［極高質分享］膠登簡易歐洲史入門

[院長講歷史]膠登仔都睇得明既簡易西史入門第三十七集:義大利統一

今集BGM


https://youtube.com/watch?v=jCX7sLKsZ7Y

1806年拿破崙推翻那不勒斯國王費迪南多四世王位立自己細佬約瑟夫·波拿巴為那不勒斯國王
就咁一班法國佬就帶住佢地幾十年革命經驗進入義大利
受到佢地啟發 一班義大利人成立起一個秘密組織去推動義大利統一
呢班人叫燒炭黨

1808年6月6日約瑟夫·波拿巴接替西班牙王位 換黎那不勒斯既新國王係拿破崙個妹夫若阿尚·繆拉
繆拉一上位就睇班燒炭黨唔順眼就走去同拿破崙呻啦
喂屌 呢班人搞到我個國家立立亂 可唔可以搞搞佢啊
緊係唔得啦 而家薩丁尼亞 西西里 同我鄉下科西嘉都仲係英國佬手上 我仲要靠佢地統一義大利架 留住佢地遲早有用既
比佢開口中 唔洗遲早繆拉就用得著啦

1813年拿破崙係萊比錫民族會戰大敗 繆拉為保自己王位即刻揼底拿破崙返那不勒斯加入反法同盟
4月6日拿破崙倒台 9月18日維也納會議召開
繆拉諗住自己係勝利國之一就傻更更走去維也納開會 點知比人一腳踢左出黎
你呢D兩頭蛇三姓家奴臨門一腳先黎埋堆就當自己係勝利國!?返屋企等退位啦!!
仆你個臭街!!睇黎奧地利冇諗住承認我個那不勒斯王位 燒炭黨!!出黎幫拖!!我要搞冧晒義大利所有政權!!我要統一義大利!!

3月20日拿破崙復辟 第七次反法同盟成立 繆拉乘機向奧地利宣戰
點知兩個月就比奧地利收左皮 繆拉逃入科西嘉係到召集燒炭黨人反攻義大利
10月13日繆拉兵敗就擒打靶
但你殺左一個繆拉都仲有千千萬萬個燒炭黨人

維也納會議後既義大利
從左上到右下係皮埃蒙特-薩丁尼亞 帕爾馬 犘德納 托斯卡納 教皇國 兩西西里 左上係倫巴底-威尼托

1820年1月1日西班牙發生兵變恢復左約瑟夫·波拿巴訂立既1812年憲法
兩西西里王國既那不勒斯 一個燒炭黨軍官見到就有樣學樣帶住支軍隊迫國王費迪南多一世簽左同樣既憲法
西西里見那不勒斯內亂就乘機宣佈獨立 費迪南多一世流亡外國

係義大利北部皮埃蒙特又發生左同樣既事 燒炭黨軍官逼皮埃蒙特-薩丁尼亞國王維托里奧·埃馬努埃萊一世簽憲法
維托里奧·埃馬努埃萊一世見到班軍佬圍向自己個王宮就揼底個王位走返鄉下
但因為佢冇仔生 佢個位就由佢細佬卡洛·腓力切繼承 但卡洛·腓力切當時就係摩德納公國
咁就由當時係皮埃-薩丁繼承順位最高既人 卡洛·腓力切個太爺個細佬個曾孫卡洛·阿爾貝托做攝政
卡洛·阿爾貝托向燒炭黨人讓步簽署憲法 但卡洛·腓力切又拒絕承認
家陣國王係我啊嘛!!你憑咩代我簽啊!?
就咁費迪南多一世同卡洛·腓力切齊齊向奧地利告狀
冇耐奧地利既軍隊就踩到入黎啦

雖然燒炭黨人既革命最後全部失敗 但都淋唔熄義大利民族熱情依然不斷有人陸續加入燒炭黨
其中包括一個廿幾歲既律師 佢叫朱塞佩·馬志尼

卡洛·腓力切


卡洛·阿爾貝托


朱塞佩·馬志尼

係奧地利淫威下義大利各國對打壓統一運動不遺餘力 但總有例外
義大利中部既小國摩德納公國佢卻反其道而行縱容燒炭黨係自己國內行動
佢地既摩德納公爵弗朗切斯科四世更周圍宣稱自己要建立統一既義大利
1831年4月27日佢既機會終於黎

皮埃-薩丁國王卡洛·腓力切病逝 佢薩伏伊家族既繼承人就只係得返佢個遠遠遠遠遠親卡洛·阿爾貝托
弗朗切斯科四世聲稱自己有權繼承皮埃-薩丁王位要求當地人民支持
而燒炭黨人更搭上左新登基既法國國王路易·腓力一世
佢地準備係法國支持下發動一場全義大利既革命
但梅特涅得悉佢地既計畫後就即刻走去搵路易·腓力一世
如果你夠膽介入既...我保證會出兵!!
見奧地利企到咁硬路易·腓力一世就縮手啦 冇左法國既支持弗朗切斯科四世即刻反面走去逮捕燒炭黨人
大量燒炭黨人流亡外國 其中有拿破崙三世兩兄弟 同埋馬志尼

4月馬志尼到達馬賽 係到佢同班流亡燒炭黨人成立義大利青年黨
1833年4月一架商船去到尼斯 一個尼斯出世既26歲水手係到識到馬志尼並加入義大利青年黨
佢個名叫朱塞佩·加里波底

朱塞佩·加里波底

經過三年準備 馬志尼同加里波底準備召集一千人係瑞士攻入皮埃-薩丁
但黎到既只有二百人 而且當地既人民根本冇準備到要加入佢地既革命
最後大量義大利青年黨員被捕處死 馬志尼同加里波底又一次流亡外國

馬志尼選擇左英國 係到佢見識到既共產思想憲章運動
而加里波底就去左南美洲參加左當地各國之間既遊擊戰

燒炭黨同義大利青年黨兩場激進派運動都終告破產後就到溫和派既興起
義大利人開始寄望教宗帶領義大利各國建立起"義大利邦聯"
但現任教宗額我略十六世係個死硬保守派 佢就連同電力有關既野都唔比係教皇國內出現
不過好彩佢係1846年6月1日死撚左 6月16日新當選既教宗庇護九世係個改革派既神父
佢一上任全義大利人都希望佢可以為統一義大利做返D野

庇護九世

果然反面係義大利人既優良基因
庇護九世一登基就釋放晒D政治犯 係教皇國內鋪設電燈同火車軌
放寬出版審查同容許市民自姐民兵取代奧地利既駐軍
睇落就好似係改革同統一既希望 但冇耐佢就變心啦

庇護九世係教皇國內既改革令一直被打壓既自由派重見天日
但係自由派當中大多數都有反教會既傾向
而且由教會領導義大利統一就係將教會重新拖返入世俗事務當中
只要教宗有咩差錯成個教會就會成為眾矢之的
到時義大利滅亡事小 作為教宗 教會既滅亡先係最可怕既結局
係教皇國內冇人對庇護九世既改革感恩載德反而引出一堆自由派既口誅筆伐
而家比起義大利既未來庇護九世更擔心既係教會既存亡
冇耐庇護九世又開始收緊返教皇國既自由

1847年一個義大利貴族係皮埃蒙特-薩丁尼亞王國搞左份叫復興報既報紙去宣揚義大利統一
佢叫加富爾伯爵卡米洛·奔索

加富爾伯爵卡米洛·奔索

係奧地利屬下既倫巴底-威尼托王國 自威尼斯共和國被解散以黎威尼斯既經濟持續衰退
奧地利出於自己需要將航運中心搬去達爾馬提亞一帶 因為威尼斯既衰落連帶埋係阿爾卑斯山口既米蘭都跟埋一齊沒落
中世紀繁榮一時米蘭同威尼斯而家只係王室貴族休閒旅遊同收稅既地方
而今次要同佢地加既就係煙稅

1848年1月1日因為奧地利提高煙草稅 倫巴底-威尼托人發起罷買行動
12日兩西西里王國既西西里島發生獨立革命 隔離既那不勒斯乘勢要求國王立憲
2月革命之火一路燒到上義大利中部既托斯卡納公國
3月4日皮埃-薩丁王國通過憲法 13日奧地利三月革命梅特涅落台 15日教皇國通過憲法
聽到革命既消息馬志尼同加里波底又急急腳趕返義大利

18日米蘭一個奧地利兵嘲笑一個參與罷買運動既米蘭人窮到冇煙食 然後彈D煙灰落落佢塊面到
個米蘭人嬲起上黎搶左佢支煙即場塞左佢一鑊然後走佬
以此為契機全市市民學法國佬咁搭起路障去驅逐奧地利軍
經五日戰鬥奧地利軍撤出米蘭


米蘭五日

見咁既環境加富爾即刻上書佢個國王卡洛·阿爾貝托
家陣全義大利都陷入內亂只有我地皮埃-薩丁得以幸免 全義大利人民都期望統一義大利既出現 而家係我地既好機會啊!!
皮埃-薩丁出兵米蘭向奧地利宣戰
23日奧地利軍退出倫巴底-威尼托王國 聖馬可共和國宣佈成立
見到皮埃-薩丁出手 教皇國既人民都要求庇護九世幫手出兵統一義大利
...但奧地利都係天主教國家黎喎...
...你講乜9話...!?

聖馬可共和國宣佈成立

但皮埃-薩丁入到米蘭 作為其中一支反抗軍領袖既馬志尼就懷疑啦
趕走奧地利皇帝請黎皮埃-薩丁國王!?咁我地革命黎做咩啊!?唔得 我要搵法國佬 佢地岩岩成立左共和國 呢D先係我地要做既野黎架嘛!!
但又有其他人質疑佢囉喎
喂咁卡洛·阿爾貝托衰衰地都係個義大利國王啊 你唔靠佢反而走去搵法國佬咁同請返奧地利皇帝返黎有咩分別啊
就係反抗軍內部仲爭拗緊時 奧地利軍又返到黎啦
咁奧地利人返到黎咪一齊抵抗囉 咁冇咩好拗啊
就係有

留你地呢D人係到第日我統一左義大利之後你地咪會黎推翻我個王位!?送死既工作就留比你地啦
卡洛·阿爾貝托將皮埃-薩丁既軍隊逼開晒奧地利軍既主力 任由反抗軍被逐個擊破
最後7月24日皮埃-薩丁軍係庫斯托扎戰役被奧地利軍擊敗 皮埃-薩丁同奧地利宣佈休戰

庫斯托扎戰役

啊啊!!義大利又打輸左奧地利人又返黎啦!!最衰都係教宗!!佢背叛左義大利!!
11月15日教皇國司法大臣被行刺引發羅馬暴動要求民主政府同向奧地利宣戰
庇護九世見到班暴民湧向宗座宮殿就打扮成神父仔逃出教皇國流亡兩西西里既加埃塔
1849年2月9日教皇國人推翻左教皇國成立羅馬共和國由馬志尼擔任三頭執政其中一人
加里波底帶住聖馬可共和國既殘兵加入羅馬共和國 馬志尼同庇護九世同時向法蘭西第二共和求助
馬志尼諗住法國總統路易-拿破崙以前都係燒炭黨員佢實會幫我地既!!
但法國執政既保守派秩序黨卻決定支持教宗出兵推翻羅馬共和國
庇護九世向所有參與支持羅馬共和國既人處以絕罰


羅馬共和國宣佈成立

不愧係義大利人 反覆係佢地既基因
卡洛·阿爾貝托又突然的起心肝再向奧地利宣戰 點知係3月23日諾瓦拉戰役中又再慘敗
真不愧係義大利人 連唔太擅戰既奧地利人都打唔贏
7月28日卡洛·阿爾貝托傳位比佢個仔維托里奧·埃馬努埃萊二世就流亡葡萄牙
6月1日法軍登陸羅馬 7月2日羅馬陷落
加里波底帶住又帶住四千殘兵走入亞平寧山區打遊擊 目標係北上支援義大利最後既反抗政權聖馬可共和國
我係邊到 邊到就係羅馬!!

點知佢都未行到去 8月5日聖馬可共和國就被奧地利推翻
8月9日皮埃-薩丁同奧地利結束戰爭 亞平寧半島又返返落奧地利手上
1850年庇護九世返回羅馬 加里波底流亡紐約
1848年義大利統一革命又一次失敗告終
再冇人有精力同奧地利週旋落去 所有人都準備認命
除左一個

維托里奧·埃馬努埃萊二世

1852年11月4日維托里奧·埃馬努埃萊二世任命加富爾為首相
陛下 統一義大利唔只係班蟻民既白日夢 亦係義大利各國既現實利益 而家全義大利人民都渴望一個統一義大利既出現
邊個可以順應潮流邊個就可以名正言順將勢力擴張到全義大利 而全義大利有條件達到呢個目的既國家只有三個
教皇國 兩西西里王國同我地皮埃蒙特-薩丁尼亞王國 前兩個佢地國王太保守 佢地只知自己既權位
我地有冇資格做呢個角色就睇陛下既做化啦 但就憑陛下既意願我地既皮埃-薩丁實在係太弱太落後
我地要急起直追建立起金融制度再去投資工業發展 但即使係咁就憑我地一個依然唔足以統一義大利
以前D革命派以為上大使館叩下門就叫外交 佢地太睇少外交啦
我地發展起經濟之餘仲要同各國建立起自由貿易 令我地既利益互相依賴
然後我地只要等機會就得啦...

自加富爾就任首相以黎皮埃-薩丁既經濟蒸蒸日上成為義大利地區既第一強國
不過佢地依然未敢輕舉莽動 直到1855年
係兩年前英法因為鄂圖曼同俄羅斯開拖 佢地雙方都希望可以拉攏奧地利加入戰爭
有苦自知既奧地利嚴守中立 只係不斷要求雙方克制早日結束戰爭
加富爾終於等到佢要既機會

如果奧地利加入戰爭既 加富爾就頭痕
如果皮埃-薩丁同奧地利企係同一陣線輸左固然麻煩 贏左又對自己有咩益處呢?
如果皮埃-薩丁同奧地利對立既咁就唔係贏就係輸 皮埃-薩丁呢D小國博唔博得起呢?
但好彩奧地利賴死唔歸邊 剩係隔住座喀爾巴阡山係到咀炮 咁樣加富爾諗都唔洗諗就撲左去英法個邊

係塞瓦斯托波爾圍城戰既最後一刻皮埃-薩丁軍趕到
1855年9月11日塞瓦斯托波爾陷落英法俄奧普係巴黎召開和談 掹車邊成為戰勝國之一既皮埃-薩丁當然走唔甩
雖然係巴黎和會同後黎既1856年巴黎條約英法都冇為皮埃-薩丁統一義大利表達明確既立場
但係克里米亞戰爭中做雙面人既奧地利已經失信於英法俄三國 佢地都好樂意係往後既國際上孤立奧地利
對加富爾而言 呢場已經算係外交勝利

1858年1月14日夜晚8點 法國皇帝拿破崙三世夫婦睇完歌劇搭馬車返屋企
突然係人群中走出三個人 其中帶頭個個向拿破崙三世既馬車掟出三個手榴彈
當場死左18人(唔包拿破崙三世夫婦) 同一百五十人傷(包括拿破崙三世夫婦)
呢三條友當場被捕 帶頭個個係個前燒炭黨員 佢係獄中指責拿破崙三世
你以前都係燒炭黨員!!但你做左法國皇帝之後就忘記左義大利人既苦難!!而家可以係奧地利手上拯救義大利既人得你架啦!!
呢件事經法國報章報導後義大利統一就成為法國人民其中一個議題 拿破崙三世都希望可以係呢件事上面做返D野

行刺拿破崙三世

7月拿破崙三世同加富爾係卜諾姆比爾簽訂密約
皮埃蒙特-薩丁尼亞國王維托里奧·埃馬努埃萊二世嫁個女比法國皇帝拿破崙三世個表弟拿破崙·熱羅姆
如果奧地利入侵皮埃-薩丁 法國會出兵支持皮埃-薩丁收復倫巴底-威尼托王國 摩德納公國 帕爾馬公國同教皇國北部
而托斯卡納大公國轉交拿破崙·熱羅姆 事成後皮埃-薩丁割讓薩伏伊同尼斯比法國

簽訂密約後加富爾就要開始工作啦
因為卜諾姆比爾密約前題係奧地利主動入侵 咁加富爾首先就要撩起奧地利把火令佢發動戰爭
加富爾係倫巴底-威尼托王國不斷煽動反奧地利運動 但當時倫巴第-威尼托總督係奧地利皇帝個細佬馬克西米連
佢係哈布斯堡內少有既自由派對皮埃-薩丁既挑釁處處忍讓 加富爾煽左佢成年都辣唔起奧地利把火
不過呢個時候英國佬已經睇出有唔妥
...你...係到做咩啊...?

比英國佬盤左輪 卜諾姆比爾密約就通左天
我反對 義大利統一對我黎講唔係問題 但我唔想見到法國既擴張同奧地利既衰落 到時我一定會介入
聽英國佬咁講加富爾本來都有D淆淆地 但奧地利得悉左卜諾姆比爾密約就啪起偉哥上黎
你呢D垃圾小國夠膽挑我機!?解除武裝!!即刻同我解除武裝!!
見佢又突然硬起上黎 加富爾就順勢拒絕左奧地利既最後通諜
1859年4月29日奧地利向皮埃蒙特-薩丁尼亞宣戰 法國向奧地利宣戰
見統一戰爭又開打馬志尼同加里波底又返返義大利

加里波底被維托里奧·埃馬努埃萊二世任命為少將 帶住班叫阿爾卑斯獵兵既民兵係阿爾卑斯山區打遊擊
但馬志尼對加里波底加入皮埃-薩丁王國不意為然 佢依然堅持要建立統一既義大利共和國
國王對國家黎講算係D咩呢!?國家對國王黎講算係D咩呢!?佢為左佢既權位隨時準備出賣任何人!!你竟然背叛民族為D咁既人賣命!?

6月4日聯軍係馬真塔戰役擊敗奧地利軍 奧地利軍退出倫巴底地區
再係6月24日索爾費里諾戰役 法奧兩國皇帝御駕親征
由兩條外行人領軍半日既戰爭就做成左四萬人死傷
睇住遍地既屍骸 拿破崙三世仲可以好得意咁講
嗯...估唔到今次個奧地利皇帝都係個軍事天才下 竟然可以同我呢個拿破崙再世打成平手
但一個路過既瑞士商人亨利·杜南睇見就大為震驚
佢帶領起附近既村民去照顧戰爭既死傷者 不分國籍
呢次經驗令佢決心要組織一支中立既醫療組織去幫助戰爭既受害者

索爾費里諾戰役


亨利·杜南

維托里奧·埃馬努埃萊二世同拿破崙三世進入米蘭

索爾費里諾再敗後 奧地利軍退入當年拿破崙了結第一次反法同盟既地方 曼圖亞要塞
OH YEAH!!我果然係拿破崙再世啊!!我要學啊叔咁打入維也納!!
但拿破崙三世收到消息普魯士開始動員準備支援奧地利 而奧地利係匈牙利亦發生叛亂
7月9日兩國不得已係維拉法蘭卡和談 11日簽訂維拉法蘭卡和約
奧地利割讓倫巴底比皮埃蒙特-薩丁尼亞 法國承認威尼托為奧地利領土

簽完法國就揼低皮埃蒙特-薩丁尼亞退出戰爭
咁...我地仲打唔打啊...?
維托里奧·埃馬努埃萊二世猶疑起黎
打!!緊係打啦!!如果而家法國走黎問我地攞薩伏伊同尼斯我地搵咩拒絕啊!?反正奧地利都打唔落去啦逼佢比個更有利既條件去和談啦!!
咁會唔會太冒險啦...?後面仲有普魯士人喎...不如都係算囉...
而家唔打以後我地仲邊有咁好機會啊!?屌!!你唔打我劈炮!!
7月19日加富爾辭任首相

8月托斯卡納大公國 帕爾馬公國 摩德納公國 教皇國北部既人民趁奧地利戰敗係英國支持下推翻左當地既君主成立中意大利聯合省
11月10日皮埃蒙特-薩丁尼亞以維拉法蘭卡和談既條款同奧地利簽訂蘇黎世條約
1860年1月21日加富爾復任首相
3月20日中意大利聯合省通過公投加入皮埃蒙特-薩丁尼亞王國
庇護九世下令歸還教皇國領土 唔係就向所有侵犯教皇國領土既人處以絕罰
不過已經冇人得閒理佢啦

而家皮埃-薩丁已經得到義大利北部同中部 加富爾履行卜諾姆比爾密約將薩伏伊同尼斯割讓比法國
呢個時候民間先得知卜諾姆比爾密約既存在 包括加里波底
咩話!?你割讓我鄉下比法國!?咁姐係咩啊!?我而家算係法國佬定義大利人啊!?
唔好咁嬲住 你係咩人唔係睇你邊到鄉下既 你愛邊個國家你咪係咩人囉 而家義大利就得返南面既兩西西里王國 你就趁而家去証明自己有幾愛國啦

拿話左你架啦 國王既野邊信得過既呢 不過加富爾講得岩而家兩西西里暴動緊 我地就去個到打個屬於義大利人民既義大利共和國返黎!!
激憤難平既加里波底離開左皮埃蒙特-薩丁尼亞王國去投靠返共和派既馬志尼
5月6日加里波底帶住一千人從熱那亞出發去西西里島 11日係西西里島西部馬爾薩拉登陸

加里波底出海

聽聞加里波底登陸 西西里島軍民齊齊倒戈投靠
14日加里波底自稱係維托里奧·埃馬努埃萊二世派黎統治西西里既獨裁官
27日加里波底開始包圍西西里首府巴勒莫 兩西西里國王派艦隊轟炸將巴勒莫夷為廢墟
得知兩西西里國王既惡行 英國派海軍支持加里波底
7月加里波底攻佔全個西西里島並渡海進入那不勒斯 沿途軍民前呼後湧夾道歡迎
9月7日加里波底同佢既千人團搭住火車無血開入那不勒斯城 兩西西里國王流亡加埃塔
呢個時候佢支"千人團"已經澎漲到四萬人
加里波底宣佈要攻入教皇國將羅馬定為義大利既首都!!

加里波底進入墨士拿

加里波底進入那不勒斯

呢下加富爾先知到自己玩大左
比馬志尼呢班共和派打左成個兩西西里王國返黎 一心要統一義大利既皮埃蒙特-薩丁尼亞"王國"咪顯得好冇道理囉
而且拿破崙三世聽到加里波底既豪言就即刻派兵去羅馬保護"聖伯多祿既遺產"
雖然加里波底仲未同皮埃-薩丁正式反面 至少佢仲自稱係維托里奧·埃馬努埃萊二世派黎既人
但如果我要派兵去接收佢既土地又一定要經過法國佬睇場既教皇國
咁咪會比佢以為我係黎幫加里波底手打教皇國既!?到時唔好話法國隨時全歐洲都圍過黎...
陛下!!而家就只有靠你御駕親征!!但記住千其唔好踩過羅馬 法國個邊我會諗辦法

9月29日皮埃-薩丁軍擊敗教皇國既法軍繼續南下
10月皮埃-薩丁議會通過合併南義大利 係南義大利馬志尼等共和派開始草寫憲法作回應
25日維托里奧·埃馬努埃萊二世繳請加里波底係泰亞諾會面解決南北分裂既危機

係泰亞諾城外 加里波底背後係萬幾個南方軍 係佢面前又係萬幾個皮埃-薩丁軍
一個鬍鬚佬騎住馬迎面而黎 佢係皮埃蒙特-薩丁尼亞國王維托里奧·埃馬努埃萊二世 統一左義大利半島另一半既人
世界只有一個義大利 係到可以統一到義大利既人只有一個
呢個賣國暴君想黎篡套人民既共和國!!唔好比佢呃到!!對冧佢!!
個鬍鬚佬一步一步向自己接近
馬志尼既聲音不斷係加里波底腦海中迴盪
抆刀!!開槍!!殺左佢!!殺左佢!!!!殺左佢!!!!!!!!






































義大利國王就係呢到!!
加里波底一聲全場歡呼回應
維托里奧·埃馬努埃萊二世行到去佢前面同佢握手
陛下 我以後咩都聽晒你啦
對唔住啊馬志尼 你係個民族既共和派 而我只係個純粹既民族派...
11月17日加里波底離開軍隊隱居到卡普雷拉島

泰亞諾扼手

11月南義大利公投支持加入皮埃蒙特-薩丁尼亞王國
1861年2月13日加埃塔陷落 兩西西里王國正式滅亡
3月14日維托里奧·埃馬努埃萊二世加冕為義大利國王
至此義大利已大致統一 只剩中部法國保護既教皇國同東北部奧地利控制既威尼托
6月6日義大利首相加富爾伯爵卡米洛·奔索病逝 終年50歲
我已經建立左義大利...再冇野好擔心啦....


義大利王國成立

1865年12月義大利王國從都靈遷都佛羅倫斯
1866年6月16日普魯士向奧地利宣戰 20日義大利加入戰爭向奧地利宣戰
義大利軍除左加里波底係阿爾卑斯山帶領既阿爾卑斯獵兵之外全線敗退
但普魯士打左場決定性既勝利令奧地利投降
奧地利為免令威尼托併入義大利就將佢交比法國
但10月21日法國係威尼托發起公投將佢併入義大利

維托里奧·埃馬努埃萊二世進入威尼斯

1870年7月普魯士向法國宣戰 拿破崙三世召回係教皇國既駐軍
冇左法軍既保護維托里奧·埃馬努埃萊二世下令義大利軍操向教重國最後既領土羅馬
9月20日羅馬城牆庇亞門
三百年前教宗庇護四世係羅馬城南面由米高安哲奴建造一座新城門並以自己命名 叫庇亞門
今日數千義大利軍包圍到庇亞門外宣稱要收復義大利既首都
只係得返幾百傭兵既教皇國 庇護九世下令士兵作象徵式既抵抗做成義大利武力入侵既法理事實
晏畫義大利軍炸開庇亞門外城牆進入羅馬 庇護九世拋棄佢既宗座宮殿逃入台伯河西岸一座城堡
座城堡叫梵蒂岡

維托里奧·埃馬努埃萊二世向庇護九世提出教宗保障法
教宗交出羅馬 義大利承認教庭擁有梵蒂岡同拉特蘭宮 為此教庭每年需向義大利繳交三十二萬里拉租金
乜撚話!?你地搶左我個國家仲要問我收錢!?收陀地啊!?我要流亡外國吹雞返黎收返我個國家!!
噢教宗唔好亂走 出面既世界好危險架 通街都有反教會既人架 你乖乖地留係梵蒂岡我地會保護你
姐係點啊!?你地要軟禁我直到我放棄羅馬為止啊!?我係絕對唔會向呢種威嚇妥協既!!

義大利軍入城後既庇亞門

1871年7月1日義大利王國遷都羅馬 前宗座宮殿改為義大利王宮奎里納爾宮 義大利完成統一
不過係佢隔離普魯士係短短十年間連冧兩大國 係個到我地見證魔王降臨

下集德意志統一

1878年2月7日在位三十一年既教宗庇護九世病逝享年85歲係至今在位最長既教宗
庇護九世死前希望葬係梵蒂岡城外既聖老楞佐聖殿同佢崇拜既聖人聖老楞佐陪葬
7月12日梵蒂岡囚徒既遺體運出梵蒂岡 有別於佢當年登基時所得到既希望同愛戴
係佢喪禮當日羅馬發生暴動 憤怒既暴民襲擊佢既車隊 破壞佢既棺木 將佢既屍體掟落台伯河
飄浮係台伯河上既屍體為教皇國一千一百一十四年歷史畫上句號

plan緊去意大利既行程所以up左呢篇重溫下

要成個經濟史嚟一齊講先有意思
首先意大利城邦喺地中海靠貿易起家，然後北歐漢撤同盟興起到衰落，之後就荷蘭堀起做海上馬車夫，光榮革命後，威廉3世個荷蘭佬做左英國國王之後反而英國開始取代荷蘭做歐洲貿易龍頭，再成就埋日不落帝國

其實意大利人有無打贏過仗

由統一左嘅意大利開始計?

統一前後

膠登仔都睇得明既簡易西史入門第三十八集:哈布斯堡受難記第六集:德意志1848年革命

遠係公元十一世紀係神聖羅馬帝國西南部既士瓦本地區個到有隻伯爵仔
佢叫布爾夏德·馮·索倫 佢係呢個家族可以追尋最遠既祖先
佢就係以下所有故事既開始

1142年佢個索倫伯爵個位就傳到比佢個曾孫腓特烈三世
因為佢同當時霍亨斯陶芬家族既神聖羅馬帝國皇帝海因里希六世同鄉而被受提拔
後來佢仲娶埋冇仔生既紐倫堡伯爵個公主繼承埋佢個領地
然後佢兩個生左個仔腓特烈四世 腓特烈四世又生左兩個仔
大仔就叫康拉德 細仔又叫腓特烈 腓特烈四世死後佢兩個仔就同佢分身家
康拉德既後人就叫法蘭克尼亞支系 腓特烈既後人就叫士瓦本支系

首先1575年士瓦本支系既後人又傳左十二代去到卡爾一世到
卡爾一世又有三個仔同佢分身家
大仔腓特烈分個份叫霍亨索倫-黑欣根支系
二仔卡爾個份叫霍亨索倫-錫格馬林根支系
細仔基斯杜化個份叫霍亨索倫-海格爾洛赫支系

而法蘭克尼亞支系既後人又傳左五代1333年傳到腓特烈五世手上
話說腓特烈五世有兩個仔 大仔叫約翰 細仔又叫腓特烈
1396年鄂圖曼人打到入巴爾幹半島從背後威脅到拜占庭帝國 為此教宗又發起多次十字軍征討呢班穆斯林
全歐洲既騎士係保加利亞既尼科波利斯集合 當中包括紐倫堡伯爵個兩個仔同神聖羅馬帝國皇帝西吉斯蒙德
呢班目無軍紀既騎士幾輪零散既衝鋒後就被擊潰 就連法國國王讓一世都成為呢班異教徒既俘虜
當時神聖羅馬帝國皇帝西吉斯蒙德都前無退路後有追兵命懸一線時 突然有兩隻騎士跑出英勇掩護西吉斯蒙德脫離險境
佢兩個就係紐倫堡伯爵腓特烈五世兩個仔約翰同腓特烈
兩位騎士捨命相救之恩 朕他朝定必雙倍奉還

1398年腓特烈五世死後就將佢既領地分比佢兩個仔
約翰繼承個份叫拜羅伊特同埋佢老豆既銜頭 腓特烈繼承個忽就叫安斯巴赫
1415年西吉斯蒙德將佢個領地勃蘭登堡選侯國交比細仔腓特烈
五年後佢啊哥約翰三世死埋 佢個領地又合併返落佢細佬到
而家索倫伯爵變成紐倫堡伯爵再升到勃蘭登堡選侯腓特烈一世
一朝暴發既索倫家族就自稱自己為高貴既索倫"霍亨索倫"

之後勃蘭登堡選侯腓特烈一世又再生左三個仔
大仔約翰分到勃蘭登堡-安斯巴赫藩侯 二仔腓特烈繼承老豆既勃蘭登堡選侯 細仔阿爾布雷希特得到拜羅伊特
大仔約翰又係短命種1464年就死左 佢個勃蘭登堡-安斯巴赫藩侯又併返入二仔腓特烈到
但1470年柏林發生暴動腓特烈比人趕走左 佢連埋佢啊哥個領地最後都合併晒入細仔阿爾布雷希特到
最後阿爾布雷希特生左三個仔 其中佢個二仔又叫腓特烈繼承左勃蘭登堡-安斯巴赫藩侯個位

1490年勃蘭登堡-安斯巴赫藩侯腓特烈二世生左佢第三個仔叫阿爾布雷希特
霍亨索倫家族一個旁支未系既細仔都唔洗指意繼承到D咩領地 咁佢就入左教會做野
點知佢係1510年被選為條頓騎士團團長 最後佢仲將條頓騎士團改為一個世俗國家普魯士公國
雖然你可以靠政治手段改變呢個國家既政治制度 但佢既經濟制度呢?

條頓騎士團係教宗冊封既騎士領地 係一般既封建制度下騎士只係貴族地主既打手
但係條頓騎士團佢地既土地係神聖羅馬帝國割比佢地既 佢地騎士係羅馬教庭派過黎既武裝修士
所以係佢地之上並無附屬於任何領主 而佢地係騎士團國入面就同時行使封建主同教會既權力
係到就只有農奴係緊緊縛死係呢片土地上面 騎士團就會為佢地既騎士分配若干既土地同農奴去供養佢地既生活
而騎士對佢既農奴就有全部既權力去維持自己既經濟生活
到條頓騎士團被廢除左之後 呢班唔再係騎士既騎士就得到左個新稱號
叫容克

普魯士公爵阿爾布雷希特一世傳左個位比佢個仔之後佢個支系就絕嗣 普魯士公國都位入埋勃蘭登堡選侯到
最初容克都只不過係個比較大權既中世紀地主姐
但佢地趁三十年戰爭勃蘭登堡選侯國大量貴族戰死農民離散 呢班匿係東普魯士過住和平生活既容克乘機大量收購勃蘭登堡既土地
等戰爭結束後佢地就成為霍亨索倫家族下面最大既政治勢力 但佢地惡極都不過係班耕田佬而已
重要既係三十年戰爭結束後英國荷蘭呢D商業國家相繼掘起
佢地既土地發展晒做城市 糧食全部依賴入口 係呢個時代東普魯士既容克地主靠北海貿易賺左一大筆
到普魯士國王腓特烈·威廉一世時佢終於下定決心要整治下佢地

腓特烈·威廉一世就立法要所有容克要加入政府或軍隊 以為咁就可以加強對佢地既控制
但結果反而係比佢地操控晒國家大權 再加上容克對農奴既權力令佢地可以拖晒全國既農民上戰場
最後得以做就普魯士成為當代既斯巴達同埋佢個仔腓特烈二世既時代
然後又過左一百年

霍亨索倫家族族譜


https://youtube.com/watch?v=cJW5JATYa78



https://youtube.com/watch?v=f1U0beJtPPI

今集BGM

1815年普魯士係維也納會議中從法國佬手上得到萊茵蘭
萊茵蘭係個點樣既地方呢?
萊茵蘭係萊茵河東岸 有肥沃既土地豐富既礦產同林木資源 同普魯士本土呢座大雪櫃比萊茵蘭真係太富庶
但即使係咁普魯士得到萊茵蘭都係得物無所用
因為普魯士係德意志地區最東面 而萊茵蘭就係德意志地區最西面 中間仲隔左十幾個小國
每過一個國家就抽一次關稅 等萊茵蘭既產品運到返普魯士時都唔已經唔值錢
呢個時候1841年有條友叫腓特烈·李斯特出左本書叫政治經濟學的國民體系

李斯特係佢本書入面提到自由經濟只會對已經工業化既國家有利
而自由經濟只會被工業國家用黎破壞未發展國家既經濟
所以未發展國家應該要用貿易保護黎比自己經濟得而發展

呢本書就比時任普魯士國王腓特烈·威廉三世睇到 仲有當時一眾受英國工業所威脅既德意志小國既君主
1828年2月14日普魯士 黑森公國簽訂關稅同盟
1831年黑森-卡塞爾公國 薩克森王國加入普魯士黑森關稅同盟
1834年1月1日普魯士成立德意志關稅同盟
1835年2月20日黑森-洪堡伯國 5月12日巴登大公國 12月10日拿叟公國加入德意志關稅同盟
1836年法蘭克福自由市加入德意志關稅同盟
1840年6月7日腓特烈·威廉三世過身 佢個仔腓特烈·威廉四世繼位
1841年布倫瑞克公國 1842年盧森堡大公國加入德意志關稅同盟

到而家普魯士已經打通晒德意志北部既關口 萊茵蘭既天然資源源源不絕流入普魯士
普魯士既容克將佢既田地改成工廠 農奴變成工人
容克地主變成容克工廠主 賺起佢地以往更難以想像既大生意
直到1842年

腓特烈·威廉四世

統一前既德國 紅線係德意志邦聯範圍 黃色係奧地利 藍色係普魯士 西面個忽係萊茵蘭

1842年係日德南半島南部由丹麥王國分封既石勒蘇日格-荷爾斯泰因公國
當地既德裔平民發生反丹麥暴動 要求脫離丹麥王國
雖然呢場暴動好快就被鎮壓
但問題係石勒蘇日格-荷爾斯泰因公爵正正就係個德國出身既貴族奧古斯滕堡家族既基斯蒂安·奧古斯特二世
而呢場暴動就係佢暗地裡支持既

前拿破崙元帥波拿道特 後來成為瑞典國王卡爾十四世·約翰 佢係1844年3月8日過身由佢個仔奧斯卡一世繼位
雖然瑞典係佢老豆在位時已經定立永久中立既政策 但佢都受到民族主義既影響希望可以統一泛斯堪的那維亞國家
德裔民族係荷爾斯泰因公國既動亂正好係佢團結起北歐各國既理由
班日爾曼生番想入侵我地維京人既神聖領土啊!!

不過佢咁講就言過其實啦 最初德意志各國對荷爾斯泰因問題都未太上心
因為各國都只在乎自己既國家 邊個會關心民族大義呢?
但到1848年歐洲既革命年 呢個議題就有左另一個意思
1月12日西西里島宣佈獨立
1月20日丹麥國王基斯蒂安八世過身佢個仔腓特烈七世繼位
腓特烈七世一登基就準備廢除石勒蘇日格-荷爾斯泰因公國併入丹麥政府直接管治
基斯蒂安·奧古斯特二世向普魯士求助


日德蘭半島 南向北黃色係荷爾斯泰因 啡色係德國人為主既南石勒蘇日格 紅色係丹麥為主既北石勒蘇日格

2月22日法國二月革命
3月3日匈牙利一個國會議員科蘇特·拉約什係國會中要求匈牙利從奧地利中獨立
最後一切保守專制既發源地 奧地利維也納
3月13日當地民眾趁奧地利軍隊去左鎮壓義大利革命就發起遊行一邊嗌住皇帝萬歲一邊要求首相梅特涅落台
時任皇帝斐迪南一世係個弱智仔 再加上失去軍隊保護 梅特涅只好菊躬落台流亡英國
但你落台事小 你落台之後邊個黎幫你執手尾呢?
答案係冇既

過街梅特涅

15日匈牙利人民響應科蘇特既號召攻入布達議會宣佈匈牙利獨立
18日普魯士首都柏林市民遊行要求民主自由同埋統一德國 腓特烈·威廉四世就派兵鎮壓
衝突中軍隊意外射殺一人 柏林既市民就搭起路障驅逐軍隊 戰鬥十三個鐘後都未分勝負
腓特烈·威廉四世擔心再打落去自己就會變成下個路易十六就主動撤回軍隊接受民眾既要求
29日普魯士自由派內閣成立
咁你地滿意啦?
唔得!!唔滿意!!我地係荷爾斯泰因公國既德國同胞比丹麥既暴政折磨緊!!我地要出兵丹麥解放佢地!!
呢下就變成大問題啦


三月革命


腓特烈·威廉四世係人民包圍下向三月革命死者鞠躬

話說係十五世紀當時丹麥王國分封既石勒蘇日格公國佢地個公爵阿道夫八世 佢同時又係神聖羅馬帝國既荷爾斯泰因公國公爵
1459年阿道夫八世冇仔送終 佢兩塊封地就返到去佢近親丹麥國王基斯蒂安一世到
但因為石勒蘇日格同荷爾斯泰因兩公國長期係同一家族管治下 當地貴族既利益早就連埋一齊
阿道夫八世死後兩公國既貴族擔心呢塊分別由兩個國家分封既土地會遲早分裂
佢地就要求基斯蒂安一世同當時既神聖羅馬帝國皇帝腓特烈三世簽署里伯條約
承諾石勒蘇日格-荷爾斯泰因兩公國天長地久海枯石爛永不分離

如是者又返到四百年後 普魯士要出兵荷爾斯泰因解放當地既德國人
咁由丹麥人為主既石勒蘇日格你要點算?
普魯士就向丹麥提出恢復基斯蒂安·奧古斯特二世同佢個奧古斯滕堡家族係石勒蘇日格-荷爾斯泰因公爵個位
但丹麥又唔滿意啦 成單野完全係佢搞出黎架嘛!!仲我要我比返佢!?不如咁啦我王室有個支系格呂斯克堡家族 交比佢又如何?
咁咪姐係將我D同胞從一個丹麥人交比另一個丹麥人!?你冇誠意傾既就食子彈啦!!
4月普魯士帶住德意志邦聯出兵石勒蘇日格-荷爾斯泰因

4月25日奧地利頒布一份非常保守既憲法 結果5月15日維也納再次發生暴動 斐迪南一世全家逃亡因斯布魯克
失去左佢地既皇帝 奧地利國內向民族都要求得到同匈牙利平等既自治權
捷克 斯洛伐克 克羅地亞 羅馬尼亞 斯洛文尼亞相繼做反

梅特涅一落台曾經係全歐洲最專制既地區轉眼就變成民主國家 果然梅特涅係人類公敵啊!!
而家我地既工作就只係剩底統一德意志民族啦
5月18日德意志各地既"民選"代表齊集法蘭克福既聖保羅教堂商議德意志統一既議題
雖然佢地話係話民選 但德意志各國選舉法各 而大部分選舉層都非常狹窄 呢班人又可以有幾大代表性呢?
唯一可以肯定既就係佢地都係專家學者 全部都係D讀書讀上腦既人
係呢班代表當中仲包括前神聖羅馬帝國諸侯 德意志邦聯加盟國之一既波希米亞王國既代表
佢一入到教堂就比人截住左
咦?你黎做咩架?
開會囉 呢到要傾點樣統一德國架嘛?一直都係德國一部分既我緊係要黎啦
呢到唔係傾點統一德國 係傾點統一德意志個喎 你呢D斯拉夫人返鄉下搵你既俄國佬啦 如果你係咁想傾既就咁你地D人轉晒講德文先啦哈哈哈
咁就比人趕走左啦


議會代表進入聖保羅教堂


法蘭克福國民議會

屌 班德國佬準備賣起我 咁我地留係奧地利帝國同德意志邦聯都冇意思啦!!
6月2日班波希米亞既代表返到布拉格就自己又搞左個泛斯拉夫會議呼籲俄羅斯以外既斯拉夫民族又要建立一個統一國家
但6月12日布拉格德裔平民發起暴動解散左泛斯拉夫會議

7月德國各地831個代表終於到齊法蘭克福正式開始會議討論點樣統一起德意志各國
有D保守派就主張保持各國君主既前題下建立一個邦聯制既統一德國
咁咪姐係而家德意志邦聯!?咁姐係德國已經統一左架啦!?咁你仲黎傾D咩啊!?
咁又有D開明D既保王派就主張保留各國君主同時成立一套共同既憲法去規範佢地
咁如果佢地唔跟呢?係咪要其他跟隨憲法既國家武力推翻佢?咁咪又係要德國人打德國人?
咁D共和派又提出不如索性推翻晒所有君主建立德國人民既共和國啦!!
哦 咁我比支槍你上山打遊擊啦

拗左一大論佢地得出個結論就係 一定要有個國家主導起德國統一
咁簡單啦 家陣德國最強大既國家緊係非奧地利莫屬 將德意志邦聯同奧地利帝國合併成七千萬人口既中歐帝國 到時我地德意志民族就係歐洲最強大既國家!!
你肯定奧地利真係最強大既國家?佢德國個部分好弱個咋喎 佢成個國家有廿9幾個民族而大部分領土都唔係德國人既地方 我地岩岩先趕走左個波希米亞人 由奧地利統一德國咪姐係拿佢D屎上身!?
咁由普魯士統一起奧地利以外既德意志國家囉 你地冇野好反駁啦掛?
ON9由普魯士統一德國你地北德既新教徒緊係高興啦!!我地南德既公教徒絕對唔要跟隨你地呢班馬丁·路德既異端!!
一班南德國既代表咁又拍台走佬

剩底呢班之後就要畫出德國既範圍啦
考慮到之前波希米亞單野佢地要明確指出邊到範圍內係將要統一既德國邊到唔係
咁就由西從萊茵河起 東到易北河 南到多瑙河 咁北呢...
就到艾達河為止啦!!荷爾斯泰因公國係德國自古以來神聖不可分割既領土一部分!!

而係丹麥德軍好快就成功收復整個石勒蘇日格同荷爾斯泰因
但英俄奧介入要求普魯士撤兵 瑞典既志願兵又源源不絕加入
再加上丹麥既海軍優勢 腓特烈·威廉四世都意興闌珊下令普軍撤兵
但普魯士將軍又拒絕喎 我係黎服務德意志邦聯唔係普魯士國王 有咩命令要落既就經法蘭克福國民議會先啦!!
8月26日腓特烈·威廉四世見管唔住兜兵就只好兜過軍隊同丹麥簽左八個月既停火協議

反對!!區區一個普魯士國王憑咩代表德國啊!!
9月5日法蘭克福國民議會以238票對221票否決左停火協議
親普魯士既議會主席冇辦法說服議會接受停火協議就辭職
新上任既主席雖然係19日說服議會通過左停火協議 但又到民間不滿
屌!!賣國君主加賣國議會!!全部推翻晒佢建立共和國啊!!
法蘭克福既市民發起暴動要推翻法蘭克福國民議會 法蘭克福國民議會向普魯士請求鎮壓
暴動被鎮壓後共和派都退出埋法蘭克福國民議會

12月2日係因斯布魯克奧地利既貴族幾經唇舌總算說服到佢地個弱智皇帝斐迪南一世傳位比佢個18歲既姪仔弗朗茨·約瑟夫一世
弗朗茨·約瑟夫一世繼位後就著手反攻維也納
12月8日普魯士通過憲法
1849年2月5日普魯士第一屆國會選舉結束
係下議院勃蘭登堡選區其中一個當選既議員係個39歲既容克地主 佢叫奧托·馮·俾斯麥

青年弗朗茨·約瑟夫一世


青年俾斯麥

3月28日法蘭克福國民議會完成佢地最後既工作 通過屬於全德意志民族既保羅教堂憲法
其中第一條記載德意志帝國由目前德意志邦聯領土範圍構成
而第二條就寫一個同另一個非德意志國家有共同國家元首既德意志國家需要有同該非德意志國家相分離既憲法同政府
法蘭克福國民議會就攞住呢套憲法去要求德意志各國簽署
第一個佢地就搵到去弗朗茨·約瑟夫一世順便希望佢加冕為德意志帝國皇帝

ON9我簽左既咪姐係要立多幾廿套憲法同政府比我境內咁撚多個國家!?到時容乜易全部同我反晒面架!?扯啦混吉!!
咁就比人趕走左
不過唔緊要奧地利唔識野仲有個普魯士做水泡 咁佢地又搵到上腓特烈·威廉四世到啦
德意志皇帝!?我同丹麥佬打場仗你地都要指指點點既仲想我簽你地套憲法!?我要做德國皇帝就會靠自己既力量去做唔洗你地班蟻民去施捨!!
就連普魯士都趕埋佢地走 冇左普奧兩大國既支持 法蘭克福國民議會連一個肯簽署保羅教堂憲法既國家都搵唔到

姐係點...?我地傾左成年既民族統一大計咁就玩完...?
未!!仲未完既!!咁就証明我地而家只係剩底一條路!!推翻晒所有賣國君主建立德意志共和國!!
普奧拒絕左保羅教堂憲法之後德國各地都發生共和黨人暴動威逼各國接受憲法

4月5日丹麥係停火期結束前兩個月突襲石勒蘇日格
佢地以炮艦轟炸岸上既德軍但反而比德軍既炮兵炸沈左兩架丹麥戰艦
丹麥破壞左停火協議後德軍直上丹麥本土無人能擋
見丹麥輸成咁英法俄出而調停建議石勒蘇日格併入丹麥 荷爾斯泰因獨立
丹麥同奧地利都反對呢個提議 但普魯士贊成就借機退出戰爭
冇左最強大既普魯士陸軍

石勒蘇日格-荷爾斯泰因戰爭勝利後丹麥軍返回哥本哈根

4月21日普魯士下議院通過保羅教堂憲法 但腓特烈·威廉四世派佢細佬威廉·腓特烈·路德維希帶兵解散下議院
之後腓特烈·威廉四世更改憲法以納稅額限制選舉權
今日係德國民主最黑暗一日啊!!
唉...德國又統一唔到 石勒蘇日格-荷爾斯泰因又守唔住...成班書生...靠你地邊成事架...
俾斯麥眼尾都唔稍佢地就返左屋企 因為佢係容克仲有大把錢比佢選普魯士下議院

而從丹麥返到家鄉既普魯士兵佢地都唔係樂得清閒
5月14日巴登大公國既共和+共產黨人推翻左巴登大公建立巴登社會民主共和國
巴登大公流亡普魯士請求出兵鎮壓
巴登唔係一件個別事件 德意志各國軍隊都調晒去丹麥 各地既共和/共產黨人都乘機做反
腓特烈·威廉四世又派佢細佬出兵巴登 再借呢個機會一次過派兵到全德意志邦聯處死晒所有反君主制既人

5月弗朗茨·約瑟夫一世請黎俄軍鎮壓匈牙利叛亂 奧地利王室返回維也納
就如同法國同義大利一樣 德國既1848年革命亦不無例外以失敗告終

雖然從下至上統一德國既希望已經破滅 但係上面總有D野心家仲未放棄呢個希望
5月26日腓特烈·威廉四世請黎薩克森同漢諾威國王結成三王同盟
呢三個國家會繼續保留各自既國王但會有共同既議會
而薩克森同漢諾威只會係其他德意志國家都同奧地利組成聯盟既情況下先會退出同盟
1850年3月20日普魯士 薩克森 漢諾威正式成立愛爾福特聯盟議會草擬由普魯士主導既"小德意志"憲法
奧地利指責愛爾福特聯盟議會違反德意志邦聯規條 但當時大多數德意志國家都對奧普間既爭執漠不關心

7月丹麥軍反攻擊退冇左普魯士參與既德軍收復石勒蘇日格
係日德蘭半島既德軍節節敗退時 黑森選侯國發生暴動
但黑森選侯開都未開聲普魯士軍已經踩到入黎準備幫手鎮壓啦
不過等佢地去到黑森選侯國邊境時已經有人捷足先登 佢地係巴伐利亞同符騰堡既軍隊

你地係邊個!?邊個派你地黎做咩架!?
哼好笑啦 我地係歐洲最強大既普魯士陸軍奉我地國王之命黎鎮壓黑森既叛亂既 你地呢班茄呢啡死開睇我地表演啦
ON9呢到你鄉下啊!?你國王叫你黎你就黎啊!?佢問過黑森選侯未啊呀?我地係黑森選侯請黎幫手鎮壓既 你地呢班不請自來既白撞再唔走就當你入侵黑森選侯國!!
咩話咁撚臭串!?我係要入黎啊!!彈出彈入喎打我啊笨
好啊!!

就咁巴伐利亞 符騰堡同普魯士既軍隊就係黑森選侯國邊境對峙劍拔弩張
德意志各國都驚覺到普魯士既侵略性紛紛向奧地利求助
呢個時候奧地利岩岩靠俄羅斯穩定左自己既局勢 而佢地到而家依然對七千萬中歐帝國既"大德意志"計畫念念不忘
佢地準備要利用呢個事態黎重建佢係德意志地區既主導權
點做?
又係搵俄羅斯

奧地利一邊鼓勵巴伐利亞 符騰堡同普魯士開戰 另一方面就同俄羅斯結成同盟
薩克森 漢諾威見大多數德意志國家都倒向奧地利就退出愛爾福特聯盟
見俄奧準備搵自己開刀而自己又孤家寡人腓特烈·威廉四世就只好死死氣向奧地利求和
11月29日奧普簽訂奧爾米茨條約 重新承認德意志邦聯 奧地利為主席 普魯士為副主席
普魯士從黑森撤軍 解散愛爾福特聯盟議會 返回石勒蘇日格-荷爾斯泰因戰爭
到呢刻德意志統一終於絕望 同樣係德國人既奧地利暴君為左佢既既私利令德意志民族永遠都要處於分裂狀態
奧爾米茨條約無論對於腓特烈·威廉四世定德國人民都係個恥辱

1851年7月俾斯麥被委任為普魯士駐德意志邦聯代表

1852年石勒蘇日格-荷爾斯泰因戰爭結束
5月8日丹麥 瑞典 英國 法國 普魯士 奧地利 俄羅斯簽署倫敦議定書
石勒蘇日格 荷爾斯泰因 勞恩堡以共主形式併入丹麥王國但唔行丹麥憲法
而丹麥國王腓特烈七世人到中年仍未有仔生 而繼承順位最高個個偏偏就係一切起因奧古斯滕堡家族既基斯蒂安·奧古斯特二世
瑞典國王奧斯卡一世就提出腓特烈七世學自己老祖波拿道特咁收自己做契仔
咁腓特烈七世死後就可以由奧斯卡一世繼承丹麥王位建立泛斯堪的那維亞帝國

ON9 比你地合併我不如攞佢黎餵德國佬
各國否決左奧斯卡一世既提議 改為比錢基斯蒂安·奧古斯特二世換取佢放棄丹麥王位繼承權
畫走左奧古斯滕堡家族之後繼承順位最高既就係格呂斯克堡公爵腓特烈·威廉第四仔基斯蒂安
等腓特烈七世死後將會由佢繼承丹麥王位

1853年克里米亞戰爭爆發俄羅斯入侵鄂圖曼 英法威脅對俄宣戰俄羅斯即刻走去搵奧地利求援
匈牙利個次我又幫你 普魯士個次我又幫你 今次我係預埋你先咁勇架咋 你唔係咁都托我手肘下話?事成後我地平分巴爾幹!!
我唔知!!我唔理!!總之你同我死出多瑙河唔係就開拖!!
好!!你咁撚絕情以後有咩事唔洗旨意黎搵我!!
革扯左俄國佬之後奧地利人就走黎搵普魯士要求訂立攻守同盟準備隨時加入戰爭

呢個要求就比左個大麻煩普魯士 呢個時候普魯士分成兩派
一批親英法派 我地應該企係英法個邊加入戰爭爭取英法支持普魯士係德意志既地位!!
另一批係親俄派 ON9而家奧地利就係想企英法個邊先黎搵我地啊嘛 跟奧地利企同一邊對我地既地位有咩幫助呢!?
係法蘭克福既德意志邦聯議會 普魯士既代表俾斯麥就另有睇法
佢雖然係親俄派既人但佢心中卻係支持親英法派既主張 佢就返去柏林解釋佢既立場
你地雙方都係係錯誤既基礎上討論呢個話題 我可以保證奧地利係絕對冇條件加入戰爭既!!無視佢份攻守同盟我地自己一個加入戰爭啦!!
但如果如你所言我地獨自加盟英法咁咪姐係將奧地利推向俄羅斯個邊?咁到時又係俄奧聯手壓返我地對我地又有咩益處呢?
最後普魯士既唔企英法個邊亦唔企俄羅斯個邊 4月20日普魯士同奧地利簽署共同防禦協定隔岸觀火
6月俄羅斯從瓦拉幾亞 摩爾達維亞撒兵 9月奧地利駐入瓦拉幾亞 摩爾達維亞 12月奧地利同英法簽署共同防禦協定

出任首相時既俾斯麥

從此呢隻手佢再未放開過 所以呢架船永遠唔會沉


https://youtube.com/watch?v=NAslBqrbof4

下集德意志統一戰爭

咁意大利城邦，由其是威尼斯，由13世紀到16世紀，稱雄地中海3百年

係喎 果時玩Medieval II Total war都有威尼斯共和國玩

又黑意粉
明明佢威過
威尼斯唔駛講
意粉王國屌打奧匈又唔提
聽人鳩up話佢二戰輸比「土著」呢啲fake news
果個所謂「土著」好鬼勁架

Btw 排版排到chapter 10 馬J路德

繼續

膠登仔都睇得明既簡易西史入門第三十九集:哈布斯堡受難記第七集:德意志統一戰爭


https://youtube.com/watch?v=f_6AQA4uzD0

今集BGM

呢幾年俾斯麥同威廉一世同下議院紏纏係憲法同預算之間
直到1863年10月15日丹麥國王腓特烈七世過身
根據倫敦議定書 腓特烈七世既遠親格呂斯克堡家族繼承丹麥王位為基斯蒂安九世
當中包括埋石勒蘇日格-荷爾斯泰因兩公國公位
但荷爾斯泰因既德裔人就抗議
乜撚野格呂斯克堡既基斯蒂安九世啊!?我地同丹麥行唔同既繼承法 荷爾斯泰因公國個位點畫都畫唔出奧古斯滕堡家族既範圍!!我地要求基斯蒂安·奧古斯特二世個仔繼承荷爾斯泰因公國!!
係 你地個繼承法係同丹麥唔同 但根據里伯條約石勒蘇日格-荷爾斯泰因兩公國永不分離 所以我繼承石勒蘇日格公國時係繼承埋荷爾斯泰因公國架啦
ON9咁點解係格呂斯克堡家族繼承石勒蘇日格-荷爾斯泰因公國 而唔係奧古斯滕堡家族繼承石勒蘇日格-荷爾斯泰因公國啊!?
問得好 呢份係我新寫既11月憲法 石勒蘇日格-荷爾斯泰因公國將併入丹麥王國!!
哇咁姐係丹麥對神聖羅馬帝國同德意志邦聯既侵略姐!?

回應丹麥11月憲法 12月24日薩克森同漢諾威率先帶萬二人攻入荷爾斯泰因 丹麥軍退守艾達河北岸
陛下 睇下 丹麥又出事啦 我地同下議院既憲法鬥爭可以告一段落啦 只要我地出兵丹麥下議院就再冇藉口去否決我地既預算
出兵丹麥唔係問題 但列強呢?上一次就係有各國阻撓先會和波收場 更何況我地今次連內政都有問題...
放心啦陛下 克里米亞戰爭之後歐洲再冇團結既國際同盟 況且我地以執行倫敦議定書既名義出兵就冇人有藉口可以介入

1864年1月16日普魯士向丹麥發出最後通牒 下令丹麥係48小時內廢除11月憲法
25日普魯士下議院再一次否決軍隊預算 威廉一世下令解散下議院
2月1日奧普聯軍渡過艾達河
小小一個丹麥比奧普兩大國圍攻唯一可以指望既就只有國際既支持
奧地利為同普魯士爭奪德意志邦聯支持就算唔想再介入民族紏紛都被逼出兵
俄羅斯係克里米亞戰爭後一直都想搵機會教訓下奧地利 但岩岩打輸仗既佢地無力再加入新既戰爭
法國拿破崙三世為突破奧普俄三國孤立就企左英國個邊 英國一日唔表態法國都唔會出聲
最後就連瑞典新國王卡爾十五世係佢老豆受挫敗後再無意再建立泛斯堪的那維亞帝國 而瑞典議會亦否決左出兵丹麥既議案
今次丹麥再得唔到國際既支持要靠自己抵抗奧普聯軍入侵

3月11日奧普宣佈倫敦議定書無效 兩國將會係戰後決定兩公國係丹麥既地位
4月18日奧普聯軍攻陷丹麥係艾達河既橋頭堡迪伯爾直入日德蘭半島
到呢到英國終於要表態啦


迪伯爾戰役

最初維多利亞一世都係支持佢娘家漢諾威王國既立場 的確係丹麥違反倫敦議定書再先 德意志邦聯只係去執行佢地簽署既國際條約姐 再講我祖家已經出左兵冇理由要我企佢對頭姐?
不過第二次做佢首相既巴麥尊就唔係咁睇啦
陛下 丹麥單野係你漢諾威既家事啊?定大不列顛既國事?將北歐維持係幾個小國狀態係我地係北海既利益 如果比奧普係日德蘭半島開幾個港口我地又要搵多幾多人去睇住呢個場?
4月25日英國召開倫敦會議調停各國為石勒蘇日格-荷爾斯泰因公國帶黎和平

雖然陸戰全敗但仍然保有北海制海權既丹麥立場強硬 堅持要兩公國併入丹麥境內
奧古斯滕堡家族既公位要求者本來預期由普魯士軍事支持佢上位 但佢家族係兩公國一直係行自由派既管治 普魯士唔希望係德意志地區再多一個自由派既政權
而一直深受民族問題困擾既奧地利唔想再多一塊由丹麥人同德國人混居既領土 但又唔希望普魯士係呢個問題上得益太多
法國就提出兩公國既歸屬問題應交比當地居民公投解決 奧普俄專制三國當然反對啦

結果成堆國家圍埋一齊傾黎傾去都傾唔到個結論出黎 拿破崙三世就首先唔耐煩
佢向普魯士表示 如果你再出兵丹麥既我唔會再有任何意見...
得到法國既默許普魯士係6月25日離開倫敦會議 而冇左法國既支持英國都再冇本錢介入歐陸事務
係呢日歐洲各國判左丹麥既死刑 只係佢地唔知道仲有個國家要幫佢墊屍底

6月28日奧普聯軍係哥本哈根門口既艾爾斯島登陸 7月12日丹麥投降
10月30日奧普丹簽訂維也納條約
丹麥放棄石勒蘇日格-荷爾斯泰因公國同勞恩堡公國既全部權利交於奧地利普魯士兩國

普丹戰爭既勝利令普魯士人民都忘記左俾斯麥既極權專制
就連自由派既報章都一致讚揚俾斯麥令普魯士變成德國既皮埃-薩丁 果然德國既問題只有用鐵同血先可以解決到!!heil鐵血首相!!

登陸艾爾斯島

之後俾斯麥就要同奧地利決定呢三個公國既命運
當時坊間都認為應該要將石勒蘇日格-荷爾斯泰因公國比返奧古斯滕堡公爵建立獨立既公國
而奧地利已無意再接收新既領土 呢個結論對佢黎講亦係順理成章
不過俾斯麥卻另有一個不可告人既計畫
我地真金白銀打場仗就係為左比個自由派係我隔離建立個政權?on9啦

1865年2月俾斯麥發表二月宣言要求
石勒蘇日格-荷爾斯泰因公國既軍隊由普魯士軍訓練同指揮
石勒蘇日格-荷爾斯泰因公國既電信郵遞同關稅由普魯士負責
普魯士負責開鑿基爾運河同關稅

奧地利 德意志邦聯 奧古斯滕堡對二月宣言一致嘩然
咁你姐係吞併石勒蘇日格-荷爾斯泰因公國姐!?
連威廉一世都對俾斯麥既強硬態度感到擔憂
無端百事你挑咩機姐?你想同人隻抽咩
無錯陛下就係隻抽 而家要同奧地利開拖佢係搵唔到人幫手 所以要打佢就趁而家
咁都唔係無端百事就打9奧地利架!?
德國統一係咪理由?普魯士要統一德國奧地利係最大既絆腳石亦係最大既踏腳石 我地同奧地利遲早必有一戰 但今日咁好既時機走左就冇下個架啦

見到奧地利同德意志邦聯反應咁大 俾斯麥只好"扮晒"死狗咁去到奧地利既加斯泰因向佢地示弱
對唔住啊我個口開大左 不如咁啦我地平分石勒蘇日格-荷爾斯泰因公國好冇?
我知你地為民族問題煩緊 只有德國人既荷爾斯泰因就交比奧地利 德國同丹麥人混居既石勒蘇日格就我哽左佢
而勞恩堡公國既主權歸你治權歸我 基爾港就交比德意志邦聯 我剩係負責當地軍事同警務 咁得唔得啊?
聽落唔錯就咁決定啦 8月14日奧地利普魯士簽訂加斯泰因專約

德意志邦聯各國本來滿心期待奧地利會保障石勒蘇日格-荷爾斯泰因公國統一同獨立
結果竟然同普魯士平分左兩公國 邦聯各國都批評奧地利出賣德意志邦聯
我係德意志邦聯大佬!!我中意點就點!!吹啊!?
睇住奧地利同德意志邦聯內訌 俾斯麥心知自己既奸計又得逞多一步

不過係佢踏出最後一步之前佢仲要多少少既保障
俾斯麥知道就算奧地利幾乞人憎都好 法國佬係唔會眼白白睇住有個國家可以主導德意志各國
拿破崙三世絕對會係我踏出最後一步時扯我尾巴
係簽完加斯泰因專約後俾斯麥就走左去法國既比亞里茨搵拿破崙三世
加斯泰因專約只係臨時條約 我地遲早會有個最終解決方案 到時希望你可以保持中立 如果成事既話我會支持你係萊茵東岸合併返D領土...

德國各地都有反加斯泰因專約運動要求廢除加斯泰因專約同復辟奧古斯滕堡公爵
見佢地企咁硬奧地利又淆淆地想退返荷爾斯泰因比奧古斯滕堡公爵
喂條條約係你呢個德意志邦聯主席國為分配德意志邦聯領土而同德意志邦聯成員國簽既條約黎個喎!!你想反悔啊!?無論作為德意志邦聯主席定加斯泰因專約你都有責任確保條約既執行!!

4月8日俾斯麥同新成立既義大利王國簽訂秘密協議 義大利會係"將來對奧地利既戰爭"中加入普魯士
第二日普魯士係德意志邦聯議會中提出成立一個普及 平等 直接選舉既議會黎解決德意志邦聯成員間既衝突
奧地利當然反對啦
喂我同奧地利平分石勒蘇日格-荷爾斯泰因你地又唔滿意 我想成立個普選既議會公平解決問題奧地利又唔比 你地係咪夾埋屈我先!?咁以後我自己成立一個普選組成既新德意志邦聯邊個想玩既跟我黎!!
聽到佢咁講奧地利就更加嬲啦
咁你係分裂德意志邦聯!!如果你真係咁做既我地德意志邦聯一定出兵鎮壓!!
劇本完成 俾斯麥心中暗笑

5月12日普魯士動員開始
6月7日石勒蘇日格既普魯士軍入侵荷爾斯泰因
奧地利指責普魯士入侵德意志邦聯成員國 要求德意志邦聯動員抵抗
錯!!係奧地利分裂德意志民族打壓德意志人民!!以後德國只會有一個啊頭!!要歸邊既就而家決定!!
14日普魯士退出德意志邦聯

德意志邦聯分裂成兩大勢力
支持奧地利既有
巴伐利亞王國 漢諾威王國 薩克森王國 符騰堡王國 巴登大公國 黑森-達姆施塔特公國 拿叟公國
黑森選侯國 薩克森-邁寧根公國 羅伊斯-格賴茨侯國 紹姆堡-利珀侯國 法蘭克福自由市
支持普魯士既有
梅克倫堡-什未林大公國 梅克倫堡-斯特雷利茨大公國 奧爾登堡大公國 安哈爾特公國 布倫瑞克公國
薩克森-阿爾滕堡公國 薩克森-科堡-哥達公國 勞恩堡公國 利珀-代特莫爾德侯國 施瓦茨堡-松德斯豪森侯國
瓦爾代克-皮爾蒙特侯國 不來梅自由市 漢堡自由市 呂貝克自由市同埋德意志外既義大利王國