《有一晚，我喺學校操場遇上跌落凡間的天使》

樓豬

唔好棄故啊

我祝福完蔥仔之後，頓時感到好無所適從。

見住佢為自己嘅目標前進，而自己呢？

我哋放學之後齊哇哇咁行去老麥食雪糕，幾蚊雞嘅快樂，廉價但珍貴。

係我哋入面，睇得出蔥仔同小藍始終都係尷尷尬尬咁，互相避嚟避去。

「點算啊？」頭先行緊去老麥嘅時候，呀紫都行過嚟搵我。

見到呀紫搵我，我個心怒放係唔洗講㗎啦，而且佢仲好細細聲咁問，佢捱埋嚟嗰下仲聞到呀紫嘅髮香，好迷人兼陶醉。

「喂？」

「啊無，我頭先諗緊嘢咋嘛。」如果我哋都可以順利咁就好啦……

「做咩啊？」我問返呀紫，其實我係知嘅，不過扮下姐。

「前面啊，點算好啊？」

「我哋都俾緊機會佢啦，俾佢哋兩個單獨行。」我可以幫嘅就係咁啦蔥仔，你要加油啊！

「咁樣好咩？」呀紫不禁擔心，驚有咩萬一。

「都唔知啊，試咗先知嘛。」

「咩事啊其實？」小瑤插入嚟，係把口插入嚟。

「係喎，你仲未知。」呀紫將個情況話返俾小瑤知。

「所以依家諗緊辦法，等佢哋無咁尷尬囉。」呀紫同我都苦惱緊，咁複雜嘅嘢唔知點搞好。

「交俾我啦。」小瑤胸有成竹地說，喱股自信令我有莫名嘅不安。

「真係㗎？」呀紫信咗，「咁一陣交俾你啦喎。」

「得啦！你放心啦。」小瑤笑得好天真浪漫。

時間又返返嚟老麥，我哋都吹咗一陣水，我哋三個故意俾佢哋兩個坐埋一齊，製造機會。

我留意到，小瑤佢鬼馬一笑。

跟住蔥仔就成個人撞咗落小藍度，連人有杯雪糕撞咗落小藍度，搞到小藍成件衫都係雪糕積，我就知我直覺無錯，真係出事啦。

「Sorry啊，我…我唔係有心㗎。」蔥仔又再激嬲小藍，不過今次小藍啲火真係出曬嚟。

「妖！你做咩姐。」小藍毫不留情面咁話蔥仔。

「我…我賠返杯雪糕俾你啊？」蔥仔都唔知發生咩事，無情情就食咗個死貓。

小瑤仲未好似察覺到大件事，仍然沾沾自喜緊。

「唔洗啊！」小藍怒氣沖沖咁走咗入洗手間，氣氛直插落冰點。

「係咪呢，好心做壞事啦。」我忍唔住斥責仲未識醒嘅小瑤。

「下？佢哋都講返嘢啦，唔係咩？」

呀紫知道小瑤並唔係故意搞破壞，所以都幫住小瑤。

「算啦，小瑤唔係有心，佢出發點都係為佢哋好姐。」

聽到蔥仔一頭霧水咁，唔知頭唔知路。

「發生咩事啊？」

「你估都估到頭先發生咩事啦。」我都畫公仔畫出腸啦，「小瑤頭先諗住幫你哋，等你哋唔洗咁尷尬嘛。」

蔥仔知道之後，竟然無聲出，反而靜咗落嚟。

過咗一陣，蔥仔先講：「事先聲明，我嘅愛情你哋唔好幫我手。」

「我想自己爭取屬於自己嘅愛情，如果我需要你哋幫手，我會開聲，其他嘅交返俾我好無？」

「我想靠自己努力令小藍真係鐘意我，我相信我會感動到佢，唔好睇小藍平時男仔頭咁，其實佢內心好細膩，佢會知道點做先最好，所以……交返俾我啦，你哋想幫我嘅心我收到㗎啦。」

蔥仔比平時更加認真，喱一刻我都覺得蔥仔好有型。

「對唔住啊，我頭先唔係有心…我都係想你哋可以講返嘢咋。」小瑤依家先意識到頭先自己好心做壞事，一臉緊張地同蔥仔道歉。

「我知。」蔥仔溫和地安慰小瑤，「我明白㗎，我都無怪你，不過一陣要同小藍講返成件事啊。」

要講返成件事啊，我都有啲講唔出口喎…

過咗無幾耐，小藍就由洗手間出返嚟。但係小藍個臉色並無因為去洗手間喱段時間而有變化，臉色唔知係咪染上廁所嘅味道，好鬼臭。

「小藍，你聽我講啊…」蔥仔心急地想解釋，但小藍不加以理會。

「小藍。」我叫住小藍，然後頂一頂身旁嘅小瑤。

「小藍，對唔住啊，頭先係我唔好，諗住幫蔥仔，點知整到你咁，真係好對唔住啊。」小瑤因為咁樣而急到喊出嚟，佢都因為咁而好內疚。

小藍即刻講：「好啦好啦，無事啦，我明㗎啦。」

「我知道依家一時間要你接受我係好難，不過我會慢慢等，等你有一日會俾我感動到。」蔥仔嘅氣度，雖然依家感動唔到小藍，但都感動到我哋幾個。

「所以我哋好似返以前咁啦，如果唔係…都幾奇怪啊呵？」蔥仔語調輕鬆，一副胸有成竹的自信。

「嗯！」小藍都一口應承，之前嘅陰霾一下子消散曬。

「咁咪好啦！依家好返咪得囉！你都唔好喊啦。」我摸摸小瑤個頭，希望唔多唔少都可以安慰到佢啦。

我哋各自四散之後，得返我同小瑤，畢竟依家小瑤住緊我屋企，我當屋企多咗個細妹㗎，不過喱個細妹係少咁條神經咁，好難捉摸。

就好似依家咁啊，小瑤一副頹樣刻係塊面度，好明顯係話俾人知佢唔開心啦。

「點啊你，仲因為頭先嘅事唔開心？」

「我成日都做咩都做唔好，越幫越忙…」小瑤真心sad，落到嚟人間係有煩惱㗎啦。

「我哋呢，唔似天上面咁，咁開心咁幸福，無煩惱。基本上煩惱人人都有㗎啦，落到嚟感受下人間煩惱係咩一回事，係咩滋味，你就知做人其實唔易㗎。」

「嗯……我依家好似體會到啦。」

「我想繼續做好啲啊，人間的確好有趣，我每日都過得好充實。」小瑤笑得好滿足，佢嘅表情完全表露曬佢嘅內心。

自從小瑤嚟咗之後，我就多咗個伴，無咁悶，亦都慢慢習慣咗小瑤，融入埋我嘅生活入面。

從此我哋返學就五人行，上堂無聊就互相傳下紙仔解下悶。

至於蔥仔啦喎，一樣成日整蠱小藍，佢哋兩個又變返好似以前咁，一對歡喜冤家。

今日中文堂個老師要我哋作文，作一篇叫做「最感動的事」。

「你有無俾我感動過啊？」蔥仔用支筆吉小藍背脊。

「無啊！」小藍無佢咁好氣，但在我看來，小藍係幾受落嘅。

「我終有一日會感動到你喊啊，你睇住嚟啦。」

「咁就睇下你點作啦。」呀紫笑說，十分期待蔥仔會寫出咩文。

我同呀紫打咗個眼色，佢都明白我眼神嘅意思，等蔥仔寫完之後就直接搶佢篇文嚟。

「哇，又係啲咁老土嘅嘢啊？話咩自己病咗，然後呀媽無微不至嘅照顧？」我揶揄蔥仔。

我哋就係咁樣互相攻擊，令平時沈悶嘅學習氣氛入面帶點生色。

「你諗住咁樣就感動到我啊？我唔需要呀媽喎。」小藍都加入戰團，識講下笑咪好囉。

「但我需要你！」蔥仔好坦白。

「WOW！」我內心不禁歡呼咗一聲。

「一陣小測，我需要你幫手。」蔥仔成隻死狗咁。

屌，無出息。

我因為蔥仔一句說話，醒起一件好重要嘅嘢。

我拍一拍前面嗰個笨蛋小瑤，道：「喂！一陣小測喎，你得唔得㗎？」

「下？小測係咩嚟㗎？」

「屌啦星……」我擔心嘅嘢出現了，死啦，佢一陣小測會死無全C喎。

「喂喂喂，點算啊，」我努力向後面嘅人兄求救，「小瑤佢連小測係咩嚟都唔知啊。」

「已經救佢唔到啦。」蔥仔無我咁焦急，反而一臉輕鬆自在的模樣。

「點解啊？」我驚佢考得差跟住出去俾數學呀Sir照肺咋，佢最憎就係啲蠢嘅人，姐係小瑤。

「因為黃Sir已經嚟咗啦。」

「收埋啲嘢！一陣小測！」未見其人，先見其聲。

班上面個個都快手快腳咁收埋啲嘢，臣服佢嘅霸氣之下，黃Sir話老唔老，正值男人黃金時期，骨子裡藏著男人最真嘅味道。

一路測，我就一路睇住小瑤，生怕佢有啲咩事，但出奇地又咩事都無喎，我仲以為佢見到份卷會好驚訝添。

點知過幾日之後小測成績出嚟，條友仔仲高分過我！

換嚟係我驚訝不已嘅表情，唔相信眼前發生嘅景象，滿帶疑惑地問小瑤：「點…點解嘅？考得咁好？」

小瑤露出殺傷力100分嘅純真笑容，道：「喱啲我一早學過啦，我哋一早就要學㗎啦，不過啲嘢好死板㗎，我都無乜興趣去學。」

我太睇小佢啦，不過我再睇返佢其他科啲作業啊，又真係咩都唔識喎，唯獨數學係勁嘅。

枉我仲擔心咁多添……

「你哋知唔知我的少女時代啊？」小藍係臨放學嘅時候問我哋。

「有啊！聽人講好似好好睇咁喎。」呀紫和應著小藍。

「咁不如喱個禮拜日去睇囉？」小藍雙眼發光，壓抑不住佢內心嘅興奮。

「下？少女喎，仲要少女時代，好毒姐！」蔥仔嫌棄地道。

小藍打咗蔥仔個頭一下，不忿地道：「你識乜鬼啊！台灣電影嚟㗎，聽講劇情幾吸引㗎。」

「我都想去睇啊…但係我禮拜日…屋企人會唔俾㗎。」呀紫擔憂佢屋企人嘅阻攔。

加油

今晚再出

樓豬你去到邊？

「無事㗎，你話我哋要傾功課，或者出嚟溫書咪得囉。」

「幫你諗埋啦。」小藍笑得好鬼馬，一睇就知佢有備而嚟。

「咁……」呀紫仲猶豫，覺得咁樣唔係咁好。

「唔好咁啦，有幾何咁樣出嚟玩，一次半次唔過份姐，我一陣放學就去買飛啦！」小藍唔俾呀紫有任何思考嘅餘地。

「你啊，同埋你啊。」小藍指完蔥仔之後，就指埋我。

「預埋你哋㗎啦，啊…仲有小瑤。」

「我無所謂，你話事啦。」我坦白說。

「Yeah！」小藍好開心，而蔥仔見到佢咁開心，都傻笑埋一份，真係情痴。

我將頭先嘅約會同小瑤講，佢都無問題。

因為小瑤嘅衫唔多，所以我禮拜六就同小瑤出去買咗啲女仔衫，因為我都唔識揀，所以就求其買啲牛仔短褲同埋白T恤俾小瑤著住先，但小瑤又著得幾好睇喎，依家就真係有中學生嘅感覺啦。

我哋幾個會係假日出嚟嘅機會其實唔多，呀紫屋企嚴，好少會俾佢出嚟，咁既然唔齊人囉，我哋都無乜點約。

「係咪真係咁好睇㗎？」我質疑小藍。

「小藍話好睇就好睇啦！」小藍都未出聲，蔥仔就已經幫住佢。

「好囉！一陣唔俾飛你，你唔好睇啦。」小藍都唔係好惹嘅人物嚟，唔明點解蔥仔會鐘意佢。

「好好好，我睇。」我死死氣咁認錯。

「小藍你都敢恰，你真係唔識死。」呀紫在旁笑我。

我哋就咁係戲院前吵吵嚷嚷，等入戲院。

小瑤就企唔穩，坐唔住咁，我就走過去問佢：「做咩姐你？過度活躍症咁。」

「我未睇過戲啊嘛，感覺好似好刺激咁！」

對於小瑤咁嘅行為已經見怪不怪，不過見到佢咁開心，我都發自內心咁感到開心。我唔明白嘅係，小瑤嗰種開心係可以傳染㗎喎，佢開心嘅時候，心頭會感到一陣溫暖。

「我哋啲娛樂咪又係行街睇戲食飯，做得多都會厭㗎。」蔥仔做咩講個事實出嚟姐，等佢再享受下啊嘛。

「同你哋一齊嘅話，做咩都唔會厭㗎。」

我哋個個都忍唔住甜笑出嚟，心頭甜咗一下，就算喱句說話再老土，再骨痺都好啦，聽落都會覺得開心，加上小瑤一副天真嘅樣，好明顯係發自內心嘅，聽落更是受用。

「講喱啲！將來大把機會一齊啦。」

「仲有啊，你頭先真係好肉麻囉。」小藍口裡不停嫌棄，但笑得最開心嗰個係佢。

我哋好快就等到開場，所有嘢都準備好曬，爆谷汽水點會少，入到去嘅時候高朋滿座，好多人都討論緊預告點點點，睇完出嚟嘅時候班女都喊曬口咁，我哋嗰兩件都唔例外。

反倒小瑤悶悶不樂咁，自己收埋係一邊悶不吭聲。

我同蔥仔兩條麻甩佬就無喊到，不過係幾感人嘅，我自己都嚮往喱種愛情。

係戲院入面，我都有偷偷地望下呀紫，心裡面希望我哋好似男女主角咁相愛。

「點啊，頭先坐小藍隔離，有無出手啊？」我問得好挑釁。

「無啊，但喱套戲令我更加立定心要追到小藍。」原來蔥仔同我唔多唔少都俾套戲影響到。

「點解嘅？」

「我唔想我哋兩個變到好似套戲咁，畢業後仲要受住思念嘅痛苦，萬一一個唔好彩，就會成為你一生人嘅遺憾啦喎，」

「我唔想咁。」

我凝望住蔥仔臉上嘅表情，十分堅定，我知道佢真係會做，仲要做到120%嘅努力。

但小藍會唔會咁諗就唔知啦。

男仔嘛，喱啲感觸嘅情緒絲通常都會埋係心底；而女仔啦喎，好多時都係浮係面。

我哋每個人睇完套戲，感受都唔一樣，明白到唔一樣嘅嘢。

玩樂咗一日之後，頭先小瑤睇完戲出嚟悶悶不樂咁，但當我哋一齊去玩嘅時候，又無乜事，好似往常一樣。

初頭我以為無乜嘢，但我哋兩個返屋企嘅時候，佢又變得沈靜。

臉上嘅笑容俾小瑤收埋起嚟。

「做咩事啊？唔開心？」我關心地問。

「嗯。」小瑤搖搖頭，一副心事重重咁。

「講啦，少女心情就唔好收收埋埋啦。」我當小瑤好似細妹咁看待。

「有咩事同哥哥講啦好無？」

小瑤見狀，最後都係開口講。

「其實我唔明白咩係愛情，好多感情我都唔明㗎，甚至乎我根本無體會過……」

「親情、友情、愛情，我都唔知咩嚟，係天堂度，唔需要為喱啲感情煩惱，一切自有安排。但係落到嚟先明白到，體會到咩係親情，咩係友情。」

「頭先睇套戲，我係度諗，喱啲就係愛情？望住男女主角，我心入面有種酸溜溜嘅感覺。美好，但又悲傷。」

最估唔到嘅係，連小瑤都被受感染。

「我都唔係好明咩係愛情㗎，只係懂得佢係一種感覺囉，一種你想對佢好，想同佢一齊嘅感覺。」

「我想係喱段時間體驗一下，如果唔係，我怕我以後無咁嘅機會。」

加油樓主
頂你呢個故我等左成年

成日沉咗底差啲搵唔返
btw推

今晚再更新，出埋新年喱幾日嘅份量啦
大家新年快樂

加油阿

頃刻，我同小瑤嘅想法都係一致，都係唔想俾自己日後有後悔嘅機會。

「一齊努力啦。」我拍拍小瑤肩膀。

我哋沈思咗一段路，返到屋企之後又好似平時一樣，但我哋已經明白咗一些事。

返到學校，一切如常，蔥仔成日都有意無意咁靠近小藍，明眼人都睇得出啦，除咗小瑤。

「小藍啊，陪我去小食部買嘢食啦……我今朝無食早餐啊。」蔥仔扮曬可憐咁，嗰隻可憐係幾搞笑嘅。

「我又去！我都想食嘢啊。」小瑤真係呢……

我坐係度食花生食得好爽。

「有小瑤陪你啊。」

蔥仔聽到之後，睥住小瑤，目露兇光。深呼吸咗一下，吞曬啲嘢落肚，睇嚟頭先心裡面講咗好多嘢啦。

「我買埋俾你食啊？」蔥仔臉帶微笑，好盞鬼。

「都好姐！」天真嘅小瑤信以為真。

「去啦，去啦。」蔥仔講完之後，起身向前行，強行拉起小藍。

小藍表情好唔情願，但身體好自然咁跟埋去。

呀紫見到佢哋走開之後，然後輕輕拍我膊頭。

「嗯？」我開心咗一下，女神主動搵我喎。

「你頭先小測幾多分啊？」呀紫憂心忡忡。

「Okay啦。」我撒謊，我唔想俾呀紫知道。

「係你收埋份試卷之前，我見到啦。」呀紫佢係專登得佢兩個走咗先同我講。

「我……」一時之間，我唔識點樣反應，心裡面都清楚，呀紫都係為我著想，我其實係應該開心先係，但我亦都唔想呀紫擔心我，覺得我好廢。

「你啊！」呀紫又再打埋嚟，喱一下比頭先嗰個重手好多。

「唔好再咁樣唔著緊自己啲成績啦。」呀紫將說話講到好重。

「知道啦。」

「嗱，我就無咁多時間再幫你補習，但我會盡量出啲題目俾你，等你做。」

聽到呀紫為我做咁多嘢，一股暖意湧上心頭，開心得濟，忍唔住調皮起上嚟。

「做咩啊？學那些年啊？」我嬉皮笑臉著，最後就係食多一嘢。

「我睇唔過眼咋！」

「你淨係做我啲練習都唔夠㗎，你仲要自己溫書㗎。」呀紫佢扮曬惡咁，但其實對我好好。

我亦都唔想令到佢失望。

「仲有啊，你要打少啲波啊。」

「下？要打少啲波啊？」喱個要求對我嚟講有啲難喎……

「係啊！你聽唔聽話啊？」

我係心入面甜咗一下，道：「遵命！咁我今日就唔打波啦。」

「咩今日啊？之後都係啊！」

「你…快啲去做下練習啦，唔好浪費咗個小息啦！」呀紫別過面去，急急忙忙咁做佢眼前嘅練習。

感覺我同呀紫嘅距離好似慢慢咁拉近。

當我擰返個頭過返嚟嘅時候，我俾坐我前面嘅小瑤嚇親。

「哇！你搞乜鬼啊，咁樣趴係度，嚇死人咩？」小瑤趴係張枱度，可憐兮兮地望住我。

「做咩啊你？」

「好無聊啊，你哋又傾得咁開心，我咪係度望下你哋囉，又唔好意思阻住你哋。」小瑤股起兩頗以示抗議。

為免小瑤多想，我解釋道：「呀紫佢要我做練習，等我考好啲個成績咋。」

「哦…你要好好加油啊。」

「你悶嘅話頭先又唔跟埋落去小食部。」

「俾機會人哋啊嘛，我仲唔明咩……」

「你明就最好啦，幫得幾多得幾多啦。」

「咁人哋真係悶啊嘛……」小瑤又再露出可憐兮兮嘅模樣。

冷不其然，我膊頭又再俾人拍多下。

係呀紫。

今次佢嘅反應無頭先咁熱情，好似俾人淋場冰水咁，冷冰冰的。

「喱份係我之前補習嘅中文練習題，你拎返去做下啦。」

「哦…好啦，唔該曬……」我頓時不知所措，甚至乎係有啲驚。

「我去一去廁所。」然後呀紫就抱住冰冷嘅態度走咗去。

我閃出一絲念頭，呀紫呷醋？

因為我同小瑤？

唔會嘅唔會嘅，但……如果唔係嘅話，點解態度會轉得咁快？

跟住成日都無乜點同呀紫傾到偈，我同佢唯一嘅連繫，就係份練習。

我返到屋企都好乖咁做曬佢，仲溫埋書。

蔥仔叫我打機，我間唔中都會同佢打下嘅，但我頭先好堅決，好瀟灑咁同佢講：「我依定以學業為重，我係唔會打機㗎！」

「你收皮啦！溝女就溝女啦你，扮曬嘢。」蔥仔坐呀紫隔離，會知道都唔出奇，而且佢都知我鐘意呀紫。

「我係啊，你努力緊嘅時候，我唔可以努力嘅？」

「得啦，我明㗎啦，你溫書啦，睇你撐到幾耐。」好挑釁，姐係落戰書咁解？

「一定耐過你！」我好有信心。

「話時話，你覺得報唔報陸運會好？」

「下？你喎？平時都唔做下運動，之前陸運會又唔見你報過。」

「我想贏返個獎俾小藍啊。」透過電話，我都聽到蔥仔好認真。

所以我都好認真咁講：「認真咩？你嘅處女賽喎。」

「係啊。」

「你想報咩啊？」

「班際接力囉。」

「我屌！」跟住我就大聲咁笑出嚟。

「哈哈哈！你諗住靠其他人追返啊？」

「唔係點啊？喱個係我最有機會拎到獎嘅項目嚟。」

啊，喱條友仔又唔係出嚟搞笑㗎喎，佢又真係諗得幾周到，而且幾聰明。

「而且我知通常最快嗰兩個會跑第二棒同埋第四棒，所以我就跑第一棒或者第三啦，不過最好就第一啦，咁樣就靠後面啲人追啦，哈哈！」

虧佢仲笑喎，睇嚟佢都有曬全盤計劃，做兄弟嘅，把口就用嚟串柒柒，但隻手係用嚟幫人㗎嘛。

「咁你打算拎個獎送俾小藍？」

「係啊，中學喱幾年都無參加過啲咩，我想趁依家去做返啲嘢，成唔成功係另一回事，你有無做過又係另一回事，你無可能成日因為覺得自己做唔到，而唔去試下做㗎嘛。」

「但你諗住點樣送啊？你送佢都未必收啦。」

「咩啊，叫佢幫我保管囉，遲下俾返我咁囉！」

咁樣溝女都得？我俾佢吹到睥一聲。

「好，咪話我唔幫你啊，你自己都要特訓下啊，以你依家咁樣話要落場跑，我肯，其他人都未必肯啦。」

推

樓豬

樓主

你要記得你講過啲咩呀