［極高質分享］膠登簡易歐洲史入門

1823年4月7日昂古萊姆公爵路易·安托萬帶領法軍進入西班牙擊敗西班牙軍恢復斐迪南七世既權力
呢件事唔只係一場反君權運動既失敗 更代表兩支波旁家族權力既復興
西班牙將會係法國支持下鎮壓南美洲獨立運動 而法國更隨時有可能重建歐陸霸權
佐治·坎寧而家先黎後悔自己搞散左歐洲協調 冇左歐洲協調我地可以係邊到搵人牽制法國佬呢...?
佐治·坎寧寫左封信比大西洋另一邊歐洲以外既國家
亞美利堅合眾國總統占士·門羅

你願意咁大個南美洲都屬於一個國家?你希望你門口永遠紮左支西班牙同法國既軍隊?如果你願意有所行動既...我地英國會支持你
占士·門羅睇完封信之後佢個國務卿約翰·昆西·亞當斯就插口
唔洗理佢 而家歐洲咩局勢啊 英國佬想搵你過橋咋
...但南美洲對我地黎講的確係個隱憂...
佢話我地有所行動既佢地都會支持啊嘛...咁我地咪比D行動佢睇囉
12月2日占士·門羅上國會發表國情諮文
歐洲係歐洲人既歐洲 美洲係美洲人既美洲...我地唔會卷入歐洲既鬥爭中 同樣我都唔希望歐洲人介入美洲既內政...簡單黎講...美洲個場我睇既!!任何干預美洲事務既人就係同我地美國佬過唔去!!

1824年9月16日路易十八病逝 佢細佬阿圖瓦伯爵查理·腓力繼位為查理十世

查理十世

1825年12月1日俄羅斯皇帝亞歷山大一世駕崩 佢膝下無兒但好在有兩個細佬
不過佢個大細佬係奧斯特里茨掩護佢逃走打到重傷既君士坦丁大公因為娶左個平民老婆所以認為自己唔適合繼承皇位
咁佢就讓左個位比佢細佬尼古拉 但尼古拉又認為自己做細既無資格坐個位
佢兩兄弟推黎推去推左兩個幾星期都冇人肯坐個位
呢個時候就有班軍官密謀推翻君主制 又或至少逼新皇帝簽份憲法

17日尼古拉繼承皇位為尼古拉一世 九日後加冕
26日三千俄國官兵操向尼古拉一世既加冕禮場地 沿途大嗌"君士坦丁大公或者憲法!!"
尼古拉一世知道就搵左一萬人去鎮壓 全部殺晒
而家連俄羅斯呢D鄉下地方都惹埋法國毒 所有國家都忙於鎮壓自己既內亂
而更攞命既係英俄對"調停"希臘獨立戰爭既意欲愈黎愈強大 梅特涅全心希望可以重建歐洲協調制度係自己主導下調停巴爾幹問題
但係冇左歐洲協調制度就代表梅特涅要靠佢一個人來回英俄兩國間去說服兩 而且英法俄既領袖都係同自己毫無交情既新人
不過係佢奔走於兩國時 外交中心早已經轉移到去英國

尼古拉一世

十二月黨人

1827年4月10日佐治·坎寧當選英國首相
7月6日英法俄三國係倫敦就巴爾幹問題達成共識簽訂倫敦條約共同出兵援助希臘
8月8日佐治·坎寧病逝威靈頓公爵接任首相
10月20日英法俄三國聯合海軍駛入愛琴海係納瓦里諾海戰擊敗鄂圖曼海軍 斷絕鄂圖曼係希臘既支援
為報復俄羅斯 鄂圖曼封鎖達達尼爾海峽 俄羅斯正式向鄂圖曼宣戰 尼古拉一世誓要摧毀吞併呢個腐爛既帝國
唔好啊!!鄂圖曼唔襟打架!!一郁就冧架!!鄂圖曼關係我地奧地利生死存亡既利益 但我地又唔敢幫拖...唔該各位大佬高抬貴手啊!!!!
冇錯你講得岩 我剩係想要希臘姐 鄂圖曼冧檔對我冇好處
最後對奧地利伸出援手既又係英國
英法將鄂圖曼趕出希臘之後就撤兵 1829年9月14日俄羅斯係各國調停下同鄂圖曼簽訂亞德里亞堡
鄂圖曼承認瓦拉幾亞 摩爾達維亞 希臘自治 多瑙河口割讓俄羅斯 俄羅斯可自由通行博斯普魯士海峽 達達尼爾海峽

納瓦里諾海戰

因為維穩卻愈維愈亂 因為希臘獨立而推冧左鄂圖曼 因為鄂圖曼既衰弱而令全歐反目
梅特涅精心設計既和平不堪一擊 佢全心保護既奧地利更係變得風雨飄搖
而要塞要從內部攻破 給予梅特涅最後一擊既偏偏係就當代最專制既暴君

下集1848年歐洲革命


https://youtube.com/watch?v=-qkf0fLU2Ao

我唔識呢d野Sorry 你想整epub可以留個tg比我我send晒d word doc比你

Send緊比你

我po出黎其實都只係copy and paste
越po就越佩服原作者 每一篇都一萬字仲要全部都用廣東話 譯名又用廣東話 又好笑又貼近史實
呢度四十幾集夾埋可能成50萬字 一定放左好多心血落去
希望多d對西史有興趣既人睇到

原作者
膠登作者：神谷奈緒老公 原名：蘿蔔絲比耳 膠登會員編號：3227
LIHKG月岡恋鐘老公 #199613

就黎到尾聲啦 每日po兩篇當推下post啦

膠登仔都睇得明既簡易西史入門第三十五集:第一次既悲劇同第二次既鬧劇-1848年歐洲革命

係法國佬為左民主自由將自己既國家變成一座大屠房既時候
佢地隔離海既英國佢地都開始左一場佢地自己都不自覺既革命 呢場叫工業革命
1764年占士·哈格里夫斯發明珍妮紡紗機 1781年占士·瓦特發明單向蒸汽機
1785年瓦特建立第一座蒸汽紡紗廠 1825年英國生產第一架蒸汽火車
係梅特涅忙於打壓法國人既革命時 英國人既革命已經翻天覆地咁改變左歐洲人既生活面貌
地主放棄佢既莊園古堡換成黑煙工廠 工廠集合成城市 城市引黎無地農民 無地農民係城外聚居成貧民窟
農奴失去佢既土地地主同地契換成一年365日一日廿四小時既工作以換取僅以果腹既雜糧直至到佢既遺骸比人掟返入佢係貧民窟既"居所"
十幾年間歐洲既城鎮農田都被城市工廠同貧民窟取代 鄉間不見青山綠水只有鋼筋水泥蒸汽同煤炭
就連梅特涅門口花園都變成污水廢氣既遊樂場時佢依然醉心於打壓法國毒而冇人留意到呢股早已毒害全歐洲既英國毒

早期紡織廠
1824年9月16日經過六十九年放縱既人生 法國國王路易十八被痴肥同糖尿折磨到佢人生最後一刻
係離留間佢講左句
...我睇我細佬都冇機會死係呢張床上面啦...
到個晚佢細佬查理十世就繼承左佢既王位

不負眾望查理十世登基後所作所為一如世人所料
佢登基後第一樣野就係扁低國債利率黎籌得十億法郎去償還所有係法國大革命中被沒收資產既人既損失
跟住佢再立反褻瀆法 所有未經許可接觸教會祭祀用具既人死刑
炒晒學校入面所有哲學科教師一律由教士取代
遺產超過300法郎就只有長子可以繼承
呢d政策既冇任何公共利益 亦唔係任何人既要求 更唔係為加強佢既權力 佢只係係到放縱佢既仇恨向大革命報仇
你地殺左我個侄!!你地殺左我啊哥!!你地殺左我個仔!!你地...仲殺左...我既青春!!我既初戀!!
乜撚野共和主義...邊個講我殺邊個!!
一個滿腔仇恨既66歲啊伯 佢擁有權力就係要向佢既人民復仇
佢六年既管治就係向貴族教會以外全法國人民宣戰

1830年3月17日查理十世終於得償所願
係呢日新當選既下議院400個議席中有221個議員聯合向查理十世提出不信任動議 查理十世就索性解散議會重選
但係三個月後6月23日新當選既下議院依然係反對派佔優 兩次議會被解散後7月6日查理十世以憲法14條宣佈暫停憲法
7月25日查理十世搬出杜樂麗宮避入巴黎市郊既聖克盧發表聖克盧條例
廢除新聞及出版自由 減少商會代表所佔選民比例 9月重新大選

嘩~!!又係舉國嘩然?唔係
其實最初大部分平民都係冷漠既 佢地如同大革命前既農奴一樣只關心自己既生存
政治對佢地黎講只係一少撮權貴之間最討厭既遊戲
但呢班農奴佢地既主人已經唔係大革命前既舊貴族 而係工業革命後既新貴族-工廠主

查理十世發表聖克盧條例後呢班工廠主失去埋佢地僅有既政治地位
銀行唔再願意向佢地借錢並追收欠債
工廠主冇錢就執晒佢地D工廠
工廠執笠工人就失業
工人冇東家打就返去搵西家打啦

就係聖克盧條例發表既第二日26日 巴黎一街都係示威遊行
無論工人定有錢人佢地都走上街頭包圍到空無一人既杜樂麗宮要求國王尊重憲法
查理十世一如佢啊哥同歷代波旁國王一樣用軍隊同戒嚴黎報答人民既訴求

再第二日27日愛與和平佔領杜樂麗宮門口既人群愈聚愈多 軍隊向天開槍驅散人群
群眾離開杜樂麗宮退入市街 佢地爬上屋頂用雜物掟街上既軍隊
軍隊又向天開槍"示警" 當場就死左廿幾個
殺人政府黎啦!!殺晒D貴族!!拖晒佢地上斷頭台!!

28日暴亂既平民愈黎愈多仲係每條街上搭起路障
軍隊只可以分散並被孤立係重要既政府部門同王室設施入面被暴民包圍再遂個擊破
守衛巴黎既依然係當年個個馬爾蒙 一班商會代表夾埋寫左封請願信比佢要佢專交國王要求解散內閣同收返聖克盧條例

七月革命

自由引領人民 背景右方係巴黎市政廳
右邊男仔係孤星淚伽弗洛許既原形

29日暴民已經打到去杜樂麗宮
看門既瑞士傭兵吸收左四十年前既教訓 見到班暴民衝埋黎佢地一槍不發就棄械逃亡
晏晝暴民攻陷巴黎市政廳 班商會領袖係到成立臨時政府接手"巴黎市政"
巴黎臨時政府再一次要求查理十世承認憲法
憲法!?我寧願返鄉下斬柴都唔要做個英式立憲君主!!
聽到佢咁講巴黎臨時政府就改為討論查理十世"退位"事宜

8月2日去到呢到查理十世又記起四十年前既教訓 佢一家點樣死係呢到
諗到呢到查理十世就掟低封退位詔書自己一個流亡英國
巴黎臨時政府收到佢封退位詔書就走去搵佢個大仔昂古萊姆公爵路易·安托萬
呢封係你佬豆既退位詔書 簽左佢你就係國王
哇!?真既!!今次仲唔輪到我!?
簽完巴黎臨時政府又攞左另一張紙出黎
呢張係陛下既退位詔書 簽埋佢
至...至少比我玩返一個鐘啊...!?
你!?你就想啦

路易十九都退埋位後王位就傳左去被行刺既貝里公爵查理·費迪南個遺腹子10歲既波爾多公爵亨利·查理
巴黎臨時政府封下一個順位繼承人奧爾良公爵路易·腓力為亨利五世既攝政
然後推舉現年72歲既拉法葉侯爵為將來既共和國總統
...總統...?...我都老啦...我成世人經歷過咁多野...我都唔想再玩啦...就交比奧爾良公爵啦...
巴黎臨時政府廢埋亨利五世 封奧爾良公爵路易·腓力為法國人民既國王路易·腓力一世
法國成為五國同盟第一個發生革命既地方
係維也納梅特涅聽到呢單消息哀嘆 我成世人既功績都玩撚完啦!!

7月21日利奧波德一世加冕為比利時國王
威廉一世拒絕承認比利時獨立8月2日出兵回收"固有領土"
比利時軍不敵向法國救助 8月12日荷軍撤出比利時

西利啊!!我地岩岩推翻左自己既國王仲救岩比利時既革命 我地簡直係歐洲民主既救世者啊!!陛下!!我地不如下個去救埋波蘭人囉!!
提出呢個要求既人係一個拿破崙既舊將讓·馬克西米連·拉馬克
嗯...但係我靠人民既革命推翻左維也納會議承認正統王世令我杳3國際地位已經相當危險 再加上我地介入比利時革命提高左英國既警覺 如果我地再係波蘭惹上俄國佬我諗到時都冇人救得到我地架啦...
就咁英法兩國既沈默 奧普兩國則駐重兵封鎖邊境以示"中立" 俄國就全力開始鎮壓波蘭既叛亂
10月5日波蘭最後一支叛軍投降

讓·馬克西米連·拉馬克
雖然路易·腓力一世係人民既革命下登基為王 但佢既根基其實係非常脆弱
首先有同波旁家族有親既舊貴族教士 佢地堅持只有波旁家族可以合法繼續法國王位 呢班人路易·腓力一世係點都拉攏唔到
之後又有批軍人同愛國憤青 佢地認為法國有責任支持全歐洲既民族主義革命擴張法國勢力重建拿破崙帝國既波拿巴主義者 但全歐洲人都一直候住法國佬幾時重燃侵略既威脅路易·腓力一世點都唔敢冒呢個險
仲有班學生 窮人 知識份子為主既共和派 佢地視路易·腓力一世為七月革命既背叛者 係佢地眼中只有建立完全民主既共和國法國先會得救 佢地對政治權利既要求永遠唔會滿足
而最路易·腓力一世唯一可以搵到既支持者就係當年係七月革命捧佢上枱既商界
呢班見錢開既工廠佬只要比D著數佢地佢地就自然會為自己出聲
為維持自己既王位路易·腓力一世滿足晒商界既要求將全國變成一坐大工廠
進入工廠以低無可低既薪金過活成為全國唯一既生活方式
夫婦離異 將自己既仔女交托比陌生人照顧 然後不明不白比炒魷
連自己既生存都無法保障 流落街頭賣牙賣頭髮賣貞操
如果曉治積曼唔黎救佢既最後就無人問津饑寒交逼下橫死街頭 就如同當時大多數法國人一樣
但最後黎拯救法國人既唔係曉治積曼 係拉馬克


https://youtube.com/watch?v=SyQ-0JOF1Qk

1832年初法國爆發左場全國性既霍亂 齋係巴黎就死左二萬人
當時作為下議院議員既拉馬克係共和派同波拿巴主義者都可以接受既人物
當國王政府議會都對呢場霍亂無動於衷時 拉馬克主動去醫院探望被隔離既病人結果令自己都惹埋霍亂
巴黎既市民對政府既冷漠感到憤怒 一班大學生密謀要推翻奧爾良朝
6月1日傳黎消息拉馬克終於病逝並會係6月5日出賓
咁我地就係個日攞路易·腓力個王位同佢部葬啦!!


https://youtube.com/watch?v=me7DMpMaKI0

6月5日拉馬克落葬既車隊行經記念拿破崙奧斯特里茨大勝既奧斯特里茨橋
班學生嗌起反政府口號撲上拉馬克既棺材 政府派警察驅散群眾 但警察反而加入群眾幫佢地搭起路障
全巴黎市民都會加入我地既革命推翻路易·腓力一世既王位 就好似上次七月革命咁!!


https://youtube.com/watch?v=gMYNfQlf1H8

當時路易·腓力一世係巴黎市郊既貢比涅城堡會見緊新上任既比利時國王利奧波德一世
路易·腓力一世收到暴動既消息即刻趕返巴黎係杜樂麗宮檢閱負責鎮壓既軍隊
班學生雖然係巴黎搭起左無數既路障 但每個路障守備既人繆繆可數
等軍隊開入巴黎時佢地既革命一攻即破 百幾個學生戰死係冷漠既鄰居門前
人地岩岩上台咪比個機會人囉 你反還反最緊要唔好阻到人啊嘛

1832年共和黨人六月暴動(誤)

1832年共和黨人六月暴動(正)

原來有個咁正既post

法國既革命失敗左 但佢地既鄰居卻得到重大既進展
自彼得盧以黎下議院改革一直都係英國主要既政治議題
1830年6月26日英國大選 無論輿論定大多數候選人都係表示支持改革既
但大選後托利黨既首相威靈頓公爵係威廉四世示意下反對改革
結果托利輝格兩黨聯手提出不信任動議罷免左威靈頓公爵由輝格黨既第二代格雷伯爵查理·格雷任相
1831年3月1日格雷提出第一份改革法案廢除左60個選區同47個議席
但點知一直表示支持既托利黨反指格雷既改革法案太激進否決左 見到咁格雷索性解釋下議院提前大選
結果呢場選舉變成改革法案既變相公投 大量輝格黨人當選進入下議院
格雷再提出同一份改革法案係輝格黨佔優既下議院獲得通過 但過左下議院仲有上議院等緊佢
由貴族教士同托利黨組成既上議院完全冇理由再支持呢條法案 而事實上佢地真係否決左
上議院否決改革法案後格雷向威廉四世請辭 但因為一屆政府唔可以改選兩次威廉四世就搵返威靈頓公爵出黎組閣
既然威靈頓公爵出山既改革機會就更加渺茫 全國各地都發生暴動更有人聲稱要學法國佬建立共和
眼見民情凶湧冇人夠膽入閣 而威靈頓公爵自己都唔好意思接任威廉四世只好搵返格雷任相
我做首相唔係唔得...但有個條件 唔係我個位我都唔知點做落去...
事已至此你咪即管講囉...
我要輝格黨人塞滿上議院!!

第二代格雷伯爵查理·格雷

1832年3月格雷再向上議院提出第三份改革法案
因為同一條法案唔可以上下議院兩次所以呢份比上次個份更激進
係到佢將郡議員由188席增加至253席 市議員由465席減至399席
市居民每年交到十磅地稅就合資格成為選民
郡居民長期田地租用者年交十磅地稅 短期田地租用者年交五十磅地稅 自有土地者年交兩磅地稅都合資格成為選民
佢唔只重新畫分左選區仲降低埋選民要求令英國多左三十萬近五分一成年男性成為選民
而上議院亦係威廉四世搵輝格黨人塞滿自己之前投降
法國六月暴動第二日6月7日上議院通過1832年改革法令

1834年5月20日拉法葉侯爵過身享年76歲 1836年6月20日西哀士過身享年88歲
1838年5月17日塔列朗過身享年84歲 至此革命一代終於死盡

共和派係六月暴動既革命失敗後就到波拿巴主義者嚐試挑戰路易·腓力一世既王位
1836年10月30日路易-拿破崙突然出現係法國既史特拉斯堡
佢同當地既波拿巴主義軍官取得連絡希望可以學似拿破崙從厄爾巴島返國咁發起軍事政變黎推翻路易·腓力一世既王位
當路易-拿破崙如約出現係史特拉斯堡當地既駐軍歡喜若狂 尤如拿破崙返生一樣
兄弟們拔營啦!!拿破崙帶我地操返巴黎對冧個賣國國王!!
但路易-拿破崙聽到佢地咁講又出黎制止佢地
唔好唔好 唔好咁暴力 大家都係法國人 我係要黎做法國人民既皇帝既 點可以對自己既國家人民做D咁暴力既野既呢 我地應該要用愛與和平感召人民跟隨我地
聽到佢咁講班軍佬就返營地鋪床訓覺
兩個鐘之後憲兵就黎到拖左路易-拿破崙走

11月11日路易-拿破崙被拖返巴黎審訊 史特拉斯堡兵變成為法國人民茶餘飯後既笑料
哈哈哈 咁就想學人搞兵變!?乜拿破崙既後人咁ON9架!?
比人笑到呢種地步佢既政治生涯都已經玩完 連路易·腓力一世都廢事晒子彈處死呢D廢柴
今次路易-拿破崙就比人掟左去美國


史特拉斯堡兵變

然後呢幾年歐洲人繼續享受住梅特涅既和平 係世界開拓殖民地 係國內起工廠
直到1837年6月20日英王威廉四世過身
威廉四世老豆佐治三世生左四個仔 大仔佐治四世 二仔約克公爵腓特烈 三仔威廉四世 四仔根特公爵愛德華
佢地四個都冇仔生就死晒啦 不過好彩根特公爵愛德華同比利時國王利奧波德一世個家姐瑪麗·路易絲·維多利葉生左個女
亞歷山德麗娜·維多利亞 今年18歲 女兒之身既佢加冕為漢諾威朝最後一個英王 英女王維多利亞一世

維多利亞一世加冕

1839年4月19日荷蘭比利時簽署1839年倫敦條約
荷蘭承認比利時獨立 英國保障比利時永久中立

係呢幾年工業革命不斷發展愈黎愈多本來與世無爭既農民被踢入工廠成為人肉齒輪
佢地放棄農村既自由換取城市既貧窮 過住全國最痛苦既生活養住議會中一個個工業家代表自己卻係全國最受忽視既一群
當年1832年改革法令已成一紙空文 英國既民主反而成為對佢地壓迫既工具
係議會中冇代表既工人成立左堆工會互相接濟 係呢皇環境下要保障工人權利往往就只有訴諸暴力
而暴力既結果就係工人被逮捕 工會被解散
為永遠解決工人困境1838年5月8日倫敦工人協會發表人民憲章
要求21歲以上冇犯罪記錄男性有選舉權 以人口平均劃分選區 秘密投票選舉
取消參選財產限制 政府出糧比議員 每年定期選舉
並收集130萬人聯署係1839年7月12日上書下議院 不過黎手就比人掟左落垃圾桶
見議會咁決絕班工會領袖決定計畫一場全國性既暴動爭取實現人民憲章
不過英國政府好快就收到料拉左幾個工會領袖告佢地叛國罪準備拖去度頸

10月1日英國為保護係中國商人既安全出兵大清
11月4日五千個失業工人攞著自制武器進攻紐波特準備解救囚禁係個到既工會領袖
紐波特市長就搵左五百個軍人黎鎮壓 當場就打死左廿幾個再拉多幾十人去度頸

紐波特起義

紐波特起義失敗令激進派沈寂落黎但冇打沉到成個憲章運動
因為佢地搵到個更好玩既理由
屌你無端百事出兵中國做咩啊!?
雖然執政既輝格黨同在野既托利黨爭拗既只係值唔值既問題
但工人團體發現呢場仗係佢地最好既宣傳例子
因為東印度公司既走私佬辣著遠東既大帝國 下議院班工廠佬為佢地同東印度公司既關係夾我地上戰場
比佢地打贏左又點姐!?等緊我地既係更大既市場 更多既原材料 更多既工廠 更多既工人同更低既人工!!反戰啊!!
拿聽唔聽到啊?收皮啦你!!在野既托利黨乘住輿論係1841年月30日罷免左首相
但托利黨政府上台後繼戰爭同打壓工人運動
最後係1842年8月29日大不列顛及愛爾蘭聯合王國係亞洲又多左一個微不足道既島仔做佢眾多殖民地之一
呢D真係一D微不足道既小事而已

1840年個個島仔

係英國工人為自己爭取權利時 佢鄰居既小丑戲仲未停過
1840年8月4日路易-拿破崙帶住50個僱傭兵從濱海布洛涅偷渡入法國
路易-拿破崙挾持左個關員要佢帶佢去當地既軍營
去到軍營路易-拿破崙對班士兵發表演說慷慨陳詞叫佢地跟隨自己去救國救民
當場一個大爆笑 醜到呢種地步路易-拿破崙走去碌拿破崙記念碑到話要同佢攬住死
你死好啦我唔會陪你架 見佢癲到咁連班僱傭兵都懶得理佢
然後又係一場大爆笑 之後憲兵就笑住黎塔佢返巴黎


布洛涅兵變

你都醜到呢到啦 你放過我啦 我都唔撚想理你啦 你要玩都唔好係我地頭到玩啊嘛
路易·腓力一世第三次見到佢都係唔處死佢 今次只係判佢終身監禁
你唔會連花廳入面都有野玩下嘛?

就係有

1846年路易-拿破崙收到佢老豆路易·波拿巴既信
你老豆我病到就死啦快D返黎見我最後一面啦
返黎!?家陣我坐緊終生喎
咁路易-拿破崙就申請要裝修自己間監房 政府又批喎
路易-拿破崙就偷左件地盤工人件衫剪個頭剃個鬚咁就比佢走左出去
之後法國就再未有人見過呢隻傻仔

被囚既路易-拿破崙

1843年3月係普魯士有份報紙叫萊因報 因為個主編講錯野比人查封左
個主編見係普魯士冇野做就過比較自由D既比利時行下囉
係到佢識左條有錢仔既太子爺 因為佢岩岩係英國返黎所以佢就同個主編講左好多英國工人運動既故事比佢聽
佢兩個見傾得好投契個太子爺就決定帶埋個主編返英國資助佢既生活
係英國佢兩個為爭取民主自由解救貧苦大眾成立左個組織叫正義者同盟 後來改名叫共產主義者同盟
個主編叫卡爾·海因里希·馬克思 個太子爺叫腓特烈·馮·恩格斯

卡爾·海因里希·馬克思

腓特烈·馮·恩格斯

工業化既普及 共產主義既宣揚 仲有憲章運動既示範
令次輪到英國做法國人既導師
路易·腓力一世既奧爾良朝名義上係君主立憲既政權 但佢地選民既比率比英國仲要低
法國唔只工人農民冇票 就連城市既中產都冇投票資格 只有全國最有錢個批先買得起一票
不過係工會發起行動之前法國既中產首先流行起舉辦政治宴會討論時政並研究點樣付諸實行

1845年發生左場全歐洲既飢荒 其中以愛爾蘭既薯仔飢荒最為嚴重
而係法國因為大量農作物失收抬高糧食價格 糧食價格提升又減低左市民既消費力
冇人肯洗錢又令工業製品扁值 工業製品唔值錢啦咁工廠就冇錢賺
當D工廠開始執笠時銀行放既債就收唔返 連金融系統都亂起上黎時法國既經濟就玩撚完啦
到1847年9月19日法國新首相弗朗索瓦·皮埃爾·吉堯姆·基佐上台

弗朗索瓦·皮埃爾·吉堯姆·基佐上台
吉堯姆·基佐上台前已經係有名既歷史學家 位極人臣既佢深明路易·腓力一世政權既缺憾
奧爾良朝係個既唔民主亦唔極權既政府 佢選民基礎薄弱但又有出版既自由同公開獨立既法庭
而所有反對勢力都係根本否定奧爾良家族既世襲君主政權
既然冇可以拉攏既朋友又冇可以妥協既空間 為保住路易·腓力一世既王位又好為保住法國又好 吉堯姆·基佐唯一可以做既就係加強佢係商界既有既支持
吉堯姆·基佐貪污 賣官 無視勞工保障法 醜聞一單接一單 黎自共產主義同共和派要求改革既呼聲愈黎愈高
而吉堯姆·基佐就公開回應呢D要求 我地冇票比你地投咩 你地自己賺多D錢咪得囉!!
之後吉堯姆·基佐仲立法限制埋新聞自由同集會既權利

1848年2月21日馬克思係倫敦發表共產黨宣言
共產黨人不屑於隱瞞自己既觀點同意圖 佢地公開宣布佢地既目的只有通過暴力推翻全部現存社會制度先會達到
令統治階級係共產主義革命面前發抖啦!!無產階級係呢場革命中失去既只係枷鎖 而佢地得到既將會係全世界!!
全世界無產階級聯合起來!!

尤如預言一樣 馬克思講既野係第二日就發生左
22日巴黎中產同失業工人遊行向杜樂麗宮要求基佐下台
然後發展就好似上一次咁樣 軍隊鎮壓民眾搭起路障抵抗 不過今次佢地頂左成日
第二日23日晏晝吉堯姆·基佐宣佈下台 收到呢個消息示威民眾衝向外交部準備"歡送"吉堯姆·基佐
軍隊係外交部門口攔截低群眾 但有個士兵火槍走火引發全隊人開火 當場死左五十幾人
係外交部門口死左幾件班暴民就兜返轉頭去攻杜樂麗宮
路易·腓力一世走去搵當年個個小記者梯也爾 今日佢已經係共和派既領袖人物
路易·腓力一世希望佢可以接任首相穩定局勢 不過梯也爾當面就拒絕左
既然搵唔到人接任首相路易·腓力一世只好躹躬下台 傳位比佢個仔巴黎伯爵路易·腓力·艾伯特之後就流亡英國
巴黎臨時政府即日就廢除左佢兩仔爺王位宣佈法蘭西第二共和國成立 臨時政府過渡到執行委員會
27日路易-拿破崙見奧爾良朝冧左佢又死返返巴黎

1842年既路易·腓力一世

二月革命
哇!!我地終於推翻左資產階級既壓迫解放左無產階級可以建立共產主義烏托邦啦
坊間D共產主義者開始提出佢地理想既勞工政策
最初執行委員會係2月26日成立國立工廠 由政府出資建立比失業工人以低薪臨時工作
執行委員會開始審議選民資格要求受過相當教育既成年男性先可以投票 但共產主義者要求所有成年男人平等投票
之後佢地又要求用代表平等既大紅旗取代紅白藍三色旗 最後佢地仲要求廢除加入國民衛隊既資產限制
哈哈哈!!共產黨人不屑於隱瞞自己既觀點同意圖!!統治階級都係共產主義革命面前發抖啦!!全部人齊跟我食大鑊飯啊!!

英國佬或者會比呢D人呃到 但法國人唔會 因為佢地係五十年前已經見識過類似既野
雅各賓返生啦...

共產主義者愈發激進既要求冇吸引到大多數法國人支持 因為大多數支持佢地既工人根本就冇選民資格
相反大多數有票既選民佢地見到既情況係 國立工廠既僱員已經升到十萬人每日出糧要七萬里弗爾
而呢個數字仲遠遠唔夠應付全國工人既需求 全國各地依然不斷有工人運動要求改善待遇
4月23日制憲議會選舉開始 6月4日結果發表
880席入面500席係共和派 280席係波旁/奧爾良派 只有100席係共產主義者
係呢個新生議會共產主義者被視為人人得以誅之既社會毒瘤
第一個要開刀既就係財政黑洞國立工廠 6月21日國立工廠廢除
哇你執左佢我地十幾萬人食咩啊!?係咪唔洗做你都比錢我地先!?
唔係~我比兩個選擇你地三日內比答覆我 當兵或者返鄉下耕田
屌一句講晒姐係我地既革命又被出賣啦!!呢個係又一個資產階級既政權!!全世界無產階級聯合起來!!

23日全巴黎近十萬既失業工人攞起自制武器走上街頭搭起路障宣稱要重建共和
呢鋪唔係雅各賓返生啊...雅各賓都冇玩過咁大啊...
對住呢十萬人制憲議會陷人恐慌
痴撚線出面成十萬人點打啊!?
連執行委員會都比唔到個答案佢地 制憲議會用不信任票罷免左佢地
但罷免左執行委員會你地都要諗辦法對付出面班共狗架
制憲議會推舉左佢地之中軍事資歷最高既人出黎負責鎮壓
佢叫路易-歐仁·卡芬雅克

1848年共產黨人六月暴動

路易-歐仁·卡芬雅克

卡芬雅克帶住十二萬正規軍同國民衛隊攻入巴黎血戰四日夜 最後係26日攻陷最後一個路障
死二千人近二萬人被捕其中四千人流放阿爾及利亞
共產主義者太恐怖啦 唔知佢地幾時又煽動班暴民挑戰我地既民主政權 卡芬雅克你咁做得野以後我地個場就靠你睇住啦
28日制憲議會任命卡芬雅克為法蘭西共和國政府首腦 簡單黎講姐係臨時軍政府
卡芬雅克上台後禁止政治集會 審查出版 以反共為名不斷收窄公民自由
呢鋪唔只共產主義者唔妥佢 人民都開始質疑革命既目的
你反共還反共姐 你唔可以反共得黎保障到公民自由架咩?
9月25日制憲議會一場補選比左佢地一個答案
路易-拿破崙·波拿巴當選制憲議會議員

11月4日制憲議會通過1848年共和國憲法 12月10日進行共和國總統選舉
只要21歲以上男性 同地點連續居住6個月以上就有資格投票
而總統候選人需得二百萬票以上先可以當選 如果冇候選人得票二百萬以上既就由議會投票產生
當日有六個人參選 一個係卡芬雅克 一個係路易-拿破崙 同兩個共產主義者 一個溫和共和派 一個波旁派
雖然卡芬雅克既政績惹人疚病但佢係唯一有做總統經驗既候選人
而路易-拿破崙既政綱就係重建秩序保障自由創造良營商環境 呢方面吸引到大資木家中產既支持
加上路易-拿破崙既波拿巴家族多少有D貴族背景對保王派黎講係咁多個候選人中唯一簡得落手既
對共產主義者佢唔係一味鎮壓 多少既妥協亦係保障社會秩序同公民權利既手段
最後佢拿破崙·波拿巴呢個名本身就係一個賣點
霎時間路易-拿破崙就好似係全部問題既答案 所有全法國人都忘記左佢以前做過既醜事
就連一個當紅既流行小說家維克多·雨果都為佢歌功頒德

總統選舉
12月20日選舉結束路易-拿破崙以五十六萬得票擊敗十五萬票既卡芬雅克當選法蘭西第二共和國第一任總統
拿破崙萬歲!!皇帝萬歲!!
路易-拿破崙得到人民既支持做到總統 但國民議會聽到法國既軍隊嗌出呢種口號就唔係咁睇
...佢果然係全心返黎搞政變既...
路易-拿破崙用佢德國口音既法文係國民議會向共和國憲法宣誓又引黎哄堂既嘲笑
笑咩姐笑 我啊叔到死個日佢D法文都係有義大利口音架啦 咁講野先夠拿破崙架嘛!!
梯也爾係台下慨嘆 呢條傻仔可以點帶領我地啊...


路易-拿破崙宣誓

的確當時法國民主並唔樂觀 國民議會750席入面過半係波旁派 奧爾良派 教士同大資本家呢D保持勢力
其中最大一個黨叫秩序黨 政府係佢地把持下通過左大量保守既政策
因為第二共和係行美式總統制 總統只係行政元首
路易-拿破崙既冇足夠既智力去推銷佢既政綱而佢亦冇權去否決國民議會既決議
秩序黨只係將佢視為君主復辟既過渡人物 全國都冇人認為佢係值得重視既人物
1849年1月29日秩序黨更召黎軍隊威逼反對派同意解散議會提前大選

5月新一屆議會產生 750席入面450席係秩序黨同佢既盟友 共和派同共產派只有210席
之後呢屆就開始佢地召喚國王既儀式
佢地立法限制出版同集會自由 學校交由教會控制 更係5月31日更改選舉法
根據新既選舉法要同地點連續居住3年以上先有資格投票 呢個少少既改動就可以令量工人失去投票權
而且佢地減少左選民人數之餘又冇降低總統需得二百萬票先當選既要求 令國民議會更大既機會操控總統選舉
最後佢地仲將將總統任期到3年且不可連任 姐係路易-拿破崙只可以玩多年零就要走人
而家佢地只需要等一場總統選舉就可以將國王召返黎

不過即使蠢如路易-拿破崙佢都發現左呢點
一個人蠢足一世但只要係適當時間聰明一次就足以改變佢一生
8月路易-拿破崙趁國民議會放暑假周圍宣揚自己對選舉法無能為力 另一方面又不斷係愛麗舍宮宴請各大小軍官
路易-拿破崙已經一副擺明要發動軍事政變解散國民議會既姿態
對此巴黎軍事總督向國民議會承諾 只要國民議會主席要求我黎手就將條傻仔掟臭格
1851年1月3日佢就比路易-拿破崙炒左
哇...條軍佬話要拉總統喎 惡到咁唔炒唔得啦
冇左巴黎軍事總督國民議會一時間再搵唔到人保護佢地

10月14日路易-拿破崙再一次要求國民議會恢復舊既選舉法但被拒絕
各地都發生罷工反對國民議會同新選舉法 呢鋪時機終於成熟
12月2日奧斯特里茨戰役四十八周年 路易-拿破崙總統任期結束前十八日
路易-拿破崙派兵封鎖巴黎各主要街道 軍隊攻入杜樂麗宮逮捕部份議員
另一班走得甩既議員就避入巴黎市長官邸 佢地係到投票罷免左路易-拿破崙總統職務
冇耐軍就殺到人黎拉晒佢地 國民議會解散

1851年12月2日政變

巴黎既政變引發全國性保王黨 共產黨 共和派一致騷亂
路易-拿破崙眼前既地位似乎比查理十世同路易·腓力一世更危急
但和平理性不非暴力沉默既大多數紛紛向佢地既總統路易-拿破崙求助
而家法國太亂啦!!有冇人可以救下我地啊!!
12月11日全部騷亂都被軍隊鎮壓 路易-拿破崙成為最後唯一剩低既當權者
1852年1月14日路易-拿破崙發表1852年憲法 由總統獨攬立法同行政權
11月21日路易-拿破崙稱帝全民公投782萬票支持 25萬反對 200萬棄權
12月2日路易-拿破崙加冕為法國人民既皇帝拿破崙三世

周圍都係保王黨試圖復辟君主專制 周圍都有大資本家欺壓工人 周圍都有共和黨人騷亂 周圍都係共產黨人暴動
人民既衝突永無化解 和平秩序永遠遠離法國
以後由我領導人民既幸福 由我教導人民咩叫民主 呢個就係波拿巴主義!!呢個就係自由帝制!!

拿破崙三世加冕巡遊

拿破崙三世

民主政權革命成果又一次被人民既冷漠同恐慌篡奪
新成立既政權既唔民主亦唔資本亦唔資本又唔共產 只係拿破崙三世一人既軍事獨裁
兜黎兜去大半世紀 咩係第一次咩係第二次早就冇人記得
係倫敦共產主義教父馬克思發表左篇文路易-波拿巴的霧月十八日用佢既唯物史觀解釋點解路易-拿破崙呢D白痴都可以上到位
1862年當年曾經支持過路易-拿破崙既個個流行小說家維克多·雨果因為反對拿破崙三世稱帝而流亡英國
係到佢出左本書講返起三十年前個場暴動提醒法國人民我地既民主係幾咁寶貴

自法國大革命以黎六十年全歐洲人都只係不斷重複佢地既舊路
但只有拿破崙三世佢人生係特別值得嘲弄既一套

下集克里米亞戰爭

唉貼漏兩張

塔列朗比利時分割方案

比利時國王利奧波德一世

土埃戰爭結束後鄂圖曼唔好話無力對抗外國入侵 就連國家統一都冇辦法保持
如其話平衡各國利益黎維持自己生存 不如先搵個鄰居黎幫自己壓下場先啦
7月8日鄂圖曼同俄羅斯簽訂洪基爾-斯凱萊西條約 兩國維持8年既防禦同盟
鄂圖曼係戰爭狀態會關閉達達尼爾海峽 而俄羅斯船隻可根據需要自由出入
!?
!?!?
!?!?!?
俄土簽左洪基爾-斯凱萊西條約之後英國佬攞住張野係到磨啦
鄂圖曼係戰爭狀態會關閉達達尼爾海峽!?而俄羅斯船隻可根據需要自由出入!?
我係1809年同你簽個條達達尼爾條約呢!?(參見拿破崙戰爭中篇)
個到講明達達尼爾海峽同博斯普魯斯海峽係非軍事區所有戰艦都唔可以出入喎
俄羅斯船隻可根據需要自由出入!?咩船隻啊!?咩需要啊!?
簽左呢張野姐係話鄂圖曼一開拖俄羅斯既黑海艦隊就會衝晒出地中海!?咁我個地中海貿易呢!?我又要準備幾大支艦隊防住佢呢!?
等英國仲攞住張紙同鄂圖曼拗緊時1839年7月2日馬哈茂德二世暴斃留低佢16歲既仔阿卜杜勒-邁吉德一世繼承蘇丹
睇準呢個機會法國支持穆罕默德·阿里出兵取代鄂圖曼蘇丹 而俄羅斯則支持鄂圖曼繼續以自己屬國形式生存落去
1840年7月15日英俄奧普簽署1840年倫敦條約 限定穆罕默德·阿里十日內撤出敘利亞唔係就聯合宣戰
9月26日英國地中海艦隊係敘利亞登陸 11月25日埃及軍退回埃及

第二次土埃戰爭後鄂圖曼改為尋求英國既援助 1841年7月13日簽署倫敦海峽公約
鄂圖曼廢除洪基爾-斯凱萊西條約 博斯普魯斯海峽 達達尼爾海峽 馬爾馬拉海為國際自由航道 只有係戰時鄂圖曼盟友既軍艦先可以進入
而家英國又重新保障返佢係地中海既利益 但又到俄國佬唔老黎喎
既然鄂圖曼做唔成自己既屬國咁不如自己吞左佢?

1848年歐洲革命從法國開始一路燒到入最保守既奧地利同普魯士 最後只有俄羅斯一個可以幸免於難
俄羅斯以歐洲憲兵自居幫奧地利平定左匈牙利民族主義者既叛亂 但俄羅斯皇帝尼古拉一世又有另一種諗法囉喎
我又唔係奧地利呢D多民族國家 民族主義對我有咩威脅姐 相反單一民族既我地民族主義可能係好好用既工具黎喎...
呢個時候俄羅斯開始對內宣傳一套斯拉夫人最偉大既思想
而呢套思想又影響到鄂圖曼治下巴爾幹既斯拉夫人去反抗鄂圖曼管治
如果有日鄂圖曼帝國突然暴斃既 俄羅斯接管巴爾幹半島已經十拿九穩

除左巴爾幹之外俄羅斯係歐洲以外繼續擴張
當英國佬係北京見到東正教教堂 係波斯同阿富汗建立起親俄政權
英國佬就知道佢既海權已經唔足以保障殖民地利益 如果再坐視不理俄羅斯將會征服亞洲
不過就算係咁諗英國佬都仲未得閒出手對付俄國佬住
係十八世紀四十年代英國除左憲章運動最重要既議題就係殼物法
準確黎講憲章運動都只係殼物法既延伸

係1845年愛爾蘭既薯仔飢荒又引起左殼物法廢存既討論
最初只係因為工業革命加速左圈地運動令大量土地從傳統地主貴族手上落入工廠家手中
為保障班地主貴族既利益英國係1815年通過殼物法禁止外國殼物入口
呢條法例成功拖高左食品價格令地主貴族謀得暴利
但係愛爾蘭個到既未有工廠家投資 而佢地土地貧瘠只適合種薯仔
係1845年愛爾蘭全島既薯仔因受真菌全部失收
但英格蘭本島既糧食生產只足以供應本地消費 而因殼物法又冇外國糧食進口
最後愛爾蘭餓死左一百萬人 二百萬人流亡外國
http://upload.wikimedia.org/wikipedia/commons/thumb/d/d8/IrelandEuropePopulation1750.PNG/640px-IrelandEuropePopulation1750.PNG
愛爾蘭同歐洲人口轉變

雖然愛爾蘭人只係羅馬教會既走狗 但死咁多人英國佬都開始有d反省
1846年英國時任首相係保守黨既羅伯特·皮爾爵士(托利黨係1835年改名叫保守黨)
佢受到李嘉圖經濟理論影響認為對農產品既貿易保護只會降低土地既產值同時拖高地價
而從中得益既地主只會將收入用係對經濟增長冇幫助既奢侈品消費

6月29日皮爾提出廢除殼物法獲輝格黨同部分保守黨支持下通過

但保守黨內主流反對廢除殼物法 皮爾等支持廢除殼物法既人被趕出保守黨 呢班人稱皮爾派
廢除殼物法後第二日皮爾內閣請辭 跟埋佢走個班人其中一個叫第四代鴨巴甸伯爵佐治·漢密爾頓-戈登
之後輝格黨接手組閣 佢地首相係約翰·羅素勛爵
佢其中一個閣員外交大臣係一個62歲既愛國憤青第三代巴麥尊子爵亨利·坦普爾
http://upload.wikimedia.org/wikipedia/commons/thumb/f/f2/Sir_Arthur_Hamilton_Gordon.jpg/360px-Sir_Arthur_Hamilton_Gordon.jpg
第四代鴨巴甸伯爵佐治·漢密爾頓-戈登
http://upload.wikimedia.org/wikipedia/commons/7/71/Lord_John_Russell.jpg
約翰·羅素勛爵
http://upload.wikimedia.org/wikipedia/commons/5/5b/Lord_Palmerston_1863.jpg
第三代巴麥尊子爵亨利·坦普爾

巴麥尊無論對外定對內都係一貫英國最偉大單邊主義政策
對外四處點火態度強硬寸步不讓 對內做事往往先斬後奏就連首相同女王都唔放眼內
1851年12月2日法國總統路易-拿破崙發動政變解散議會 巴麥尊走去同約翰·羅素笑啦
睇下班法國佬五十年就搞左五場革命 佢地邊識咩叫憲法架 我睇死呢個政權都唔會長命架啦
你睇還睇唔好亂講野 奧爾良家族係事頭婆個親家黎 呢D係王室既家事唔到你理 總之我地英國對佢係保持中立ok?
yes sir~

點知一年後1852年12月2日路易-拿破崙稱帝 巴麥尊問都唔問就發信代表英國政府同女王祝賀拿破崙三世稱帝
今次事頭婆都唔忍佢啦
我既野係你區區一個外交大臣可以代表架咩!?you are fire!!
炒左一個外交大臣事小 但你炒個個係巴麥尊
巴麥尊被炒後帶埋佢d人聯合保守黨罷免左約翰·羅素內閣 事後事頭婆就搵左保守黨第十四代德比伯爵愛德華·史密斯-斯丹利接手組閣
但德比內閣成立冇耐6月就大選 而選舉結果係保守黨330席 輝格黨292席 皮爾派38席 仲有一大堆小數黨

無論保守黨定輝格黨都冇辦法組成多數政府
最後輝格黨向皮爾派招手再加埋d小數黨左砌右砌總算砌到個聯合政府出黎
聯合政府就砌左出黎啦 但邊個做首相呢?

因為上次倒閣令約翰·羅素同巴麥尊互生嫌隙
兩個既唔願意係對方下面做野 亦唔接受對方做首相
而維多利亞一世更直接出黎放風 我討厭巴麥尊 佢做首相唔洗諗 不如比皮爾派領袖鴨巴甸試下?
就咁輝格黨就捧左鴨巴甸做首相 巴麥尊同約翰·羅素就返返入閣
但因為巴麥尊做外交大臣太危險所以佢就改為做內政大臣 而外交大臣就交比約翰·羅素
不過皮爾派雖然從保守黨分裂出黎 但除左反殼物法之外佢地本質都係保守黨
加上閣員都係輝格黨人 鴨巴甸盡其量不過係政治籌傭既傀儡而已
更何況佢下面仲有一大惡人巴麥尊

鴨巴甸內閣就成立左啦 之後佢就要同佢既外交大臣盡速對新成立既法蘭西第二帝國表態
鴨巴甸:拿破崙三世真係當正自己係拿破崙再世 佢最主要既支持黎自軍隊同波拿巴主義者 就憑呢個背景佢遲早一定會搞場大仗出黎
約翰·羅素:我認同 但重點唔係保持和平 如果佢發起戰爭既我地應該係諗要點樣利用
鴨巴甸:但始終法國係歐洲最強大既國家 如果考慮到勢力均衡法國人既戰爭只會令英國拖入佢地既敵方 我地應該係情況不可收拾前削弱法國既影響力
約翰·羅素:就咁決定囉?

返返去巴爾幹半島 自泛斯拉夫主義傳播後巴爾幹既斯拉夫民族反抗運動此起彼落
因此多信奉東正教既斯拉夫人係鄂圖曼境內行動受到諸多制抓
尼古拉一世引用庫楚克開納吉和約指俄羅斯有權保護東方既東正教徒
要求鄂圖曼將兩個耶教聖地 聖墓教堂同聖誕教堂劃為俄羅斯既保護地
如果俄羅斯認為聖墓教堂同聖誕教堂既保護唔足夠時俄羅斯有權出兵介入 如果你唔答應我地既要求既...

約翰·羅素好快就收到風俄羅斯同鄂圖曼關於聖地管理權既談判
仆街乜撚話!?俄羅斯係耶路撒冷建立保護地有權駐兵!?佢地又想遊出地中海!?即刻SEND封信比伊斯坦堡大使叫佢點都拖住佢地談判先!!

係倫敦海峽公約中英國將鄂圖曼從俄羅斯手上拖返去自己個邊
但如果俄羅斯駐兵入耶路撒冷就廢左倫敦海峽公約武功 到時俄羅斯同鄂圖曼就係落閘打狗既關係
而且俄羅斯控制左中東就更會威脅到英國同佢亞洲殖民地既連繫
到個陣時先有歐洲國家想救鄂圖曼仲必先要同俄羅斯經一場苦戰
話比阿卜杜勒-邁吉德一世聽!!如果佢接受左呢個條件佢個國家唔撚洗要架啦!!如果俄羅斯凶你我會幫拖 總之拒絕佢要求!!
約翰·羅素個命令就落左伊斯坦堡啦 但俄國佬唔係人咁品 如果佢真係惡起上黎唔通真係要英國同佢隻抽?
呢個時候一個完全唔關事既人開聲
係拿破崙三世

聖墓教堂同聖誕教堂唔係你東正教獨家既!!我有從弗朗索瓦一世流傳落黎保護東方天主教徒既權利!!
聽到佢咁講尼古拉一世都打左個突
東方?天主教徒??乜家陣耶路撒冷仲有天主教徒架咩?我橫睇掂睇剩係見到東正教 穆斯林同猶太人咋喎 你爭個屎坑返去唔痾屎!?
係啊吹咩
1852年初 拿破崙三世派左架戰列艦遊過達達尼爾海峽 馬爾馬拉海 博斯普魯斯海峽直入到黑海兜左過圈先返屋企
點啊?係咪想隻抽?

竟然毫無關係毫無利益毫無原因突然對俄國佬擺到咁硬 全世界都為拿破崙三世呢條傻仔既行為嚇左跳
嚇完冷靜落黎約翰·羅素意識到 條傻仔用得著!!
第日俄國大使向約翰·羅素抗議法國破壞倫敦海峽公約既行為
係咩?乜咁大件事啊?咁我要去察下啦 你返屋企等消息啦
使走左俄國大使之後約翰·羅素就即刻去搵鴨巴甸啦

鴨巴甸睇下我成功拉攏左法國佬同辣著左俄國佬 可以將俄國佬趕出中東啦!!
WHAT!?咁重大既外交政策你唔問過我先!?我冇諗過要同俄國佬開拖個喎!!就算有法國佬幫拖我地都唔值得同俄國開拖!!
咁姐係點呢!?你諗住成個鄂圖曼交比法俄兩個爭飽佢!?

你問我啊!?係你將個場搞成咁架!!應該係我問你諗住要點收科啊!!
突然碰一聲巴麥尊衝左入黎
出兵啊!!如果唔想打仗就出兵啊!!派一支艦隊聯合法國艦隊遊到去達達尼爾海峽 有幾大支派幾大支 拋到俄國佬縮沙為止!!
ON9咁咪姐係我地自己破棄左倫敦海峽公約!?如果拋唔窒佢就真係會開拖個囉喎!!仲你而家係內政大臣外交既野關你咩事!?
唔係 呢鋪我都撐巴麥尊 如果想和解決呢件事我諗就只有咁做啦
唔得 太冒險啦 現階段我唔想進行任何軍事行動 約翰·羅素你係外交大臣壇野你自己諗掂佢
答案我比左你唔做係你既事 首相都唔支持我既外交政策既咁我彈出啦
1853年2月21日約翰·羅素辭任外交大臣

3月13日鄂圖曼屬國蒙特內哥羅主教係俄羅斯奧地利授意下通過新憲法 將蒙特內哥羅主教改為世俗化既蒙特內哥羅大公
鄂圖曼出兵鎮壓 鄂圖曼將聖地保護權交比法國以支持自己出兵
6月尼古拉一世係多瑙河集結八萬大軍指責鄂圖曼破壞庫楚克開納吉和約
如果鄂圖曼唔係蒙特內哥羅撤兵同交出耶路撒冷 俄羅斯就出兵瓦拉幾亞同摩爾達維亞去拯救蒙特內哥羅既斯拉夫人同東正教徒

事情發展到呢到一直係局外人既奧地利都忍唔住要開聲
巴爾幹既和平就係我奧地利既和平!!邊個係我門口玩野就打邊個!!...所以...
...不如大家都黎我屋企和和平平咁傾下點和平解決巴爾幹壇野啊...?
就咁英 法 俄再加普魯士四國代表係維也納會面希望可以傾到個解決方案出黎
法國提出俄羅斯放棄多瑙河地區 放棄東正教徒保護權 重寫倫敦海峽公約
咁姐係打都未打就當我輸姐!?啊拿破崙啊 我地對法國既立場自1812年以黎都未改變過!!
講完俄國代表就拍台走人
俄國都唔傾啦 咁我地都走得啦?
英法都跟埋走

和談失敗之後鴨巴甸又摷返巴麥尊條橋出黎
鴨巴甸又學拿破崙三世派架戰列艦遊入達達尼爾海峽希望可以嚇尼古拉一世返返上談判桌
點知英國海軍一入達達尼爾海峽 尼古拉一世即刻拍台指責英國破壞倫敦海峽公約下令俄軍渡過多瑙河
7月3日俄軍佔領瓦拉幾亞同摩爾達維 10月16日鄂圖曼向俄羅斯宣戰

巴麥尊!!你又話派架戰艦入達達尼爾海峽俄國佬就會淆底既!?睇下你條橋搞成點!?而家真係打啦!!
係我問你將我條橋搞成點啊!!我叫你搵支大艦隊直入黑海 你就剩係搵架艇仔入達達尼爾海峽 呢D唔叫示威叫示弱啊!!

戰爭開始卻一反預料 鄂圖曼竟同俄羅斯相持不下
係巴爾幹半島由於斯拉夫人叛亂同希臘志願軍加入令土軍被前後夾擊
不過俄羅斯清況都唔好得去邊 因為戰場遠離俄羅斯本土又被巴爾幹山所阻令俄軍難以調動大軍
雙方都靠黑海運輸支援各自既軍隊 結果兩軍戰場就環繞住多瑙河口展開
首先土軍11月4日係奧爾泰尼察擊退左俄軍先頭渡過多瑙河重奪布加勒斯特 不過俄軍主力到達之後土軍就退返多瑙河南

11月30日俄軍發現一支鄂圖曼船隊出現係安納托利亞半島北部既錫諾普
俄軍下令六架戰列艦南下突襲用炸裂彈轟炸成個港口
鄂圖曼木製既船隊瞬間化為火海 岸上既港口設施都被炸成廢墟
失去左海路支援 係巴爾幹既土軍只可以退守多瑙河口南岸既要塞錫利斯特拉


錫諾普海戰

1854年3月28日俄羅斯無視英法下令俄軍從瓦拉幾亞 摩爾達維撤軍要求 英法向俄羅斯宣戰
4月20日奧地利 普魯士簽署共同防禦協定
撤兵!!即刻撤兵!!我唔要同你做鄰居!!唔撤兵既就宣戰!!
6月24日英法宣戰後再加奧普宣戰威脅俄軍撤回多瑙河北岸 錫利斯特拉解圍
8月英法聯合艦隊分別襲擊俄羅斯係波羅的海同堪察加既軍港

10月25日凌晨一支二萬五人既俄軍從塞瓦斯托波爾東部出城 擊敗城外土軍據點然後就消失於黑夜中
第朝係巴拉克拉瓦本部既英軍收到俄軍突圍既消息就派出四千五人去支援土軍
點知岩岩出城冇耐一支完完整整二萬五人既俄軍就出現係佢地面前

係英軍面前係兩排東西向既谷地 中間被一座高士威山隔開
7點英軍岩岩行入南方谷地時 俄國既哥薩克就衝過高士威山到去英軍面前
英軍既蘇格蘭高地兵匆匆排開戰列及時抵擋左哥薩克既衝擊
趁呢個機會英軍派出兩隊騎兵北上馳援 一隊係輕騎兵一路跑到去北方谷地西部
另一隊係重騎兵兜到高士威山既西側從側翼向哥薩克發起突擊
哥薩克敗退後俄軍步兵先匆匆趕到接手左高士威山布防
暫時俄軍似乎無力去襲擊聯軍大本營巴拉克拉瓦 只要等到法軍既增援都趕到既話俄國佬就不得不退城

蘇格蘭高地兵


係後方山上府視南北山谷既英軍將領突然驚覺到一樣野
大炮!!係大炮啊!!俄國佬準備拖走土耳其陣地入面既大炮啊!!傳令兵!!即刻叫北方谷地既輕騎兵進攻!!
YES SIR!!
傳令兵就將命令帶到比北方谷地既輕騎兵啦
即刻進攻!!唔好比俄國佬拖D大炮走!!
進攻?進攻咩啊!?咩大炮啊!?呢D咩命令黎架!?咁簡略既!?冇詳細D架!?
冇架啦 佢叫我講咩我就講咩 睇下曼山遍野都係俄國佬 你咪隨便搵幾個人打下搶幾碌炮返去囉
屌 命令就係命令 全部人上馬!!跟我衝啊!!!!

係北方谷地西部盡頭六百隻英軍輕騎收到命令就直奔向北方谷地既東部
但呢個時候二萬俄軍早已係北方谷地東部盡頭佈好陣形
英軍輕騎既衝鋒遭到三面火力環迴射擊 沿途死傷慘重但都衝到入谷地東部盡頭俄軍既炮兵陣地
山上既俄軍都被英軍呢場自殺式攻擊所震懾亂成一團 係到英軍輕騎奮力撕殺戰至最後一兵一卒戰死大半
最後法軍及時趕到 二萬俄軍拋棄土耳其陣地同大炮逃回塞瓦斯托波爾

英軍輕騎兵






輕騎兵衝鋒


https://youtube.com/watch?v=ZAxA1ztEAQ0



https://youtube.com/watch?v=dyqcZMsBOU4


雖然俄軍係巴拉克拉瓦戰役一無所獲 但亦証明左聯軍防禦既薄弱
俄軍計畫係冬天來臨前突破聯軍既包圍從而令聯軍不得不撤出克里米亞
11月5日清晨四萬俄軍乘住大霧兵分三路衝出塞瓦斯托波爾
因為自圍城以黎雙方不斷炮擊 兩軍之間既道路設施早已被全數炸毀
再加上俄軍冇城外既地圖 三軍一出門就互不接應
其中係因克爾曼一路既俄軍就撞上左山谷地帶
因地形狹窄人頭密集 遭到聯軍戰壕中密集火力炮擊
俄軍只係留低左一萬條屍體又逃返入塞瓦斯托波爾

因克爾曼戰役