖羅馬帝國皇帝就由我既女婿繼承!!
乜撚野繼承啊!?神聖羅馬帝國皇帝你私產黎架!?選舉家嘛!!
佢背後班大老虎即時起哄

1716年尾卡爾六世老婆布倫瑞克-沃爾芬比特公國的伊麗莎白·姬斯丁娜傳黎懷孕既消息
卡爾六世每日就求神拜耶一定要係仔!!只要生到個仔出黎之前既野全部可以當冇發生過!!
1717年5月13日結果掀盅
女既

卡爾六世係上年生左個七個月大就死左既仔之後 而家生既第二個係佢既大女瑪麗亞·特蕾西亞
而家佢又繼續求神拜耶第日一定要生到個仔 希望在明天後代在枕邊
呢個時候卡爾六世人生第二場王位繼承戰爭係佢背後開始塭壤啦

卡爾六世全家福其中只有兩個養得大

1709年瑞典係大北方戰爭既波爾塔瓦會戰被擊敗
由卡爾十二世扶植公務員出身既斯坦尼斯瓦夫一世被趕落台
但佢以放棄波蘭王位為條件係薩克森選侯兼波蘭國王奧古斯特二世手上換到茨魏布呂肯公國
呢到係佢爬上貴族既第一步

雖然茨魏布呂肯只係同法國接壤無人希罕既邊境小公國
不過對斯坦尼斯瓦夫一世黎講咁樣已經足夠啦
因為呢到同法國接壤
好快佢就比法國國王路易十五世睇中
路易十五世唔係基 佢係睇中佢個女瑪麗·蕾捷斯卡
1725年路易十五世同瑪麗·蕾捷斯卡完婚
呢到係第二步

1733年2月1日薩克森選侯波蘭國王奧古斯特二世過身
一如已往波蘭貴族又走埋一齊去選下任國王啦
做生不如做熟 不如就比返斯坦尼斯瓦夫一世上黎啦
佢本身係波蘭公務員出身又真係做過波蘭國王 係佢任內佢都管得我地幾高興啊

唔得!!!!!!!!!

波蘭周邊各國都屌晒老母啦
如果波蘭建立一個親法政權 佢就可以用波蘭軒制神聖羅馬帝國同俄羅斯
再加上佢背脊已經有個波旁家族既西班牙 如果法國得到波蘭國際平衡就會倒向法國
薩克森!!薩克森選侯既後人奧古斯特三世係可以接受既對象

俄羅斯 奧地利 薩克森支持薩克森選侯奧古斯特三世
法國 西班牙 薩伏伊支持茨魏布呂肯公爵斯坦尼斯瓦夫一世
最終決定權係波蘭議會

斯坦尼斯瓦夫一世

1733年9月斯坦尼斯瓦夫一世再次當選波蘭國王
俄羅斯 奧地利 薩克森向波蘭宣戰 法國 西班牙 薩伏伊出兵支持波蘭
波蘭王位繼承戰爭開始

1734年俄羅斯攻入波蘭扶植薩克森選侯奧古斯特三世為波蘭國王
東線俄羅斯隻抽波蘭當然容易但係西線就冇咁好彩啦
奧地利 薩克森遭到法國 西班牙 薩伏伊全力圍毆
法國 西班牙 薩伏伊攻佔全個義大利直逼奧地利本土
萊茵河好彩D睇場既係年近七十既歐根老親王
佢後面仲帶住隻廿六歲年青既普魯士王子腓特烈

奧古斯特三世

自三十年戰爭以黎巴伐利亞多次企錯邊成為哈布斯堡既陪葬品
係神聖羅馬帝國東北有兩個諸侯乘勢而起
一個係薩克森 一個係勃蘭登堡-普魯士

薩克森靠位處易北河上游貿易中心位置賺左一大筆錢
前薩克森選侯奧古斯特二世就攞左呢筆錢去投資文化創作
係佢治下薩克森被稱讚為神聖羅馬帝國既雅典
奧古斯特二世非常滿意

佢既鄰居兼競爭對手普魯士相反
普魯士國王腓特烈·威廉一世對商業同文化不屑一顧
佢只對軍事有興趣
係佢治下既勃蘭登堡-普魯士一街都係警察監視佢臣民既生活風氣
全國既農民都拖晒去當兵 街頭每日都係閱兵儀式
係佢治下勃蘭登堡-普魯士被戲稱為神聖羅馬帝國既斯巴達
腓特烈·威廉一世都好滿意
不過有樣野佢就好唔滿意啦
就係佢個仔腓特烈

一個軍人老豆就係生唔出一個軍人仔仔
普魯士王子腓特烈強烈厭惡粗魯既軍人生活
佢寧願同班行為優雅既美男子好友一齊遊山玩水吟詩作對
佢老豆就睇到眼火爆啦
唔得!!再係咁落去佢變成基佬啦!!人黎!!拖佢過黎!!我要教訓下佢!!
陛下王子同班FRD走左啦!!
走左!?同邊個!?公定乸!?
公架
死基佬!!!!!!!!!!!!!!!!!!!!!!!!!!

當腓特烈比人拖返返普魯士
腓特烈·威廉一世係柏林市中心當住全街市民同腓特烈面前處死左佢最好既基友
呢年腓特烈18歲
佢既青春以羅密歐與羅密歐式結局告終

普魯士王子腓特烈

八年後腓特烈被佢啊爸派到萊茵河跟住名將歐根親王搵食
係波蘭王位繼承戰爭既萊茵河戰場雖然有名將歐根親王鎮守亦無法扭轉奧地利既劣勢
1738年11月奧地利簽訂維也納條約
斯坦尼斯瓦夫一世得到洛林公國為補償 放棄波蘭王位承認奧古斯特三世為波蘭國王
而本來既洛林公爵瑪麗亞·特蕾西亞新入門既老公弗朗茨·斯蒂芬就係奧地利手上得到托斯卡納公國

1月20日維特爾斯巴哈家族既神聖羅馬帝國皇帝卡爾七世病逝
佢個仔馬克西米連三世·約瑟夫繼承巴伐利亞選侯
4月15日奧地利係法芬豪芬戰役擊敗巴伐利亞後奧地利同巴伐利亞簽訂福森和約
馬克西米連三世·約瑟夫放棄神聖羅馬帝國皇位要求 承認1713年國事詔書
得到維特爾斯巴哈家族既巴伐利亞 普法爾茨 科隆主教區再加上薩克森 漢諾威
瑪麗亞·特蕾西亞既老公弗朗茨·斯蒂芬終於得到足夠既票數9月13日加冕為神聖羅馬帝國皇帝弗朗茨一世
佢地兩公婆將自己姓氏合併成哈布斯堡-洛林 神聖羅馬帝國哈布斯堡-洛林朝開始

1745年當冬天一過再無後顧之憂既皇帝細佬卡爾·亞歷山大就帶埋薩克森盟軍共六萬人反攻西里西亞
卡爾·亞歷山大進入西里西亞沿途冇遇到任何抵抗 進展順利一直向布雷斯勞進發
6月3日夜晚奧地利薩克森軍到達霍亨腓特堡村紮營休息
佢地唔知道係黑夜中已經有六萬普魯士軍包圍係附近...


霍亨腓特堡會戰

除左1989年6月4日大家仲可以記多一個年份
1745年6月4日凌晨4點 天光前既最後一刻
奧薩聯軍營地突然響起四面普歌 奧薩聯軍士兵係睡夢中驚醒慌忙佈陣
係左翼普魯士軍既驃騎兵已經衝到去佢地面前 將奧薩列隊沖成一片混亂
係騎兵之後就係普魯士引以自豪既步兵
佢地以鐵一般既紀律忍受住奧薩聯軍既火力直至去到足以將火槍發揮最大火力既距離
然後一輪齊射 大半奧薩聯軍應聲倒地
奧薩聯軍個個慌忙逃生 普魯士軍發動最後一擊
普魯士軍右翼拜羅伊特帶領既第五龍騎兵橫掃戰場
廿分鐘內就俘虜2,500人67枝軍旗9碌大炮

霍亨腓特堡會戰中前進既普魯士擲彈兵

朝早9點岩岩天光戰爭已經結束
六萬對六萬 普軍死二千 奧薩聯軍死八千 降七千
經過呢場仗腓特烈二世好似諗到少少野...


https://youtube.com/watch?v=5f2M9t_tEhQ


霍亨腓特堡會戰勝利後腓特烈二世帶二萬二再次出兵波希米亞
瑪麗亞·特蕾西亞又再派佢叔仔卡爾·亞歷山大迎戰

又係我!?又係腓特烈!?我輸緊架!!
隻抽你輸硬姐 比你兩倍兵得啦呱

卡爾·亞歷山大雖然廢但唔係弱智既
吸收霍亨腓特堡既經驗佢決定照版煮碗做一次

1745年9月29日普魯士軍係索爾山下紮營過夜
卡爾·亞歷山大帶住四萬奧地利匿埋係山既另一面
30日凌晨5點腓特烈二世被偵查兵嘈醒發現奧地利軍已經將普軍包圍並開始前進

當奧地利軍真係行到普魯士軍面前
卡爾·亞歷山大驚訝普魯士軍之整齊同當日既自己完全天壤之別 呢場唔似伏擊戰反而似場會戰

腓特烈二世已經準備好新料招呼卡爾·亞歷山大
腓特烈二世綜合呢百幾年戰列兵既經驗得出結論
戰列兵核心不過小心側翼 睇實背脊 中央突破三點
以往為發揮火槍最大威力都會將步兵平排 故此人多一方就可以包圍對方側翼
如果人數相約則以紀律決勝 邊個最能忍受炮火 快速上彈 整齊射擊
但如果紀律都相約呢?呢種戰爭仲有冇以陣法取勝既可能呢?

腓特烈二世今次既計畫係咁
先以右翼發動進攻咬實對方既左翼 然後自己既左翼後退令兩軍呈T字形 再從敵人既左翼開始摧毀全軍
呢種打法叫斜線戰術!!

朝早8點普軍右翼發動進攻奧軍左翼潰敗 奧軍重心被吸向左邊
腓特烈二世都未及下令 本應後退既左翼已經衝上去夾擊奧軍既右翼
腓特烈二世精心設計既斜線戰術變成包圍戰術
普魯士軍以少數包圍多數 普軍死四千 奧軍死八千
呢場係紀律既勝利
THIS IS SPARTA

索爾戰役

呢鋪瑪麗亞·特蕾西亞終於認識到腓特烈二世係不可戰勝既對象
要係佢手上收返西里西亞係冇可能架啦 但至少要打場好好睇睇既仗逼佢上談判桌
1745年12月24日三萬一奧地利薩克森聯軍從薩克森出發直擊勃蘭登堡
但係凱撒斯多夫會戰被二萬五普魯士軍擊敗

我唔只輸比腓特烈二世 我仲係輸比佢地既軍隊...
呢班真係斯巴達人黎架...

第二日1745年12月25日瑪麗亞·特蕾西亞萬念區灰 只慶幸跌落地仲有札沙
係俄羅斯威脅下普魯士同奧地利簽訂德雷斯頓和約
普魯士承認1713年國事詔書同弗朗茨·斯蒂芬為神聖羅馬帝國皇帝
奧地利承認普魯士係西里西亞既主權
由薩克森賠償普魯士軍費

1748年10月18日反哈布斯堡各國同奧地利簽訂第二亞琛和約
英國歸還法屬北美路易斯堡以及附近新斯科舍比法國
法屬印度既馬德拉斯割讓英國
法國將荷蘭部分邊境城鎮割讓荷蘭
承認神聖羅馬帝國皇帝弗朗茨一世 皇后瑪麗亞·特蕾西亞及佢地後裔對哈布斯堡家族領地繼承權
帕爾馬 皮亞琴察 瓜斯塔拉割讓西班牙王子唐·菲利浦
恢復摩德納公國 熱那亞共和國獨立
重申烏得勒支和約中英國奴隸貿易優先權同向西屬殖民地運送奴隸既義務
普魯士獲得西里西亞公國同格拉茨伯國


第二亞琛和約後歐洲秩序

至此奧地利王位繼承戰爭正式結束
卡爾·亞歷山大終於係腓特烈二世陰影下得到解脫

不過英國同法國攞住第二亞琛和約返屋企愈睇愈唔對路...

1755年11月2日瑪麗亞·特蕾西亞最後一個女瑪麗·安托瓦內出世

下集七年戰爭

見仲有人想睇20集打後我出返圖要逐條link copy and paste再插入圖片

大家留意返作者係
膠登作者：神谷奈緒老公 原名：蘿蔔絲比耳 膠登會員編號：3227
LIHKG月岡恋鐘老公 #199613

感謝樓主

respect

想重溫法國大革命打後，麻煩樓主

Sorry我而家病緊加上要準備聽日旅行既野 而家唔得閒up住