[極高質分享]膠登簡易歐洲史入門

473 回覆
167 Like 5 Dislike
2019-05-09 17:10:33
[多字有圖]膠登仔都睇得明既簡易西史入門第四集:英法百年戰爭[膠登原創]
故事返到去凡爾登條約分割後既西法蘭克王國
西法蘭克王國國王禿頭查理死左 傳位比佢個仔口吃路易
口吃路易死埋 又傳位比佢個仔路易三世
之後路易三世都死埋 咁咪又傳位比佢個仔 不過佢冇仔喎 咁仲有佢細路卡洛曼二世
卡洛曼二世都冇仔生就死左啦咁點算?咁個王位就返返去東法蘭克既胖子查理
但胖子查理又比佢個侄阿努爾夫廢左喎
班西法蘭克貴族就話啦 你搵個姓卡洛林既人黎管我就話姐 而我不知阿努爾夫是誰

係公元九世紀開始 源自北歐既維京人開始搶掠全歐洲既海岸線
係西法蘭克抵抗維京人最成功既就係卡佩家族巴黎伯爵強人羅貝爾
強人羅貝爾死後佢個仔巴黎伯爵厄德一世(呃唔到一時)就被推舉為西法蘭克王國國王

898年厄德一世死後西法蘭克貴族又抬左口吃路易個私生子糊塗查理出黎做國王
呢個時候維京人依然侵擾緊西法蘭克既海岸 為此糊塗查理決定割西法蘭克北部沿海地區比維京人定居 順便趕走其他維京人
呢個就係諾曼第公國啦

後來西法蘭克貴族又反對糊塗查理 推舉厄德一世個細佬羅貝爾為王
羅貝爾同糊塗查理爭奪王位時戰死 由羅貝爾個女婿拉烏爾一世繼承
拉烏爾一世冇仔生就由糊塗查理個仔 海歸路易繼承然後傳比佢個仔洛泰爾一世
洛泰爾一世之後又傳比佢個仔懶王路易

呢個時候卡佩家族已經由巴黎伯爵升上法蘭西公爵
987年懶王路易死後卡佩家族法蘭西公爵雨果卡佩繼位 法蘭西王國卡佩朝正式成立

九世紀維京人侵擾歐洲既時代英國亦冇例外
維京人係不列顛島上成立一大堆大大小小既王國
886西塞克斯王國艾佛烈大帝統一左英格蘭

1066年時任英王懺悔者愛德華逝世
懺悔者愛德華老婆個啊哥哈羅德二世稱王
挪威國王哈拉爾三世又帶隊兵係英國北部登陸同佢爭王位
最後哈羅德二世幾經辛苦係斯坦福橋之戰做底哈拉爾三世 可以安心坐上個王位啦
咁諗既時候 哈羅德二世接到報告又有另一支軍隊係英國南部登陸
抖都冇機會抖又要帶兵追過去 係黑斯廷斯兩軍相遇
帶兵既係諾曼第公爵征服者威廉

征服者威廉係黑斯廷斯戰役擊敗哈羅德二世之後 再鎮壓埋反抗既英國貴族
征服者威廉正式成為英格蘭王國諾曼朝既君主啦

1328年法國卡佩朝最後一個國王查理四世過生 又係衰個樣野 冇仔送終
咁咪拎卡佩家族個族譜出黎畫鬼腳睇下邊個血緣最近囉 一畫就畫到個出黎啦 個個叫愛德華
哦 愛德華 我識佢 佢講野好on9架嘛 咁咪叫佢黎繼位囉 佢家陣係邊啊?
佢係英國 英國國王愛德華三世......

法國貴族拒絕接受呢個結果 佢地簡左血緣第二近既瓦盧瓦伯爵腓力出黎繼位 是為瓦盧瓦朝腓力六世
你唔接受呢個結果?我都唔接受喎!!明明族譜寫到明王位係我既 你話唔比就唔比架啦!?愛德華三世亦跟手宣稱自己係法國國王
法?睇個?邊撚到法啊屌你老母!?我腓力六世就真係法國國王啦 我黎手沒收晒你係法國既領地都仲得啊
都仲未夠切底 你d羊毛係法蘭德斯好撚好賣下話 咁我就禁止法蘭德斯既羊毛交易啦
(法蘭德斯即今日既荷蘭比利時個頭)

呢鋪玩大左啦 因為呢個政策令法蘭德斯失業率大增 法蘭德斯商人領袖阿特威爾德推翻左法國既管治
1340年英國為支援法蘭德斯就派左支艦隊出海 法國亦派出艦隊攔截
兩軍爆發斯魯伊斯海戰 英軍大勝法國海軍 所以點解百年戰爭既戰鬥都係法國發生

雖然埸仗贏左但係愛德華三世只係為左打呢埸仗就已經打晒成副身家啦只好收兵休整
1346年法國對親英既法蘭德斯政權步步進逼 愛德華三世再次對法國出兵
今次仲帶埋佢個仔黑太子愛德華

英軍係布列塔尼登陸沿住法國北岸前往法蘭德斯
七千長弓五千騎士既英軍係加萊附近比四萬法軍追上 其中大部分係騎士

百年戰爭Round 1 愛德華三世vs腓力六世

中世紀既騎士唔好諗住好似世紀帝國咁起幾隻長槍兵就可以督死佢
試諗下一隻成個人咁高既馬 係佢上面再騎多個人 而人同馬全身都鋪滿裝甲既 個人揸住兩米幾長既騎槍
有幾百幾千甚至呢到咁有三萬幾個 佢地一字排開一排又一排 以每小時十幾公里既速度 砰令碰隆咁撞過黎
係當時步兵絕對冇可能打得贏騎士 呢個唔係迷信係事實 不過事實亦到此為止啦

騎士衝鋒
1346年8月26日早晨訓醒覺食飽早餐既英軍係克雷西村附近既一個山坡上面等待法軍既到來
英軍以V型面向法軍 愛德華三世帶領既徒步騎兵係中間 兩翼係長弓兵 右翼由黑太子愛德華帶領
到晏晝 日夜兼程既法軍終於趕黎
首先熱那亞弩兵賞試接近英軍進行射擊 但因英軍駐係山上熱那亞弩兵多次接近都未能成功
係後面自信自大自戀既法國騎士開始唔耐煩 佢地連陣都未排好就一湧而上 係英軍面前同熱那亞弩兵"打成一片"
乘此良機英軍長弓兵萬箭齊發箭如雨下法軍陣營一片混亂 屠殺一直持續到第日凌晨
法軍全軍覆沒而英軍只損失幾百人 英軍攻佔加來

克雷西會戰地圖
克雷西會戰演示


https://youtube.com/watch?v=8aNf1mQQ7_4


戰後愛德華三世為獎勵黑太子愛德華既傑出表現
愛德華三世成立嘉德騎士團並冊封黑太子愛德華為嘉德騎士

1350年腓力六世死亡佢個仔約翰二世繼位
1355年戰事再起 黑太子愛德華出兵洗劫阿基坦 法王約翰二世帶住佢兩個仔查理同路易御駕親征
結果法軍不堪一擊係普瓦捷戰役中大敗 約翰二世被俘查理同路易走甩左 大哥查理回國後成為攝政
英法簽訂加來條約 愛德華三世放棄法國王位以換取法國北部領土
1359年英軍再度出兵一路打到巴黎門口 查理同英國再簽布勒丁尼和約 英國得到阿基坦公國並賜予黑太子愛德華
1364年約翰二世死係英國 攝政查理登基為王 是為查理五世

1360年英法地圖

係十四世紀 法國既軍隊主要由三種人組成 痴線既騎士 收錢既傭兵 徵召既平民
0+0+0戰鬥力依然等於0
為解決呢個問題查理五世就改革稅制 平民唔洗再服役啦 你地專心耕田交多幾蚊稅比我去請顧傭兵

1369年查理五世主動出擊 收復大量被英軍攻佔既失地
到佢死後英國只係得返法國北部幾個港口
英法戰爭都似乎差唔多打完 可以宣判法國既勝利啦

1376年黑太子愛德華過身 1377年愛德華三世死埋
黑太子愛德華個仔十歲既理查二世繼位
1381年查理五世死 查理六世繼位
2019-05-09 17:11:22
[多字有圖]膠登仔都睇得明既簡易西史入門第五集:蘭開夏VS約克郡王室打呲玫瑰戰爭[膠登原創]

首先我地返到上集百年戰爭既初期
英王愛德華三世生左五個仔 大仔黑太子愛德華 二仔克拉倫斯公爵安特衛普的里安內爾 五仔第一代告士打公爵胡士托的湯馬士
而最重要既係 三仔第一代蘭開斯特公爵岡特的約翰 四仔第一代約克公爵蘭利的艾德蒙

事緣當年黑太子愛德華早死 愛德華三世死後只好由大仔黑太子愛德華個仔理查二世繼位
但理查二世任內不得民心民變四起 第一代蘭開斯特公爵岡特的約翰 個仔亨利四世推翻理查二世自立

咁就問題黎啦 理查二世樣衰你推翻佢係佢抵死啊 但你憑咩坐王位先?
論血緣點都係搵 二仔克拉倫斯公爵安特衛普的里安內爾 既後人 第五代馬奇伯爵艾德蒙·莫蒂默 坐王位啊
對此亨利四世既回應係囚禁艾德蒙·莫蒂默
只要困住艾德蒙·莫蒂默等佢冇仔生咁就冇人挑戰到我既繼承權 亨利四世既算盤係咁打既
不過係監獄出面 艾德蒙·莫蒂默既家姐安娜·莫蒂默同左個男人結婚 第三代劍橋伯爵科尼斯堡的理查

但到而家在位既係亨利六世 當時係百年戰爭既未期 英國係法國只係得返幾個港口
而亨利六世佢亦唔似佢歷代既父輩 佢唔係個騎士反而似係個讀書人 而且性格仲有d"神經質"
對法國既戰爭事務都交由王儲 第二代索默賽特公爵艾德蒙·蒲福 去處理

1453年王室有喜 亨利六世同佢老婆安茹的瑪嘉烈生左個仔西敏的愛德華 就係呢年亨利六世真係痴左線啦
國王出事就需要搵個人做攝政去代佢管理國家 第三代劍橋伯爵科尼斯堡的理查 個仔 第三代約克公爵理查·金雀花 就係呢個人

金雀花朝族譜

理查·金雀花以母系血緣比亨利六世有更高繼承權 而且加埋係佢啊爸啊媽到繼承落黎既封地令佢成為英國最強大既貴族
攝政既地位佢當之無愧 甚至仲有D委屈添
一心要做國王又或至少要做個王儲既理查·金雀花 佢眼前最大既障礙係現任王儲 第二代索默賽特公爵艾德蒙·蒲福

當然艾德蒙·蒲福都唔係傻既 佢背後撐腰既仲有另一個權貴家族 珀西家族
為消除理查·金雀花對王位既威脅 佢地試圖阻止理查·金雀花成為攝政
不過珀西家族都有佢地既宿敵 內維爾家族 第五代索爾斯伯里伯爵理查·內維爾 為佢既家族利益 佢都好樂意卷入呢場王位鬥爭入面
最終因得到國會既多數支持理查·金雀花成為攝政並將艾德蒙·蒲福囚禁於倫敦塔內

1455年理查·金雀花攝政期將要任滿時 "國會"要求理查·金雀花可以取代亨利六世成為國王
理查·金雀花差少少就可以成為國王 就差個少少 不過大家睇篇文既長度就知 災難性既事件而家先開始

1455年亨利六世突然醒返 係佢老婆安茹的瑪嘉烈指點下佢完全明白呢一年內發生過既事
亨利六世放返艾德蒙·蒲福出黎取代理查·金雀花攝政職位
理查·金雀花一黨人知驚啦 佢知道如果國王有心要整佢既 佢過去呢一年內犯既都係叛國大罪
既然係咁 橫死掂死 盡地一煲 佢地返到各自既封地臨時臨急徵召左支幾千人既軍隊出黎攻向倫敦

安茹的瑪嘉烈

1455年5月22日倫敦北面既既聖亞班士城
由亨利六世同艾德蒙·蒲福帶領既軍隊遇上由 索爾斯伯里伯爵理查·內維爾 個仔 第十六代華里克伯爵理查·內維爾 加 理查·金雀花帶領既軍隊
艾德蒙·蒲福駐紮係聖亞班士城入面建造防禦工事希望用談判解決事件 但被華里克伯爵理查·內維爾發現缺口偷襲艾德蒙·蒲福既軍隊
艾德蒙·蒲福係衝突中死亡 亨利六世亦被活捉
亨利六世係索爾斯伯里伯爵理查·內維爾 華里克伯爵理查·內維爾 同理查·金雀花既挾持下返回倫敦
華里克伯爵理查·內維爾成為加來將軍負責對法國戰爭 理查·金雀花亦回復攝政官職

重奪政治地位既理查·金雀花佢又再次向王位進逼而且今次同佢撐腰既唔只係貴族
係百年戰爭後期因英國失去左勃根地呢個盟友兼生意伙伴令英國南部既經濟一落千丈
再加上由法國王室出生既王后安茹的瑪嘉烈所帶領既王室係英國南部愈黎愈不受歡迎
相反民間要求理查·金雀花繼位既呼聲就愈益高漲

對此王后安茹的瑪嘉烈就以劉慧卿既聲線回應:我唔理你地點搞我老公 總之邊個攞走我個仔既王位就唔得!!
就拍台走人將首都遷去蘭開斯特勢力範圍內既考文垂
倫敦你都唔要啊?咁我攞去囉 1460年華里克伯爵理查·內維爾用佢係加來帶黎既英軍進入倫敦
理查·金雀花以國王既儀仗召開國會大搖大擺既走向王座
只要你地嗌聲萬歲我就坐落去
全場鴉雀無聲 就連理查·金雀花既忠實支持者內維爾父子都拒絕表態
OK你地覺得呢個位我冇資格坐啊嘛 理查·金雀花攞左份族譜出黎 咁族譜你地識睇啦掛?我絕對比個白痴亨利六世更有資格坐呢個位
不過各貴族依然認為亨利六世繼續做國王比較適合 最後國會協調出調解法案出黎 通過亨利六世繼續為英國國王而理查·金雀花就做佢既王儲
雖然理查·金雀花做唔成國王 但作為攝政既佢依然可以以亨利六世既名義去管理國家
而佢同佢既繼承人亦得到王位既繼承權 只要亨利六世一死佢就可以即位 呢個結局可以接受

不過係考文垂既安茹的瑪嘉烈就唔得囉 佢知道呢個消息後立刻召集起一支軍隊
但佢冇錢出糧喎 佢就批准佢既軍隊沿途任意搶掠
就咁呢支山賊大軍就浩浩蕩蕩咁沖向倫敦啦

得知蘭開斯特既軍事行動理查·金雀花同索爾斯伯里伯爵理查·內維爾亦北上迎接
係韋克菲爾德理查·金雀花同索爾斯伯里伯爵理查·內維爾遇到多自己一倍既軍隊
理查·金雀花同索爾斯伯里伯爵理查·內維爾戰敗被殺 佢地既人頭被縣掛係約克城門上
係韋克菲爾德戰役後安茹的瑪嘉烈既繼續南下終於去到倫敦城外
但因為蘭開斯特軍沿途暴虐既行經倫敦拒絕開城
相反理查·金雀花死後佢個仔愛德華接替父親成為約克家族既首領
佢仲有華里克伯爵理查·內維爾就成功進入倫敦城

到而家蘭開斯特王室既聲譽已經衰到貼地啦
愛德華係倫敦市民簇擁之下加冕成為英王愛德華四世

愛德華四世

愛德華四世同華里克伯爵理查·內維爾既約克軍繼續向北進軍最後係陶頓遇上蘭開斯特軍
係陶頓戰役中三萬人既約克軍戰勝四萬人既蘭開斯特軍並做成雙方二萬人死亡
全英國人都嚇親啦 即使百年戰爭英國都未見過咁大規模既戰爭咁大規模既死亡
估唔到呢兩個家族為王位打起仗上黎仲狠過打外國人
戰後安茹的瑪嘉烈同個仔西敏的愛德華著草去法國 亨利六世比人掟入倫敦塔 蘭開斯特既勢力被徹底消滅
今次愛德華四世坐穩王位 可以分餅仔啦

首先我兩個細佬 理查做告士打公爵 喬治做克拉倫斯公爵
而我呢就同伍德維爾家族既伊麗莎白結婚啦
華里克伯爵理查·內維爾覺得唔對路啦 伍德維爾係蘭開斯特既人黎喎
華里克伯爵理查·內維爾就走去搵愛德華四世個細佬新任克拉倫斯公爵 第一代克拉倫斯公爵喬治·金雀花
問 你想唔想做國王? 想啊想啊
好我嫁我個女伊莎貝爾·內維爾比你 好耶
之後你跟我黎 去邊啊?
法國

第一代克拉倫斯公爵喬治·金雀花

華里克伯爵理查·內維爾就帶住喬治·金雀花兩夫婦去法國搵安茹的瑪嘉烈兩母子
ON99既喬治·金雀花就奇怪啦 你要捧我上王位點解要搵佢面母子既?如果而家返到去都係西敏的愛德華上王位姐
傻啦佢兩母子只係工具 到我地返去搞掂你老哥之後我地再夾手夾腳搞掂埋西敏的愛德華咁你咪有王位坐囉
又係喎咁醒既你 轉個頭喬治·金雀花見到街邊有間教堂搞婚禮喎 邊個結婚啊睇過? 安妮·內維爾西敏的愛德華聯婚!?
屌你啊!?線我!? 喬治·金雀花即刻走返英國同佢啊哥報串 不過已經太遲
華里克伯爵理查·內維爾同安茹的瑪嘉烈既軍隊已經攻入英國並恢復亨利六世既王位
而愛德華四世三兄弟就走難去法國.......隔離既勃根地

得法國支持既亨利六世復位 而我手頭上咁橋又有愛德華四世三兄弟係到 作為法國宿敵既勃根地 我仲有咩好做啊?
勃根地出兵出錢送愛德華四世三兄弟返英國爭王位啦
2019-05-09 17:11:32
1471年4月14日大霧 倫敦北部既巴內特 約克家族蘭開斯特家族兩軍相遇
約克同蘭開斯特兩軍各自佈陣 華里克伯爵理查·內維爾亦帶兵加入蘭開斯特軍
係大霧中理查·內維爾誤認蘭開斯特軍為敵人而放箭
做反啦!!理查·內維爾又做反啦!!受到攻擊既蘭開斯特軍即刻掉頭回攻理查·內維爾
當大霧散去愛德華四世見到既係內哄中一片混亂既蘭開斯特軍
機不可失全軍出擊 蘭開斯特軍戰敗 華里克伯爵理查·內維爾亦係戰鬥中身亡

再係5月4日蒂克斯伯里戰役蘭開斯特軍再敗 西敏的愛德華戰死 其後亨利六世亦被殺埋
為保護家庭奮鬥半生既師奶安茹的瑪嘉烈 乖仔戰死老公被殺而佢而家被約克家族囚禁係倫敦塔入面
三年後比佢表哥法王路易十一贖回 七年後係法國悲痛孤獨中過生

到而家蘭開斯特家族再冇人有資格繼承王位啦

1483年安穩坐左十幾年王位既愛德華四世 係佢臨死前囑託佢細佬告士打公爵理查 幫佢照顧得十三歲將要繼承王位既仔愛德華五世

哦 好啊

愛德華四世死後告士打公爵理查宣佈 愛德華四世係同伊莉莎白·伍德維爾結婚前曾經同另一個女人正式結婚
所以愛德華五世同佢細佬舒茲伯利的理查為愛德華四世既私生子 佢地冇法律地位 順手將佢地又掟埋入倫敦塔
國會通過王權法案任命告士打公爵理查為英國國王理查三世 搞掂

塔中王子 愛德華五世舒茲伯利的理查

理查三世

大家之前見過一個女人為左佢個仔可以幾兇猛 而家 有個女人 冇左兩個仔
愛德華四世個老婆 愛德華五世同舒茲伯利的理查既生母 伊麗莎白·伍德維爾

理查三世 你以為蘭開斯特既人死晒你個王位就坐得好穩 但有資格繼承王位既人唔只你兩家族
伊麗莎白·伍德維爾走左去搵一個女人 瑪嘉烈·蒲福

瑪嘉烈·蒲福 第一代蘭開斯特公爵岡特的約翰個孫女 第二代索默賽特公爵艾德蒙·蒲福個妹
當然就憑呢個女人佢係坐唔上王位既 不過佢同佢第二任老公里士滿伯爵艾德蒙·都鐸生左個仔 亨利·都鐸
而艾德蒙·都鐸就係 亨利六世啊媽瓦盧瓦的凱撒琳同歐文·都鐸既私生子
如果以蘭開斯特家族既血統黎講亨利·都鐸係非常有資格繼承王位
而理查三世仲未有仔生 只要佢一死約克家族冇人可以繼承王位

唔得仲未夠 瑪嘉烈·蒲福聽完伊麗莎白·伍德維爾既計劃未予認同
如果亨利·都鐸可以同愛德華四世個女結婚就完美啦
兩個師奶相視而笑 呢個時代兩個最兇惡既啊媽就咁結成盟友啦

1485年8月22日亨利·都鐸召集蘭開斯特家族既殘部同理查三世決戰於博斯沃思平原
亨利·都鐸憑你條野仔個少少血緣想挑戰我既王位?正好你自己送上門 打埋呢場我地約克家族穩坐天下
充滿自信既理查三世以兩倍於蘭開斯特軍既兵力參戰 戰爭既結果毫無縣念
戰鬥一開始事情就發生啦
瑪嘉烈·蒲福既第四任老公第一代打比伯爵湯瑪斯·史丹利就帶住佢細佬威廉·史丹利投奔亨利·都鐸
之後一直係蘭開斯特家族忠實支持者既珀西家族既諾森伯蘭伯爵亨利·珀西亦叛投亨利·都鐸

戰情瞬間逆轉 理查三世係曾經既盟友圍攻下不斷大嗌 叛徒!!叛徒!!叛徒!!叛徒!!
一直奮戰至死 可比項羽既悲壯

唔知大家仲記唔記得有單新聞
上年英國有人係個停車場下面掘到個英王既骸骨
個條屍就係英國最後一個戰死沙場既國王 死後被遊街示眾最後草草下葬既理查三世

戰後亨利·都鐸被加冕為英國國王亨利七世仲迎娶埋愛德華四世個女約克的伊麗莎白
約克家族同蘭開斯特家族既血統都統一係都鐸家族之下

亨利七世

後來亨利七世同約克的伊麗莎白生左兩個仔 大仔亞瑟細仔亨利
亨利七世幫佢個大仔亞瑟娶左個老婆 西班牙公主阿拉岡的凱撒琳
亨利:喂老豆我又要屌西
亨利七世:你啊哥第日要做國王更係要搵注好人家 你老婆第日再幫你慢慢搵
亨利:哦~~

下集收復失地運動
2019-05-09 17:12:32
1494年8月查理八世帶住三萬幾人爬過阿爾卑斯山
教宗亞歷山大六世知道玩大左啦 如果法國佔領義大利將會係對教廷更大威脅
呢個時候那不勒斯國王係阿方索五世個仔阿方索二世 亞歷山大六世承認阿方索二世那不勒斯王位以團結義大利諸國

阿方索二世知道法軍壓境就即刻派佢細佬費代里戈係亞拉岡帶艦隊去封鎖熱那亞 而陸上就由佛羅倫斯共和國防守
只要成功拖到冬天 法軍就不得不返鄉下 好完美既計劃

結果就係 係費代里戈既艦隊到達前 法國海軍已經進佔熱那亞
而佛羅倫斯共和國因為法國既貿易禁運做成社會動盪
當法軍去到佛羅倫斯共和國門口既時候美第奇家族已經係跪住出黎投降

法軍長驅直入踩過埋教皇國殺到去那不勒斯門口
乖仔!!我送個王位比你 而我就返亞拉岡養老啦 拜拜你條尾~
阿方索二世將王位傳比個仔費蘭天奴
屌你你頂唔順我就搞得掂架啦!?
費蘭天奴又走難去西西里島
就咁查理八世不費吹灰之力就征服左成個義大利啦

法軍進入佛羅倫斯

但後黎當查理八世一帶兵返鄉下 那不勒斯既人就做反啦
呢個對流亡西西里島既費蘭天奴黎講係個好機會
唔只 係後面仲有兩個人鴿實呢到
神聖羅馬帝國皇帝馬克西米連一世 西班牙國王斐迪南二世

馬克西米連一世嫁女瑪嘉烈比斐迪南二世個仔若昂
斐迪南二世又嫁女胡安娜比馬克西米連一世個仔腓力
兩個國家親上加親係1495年聯合米蘭公國 威尼斯共和國同教皇國發起威尼斯同盟抵抗法國既入侵
最後係威尼斯同盟圍攻下法軍節節敗退 一路退到去米蘭公國門口
法國既奧爾良公爵路易因為同米蘭公國既前王室維斯康蒂家族有血緣關係
所以路過既時候順手塞鑊米蘭公國 路易成功攻佔米蘭門口既諾瓦拉 但係又比米蘭大軍重重包圍
大家都想息事寧人 盧多維科·斯福爾扎承諾法國下次出兵會提供支援以換取法軍退兵
1497年法國完全退出義大利而查理八世亦係1498年過身 奧爾良公爵路易繼位為路易十二世

米蘭同諾瓦拉位置

路易十二世

上手法國國王查理八世冇仔生 得個女跛既讓娜
雖然冇腳比你玩 但有樣野搭救 佢係國王既獨生女
姐係話邊個男人娶到佢邊個就係下任國王 齋係呢點所有男人都狗沖啦
但最後勝利者只會得一個 奧爾良公爵路易

奧爾良公爵路易成為法國國王路易十二世之後佢就唔高興啦
喂我娶條女返去係貪個王位姐 我腳膠黎架嘛腦魔黎架嘛離婚得唔得啊
得 搵教宗啦 係當時只有教宗有權批准離婚

時任教宗亞歷山大六世佢有個仔 切薩雷·博吉亞
佢當時係西班牙做緊主教
路易十二世就走去搵亞歷山大六世啦
亞歷山大你屋企做呢行搵得幾多姐?不如咁呢 我比個公爵你個仔做呢
就咁切薩雷·博吉亞就成為法國既瓦倫蒂諾公爵而路易十二世亦成功離婚

亞歷山大六世 切薩雷·博吉亞

1498年切薩雷·博吉亞帶住以瑞士傭兵為主既軍隊前往義大利去回收路易十二世認為應該屬於佢既爵位
第一個開刀既 就係阿爾卑斯山門口既米蘭公國
當切薩雷·博吉亞大軍一爬過阿爾卑斯山 米蘭公國既軍隊紛紛投降
盧多維科·斯福爾扎走難去神聖羅馬帝國請求出兵
但當時既神聖羅馬帝國陷入士瓦本戰爭中而且仲係打幾多輸幾多
已經比瑞士聯邦逼到上談判桌

神聖羅馬帝國輸得咁徹底反而引起法國憂慮
如果神聖羅馬帝國同瑞士聯邦回復和平 咁佢咪會調頭對付我?
所以係會談上法國不斷煽動瑞士聯邦繼續戰爭
呢個行為辣著左瑞士人
佢地黎手就送左一萬人比盧多維科·斯福爾扎

但我懷疑瑞士人完全係整鳩佢

當盧多維科·斯福爾扎帶住一萬人瑞士傭兵返到米蘭既時候
遇上同樣由瑞士傭兵為主既切薩雷·博吉亞
兩軍相遇 奇蹟發生啦

兩邊既瑞士傭兵唔願意同胞相殘 佢地齊齊橋住手唱住飄零燕就返鄉下啦
戰場上剩係得返O晒咀既盧多維科·斯福爾扎同切薩雷·博吉亞

最後盧多維科·斯福爾扎都係被法軍俘虜
打完米蘭公國下一個開刀既就係那不勒斯王國
打埋那不勒斯王國法國就可以連埋教廷擁有成個義大利
到時法國就會成為全歐洲最強大最有權勢既國家
東面既鄂圖曼西面既法國 我地神聖羅馬帝國遲早會死係佢地兩其中一個手上 咁都唔明咩?
馬克西米連一世係帝國議會慷慨陳詞說服各諸侯支持佢出兵義大利

場仗打係打我地既人贏係贏你既權力 打黎為咩?要黎對付我地?咁把炮你咪自己去打囉
呢班人冇撚得救 馬克西米連一世要諗其他方法
[img]http://upload.wikimedia.org/wikipedia/commons/thumb/c/ce/Albrecht_D%C3%BCrer_084b.jpg/489px-Albrecht_D%C3%BCrer_084b.jpg
[/img]馬克西米連一世

希望大家冇忘記那不勒斯國王係亞拉岡到黎 而現任那不勒斯國王費蘭天奴係西班牙國王斐迪南二世表親
至少路易十二世冇忘記呢點 所以要郁那不勒斯王國之前首先要擺平西班牙王國

法國同西班牙兩國秘密簽訂格拉納達條約平分那不勒斯王國
義大利呢對長靴 西班牙得到腳板同鞋跟 剩底就係法國既
但到1504年兩國因為分贓唔均又打起上黎
擁有地中海制海權既西班牙將法國驅逐出義大利
就咁經過兩代法王既努力義大利成功統一係西班牙王國之下啦

法國既失敗等於神聖羅馬帝國既機會
當時時布列塔尼公爵安妮先後嫁比法王查理八世同路易十二世
而佢又同路易十二世生左個女法蘭西的克勞迪
布列塔尼公爵安妮又冇其他兄弟 如果法蘭西的克勞迪都嫁埋比法國王室既話布列塔尼公國就絕對會被法國吞併
所以布列塔尼公爵安妮全歐洲搵人娶自己個女法蘭西的克勞迪
神聖羅馬帝國皇帝馬克西米連一世就搵上門啦
我岩岩抱孫 叫卡爾 有冇興趣?
路易十二世聽到即刻拍台
我知你想點!!唔好搞我個女同布列塔尼公國!!要搞就搞義大利好啦!!

就咁法國同神聖羅馬帝國簽訂布盧瓦條約
法蘭西的克勞迪嫁比路易十二堂侄昂古萊姆的弗朗索瓦
而神聖羅馬帝國就得到米蘭同熱那亞

呢個時候既義大利中部 亞歷山大六個仔切薩雷·博吉亞佢靠住佢係法國帶入黎既軍隊成功為博吉亞家族係當地建立勢力
佢地甚至試圖將整個羅馬城都收歸己有
但係1503年8月18日 教宗亞歷山大六世過身 法國同西班牙推儒略二世做教宗

教宗儒略二世

你可以係教廷門口玩咁大都因為有法國佬撐你 而法國佬撐你都不過因為你有個教宗老豆 家陣你老豆死左 而家都輪到你啦
首先法國剝奪切薩雷·博吉亞既爵位同封地
然後儒略二世逮捕切薩雷·博吉亞重新建立教皇國係義大利中部既控制

教宗第二個要開刀既就係呢十幾年戰爭中都堅守中立而得益既威尼斯共和國
1508年儒略二世慫恿馬克西米連一世入侵威尼斯共和國
但結果就係等左呢個機會好耐既馬克西米連一世 佢連阿爾卑斯山都爬唔過就比威尼斯既軍隊打敗左啦

屌冇撚用 小小一個威尼斯逼我黎真 兄弟們同我上!!
儒略二世聯合法國 神聖羅馬帝國 西班牙 費拉拉公國成立康布雷同盟對付威尼斯
係當時歐洲三大國圍毆下1509年法國就攻入威尼斯 威尼斯共和國宣佈投降
威尼斯共和國開始同教廷和談啦
但係出面
法國係義大利既軍事行動並冇因此而結束......

下集義大利戰爭(下)
2019-05-09 17:13:40
膠登仔都睇得明既簡易西史入門第七集:義大利戰爭(下)

上集講到
教宗儒略二世發起康布雷同盟搞掂左威尼斯 大家開始談判
但係法國係意大利既軍事擴張並未就此結束 更攞命既係法國前面仲有隻狐假虎威既費拉拉公國
教宗最初叫瑞士幫拖 結果比法國佬打皺埋
唔理啦回頭草都照食啦
教皇國今次同威尼斯共和國結盟對付法國
都頂唔順 法軍仲一路打到去拉文納門口

儒略二世再成立個新既聯盟叫神聖同盟 得到西班牙同神聖羅馬帝國既響應
而且仲有個好耐冇見既朋友 英國

係百年戰爭之後英國係歐洲大陸只係得返加來一個港口
眼見佢最大既敵人法國將全國軍隊倒晒落義大利 如果想重返歐陸政治舞台既話而家會係絕好機會

為應對英國既入侵 法國盡地一鋪進攻教皇國最後領土拉文納
法軍既進攻成功吸引神聖同盟既主力集中係拉文納
係拉文納之戰中法軍以優秀既炮兵戰術同騎兵配合重創神聖同盟
不過戰後法軍亦轉入守勢 揼低佢既盟友費拉拉公國自己返返倫巴底地區

OK趕走左法國佬我地可以開始分豬肉啦
首先儒略二世出錢請左支瑞士傭兵帶住斯福爾扎家族後人馬克西米連·斯福爾扎返去繼承返米蘭公國
然後係西班牙既支持下朱利亞諾·德·美第奇返返去做佛羅倫斯僭主
而費拉拉公國呢就歸教廷啦
斐迪南二世:下你ON9架?我打場仗要黎養肥你?如果你想要費拉拉公國就交米蘭公國出黎
儒略二世:米蘭公國我老死你咪撚搞佢 威尼斯共和國就隨便你
馬克西米連一世:爭咩啊爭 米蘭公國同威尼斯共和國本來就係我地頭黎既

係呢場會議上面威尼斯共和國愈聽愈心驚 明明自己係戰勝國之一 原來自己先係神聖同盟入面最大個舊肥豬肉
唔掂啦我都要搵返個盟友撐下場先得啦 1513年威尼斯共和國同法國結盟 再次同神聖同盟開戰

一開波法國威尼斯聯軍左右夾攻米蘭公國但被瑞士既援軍打敗
而係大後方既法國本土 英軍從加來出兵攻到入圖爾奈
法國連自己屋企都守唔住 西班牙既艦隊亦游到去威尼斯門口
法國威尼斯聯盟連場似樣既仗都未打過就玩完啦
神聖同盟又贏一仗
就當大家都係咁諗既時候 首先英國私自同法國講和
然後1514年教宗儒略二世過身 繼位既係愛好和平既利奧十世 本名喬萬尼·德·美第奇
冇耐1515年路易十二世都死埋 繼位既係佢既堂侄兼女婿昂古萊姆的弗朗索瓦 是為弗朗索瓦一世
但弗朗索瓦一世冇因為自己新人就放軟手腳 相反佢一上位就準備左支四萬人既大軍御駕親征收復米蘭

弗朗索瓦一世

不過佢既打法主流好唔同 佢冇行大路入義大利 因為佢知道主要既路口一定有神聖同盟重兵埋伏
佢做左樣只有漢尼拔先夠膽做得出既野 拖住廿幾碌炮爬阿爾卑斯山

當神聖同盟發現法軍已經穿越阿爾卑斯山既時候 佢地已經去到米蘭門口既馬里尼亞諾
米蘭公爵馬克西米連·斯福爾扎帶住二萬幾瑞士傭兵係馬里尼亞諾對戰法國四萬大軍
雖然數字上睇起黎好鉛殊 但要知道瑞士傭兵係當時歐洲係數一數二既兵種黎 所以一般黎講係有得打既 一般黎講
弗朗索瓦一世既法軍唔一般 法軍將火炮以長縱深放係兩翼 而瑞士傭兵用傳統行動援慢既方陣戰術
如果有玩世紀帝國3既就可以想像到個畫面 成排鷹炮掃射成堆既瑞士傭兵會係咩結果
米蘭損失大半 而法軍只係死傷幾千
最後就連弗朗索瓦一世都唔忍心睇落去下令炮兵停火先結束到呢場屠殺

馬里尼亞諾戰役中既弗朗索瓦一世

係馬里尼亞諾戰役後係歐洲再冇人有興趣同法國再打落去啦
戰後瑞士向法國承諾保持永久中立 歷史向我地証明 佢講得出做得到
威尼斯共和國得到倫巴第地區
而法國將佢忠心既盟友費拉拉公國送比教皇國 換取教廷接受法國吞併烏爾比諾公國
弗朗索瓦一世就同卡洛斯一世平分義大利 法國得到米蘭 西班牙得到那不勒斯 大團圓結局

以為就咁就完?我講過啦......

最後大佬你都未打啊!!

1519年神聖羅馬帝國皇帝馬克西米連一世駕崩
要知道神聖羅馬帝國皇帝唔係世襲 而係要選出黎
係中世紀歐洲封建制度 每個貴族佢地都有佢地自己既封地自己既軍隊
上面掟落黎既法律唔係奉旨要聽既 同樣搵邊個做佢地既皇帝一樣要過佢地個關
慢慢佢地又覺得成班貴族聚埋一齊選皇帝太麻煩 然後佢地發展出一套選侯制度
就係由神聖羅馬帝國入面七個勢力最大既諸侯選舉皇帝
呢個仲小圈子過特首選舉既小圈子選舉一般係前任皇帝死前已經擺平晒七個選侯
但今年唔同 有兩個候選人 馬克西米連一世個孫西班牙國王卡洛斯一世 同法國國王弗朗索瓦一世

最後個七個選侯投左咩票冇人知 反正最後贏既係卡洛斯一世加冕為神聖羅馬帝國皇帝卡爾五世
小圈子選舉可恥!!小圈子選舉可恥!!可以想像當年落選既弗朗索瓦一世點樣走住咁屌
返到法國既弗朗索瓦一世決心要整鳩呢個十九歲就當選神聖羅馬帝國皇帝既細路二世祖

少年卡爾五世

1521年弗朗索瓦一世兵分三路入侵哈布斯堡帝國 一線進攻尼德蘭另一線攻納瓦拉一線攻義大利
係西班牙戰線法軍攻入富恩特拉比亞 靠比達索阿河既天險成功抵擋哈布斯堡帝國既還擊
但係東線既進攻就冇咁好彩啦 哈布斯堡帝國既反擊將法軍一路推返入圖爾奈
而最正點既絕對係義大利戰線 係米蘭既法國進攻帕維亞 哈布斯堡既軍隊從那不勒斯北上支援 兩軍係比克卡相遇
法軍有萬五瑞士傭兵加萬五義大利人 哈布斯堡軍由西班牙人加其他傭兵組成共萬五人
法軍雖然有數量上既優勢 不過瑞士人又發功啦

喂你份糧夠請我做埋今日咋喎 你唔打既我返屋企架啦
得得得比多幾日就齊人架啦拍爛檔等多幾日啦唔該
屌對面都係得萬五人之嘛 我一個都夠做啦 ...等陣...睇清楚有冇大炮先 冇 兄弟們沖啊

哈布斯堡冇火炮 但佢地有火槍
以往火槍兵為求對敵人做成最大打擊 佢地會將所有火槍兵一次過一字排開一齊射擊
射完之後火槍兵既工作就完成 剩低既就由長槍兵去清場
不過今次西班牙將火槍兵排成四排 第一排射完返後面上彈 第二排上前依次射擊
瑞士傭兵係西班牙軍密集火力之下進攻時死左一半 逃走既時候又死埋剩低個半
當法軍齊集既時候 佢地見到既得返毫髮無損既哈布斯堡軍同遍地瑞士傭兵既屍骸
嗯冇得打啦 返屋企啦

西班牙大方陣

比克卡戰役後法軍退出義大利
佛朗西斯科·斯福爾扎二世又比神聖羅馬帝國的返返黎做米蘭公爵

眼見歐陸戰事再起 有條仆街仔又要出手啦
本住"凡法國支持我必反對 凡法國仆街我必踩兩腳"既原則
英國同哈布斯堡簽訂溫莎條約承諾每邊至少派四萬人共同入侵法國
為表誠意英王亨利八世嫁埋自己個大女瑪麗比卡爾五世個大仔腓力

雖然四面受敵 但又冇得八面威風 而家既法國已經係衰到貼地 佢地連打仗既錢都冇
係弗朗索瓦一世煩緊唔知點收尾既時候 收到個唔知係好定壞既消息
波旁公爵蘇珊·德·波旁死左 佢生左兩個仔 兩個都早死
而家佢個位由佢老公夏爾三世·德·波旁繼承
咪住...弗朗索瓦一世心諗

我啊媽薩伏依的露易斯咪波旁公爵夏爾一世·德·波旁既外孫女黎既?
論血緣點都係佢近D啊 點會搵個嫁入去既男人去繼承呢?
呢鋪掂啦 弗朗索瓦一世沒收夏爾三世·德·波旁既封地送比佢啊媽薩伏依的露易斯 然後用係上面搜括返黎既錢繼續戰爭
但呢筆錢對場仗只係杯水車薪 而更糟糕既係因為咁夏爾三世·德·波旁已經搭上左卡爾五世同亨利八世
OK唔好比佢係呢D時候做反 召佢黎見我我要開解下佢 咩話!?走左!?走左去邊啊!?
神聖羅馬帝國......

夏爾三世·德·波旁
2019-05-09 17:13:52
呢個時候既弗朗索瓦一世係 四面受敵前面仲要再加多句眾叛親離
英軍洗劫左整個法國北部 係巴黎門口兜左個圈之後施施然返返加來
而神聖羅馬帝國既軍隊就沿住法國東部行入義大利同西班牙軍會合

1523年已經到左垂死狀態既弗朗索瓦一世再派多二萬人入義大利
12月當法軍去到米蘭既時候 佢地認為憑自己既兵力唔足以係短時間入攻陷米蘭城
所以法軍轉移去塞西亞河到紮營過冬
係塞西亞河 法軍再次見到佢地既老死 夏爾三世·德·波旁
夏爾三世·德·波旁帶住神聖羅馬帝國既軍隊 再次用火槍戰術重挫法軍
係塞西亞戰役之後哈布斯堡軍直入普羅旺斯

比克卡 塞西亞 帕維亞位置圖

1524年趁哈布斯堡軍拖死係普羅旺斯 弗朗索瓦一世親自帶住最後一批法軍進攻義大利
四萬法軍瞬間攻陷米蘭 佛羅倫斯共和國威尼斯共和國呢兩條牆頭草即刻跟住倒向法國
戰況逆轉 而家成個教皇國以北都係法國既地頭
10月弗朗索瓦一世用三萬人進攻神聖羅馬帝國係義大利北部最後據點 只有九千人守城既帕維亞

到11月尾帕維亞既城牆已經比法軍既大炮炸穿左幾個窿
但眼見天雨潮濕火藥又剩唔多 弗朗索瓦一世決定圍困入面既守軍靜待勝利既來臨

係弗朗索瓦一世見唔到既地方 神聖羅馬帝國開始行動啦
夏爾三世·德·波旁從普羅旺斯趕返黎同係洛迪既神聖羅馬帝國軍會合共兩萬幾人
佢地首先切斷帕維亞城外法軍同米蘭之間既通訊路線
然後再對包圍係帕維亞城既外法軍做成一個回字形既反包圍

帕維亞戰役法軍同神聖羅馬帝國軍進軍路線

戰況逆轉再逆轉 弗朗索瓦一世由攻方變成守方
弗朗索瓦一世而家唯一既生存機會就係盡快攻入帕維亞城 利用帕維亞城抵禦神聖羅馬帝國軍既進攻

咁簡單既道理你諗得出 夏爾三世·德·波旁都諗得到
1524年2月23日夜晚係大部分法軍都訓緊覺既時候 夏爾三世·德·波旁挖穿帕維亞城牆既一角同帕維亞城內既守軍回合
城牆內外既神聖羅馬帝國軍互相交換作戰計畫 補充人員同裝備準備黎緊既決戰
2月24日既凌晨 包圍係帕維亞城既外法軍係睡夢中突然遭到神聖羅馬帝國軍既內外夾攻
突然被嘈醒既法軍無法組織有效既抵抗全軍覆沒
弗朗索瓦一世亦係戰鬥中被俘虜
戰後被俘既弗朗索瓦一世被夏爾三世·德·波旁帶去華倫西亞見卡爾五世

帕維亞戰役

城下之盟大家都知咩意思 但你衰極你都仲係自己座城下面
而家弗朗索瓦一世係卡爾五世座城入面

弗朗索瓦一世當日係帕維亞戰役逃走既時候跌傷左隻腳到而家病情愈黎愈嚴重
所以"溫柔""善良"既卡爾五世日日走去"探病"
身體好返d未啊?洗唔洗幫你搵醫生啊?想唔想返鄉下啊?
簽左條條約佢我咪比你走囉 我剩係想要個勃根地同普羅旺斯姐
然後你放棄埋義大利既領土要求同埋比返波旁公國比夏爾三世·德·波旁
咁我咪放你走囉
仆你個街咁既條款不如殺左我!!有種你鏟平成個法國唔洗係到問我攞

弗朗索瓦一世同卡爾五世

需然講得咁口響1526年1月14日受唔住折磨既弗朗索瓦一世終於簽署馬德里條約
接受左上面個堆要求之外再加兩條
弗朗索瓦一世迎娶卡爾五世個家姐奧地利的埃利諾而佢兩個仔弗朗索瓦同亨利要擺係西班牙到做人質
之後終於可以返屋企啦

法國係義大利打左三十幾年一無所獲 仲簽埋d咁既條約 真係同亡國冇分別啦
返到法國既弗朗索瓦一世得到教宗克萊孟七世既支持拒絕承認馬德里條約
然後教廷再聯合埋米蘭公國 佛羅倫斯共和國 威尼斯共和國 成立干邑同盟
更難得既係因為睇唔過眼哈布斯堡咁強大今次連英國佬都企埋法國個邊

因為弗朗索瓦一世拒絕履行馬德里條約 所以夏爾三世·德·波旁又返返去神聖羅馬帝國到打工啦
然後又因為干邑同盟既入侵 夏爾三世·德·波旁就比人派左去米蘭到打仗啦
跟住干邑同盟班廢柴加埋都唔夠夏爾三世·德·波旁一個抽
但最後 打贏夏爾三世·德·波旁既唔係軍隊
係錢

因為打到半路冇錢出糧支軍隊嘈話要返屋企
場仗都未打完返咩屋企姐!?你地想要錢之嘛 羅馬大把錢 我地去羅馬出糧!!
好野去羅馬出糧!!
夏爾三世·德·波旁就帶住呢二萬幾隻山賊進攻羅馬啦
1527年5月6日夏爾三世·德·波旁攻陷羅馬城 而佢自己亦係戰鬥中死亡
呢二萬幾隻山賊攻入羅馬城後大肆洗劫 當然連教廷都唔會放過
係聖伯多祿大殿上只有百幾個既瑞士傭兵決死抵抗神聖羅馬帝國軍隊既進攻成功掩護教宗逃走
戰後瑞士傭兵成為教宗御用衛隊直至今日
到6月5日教宗克萊孟七世出左一大筆錢終於請走呢班瘟神

羅馬之劫

瑞士衛隊

之後干邑同盟嚐試過進攻那不勒斯同佛羅倫斯但都好快就比神聖羅馬帝國趕走左
到最後弗朗索瓦一世只好面懵懵咁走去搵卡爾五世
我知衰啦 不如咁啦 我地改改條馬德里條約 我同你簽左佢啊

佛羅倫斯圍城

1529年法國同哈布斯堡帝國簽訂康布來條約
哈布斯堡得到熱那亞共和國 米蘭公國 那不勒斯王國
法國放棄法蘭德斯 阿圖瓦 圖爾奈
弗朗索瓦一世用二百萬埃居買返佢兩個仔亨利和弗朗索瓦返去

雖然義大利戰爭冇因為咁而正式結束
不過四十年失敗既軍事行動 加埋呢條條約
法國都一段時間唔敢再黎 卡爾五世終於可以專注返自己最關心既議題

下集宗教改革篇第一集:中世紀結束到胡斯戰爭
2019-05-09 17:14:42
[多字有圖]膠登仔都睇得明既簡易西史入門第九集:宗教改革篇第一集:中世紀結束到胡斯戰爭[膠登原創]
係我同大家講咩係宗教改革之前 首先我想同大家講下宗教改革之前究竟發生過咩事

一切返到羅馬帝國 係公元十幾年 有個自稱自己老母係處女既木匠兼預言家兼魔術師兼上帝個仔兼神棍既人
佢發明左個宗教吸引左一大班信徒 當時呢個宗教可以話係得三個重點
世上只有一個神 信既上天堂 唔信既落地獄

但當時既羅馬信奉多神教 每個人都可以選擇拜自己中意既神
如果你搵唔到自己中意既神你甚至可以自己做個神出黎拜 點解你既神就係唔可以同其他神一齊平等相處呢?
唔得!!世上只有一個神 我上天堂 你落地獄!!
呢個邪教冇撚得救啦全部攞晒去喂獅子啦

然後唔知點解呢個宗教既教徒愈黎愈多 到最後連皇帝身邊既人都係教徒
皇帝都開始諗:如果將呢個神變成呢個帝國唯一既神都唔錯喎
就咁313年君士坦丁皇帝發佈米蘭敕令停止對呢個宗教既壓迫

係米蘭敕令之前呢個宗教只可以以地下教會既形式運作
一班教徒搵個冇人見到既地方聚集 各自去讚美佢自己心中既神
慢慢呢個神同佢既神話就出現左好多種唔同既版本

係米蘭敕令呢個宗教合法化之後 呢個宗教既領袖發現佢地個宗教既版本之多已經唔可以再稱之為"一個宗教"
呢個宗教既領袖發起大公會議召集各地既教士討論咩主張係真既咩主張係假既
係大公會議之後呢個宗教唔再係當年個個"自稱自己老母係處女既木匠兼預言家兼魔術師兼上帝個仔兼神棍既人"既宗教
呢個宗教只會得返一個型式 呢個宗教成為宗教領袖一個人既宗教 呢個宗教係呢個時候開始變成天主教
但比起天主教 我係呢個宗教改革篇入面 我會想用個更準確表達原文既譯名:普世大公教

第一次尼西亞大公會議

到左中世紀呢班耶撚又發功啦
最初只係為左攞返聖城耶路撒冷 佢地發起十字軍去打救班異教徒
但當呢班鄉下佬去到東方既富庶地區 佢地既諗法唔同晒啦
係個到有絲綢做既衫 香料做既料理 仲有一切係佢地鄉下唔會見到既享受
來生既天國已經唔再係佢地既生存目的 佢地要係今生製造天堂

係呢班鄉下佬源源不絕咁湧入東方既時候 係歐洲又有其他事發生緊啦

要知道係中世紀從歐洲行去東方絕對唔係快捷容易既事
如果趕時間既話最快既方法就係搭船 有河行河有海行海
當然呢d船唔係免費既最初可能只係幾個麵包一程 後來如果你地冇返一千幾百人佢地都懶得載你一程

人口快速流動既結果就係 係交通方便既地方做成城市既出現
係城市入面出現左各種各樣既商人買各種各樣既商品去服務前往東方既旅客
當呢班封建領主帶住佢既騎士同農奴去東方朝聖時候 佢地行既每一步都要比錢佢地賺
為支付封建領主前往東方途中既使費 當然佢地冇可能抬住一大堆金由西方抬去東方
所以佢地會入錢落銀行 銀行就會發張匯票比佢地 等佢地去到東方既時候再攞張匯票換返黃金
而兩地既銀行就會用黃金買賣返當地既貨品黎賺取差價
其中最成功既一個銀行家係佛羅倫斯既美第奇家族
到今日美第奇家族死晒佢地間美第奇銀行都仲係到

後黎城市發展慢慢累積左財富 佢地開始會請顧傭兵去保護自己既城市發展自己既勢力
等到呢班封建領主從東方兩手空空返黎既時候 呢d城市已經升lv做可以獨立存在既城邦啦
當然呢班封建領主唔會憤氣啦 當佢地試圖用武力搶走城邦既一切既時候
佢地發現城邦既城牆之高 傭兵軍勢之盛 仲有自己必須依賴佢地進口既東方產品 就連自己都必須向佢地屈服
神聖羅馬帝國既諸侯 義大利既城邦 就係咁掘起架啦

但只係城市既掘起唔足以為歐洲帶黎新時代 佢地仲需要一d陣痛
黑死病

黑死病既傳播

1347年黑死病係克里米亞半島開始爆發
到十五世紀歐洲既人口只係得返一半
鄉下耕田要人 城市做野又要人 而而家既歐洲最缺既野就係人
為返返黑死病前既生活水準 歐洲社會最渴求既係節省人力提高生產力既工具
佢地社會唔再追求享樂同消費而改為追求知識同技術
再等多百幾年歐洲既人口恢復返之後
歐洲人佢地開始有多餘既人口 多餘既財富 多餘既智識 去做一D當時全世界都冇人做過既野
佢地既光學同解剖學帶黎更精緻既油畫 力學令佢地起到更宏偉既建築
而係當時呢方面最大既投資者莫過於教廷
除左因為教會上層既腐敗 佢地仲要攞呢D野黎維持信仰
要知道古時聖經只可以用拉丁文書寫 係當時除左教士係冇人識拉丁文
而事實上因為教會既腐敗令到當時即使係教士都唔識拉丁文
對於信徒既疑問同告解教士全部都係隨口UP回應
為左要令呢班成世剩係食雜麥麵包既農奴對佢地信仰有更大既信心 要佢地耐唔耐黎教堂做彌撒時感受到天堂同上帝
教會開始追求愈黎愈華麗既裝潢同儀式 亦因此令教會變得更加腐敗既惡性循環
今集故事就咁就開始啦

1303年法王腓力四世攻入羅馬殺死教宗博義八世 繼位既係個短命既教宗本篤十一世
1305年法王腓力四世立自己既親信波爾多大主教為教宗克萊孟五世
然後克萊孟五世索性將教廷搬埋去法國既阿維農
就咁教廷就成為法國國王"保護"下既傀儡
到左1377年時任教宗額我略十一世終於將教廷搬返返羅馬
但爭議冇就此結束反而令件事變得更麻煩
額我略十一世將教廷搬返返羅馬第二年佢就死左啦
由法國人為主既樞機團選舉出一個法國人克萊孟七世做教宗
羅馬既主教不滿佢地 又自己選出另一個教宗烏爾班六世然後趕左條法國佬返法國
就係咁西方教會大分裂就開始左啦

阿維農教宗宮

而家我想介紹個朋友比大家識 佢叫威克里夫
佢好犀利架1372年牛津大學畢業 不過讀神學同哲學
係咪睇死佢呢行搵唔到食呢?都算係架 佢而家做緊神父
英王愛德華三世御用個隻

威克里夫一入行就已經睇教會既風氣唔順眼
教宗娶廿9幾個老婆生廿9幾個仔 教士攞教堂黎嫖賭飲吹
你班人仲算係耶撚黎既!?就算異教徒都冇你地咁樣衰
耶穌基督拯救世人既教誨你地早就拋諸腦後
你地班人只係將世人當成食物 你地無疑絕對會落地獄
但一切既罪魁禍首係教宗
上帝既話語早就係聖經入面講清楚
每個人都應靠自己通過聖經去接觸上帝
全知全能既上帝唔需要任何人去代佢去講話
而唔係比教宗呢個敵基督為左佢自己既私慾去扭曲我地既信仰
為此我地唔需要複雜既禮儀 我地只需要用自己語言寫既聖經
所以我地既教會唔應該屬於任何人 我地既教會係屬於我地教會入面每一個人!!

威克里夫

威克里夫既主張震驚天主教世界
教宗將佢打為異端 英王被逼疏離佢
但有幸得到全英國人民既保護免受教會力量既迫害
威克里夫失去工作之後返到鄉下開始翻譯英文聖經
1382年翻譯完成 1384年中風過生

死後教廷禁止落葬並將佢既骨灰倒落大海
最後威克里夫既主張就隨住佢既骨灰沿住大海散播到全世界

而佢其中一粒骨灰就飄左入波希米亞既莫爾道河入面
有條友唔識死不左啖河水飲 威克里夫既骨灰就好似白粉咁令佢上左癮啦
今次既受害者叫讓·胡斯

讓·胡斯

1390年耕田出身既胡斯 父母死慳死抵儲左筆錢供佢上布拉格大學讀神學
要知道當年最紅呢科 讀完出黎仲好搵過MBA
不過條衰仔唔生性讀完出黎唔去做神父 繼續係入面教書
1401年升做神學部主任 1409年仲做埋校長
除左教書佢閒餘仲會出黎講下道
無論係佢傳道定係上堂既時候佢都中意同人分享下威克里夫既主張
佢為人清廉 熟讀聖經 精通神學 深得布拉格市民既喜愛
不過快樂時間過得特別快 佢係時候同大家講拜拜

有一日布拉格既街市特別熱鬧
咦?啊生?咩事咁熱鬧啊?
你唔知咩?今日有得買贖罪券啊嘛
豈有此理!!有D咁既事!?贖罪券都有得買!?唔得 我要過去同佢理論下

讀神學出身既胡斯當然唔會比呢D咁反智既事係佢地頭發生啦
佢就走去同條神棍嘈啦

1521年既贖罪券

喂老兄 聽講你連贖罪券都有得買喎 乜贖罪券係買得到既野黎架咩?
喂啊叔買你就排隊啦 我既贖罪券係教宗若望廿三世派我黎賣既 保證正貨 買左必上天堂
你都圾戇既 我地信左天主早就注定上天堂架啦 地獄係留返比D異教徒架嘛
你就圾戇 信左天主早就保證上天堂架啦?仲有煉獄架嘛
乜撚野煉獄啊?聽都未聽過
你條鄉下佬唔識野 煉獄就係比有得上天堂但現世生活唔多乾淨既人死後去既
呢D人死左之後要落煉獄受返一千幾百年苦等上帝高興啦你先有得上天堂
不過唔緊要啊有我黎到 只要買左我既贖罪券 你連你親戚既靈魂係煉獄入面叮一聲就上到天堂
ON9乜撚野煉獄如果係有既你就係聖經入而摷比我睇 仲有贖罪券係比係宗教上有好大功德既人由教宗親自頒發 邊係你條神棍通街買既野
教宗話有煉獄就有煉獄 教宗話有赦你罪就赦你罪 你條啊叔識D咩 唔係買既就唔好運吉 阻人發達死左要燒春袋架
我會唔識!?你條外江佬又知唔知我係乜水啊?我係布拉格大學校長啊!!
哦~校長下嘛 人黎 同我拖佢返去阿維農審

就咁胡斯因為反抗阿維農教廷贖罪券政策被捕
1411年被打為異端革除教藉
1414年羅馬教廷召開康斯坦茨會議請胡斯去為佢自己既主張辯護 不過係途中將佢遞捕 第二年就BBQ左啦

大受我地布拉格市民愛戴既胡斯比班耶撚燒撚左啊!!
平反胡斯 追究燒烤責任!!
因為胡斯既死 憤怒既布拉格市民遊行到市政府前面示威
突然有人係市政府入面向群眾掟石
點著左既怒火從此一發不可收拾
憤怒既市民沖入市政府將入面既人掟晒落樓 四處破壞教會既財物
暴動從布拉格曼延至整個波希米亞
神聖羅馬帝國出兵鎮壓引發場胡斯戰爭 一打就打左十五年
最後雖然成功鎮壓 但仇恨從此就長埋波希米亞人民心中
神聖羅馬帝國遲早會返黎受返既

胡斯戰爭
胡斯從此成為教會敏感既話題
你話胡斯講得岩呢佢地又唔肯承認喎 你話胡斯抵死呢又唔見教會年年係佢死忌時慶祝喎
點解咁虛怯?
因為理虧
點解理虧?
"係人地同你講道理既時候 你只可以用道理去回應人"
知唔知呢句話邊個講?
下集宗教改革篇第二集:九十五條論綱到德國農民戰爭
2019-05-09 17:15:23
[多字有圖]膠登仔都睇得明既簡易西史入門第九集:宗教改革篇第一集:中世紀結束到胡斯戰爭[膠登原創]
今集我又介紹多另一個朋友比大家識
佢叫馬丁·路德
佢冇發過一個夢 但或者佢都有一個夢

黑人民權領袖馬丁·路德·金

宗教改革家馬丁·路德

馬丁·路德 生於1483年神聖羅馬帝國薩克森公國既一個農民家庭
佢父母生左九個仔 佢係第八個
為左養起咁大頭家 佢啊爸後尾轉行去開礦
然後成為一個銅礦礦主晉身市議會 都叫有少少社會地位
1488年五歲既馬丁·路德比佢父母送左入城讀扑扑齋
1501年馬丁·路德去圖林根到讀大學
但佢冇讀當紅既神學 佢讀哲學同法律
1505年有日佢放學返屋企既時候突然雷聲大作
馬丁·路德就係心入面祈禱啦 上帝啊求你保佑我 如果我劈唔死既我出家做神父
返到屋企 OK死唔去 轉行做神父啦
就咁佢就入左屋企附近既一間修院到做修士
到左1508年修院院長見佢學有所成就送佢去維滕堡大學到教神學啦
g
十七世紀既維滕堡大學

同一時候係神聖羅馬帝國既另一邊
神聖羅馬帝國七大選侯之一勃蘭登堡選侯有個細仔 馬德堡大主教阿爾布雷希特·馮·勃蘭登堡
因為佢係細仔所以勃蘭登堡選侯個位就冇佢份
但為左晉身選侯 佢不惜向富格爾家族借左筆大到佢呢世都還唔起既錢
最後佢當然係成功左成為七大選侯之一既美因茨大主教 而家個問題係
佢要點還錢

教宗啊教宗...我呢...最近呢...手頭呢...
你想要錢咋話 唔緊要反正我最近都想幫聖伯多祿大教堂裝修下 拿 呢疊贖罪券你攞去啦 賣完分返D比我啊
多謝教宗教宗萬歲

1517年維滕堡
阿爾布雷希特·馮·勃蘭登堡攞住佢疊贖罪券黎到呢到做世界
對呢D現象早就見怪不怪既馬丁·路德只係嘆一啖氣就返去教堂做佢既工作啦
馬丁·路德岩岩返到教堂就有人搵佢告解啦
點啊衰D咩啊?
唉其實都唔係D咩大不了既 循例黎講下架姐 反正我都買左贖罪券囉 喂神父啊 我家陣係咪上硬天堂架啦?
上天堂...你覺得自己買左贖罪券就上硬天堂既...咁你咪直接去死囉仲洗唔洗留係到獻世啊!?
抑壓唔住怒火既馬丁·路德即刻返到屋企寫左九十五條論據出黎質疑贖罪券既功效
第二日佢就將佢個九十五條論點貼係維滕堡大學既門口
大學大門就相當於我地而家既民主牆 有咩想拗就貼上去 係當時咁做係好平常既事
馬丁·路德佢都冇諗過件事最後會搞咁大...

維滕堡大學教堂大門上既九十五條論綱

貼左出黎之後佢就企係到等人埋黎同自己辯論
冇 冇人埋黎 準確黎講所有人埋到黎都急急腳掉頭冇鞋玩劇走
我講既野唔中POINT咩......?

中 完全中晒 佢地只係唔敢埋黎姐
馬丁·路德篇九十五條論綱貼左出黎之後瞬間就被翻譯成各國文字傳遍全歐洲
佢既理論講中左全歐洲教徒既心 而且仲講中埋教宗個個
冇耐教廷就派人搵上門同佢傾計啦

喂啊馬生乜咁大整古啊 教宗睇左你篇文啦 佢家陣好唔開心啊
我篇文有咩令佢咁唔開心呢?有既咪即管講黎聽下囉
你講埋D咁既野咁你同當年既胡斯有咩分別呢...
胡斯...你地好意思講呢個名 如果你地覺得自己岩係佢錯既 講你地既理據黎聽下 你地講得服我既我就年年佢死忌就上佢墳頭放煙花!!
咁不如咁啦 你親自去羅馬同教宗解釋下你既意思啊
去羅馬!?你真係當我胡斯啊!?
教廷既使者比佢打發走左
幾日後馬丁·路德就收到教廷送黎革除佢教藉既信件

呢封信代表著大公教會同馬丁·路德既決裂 就係呢封信令到事件既發展變得不可挽回
對於教廷既表態馬丁·路德亦作出佢既回應
第二日馬丁·路德召集佢既學生同支持者係維滕堡大學門口聚集
馬丁·路德係公眾面前燒左呢堆信件
群眾既情緒達到高峰 佢既學生同支持者都聲言要係教廷既魔爪下誓死保護馬丁·路德
其中有個學生特別興奮

啊SIR既然我地都同教會反晒面啦 為左恢復早期教會既傳統 不如我地直接推翻羅馬大公教會啦
就憑我地幾個?
當然唔係 但我地可以搵地方匿埋 然後過住好似早期教會咁既生活 共同勞動共享資源 跟住將呢種生活方式宣揚開去 最終推翻羅馬教會!!
學生哥你叫咩名啊?
搞錯啊啊SIR聽左你咁耐書都唔認得人既 我係閔采爾啊 湯馬士·閔采爾
OK閔采爾 如果我地既生活遭到政權既干涉呢?
咁我地就要堅決抵抗!!
有錯既只係羅馬大公教會 政權都係人佢地都需要耶穌 點解我地唔可以當佢地係平信徒咁看待吸納佢地入教會反而要以卵擊石呢?
羅馬大公教會既墮落就係因為同政權既利益交錯 如果我地將政權都吸納入教會既話就只係複製更多既教廷出黎!!
閔采爾啊 你下下都去咁盡棧遲早逼死自己咋

之後比羅馬大公教會革除教徒身份既馬丁·路德成立左自己既教會 路德會
因為佢地主張因信稱義 姐係你只要信聖經你就係義人可以上天堂
所以路德會又稱信義宗

然後馬丁·路德就係佢既支持者保護下過住著草既生活
而佢既學生閔采爾亦行上左佢自己既道路

湯馬士·閔采爾

1521年既神聖羅馬帝國已經深陷義大利戰爭十幾年
但比起前線 皇帝卡爾五世最關心既事係後方既諸侯
因為馬丁·路德既主張比左神聖羅馬帝國諸侯好好既藉口去反抗自己
要解決問題卡爾五世只好去搵教宗利奧十世傾傾

喂啊利奧啊 不如咁啦 你去同馬丁·路德傾下睇下大家有冇得讓步?
唔得!!唔製!!我憎撚死佢!!我要拖佢去BBQ!!就好似胡斯咁!!
噯喲你企咁硬既義大利個邊我唔打架啦 等法國佬以後同你做鄰居架啦
挑!!就算我肯佢都唔肯啦!!
得得得 佢一定肯 只要你肯就得啦 之後有咩我幫你諗掂佢

1521年1月28日卡爾五世係小鎮沃爾姆斯召開帝國會議
神聖羅馬帝國各地諸侯貴族主教都會參加
卡爾五世以人格擔保馬丁·路德唔會因出席會議而遇害
係會議入面羅馬大公教會多次重申強調自己要有解釋聖經既權威 要求馬丁·路德收返對羅馬大公教會既指控
馬丁·路德既回應係 聖經係上帝既語言確切無誤 唔需要任何人為信徒解釋 而佢亦唔會係壞事做盡自相矛盾既大公教會威逼之下扭曲自己既信仰
面對馬丁·路德既堅持 帝國議會係沃爾姆斯會議最後一日宣判馬丁·路德為異端 任何教徒都唔可以幫助佢 任何教徒都有權拘捕佢
不過馬丁·路德宣判之前個晚已經係佢既支持者護送下離開
2019-05-09 17:15:35
沃爾姆斯會議中既馬丁·路德

家陣馬丁·路德唔只得罪左教廷 而家連神聖羅馬帝國都要對佢出手
係馬丁·路德同佢既支持者留夜著草返佢老家薩克森既時候
突然有幾個騎士從後追上搶走馬丁·路德
馬丁·路德最後被帶到一座荒廢既古堡入面 呢到將會成為佢既葬身之地...

連馬丁·路德自己都係咁諗既時候 有個人影係古堡中行出黎
薩克森選侯 腓特烈三世
啊生 我睇好你 我係沃爾姆斯會議聽完你既演講好撚感動 出面好危險 你以後化身為我既騎士匿係呢座華特堡入面繼續你既工作啦
從此馬丁·路德就匿係華特堡開始佢翻譯德文聖經既工作

華特堡

馬丁·路德華特堡入面間房

然後係華特堡出面 一件更驚天動地既事開始啦

最初只係神聖羅馬帝國西南部士瓦本地區既農民暴動
佢地攞住馬丁·路德岩岩新譯出黎既德文聖經去質疑教會同封建主所定立既法律既正當性
士瓦本既貴族為共同防禦農民既反抗而成立士瓦本同盟
而士瓦本既農民亦有樣學樣聯合各地既農民整左個上士瓦本同盟出黎同貴族談判
佢地提出十二條款要求改善農民既待遇
但正當上士瓦本同盟既高層開始同貴族談判緊既時候
佢地下面既農民軍繼續四處搶掠同破壞引起士瓦本同盟既不滿
士瓦本同盟拍台離場準備出兵鎮壓
同時 因為十二條款傳播 農民暴動亦蔓延至整個神聖羅馬帝國
不過始終都係攞鐮刀鋤頭既農民暴動 面對住裝備精良既騎士同顧傭兵完全不堪一擊
士瓦本同盟既軍隊係1525年頭從神聖羅馬帝國西南部士瓦本開始鎮壓
到1525年中佢地已經打到神聖羅馬帝國中部既圖林根
係到見返我地久違既老朋友 馬丁·路德既學生 閔采爾

當年閔采爾離開馬丁·路德之後佢就係圖林根開始傳教
佢係當地成立共產公社式既教會 入面既人共同勞動互相照顧人人平等 吸引左大班農民參加
十二條款出左黎之後閔采爾帶住佢既教徒參加農民暴動

其實德國農民戰爭係歐洲史入面唔算係好重要既歷史事件 但對香港人就非常有教育意義
第一個教訓就係:利益唔係施捨同乞求既野 唔爭取絕對勝利既人就只會得到絕對既失敗

1525年5月士瓦本同盟既軍隊打到入圖林根既弗蘭肯豪森
閔采爾係到聚集左萬幾農民 但自德國農民戰爭開始以黎 士瓦本同盟對反叛者殘酷既屠殺嚴重打擊農民既戰意
而家呢班農民聚埋一齊唔係為打仗 佢地只係黎曬馬示威 希望封建領主會因為咁可以施捨返少少權利比佢地
反抗農民係弗蘭肯豪森建造防禦工事希望令封建領主會知難而退參與談判

錯囉 士瓦本同盟見到佢地既防禦工事之後拖左幾碌大炮過黎將佢地重重包圍
士瓦本同盟攻破反抗農民既防禦工事 將入面萬幾個農民一個不留當場殺晒

都唔算一個不留既 都有幾個"不幸"死唔去
佢地就係起事領袖 包括閔采爾
佢地比士瓦本同盟拖左返去嚴刑拷問左十幾日之後係5月27日被處死
到1525年年尾農民暴動完全鎮壓

德國農民戰爭過程同範圍

呢場農民暴動對羅馬大公教會黎講係反對宗教改革絕好藉口
睇下馬丁·路德既主張 激進暴力 教壞細路 破壞社會既繁榮穩定

對此被薩克森選侯腓特烈三世好安全咁保護係華特堡入面既馬丁·路德佢既回應係
唔關我事架 我同佢地完全唔熟架 個班暴徒殺晒佢地就岩架啦 我地信義宗堅持和平理性非暴力 我地既愛連騎士既板甲都打得穿架
第二個教訓:一D開口埋口同你講和理非非既人 佢地究竟有幾大承擔?

雖然馬丁·路德對德國農民戰爭瀉晒膀 但戰後宗教改革大失人心 馬丁·路德佢自己都唔知要點做落去
但一班希望靠宗教改革打擊皇帝同教廷既神聖羅馬帝國諸侯 佢地唔會就咁放棄
佢地係1526年組成托爾高聯盟 沒收大公教會財產 支持境內宗教改革 互相保護

老老竇竇 只係農民暴動卡爾五世唔驚 但今次到班諸侯出面咁就麻煩啦
卡爾五世用武力威脅托爾高聯盟歸還教會財產
托爾高聯盟就請黎法國同丹麥組成施馬爾卡爾登聯盟擊敗卡爾五世
戰後1531年意興闌珊既卡爾五世將神聖羅馬帝國皇位讓比細佬斐迪南一世自己就垂簾聽政做太上皇

1545年教宗保祿三世比卡爾五世吹左十幾年枕邊風 總算係特倫托召開一場大公會議希望徹底解決宗教改革
係第一次特倫托會議 參與既國家只有法國 哈布斯堡帝國境內同義大利地區既教士
其中大半係義大利人
最後佢地通過決議:我地最高質 更正教係MK小學雞 教宗萬歲
對回應宗教改革同緩和神聖羅馬帝國分裂毫無幫助
對教廷徹底絕望既卡爾五世只好靠自己既鐵腕去鎮壓神聖羅馬帝國境內既宗教改革運動

1550年卡爾五世發佈血腥詔令禁止發佈一切關於宗教改革既書籍
因為咁神聖羅馬帝國更正教諸侯再次做反
1555年戰敗既斐迪南一世簽訂奧格斯堡和約
根據奧格斯堡和約神聖羅馬帝國諸侯可以自由選擇自己既宗教 佢下面既屬民則跟隨佢地領主既信仰 唔接受既可以離開
到此神聖羅馬帝國既宗教改革總算係告一段落
不過係佢隔離既法國
佢地既宗教改革而家先開始咋

下集普魯士公國成立到雨格諾戰爭
2019-05-09 17:16:41
膠登仔都睇得明既簡易西史入門第十二集:宗教改革篇第四集:亨利八世同佢富貴既冚家


亨利八世

今集故事從玫瑰戰爭結束之後開始講起
玫瑰戰爭後亨利七世娶左約克的伊麗莎白
生左七個仔女 其中得四個養得大
首先家姐瑪嘉烈嫁去蘇格蘭 啊妹瑪麗嫁去法國
大哥亞瑟就娶新成立既西班牙王國個公主 伊莎貝拉一世同斐迪南二世個女 阿拉岡的凱瑟琳

OK 周邊國家既人我都同佢地結晒婚 但我仲有個細仔亨利 佢娶邊個人條女好呢?
咦啊~唔制啊老豆~個個有得扑野得我冇~我又要扑野~快D比塊西我~
得啦得啦啊仔 老豆幫你搵緊啦比D時間黎啦
突然有個侍衛衝入黎
陛下!!大事不妙啦!!王子...亞瑟王子佢死撚左啊!!
咩話!?哎呀死囉咁我媳抱咪未入門就守寡?點向外家交待好呢...
老豆!!扑野!!老豆!!扑野!!
啊~有計

青年亨利八世

1502年亨利七世大仔王儲威爾斯親王亞瑟 15歲就死左
因法國西班牙面國交惡 而自己已經嫁左個女比法國
伊莎貝拉一世斐迪南二世夫婦又垂垂老矣 佢地個女瘋女胡安娜又冇其他女可以嫁比我
如果法國同西班牙打起上黎我咪要焗住痴埋法國到?
唔得我一定要保住同西班牙既關係
乖仔!!你想扑野啊嘛!?比啊哥個飛機杯你用住先啦!!
哇!!好野!!

就咁 18歲既阿拉岡的凱瑟琳就嫁左比佢前叔仔 12歲既亨利啦
姐姐 姐姐~可唔可以幫我打飛機啊?

阿拉岡的凱瑟琳

然後到1509年亨利七世死佢個仔繼位為亨利八世

亨利八世登基後面對最大既問題就係繼承人既問題
作為都鐸家族九代單傳長子嫡孫
只要佢一死都鐸家族對英國既管治就結束
所以佢眼前最大既任務就係佢死前點都要嘔個慈菇定出黎

經過多年既努力1516年終於生到個出黎啦...
女既...
老公老公睇下我地個女啊 係咪好得意呢?我連名都幫佢諗好啦 佢就叫瑪麗啦
屌你仆街啦!!啃左你條啊嬸十幾年你生塊西比我!?你生塊西比我要黎做咩啊!?要黎屌啊!?

1519年一個駐法國大使完成左佢既任期帶住佢全家返返黎英國
其中佢有個大女 叫瑪麗·博林
當年佢跟住佢啊爸被派駐法國 後來連埋佢個妹安妮·博林 成為亨利八世個妹 嫁比法國路易十二既瑪麗·都鐸既侍女
瑪麗·博林返到黎英國之後佢係一場舞會入面識到亨利八世
亨利八世一眼就愛上左佢 之後就日日就去搵佢扑野啦

有日亨利八世同瑪麗·博林如常咁扑野 完事後亨利八世又如常咁嘆佢枝事後煙
但呢次異常地有個女人係佢門口行過
亨利八世一見到就彈起身啦
扑野啊!!扑野啊!!我要扑野啊!!
下又扑!?岩岩咪扑完囉!?
扑野啊!!扑野啊!!我要同門口個條女扑野啊!!
哦~佢啊話 我識佢 安妮·博林啊嘛 佢講野唔只ON9 佢仲係我個妹黎添
用賓州諗野既亨利八世知道左就請左安妮·博林入宮"服侍"自己啦

安妮·博林

但係入左宮做野既安妮·博林非常安份守紀絕無行差踏錯 死都唔肯同亨利八世扑野
[CV釘宮]我入黎做野完全唔係為見你個囉 你請我入黎做野我一D都冇開心囉 你千祈唔好誤會啊!!哼!!
但係如果你真係咁想要既話都可以既...但你以後剩係可以愛我一個唔可以望其他女人架!!このバカ犬!![CV釘宮]
OK!!為扑野我咩都肯制 我現家即刻返屋企休左個黃面婆佢

真係要離婚又邊有咁易啊
首先你要問準教宗 而後面幫教宗撐腰既係神聖羅馬帝國皇帝卡爾五世 而阿拉岡的凱瑟琳就係卡爾五世既姑姐
但為左扑野咩都唔理既亨利八世就召左佢既頭馬樞機主教湯瑪斯·沃爾西去同教宗談判啦

1529年經過左年幾既談判沃爾西終於返黎啦
點啊?傾成點啊?
教宗話唔得喎
佢話唔得你就返黎架啦!?咁洗乜叫你去談判啊!?我夠知唔得啦!!我條女比我搞撚大左就黎生得啦!!
如果佢生左個仔出黎我又同佢結唔成婚既我係咪白白生啊!?屌你仆街啦!!人黎同我鎖起佢!!
有冇人!?仲有冇人有橋可以幫我!?
有有有!!陛下我有條好橋!!
彈出黎既人係湯瑪斯·克蘭默

陛下最近有冇聽過對面海好興一樣野叫宗教改革啊?聽講話只要你用馬丁·路德本聖經你就唔洗聽教宗點架啦 條頓騎士團都因為咁變成普魯士公國咋
咁勁!?姐係我想離婚唔洗再問準教宗啊!?
何只啊 你想離完再結結完又離離離結結又結又離都仲得啊!!
咁旬!?克蘭默你醒目仔 大家學下野啦 你以後就做坎特伯雷大主教啦!!
喳~
喳咩姐你

1533年英國國會立法通過脫離羅馬教廷 坎特伯雷大主教克蘭默宣布亨利八世同阿拉岡的凱瑟琳婚姻無效
亨利八世同安妮·博林成婚 年尾終於生左個BB
都係女...
老公老公睇下我地個女啊 係咪好得意呢?我連名都幫佢諗好啦 佢就叫伊莉莎白啦
屌你仆街啦!!啃左你條啊嬸十幾年你生塊西比我!?你生塊西比我要黎做咩啊!?要黎屌啊!?

有一個刷鞋仔就有第二個刷鞋仔
第二個刷鞋仔湯瑪斯·克倫威爾係國會通過上訴限制條例:禁止英國教會法庭上訴到教皇 禁止教會唔經英王允許發布規章
教職任命法案:教會由英王指派主教 叛國罪法案:唔承認英王最高權威就係叛國
王位繼承法:宣布凱瑟琳個女瑪麗係私生女 安妮·博林個女伊莉莎白為最高順位繼承人 至尊法案:宣布英王係英國教會唯一最高權威
從此英國教會變成由英王領導既聖公會
亦因為咁 有個細路女開始左佢悲慘既人生

湯瑪斯·克蘭默 湯瑪斯·克倫威爾

王位繼承法通過左之後
阿拉岡的凱瑟琳個女17歲既瑪麗 就由公主+王位繼承人跌落成為負責照顧公主+王位繼承人伊莉莎白既賓賓 過住孤星淚一樣既生活
就連1536年阿拉岡的凱瑟琳過生瑪麗都唔可以去見佢最後一面

同年生左個女之後連續兩次流產既安妮·博林已經失去晒亨利八世所有既愛同耐性
亨利八世已經搭上左第三條女 同樣係侍女出身既珍妮·西摩
見亨利八世豎起條賓州已經知佢諗咩既刷鞋仔湯瑪斯·克倫威爾即刻彈出黎出橋比亨利八世啦
陛下 聽講呢安妮·博林好咸濕架 佢成日通街搵佬扑野架 佢連自己細路都唔放過架
咩話!?咁可惡!?即刻同我斬撚左佢!!然後我要同珍妮·西摩結婚!!
喳~
喳咩姐你

珍妮·西摩
2019-05-09 17:17:31
膠登仔都睇得明既簡易西史入門第十三集:宗教改革篇第五集:八十年戰爭

今集就聽住荷蘭既國歌黎睇啦


https://youtube.com/watch?v=_U2HsdbbDgI


係十五世紀 百年戰爭未期 法蘭西王國下面有個小公國 叫勃根地公國
佢乘住法國既劣勢 依附入侵者英國擴張自己既勢力
到戰爭結束時 佢已經成為三國中既大贏家
明明係戰敗國既盟友 卻得到戰勝國既待遇
連佢啊頭法國都要忌佢三分

當年百年戰爭時做法國攝政既勃根地公爵 無畏的約翰被行刺後傳位比佢個仔菲利普三世
菲利普三世死後再傳比佢個仔大膽查理
勃根地公國既勢力係大膽查理在位時期到達頂峰
但係神聖羅馬帝國既慫恿下同瑞士爆發勃根地戰爭
最後大膽查理係南錫戰役中戰死
佢既國家由佢個女勃根地的瑪麗繼承

大膽查理時期勃根地公國

戰後勃根地公國南部併入法國
北面既尼德蘭地區 就跟住勃根地的瑪麗嫁比神聖羅馬帝國皇帝馬克西米連一世 成為哈布斯堡家族其中一塊領地
後來馬克西米連一世嫁左個仔美男子腓力比西班牙國王伊莎貝拉一世同斐迪南二世個女瘋女胡安娜
然後佢地生左個仔神聖羅馬帝國皇帝卡爾五世

卡爾五世係義大利戰爭爬上佢人生既頂峰 然後係宗教改革跌落佢人生既谷底
係施馬爾卡爾登聯盟之後退位 奧地利公國同神聖羅馬帝國交比佢細路斐迪南一世 佢既後代稱為哈布斯堡奧地利支系
而西班牙同尼德蘭就交比佢個仔菲利普二世 佢既後代稱為哈布斯堡西班牙支系
故事就咁開始啦

菲利普二世

係哈布斯堡分家後既西班牙王國 佢地既新任國王菲利普二世 如果用宗教狂熱者黎形容佢完全係對宗教狂熱者既侮辱
菲利普二世唔係宗教狂熱者 佢只係條純粹痴撚左線既耶撚
佢係佢管治地區成立大量宗教裁判所 只要稍為唔合大公教義就全部比佢拎去BBQ
而西班牙經過七百年收復失地戰爭 除左宗教狂熱仲養成極端既尚武文化
係佢地眼中世界只有上帝同戰爭

首先呢班連身為耕田佬都懶得耕田既西班牙人 將大量主要從事手工業既猶太人同穆斯林拖晒去BBQ
然後佢地先發現自己冇錢囉喎
唔緊要 我地岩岩發現左個新大陸 個到咩都冇只有黃金同異教徒
我地殺晒佢地D人搶晒佢地D金 咁我地咪有錢囉
但而家異教徒又殺晒D金又搶晒啦但我地依然唔夠錢洗喎咁點算呢?
咁加稅囉 反正尼德蘭D人咁有錢佢地實比得起既 唔比既人就係反耶穌

1559年菲利普二世派佢個妹帕爾馬的瑪嘉烈去尼德蘭到做攝政

十五世紀未有條友叫門諾·西門 佢受左加爾文主義影響成立門諾會進入尼德蘭傳教 成為尼德蘭主要既更正教派
但係西班牙既管治下無論你係大公教定更正教 只要稍有差池你都有可能比宗教裁判所拖去BBQ
經過多年既恐怖統治 1566年 尼德蘭既貴族終於頂唔順交左份請願書比帕爾馬的瑪嘉烈 要求廢除宗教裁判所
但佢地既要求旋即比遠在西班牙既菲利普二世拒絕左

西班牙既天朝國威激嬲尼德蘭既更正教徒 佢地發起暴動四處破壞大公教會既財物
尼德蘭暴動逼使帕爾馬的瑪嘉烈私下同尼德蘭人民妥協
而然帕爾馬的瑪嘉烈既妥協換黎菲利普二世更強硬既政策

菲利普二世派佢既親信兼名將 第三代阿爾巴公爵費爾南多·阿爾瓦雷斯·德·托萊多 上任尼德蘭總督鎮壓尼德蘭暴動
菲利普二世既任命惹黎帕爾馬的瑪嘉烈既不滿而憤而辭職

第三代阿爾巴公爵費爾南多·阿爾瓦雷斯·德·托萊多

帕爾馬的瑪嘉烈辭職後阿爾巴公爵費爾南多唔只係尼德蘭既軍頭 佢仲順便兼顧埋尼德蘭既內政
1567年阿爾巴公爵費爾南多成立除暴委員會去處決所有有反抗嫌疑既人 不問教派
係呢段腥風血雨既日子 有個大公教徒逃離尼德蘭
佢叫沉默者威廉·馮·奧良治親王

作為除暴委員會通緝犯之一威廉·馮·奧良治走難去佢係神聖羅馬帝國境內既封地拿叟公國
佢用佢係拿叟公國既財產資助尼德蘭既反抗運動

沉默者威廉·馮·奧良治親王

以前既所謂高壓管治下尼德蘭人都仲有機會反抗 到而家尼德蘭人先見識到咩叫真正既高壓管治
西班牙既山番取代尼德蘭貴族既僱傭兵
更嚴厲既法律 更隨便既施法
比自己收入仲高既稅收
每日街頭既營火大會
尼德蘭人已經連反抗既氣力都冇

而重拾自己稅收根基既菲利普二世又可以繼續去樹立自己既敵人啦
南面對付鄂圖曼 東面干涉法國既雨格諾戰爭 北面防範更正教領袖英國既威脅 西面強搶葡萄牙既王位 仲有係全世界擴張殖民地
但作為尼德蘭總督 阿爾巴公爵費爾南多最擔心既係西班牙對雨格諾戰爭既干涉會引黎法國既入侵
所以阿爾巴公爵費爾南多將大部分軍隊調去法國邊境
咁就出事啦

1572年威廉·馮·奧良治重返尼德蘭被各貴族推舉為尼德蘭總督
尼德蘭各地既反抗運動瞬間奪得整個尼德蘭 剩係得阿姆斯特丹仍然企係西班牙個邊
阿爾巴公爵費爾南多又要將邊境既軍隊調返返去鎮壓尼德蘭既暴動啦

第一個遭殃既係納爾登

面對西班牙大軍壓境
呢坐幾百民兵佔領既小城緊係冇得打開城投降啦
西班牙軍收復納爾登之後將全村三千幾人聚集係教堂入面
然後一把火 同樣不問教派

到1573年10月西班牙軍攻到去萊頓
吸收左納爾登既教訓 萊頓幾大都堅持到底決不投降
見萊頓尼德蘭軍企得咁硬西班牙軍就將萊頓重重包圍黎個斷水斷糧啦

得知萊頓之圍既威廉·馮·奧良治立即準備左支八千人既僱傭兵交比佢兩個係拿叟公國既細佬 路易同亨利帶領去幫萊頓解圍啦
點知1574年4月支軍隊岩岩行入尼德蘭境內就瞬間被擊潰連佢兩個細佬都戰死埋
到1574年尾萊頓彈盡糧絕 全尼德蘭都準備同萊頓RIP既時候威廉·馮·奧良治諗到條好橋

威廉·馮·奧良治放左隻信鴿入萊頓要求佢地炸毀全城既堤壩
死路一條既萊頓城盡地一鋪一於照做1574年10月1日炸毀堤壩 海水灌入全城
唔只海水 灌入萊頓城既仲有尼德蘭既援軍
係萊頓周圍既尼德蘭人搵晒全國既戰艦 商船 漁船 舢舨 木板 水泡 鑊鏟 總之浮得水既都坐晒上屁股
仲有大炮 火槍 弓箭 丫叉 彈弓 石頭 總之射得到人既都帶晒上身
就係呢支咁既土製海軍隨住海水灌入萊頓城擊潰包圍城外既西班牙軍
到10月3日西班牙軍徹底徹出萊頓
然後尼德蘭軍係萊頓城外發現西班牙軍慌忙逃走時候留底既大量食物
餓左成年萊頓市民終於可以食返餐飽啦

萊頓開城

戰後西班牙人就嘲笑尼德蘭人啦 睇下佢地個衰樣乜我地原來同緊班乞衣打仗架
你話我乞衣咩 咁我咪乞衣萬歲囉
從此尼德蘭人就以乞衣自居 陸軍叫森林乞丐 海軍叫海上乞丐
從加勒比海到東印度洋 從台灣島到南北美洲 無論世界任何一個最荒涼既角落 只要有西班牙人既地方就有尼德蘭人同佢地"乞食"

又返返去西班牙本土 菲利普二世係世界各地既擴張已經對西班牙做成非常大既負擔
再加上佢主要既稅收來源尼德蘭既叛變 1575年菲利普二世宣佈破產

破產姐係咩呢?姐係我差你既錢唔洗旨意還
呢個時候係尼德蘭服緊役已經差左幾個月糧既西班牙軍隊聽到呢個消息即刻做反

你冇糧出比我咩!?我自己搵!!

係尼德蘭既西班牙軍直衝尼德蘭既經濟中心 最富庶既城市安特衛普
收到呢個消息既安特衛普市民立即聚集左二萬人準備抵禦西班牙既入侵
11月4日朝早11點二萬個臨時拉夫既民兵對六千個久經沙場既職業軍人
唔洗幾個鐘當場就死左七千幾人 西班牙個邊可能死左幾個啦
然後再經過三日既洗劫又再死多幾千人
尼德蘭既經濟中心最富庶既城市安特衛普比呢班蝗蟲搶為平地 從此尼德蘭第一大城市既地位就讓左比阿姆斯特丹

安特衛普洗劫

經過咁恐怖既經歷 1579年1月6日尼德蘭西南部親西班牙既大公教城市成立阿拉斯聯盟宣佈"中立" 希望西班牙可以手下留情
回應阿拉斯聯盟1579年1月23日剩餘既尼德蘭地區成立烏得勒支同盟共同抵禦西班牙既暴政
1581年7月26日烏得勒支同盟發表誓絕法案宣佈脫離西班牙獨立

烏得勒支同盟
2019-05-09 17:18:25
白山戰役

失去左波希米亞又冇埋普法爾茨既波希米亞國王普法爾茨選侯腓特烈五世係布拉格陷城時慌忙逃生前住西里西亞
西里西亞拒絕借兵就趕左佢扯
最係腓特烈五世係1612年去到尼德蘭既海牙投靠佢外家直到終老

你地想受奧格斯堡和約保障啊嘛!?好我比你囉 家陣你啊頭係大公教徒 所有更正教徒同我躝!!
神聖羅馬帝國係白山戰役收復波希米亞之後根據奧格斯堡和約將所有更正教徒趕出波希米亞
沒收晒所有更正教貴族既領地重新分配比神聖羅馬帝國既大公教貴族
最後再廢除埋波希米亞議會咁就唔洗驚佢地再做反啦

1621年4月9日十二年休戰協定到期
雖然西班牙已經清除晒萊茵河沿岸既更正教勢力可以北上尼德蘭
不過趕狗入窮巷既西班牙7月23日帶住二萬五人開始圍攻普法爾茨選侯國最後既領土 佢地既首都萬五人守城既海德堡
但即使係咁既劣勢之下都仲有人跳入呢個火坑
一個年輕既更正教諸侯廿二歲既不倫瑞克-呂訥堡公爵基斯蒂安 佢帶住萬五人進攻西屬尼德蘭要路弗勒呂
如果成功攻陷既話又可以重新切斷西班牙路並軒制包圍海德堡既西班牙軍
8月29日基斯蒂安係弗勒呂以北發現西班牙軍
熱愛騎兵戰既基斯蒂安帶住佢隊騎兵直衝西班牙軍 但遭到匿係森林入面既火槍兵伏擊
經過五個鐘既混戰 基斯蒂安被擊敗只好向尼德蘭方向撤退
但係撤退除中遇到西班牙騎兵追擊 最後基斯蒂安只係得返三千騎兵跟佢退入尼德蘭
而海德堡亦係9月19日被攻陷

不倫瑞克-呂訥堡公爵基斯蒂安

弗勒呂戰役

一年後匿係尼德蘭既基斯蒂安又再徵召多萬五人準備東山再起
8月岩岩入到神聖羅馬帝國境內不倫瑞克軍就比蒂利發現
基斯蒂安只好又轉向尼德蘭方向撤退
但係距離尼德蘭五公里既施塔特洛恩被蒂利追上
基斯蒂安退守施塔特洛恩附近一座小山上
蒂利就帶住二萬五人將佢地包圍係山上面
一輪大炮轟炸之後 蒂利派騎兵突襲不倫瑞克軍既右翼由基斯蒂安親自帶領既騎兵
基斯蒂安既騎兵不敵潰敗 見到騎兵撤退步兵又跟住一齊散
最後蒂利既騎兵就好似狂風掃落葉一樣席捲不倫瑞克全軍
上次基斯蒂安仲帶到三千人走 今次得二千 剩底走唔甩個萬三人全部當場戰死
呢個想趁亂世創番大事業既年輕人 不倫瑞克-呂訥堡公爵基斯蒂安 到1626年就病死左啦

施塔特洛恩戰役

普法爾茨又好不倫瑞克又好而家所有反抗神聖羅馬帝國既更正教諸侯已經全部被打敗
而成個歐洲大陸亦只係得返尼德蘭一個更正教國家附隅頑抗
只要搞掂埋佢 卡爾五世時代既哈布斯堡帝國又會重臨歐洲

而最害怕呢個畫面既唔係更正教徒 係比兩個哈布斯堡夾係中間既法國

下集三十年戰爭-丹麥階段-
2019-05-09 17:18:53
膠登仔都睇得明既簡易西史入門第十五集:宗教改革篇第七集:三十年戰爭-丹麥階段-

上集講到麥記出左隻新漢堡 叫做哈布斯堡
由西班牙同神聖羅馬帝國兩塊麵包夾住塊足三兩法國牛排
I'm loven it
法國心諗:如果真係咁就慘啦

1622年法國既薩伏伊公國同熱那亞共和國於格勞賓登發生領土爭議
格勞賓登位於亞爾卑斯山口 而熱那亞就係西班牙係義大利北部既重要港口 兩者構成西班牙路既起點
咁既戰略要點所有反哈布斯堡勢力都唔會放過 除左黎黎去去個幾個更正教國家 今次出兵既仲有法國
1625年係法國 威尼斯 尼德蘭背後支持下薩伏伊公國出兵西班牙既盟友熱那亞共和國
西班牙視薩伏伊對熱那亞既入侵為法國對西班牙既戰爭 威脅要對法國宣戰
法國就話啦:喂我無辜架 鬼叫我同薩伏伊有盟約咩 我比佢夾住上架咋 不過如果你要同我宣戰既我都唔介意架
經過一輪圍困之後3月薩伏伊攻佔熱那亞 不過到4月尾西班牙同教皇國就趕走左薩伏伊重新收復熱那亞並攻佔格勞賓登
全世界都以為法國同西班牙會因為呢場代理人戰爭開拖 事實係口響響打輸仗既法國戰後就走去搵西班牙
法國同西班牙簽署蒙松條約 法國"代表"薩伏伊放棄格勞賓登 不過法國要有自由通過既權利
就咁薩伏伊公國同佢一眾既盟友好完美咁比法國賣左豬仔

身係大公教國家既法國唔敢認真同哈布斯堡開拖 我敢!!
第二個出手既係英國
英王詹士一世一直受困於同英國議會既鬥爭中
因為佢個人既專橫令佢係英國四面受敵 不過曹操都有知心友
佢有個寵臣第一代白金漢公爵喬治·維利爾斯

第一代白金漢公爵喬治·維利爾斯

英國以更正教為多數既國會一直主張介入歐洲戰爭但被詹士一世拒絕
1624年喬治·維利爾斯自告奮勇提出自己帶支艦隊去封鎖同搶掠西班牙海岸
但呢鋪又到國會擔心如果自己批左筆錢比詹士 詹士可能會攞筆錢比自己用 最後雙方一直爭持不下
直到1625年3月27日詹士一世呢隻蘇格蘭山番總算死得啦
繼位既係佢個仔查理一世
冇左督口督鼻既詹士一世 英國國會終於批左筆錢組成左支艦隊比喬治·維利爾斯去西班牙遊船河
1625年10月喬治·維利爾斯準備好一百架戰艦共萬五人出兵西班牙
結果喬治·維利爾斯一出海就遇到暴風雨

因為呢場暴風雨 西班牙既商船都改行更南路線令英國海軍大西洋兜左個大圈西班牙艇仔都見唔到半架
OK FINE搶唔到你既船搶你港口得啦掛 喬治·維利爾斯改為轉向西班牙西南既加的斯
當喬治·維利爾斯去到加的斯既時候加的斯已經嚴陣以待
OK都FINE攻唔到港口搶你D船得啦掛 同樣因為喬治·維利爾斯既封鎖西班牙商船全部改晒係其他港口上岸
喬治·維利爾斯一樣係咩都搶唔到
出兵幾耐7幾耐既喬治·維利爾斯終於老羞成怒爆SEED啦
我唔撚7理你咁西多總之你地同我炸9座城落黎!!
你唔理我?咁我都唔理你啦
因為英國海軍大多數戰艦都係徵召民用商船改裝而成 船上既船主唔願意攞自己既財產去冒險強攻一座海岸要塞
結果支海軍改為係隔離既鄉下地方登陸

班水手跟住條ON9仔係海上面飄浮左個幾月終於落到地 佢地呢個幾月黎抑壓既獸性終於要爆出黎啦
佢地上岸做既第一樣野係咩?姦淫擄掠? 如果係咁就好啦
係大吃大喝
加的斯係西班牙有名既葡萄酒產地 呢頭食得既野就唔多啦不過紅酒就任飲唔嬲
當西班牙軍接到英軍登陸既情報全速趕黎既時候 佢地見到既係萬幾個飲飽食醉既英軍攤係條村到不醒人事
最後有千幾個英軍比西班牙軍生擒 一事無成既英國海軍慌忙死返英國

1625年某日法國首相黎塞留召黎英國 尼德蘭 瑞典 丹麥四個更正教國家既大使
作為一個大公教國家係d咁既時候召我地黎做咩呢?幸災樂禍?
黎塞留:唔好咁講 如果係我國內既更正教徒仆街我當然會放煙花 但如果全歐洲既更正教徒一齊仆街咁我就會好撚擔心啦
特別你地都死係同一個人手上 考慮到我國既利益我地絕對唔會袖手旁觀
但你地講得岩 我地作為一個大公教國家面對我地國眾多既大公教徒 係呢場宗教戰爭入面我地唔方便出手
又或者你地睇下你地有咩可以做?

英國:場仗打到咁既實我地都擔心 英國既和平係建立係歐陸既混亂之上 任何一國獨占歐陸霸權我地都唔樂見
尼德蘭:場仗打到呢個地步最大既受害者絕對係我地 但我地都已經打到全民皆兵啦 你仲想我點呢?
瑞典:其實我係非常樂意參加呢場戰爭既 但我而家同波蘭打緊 你地介唔介意等多我一陣?
丹麥:我都同樣願意出兵 但呢場仗唔只係我既事冇理由要我咩晒
英國&尼德蘭:人我地就比唔到你啦 我地冇野多就係錢多 想要幾多即管出聲
就咁係大公教既法國斡旋下 英國 尼德蘭 瑞典 丹麥四個更正教國家結成海牙聯盟
英國 尼德蘭負責出錢 瑞典 丹麥負責出兵

黎塞留

但丹麥大使返到本國佢地既國王又有另一番盤算
ON9我岩岩先係卡爾馬戰爭打殘左瑞典攏斷左波羅的海貿易
如果比佢加入呢場戰爭容乜易比佢挑戰到我既地位架?
就係丹麥國王基斯蒂安四世計畫緊佢既陰謀既時候 神聖羅馬帝國皇帝斐迪南二世做左樣非常配合佢計畫既行動
1624年薩克森既荷爾斯泰恩選左個更正教既教士出任主教
斐迪南二世當然唔制啦 佢就夾硬攝左個大公教既主教落去
就咁1625年5月身兼荷爾斯泰恩公爵既基斯蒂安四世 係薩克森諸侯支持下搶先係瑞典之前出兵神聖羅馬帝國

基斯蒂安四世

基斯蒂安四世進入神聖羅馬帝國 準備從德紹橋跨越易北河進入神聖羅馬帝國內陸
但早係基斯蒂安四世進入神聖羅馬帝國前 華倫斯坦已經銀自己荷包請左支軍隊係易北河沿岸布置好防線
當佢發現丹麥軍向德紹橋方向進發就立即準備係河對岸布置大炮
可惜1626年4月25日係華倫斯坦準備好大炮之前丹麥軍已經到達德紹橋
因為低估丹麥軍行軍速度令華倫斯坦既精心報局全部白費
最後二萬人既神聖羅馬帝國軍以人數優勢擊退萬二人既丹麥軍

德紹橋戰役

德紹橋戰役後南進戰略失敗既基斯蒂安四世改為兜過華倫斯坦既駐軍向西行
因為天雨同長期行軍1626年8月26日二萬丹麥軍駐紮係巴倫山腳既盧特
可惜支持神聖羅馬帝國既有兩大名將 你避得過一個華倫斯坦你都避唔過第二個
27日蒂利伯爵帶住二萬人係盧特追上丹麥軍
係雙方一輪炮擊之後 神聖羅馬帝國軍既方陣兵首先發動進攻
因為兩軍中間隔左條小溪令丹麥軍成功抵擋神聖羅馬帝國軍既進攻
基斯蒂安四世趁神聖羅馬帝國軍後撤既機會下令丹麥軍既方陣兵進攻
當丹麥軍岩岩追到過河 蒂利下令騎兵進攻丹麥軍 後無退路前有追兵既丹麥軍一衝即散
最後蒂利只係用二百人既成本就消滅左丹麥軍一萬人

盧特戰役

經過兩場敗仗 孤軍深入既基斯蒂安四世只好退返丹麥
但蒂利同華倫斯坦得勢不繞人一路將丹麥軍追到入波美拉尼亞
見住神聖羅馬帝國軍既威勢嚇到瀨屎既波美拉尼亞公爵博古斯瓦夫十四世即刻宣布中立
冇用 神聖羅馬帝國軍照踩入去
OK你都係想要錢姐六萬得唔得?唔得?廿萬!!喂廿萬都唔得!?你好返轉頭囉喎!!廿萬喎!!
1626年11月華倫斯坦攻佔整個波美拉尼亞公國迫博古斯瓦夫十四世簽弗蘭茨堡條約
根據條約波美拉尼亞要係全國準備十幾個營地比神聖羅馬帝國駐軍同埋每個月定期代佢出糧比軍隊

ON9我貪你D錢咩 入侵波美拉尼亞係我既戰略配置啊
岩岩比斐迪南二世賜予北海和波羅的海海軍上將稱號既華倫斯坦係弗蘭茨堡條約後瞬速攻佔各港口同沒收所有船隻
佢既目標係阻止丹麥運送援兵同阻止基斯蒂安四世返回丹麥 從而最終建立海軍控制波羅的海
戰略進展非常順利

除左施特拉爾松

作為漢薩同盟其中一個加盟港 佢地唔願意接受弗蘭茨堡條約 佢地就開門比丹麥軍入黎幫拖啦
除左丹麥軍 同波蘭紏纏緊既瑞典都派左六百人入去
華倫斯坦從1628年5月開始攻城但一直久攻不下 直到8月4日一場大雨令戰場變成一遍泥濘
因潮濕令火藥難以燃點 泥濘令火炮難以移動 華倫斯坦只好放棄攻城

施特拉爾松圍城

係施特拉爾松戰役後認為有機可乘既基斯蒂安四世再次派兵進攻神聖羅馬帝國
8月11日七千丹麥軍進駐烏瑟多姆
8月14日丹麥軍係對岸受華倫斯坦壓迫既人民歡迎下進駐沃爾加斯特
但到8月22日華倫斯坦已經帶住七千人趕到
丹麥軍係城外佈陣迎戰但瞬間被打敗 最後仲要溜夜撤退

自出兵以黎只輸冇贏既基斯蒂安四世失去晒所有希望 同華倫斯坦簽署呂貝克和約
基斯蒂安四世割讓荷爾斯泰恩 賠償軍費同因戰爭做成既損失
放棄支持普法爾茨選侯腓特烈五世 同承認巴伐利亞選侯馬克西米利連既普法爾茨選侯地位

連場勝仗重奪神聖羅馬帝國權威既斐迪南二世要比神聖羅馬帝國更正教徒最後一擊
1629年3月6日斐迪南二世發表歸還敕令要求神聖羅馬帝國更正教諸侯歸還自奧格斯堡和約以黎沒收既大公教會資產
聽到呢個消息僅餘既更正教選侯薩克森選侯同勃蘭登堡選侯就去同斐迪南二世抗議啦
痴撚線既奧格斯堡和約你自己簽架嘛!!你而家要我還!?仲差唔多一百年啦條數我點計啊
不過最大反應既都唔係佢地 係華倫斯坦
華倫斯坦寫左封信比斐迪南二世指出歸還敕令只會擴大戰爭
巴伐利亞選侯馬克西米連一世就攞住呢封信去斐迪南二世到督佢背脊啦
佢反你喎
咁啊 炒左佢囉 反正場仗都打完啦

就咁一代戰爭英雄華倫斯坦就轉行返鄉下耕田啦
而佢支私人軍隊亦轉入斐迪南二世旗下

1629年9月瑞典結束同波蘭既戰爭
因為歸還敕令 一直保持沉默既勃蘭登堡選侯要求瑞典出兵
失去左丹麥保護既波美拉尼亞亦投向瑞典
1630年6月26日瑞典國王古斯塔夫二世·阿道夫登陸波美拉尼亞
1631年1月23日法國同瑞典簽訂Barwalde條約
法國支付一百萬里弗爾換取瑞典出三萬步兵六千騎兵 並且係未得法國許可不得向第三方議和

古斯塔夫二世·阿道夫
2019-05-09 17:19:30
膠登仔都睇得明既簡易西史入門第十六集:宗教改革篇第八集:哈布斯堡受難記第一集:三十年戰爭-瑞典階段-

上集講到丹麥同華倫斯坦齊齊返鄉下
係哈布斯堡統一歐洲前一刻 魔王降臨啦

話說當年白山戰役個個小兵戈弗烈·海因里希·馮·巴本海姆伯爵已經取代左被炒魷既華倫斯坦既地位
同樣係漢薩同盟其中一個加盟城市馬格德堡因為反抗神聖羅馬帝國既管治1630年11月開始比巴本海姆同蒂利圍攻
為解救馬格德堡古斯塔夫二世·阿道夫越過奧得河進入神聖羅馬帝國
1631年4月14日瑞典軍途經既第一個城鎮係三千僱傭兵守城既奧得河畔法蘭克福
哇哇哇瑞典既邪教徒打到入黎啦 僱傭兵快D同我出去擋擋佢
擋擋擋擋你老母 你差我條數好快D同我找左佢
就係佢地拗緊數既時候第二日瑞典軍已經攻入奧得河畔法蘭克福
三千個揸算盤既僱傭兵死清光

奧得河畔法蘭克福戰役

唔 一出兵就有個好開始 馬格德堡既弟兄等多陣啦我好快黎救你 薩克森我要去馬格德堡可唔可以借條路黎行下
ON9既 我借條路比你 咁神聖羅馬帝國咪借D意打埋我 啋你生芒果
但我唔去既話馬格德堡既弟兄就仆街個喎
仆街咪仆街囉 佢仆街好過我仆街啊

就咁1631年5月20日馬格德堡陷城
因為神聖羅馬帝國軍既僱傭兵長期欠薪 陷城後四處搶掠同屠殺
三萬人既城市到佢地離開之後只係得返五千人
打完馬格德堡 巴本海姆同蒂利進入薩克森攻佔萊比錫 今次薩克森選侯約翰·格奧爾格一世終於知出事啦
仆街啦仆街啦 今次到我仆街啦 神聖羅馬打到黎啦 古斯塔夫幫拖啊
馬格德堡仆街既時候又唔見你條仆街出聲!?你D仆街真係鬼唔望你仆街 我不過我唔似得你D仆街囉

馬格德堡圍城

9月17日萬八薩克森軍同二萬瑞典軍係萊比錫以北會合反攻萊比錫
而萊比錫中既巴本海姆同蒂利就出城迎戰
兩軍係布賴滕菲爾德相會

瑞典同薩克森聯軍共四萬人 而神聖羅馬帝國軍就少D三萬五
神聖羅馬帝國軍坐南向北騎兵擺兩翼 其中左翼既騎兵由巴本海姆帶領
中間由方陣兵組成 方陣每排一百人排十五排 有十七個方陣 後面再有一隊預備騎兵 大炮擺正前方中央
瑞典薩克森聯軍坐北向南 薩克森軍係左翼 右翼係瑞典軍既騎兵
中間既瑞典軍步兵唔係擺方陣而係淺縱深長戰線既戰列兵 每個戰列每排二百人頭三排係火槍兵後三排係長槍兵
共九個戰列分兩層 每層後面再有一隊預備騎兵 大炮擺正前方中央
因為人數既優勢加步兵既陣式 瑞典薩克森聯軍可以排出一條比神聖羅馬帝國長既戰線


兩軍相遇既頭兩個鐘係一輪炮戰
神聖羅馬帝國軍有火炮廿六碌 而瑞典軍就有近一百碌
唔好睇數量鉛殊就以為瑞典軍贏緊
要知道當時係個巨艦大炮主義既時代
當時主流既大炮係有幾大碌整幾大碌
因為當時仲未有榴彈既關係炮彈都係實心既
炮兵會將大炮低角度射向地面 炮彈就會好似片石咁樣係落地之後再彈多段距離
炮彈落地個下會因為自身既重量將炮彈同地表炸成碎片 呢D碎片可以對附近做成大範圍既損害
而炮彈彈起之後會係人群中彈跳穿插 被打中既人會成個好似豆腐咁碎開
係非常恐怖非常強大既武器

相反瑞典軍既大炮就冇咁把炮啦
古斯塔夫二世·阿道夫將全國既大炮標準化成三種
射3磅炮彈既輕炮 6磅既重炮同24磅既攻城炮
係到只係得24磅炮可以做到上述既效果 而呢D只佔瑞典軍中既少數
雖然比3磅同6磅炮打中個人都一樣會好似豆腐咁碎開 但碎片片石呢D效果佢地就做唔到啦

經過兩個鐘頭既炮擊 第一個出手既係神聖羅馬帝國軍
巴本海姆帶住佢左翼既騎兵向瑞典軍既右翼發動進攻
神聖羅馬帝國軍既騎兵係當時典型既重騎兵 雖然裝甲冇中世紀騎士咁重亦放棄左騎槍
但佢地既裝甲依然係戰場上數一數二重既 佢地既武器係劍同好多把手槍 射完一把換另一把
而對家瑞典軍既騎兵係歐洲戰場上全新既兵種 龍騎兵
佢地身上既裝甲只有頭盔同胸甲 武器係軍刀同火槍

瑞典軍既龍騎兵靠射程同速度化解左巴本海姆七輪既衝鋒 仲將佢地推向戰場外
不過當神聖羅馬帝國軍既右翼見到左翼發動進攻時自己都跟埋一齊上
對面瑞典同薩克森聯軍既左翼係薩克森軍
薩克森軍一見到神聖羅馬帝國軍發動進攻就一哄而散全速逃跑
而且係佢地逃走既時候咁橋路過瑞典軍後方既營地
反正都係走架啦搶返份先啦!!
而看門口既係瑞典軍既僱傭兵
唔好搞我啊 我打份工架咋 反正都係啦我都攞返份先


就咁本來人數稍為佔優既瑞典軍就瞬間失去左萬八人既左翼同全部既行李
本來戰線比神聖羅馬帝國軍既瑞典軍 佢而家既右翼同神聖羅馬帝國軍貼齊 但左翼既步兵就曝露係神聖羅馬帝國軍眼前
機不可失蒂利下令預備騎兵經瑞典軍左翼兜去瑞典軍後方 而方陣兵全部向右行進攻瑞典軍既左翼
自白山戰役起兵以黎我未嘗敗一仗 而家你地都可以跟丹麥同普法爾茨一樣返屋企訓啦!!
係咩?我唔覺憑你條on9仔抽得贏我囉!!步兵變陣!!

當時歐洲既火槍兵係分別咩住一袋火藥一袋子彈
要用既時候就倒d火藥落槍到再放子彈 但人人倒既份量唔一樣 成排人射出黎既火力就唔一樣
但瑞典軍唔同 佢地全身唔只咩兩袋野 係十9幾袋
每袋係固定份量既火藥袋底有粒子彈 要用既時候咬開個袋 揸住袋底既子彈 將火藥倒晒落去 之後就塞埋個子彈落去
塞實左之後就可以開槍 火力穩定之餘上彈速度仲快左

另一點歐洲既炮兵又大又重只會擺係戰場既中心獨立運作唔屬任何部隊指揮
但瑞典軍既輕炮係分配比每個兵團 每個兵團都有幾碌輕炮
而且一碌3磅既輕炮幾個人就可以抬住走 不過瑞典既輕炮係搵馬拉既

之前講過瑞典軍唔係用歐洲主流既方陣兵而係用戰列兵 而且火槍係佔多數
姐係話佢地有更長既火力面攻擊神聖羅馬帝國軍
相反神聖羅馬帝國軍既步兵係用西班牙式既大方陣
西班牙大方陣以長槍兵為主火槍只佔少數擺係四個角 而長槍兵只可以正面接觸敵人
佔多數既長槍兵係移動既中途除左行就冇其他野可以做

西班牙大方陣

瑞典戰列

姐係佢地要進攻瑞典軍既左翼唔係直線行過去就得 佢地要曲線兜過去用自己既正面撞向瑞典軍既側面
咁就會拖長左佢地移動距離 加上西班牙大方陣本來就係移動緩慢既陣式
而且係神聖羅馬帝國軍前進既同時瑞典軍亦跟住轉向
結果就係神聖羅馬帝國軍永遠用側面對住瑞典軍既正面
而瑞典軍永遠用正面掃射神聖羅馬帝國軍既側面


當神聖羅馬帝國軍向瑞典軍左翼前進 事情就發生啦
瑞典軍全軍既輕炮砰令碰隆咁跑過黎左翼
再加上瑞典軍火槍既射速
神聖羅馬帝國軍既方陣兵就好似係十號風球中前進既記者一樣
不過打落佢地身上既唔係雨點 而係子彈同3磅既炮彈
抵受唔住密集猛烈既炮火 方陣兵逐個崩塌
最後古斯塔夫帶住剩餘既騎兵包抄追截逃走既神聖羅馬帝國軍


實際只有二萬人參戰既瑞典軍擊敗三萬幾人既神聖羅馬帝國軍
瑞典軍只有三千死傷其中大部分死於開頭既炮擊
而神聖羅馬帝國軍死一萬人 六千幾投降 唔夠一半人走得甩
神聖羅馬帝國軍個廿幾碌大炮一路擺係戰場中間最後全數被俘虜
一代名將蒂利一生最大既敗仗

布賴滕菲爾德中既古斯塔夫二世·阿道夫

布賴滕菲爾德勝利後既古斯塔夫二世·阿道夫

今日既布賴滕菲爾德 有條以古斯塔夫二世·阿道夫命名既馬路

係布賴滕菲爾德戰役大勝後古斯塔夫二世·阿道夫繼續南下勢不可擋
1632年4月15日四萬瑞典軍去到奧地利公國邊境既萊希河
只要一過河就係奧地利本土 蒂利 救得到我既得你一個啦 你死都要同我死場贏仗返黎啊
就咁七十三歲既老將蒂利同巴伐利亞選侯馬克西米連一世就帶住臨時臨急徵返黎既二萬五人趕去萊希河啦
神聖羅馬帝國軍一趕到去就遭到百幾門大炮既猛烈掃射
蒂利當場就比大炮炸斷對腳被抬離戰場 指揮既職責就落係馬克西米連一世身上
係大炮既掩護下瑞典軍搭起船橋由騎兵帶頭渡過萊希河
哇屌你 督背脊我就識姐打仗我唔點架 走!!走啦!!快d走!!
巴伐利亞選侯馬克西米連一世係瑞典軍騎兵追趕下惚惚撤退

萊希戰役

事後得知蒂利受左重傷既古斯塔夫二世·阿道夫就送左隊醫生過去
蒂利見到隊醫生就好感動咁話啦
你地既主人係真正既騎士...嗚
咁就死左啦

失去左蒂利手下再冇名將 斐迪南二世只好死死氣走去哎華倫斯坦出山
哎呀乜要食回頭草咁樣衰啊?打仗既野唔好預我囉 頻頻撲撲又日晒雨淋仲要受人氣 打贏仗都要比人炒既 呢d工唔洗預我囉
係我衰係我唔著 我受小人誤導 今次冇人救得到我啦你點話點好啦
就咁阿爾布雷希特·馮·華倫斯坦出山救國

挑 你地搞咁撚多野都係想趕佢走姐 推唔郁既咪用拖囉
華倫斯坦係波希米亞徵召佢既軍隊反攻萊比錫
後方受到截擊既古斯塔夫不得不調頭
兩軍係萊比錫以西既呂岑相遇
瑞典軍有萬九人 而華倫斯坦得萬六人

戰場係萊比錫城西同小鎮呂岑中間 兩軍中間有條東西向貫穿萊比錫同呂岑既大馬路
馬路兩傍又有條大坑渠
參考過布賴滕菲爾德既經驗華倫斯坦度左條好橋對付古斯塔夫二世·阿道夫

首先佢放棄傳統既西班牙大方陣戰術 將火槍兵同長槍兵分開擺
華倫斯坦吩咐火槍兵挖爛坑渠做戰壕 將全部火槍兵擺晒係入面 前面擺幾碌大炮
剩低既長槍兵就匿係右翼既呂岑 又帶多幾碌大炮同部分騎兵
剩低既大部分騎兵就擺係左翼

溜夜趕黎既瑞典軍中路繼續係佢地既瑞典方陣 分兩層後面有隊預備騎兵全部大炮集中係正前方
騎兵擺兩翼 為回應神聖羅馬帝國軍既佈陣 右翼比左翼稍多
2019-05-09 17:20:13
1648年5月15日神聖羅馬帝國 西班牙王國 法蘭西王國 瑞典王國 尼德蘭七省聯邦共和國 神聖羅馬帝國諸侯 帝國自由城市
齊集西伐里亞商議歐洲未來秩序
最後1648年10月24日簽署西伐里亞和約

根據西伐里亞和約
重申奧格斯堡和約同布拉格和約繼續有效
哈布斯堡皇室承認加爾文教派合法並同其他更正教大公教有平等地位
神聖羅馬帝國境內各諸侯可自行決定官方宗教
神聖羅馬帝國境內各諸侯國有主權及外交自主權但不得對皇帝及皇室宣戰 呢點凌駕布拉格和約
承認尼德蘭 瑞士 薩伏依 米蘭 熱那亞 曼圖亞 托斯卡納 盧卡 摩德納 帕爾瑪獨立
哈布斯堡皇室部分外奧地利領地割讓法國
法國得到梅林 圖爾 凡爾登同埋除史特拉斯堡以外整個亞爾薩斯
瑞典王國得到西波美拉尼亞 維斯馬城 不來梅 維爾登
勃蘭登堡-普魯士得到東波美拉尼亞 馬格德堡 哈爾伯施塔特 明登
薩克森得到盧薩蒂亞
普法爾茨選侯國一分為二 上普法爾茨同巴伐利亞合併 下普法爾茨發還腓特烈五世後人卡爾一世·路德維希
巴伐利亞選侯馬克西米連一世保留帝侯地位 恢復腓特烈五世後人卡爾一世·路德維希既選侯資格 選侯數量增加到八席
神聖羅馬帝國皇帝選舉不得係現任皇帝在世時進行
法國 瑞典係神聖羅馬帝國議會有代表權

西伐里亞和約簽字

三十年戰爭德意志地區人口減少率

西伐里亞和約後歐洲格局

西伐里亞和約後神聖羅馬帝國諸侯

至此宗教改革正式結束
羅馬教廷退出世俗政治 大公教會保護者神聖羅馬帝國既衰落 現實政治既興起
係宗教改革之前歐洲冇民族
歐洲人眼中只有教徒同異教徒
所有人都係教宗牧養既羔羊
但宗教改革後所有歐洲人都有權脫離皇宗既牧養去選擇自己既宗派
從此歐洲人效忠既對象就由教宗轉投佢地國家既領袖
民族國家就咁出現啦
好快大家就會睇到路易十四表現比大家睇咩叫朕即國家

自查理曼大帝起神聖羅馬帝國就已經唔係一個穩定統一既政權
當民族國家係歐洲興起神聖羅馬帝國卻被西伐里亞和約沖往潮流既反方向
因西伐里亞和約神聖羅馬帝國諸侯得到外交自主權 佢地可以為各自利益遊走於歐洲列強
所謂神聖羅馬帝國皇帝淪為虛銜 當神聖羅馬帝國陷於劣勢 神聖羅馬帝國"諸侯"願意保持沉默已經相當厚道

係中世紀騎士同民兵係戰場上既主角
但因十字軍東征大量既騎士前往並死於東方
而未經訓練既平民係冷兵器戰場上表現惡劣
低士氣低戰力加上因徵召平民而荒廢經濟生產
到中世紀後期歐洲人更樂意聘請僱傭兵
但到熱兵器既興起僱傭兵既優點又變成缺點
軍紀惡劣 肆意搶掠 收錢唔做野
更重要既係 使用火槍係唔洗點訓練
瑞典既古斯塔夫二世·阿道夫開始左徵召平民為職業軍人既風氣
比起僱傭兵 因為職業軍隊既升遷制度得以維持軍紀
同一民族效忠同一領袖士氣高昂
更重要都既係 使用火槍係唔洗點訓練
你可以好快好平咁得到一班你可以掌握到佢地背景既軍隊
從此歐洲再冇騎士再冇僱傭兵 有既只有人民既軍隊

三十年戰爭同西伐里亞和約徹底改變歐洲社會 被視為中世紀過渡到近代史間既標誌
呢頭歐洲各國岩岩放低佢地既宗教爭議 面對佢地現實政治利益
個頭有個遲鈍既國家而家先開始拗

下集英國內戰
冇下集啦 懶得寫啦
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞