[極高質分享]膠登簡易歐洲史入門

473 回覆
167 Like 5 Dislike
2019-05-18 11:53:55
10月5日巴黎清早城中既師奶聚集到巴黎東部聖安托萬既街市為佢一家大細準備早餐
咩話!?一個麵包20蘇!?點解咁貴架!?而家咩稅都廢晒點解D食物仲貴過幾年前架!?政府係到做咩架!?邊個可以為我討公道!?
就有個師奶跑入附近教堂鐘樓敲嚮入面既大鐘
屌你師奶我冇錢買早餐啊!!
樓下班師奶聽到又跟埋起哄
屌你麵包好貴啊!!冇錢啦!!
班師奶向西出發沿途不斷有師奶受到號召 煮緊早餐都揸住把菜刀加入
到佢地去到巴黎市中心既巴黎市政廳時已經聚集到萬幾人
係巴黎市政廳入面既巴伊見到都嚇一跳
咩事啊!?又巴士底日啊!?黎搶武器架!?
我地唔要武器我地要麵包!!就黎餓死老公瘟臭屋啦!!
咁你地過主都得啦 我地呢到得武器姐
唔信!!咁大間倉入面一定有野食既!!唔係你地平時食咩啊!?姐妹們衝入去!!
成班師奶衝入巴黎市政廳將入面反轉再反轉 入面既武器比佢地搶走晒但都搵唔到食物
氣又出完食物又搶唔到 班師奶都諗住留返啖氣暖肚返屋企繼續捱餓啦
但係皇家宮殿花園既露台上面奧爾良公爵路易·腓力睇住呢場大戲就同隔離D手下講啦
啊~如果你話呢班人去到凡爾賽宮會點啊拿?
嘻嘻 屬下明白 即刻去辦!!

就係人群開始散既時候突然有人係暗角大嗌
去凡爾賽!!佢地連成支軍隊都餵得飽個到點會冇食物!?
係啊!!冇錯!!凡爾賽一定有食物!!去凡爾賽!!

去邊啊去!?邊到都冇得去!!

當班師奶準備再次起程時 拉法葉侯爵同佢支國民衛隊及時趕到
咁大班人係到做咩啊!?想做反啊!?全部同我返屋企!!
等陣啊SIR!!佢地都係冇飯食先出黎姐!!佢地既遊行集會自由應得到保障!!
咩自由啊!?萬幾人抬住碌炮通山走已經充分危害到社會秩序同公眾安寧仲有咩理由唔夠!?
我老婆都係入面!!我早餐都未食!!我支持佢地既訴求!!我唔會執行你既命令既SIR!!
咁你係遺抗軍紀!!返去等打靶啦!!
NO SIR!!要打靶個個係你!!
成班國民衛隊舉槍指向拉法葉侯爵 前一秒仲凶神惡殺既師奶都被呢場突發既兵變嚇呆
OKOK你地大晒 咁至少確保佢地遊行途中既秩序OK?
下晝4點連埋國民衛隊近二萬人繼續向西前往凡爾賽宮
拉法葉侯爵係佢地背後搵黎一個斥侯
同我快馬加鞭趕去凡爾賽宮 而家有二萬人去緊佢地到 我呢邊隨時可能發生兵變 叫佢地準備

係遊行隊伍無所事事繼續前進時謠言就開始擴散
係瑪麗·安托瓦內特收埋晒全城既食物係凡爾賽宮準備餓死晒我地!!
我地同哈布斯堡打左幾百年竟然因為國王結個婚哈布斯堡既軍隊就駐到入巴黎!?
如果我地殺晒班德國佬我地咪可以成為正式既軍人?
結論:最衰都係個奧地利既女人!!攻入去殺左佢!!


凡爾賽遊行
2019-05-18 11:54:30
夜晚10點遊行隊伍終於到達凡爾賽宮
兩萬個國民衛隊同武裝師奶突然出現 係凡爾賽宮入面開緊會既國民制憲議會成員大驚出黎問個究竟
咩事啊!?又暴動啊!?
我地冇錢食飯希望國王陛下比個交代!!
好好好 師奶們稍安無躁 我地幫你去引見
國民制憲議會主席帶住六個師奶代表去晉見路易十六
班師奶就向路易十六呻啦
陛下出面麵包好貴啊 我冇錢食飯啦
哦 係咁咋話 人黎 同我比出面既人一人一個麵包
哇 多謝陛下!!陛下真係耶穌再世啊
得到麵包既師奶就好滿意返屋企啦

喂等陣!!一個麵包就收賣到你地!?你地真係黎乞食架!?
師奶我地好忙架 我地仲要返去煮晚飯架 我唔似得你地班死廢青啊 乜都係到嘈嘈嘈 咁得閒就正正經經搵返份工啦
成班師奶走晒 得返幾千個憤青同國民衛隊留係現場
點會咁架...
係班師奶分化左我地!!
一定係拉法葉特登拖慢遊行令班師奶要趕返屋企煮晚飯!!
衝入去!!衝入去!!殺死塊臭西!!

雖然班師奶走晒但最危險既憤青同國民衛隊仲圍係門外
米拉波就走去搵路易十六傾啦
陛下 對師奶黎講麵包係好實際 但佢地其實冇乜威脅 相反冇左班師奶阻頭阻勢而家留係外面既人先係最危險既 佢地會希望得到D比麵包既實際既野
嗯 我明你意思 咁幫我出去宣佈我願意接受八月法令人權及公民權宣言全部條文

但係出面既示威民眾依然不滿
我唔信!!你匿係重兵把守既凡爾賽講咩都得啦!!我要你搬返巴黎以示誠意!!
好好好我幫大家再同陛下反映下
然後到天光米拉波都再未返出黎

朝早6點有幾個憤青發現有個後門冇人看 佢地就從呢個門口進入凡爾賽宮
入到凡爾賽宮佢地就分散晒人去搵瑪麗·安托瓦內特間房
守軍發現凡爾賽宮被入侵就即刻封鎖各大門將入侵者迫返室外
最後有幾百個憤青被迫入大理石庭院
佢地見自己無路可逃就反攻大門
看門口既兩個法蘭德斯兵就開槍示警
點知打中左個細路
成班憤青一湧而上徒手將兩隻守兵扯開幾份
大理石庭院中既示威者返攻入凡爾賽宮
示威者中既國民衛隊成員同守城既法蘭德斯兵互相射擊
戰鬥聲嘈醒整個凡爾賽宮
被嘈醒既瑪麗·安托瓦內特發現房外一屋都係暴民就帶住佢兩個仔女跑去路易十六間房
點知比示威者發現左
奧地利塊西係到!!追上去!!殺左佢!!
瑪麗·安托瓦內特身邊既隨從一個個被暴民捉住 佢地既人頭成為暴民刺刀上既裝飾
最後直到剩低瑪麗·安托瓦內特三仔乸 暴民既魔爪準備將佢地碎屍萬段既千鈞一髮間
瑪麗·安托瓦內特及時趕入路易十六既睡房關上大門 將暴民隔絕於門外
然後係門外傳黎既係僕人既慘叫聲同人體既撕裂聲

大理石庭院
2019-05-18 11:55:23
然後一段沉默

然後大門一輪劇震 路易一家 僕人 侍衛 全間房所有人都衝前禁實大門
門外既暴民開始衝擊路易十六既睡房
奧地利既女人同我出黎!!
殺!!殺!!殺!!
咩咩咩事啊老婆!?
唔知啊老公 禾巧京京豬啊 國民衛隊做反啦!!
係門外暴民們既怒吼聲中突然傳黎一把響亮清晰既叫聲
你地係到對陛下間房做咩!?全部同我讓開!!
拉法葉侯爵及時趕到救左路易十六一家

拉法葉侯爵控制形勢後下令國民衛隊打掃乾淨凡爾賽宮後返出去等消息
然後就自己去晉見路易十六
臣救駕來遲令陛下受驚臣罪該萬死
唉~算啦算啦...快D帶你D人返去我唔想再見到佢地
...陛下...你肯定?我覺得你都係出去見下佢地好D...
我見佢地做咩啊!?佢地話肚餓我盟倉派包 佢地想要政治承諾我宣佈接受八月法令人權及公民權宣言
但佢攞咩回報我啊!?佢地踩亂我屋企殺我僕人侍衛謀害我家人!!我唔殺佢地已經寬容我仲出去見佢地仲咩啊!?
陛下的確錯係在佢地 但你而家出去見見佢地 佢地仲可以嗌聲萬歲返屋企繼續尊你為國王
但你見都唔見就趕佢地走既佢地今日殺你僕人侍衛聽日就會黎殺你全家 落去好好睇睇做場戲啦陛下...

晏晝路易十六出現係凡爾賽宮正門露台會見示威群眾
我已經明白到我既子民生活上既困苦 但我既奴僕蒙蔽我既耳目 班外國軍人侵凌我既百姓
多得各位義民黎到我既宮室除暴安良替天行道 為表達對我忠誠而高貴既子民既愛 我決定將居所搬返巴黎
忍住每一個字間內心既憤恨 忍住每一句話內心既怨懟
係台下路易十六對住近萬個衣衫襤褸既暴民 面目猙獰既國民衛隊 自己往日熟悉既面孔成為佢地手上火槍既刺刀既裝飾品
國王萬歲!!
係台下既歡呼聲中拉法葉侯爵為路易十六戴上巴黎公社既三色徽章將現場既氣氛推上高峰
但對路易十六而言呢一切只係屈辱
我地要見王后!!叫埋王后出黎!!
台下要求面見王后但路易十六咩都未表示拉法葉侯爵就係後台引埋瑪麗·安托瓦內特出黎
瑪麗·安托瓦內特一出黎氣氛即時跌落冰點
冇歡呼 冇萬歲
人群中有人舉槍指向瑪麗·安托瓦內特
去死啦奧地利既女人!!
係國王既地頭做咩啊!?人黎同我拖佢出去!!
然後拉法葉侯爵上前親吻瑪麗·安托瓦內特手背
台下繼續沉默

路易一家同拉法葉侯爵係露台接見群眾
https://youtube.com/watch?v=R6wPHByRros
2019-05-18 11:56:18
10月6日下晝1點國王既車隊係國民衛隊"護送"下從凡爾賽宮出發返回巴黎
係呢條車隊入面有個細路係馬車入面伸個頭出黎向人群不斷大嗌 唔好搞我啊媽!!唔好搞我啊媽!!
佢係路易十六既獨子5歲既諾曼第公爵路易·查理
由凡爾賽宮一路嗌到返巴黎既杜樂麗宮 一座係塞納河泮自路易十四起好凡爾賽宮後就荒廢既法國王室舊居
返到杜樂麗宮路易十六剩係拎左本關於查理一世既書然後粒聲唔出就返返入房
從此路易十六成為國民衛隊軟禁係杜樂麗宮既囚犯
而國民制憲議會中既貴族代表拒絕進入國民衛隊既魔巢巴黎開會而退出
路易十六更顯勢孤力弱

諾曼第公爵路易·查理
係凡爾賽婦女遊行之後米拉波開始帶埋班FD係巴黎皇家宮殿隔離既雅各賓修道院聚會討論議題
最初有西哀士 巴納夫 羅伯斯比爾
後尾愈黎愈多人慕名而來拉法葉侯爵 布里索都成為佢地一員

而係塞納河南面又有另一間修道院 叫科德利埃修道院
入面有丹東 馬拉 德穆蘭同布里索

八月法令廢除貴族同教會既稅收間接減少國家收入
內克爾發行三千萬里費爾國債但只有二百五十萬被認購
佢又印制一億紙幣但佢手頭擁有既儲備金只足以支付其中既四分一
當時法國負債已經升到上43億而且每年仲要償還3億利息
佢作為財政大臣權力範圍內既野已經做無可做 佢就走去搵國民制憲議會求助

你地可唔可以搵D新既資產作為儲備金黎比我印制新既貨幣呢
吓?你財政大臣黎個喎 全國既資產都係你手架啦 你仲想問我地攞D咩呢?
話就唔係咁話啦 有樣野係以前就算係國王都郁唔到
教會

提議一出口國民制憲議會入面既教士代表就屌晒鬼啦
教會既財產係屬於教廷!!唔係任何國家政權有權處置!!
米拉波提出根據人權及公民權宣言人人平等 議會有權徵收國內任何人財產既話咁教會一定唔會例外 否則教會就會成為特權階級
塔列朗就話 教會既財產係出自國民 咁國民當然有權自由處分教會財產
西哀士指出教會並冇擁有任何財產 佢地得到既只係使用權 目的係救苦濟世 如果有任何人可以取代教會既功能既佢都有權取締教會既財產
屌咁多野講 有種投票啊!!睇下邊個贏!?
11月2日568票支持對346票反對教會財產國有化法通過

一舉手間全國教會失去財產 全國各地國民衛隊以國民制憲議會既名義衝入大小教堂修院將入面一切值錢既野抬出街派街坊
只要上面一個命令佢地仲可以隨時鏟平教堂將土地分比無地農民黎耕田
當年路易十六既擔憂一語成籤 失去左貴族代表既抗衡 以普選產生既第三等級代表得到左為所欲為既權力
哈哈哈!!打倒教會!!同耶穌分身家啊!!
唔好搶啊!!唔好搶啊!!你要錢我比晒D值錢野你!!神台上面D野唔好搶啊!!冇左佢地我以後要點拜神啊!?
咩唔好啊!?再嘈我姦埋你添啊!!
呢日係諾曼第有個23歲既見習修女被趕出修院被逼還俗
佢個名叫夏洛特·科黛
法國著名劇作家高乃依既後人 不過到佢呢代只係個貧困潦倒既耕田佬
係佢13歲個年啊媽死左之後就入左修院讀書
除左佢老祖既名作席德 賀拉斯之外佢最中意睇既就係盧梭既書
夏洛特·科黛趕出修院之後就去左康城投靠佢姑媽

法國妹夏洛特...
夏洛特·科黛
2019-05-18 11:57:04
12月19日國民制憲議會發行4億里費爾指券 一種用沒收教會財產黎做抵押既債券
但坊間擔憂革命失敗教會回收財產令指券變成廢紙所以銷情並唔理想
後黎內克爾就將指券改為用教會財產做儲備金以貨幣形式發行
既然開左個頭就唔好比佢停囉!!因為修士同修女禁欲生活違反人權及公民權宣言 我地投票表決關閉修院同禁止修士宣誓囉!?
支持!!支持!!
咁天主教要唔要做國教啊!?
反對!!反對!!
1790年7月12日國民制憲議會通過神職人員民事組織法
所有神職人員唔再幫教廷打工而係由政府出糧 主教同神父由當地選民不論信仰投票產生 禁止神職人員出任公職並需向民族 法律 國王宣誓效忠
時任教宗庇護六世下令對所有宣誓教士處以絕罰 西哀士公開燒毀佢既主教袍以示表率 法國既教士分裂為宣誓派同不宣誓派
全國各地都有不宣誓派教士帶領教徙暴動
拿都話左教會係反革命架啦 打倒教會!!

指券

神職人員民事組織法通過既兩日後 7月14日巴士底日一周年
一個埃納省23歲國民衛隊隊長安托萬·路易·德·聖-茹斯特黎到巴黎朝聖
佢係到識到羅伯斯比爾之後跟埋佢加入雅各賓會
路易十六係巴士底監獄出席紀念活動 係會上路易十六向群眾發誓將會維護憲法效忠國家同人民
台下既群眾都歡呼萬歲
呢個時候人人都相信冇教會冇保守貴族 法國會穩步向君主立憲制

巴士底日一周年紀念日

拉法葉係巴士底日一周年紀念日帶領參加者向憲法宣誓
2019-05-18 11:57:53

安托萬·路易·德·聖-茹斯特

工作多年依然無力挽救法國經濟9月4日內克爾辭職返鄉下

當年個個貧苦報紙仔德穆蘭而家轉身為輿論領袖終於得到佢女朋友老豆承認許配個女比佢
12月29日卡米爾·德穆蘭 露西爾·杜普雷斯係聖敘爾比斯教堂成婚
由佢中學老死羅伯斯比爾同新聞界上經常照顧佢既前輩布里索做証婚

12月馬拉既人民之友報刊出一份路易十六逃離巴黎以消滅革命既計劃
全國嘩然
呢個時候佢地先發現佢地計劃既盲點
我地係搞緊君主立憲 如果冇左君主仲立咩憲!?

2月19日路易十六兩個做修女既姑姐準備出國前往羅馬 但係關口比人截住左
做咩啊!?你地係法國唔比人拜神我地咪去外國拜囉 咁都唔比啊!?
錯!!你地係拜神為名出國尋找外國勢力反革命!!
結果呢單野嘈到上國民制憲議會
米拉波就話啦 咳咳...出入境自由係人權及公民權宣言所保障既人身自由 佢地想走咪比佢走囉 咳咳...
米拉波你咳成咁既?冇野啊話?
冇 年紀大機器壞姐
國民制憲議會通過流亡禁止法禁止未經許可既出境 然後係後面加左條附款
如果國王離開王位等於退位

2月28日有百幾個年輕貴族去杜樂麗宮宣稱要救走被禁錮既國王同門口既國民衛隊發生衝突
米拉波即刻急急腳走去搵路易十六
陛下 咳咳...出面班友唔係你搵黎架話 唔好再諗住走 咳咳...對你冇幫助 我會係議會幫你搞掂佢
我知道架啦你返抖下先啦

雖然米拉波順誓旦旦 但病情一日一日加重慢慢佢連議會都上唔到
3月係米拉波缺席既情況下國民制憲議會通過攝政法
如果路易十六"失去"王位 因為佢個獨子諾曼第公爵路易·查理年紀仲細 所以攝政權將會交比同佢血緣最近仲留係法國既男性親屬
攝政順位第一係路易十六個細佬普羅旺斯伯爵路易·斯坦尼斯瓦夫 跟住就係奧爾良公爵路易·腓力
廢位既陰影愈黎愈重

3月31日羅伯斯比爾當選雅各賓會主席接替病重既米拉波
兩日後既4月2日米拉波就病逝
冇左米拉波既資助 德穆蘭自始就完全成為科德利埃會既核心成員
第二日一直跟米拉波搵食既德穆蘭係布里索法蘭西愛國者報寫左篇文揭穿米拉波同路易十六既關係
佢一直收受國王既利益 表面上係改革派 暗地裡係反革命既保王黨!!

4月18日復活節 路易十六一家準備去聖克盧同一班不宣誓教士望彌撒
但係杜樂麗宮外市民見到宮內既人係到準備國王既馬車就大叫啦
救命啊!!國王又準備逃走啦!!
好快人潮就係杜樂麗宮大門聚集 然後又好快拉法葉侯爵就帶住佢班國民衛隊黎維持秩序
請馬路上既行人返回行人路上 保持冷靜遵守秩序多謝合作
但聚集既人群實在太多趕極唔走 國民衛隊反而調返轉頭封鎖杜樂麗宮大門
拉法葉侯爵上前同路易十六講啦
不如陛下你第日再去過啊...?
咁係咪代表我地已經失去自由?

係史特拉斯堡有個德國大學生因為政局日益動盪中止學業離開法國返鄉避難

佢個名叫克萊門斯·文策爾·馮·梅特涅

當日帶全家出走薩伏依既阿圖瓦伯爵查理·腓力而家已經去到特里爾主教區既首都科布倫茨去投靠佢舅父特里爾大主教
佢係呢到召集從法國出走既保皇黨 令科布倫茨尤如佢地既流亡政府
查理·腓力同佢地既流亡政府係到安頓落黎之後成功搭上左係巴黎既瑪麗·安托瓦內特
我已經講掂左你啊哥神聖羅馬帝國皇帝利奧波德二世 佢會係奧屬尼德蘭準備一支軍隊接應你地 只要你地去到法國邊境就得啦

雖然阿圖瓦伯爵查理·腓力已經準備左個完美計畫 但封信去到個兩公婆手上又另有煩惱啦
老公老公睇下 你細佬寄左封信黎接我地走啦
走?走去邊啊!?根據流亡禁止法同攝政法我離開法國就算放棄王位 咁我係留低個仔係到自己走啊定帶埋奧爾良公爵一齊走啊!?
再講我作為法國國王揼低自己既王國流亡外國太樣衰啦 我最多都係走到安全既地方我唔會離開法國既!!
接壤奧屬尼德蘭既蒙梅迪要塞係唔錯既選擇 老婆快D上馬車我地今晚就走!!
吓!?咁趕!?我全副身家都係巴黎喎 我走左之後我食咩著咩玩咩啊!?
唔制啊 我D衫啊玩具啊首飾啊化妝品啊全部要跟我走架
家陣著草啊你估去旅行咩!?咁大車野出街全歐洲都知啦!!
唔制啊 佢地唔跟我我唔走 你自己同我諗掂佢

6月20日凌晨0時 經過個幾月既準備奧地利既軍隊已經集結係奧屬尼德蘭既邊境 瑪麗·安托瓦內特既家當亦全部運走
係之前個晚普羅旺斯伯爵路易·斯坦尼斯瓦夫一家已經離開巴黎前往布魯塞爾
路易十六自己一家大細都係樓下馬車入面等緊佢一齊離開呢個是非之地
臨走前路易十六一個人係書房緬懷呢座陪左佢一年既王宮 係呢一年呢庭王宮留比佢既就只有屈辱既回憶
咯咯
突然房門敲響 開門入黎既係拉法葉侯爵
陛下...早兩個月既事非常對唔住 奈何聚集人數眾多我只可以出此下策
臣知道陛下失去左米拉波係非常擔憂 臣知道陛下一直非常抗拒國民衛隊 陛下亦知道我同米拉波一直不和
但呢D都係政見上既不和 對陛下既忠誠臣絕不下於米拉波 所以希望陛下唔好再輕舉妄動 只要捱過立憲呢段時期臣都有辦法幫你解決
我明白 放心啦 我都忍左咁耐囉仲有咩唔忍得姐 退下啦

拉法葉侯爵離開房間 書房入面又剩低路易十六一個
不過我已經唔需要再忍啦...

下集制憲.立憲.斷頭台
2019-05-18 11:59:39
膠登仔都睇得明既簡易西史入門第廿七集:法國大革命篇第三集:制憲.立憲.斷頭台


6月20日晏晝1點路易十六 瑪麗·安托瓦內特 佢地個女瑪麗-特蕾絲 個仔路易·查理打扮成僕人既外表
然後一男一女侍婢打扮成貴族坐係一架普通既馬車入面出發離開杜樂麗宮 後面仲跟左架裝住瑪麗·安托瓦內特私伙既馬車
沿途非常順利 一行人離開巴黎都未被發現
到佢地接近邊境時路易一家已經完全進入遊山玩水既狀態

第二日夜晚佢地一行人去到接近邊境既聖默努爾德
經過一日舟車勞動路易一家搵左間酒店休息
佢兩個打扮成貴族既僕人將馬車上面既高級餐具名貴紅酒搬落黎為打扮成僕人既路易一家準備豐富既晚餐
全條村既鄉下佬都走黎呢間酒店到圍觀
哇~我成世都未見過咁有錢既~
緊係啦你成世都係到耕田 不過奇怪係個兩個著得好高檔既係到服侍個四個乞衣喎
話時話覺唔覺個男人好熟口面?
係囉...
路易一家嘆完晚飯之後又上返馬車繼續趕路

第朝21日6點杜樂麗宮 僕人進入路易十六睡房準備為佢梳洗
點知冇人
拉法葉侯爵!!拉法葉侯爵!!出事啦!!拉法葉侯爵!!
咩事!?
陛下唔見左啊!!
咩話!?
係佢枱頭剩係得呢封信咋!!
拉法葉侯爵打開封信 入面係路易十六親筆書寫指責國民制憲議會搶奪佢既權力 佢係網球場宣言之後簽署既法律全部無效
幾廿歲人仲玩離家出走!?下令全國既國民衛隊 同我反轉成個法國都要同我摷返陛下出黎!!

路易十六出走消息一傳出 巴黎上下都陷入一片恐慌 全市國民衛隊動員搜索
有冇人見過陛下!?幾點見過!?向咩方向走!?
係杜樂麗宮中 國民制憲議會亦陷入混亂
國王已經放棄王位!!我地要即刻立繼承順位最高既奧爾良公爵為王!!
陛下逃入奧地利我地係咪應該表達D善意呢!?如果唔係佢真係會搵奧地利會出兵消滅我地架!!
肅靜!!肅靜!!大家容我拉法葉侯爵發言!!陛下已經逃離巴黎係不爭既事實但相信佢仲未離開法國
如果唔係奧地利已經有所行動 我已經派人加強邊境戒備 只要我地追上國王帶佢返黎所有野都有彎轉
但係最壞既情況可能我地真係要準備戰爭啦...

而拉法葉侯爵係巴黎發出既信差好快傳到去各地既政府
包括聖默努爾德
乜原來琴晚個個真係陛下黎架...
你有見過佢!?
有!!跟我黎!!而家仲趕得切!!
聖默努爾德市長帶住百幾個聖默努爾德既國民衛隊追去隔離村瓦雷納敲響當地教堂大鐘
國民衛隊召集啊!!陛下逃亡啦!!瓦雷納既國民衛隊跟我去攔截陛下!!

夜晚路易一家馬車終於到達呢座邊境既寧靜小農村瓦雷納
車上既人仲未發現村中既異樣 但係每對緊閉既門窗背後都有一對對眼睛鴿實佢地

打扮成僕人既路易十六落車攞住護照搵市長辦入村手續
...黎做咩架...?
旅行觀光
...嗯...冇問題...不過都咁夜啦不如搵間酒店過夜啊?
好啊 有咩好介紹?
...跟我黎啦

係路易十六既目的地蒙梅迪 係到準備接應既奧地利軍收到消息路易十六已經去到瓦雷納不過計畫敗露
佢地即刻派幾十隻騎兵去瓦雷納營救路易十六 但佢地去到時呢條村已經比幾百個國民衛隊包圍
奧地利騎兵突圍不果就退返蒙梅迪
係村中某間酒店二樓 呢到聽唔到外面既爭吵同戰鬥聲
路易一家就好似琴晚咁安然準備佢地華麗既晚餐
然後有人推門入黎 係懷中攞左張指卷出黎 望左望路易十六

革命搞左咁耐 咩拉法葉米拉波佢地個名日講夜講但我都唔知佢地係點既樣
就連王后嫁左入黎法國十幾年我都唔知佢生成點
不過就只有你會將自己個樣印係貨幣上面然後全國通街派...
...你以為會冇人認得你?難為你夠膽落車喎 陛下?

第朝國民制憲議會代表攞住逮捕令黎到瓦雷納 以違反流亡禁止法拘捕路易一家

路易一家被捕
2019-05-18 12:00:28
係路易十六從法國邊境返鄉路上國民制憲議會已經開始討論緊佢既處置問題
路易十六背叛國家投敵賣國!!我地應該廢除佢個王位!!擁立奧爾良公爵!!
等陣!!而家可以肯既只有陛下離開巴黎呢點姐!!話佢投敵賣國言過其實 話唔定佢係比人拐帶呢!!
巴納夫!!你老頂米拉波岩岩死左你咁快爭住代佢舔國王鞋底!?
總之係而家處分國王對革命冇任何好處!!我地接國王返黎就當咩事都冇發生過OK!?

第二日 巴納夫搵埋班人係巴黎既大街小巷貼街招
對國王無禮既斬頭 誹謗國王既吊頸

6月25日夜晚7點國王既車隊係幾百個國民衛隊護送下返回巴黎
全市既市民都出黎目送呢場歷史時刻
唔係國王平時既御駕 只係一架普通有錢人坐既四輪馬車 入面坐既係裝扮成僕人既國王夫婦
一幕荒謬既畫面 唔再需要解釋
沈默既街頭 冷漠既視線
人民既感情已經判左路易既死刑
街上只係得返馬蹄同車碌既聲音返回杜樂麗宮

路易一家返回巴黎

7月15日國民制憲議會宣判國王無罪 舉國嘩然
無罪!?咁你當日憑咩拘捕佢架!?証據確鑿當場斷正都有得無罪!?因為佢係國王判佢有罪會影響政局咁仲要咩法律你地立咩憲啊!?
你同我講憲法!?係君主政體下指控國王本身就違憲!!
國民制憲議會中最大黨雅各賓派係散會後返雅各賓修道院爭拗投票取向
全場人拗過面紅耳熱 突然德穆蘭帶住佢班科德利埃既人破門而入
你地雅各賓派係國民制憲議會最大黨 國王被判無罪你地要負最大責任!!而家我地要搞聯署要求罷免國王你地跟唔跟!?
我跟!!
主席!!你上樑不正多次無視黨內決議再係咁我地退黨!!
羅伯斯比爾我同你幾廿年舊同學咪話我唔提你 我早知巴納夫同拉法葉係鬼黎!!
主席裁決...我宣佈所有人自行決定參與聯署!!
哼!!咁反對既人跟我走!!

巴納夫帶住拉法葉侯爵 西哀士 巴伊同264個反對判罪既主流派脫離雅各賓派然後係皇家宮殿花園隔離既斐揚修道院集會
而剩低136個雅各賓派就準備兩日後係戰神廣場公開收集簽名
係斐揚修道院新成立既斐揚派則決心要鎮壓呢場未來既暴動
而家社會已經夠亂啦 外國勢力又隨時入侵 我地國民制憲議會都已經得到國家全部既權力啦佢地仲有咩唔滿意呢?只有穩定社會先係保住革命成果既唯一方法
巴伊 你係巴黎市長 你發布戒嚴令禁止人民聚集
拉法葉侯爵 聽日你帶隊國民衛隊去戰神廣場驅散佢地
而我巴納夫就會去說服陛下接受憲法 只要確立立憲政體所有麻煩都會結束...

7月17日朝早科德利埃會既丹東 布里索 埃貝爾 德穆蘭係戰神廣場聚集左六千人收集簽名要求罷免路易十六
路易十六已經發過誓要捍衛憲法!!但佢背叛國家背叛民族放棄責任逃亡外國!!我地要求國民制憲議會停止路易十六作為國王既權力!!
巴黎公社已經發布戒嚴令!!係到聚集既群眾即刻解散!!要求罷免國王係叛國罪趁我拖你地去斬頭之前好快D走!!
巴伊同拉法葉侯爵帶住國民衛隊包圍戰神廣場
喂巴黎公社你既 你話戒嚴就戒嚴啊!?咁你咪大撚晒!?
噓~噓~
群眾不滿就掟石還擊啦
有種開槍啊笨撚7!!
好啊!!
被亂石襲擊既國民衛隊未待巴伊下令就開火還擊 當場死左十幾人
反革命分子巴伊同拉法葉侯爵帶住國民衛隊屠殺人民啊!!
巴黎公社下令通緝丹東 德穆蘭


https://youtube.com/watch?v=a9uVE4lwpPs


8月24日神聖羅馬帝國 薩克森 皮爾尼茨
奧普俄係1772年第一次瓜分波蘭後 波蘭係1791年5月3日通過五三憲法改革政府結果惹黎俄國不滿要脅要全面佔領波蘭
普魯士國王腓特烈·威廉二世同神聖羅馬帝國皇帝利奧波德二世就俄波關係立場係皮爾尼茨會面
我地應該保住波蘭黎避開俄羅斯既直接威脅 定陪俄羅斯一齊吞左波蘭好呢?
突然阿圖瓦伯爵查理·腓力破門而入
波蘭呢D算D咩呢而家歐洲最重要既係法國啊!!個到有班蟻民夠膽要推翻君主制啊!!利奧波德!!佢地既王后係你個妹黎架!!
我有十幾個妹你講緊邊個?
算啦利奧波德 雖然介入法國內亂對任何國家黎講都冇利益 但阿圖瓦伯爵不過想要個承諾姐 我地咪比佢囉
比還比但我冇諗過要打仗架...
8月27日神聖羅馬帝國皇帝利奧波德二世 普魯士國王腓特烈·威廉二世發表皮爾尼茨宣言
而家法國國王係全歐洲君主共同利害所在 為左令佢回復完全既自由 只要有任何歐洲國家對法國開戰我地兩國願意行使必要既武力

利奧波德 咁樣講咪打發到阿圖瓦伯爵而我地又唔洗上身囉 唔通除左我地仲有邊個國家敢開法國拖?

皮爾尼茨宣言
2019-05-18 12:00:44
9月3日國民制憲議會通過1791年憲法並得到路易十六簽署確認
9月14日路易十六向憲法宣誓
9月30日係羅伯斯比爾提議下國民制憲議會通過最後一條法案自我否定條例 為避免利益衝突所有參與制憲成員不得再加入議會
9月30日晚國民制憲議會完成兩年既任務全體躬恭下台 法國政府開始籌備第一屆國民立法議會選舉

國民立法議會話雖係民選既議會 但係法國三千萬人口入面只有四百幾萬交得稅既人先有選舉同參選權
而且佢地唔係直接選出議員而係選出選舉人再去選745名議員 而成為選舉人既要求更高全國亦只有五萬人合資格
加上係八月法令廢除左貴族教士既特權之後佢地大多數都達唔到選民要求
結果新成立既國民立法議會成為左中產商人既專政工具
最大黨係有260人當選既斐揚派 而雅各賓派同科德利埃會共有130人其中主要成員有布里索

根據1791年憲法國王係政府首長擁有最高行政權力 而立法同財政權屬國民立法議會
係國王之下由國王任命非國民立法議會成員為各部門長官組成內閣
國民立法議會每兩年換屆 未經國民立法議會許可冇人有權解散議會或逮捕議員
國民立法議會通過左既法令由國王簽署後頒行 但國王可提出否決權
被國王否決既議案兩個月內不得提出 同一議案國王只能否決兩次 議會第三次通過將會強制執行
11月18日新成立既國民立法議會第一項工作就係罷免練兵場慘案主犯 巴伊同拉法葉侯爵
12月9日路易十六任命斐揚派籌組內閣

就咁新成立既君主立憲法蘭西王國政府開始運作啦
國民立法議會提交第一條法案比路易十六簽署
否決
第二條法案
否決
第三條法案
否決
陛下啊...唔知係咪我心理作用呢...D好議案好似全部比你否決晒咁既...?
否決
如果你覺得內容有咩問題可以提出意見啊...?
否決
但係陛下!!你連徵兵令都否決埋喎!!奧地利同普魯士已經係萊茵蘭聚集緊軍隊啦!!
否決
陛下政府已經無法運作...請容我地內閣請辭...
否決

當法國政府因為路易十六既否決權陷入空轉時
阿圖瓦伯爵查理·腓力以割讓亞爾薩斯換取奧地利出兵
而奧地利就以承認第二次瓜分波蘭換取普魯士出兵
奧地利普魯士兩國結成軍事聯盟 由普魯士既布倫瑞克-沃爾芬比特公爵卡爾·威廉·斐迪南任聯軍司令
兩國軍隊陸續進駐萊茵蘭同奧屬尼德蘭
戰爭既威脅終於變成事實

係雅各賓修道院 雅各賓會同科德利埃會既成員正為戰爭既威脅互相爭論
我布里索作為雅各賓會係國民立法議會僅餘既議員 我支持戰爭既立場係堅定不移
因為發動戰爭將會係試驗國王對祖國忠誠既最佳機會 如果係外國入侵下國王連宣戰令都拒絕簽署既咁我地咪可以名正言順推翻佢囉
而全歐洲係君主暴政下受苦受難既民眾將會夾道歡迎我地既軍隊 最終我地將會成為全歐洲既救世主!!
冇錯冇錯!!支持動議!!
我反對
哦?又係羅伯斯比爾啊?敢問主席有咩高見呢?
我地要有心要推翻國王既戰爭與否根本唔係問題 我唔係反對一切既戰爭但而家既軍隊係邊個手上?
雖然士兵係黎只平民但帶兵既都係貴族 如果佢地都只係放軟手腳打輸仗都仲好D
但如果佢地夠膽打贏仗既 等佢地征服一大片土地手揸一大支軍隊邊個保證佢地唔會成為第二個凱撒!?
戰爭既結果往往係引向軍事獨裁 而用軍隊傳播共和更係一個政客最瘋狂既想法
世上邊個人會愛上武裝傳教士?你唔係諗住人權及公民權宣言會好似天譴咁一個閃電就劈死晒全歐洲既國王下話?
我唔會話今日我地搞既革命永遠唔會對世界有影響 但絕對唔會係今日!!
咁主席 呢個係咪你要求既投票立場?
2019-05-18 12:01:15
散會後布里索走左去搵女人
布里索搵既唔係普通女人 佢係個有夫之婦 而且仲係貴族既老婆
德拉普拉蒂埃子爵讓-馬利·羅蘭個老婆瑪莉-讓娜·腓力 人稱羅蘭夫人
老公係個工業家 老婆係有錢佬個女
兩人係1780年結婚 1791年因生意關係黎到巴黎
老公專注於工作老婆就成為佢背後既女人
最初羅蘭夫人為老公搞關係而係屋企搞好多宴會
慢慢羅蘭夫人係到認識好多政界既人物然後慢慢自己都成為佢地既一部分
羅蘭夫人長袖善舞思考敏銳吸引到唔少耐唔耐都有人會黎問佢攞意見
今晚黎個個係布里索

羅蘭夫人

頭先黨團大會上面主席就講左D咁野啦 夫人點睇呢?
簡單黎講而家雅各賓派分裂成主戰派同反戰派
主戰派係以你為首既國民立法議會議員 而反戰派就係羅伯斯比爾同在野黨員係咪?
冇錯 的確我地要投贊成票係冇人奈得我地何 但我唔希望再做成一次斐揚派分裂
咁簡單啦 既然你地黨內冇辦法互相說服對方既就用群眾黎講道理啦 睇下到時人民會企邊個個邊?
咁即係...?
我收到風我老公好快會被邀入閣 到時我會做場好戲 只要你適時配合下我就得架啦
2019-05-18 12:01:42
3月1日神聖羅馬帝國皇帝利奧波德二世過身佢個仔弗朗茨二世繼位
3月9日路易十六接受斐揚內閣請辭 讓-瑪麗·羅蘭接任內政部長
4月20日國民立法議會通過向奧地利宣戰 塔列朗出使英國承諾法國唔會侵佔領土換取英國中立
無論議會內外法國全國上下無不為戰爭鼓掌歡呼 但開戰既最後一關係路易十六身上
陛下 呢份係宣戰令 你想簽就簽啦
我簽 通過
!?
好奇咩 而家你地同歐洲最強兩個國家開戰 憑你地呢班烏合之眾要點樣抵擋?
你地不過係班平民出身既平民代表 你地識治國咩?你地識外交咩?你地識打仗咩?
我根本唔需要同你地簽任何法律 只要奧普聯軍攻到入巴黎佢地就會摧毀你地既議會你地既憲法然後恢復我既權力
到時我就可以通過一切我喜愛法律 你仲有冇咩法案想我簽?即管黎啦

對於路易十六再以否決權抵制國民立法議會 羅蘭夫人寫左封信批評路易十六既取態
一如羅蘭夫人所料路易十六但遲遲無所表示 羅蘭夫人就要佢老公係出席國民立法議會時公開宣讀呢封信
結果羅蘭子爵第二日就比人炒左魷

唔通你炒晒D閣員就係我地既滅亡你既幸福!?軍隊既失敗就係你既榮耀我地既恥辱!?
法國既人民!!你地有種既就衝入杜樂麗宮!!只要你地有日夠膽衝入黎既我地就可以揭穿呢到所有賣國賊既陰謀!!
羅蘭子爵被炒後布里索呼籲人民以杜樂麗宮為目標發動武裝請願
投閒在家既拉法葉侯爵致信國民立法議會請求雅各賓派抑制
法國已經夠亂啦 敵人已經打到埋黎啦 大家槍口要一致向外啊
家陣錯既係路易十六啊嘛!!你走黎幫佢講說話!?噓~拉法葉係貴族係保王黨係賣國賊!!

6月20日終於有班暴民出手 佢地強闖杜樂麗宮連番羞辱路易十六要求佢放棄否決權
瑪麗·安托瓦內特嚇到帶住兩個仔女避入國民立法議會會議廳 最後呢班暴民被巴黎市長帶兵驅散
但呢幕比奧地利駐法國大使睇在眼中 佢就將呢個故事寫信寄去比布倫瑞克-沃爾芬比特公爵
而到7月10日對內對外都無力挽救劣勢既內閣向路易十六總辭
但內閣總辭後路易十六就連任命內閣都拒絕 國民立法議會改任國王議會外國三方都信任既拉法葉侯爵出任軍隊總司令
拉法葉侯爵發信懇求反法同盟軍停止軍事行動比佢可以調兵返巴黎保護國王鎮壓暴動但被拒絕
7月11日國民立法議會宣佈國家進入戰爭狀態批准所有公民隨身攜帶武器

6月20日係杜樂麗宮向路易十六示威既市民
2019-05-18 12:02:58

6月20日中既瑪麗·安托瓦內特同佢對仔女

係6月20日被逼帶上代表窮人既紅色弗里基亞無邊帽同敬酒既路易十六
http://youtu.be/sZye-qw1GRM?t=1h5m7s

7月14日巴士底日兩周年 全國民兵湧入巴黎參加"紀念活動"
眼見巴黎被志願軍重兵包圍瑪麗·安托瓦內特向布倫瑞克-沃爾芬比特公爵要求盡快攻入巴黎平亂
7月25日布倫瑞克-沃爾芬比特公爵發表布倫瑞克宣言宣告 如果法國王室安然無恙既話反法聯軍絕對唔會傷害任何法國平民
但係如果再有羞辱或傷害法國王室既暴力行動既話佢地一定會將巴黎夷為平地
到呢一刻全法國上下都明白到一件事 而家只係等人將呢件事講出口

所謂君主立憲就係先有君主而憲法只係佢既加身黃袍 只有君主存在本身君主立憲先成立
但如果君主本身就係反憲法既 憲法要點運作!?
君主立憲本身就係種自相矛盾既制度!!我地既王國根本唔需要國王!!
因為人民就係國家既全部!!
點解國王仲未罷免啊!?點解我地既議會咩都做唔到啊!?
因為呢個係班有錢佬選出黎既議會 佢地為左自己既利益支持國王討好外國!!
我地要推翻路易十六推翻呢個不國民不立法既國民立法議會 成立一個屬於全國國民既國民公會!!
8月6日羅伯斯比爾號召下萬幾個民兵係戰神廣場立誓要推翻路易十六
全國各省議會都致信支持推翻國王
今次再冇人夠膽鎮壓啦

8月9日晚巴黎各區民兵突襲巴黎市政廳解散巴黎公社
由在場民兵即場選出埃貝爾為新任副檢察長
埃貝爾以副檢察長名義傳召岩岩上任既國民衛隊司令
佢一黎到就被埃貝爾下令拘捕
你乜水啊!?你幾時做左副檢察長架!?罪名呢!?審判呢!?
需要咩?
第朝就被槍決

8月10日朝早二萬幾個民兵睇完打靶後包圍到杜樂麗宮聲言要拘捕路易十六
宮外看守既就只有一千個瑞士傭兵二千個國民衛隊同埋殺死國王!!既呼聲
...老...老婆...帶埋仔女跟我黎...我地去國民立法議會...
去國民立法議會?搵埋我咪仲衰?佢地認定我勾結外國勢力既 你一個人去同佢地解釋咪得囉?
唔係...你明唔明...唔係去解釋...總之帶埋仔女跟我黎...
路易十六眾目睽睽下帶住一家大細行出杜樂麗宮徒步穿過杜樂麗花園行向另一頭國民立法議會會議廳
睇見路易十六都走埋 駐守既二千個國民衛隊你眼望我眼
咩事?陛下走左?咁我地仲留係到做咩?
突然一個國民衛隊離開崗位走向群眾 然後第二個 第三個

國民衛隊一個一個走向群眾剩低個D索性拖埋大炮加入宮外既民兵
宮外既示威者爬過圍欄同入面既國民衛隊互相歡呼擁抱
剩低既瑞士傭兵都跟埋出黎但不過唔係投降而係係正門組成人牆舉槍指向示威者
全部到我停低!!立即離開王宮範圍!!即使國王走左呢到都係王室禁地未經許可不得擅闖!!
呢到係法國既地方我地法國人中意去邊就去邊!!唔洗理佢我地衝入去!!
開火!!
瑞士傭兵不辱盛名堅守岡位結果引發一場無意義既戰鬥
二萬幾個志願兵國民衛隊拖住十幾碌大炮密集掃射 宮中既瑞士傭兵戰至最後一兵一卒
朝早10點戰鬥結束 二萬幾個示威者踩住瑞士傭兵既屍體湧入杜樂麗宮任意搶掠破壞
宮中一個舞台指揮睇住呢座百年王宮淪為一群山番土匪既遊樂場不勝唏噓
佢一個人行向廢墟中僅存最後一座完整既鋼琴旁邊坐低然後伸出五指
宮室間迴盪起柔然音樂 即使最橫蠻既山賊都停低冷靜落黎欣賞同思考(因為佢地係法國人)
我地係入黎打劫架咩?唔係...我地推翻左國王啦!!

奮戰最後既瑞士傭兵
2019-05-18 12:05:39
9月2日既暴行就連布里索都大表震驚 佢要求司法大臣丹東嚴懲暴徙
嗯?乜有事發生過咩?革命既野係咁架啦 唔通你反對?你反對革命?...布里索反革命?
丹東...!!你咪亂講啊...!!

殺完反革命大家就可以安心上戰場啦
9月20日三萬四奧普聯軍到達當日路易十六逃亡途經既小鎮聖默努爾德
兩支分別黎自梅斯同色當既民兵共五萬人係聖默努爾德以西既瓦爾密會合追擊奧普聯軍
布倫瑞克-沃爾芬比特公爵發現自己已經被法軍追上就下令調頭迎擊
但法軍已經佔據左座山坡站穩陣勢加上數量既差距雖然對方只係民兵
布倫瑞克-沃爾芬比特公爵判斷就算打贏都損失慘重就向北撤退

瓦爾密戰役


https://youtube.com/watch?v=K8MJIxf56bk


係同一日既巴黎 國民立法議會宣佈解散
咩事?
因為國民公會宣布成立
西哀士 奧爾良公爵路易·腓力 布里索 丹東 馬拉 德穆蘭 埃貝爾 雅克-路易·大衛 聖-茹斯特 羅伯斯比爾當選成為749個議員之一
其中仲有四個新朋友佐治·奧古斯特·庫東 約瑟夫·富歇 讓·蘭伯特·塔里安 巴拉斯子爵保爾·弗朗索瓦·讓·尼古拉
佢地當中政治思想最激進既就坐係會場山頂人稱山岳派 溫和個班就坐係下面例如西哀士 路易·腓力個D人稱平原派
而經濟上親窮人個邊就坐左邊 親商人既就坐右邊 例如埃貝爾就係山岳左派 布里索就係山岳右派
從主席台望過去國民公會會場就如一幅諾蘭曲線一樣

佐治·奧古斯特·庫東

約瑟夫·富歇

讓·蘭伯特·塔里安

巴拉斯子爵保爾·弗朗索瓦·讓·尼古拉
2019-05-18 12:05:59
國民公會成立後第一個議題係王位既處置問題
既然我地拖左路易十六落黎啦 咁而家個位要比邊個坐呢?
奧爾良公爵囉 佢係留係法國入面繼承順位最高既人 捨佢其誰?
唔得~如果我坐左上去呢幾年既革命咪變成我政變既陰謀?為証明我對革命既忠誠
從今日起我放棄波旁呢個代表君主暴政既姓 改姓"平等"以後我叫路易·腓力·平等!!咁而家我仲有冇資格繼承王位呢?

咁布倫瑞克-沃爾芬比特公爵卡爾·威廉·斐迪南呢?如果佢肯放棄普魯士既爵位向法國憲法宣誓我地就比個王位佢
一黎王位有人坐仲可以退兵一舉兩得 我係咪好撚醒呢?
佢帶住隊兵同你發誓你信唔信啊?

咁英國王子約克公爵腓特烈呢?佢都係君主立憲國家 隨時比我地全法國人都更尊重同識玩呢套制度
我驚我地肯佢都唔肯咋 英國一向最忌直接介入歐陸事務既

喂其實我地咁辛苦推翻個國王做咩要搵個個返黎姐?所謂既君主制只係人民既吸血鬼食人魔!!
王室只係犯罪既工場 腐敗既中心 暴君既洞穴 國王既歷史就只係國民既死難名冊!!
從今我地要建立屬於全法國人民既共和國!!
9月21日國民公會宣告法蘭西共和國成立

既然法國已經決定廢除君主制咁跟住佢地就要考慮點處置佢地既前國王
等陣主席!!係路易十六之前我地有個更重要既議題
布里索舉手要求發言
9月2日係巴黎再引申至全國咁大規模既暴力事件我地既司法大臣丹東都竟然可以無動於衷冇任何人被起訴
我非常質疑佢作為司法大臣既職務有冇資格去應付將來審訊國王咁重大既任務!!
挑咁撚多野講 我辭職咪得囉你都係想咁姐!?
唔係你辭職就可以了事!!我而家係要為九月屠殺追究責任!!究竟呢單野係邊個搞出黎既!!
咩邊個搞姐?咪人民自發個囉
自發!?點解當日呢班自發既暴民個個都有雅各賓派既人帶頭既!?
雅各賓派?乜你唔係咩?
我...我冇參與過!!同埋呢件事我唔知情!!
你冇參與 不過我地雅各賓派開會你次次都有黎個喎 你會唔知情?
...係...係羅伯斯比爾!!係佢下令雅各賓派煽動民兵利用佢地既支持建立獨裁體制!!
仲有馬拉 丹東佢地三個人一把口一支筆加個司法大臣準備建立一個三頭政治推翻革命!!
聽佢講到呢到羅伯斯比爾終於忍唔住起身啦
你話我係獨裁 我唔明係個人人自由既社會入面究竟咩叫獨裁 係個人人自由既社會冇人可以強迫任何人去代表自己
就好似在坐既各位一樣我地所言所行都係以理服人而成為人民既代表 係今日既法國入面冇人會比其他人更重要
你話我地犯法 我想同你講革命本身就係非法 從攻擊巴士底到推翻君主制邊樣唔係犯法!?係當時自由本身就係犯法!!
究竟係乜野引導我地從過去既枷鎖中解放出黎!?如果你話我地至今所做既野係犯法既 我只係想問各位公民你地究竟仲要唔要革命!?
我同呢D暴民政黨冇任何關係!!為表清白我布里索宣佈脫離雅各賓會!!所有反對羅伯斯比爾既跟我一齊黎!!
從此跟布里索脫離雅各賓會既人就被稱為吉倫特派
2019-05-18 12:06:45
11月16日法軍係熱馬普擊敗奧普聯軍主力攻佔整個奧屬尼德蘭
11月20日杜樂麗宮中發現一個暗格入面收埋左一個夾萬
而家呢個夾萬送到去內政大臣讓-馬利·羅蘭手上 佢一打開入面裝既唔係錢
係紙
係路易十六呢幾年同外國王室貴族同保王黨之間金錢流通既書信同單據
有左呢個夾萬絕對夠料做死路易十六 第二日讓-馬利·羅蘭就將佢送左上國民公會
夾萬係國民公會公開後全場嘩然 好多曾經既革命同志都紙上有名
米拉波 巴納夫 塔列朗 拉法葉侯爵...仲有...
仲有點解有幾張紙爛左既...?唔知佢上面仲寫左邊個人既名呢呵?讓-馬利·羅蘭?

12月10日國民公會傳召路易十六被控以三十三條控罪 路易十六一概否認
我已經結束既既辯護 我冇野再重複 話唔定今次係我最後一次同大家講野 但我呢世人從來冇做過虧心事唔怕公開接受考驗

控辯雙方陳詞完畢 國民公會開始討論裁決
等陣 我地既係控方又係法官仲做埋陪審團!?咁對辯方太唔公平啦!!
你講得岩 如果有呢種諗法既人就退場啦
749個議員走左5個

跟住各議員開始表述立場啦
首先係布里索
其實你問路易有冇罪呢d其實唔重要 我地考慮既重點應該係點處置佢
大家諗下奧普兩軍攻入黎不過係要擁立返路易十六姐 而家佢係我地手正好係個談判籌碼
再講如果我地處死路易十六難保唔會引起更大規模既外國入侵同保王黨叛亂
睇下個道理係幾咁簡單?所以我係反對路易有罪既

聽完佢咁講有個後生仔笑左笑
佢係國民公會最年輕既議員25歲雅各賓既聖-茹斯特
路易·卡佩!!佢唔係作為一個國王被審判!!佢甚至連公民都唔係!!佢只係一個賣國賊!!對法國而言必須一死既敵人!!
佢搶奪本來屬於人民既主權去壓迫一個本來自由既國家!!佢濫用法律 向自己既人民宣戰!!
對共和國而言 國王呢個身份本身就係罪!!我地唔係審判呢個人 係處死佢所代表既君主制!!
全場鼓掌歡呼 聖-茹斯特只係帶住冷笑坐返低
...成班傻仔...

緊接住聖-茹斯特 羅伯斯比爾開口給予國民公會最後一擊
大會已經離題 呢到唔係咩法庭 路易唔係被告 你地亦唔係法官 你地不過係國民既代表
你地坐係到唔係要宣判任何人 而係要採取一D保護國家既手段
係共和國入面一個被廢既國王只有兩種可能 一係保護國家既自由 一係破壞國家既自由
路易曾經係國王但而家共和國已經成立 呢個就已經決定左我地要討論既問題
路易係因佢自身既罪行而被廢黜 佢指責人民叛亂而出動佢既軍隊
而人民既勝利証明左佢先係真正既叛亂者 所以路易坐係到唔係黎審判 因為佢已經被定罪
無論用任何方式起訴路易對共和國而言都係個倒退 因為審判路易就係將革命變成可爭議既現實
如果我地審訊路易既 佢就有可能無罪 如果佢係無罪既 咁我地既革命 所有保衛自由既人咪都變成弒君叛國既人!?
當一個被人民推翻既國王重新出現就只會成為叛亂既籍口
比路易辯護就係比保王黨多一個場所去指責自由同平等 比路易辯護就係比保王黨多一個機會去選擇民主定係君主
係一個仲未穩定既共和國而言 國王呢個稱呼本身已經係個災難 無論係監禁定流放都唔會減輕佢對國家既危害
所以我要係到宣判一個真理...
路易必須死!!為左共和國既生存!!
冇錯!!殺啊!!殺啊!!
https://soundcloud.com/galden-hk/sets/22-4-1792-12-3

1月19日國民公會就路易十六處置表決
見旁聽席上群情凶湧布里索提出要不記名投票 結果台上既情緒更加激憤
點解要不記名啊!?我地要睇清楚邊個議員賣國!!
係記名投票下冇人夠膽支持不記名投票
最後要逐個議員上台表態

第一輪就國王有冇罪投票
第一個議員係旁聽席既威嚇聲下戰戰兢兢上到投票席...ER...ER...國...國王...ER...冇罪...
旁聽席上一槍打落黎佢當場死亡
殺啊!!殺啊!!邊個議員賣國殺邊個!!
最後693票贊成 28票反對

第二輪投票由布里索提出路易十六罪行應否交由人民公投
布里索預計冇人會反對公投呢種最"民主"既方式 而台上既聽眾亦唔會反感
加上地方大部分農民都依然支持國王 只要將議案交予公投就一定保得住國王
但結果292票贊成 423票反對

第三輪投票路易十六應處咩刑
無條件死刑387票 死緩46票 其他刑286票
第四輪投票應否延期執行
310票贊成 380票反對
路易十六即時處決!!

1793年1月21日朝早5點聖殿塔
路易十六食完早餐 由一個不宣誓教士主持完彌撒
之後搭上馬車
前往目的地路上有重重人牆圍觀
人多但係寧靜
就好似當年佢重返巴黎咁
突然係人群中有人大叫 兄弟我地上!!
有三百個保王黨上前試圖劫犯 不過好快比國民衛隊打走左
然後就到達杜樂麗宮正門前既廣場
而家呢到叫革命廣場
係馬路交匯既正中心搭起左個台
係個台上面又搭起左另一個台 佢叫斷頭台
一個國民公會通過法國唯一既死刑方式 一部可以平等處死所有人既機器
路易十六從後縛起雙手走上台 台下係一望無際既人群 人群目光全部集中係路易十六身上
我係因不實既罪名而死!!但我已經原諒所有加害我既人!!希望我既血可以令法國唔會再發生同樣既事...
台下既軍隊響起軍鼓中斷左路易十六既發言
然後路易十六被推上最後一個台上面
刀片落下 人頭落地
肅殺既氣氛一掃而清
台下大嗌 民族萬歲!!共和萬歲!!
路易既故事就此結束 而革命既故事而家先開始

聖殿塔上瑪麗·安托瓦內特三母子女都係其中一個觀眾
乖仔...跪低...跟我講...國王駕崩...國王萬歲...
國王駕崩 國王萬歲

路易十六處死
2019-05-18 12:07:59
2019-05-18 12:08:17
up住咁多先
2019-05-19 00:14:16
去旅行都post文
2019-05-19 05:13:34
copy and paste 姐我有時間都會開黎睇
作者一篇打一萬字
2019-05-19 05:15:11
膠登仔都睇得明既簡易西史入門第廿八集:法國大革命篇第四集:恐怖政治

路易十六處死震撼全歐洲
係科布倫茨既普羅旺斯伯爵路易·斯坦尼斯瓦夫宣佈路易十六個仔諾曼第公爵路易·查理繼承法國王位為路易十七 自己就做佢既攝政
本來英國對法國既革命都係抱持憐憫既態度 認為法國可以係佢身上學到優良既君主立憲制成為歐洲大陸第一個民主國家
但當法軍攻佔奧屬尼德蘭後就變成現實既問題 法國已經成為英國係歐洲大陸最主要盟友荷蘭既威脅
2月13日英國主導下奧地利 普魯士 荷蘭 薩丁 那不勒斯成立第一次反法同盟向法國宣戰
而家法國係西線有西班牙 東北萊茵河戰線有荷蘭 奧地利 普魯士 東南義大利戰線有薩丁 那不勒斯
大西洋同地中海兩條海岸都被英國海軍封鎖
比全個西歐圍毆既法國只靠自願入伍既廿萬民兵已經唔足以應付戰爭既規模
戰爭大臣出席國民公會向佢地開出個價 比多三十萬人我 我要五十萬人
全場倒抽一口涼氣
我地全國得二千幾萬人口 就當一半係女人仲有千幾萬男人 就當一半係老人細路仲有五百幾萬成年人
你要叫我將其中十分一全部拖晒上戰場...?
呢個已經係最保守既數字...而且我唔知場仗仲會打幾耐...
布里索 你話想打仗架嘛 我比枝槍你去打飽佢啦
羅伯斯比爾!!場仗會打成咁係因為你話要處死路易架咋!!
大家可唔可以放低黨爭交低個解決方法出黎先嘛...?

2月24日國民公會通過三十萬動員令
全國18歲至41歲單身男人都自動成為預備兵役 每個城市都會分配到某個名額
如果自願服役既人唔足夠滿足個名額就由市議會自行決定徵召方法

法令一落黎全國嘩然
我好地地係鄉下耕緊田你無端百事要我上戰場食子彈!?就算以前既國王都未做過呢D暴政啊!!
係啊係啊!!反正都係囉不如我地請返舊時個國王返黎算啦!!
法國西部羅亞爾河下遊既旺代地區本來就係虔誠既天主教地區 有大量不宣誓教士活動
話係話虔誠 但當年神職人員民事組織法分教會身家係對農民有利所以當時佢地冇反抗 而班不宣誓教士亦冇辦法煽動佢地反抗
但三十萬動員令落到黎 兩者既利害就一致啦
3月10日旺代地區既農民係不宣誓教士既帶領下以天主教保王軍既名義掀起反旗
要求廢除神職人員民事組織法 三十萬動員令同保護貴族財產
唔洗十日天主教保王軍就遍佈全個旺代地區並沿羅亞爾河繼續東進

旺代戰爭

旺代軍進軍路線

旺代軍渡過羅亞爾河
2019-05-19 05:19:56

土倫港戰役

係拿破崙打緊土倫既時候法國又有另一座大城做反
係里昂有條友叫約瑟夫 雖然身為神父卻係革命既支持者更係雅各賓派既狂熱信徒
但佢個教區里昂偏偏係保王黨既據點
當地既保王黨偽造証據向革命法庭告發約瑟夫反革命
革命法庭判約瑟夫有罪就送左部斷頭台過里昂
點知事後公安委員會發現約瑟夫係自己友黎就警告里昂 如果夠膽處死佢既就當你地做反
7月17日里昂用巴黎送黎既斷頭台處死約瑟夫
但行刑者第一次用斷頭台斬左三次都斬唔甩佢個頭
最後隨手搵左把刀仔鋸左佢個頭落黎
哇...斷頭台原來係咁恐怖架...國民公會太殘忍啦!!我地一定要推翻佢!!

8月8日三萬法軍包圍里昂
里昂唔係D咩小村莊 佢係比美巴黎法國數一數二既大城市 佢城牆之高城牆之厚簡直可稱之為要塞
加上當時法國已經全民武裝 入面有幾多人敢反抗又唔知
就憑三萬人謬謬然攻城絕對唔化算
咁點算呢?
法軍就佔據里昂周圍既高地然後用大炮直接轟炸城牆後既街道
炸足兩個月
10月9日里昂保王黨開城投降
作為第一座比攻陷既叛亂城市國民公會決定要殺雞警猴
10月12日國民公會宣佈成立一個5人特別委員會決定里昂處分
解除所有居民武裝 將有錢人既財產分比窮人 夷平城市
里昂改名做解放城並建立一座紀念碑去紀念"所有為里昂既自由而犧牲既人"
為監督命令執行 公安委員會派其中一個公安委員庫東出使里昂

轟炸里昂

庫東去到里昂又覺得國民公會個決議又太過份
佢只係象徵式拆左幾棟樓 殺左幾個叛亂領袖
國民公會收到佢個工作報告就不滿
佢地召返庫東返黎搵個第個去做派遣議員
接手個個係富歇

11月10日富歇一黎到就下令全市剩低既居民係市中心廣場集合
呢到有幾多人?
二千人SIR!!
仲有咁撚多!?用斷頭台要斬到幾時啊!?叫佢地挖個窿 抬D大炮黎圍住佢地 上散彈 得啦嘛!?3 2 1 開火!!搞掂走人
一場叛亂 法國第一大城變成零人口既廢墟

里昂散彈屠殺
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞