【pH值介乎於7飄浮的愛情故事】《一腳踏兩船》(7)

『我講事實咋喎！』

「事實係你應該一早講！」

『你都冇問！』

「冇問都可以講㗎嘛！」

「啱吖啱吖！」Mark導同Cam Man企定定影住我哋，「再高啲！再高啲！」

『你唔問我點答吖？』

「你淨係識得怪人！」

『而家係你怪緊我咋喎！』

「咁係你錯吖嘛！」

『你話過我唔會有錯㗎！』

「咁我錯囉！我錯晒囉得未吖？」

『蠻不講理㗎！』

「好好！非常好！Cut！Good Take！」Mark導拍晒手！「掂晒吖！」

梗係掂晒啦！我同LB都鬧到面紅耳熱咁！

其實...我又唔知自己點解會同LB鬧得咁激㗎喎...

「睇返Playback先～」Mark導拍拍Cam Man～

我哋又一齊走埋去睇Cam Man部機～

其實...我仲未平靜返落嚟...

尤其係睇住個Mon...自己同LB鬧到七情上面咁...

真係好似一對情侶為啲無聊嘢鬧交...

「真係拍得好好～」Mark導好滿意～

「係吖係吖～」阿Da都拍拍手，笑住咁望住我，「拍到咁有Feel...你成日都同你男朋友仔鬧交㗎？」

『吓吓？』我有啲老尷，『唔係吖...唔係吖...我哋冇鬧過交喎...』

真喎...如果話同Jeff拍咗拖咁耐...得上次我嬲咗佢咋喎...

就係得嗰次囉...冇喇...

「竟然冇鬧過交？」阿Da笑笑口打量住我，「咁你男朋友仔一定好錫你啦～」

『呃...都幾啦...』

「好羡慕囉～我男朋友衰到死！都唔就我成日同我嘈！」

剪

「兩小無猜係少啲爭吵嘅～」

「唔係兩小無猜先多嘢鬧㗎咩？」

「咁係唔係你男朋友仔好就你㗎先？」

『呃...係...都係...』

「嗱～呢啲咪好男朋友囉～你哋學吓人啦～」

「我都冇女朋友！學乜鬼姐？」

「就係因為你哋唔係好男朋友！所以先冇女朋友！」

在場成班男男女女嘅工作人員就鬧起上嚟～除咗LB...

LB冇表過態...又冇發過言...冇參與其中...

只係靜靜咁聽...企喺度靜靜咁聽...

「好喇好喇～」Mark導拍拍手，「早咗拍晒朝早嘅，放咗飯先喇我哋～啲飯搞掂未吖？」

「搞掂㗎喇～」阿Da點點頭，「啲飯盒派得～」

「咁好啦～」Mark導帶住我哋行，「放飯先啦～」

我哋一行人就行返去有蓋操場。

大家都去攞飯，我就攞返個油雞飯。

今次大家坐埋一齊，Marco坐正喺我對面，LB就坐喺Marco隔籬...

望住佢打開盒叉燒飯...自己食自己咁...

睇嚟都冇打算同我交換...咁我亦都無謂主動開口...

呢種氣氛都唔算尷尬嘅...話晒成張長檯咁多人一齊坐～

「係呢Joanne～」而且Marco都主動開口，「你之前咪話有人想搵你合作嘅～有冇遇到啲咩難題？」

『難題吖？』我諗一諗，『都冇咩難題嘅...因為我到而家一個都冇應承～』

「係？」Marco邊食邊問，「傾唔掂？」

『傾唔掂吖？』我又諗一諗，『呃...都冇話想同邊個合作...』

「咁接Job呢？應該都有公司搵你？」

『有吖～啲化妝品護膚品嗰啲～不過都係未傾成～』

「價錢唔啱？」

『都...唔係嘅...』

同Marco邊食邊傾，佢都俾咗唔少意見我。

不過我哋傾咁耐，LB都係冇出過聲...

直頭係冇理過我哋...只係自己靜靜咁食佢盒叉燒飯...

點解LB好似完全唔在意我咁㗎呢？

點解我又咁在乎LB㗎呢？

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

邊食邊傾...

「咁就要睇吓喇～」

都係同Marco傾返有關其他YouTuber同公司搵我傾合作嘅事...

咁晚咁快手吖

睇嚟佢哋鬧交唔係做戲