春泥
2018-11-12 00:14:52
歐國盃完結後,我把戶口的所有存款都提取出來,然後相約房侍農到東方文華慶祝。
房侍農打量了四周一眼,道:「嘩!阿志,東方文華我平時聽就聽得多,但係我咁大個仔先係第一次嚟。」
「其實我都係第一次嚟依到食飯,難得贏錢,緊係對自己好啲啦!」
房侍農悄聲道:「總共贏咗幾多錢啊?」
我把一個重甸甸的公文袋遞給房侍農,道:「始終賭錢贏返嚟嘅係偏財,我捐咗部分出去,依份你嘅。」
房侍農打開了公文袋點算鈔票,道:「四十萬?」
我以為房侍農懷疑我中飽私囊,我立時澄清道:「我同你一人拎一萬出嚟,最後贏咗八十八萬幾,啲零頭我捐咗出去,八十萬對分,每人四十萬,你唔信,我可以畀返戶口記錄同啲捐款單你睇架?」
房侍農笑道:「我幾時有話唔信你,我係話你好似陳刀仔咁叻仔,只係一個禮拜多啲,就將兩萬蚊變成八十幾萬。」
「咁依層佢叻過我,佢用二十蚊就贏到二千五百萬。」
房侍農有點擔憂道:「阿志,我都係攞住兩萬先,其他錢擺住喺你到先,我驚madam佢知道咗我賭錢,會唔高興啊!」
「吓!咁大筆錢擺喺我到?咪喇!靜間食完飯,你同我一齊去銀行入番啲錢落戶口,我驚畀人老笠啊!」
待續