[Netflix] 有無人睇咗Adolescence?

好好睇，4集分別用一鏡拍，無論劇本，演員同導演都好出色，當中仲有出現過好多中學生同其他演員都一樣拍得咁流暢真係好勁。

故事講述一個早上，一個13歲嘅男仔畀警察爆入門拉咗佢返差館，個小朋友個樣好似好乖，成家都唔知發生咗咩事。之後就係一鏡過拍由一進入差館之後嘅所有程序，真係好似同主角同埋佢嘅父母一齊經歷成個程序。

個劇唔係查案劇，不過係探討個悲劇係點樣發生，係社交媒體嘅不良風氣，父權嘅影響，父母唔識教，學校制度嘅失敗定係天性嘅心理問題？

我覺得有啲似let's talk about kevin但個視點更加係從唔同嘅環境去探討個問題，而唔係只著眼於個家庭問題。

最後真係要讚個男仔真係做得極出色，中間佢見心理學家時出現嘅情緒，行為變化真係表演得好好，仲要每個鏡頭都咁長淨係記得哂咁多對白已經好難。作為父母我相信見完會更加深感受。

完左架拿？

睇左 不過好想知個心理學家喺監控見到啲咩

睇完好撚勁，演員們痴撚線演出，唔知排幾耐先拍到一集。

我覺得呢幕係表達佢心理轉換/改變策略，睇到咩應該唔係重點。

好睇
段段都好緊湊
個細路演員真係好勁

我相信佢係想睇返由邊個位，講緊啲咩引發到個男仔嘅情緒同發脾氣。既然係串流，我覺得個導演可能都想觀眾一齊回帶自己去留意一下。

當然我覺得佢講到自己爸爸同佢對男性嘅印象，特別係佢覺得個心理學家想控制佢嗰時，佢係會最嬲同埋想自己控制返對方（女性）。哩點可以睇第4集，佢爸爸係家庭中就係扮演緊指導其他家人嘅角色，特別係佢感覺有危險嘅時間。佢會要求老婆同個女淨係跟住佢，唔好問咁多嘢。

最難係喺學校咁多人，咁多場景同小朋友都可以拍得咁順仲交到戲真係好顛

啱啱睇完， 好震撼。完全比第一集拉佢個過程吸咗入去，呢套嘢好癲，一三四集個人物刻畫都好仔細。

英國佬竟然拍得出咁高質嘅劇有啲意外

好好睇
特別係第三集
一鏡到底嘅拍法增強觀眾代入感
好似同劇中人物一齊經歷整個故仔

多謝推介，睇緊第一集

暫時2025 netflix 最大驚喜

最尾嗰集有啲悶
飛黎睇

係有啲反高潮，明明第三集睇住Jamie爆，一開始以為第四集係繼續講佢嘅結局，可能係睇佢上庭，但竟然係講佢啲家人。不過我都覺得好睇嘅，因為可以睇到佢啲家人係點嘅人，究竟佢哋有無影響咗Jamie。而且佢父母之間嘅互動，同最後佢阿爸嘅懊悔都係感人嘅。

1,3>2,4

好想睇making of

成套野好撚癲
特別第三集，兩個人傾左成粒鐘，
唔知佢地點背對白，可能有啲係即場爆肚？
不過都唔係重點，重點係成集睇到壓迫感好撚重（唔知大家有冇？）
我觀眾嚟咋，睇到好似俾個13歲精神虐待緊咁，依種感覺勁新鮮刺激
係睇鬼片都俾唔到我嘅感覺
但第四集咁樣完左，係有啲單調，但恰到好處，俾觀眾自己思考

好撚癲，唔知NG左幾多次先有咁嘅作品出嚟

其實英國劇同電影一向都正，一開始嘅black mirror，after life，既幽默，對人性刻畫又好深厚

我幾鍾意少第四集
好多時講殺人反 好似會講屋企人會面對啲乜

呢集好真事 好好睇
成日幻想自己係個爸爸 真係可能會癲

Agree
第四集從屋企角度出發
幾新鮮
我最鍾意第一集 之後就第四集

啱啱睇咗第一集
覺得好高質

最後描寫真係好好 唔覺4悶 同台劇套我們與惡的距離一樣 罪惡會禍延致加害者家人身上 網上斥罵 現實生活被排斥 唾棄 嚴重d身命受威脅

完全不意外，對上一次真心睇到驚歎嘅係black mirror，但自從畀美國佬搞之後就少咗睇

我有啲懷疑係咪真係一鏡
有冇source 講下

https://variety.com/2025/artisans/news/adolescence-one-take-episodes-netflix-1236339292/

原來真係一鏡
點拍第二集都講埋
真心癲