[真人真事][校園][純愛]《兩個我加一個妳》

序章
大家好耐冇見

又係我呢條蛋散

今次同之前一樣，

喺度同大家講故仔

照舊啦今次都係校園愛情故

話說今次個男主角係我細佬個friend

我就唔撚知點解我細佬個friend同我係同年嘅(我細佬細我兩年)

好似話喺u入面識嘅

我唔去深究喇總之就係咁啦

話說喺上一個故，

我夜晚準備出文上去連登嗰陣，

就俾我細佬睇撚到

咁就水洗都唔清啦

跟住佢就係咁唱我連登仔連登仔

真係仆佢個街

然之後早幾個月佢無啦啦問我

有冇現實經歷打上去

咁我就梗係話冇啦屌

的而且確身邊冇乜具故事性嘅經歷，

加上自己文筆又唔係好

真係冇乜野值得寫

就算搵到有，

聽完之後發覺個結局同之前嗰啲差唔多

咁費事悶親大家啦

所以都冇諗住喺度講，

點知我細佬同我講話佢有個friend啲經歷幾長下

咁我就叫佢係咁咦講嚟聽下啦

聽完之後發覺真係幾撚長

消磨時間嚟講算係唔錯

所以之後佢就叫佢個friend上嚟打邊爐

一路烚下烚下一路分享

順便問埋好唔好打出嚟俾咁多人睇

初時我以為唔肯

始終有啲人唔鍾意將某啲野公諸於世

點知佢話冇問題喎

重講其實好想咁樣做只不過自己冇乜時間，

就算有時間又驚唔可以持之以恆，

哈哈，

我估佢所謂嘅唔可以持之以恆，

其實係唔想透過寫故去緬懷過去掛

我鳩估咋我冇問過佢

仲問我要唔要日記，

佢話佢一路有寫開

呢刻先發現香港原來有好多人有寫日記嘅習慣，

好似今次個故個男主角咁樣寫喺簿度嗰啲有，

喺電腦打出嚟嘅都有

跟住我同佢講，

話我會間唔中搵佢有冇問題

佢都話唔嫌煩

叫我搵幾多次都得

條件就係佢同埋女主角要用真名唔使代名

我心諗咁撚大膽唔驚俾人認到咩

佢話唔驚得咁多喎

真係夠灑脫

至於點解男主角要堅持用真名

暫時就賣關子先

相信跟住落嚟嗰故會答到各位，

故事情節總有雷同，

縱使劇情可能會比較悶

但係仍然希望各位巴打絲打支持一下小弟

都係嗰句啦，

如果你覺得劇情太假，

咁咪當係一個虛擬故事咁樣睇

有人肯睇都已經好滿意喇

好，

唔撚講咁多廢話

即刻出文先。

新故留名

屌 追蹤左你 終於有新文出

LM

LM

留 名

真名
btw樂仔呢

第一章
大家好

我叫做壹仔

無論以前讀書，

定係依家出嚟做野都好啦，

個個都係咁樣叫我架喇

大家唔好誤會我唔係基佬

只係我本身個名真係有個壹字

跟住唔知邊撚個初中同學叫下叫下，

咁就變咗個花名

一直用到依家

每個故事一開頭都係介紹主角先架啦，

今次我都唔例外

小弟係典型一個朝九晚六嘅上班族(又或者叫做港奴)

大學畢業之後就做到依家，

我個人就冇乜大志

但求安逸嘅啫

夠食夠使就得

本身又冇乜使錢嘅興趣，

你知啦好多人都會玩車玩錶又或者係音響

對我嚟講，

呢啲全部都係奢侈品

咁高尚嘅野唔啱我呀

自己能力唔高搵唔到好多錢，

亂咁去追求到時咪盞害到自己

我好耐之前就已經明白呢個道理

當然我都必須要承認，

咁係因為我窮啫

如果唔係我諗自己都會學人地

玩埋啲咁有生活態度嘅野

我就係91年出世

講下講下其實都就嚟三十歲

你知啦，

一去到呢啲年紀，

每逢新年呀又或者做節嗰陣，

唔係好熟嗰啲親戚但又想搵野講嗰陣

就梗係會問我啲感情狀況啦

其實有時我都唔明佢地，

擺到明我就係一條毒撚啦

都唔知有咩好問

如果冇野講咁咪唔好講囉

佢地硬係要R水吹，

我好相信話不投機半句多呢句說話

啱傾咪傾多啲

唔啱傾冇野架，

咪唔好傾囉

不過佢地總係唔明

咁多年都係鍾意夾硬搵啲野嚟講

由我啱啱入到u嗰陣，

問到我依家已經出嚟做咗幾年野，

都係問同一條問題

就係有冇女朋友呀

有嘅話要帶返嚟見屋企人喎

答完又答答完再答

我都真係冇咁好氣

笑下就算

當然如果要諗衰啲嘅，

就係佢地擺明想落我面哈哈

特登恥笑我呢條毒撚

好彩本身自己係奴隸性格

已經習慣咗呢啲野

從來唔會放喺心上面，

咁執著咪搞到自己唔開心

倒不如睇開啲，

有時係咁冇尊嚴架喇

至於講真嗰句，

究竟我有冇女朋友

唔講你地知住

喺度賣下關子先

各位巴打絲打睇落去咪知囉，

費事成日一開始就講咗個結果

搞到冇得估啦

肯定嘅係唔會走數，

大家可以放心

YESSSS 等咗你好耐啦

話說小弟我基本上每一晚都會同我老死Cyrus打機

除非有野做又或者病咗先至休戰

如果唔係就日日都會

以前讀緊中學嗰陣就打aoe，墨香

之後就打英雄聯盟

依家咪ps4囉

其實都係志在吹水啫

返咗成日工，

放工打個機都唔係好過份啫哈哈

喺度講下我點樣識Cyrus

話說我由中四開始就轉讀一間新學校

嗰陣佢同我同班，

大家又坐得近，

傾傾下就覺得好啱傾

咁就friend咗十二年

我好記得我係2006年識佢

繼後幾年都係同佢同一班，

甚至上到u都係同一間

講返時間線先啦，

話說喺上年十月嘅某一晚

我地就好似平時咁樣，

繼續喺遊戲世界入面廝殺緊

傾傾下無啦啦諗起啲野

我:「係喎你有冇收到message 」

Cyrus:「邊個message呀老友

咁撚多個 」

我:「我地中學嗰個班會主席冇搵你咩 」

Cyrus:「有呀，

你講下個禮拜日嗰個乜撚野週年慶典丫嘛 」

我:「屌又真係收到喎 」

Cyrus:「屌

你真係當我流 」

我:「咁點呀你點講呀 」

Cyrus:「我梗係話到時先算啦

費事一早覆實 」

我:「你唔得閒咩 」

Cyrus:「唔係呀，

不過唔想咁快講定咋嘛

你知啦咁多意外邊有得計

同埋想問埋你去唔去，

如果你唔去我一個去戇鳩鳩咁樣

咪又係嘥氣 」

我:「痴線我諗住問返你轉頭，

咁你去唔去丫 」

Cyrus:「你去我去 」

我:「咁去囉

反正咁耐冇返過去 」

Cyrus:「難得喎你竟然禮拜日都出嚟 」

我:「耐冇返過去咪行下囉

平時都唔會有時間架啦 」

Cyrus:「真係咁簡單 」

我:「如果唔係你想有幾複雜 」

Cyrus:「有啲野大家明啦

放心就算嗰日有約我都會推晒佢

一齊返

睇死你條蛋散一條友都係唔會返去 」

我:「屌你啦 」

心諗你又幾心水清

其實畢咗業咁多年，

有幾次都真係好想返去

但有時的確係冇時間

又或者換轉第二個講法，

時間係人定嘅啫，

可能係我以前唔敢返去掛，

驚自己又亂諗野

同埋都知道自己冇機會見到自己想見嘅野，

咁咪索性唔返囉

不過隔咗咁耐，

咁難得有返一個叫做大型啲嘅活動，

就當我去賭一鋪

睇下搏唔搏到懵

其實過咗咁多年我都真係睇化晒，

今次返到去，

如果有自己想要嘅結果就當然好啦，

如果冇嘅話都唔會話特別失望，

反正都唔係第一次期望落空啦

再試多次又點會覺得痛，

都已經麻木晒，

唔講由自可，

依家一講起，

腦入面湧現返好多片段

再喺度細味一次，

有時真係好憎自己

明知自己諗完會點樣，

都係忍唔住。

留名

第二章
首先將時間去返十二年前

亦即係2006年

我就喺嗰一年搬屋，

既然距離都唔係近

所以屋企人索性安排我退學

等我去到新一區先至搵一間中學

況且區內有咁多間中學，

自己成績又唔係衰到貼地嗰種

搵學校應該唔難嘅

不過我記得嗰陣我唔係好願意搬屋

梗係啦同以前嗰班人玩慣咗，

一時之間想出嚟聚下都唔係咁易

要記住嗰陣只係升中四

同埋如果我喺新屋去返以前嗰度，

來回最快都要一個鐘零九個字

基本上一搬屋就代表我同以前嗰批朋友斷絕來往咁滯

嗰陣重係一個戇鳩仔

又擔心新學校環境唔適應，

都唔知會唔會比人排擠

可能我都係冇乜腦，

以前睇得太多tvb劇

搞到有啲咁無稽嘅諗法

都重未講生活模式有轉變

種種因素之下，

令到我嗰一刻其實係唔想搬

不過，

十幾年後問返我，

我反而好慶幸當年屋企人有呢個舉動

或者唔搬屋結果有可能會更加好都未定

不過我從來都唔會用一樣未知嘅野，

去否定已知嘅野

的而且確搬屋係我人生嘅轉淚點，

帶咗好多野俾我，

無論開心定係唔開心，

講真嗰句，

我都冇後悔過擁有呢啲回憶，識過呢啲人

可能你地都成日聽人講過，

「我寧願冇識過佢」之類嘅說話，

可能係我太懦弱

我真係唔敢咁樣講，

又或者其實係自己過度美化回憶

不知不覺間覺得咁樣係好呱，

有時人就係咁，

點會每一樣野都咁客觀

至少我唔得先啦。

我重好記得我第一日返到去個情況係點樣

首先我喺校務處等，

跟住見到我班主任

佢叫我跟住佢行，

話帶我入去班房，

我嗰陣一條友戇鳩鳩唔知做乜

咁就梗係聽佢講啦

之後入到去，

就見到成班同學望住我

有啲就好好奇，

可能佢地覺得插班生好特別啦下

碌大隻眼望住我

亦都見到有啲男同學好不屑

擺到明就係因為我而令到佢地失望啦

佢地九成九諗住個插班生係一個靚女，

點知原來係我呢條毒撚

希望唔好因為咁樣搞到我俾佢地杯葛啦

跟住我就下意識望返前面

再好尷尬咁樣自我介紹

講完一輪我就搵個位坐低

我個位係單丁位，

不過其實同隔離行嗰個人好近，

基本上你當係隔離位都冇問題架喇

坐坐下，

我隔離嗰個男仔就撩我傾計

嗰啲話題重要係好搞笑

嗰個男仔:「壹仔你有冇睇鹹片 」

我:「頂你一嚟就咁直接 」

嗰個男仔:「梗係啦，

唔通喺度轉彎抹角兜圈咩

我從來唔會做呢啲野 」

估唔到有啲人真係咁搞笑

一同佢傾計就講呢方面嘅野

我:「梗係有啦

我話冇你信唔信 」

嗰個男仔:「唔信

鍾意邊個呀

唔係又係松老師下話 」

我:「我想講有邊個唔係 」

傾傾下我地愈講愈大聲，

直至老師叫佢:「Cyrus唔好騷擾同學呀 」

我先知佢叫做Cyrus

就係咁，

我就同呢個男仔friend咗，

而且重維持到今日

跟住我自己喺班房度周圍睇，

都冇乜邊個女仔特別標青

心諗唔係咁好彩下話

唔使我講大家都知啦，

中學最期待就係喺班入面有靚嘅女仔，

好彩嘅重唔止有一兩個添

頂你個肺我嗰班一個都冇

而且重聽聞高中之後唔會再調班，

我當自己順利去到A-Level，

即係起碼要對住呢班人三年

三年都冇靚女呀屌你

成個人即刻頹晒

新故留名

第一個上課日通常都會早放

開晒簿再搞埋其他雜務就放學

放咗學之後，

同Cyrus傾咗一陣計就走人

話說我返屋企就搭巴士嘅

當然其實可以行路不過用嘅時間會多好多

想早啲返就梗係搭巴士啦

你知啦嗰陣冇得喺街上面用google map

搞到我搵嗰個巴士站搵咗好耐，

重要本身搵路又唔係叻

我去返今朝落車嗰個站附近又見唔到

搵下搵下點知我見到有架巴士個號碼

係我今朝搭嗰架重要行相反方向，

擺明佢就係我要上嗰架車喇

跟住我就沿住架車向前嘅方向係咁跑

點知架車都係快過我

我係咁大叫等埋呀，

瘀就瘀啦

好彩個司機好人

佢見到我，

話見到我跑定唔知係聽到我叫，

所以就等埋

入完錢我就坐上層喇，

一上到去，

我就見到有個著住我地校服嘅女仔坐咗喺其中一行

第一眼見到佢，

好靚

典型靚女樣

帶少少啡色嘅長頭髮，

眼大而且個口細

原諒我淨係可以望到咁多

因為跟住佢就望咗過嚟，

可能feel到有條友望佢掛，

對望咗一下我就懶係型咁樣繼續行

你知毒撚係咁架啦

第一次見點會咁有吉士行過去

同埋一定要扮到冇野咁樣

輸人唔好輸陣呀

如果佢同你對望嗰一刻，

你選擇轉移視線嘅話，

咁就已經輸咗啦

跟住我就坐佢後幾行，

靜靜地咁樣聽歌，

用一條條嗰啲mp3機，

你地依家應該唔知係乜

有代溝呀哈哈

後來嘅我出嚟見得多人先至發現，

原來佢唔係典型靚女樣，

因為根本搵唔到第二個人，

我係覺得同佢相似

2006年9月1號，

就係我第一次見到佢嘅日子。

第三章
講開又講，

嗰個年代手機邊有得上網

起碼我嗰部唔可以先

所以每次搭巴士嗰陣，

一係就聽歌，

一係就望風景，

咁樣真係好寧靜，好舒服

個腦放空晒乜都唔使諗，

當係俾自己休息一下

咁樣當我坐低咗之後，

就好似平時咁啦，

一路望住出面

一路聽緊歌，

其實有時都唔知望乜，

或者就係咁樣先舒服丫嘛

不過嗰日有少少唔同，

平時我就真係全程望住出面，

唔知點解嗰程車我間唔中會移出啲

去望前面嗰個女仔，

又或者紅燈嗰陣企高啲啲去偷望佢

我唔係幫自己辯護，

我絕對同意我呢一個行為係好撚毒

不過我就唔信你地未試過喇

總之就心掛掛想偷睇佢，

但係又唔敢行上去同佢傾計

大佬我第一日過嚟呢度讀咋

邊會咁放膽去做

梗係適應咗先至開始大膽啦

佢又唔可以叫馬尾

因為見到有個髮髻喺度，

喺側邊都見到佢執斜陰

全程佢就喺度聽住歌，

咁我當然唔會全程望住佢啦，

真係當我痴漢咩

不過唔知佢幾多年級呢

我嗰陣猛咁喺度諗，

點解我嗰班冇呢個女仔喺度

有就發達喇

起碼接觸相對比較易，

又或者唔好話呢個，

有類似質素都好丫

唔係話我癩蛤蟆想食天鵝肉，

咁樣俾我ff都得啦下話

坐多陣跟住我就落車

呢個時候原來佢重坐喺度，

話說我嗰個站係尾三，

即係佢得返兩個站就會落車啦

呢個時候我呢啲毒撚就梗係喺度自high

依家諗返起都真係好尷尬，

不過以前就係咁，

少少野都可以開心到不斷幻想

都有啲羨慕嗰陣嘅我，

起碼夠無知

咁樣都可以ff一輪，

依家邊度會丫，

臨走前我重見佢聽住歌望著窗口，

不過眼尾都冇望一望，

咁其實好正常嘅，

我都係扮晒野喺度講兩句啫

嗰日係禮拜五，

當時已經決定禮拜一返到去一定要問Cyrus，

睇下佢知唔知呢個女仔叫咩名

希望佢會估到我講緊邊個。

禮拜一返到去，

咁就梗係問Cyrus啦

等咗幾日好鬼心急

我:「喂你知唔知我地級有咩靚女 」

Cyrus:「幾多下喎數唔晒

你見到邊個 」

我:「有冇一個女仔係啡啡地頭髮

條辮幾長係留斜陰，

眼大嘅 」

Cyrus:「頂你啦講到咁樣點知呀 」

我:「重諗住你會知添 」

Cyrus:「俾張相我都幫到你丫，

依家真係完全唔知 」

嗰陣唔係依家，

唔係部部電話都可以影相

我畫畫又唔叻喎，

如果唔係都可以當場素描

我:「一係咁，

一陣小息我地周圍去搵

好唔好先 」

Cyrus:「搵靚女實好架 」

我:「其實我都唔知佢係邊級，

不過似係高中 」

Cyrus:「時間多就搵晒啦

不過你有冇伏我 」

我:「伏乜 」

Cyrus:「會唔會係帶我睇豬西 」

我:「我實鍾意豬西啦 」

Cyrus:「好難講點知你 」

我:「痴線 」

就係咁，

我地兩個戇鳩仔小息就去其他班房嗰度睇

中四至中七都去晒，

雖然咁樣真係好毒

不過我都係嗰句，

但我唔撚信睇緊嘅你地未試過呀

為咗去睇女，

攀山涉水都要啦

更何況只係幾層樓梯

完全冇難度

搵到就值回票價啦

不過咁，

搵到先至值，

搵唔到係完全嘥時間

有時有啲野點會係你想點就點丫，

唔係話想做就做到，

你見我咁嘅口氣

就知我地小息周圍去，

係得個桔啦

我:「點會冇架 」

Cyrus:「係咪你見唔到咋 」

我:「兩個人四隻眼都見唔到

係咁嘅話去驗啦 」

Cyrus:「如果冇睇漏咁就真係冇喎

我每次見到個樣唔差就指俾你睇，

定係俾我講中咗你真係鍾意豬西 」

我:「痴線

信我啦真係唔係豬西 」

Cyrus:「唔通落咗去小食部

點樣搵呀大哥 」

我:「話時話我諗到個方法

不過要麻煩你，

最多巴士車錢我俾你

今日放學同我搭巴士 」

Cyrus:「好喎免費搭車重有冷氣

頂你唔好走數呀 」

我:「得啦嗰幾蚊咋嘛

今次重有得輸 」

有時太有自信真係唔係一件好事。

第四章
嗰日放咗學之後，

我同Cyrus兩條傻仔

就一早企咗喺巴士站嗰度啦

一個望左一個望右

萬事俱備只欠東風，

等嗰個女仔嚟就得喇

今次重唔可以成功起底

點知等下一架等下又一架，

起碼過咗四五班車

都重未見到嗰個女仔行過嚟巴士站

Cyrus:「咁樣唔掂喎，

等咗成個鐘都重未見人 」

我:「唔通今日冇返 」

Cyrus:「唔係咁黑下話

黑到咁死咗去算啦 」

我:「唉冇計啦

算啦唔等喇費事阻到你

係咪返去玩墨香 」

Cyrus:「梗係 」

就係咁，

我一個人搭巴士返去喇

其實嗰陣我都有喺度問自己，

明明只係萍水相逢，

點解咁執著呢

為咗一個連名都唔知嘅人就咁樣

好似唔係幾划算

講出去都驚俾人笑

所以跟住我都冇刻意去諗呢個女仔，

反正大家同一間學校，

點會真係完全撞唔到

學Cyrus話齋，

如果真係咁黑，

不如死咗去好過

當然我其實都係自打嘴巴嗰種人

之後幾日返到去學校，

每逢小息又或者食晏嗰陣，

如果重有時間的話，

告訴會特登周圍行下

睇下撞唔撞到都好，

唔通真係戇鳩鳩喺度等機會嚟咩

當然我都係食檸檬啦

因為真係次次都見唔到，

冇理由我嗰日見嗰個唔係呢間學校嘅學生

死火唔通我見鬼

當然自己一向唔相信呢方面嘅野，

不過真係唔明點解見唔返呢個女仔

依家諗返起，

可能一開始就已經注定冇緣

聰明嘅讀者實估到

如果真係一路都見唔返，

咁我又點會喺度講呢個故事出嚟 ，

有時天意真係弄人，

當你好期待嗰陣，

佢硬係鍾意糟質你

折磨你一輪先

好喇當你想放棄嗰陣

佢又無啦啦俾返個機會你

所以意料之外有意料之外嘅好

起碼有驚喜先

當然開唔開心就決定驚多啲定係喜多啲，

我就好好彩係後者

話說有一日，

我地成班人放學要留低幫手做壁報，

原本以我咁懶嘅人，

諗住放學就一定偷走

點知上完最尾一堂冇幾耐

我地個班主任就企喺班房門口

點樣走啫

結果我就戇鳩鳩喺度黐野

起碼搞到五點幾

整完之後就梗係拿拿臨走人啦，

重同你喺度咩

又好好彩一去到就有巴士，

一上車就去返上層嗰度坐

上到去諗住拎個耳機出嚟嗰陣，

我竟然見返嗰個女仔

我嗰一刻都呆咗一呆

好彩佢唔知我望住佢，

如果唔係就大鑊

跟住佢就坐返上次嗰個位，

亦即係我隔離嗰一行

其實邊度係咁啱丫

只係自從上次我見完佢之後，

我就多數會坐喺佢隔離嗰一行，

嗰陣諗住之後嗰幾日佢會喺度架嘛

咪特登坐呢個位，

點知嗰幾日都唔見佢

反而我就開始習慣咗坐呢個位

自此每一次放學，

我都會坐返呢一個位

原來今日就係收成嘅一日

以我毒撚性格，

呢個女仔坐喺我隔離嗰行，

我梗係淆底啦

依家諗返起都唔知有咩好淆

原本我諗住聽歌，

一見佢喺度就梗係唔聽啦，

反正如果真係聽嘅話我都唔會專心聽，

嗰陣我喺度掙扎緊，

究竟好唔好同佢吹水

你知啦，

毒撚不嬲都係簡單複雜化

一樣咁普通嘅野都要左諗右諗，

如果同佢傾又傾咩好呢

正當我喺度諗緊呢啲咁嘅野嗰陣，

突然間聽到喺我右手邊出現咗啲跌野嘅聲

跟住就有把聲問我，

xx:「唔該。」

第五章
唔使問都知係邊個同我講野啦

如果係啲閒雜人等你估我會唔會講出嚟

嗰陣我應該係第一次聽佢把聲，

唔知係咪我主觀，

又真係零舍好聽

有時中學雞係咁，

一鍾意一樣野，

就乜都話佢好

或者只係我呢個傻仔先係咁啦

其實嗰陣我有啲緊張

因為冇諗過呢個情況會出現

咁當然我都係望實佢啦

講野望人係基本，

雖然我係毒啫

不過未至於咁都唔識，

嗰個女仔:「唔該

可唔可以幫我拎返嗰支茶呀 」

原來佢飲緊嗰支茶碌咗嚟我呢邊

咁我梗係攞返俾佢啦，

區區一支茶又點會難到我

最多烏低身嗰陣要烏低啲啫，

大家喺巴士試過執野架啦

幾經辛苦終於拎到，

跟住就俾返佢喇

我:「嗱

比返你 」

嗰個女仔:「唔該丫 」

真係講句唔該都好聽過人

靚女即係靚女

嗰陣我喺度諗，

依家個天俾咗一個咁黃金嘅機會我，

我冇理由嘥咗佢丫

好唔好食住上同佢傾計呢

我見佢又好似冇帶耳機，

好似真係搏得過

但係另一方面就梗係淆底啦

三唔識七喺度撩人吹水，

好似唔係咁好

不過再諗深一層，

真係唔應該浪費呢個機會

反正我同佢又唔係同班，

萬一我撩人失敗，

都唔係好瘀啫

最多以後坐巴士咪坐後啲

佢又唔會知我係邊個，

周圍唱都影響唔到我

一於就賭一鋪啦

我:「喂喂喂

我想問你啲野 」

嗰個女仔:「問咩呀 」

我:「知唔知邊個區成日水浸 」

你地冇睇錯，

我真係好九唔搭八咁樣撩佢

鬼叫嗰陣完全諗唔到話題咩

唔通真係好似電視劇咁樣

「今日天氣好好喎。」

「食咗飯未呀。」

「我相信聽日會好天嘅。」

咁樣撩佢死得啦

白痴都知咩事

當然之後我先知，

其實我呢個方法都係好差

嗰個女仔:「下

iq題嚟架 」

我:「你估下 」

嗰個女仔:「即係係啦

等我諗下先

邊個大區嚟架

新界九龍定係港島 」

我:「九龍

有地鐵站嘅 」

嗰個女仔:「油麻地

因為好多油，

咁咪搞到好似水浸咁囉 」

我:「唔係 」

嗰一刻我真係忍唔住笑

估唔到呢個女仔講啲野都幾撚戇鳩

十足十依家連登估iq題嗰班人

嗰個女仔:「做咩笑到咁 ？

iq題就係咁架啦 」

我:「冇笑真係冇笑 」

嗰個女仔:「重話冇笑

忍笑忍到面都紅呀 」

我:「真係冇笑 」

講完呢句之後我真係忍唔住

結果就喺佢面前大笑

成個阮兆祥咁樣

當然啦我嗰刻係真心笑

就唔同阮兆祥，

佢擺明係假膠

估唔到個女仔跟住我一齊笑

我:「你都覺得好笑呢 」

嗰個女仔:「唔係呀

我想講你笑得好好笑 」

我:「繼續估啦

究竟估唔估到 」

嗰個女仔:「俾我諗多陣先啦 」

我:「咁呀，

你諗到之後喺學校先搵返我啦 」

嗰個女仔:「點解呀 」

我:「事關我依家要落車 」

嗰個女仔:「開估先啦 」

我:「諗多陣啦

咁快開估冇癮 」

嗰個女仔:「係咪你諗唔到個答案咋 」

我:「痴線點會係 」

嗰個女仔:「咁信你喇

拜拜喇 」

我:「拜拜 」

嗰個女仔:「喂。」

我:「做咩呀 」

嗰個女仔:「漏咗把遮呀 」

我:「唔該晒喎 」

小弟真係成日都唔記得拎遮

可能真係坐住咗個腦，

拎完之後就真係落咗車，

唔通我話俾你知，

我係緊張先至面紅咩，

點講出口啫

好彩話之後先開估，

咁樣下次就肯定有話題做開頭

自己都覺得自己真係幾撚醒哈哈。

好耐冇見巴打

多謝你支持
希望唔會悶親你

LM

LM

留 名

多謝三位巴打支持