［極高質分享］膠登簡易歐洲史入門

是咪話有epub版？
樓主或者原作介唔介意upload堆doc / epub?

係咪冇咗第六集？

當年都有睇

聽日再po

咩係Epub?

咦我要查下

真係無 應該漏左無back up

電子書格式

推

黎啦黎啦

膠登仔都睇得明既簡易西史入門第三十三集:拿破崙戰爭篇(下)第六,七次反法同盟


https://youtube.com/watch?v=VbxgYlcNxE8

1812年6月23日拿破崙渡過尼曼河進入俄羅斯
對此俄羅斯亦早有準備 巴克萊·德托利既廿四萬大軍亦係尼曼河對岸對待法軍既來臨
當法軍一渡過尼曼河呢廿四萬俄軍拔足就跑從此音信全無
我地戰無不勝既拿破崙皇帝威名遠播所向披靡!!我地唔洗打都可以行入莫斯科啦!!
最初俄軍既敵前逃亡鼓起左法軍既士氣 但等佢地行左兩個幾月之後佢地就後悔啦
如果打既話都仲有機會係敵人身上得到補給 但而家係佢地眼前既只係一片沙漠
冇錯係沙漠 俄羅斯既夏天炎熱而乾燥 植物稀少塵土飛揚 當時法軍面對既唔係大家想像既雪原 係沙漠
巴克萊·德托利個廿四萬大軍負責將法軍進路前每條村移平
幾百公里既荒地養近百萬大軍 後勤補給完全無力負荷
饑餓疾病係軍中肆虐 士兵開始擅自離隊然後一去不返 當佢可以再同隊友見面時已經變成地上既白骨
人類從未係歷史中得到任何教訓 又或者當時根本冇人將卡爾十二世當成一個教訓

7月18日英俄簽訂厄勒布魯條約結束兩國既戰爭並同瑞典結成盟友共同對抗法國入侵
7月22日英葡聯軍係薩拉曼卡戰役擊敗法軍攻入馬德里 英軍總指揮阿瑟·韋斯里獲封威靈頓伯爵

8月14日拿破崙終於到達俄羅斯境內既第一座大城 斯摩棱斯克
法軍既偵查發現城內有七萬俄軍 拿破崙認定呢到將會成為決定性既戰場 又或至少係件唔錯既補給品
16日十七萬法軍開始包圍斯摩棱斯克 七萬俄軍據城固守
第二日巴格拉基昂帶住六萬俄軍增援 而家城內既俄軍已增至十三萬人
拿破崙更加深信呢到必定係最終既決戰之地就下令放鬆包圍
圍佢好啦 唔好攻陷啊 我要吸引全俄國既軍隊集中晒係到一次過殲滅!!
但當十七萬法軍懶懶閒係城外紮營時 城內既俄軍已經開始左佢地既戰鬥
拖晒D平民走!!唔走就殺!!拎得就既就拎!!拎唔走既就燒!!燒唔爛既野就同我打碎佢!!一條草都唔好留比法國佬!!
18日拿破崙驚覺城牆上既守軍愈黎愈少既時候佢先發現自己既天真
扑街!!快D攻城!!佢地走緊啊!!
等班法國佬爬上城牆時城中已經化成一片火海 一條十三萬人既人龍從東門伸向東方既地平線
晒左兩日時間黎露營最終一無所獲 拿破崙要急起直追爭取係物資用完前進入莫斯科

斯摩棱斯克戰役

但打到呢到俄羅斯國內對焦土戰術既反對聲音亦愈黎愈激烈
條蘇格蘭佬燒左斯摩棱斯克啊!!斯摩棱斯克係我地既民族發源地千幾年既歷史名城佢一把火就燒撚左啊!!
就算要玩焦土戰 可以燒我地俄羅斯人既屋既就只有俄羅斯人自己!!
亞歷山大一世頂唔住輿論要搵人接替巴克萊·德托利 但要搵個純種俄羅斯人又要有咁上下軍隊經驗既人邊到搵?
亞歷山大一世搵黎搵剩係搵到一個
死肥佬庫圖佐夫
今次你係想打啊嘛!?咁你同我好好睇睇打一場!!

9月7日十五萬俄軍進駐莫斯科以西120公里外既博羅金諾村
博羅金諾村位於莫斯科河支流科洛恰河北岸 庫圖佐夫將佢既軍隊分成四個軍團
最大分既係佢既右翼放係博羅金諾村東面面向科洛恰河由巴克萊·德托利帶領
冇咁大分既中路係博羅金諾村南面向西 築有雷夫斯堡
最細分既左翼擺係中路既南面巴格拉基昂帶領 築有巴格拉基昂堡
呢三隊構成一個尖向西北既直角型 庫圖佐夫同佢既預備隊就係呢個直角東南既空間入面
庫圖佐夫呢個佈陣係希望利用向西兩路堅守堡壘消耗法軍 然後右翼趁機過河包抄

一直追求決戰既拿破崙亦帶住十三萬人從西面黎到 兩軍中間被一條源自科洛恰河既小溪隔開
拿破崙考慮到俄軍右翼人數眾多且隔河防守唔適合作為攻擊目標 咁就只有從正面強攻
法軍係科洛恰河南岸向東展開陣形 主力係中路由達武帶領 右翼係內伊 後面有預備隊既繆拉
另外係科洛恰河北岸只有少數既波蘭軍團保護法軍係南岸既左翼防止俄軍右翼渡河

朝早6點小溪兩側合共千門大炮齊射 中路既達武首先操向小溪對岸既巴格拉基昂堡
因為中隔住條小溪河谷爬過去之後仲有大量拒馬土壘令法軍步步為艱 呢個時候巴格拉基昂堡中數百門大炮掃射向小溪
戰場仿如第一次世界大戰既戰壕戰 小溪成為戰壕間既無人帶 步兵源源湧入只係白白成為大炮既食糧
法軍步兵化身人盾掩護炮兵前進破壞俄軍既防禦工事 見到法軍炮兵推進巴格拉基昂堡中既俄軍都爬出碉堡係小溪上同法軍殊死一戰
巴格拉基昂堡前既血戰一直維持到11點
鮮血淹過溪水 屍體填滿河谷 不過一公里長既小溪就堆滿左過萬人馬既屍骸
達武 內伊 繆拉全個法國正面軍都衝到巴格拉基昂堡下
眼見俄軍人數最少既左翼快將失守 庫圖佐夫下令預備隊包抄法軍右翼 巴克萊·德托利一半渡河包抄法軍左翼另一半支援巴格拉基昂堡
當巴克萊·德托利一渡河就比恭候已久既波蘭軍團擊退 不過預備隊既攻擊分散左法軍既火力令巴格拉基昂堡得以重整
但係呢個時候一個炮彈飛埋黎係巴格拉基昂身邊爆炸炸飛左佢既左腳
巴格拉基昂強作鎮定繼續指揮 但冇耐失血過多跌左落馬先比人發現佢既傷勢抬離戰場
12點繆拉同佢D騎兵成功穿過俄軍炮兵既火力盲點衝到巴格拉基昂堡下 庫圖佐夫放出所有騎兵攔截
一輪奮戰後繆拉擊退俄軍騎兵終於衝上巴格拉基昂堡 內伊 達武都從後跟上 前線從南方推進到雷夫斯堡
只要攻陷埋法軍就可以宣佈勝利 所有人都上晒戰場而家只係剩低拿破崙身邊既帝國衛隊 推埋佢地上戰場一次過消滅俄國佬啦陛下!!
嗯...天色都開始暗啦...今日之內打唔晒架啦...佢地就留返聽日先用啦...
夜晚7點兩軍各自退兵

第朝天光 戰場上依然係個堆屍體
但對面已經冇人
走晒!?又走!?班俄國佬究竟想點架!?你唔打我就攻入莫斯科架啦!!就當我求下你出黎同我打返場啦!!
博羅金諾戰役 法軍死二萬八 俄軍死四萬四 第一次世界大戰前歐洲單日死人最多既戰役











博羅金諾戰役

https://youtube.com/watch?v=k97nvOSBDnk



https://youtube.com/watch?v=eI8dZhuJQyU


庫圖佐夫!?你返黎啦!?場仗打成點啊!?拿破崙收左皮未啊!?
未
未!?你打輸左!?佢已經去到莫斯科門口個囉喎!!
陛下 臣冇打贏亦冇打輸 以臣係博羅金諾所見法國佬著既都係夏天既軍服 就憑呢點我地已經贏左啦
贏你老母啊!!你趕唔走拿破崙仲拖住十幾萬人返黎同我講呢D野!?你同我推晒佢地去死都要守住莫斯科啊!!
陛下 我唔可以將寶貴既軍隊浪費係佢地身上 拿破崙想要莫斯科既咁咪比佢囉 如果佢想要聖彼得堡既都比埋佢啦
俄羅斯冇左莫斯科唔會死 但國家冇左軍隊就玩完啦!!陛下我地搬屋去聖彼得堡啦

係維也納另一個皇帝都收到封黎自巴黎既信
入面只有短短一句
夠鐘撤兵啦

9月15日法軍進入莫斯科 如同一路既經歷呢到早已變成一座空城
雖然俄國佬早就搬走晒呢到所有野 但好彩佢地冇好似斯摩棱斯克咁放火燒城
至少而家有個有瓦遮頭既地方比疲憊既法軍休息下

15日晚 十萬法軍難得既安眠
最初只係市郊少少既火花 然後...
...陛下...陛下!!起身啦陛下!!出面燒起上黎啦!!
係克里姆林宮訓緊覺既拿破崙半夜被嘈醒爬出窗外一望
成個莫斯科市都燒起上黎 全軍係熟睡中被趕起身救火 最終燒足三日三夜
18日天上開始飄落一片片雪花撲滅地上既火花
...落雪啦...睇下落雪啦!!家陣連個天都幫我啊!!亞歷山大一世!!知驚就快D投降啦!!

莫斯科大火

火災後視察既拿破崙

俄羅斯落起第一場雪之後就再未停過
每日急降十幾度
而家莫斯科城中仲著住夏季軍服既法軍恨不得燒著成座城黎取暖
法國派往聖彼得堡既談判代表一一被拒絕 薩拉曼卡戰役後西班牙既法軍節節敗退
征俄前線既奧地利軍仲擅自撤兵 普魯士萊茵邦聯緊隨其後 法國保王黨人乘勢起事
10月19日拿破崙不得不率兵撤退
俄軍開始反擊啦

法軍撤出莫斯科

當法軍一步出莫斯科俄國既哥薩克騎兵就無間斷出現偷襲
因為冰雪遍地補給不繼令戰馬缺乏牧草 再加上法軍冇準備雪地用既馬蹄
法軍騎兵追擊哥薩克時好容易線低跌斷腳令法軍損失大量騎兵
只係D馬死左都仲好D 但D馬死左就代表有肉食
一路缺乏食糧既法軍全軍往往就會因為好小既食物而自相殘殺

11月9日法軍重返斯摩棱斯克 攞埋緊餘既補給品同守軍就繼續上路
16日去到尼曼河前最後一座大城明斯克 但駐守係到既奧地利軍早就撤走左
法軍所有補給都落入俄國佬手上 法軍轉向北上
最終係26日終於去到尼曼河支流既別列津納河
因為愈黎愈近歐洲 天氣都開始回暖 士兵都可以鬆返口氣
但比佢地去到別列津納河前佢地已經再笑唔出

法軍撤退

因為天氣寒冷 俄羅斯既河流已經全部凍結
士兵都可以踩住結冰既河面過去 拿破崙就覺得反正都係啦鋪浮橋既架生都冇用架啦 揼晒佢啦
但邊境前既別列津納河偏偏仲未結冰 而且對岸仲有四萬俄軍等緊佢地
拿破崙就派左一萬人向下游走引開對岸既俄軍 之後派左班工兵去上游剩夜搭起左座勉強浮得起既"設施"
第朝天光三萬法軍向浮橋一湧而上 浮橋不堪負荷應聲斷裂 更引起左俄軍既注意
過左河既少數法軍歇力抵抗 另一邊既工兵加緊修建浮橋
等法軍有序過埋河趕走埋對岸既俄軍就諗住安全啦
點後面又有俄軍趕上黎 拿破崙就即刻下令炸橋
陛下!?我地仲有一萬人係下游未過河個喎!?
屌!!我都死左六十萬人係到啦!!再死多一萬人算D咩啊!?炸!!


別列津納河戰役

係別列津納河為法軍殿後既內伊
12月12日法軍渡過尼曼河退出俄國領土
半年前都冇佢帶住六十萬人過河 半年後今日跟住佢返黎既人一萬都冇
生還率只有六十份一
無論百年戰爭既一百年 義大利戰爭大半世紀 牽涉全歐洲既三十年戰爭同七年戰爭
甚至將呢幾場仗既死亡人數加埋都唔及呢短短半年
法國人已經死盡 再冇人可以做呢隻科西嘉食人魔既爪牙

法軍進軍路線圖

啱啱開始睇英國都鐸王朝

法軍人數減幅

拿破崙退出俄羅斯後庫圖佐夫就向亞歷山大一世請辭
陛下你想要既係拿破崙既人頭定俄羅斯?呢場戰爭已經為人民帶黎莫大既苦難...我地而家應該要收兵同人民休養生息
我唔理!!而家邊個係皇帝!?我叫你追你就追!!
咁希望陛下以後可以成為一個名君啦...

2月27日普魯士加入英俄組成第六次反法同盟 奧地利宣佈中立
4月28日庫圖佐夫因傷寒係軍旅中過身

征俄失敗後拿破崙即刻趕返巴黎徵召廿萬新兵反攻東歐
但等佢支軍隊趕到黎既時候戰場已經推到入薩克森王國境內
拿破崙領兵十二萬進攻萊比錫
係萊比錫城西 當年古斯塔夫·阿道夫魂斷之地呂岑遇上布呂歇爾既七萬俄普聯軍
法軍以人數優勢好輕易擊敗左俄普聯軍
但因法國既戰馬都死晒係俄羅斯令法軍缺少騎兵 俄普聯軍戰敗後得以安然撤退

呂岑會戰後拿破崙繼續東進 九萬俄普聯軍放棄薩克森首都德累斯頓東退布雷斯勞
拿破崙帶十一萬法軍繼續追趕
為厘補騎兵不足既缺陷 拿破崙下令內伊先從北面兜截俄普聯軍既後路
5月19日拿破崙係德累斯頓以東既包岑追上俄普聯軍
但到開戰第二日內伊先到達戰場 俄普聯軍意識到後將被切斷就匆忙撤退
同樣因為缺少騎兵未能殲滅敗退既俄普聯軍

連贏兩場大戰但都一無所獲 拿破崙無奈同反法聯軍簽訂兩個月既休戰協定去重整軍備
拿破崙以為佢可以用兩個月重新準備一支戰無不勝既軍隊 事實上呢兩個月休戰只係比反法聯盟尋找更多盟友
8月11日休戰結束瑞典 奧地利向法國宣戰

休戰結束後拿破崙帶法軍主力東出布雷斯勞 但反法聯軍採取避其鋒芒斷其羽翼既戰略
布呂歇爾係柏林南面既葛羅比忍戰役 波拿道特係布雷斯勞後方既卡茲巴赫戰役戰敗左法軍
被孤立係布雷斯勞既拿破崙不得不退回德累斯頓
反法聯軍以為時機成熟8月26日集合廿一萬大軍包圍德累斯頓 但被拿破崙用十三萬人擊退
德累斯頓戰役後拿破崙以為自己得米就派十二萬人追擊退入波希米亞既反法聯軍 但又係庫爾姆戰役被徹底咁趕返出黎
加上進攻普魯士個路軍隊既失敗 拿破崙已經意興闌珊放棄所有主動攻勢
仲下令係後方督軍既奧熱羅將駐守萊茵邦聯各部隊退入萊比錫要係到同反法聯軍決一死戰
係到拿破崙十九萬法軍被三十六萬黎自全歐洲各民族既反法聯軍包圍
兩軍混戰三日留低共十萬條屍骸 但本應出現既奧熱羅卻遲遲未到 最後拿破崙不敵而逃
萊比錫戰役後繆拉自己一個走返那不勒斯國王加入第六次反法同盟向法國宣戰


萊比錫民族大會戰

拿破崙逃返巴黎後卻見奧熱羅同佢支十萬大軍完完整整咁擺係到
奧熱羅...!!因為你!!因為你既背叛令我打輸左場咁重要既仗!!因為你!!法國要亡啦!!
法國要亡...?陛下你要搞清楚 係因為你法國先要亡!!如果你仲係法國人民既皇帝就唔好為左自己既野心將自己既人民推去打一場必敗既仗!!

法軍退出德意志地區後萊茵邦聯加入第六次反法同盟向法國宣戰
12月2日反法聯軍攻入阿姆斯特丹推翻路易·波拿巴王位
21日反法聯軍渡過萊茵河
1814年1月14日瑞典丹麥簽訂基爾條約 丹麥將挪威割讓瑞典換取瑞屬波美拉尼亞 丹麥投降
3月1日英俄奧普簽訂儲蒙條約
約定推翻拿破崙後繼續反法同盟二十年以維持歐洲和平 四國各出兵六萬人組成聯軍防範法國侵略
3月30日巴黎守衛隊隊長馬爾蒙向反法聯軍投降 拿破崙逃入楓丹白露宮
列朗係巴黎成立臨時政府同反法同盟就拿破崙退位談判

俄軍進入巴黎凱旋門


巴黎中既俄軍
玩完了 乜撚都玩完了
回想廿年前佢只係土倫港中既一個小炮兵 憑佢既野心同堅持係呢短短廿年間爬上歐洲既頂峰將歐洲打個天翻地覆
然後俄羅斯一場雪就將佢打到眾叛親離永不翻身
而家係拿破崙身邊只係得返佢老婆 佢個仔 同內伊帶住個幾千個帝國衛隊
仲有塔列朗同佢手上既一張紙

陛下呢張係我同反法各國草擬既退位詔書 簽左佢萬事有商量
如果我簽左之後個王位邊個坐...?
......
...當然係我個仔啦...唔係我生佢出黎做咩啊...
...我會幫你爭取...
4月6日拿破崙退位


拿破崙退位

塔列朗攞住拿破崙封退位詔書返到巴黎同反法各國代表商討法國王位繼承人問題
繼承人問題!?拿破崙退位佢個位緊係由佢個仔繼承啦 有咩問題?
奧地利!!你緊係想佢個仔繼位啦!!有你個女睇住一個唔覺意連佢個位都比你坐埋添!!
咁波拿道特啦!!瑞典呢D小國同法國合併咁就勢力均衡啦
你都ON9!!瑞典就係你俄國門口 有咩事你就即殺入斯德哥爾摩 交比瑞典咪姐係交比你!?
咁奧爾良公爵路易·腓力啦 佢本身係法國貴族冇異議啦掛!?
有
塔列朗打斷左佢地既爭拗
你地係講緊法國既問題個呵?點解你地唔問下我地法國本來既王室?
只有路易十八可以繼承法國王位!!如果唔係路易就係拿破崙 其他一切建議都只係想操控法國既陰謀我係絕對唔會妥協!!

5月21日瑪麗·路易莎帶埋佢個仔弗朗索瓦·夏爾·約瑟夫·波拿巴返佢祖家奧地利
5月30日反法聯軍簽訂1814年巴黎和約
法國回復至1792年1月1日既疆域
反法同盟承認波旁家族為法國王室正統 法國承認荷蘭 瑞士 德意志 義大利各邦國獨立
拿破崙保留法蘭西帝國皇帝稱號流放至厄爾巴島 並每年收取法國政府二百萬法郎
呢樣就係塔列朗爭取既成果 冇割地冇賠款 一切責任由拿破崙孭

路易十八登基

科西嘉食人魔被流放到地中海不知名小島啦!!歐洲終於和平啦!!
拿破崙被流放厄爾巴島後梅特涅繳請歐洲各國到維也納商討今後既歐洲秩序
事實上係梅特涅意識到奧地利係拿破崙戰爭中已經打到亡國邊沿
周邊太多新興強國 奧地利已經無辦法再維持歐洲第一大國既地位
至少要係夕陽前主導歐洲未來秩序為奧地利賺返筆養老金

9月18日維也納會議召開
各國都派出代表劃分新歐洲既邊界
法國有塔列朗 奧地利有梅特涅 俄羅斯更由皇帝亞歷山大一世親自出席
而英國就派出代表外務大臣卡蘇里子爵羅伯特·史釗活

維也納會議
1.威靈頓6.梅特涅10.卡蘇里22.塔列朗

卡蘇里子爵羅伯特·史釗活

另一方面路易十八恢復王位後 佢只係成立左兩個裝飾性既上下議院
冇立法權冇否決權 只係一班圍埋吹水 國王繼續大權獨攬
路易十八堅持君權神授 佢恢復晒法國大革命前所有舊貴族同佢地既特權
佢下令全國農民補交佢係呢廿年流放時未收過既稅

十年破產十年革命十年征戰 今日法國除左你呢個死肥佬仲有D咩呢
你仲有咩可以係呢個國家身上搾壓到出黎呢
係維也納塔列朗聽到路易十八所作所為都不禁搖頭嘆息
呢條死肥佬...遲鈍 自我中心 只知享樂不知恩情 不記教訓只記仇恨 佢個國家唔亡就有鬼啦...

不過係呢個和平既亂世 無論係巴黎定維也納都冇人反省自身既罪行
繼續享受佢地最後盛宴
會議冇野討論 佢地只係係到跳舞

係地中海個個不知名小島 島上個個矮仔食人魔皇帝
攞住份法國報紙睇住佢地既報導笑左一笑
...我既人民需要我啦...

1815年2月26日拿破崙避開英法海軍嚴密監視帶住一千個侍衛係法國南部儒安港登陸
路易十八聽到只係哈哈大笑 有厄爾巴皇帝唔做走返黎法國送死啊!?
就派左內伊帶六千人去逮捕佢
臨走前內伊向路易十八承諾 我雖然係拿破崙以前條靚...
但佢為法國人民帶黎莫大既苦難!!而家仲有面返黎挑起事端!?我一定會將呢隻食人魔困係鐵籠到拖返黎!!

3月14日內伊帶住呢六千人追到去拿破崙面前
六千枝槍口對住拿破崙一個人 只要有一個人開槍事件就可以了結
拿破崙!!你白紙黑字承諾放棄王位 而家先黎反口!?
拿破崙冇回應內伊指責 佢只係打開佢既上衫 露出佢既心口 慢慢走向內伊既軍隊
你地願意射殺自己既皇帝既...咁就開槍啦...
六千人只要有一槍 事件就可以了結 但係一槍都冇
相反六千人中只要有一個離開隊伍 全部人就拋低自己既職務去勇抱佢地既小伍長
VIVE FRANCE!!VIVE NAPOLEON!!
最後只係剩低內伊一個企左係到
內伊...我會好似係莫斯科個時咁接見你
...陛下...!!我都係逼不得已先會跪係個條死肥佬面前咋!!我一直都係效忠於你架!!


拿破崙歸還


https://youtube.com/watch?v=ffeOvwBYkf4


15日那不勒斯國王繆拉見奧地利無意承認佢既王位就趁拿破崙越獄後向奧地利宣戰
17日大不列顛及愛爾蘭聯合王國 奧地利帝國 俄羅斯帝國 普魯士王國 瑞典王國 荷蘭王國 萊茵邦聯組成第七次反法同盟
20日係人民同軍隊既前呼後湧下拿破崙返到佢既首都巴黎 而個條死肥佬就再次流亡匆忙逃入荷蘭南部根特 即以前既奧屬尼德蘭
拿破崙恢復法蘭西帝國政治制度 任命拉法葉為上議院議員 達武為陸軍大臣
5月20日繆拉被奧地利軍擊敗逃入科西嘉

呢個時候荷蘭駐有威靈頓帶領既十一萬英荷聯軍 另外仲有布呂歇爾岩岩帶住十二萬普魯士軍趕到
後面仲有反法各國動員百萬大軍逼向法國邊境
拿破崙希望可以重演多次奧斯特里茨戰役 以一場決定性既勝利瓦解反法同盟
6月14日佢就帶住十二萬人分兩路攻入荷蘭
一路係拿破崙親自帶領既右路係16日里尼戰役擊退左布呂歇爾既先頭部隊
之後拿破崙搵左條友叫格魯希帶三萬人去追擊向北逃跑既普魯士軍 自己就向西支援另一路
同日係左路既內伊係四臂村遇上左威靈頓既主力 兩軍交戰不分高下
但係夜晚威靈頓收到布呂歇爾被擊退既消息擔心自己陷入包圍就主動向北撤退
內伊諗住帶騎兵追上去 點知突然落起大雨 就咁比英軍擺脫左

呢晚威靈頓帶住六萬英荷聯軍退入一條小村過夜
條村叫窩打老

窩打老戰役前三軍進軍路線

中路既步兵都跟住爬過座山 點知一爬上山頭一直匍匐係山下既英軍突然彈出以近距離射擊法軍
幾輪射擊後法軍最後一輪步兵衝鋒都被擊退 呢個時候六萬普魯士軍已經到達窩打老戰場
布呂歇爾下令以刺刀攻入法軍右翼既弗里歇魯孟 之後係村中架起大炮掃射整個戰場
6點英軍重奪拉海聖 7點普軍攻佔法軍後方普朗斯諾瓦
呢個時候格魯希先收到向普魯士軍進攻既命令
窩打老戰役拿破崙以七萬人對兩倍於已既反法聯軍 戰役以兩邊各死二萬人告終
但拿破崙已經再搵唔到二萬人黎支持佢啦

普軍攻入普朗斯諾瓦

法軍投降

https://youtube.com/watch?v=HAb4U6Pfl84

6月21日拿破崙逃返巴黎
咩話!?打輸左!?你山長水遠走返黎就係為左引入外國入侵架!?
我地動議罷免拿破崙既帝位!!
拿破崙個細佬議員之一既呂西安就拍枱話啦
動議罷免人民既皇帝係背叛祖國背叛人民既行為!!
係議會既角落 一個係政界沈寂左二十年既老人家平緩開口
佢為左佢個人既榮耀征戰全歐洲 為我地帶黎三百萬同胞既死亡 呢個皇帝憑咩代表國家民族呢?
全場人都望過去呢把最權威既聲音 佢係年屆六十既革命老英雄拉法葉侯爵
拉法葉都咁講...冇錯!!罷免啊!!罷免!!拿破崙係法國既暴君!!

6月24日拿破崙宣佈退位比佢個仔弗朗索瓦·夏爾·約瑟夫·波拿巴為拿破崙二世
不過呢個時候既佢同佢啊媽係奧地利享緊福
因為塔列朗係維也納開緊會 今次由富歇籌組臨時政府向反法同盟投降
反法同盟向陸軍大臣達武承諾唔會追究跟隨拿破崙既法軍將士 達武率軍向反法同盟投降
7月7日反法聯軍進入巴黎 路易十八再次復辟

拿破崙逃出巴黎後繼續向西走
只要比我搵到個港口上個船走到天腳底就再冇人可以搵到我!!嗯...去邊到好呢...冇錯!!美國我比個咁多人情佢佢一定會保護我既!!
但比佢去到海邊 水平線上已經浮滿英國既戰艦
上黎啦矮仔...我地等你好耐啦...
7月15日拿破崙被英國海軍HMS柏勒洛豐號逮捕 俄羅斯普魯士堅持要將呢隻違背諾言破壞和平既食人魔拖去打靶
拿破崙係船上苦苦哀求英王佐治三世庇護佢 最後英國佬將佢流放到大西洋更偏僻更不知名既小島
聖赫倫那

https://youtube.com/watch?v=-l6bX5aEdqE

10月13日繆拉被奧地利逮捕處死

11月20日波旁法國同反法同盟簽訂1815年巴黎和約
法國回復到1790年疆界
拿破崙流放至聖赫倫那島 並唔會得到任何資助
法國須賠償七億法郎予反法同盟
反法同盟係法國邊境駐紮十萬軍人三至五年 費用由法國承擔

內伊作為波旁王朝既軍人 帶領軍隊叛投侵略者被控以叛國罪送上軍事法庭
法庭上佢既律師為佢辯護
內伊既出生地已經係維也納會議中歸入普魯士領土所以內伊唔係法國人係普魯士人咁佢既背叛就唔構成叛國罪
聽到呢到內伊即刻彈起身 邊個話我唔係法國人!?我係法國人!!我從來都係法國人!!
12月7日內伊叛國罪成判以槍決
行刑人為佢用黑布蒙眼
唔洗啦 你唔知我幾十年士兵生涯都一直係直視子彈架咩?
士兵們!!呢次係我最後一次向你地落命令!!聽到我既命令就即管射向我既心臟啦!!我為法國打過一百場仗未有一次調轉過槍頭!!我抗議我既判決!!開火!!

1821年5月5日拿破崙過身終年51歲

拿破崙遺容

今次我地終於擊敗科西嘉食人魔啦!!
十幾廿年既混亂証明左共和主義同民族主義只係世界和平既破壞者
只有神聖既君主先可以保護人民既幸福!!
我地要聯合起全歐洲既君主消滅民族同共和主義為歐洲帶黎永遠既幸福!!

1815年10月一個囚犯因為偷麵包被判入獄二十年後終於獲得釋放


https://youtube.com/watch?v=e6jp_MKI_6w


下集維也納會議同梅特涅體制

膠登仔都睇得明既簡易西史入門第三十四集:維也納會議同梅特涅體制

1804年1月1日經過六年既戰爭
法國殖民地聖多明各趁法國內亂時成功爭取獨立為海地共和國成為美洲第二個獨立既國家
然後歐洲就陷入十年既戰亂中
1808年拿破崙連廢兩個西班牙國王由自己個細佬約瑟夫·波拿巴取代王位
然後西班牙又陷入另一場戰亂中
係佢地美洲既殖民地因為半島戰爭失去左宗主國既聯繫 佢地既總督成為當地唯一既話事人
當地既需要成為總督唯一既考慮 如果發生暴動佢地都洗旨意會有軍隊黎鎮壓

當年拿破崙身後既隨從玻利維係1808年返到佢老家委內瑞拉總督區
佢趁西班牙陷入半島戰爭就開始帶領佢既同胞打遊擊戰抵抗西班牙既殖民統治

1810年5月18日拉普拉塔總督區首都布宜諾斯艾利斯 一支英軍帶黎左佢地國王被推翻既消息
最初拉普拉塔總督試圖向公眾隱瞞西班牙既形勢 但好快謠言就滿天飛
群眾係政府門口聚集要求脫離西班牙 軍隊同政府拒絕向總督效忠
最後5月25日拉普拉塔總督宣佈脫西班牙獨立建立拉普拉塔聯合省

幾個月後9月16日西班牙另一個殖民地 新西班牙總督區多洛雷斯市半夜
一個神父米格爾·伊達爾戈·伊·科斯蒂利亞走上教堂敲響大鐘嘈醒左全村既人
三百年前班西班牙佬搶走左我地既土地你地願唔願意搶返返黎!?你地願唔願意自由!!
¡¡殺晒班賊仔!!¡¡viva México!!

雖然伊達爾戈一年後就戰死 但獨立既戰火已經遍及全個新西班牙總督區
佢地更係1813年發表獨立宣言同憲法
但好景不常 兩年後美洲既人民以為可以乘歐洲動盪揭竿而起時 歐洲既戰亂就已經結束
斐迪南七世返回西班牙王位 而西班牙既軍隊亦隨住斐迪南七世既復辟進駐到新西班牙總督區
新西班牙革命都轉入遊擊戰中
1814年9月18日全歐洲既王公貴族齊集維也納商討世界既"和平"


西班牙殖民地從北到南:新西班牙總督區 新格拉那達總督區 秘魯總督區 拉普拉塔總督區

話說當年拿破崙侵俄失敗後係第六次反法同盟中 英俄奧普呢四大拿破崙受害者決定係維也納會探討永遠消滅法國侵略既對策
呢場唔係D咩正式既國際會議 最初只係呢四個國家既吹風會
但奧地利皇帝弗朗茨一世 外交大臣梅特涅親王
英國外交大臣卡蘇里子爵 駐法國大使威靈頓公爵
俄羅斯皇帝亞歷山大一世 普魯士國王腓特烈·威廉三世
呢班全歐洲最有權勢既人聚集係一座城市入面就自然引黎左一班狂蜂浪蝶
全歐洲王公貴族不論親法反法 仲有各種利益團體
佢地都黎到維也納希望係呢四強瓜分歐洲時可以分一杯羹 又或至少可以保得住自己既利益

起先英俄奧普為抑制法國再次侵略既可能
佢地四國準備開一套嚴苛既條件比法國 然後再塞一個佢地四國都可以控制既人做法國國王
係佢地四國既會議室外 塔列朗正為將會發生既陰謀惴惴不安
但我地法國可以點呢...我地係戰敗國...全歐洲針對既目標...
呢個時候竟然有條友直接衝埋黎拍響會議室既大門
喂屌你啊!!我地全歐洲既代表黎齊晒呢到 你地四國諗住自己玩晒啊!?
塔列朗就諗到計啦
西班牙既代表唔好咁嬲住 佢地四國有佢地重要野傾咪由佢地傾囉 不如我地又另開間房傾我地自己想傾既野啊?
塔列朗就帶住西班牙仲有瑞典 葡萄牙既代表同埋一絲奸笑走入另一間會議室
係門後 梅特涅都發現法國佬係到組織緊不下於自己既陰謀
...仆街...反而比法國佬爭取到一個外交舞台...與其比佢係到建立另一個外交中心不如將佢納入自己之下啦
咯咯 塔列朗~好耐冇見啊~乜你條扑街仲未死架~當年雅各賓派冇斬到你真係睇漏眼啦 咩你班友咁屈DUP係到開會啊?不如入黎同我地一齊開啦
不過梅特涅強顏既歡笑只係狠狠咁撞上左塔列朗既冷屎忽
??我係到同西葡瑞既代表傾得好開心啊 我地呢D敗者同弱者邊有資格同你地D大國一齊坐啊?不過...如果你咁堅持既話...我建議先由我地八國開個預備會傾下往後會議細則先?
梅特涅向塔列朗奸計妥協 佢將四國會議擴張成八國會議並將正式議期拖延到11月1日先開幕
並且往後會議規則都須經八國會議同意先生效 到時塔列朗就可以用大量小眾利益黎平衡四國既野心

11月1日維也納會議正式召開 佢地第一個要解決既就係各個比拿破崙推翻既王國既王位啦
既然路易十八可以坐返法國王位 咁各國都可以搵返佢地本來既王室去恢復王位啊
就咁與會各國就提出第一條仲裁原則 叫正統原則
根據正統原則各國承認1789年前封建領地劃分係正統王朝 各國有義務維持各國王室正統秩序
咁問題黎啦 丹麥同瑞典代表舉手 咁挪威既王位呢?
我地係1814年簽基爾條約將丹麥既挪威割左比瑞典 咁姐係丹麥既王室係挪威既王室正統?

之後佢地又拋出第二個原則 叫補償原則
所有係反法戰爭中有出過力既都可以得到領土賠償
講到呢到會場就陷入瘋狂 所有代表都抆出刀仔撲向歐洲地圖
十年拿破崙戰爭除左丹麥有邊個國家冇同法國佬開過拖呢?

睇見會場既氣氛梅特涅就放心啦
你地爭啦 你地班小國爭黎爭去最後都係要搵D大國黎撐腰主持大局 到時就係我奧地利擴張既機會...!!
梅特涅懶懶閒咁睇住呢班小國吱吱喳喳係到為領土爭拗時會場中突然響起一把雄亮既聲音
我要薩克森!!
想要成個薩克森!?邊撚個咁撚大想頭!?梅特涅驚愕望過去 原來係普魯士國王腓特烈·威廉三世
我要繼承老祖腓特烈大王遺志吞併全個薩克森呢隻拿破崙既走狗!!
呢下梅特涅先知自己玩大左
自三十年戰爭以黎神聖羅馬帝國早已名存實亡 但哈布斯堡靠貴族聯姻仍可以係德意志保留相當既影響力
就憑呢D影響力都足夠比奧地利換個招牌重建神聖羅馬帝國 咁奧地利都仲可以保住歐洲第一大國個位
但如果比普魯士吞左薩克森 普魯士就會一躍而成德意志第一大國左右奧地利既號召力
而且奧地利失去左控制德意志機會之餘仲會係北面比兩個新興強國普魯士同俄羅斯包圍再加埋南面既鄂圖曼
到時唔好話做第一大國 直情係亡國邊沿啦

睇住腓特烈·威廉三世呢隻粗人係到拍枱拍橙 梅特涅聽到冷汗直標
嘈夠未啊你隻死軍佬!!論貢獻我先最大啊!!我都未攞賠償啊!!
係救世主啊!!終於有人出黎制止腓特烈·威廉三世 梅特涅即刻望過去邊個係佢潛在既盟友
我要波蘭!!係全個啊!!
原來係個個包住白人皮膚既蒙古人 俄國皇帝亞歷山大一世
腓特烈·威廉三世打蛇隨棍上大嗌
波蘭同薩克森我地要硬架啦!!邊個阻我地打邊個!!
聽到呢到梅特涅已經嚇到雙眼反白口吐白泡
...天亡奧地利啊...
呢個時候有人拍拍佢膊頭貼埋佢耳邊
俄普既事我唔會坐事不理...
真係奧地利既救世主!?唔會又係黎搵我老襯架下嘛...?
梅特涅擰轉頭 企佢後面既係英國外交大臣卡蘇里子爵
俄普既問題我地不如開間房再傾啊?
見梅特涅同卡蘇里好似基佬咁雙雙離開會場
塔列朗敏銳既觸角話比佢聽個到先係主戰場 塔列朗又吊住佢兩個尾跟埋出去

係歐洲大陸我地英國冇任何利益 我地係衷心咁希望見到你地既和平 如果有任何一國破壞歐洲既勢力均衡我都會視佢為拿破崙
咁你諗住點?就憑我地兩個對上俄羅斯普魯士?以貴國係拿破崙戰爭既投放我非常懷疑你個立場可以有幾堅定
咁如果加埋我呢? 塔列朗推門行入黎
我願意用萊茵河東岸既萊茵蘭換取薩克森獨立 咁你地會用咩報答我?

...俄普似乎想係你身上鑿一筆...我覺得佢地太貪心啦
仲有教廷...佢地話想要返阿維農喎...都九唔搭八既
就咁有我地三個仲夠唔夠做?
英法奧簽訂密約如果俄普強行吞併波蘭薩克森將會聯合向俄普宣戰

三國簽完密約就前後腳離開間房
但到梅特涅行出去就見到亞歷山大一世企左係到 用捉姦在床一樣既眼神望住自己
你三個係到傾D咩?
冇啊...見塔列朗個菊花幾白滑就借黎玩下...
波蘭單野你會支持我個呵?係既話我唔介意割幾忽比你
...波蘭將會作為完整既國家而存在 但我地唔介意同俄羅斯共同管治波蘭既
唔得 就算係共管我地俄羅斯都要有優先權
亞歷山大...你以為我地奧地利唔夠你抽?就算係隻抽我地都未驚過
梅特涅要搞清楚情況既係你 我地俄羅斯百萬大軍停駐係全歐洲前拿破崙既領土上面!!我係完全諗唔到理由要撤兵!!只要開句聲我得到既將會比拿破崙更多 如果你唔將波蘭交出黎咁連你老闆個位都唔洗要!!
係咩?咁你就唔好得把口啦
梅特涅講完就轉身離去 留低羞憤既亞歷山大一個
...人黎啊!!同我準備出兵!!我要打9呢班異教徒比佢地見識下我地俄羅斯天威!!
佢個外交大臣聽到即刻制止佢
唔好啊陛下!!你肯傾既你既土地一定會有增加 你要打既就係同全歐洲過唔去 到時你就成為第二個拿破崙隨時得不償失啊

到亞歷山大一世死死氣返去會議聽時只見腓特烈·威廉三世流晒口水對住張歐洲地圖 隔離有塔列朗同卡蘇里對住萊茵蘭手指指
咁你而家諗住點?
亞歷山大一世強擠起笑容宣佈 我願意返到1789年前咁同奧普兩國平分波蘭!!
就咁佢地又拋多條仲裁原則出黎 叫勢力均衡原則
最後再加多條圍堵法國原則
就靠呢四條原則與會各國總算畫出一幅新既歐洲地圖出黎

1815年6月9日窩打老戰役前九日維也納會議通過決議
奧地利得到蒂羅爾 薩爾茨堡 伊利里亞 捷爾諾波爾 拉古薩 倫巴第 威尼斯 重建托斯卡納大公國 摩德納公國 建立倫巴第-威尼托王國由奧地利皇帝擔任國王
荷蘭得到奧屬尼德蘭 部分盧森堡大公國 尼德蘭聯省共和國改為尼德蘭聯合王國 由奧良治-拿叟家族出任國王同盧森堡大公 荷蘭以盧森堡大公名義參與德意志邦聯
普魯士得到薩克森北部 但澤 萊茵蘭 瑞屬波美拉尼亞 另一部分盧森堡大公國
英國得到開普殖民地 多巴哥 錫蘭 毛里求斯 愛奧尼亞 特立尼達 赫爾戈蘭
法國得到塞內加爾
薩丁尼亞王國重奪皮埃蒙特 尼斯 薩伏伊並吞併熱那亞共和國
教皇國復國但阿維農 孔塔-弗內森歸法國
波旁家族帕爾馬支系建立盧卡公國
拿破崙個老婆瑪麗·路易莎得到帕爾馬公國 皮亞琴察和瓜斯塔拉公國 死後由波旁家族帕爾馬支系繼承
那不勒斯及西西里國王費迪南多四世返回王位 那不勒斯及西西里國王合併成兩西西里王國 那不勒斯及西西里國王費迪南多四世改名為兩西西里國王費迪南多一世
漢諾威升為王國 將勞恩堡公國割讓丹麥 但獲得明斯特主教區 東弗里西亞
巴伐利亞 符騰堡 巴登 黑森-達姆施塔特 拿叟係萊茵邦聯時期得到既領土得到承認
巴伐利亞再獲得萊茵-普法爾茨 維爾茨堡公國 法蘭克福大公國
黑森-達姆施塔特將西伐里亞割讓普魯士但獲得萊茵-黑森
華沙公國分成三份 最大份波蘭會議王國由俄羅斯皇帝出任國王 跟住波茲南大公國由普魯士國王出任大公 最細係克拉科夫自由市由奧地利保護
三十八個僅存既神聖羅馬帝國諸侯組成德意志邦聯 奧地利做主席 副主席係普魯士
與會各國保證瑞士中立
開放萊茵河及多瑙河為國際航道
反對奴隸貿易

維也納會議後歐洲國界

臨散BAND前亞歷山大一世又彈出黎發神經
實在太美好 實在太感動啦!!我地歐洲千幾年既戰亂因為一個拿破崙就將全歐洲既國家團結起黎締造永久既和平
呢D一定係上帝既恩賜要我地耶教各教派永結同心既旨意啊 因此我提出所有歐洲既國家成立一個神聖同盟確保歐洲永遠既幸福!!
哇好偉大!!好感動啊!!我地都要加入!!
各國代表都爭相係神聖同盟上簽字
亞歷山大一世睇見都好滿意 哼哼...我簡直係歐洲既救世主...
簽完神聖同盟之後維也納會議終於正式解散
各國代表一離開會場就係到交頭接耳
...條俄國佬係到UP乜9啊...
...佢係咪標完童黎啊...

等D人走晒之後亞歷山大一世攞起張神聖同盟睇
有三個國家冇簽名
英國 教廷 鄂圖曼

英國代表卡蘇里係眾人既歸途上截住左梅特涅
雖然亞歷山大一世係神神地 但我覺得有D野都值得我地參考
...你意思係...?
不如我地加埋俄普四大國建立一套歐洲協調制度 每兩年定期聚埋一齊商討歐洲既秩序咁先係真正既和平
嗯冇錯 一言為定 咁我地兩年後再會

但9月26日法國首相塔列朗返到巴黎時大選岩岩結束
一班比國王更保王既超保王黨係402席入面攞左350席
呢班貴族同教士組成由阿圖瓦伯爵查理·腓力帶領既超保王黨霸佔議會連路易十八都管佢地唔到
首先查理·腓力向塔列朗開炮話佢參加過革命要佢下台 如果唔係自己就帶班貴族流亡出國
咁路易十八就搵黎塞留公爵阿爾芒-埃曼紐爾·迪普萊西接任首相
跟住呢班超保王黨仲未滿意
佢地再係全國各地搜括所有同國民公會有關支持過拿破崙既人 用私刑虐待同處死佢地
每日都有自己鄰居神秘消失或橫死街頭 法國人經歷第二次白色恐怖

黎塞留公爵阿爾芒-埃曼紐爾·迪普萊西

1817年3月4日前美國駐法國大使占士·門羅當選美國總統

經過兩年既和平後1818年9月30日英俄奧普如約係亞琛再次召開會議
因為黎塞留公爵說服反法同盟提早撤兵換取減少兩億法郎賠償令法國提早還清1815年巴黎和約欠款
英俄奧普同意法國加入結成五國同盟
另一個議題就係自拿破崙已黎南美洲既亂局
佢地搞既獨立運動明顯係我地五國同盟所反對既民族主義同共和主義
但目標係隔成個大西洋既南美洲 距離咁遠範圍咁大就憑我地五國要點處理呢?
亞歷山大一世條神棍又彈起啦
為左我既弟兄!!擁有歐洲最大陸軍既我地願意出兵幫手鎮壓!!
!?!? 聽佢一講又挑起左卡蘇里同梅特涅既神經
今日西班牙出事你就擺隊兵係西班牙 聽日唔知邊到出事你又擺隊兵過去 遲下成個歐洲仲唔比你玩晒!?
話係咁話姐...但我地要點拒絕佢啊...
卡蘇里就開口啦 亞歷山大啊 我地五國同盟成立旨在維護國際既和平 南美洲既叛亂始終都係西班牙既內政我地不宜介入既...
哦...原來係咁...咁簡單啦我地五國成立一支常設既聯合軍隨時準備鎮壓各地既叛亂咪得囉
腓特烈·威廉三世!?!?死軍佬咁撚多口...咁既橋你都諗得出叫我地點反駁啊!?
OK!! 卡蘇里又開聲 只有陸軍係唔夠既...如果再加支聯合海軍就完美啦
咩話!? 亞歷山大一世 腓特烈·威廉三世 黎塞留公爵聽到就一齊拍枱
而家全歐洲得返你地英國有海軍之嘛!!要建立聯合海軍咪姐係你英國既海軍囉!!
如果建立聯合海軍唔得既 聯合陸軍既野我都唔支持啦 歐洲既野你地自己玩飽佢五國同盟我退出
英國既態度令亞歷山大一世更扯火 你唔鎮壓既搞呢個同盟出黎做乜9啊!?我地係上天派落黎!@#$%^&*...
梅特涅出黎打完場 算啦算啦 大家唔好拗得咁薑 有咩我兩年後再傾過好冇?
到最後亞琛會議咩都傾唔出就結束左

話說係拿破崙戰爭時英國既紡織業非常好景 佢地用好高人工請左好多人入工廠
但拿破崙戰爭結束後英國既紡織業就泡沫爆破 再加上英國政府為保護當地農業而向入境農產品增收關稅
英國既低下層生活百上加斤但又有冤無路訴
話雖英國係當時最民主既國家 但英國既選民基礎係比功能組別仲要細
只有一年交得起三十磅地稅既男人先買得起一票
選區係中世紀畫落黎既 有D選區已經冇人住都可以選到十幾個議員 有D新興城市住左幾萬人但一席都冇
而且選舉仲要係記名投票 姐係班選民一個個行上台公開講自己投票比邊個
當時英國所謂既民主不過就係班有錢佬圍內既遊戲

1819年8月16日曼徹斯特有六萬人係彼得盧聚集要求改革選舉制度
政府既回應就係搵騎兵揮住馬刀衝入人群 做成十五死六百幾人傷
舉國嘩然 屌你呢到彼得盧咋 你以為窩打老啊!?在野既輝格黨當然咬住唔放
雖然唔關佢事但身兼下議院領袖既外交大臣卡蘇里都不得不為政府辯護
佢地係暴民!!佢地抵死!!
咁就比輿論咬上左
卡蘇里係維也納牛太耐以為自己係梅特涅呢到係奧地利啦!!
卡蘇里同對面海D暴君聯手打壓我地英國既民主改革!!
自此卡蘇里係英變成過街老鼠

彼得盧屠殺

10月20日五國同盟再召開維羅納會議
拿破崙不過係冧左七年...點解歐洲...世界都愈壓愈亂架...
話左邊到有人做反我地就要即刻出兵鎮壓架啦!!係你地英法奧三國剩係識係到互相猜忌同內鬥!!唔理啦總之我要出十五萬兵鎮壓西班牙!!
邊到有仗打邊到就有我!!如果俄國出兵我一定跟!!
亞歷山大一世!!腓特烈·威廉三世!!你兩個係歐洲最東面諗住點去歐洲最西面啊!?我奧地利同德意志邦聯絕對唔會比你地既軍隊踩過去架!!
講到尾你咪就剩係識得內鬥!!
算啦 我退出啦
對俄奧普既爭吵一直沈默既會議新人佐治·坎寧終於開聲
老實講 共和主義同民族主義對我地英國根本冇任何威脅 相反我地對歐洲大陸既反抗運動一直抱持憐憫態度 如果歐洲協調只係一種反人民既保守制度 咁恕我退出啦
...佐治·坎寧...!!你走啊!!你走左唔好返黎!!第日你地英國出事唔洗旨意我地會幫你鎮壓!!
鎮壓?好笑啦 比你地呢D人管治唔做反先奇啦 我地光榮既英國邊似得你地 而家唔係你地孤立我 係我對你地既光榮孤立!!
佐治·坎寧講完閂門就走
關於西班牙叛亂既問題請都容我拒絕俄普既建議 我地法國一向都反對介入外國內政 而且西班牙既叛亂只係我地波旁家族既家事 我地亨利四世既後人自己會解決!!
講完連維萊爾都走埋
咁唔洗傾啦?巴爾幹單野我郁硬鄂圖曼!!
最後連亞歷山大一世都走埋
梅特涅精心設計既"和平"只係經過七年三場會議就崩潰

12月1日巴西攝政佩德羅加冕為巴西帝國皇帝佩德羅一世

佩德羅一世