
上回講到化妝師幫Joanne化好個妝,就到髮型師幫佢執執個頭~
Joanne都仲係諗住LB~成個諗樣都出晒嚟!
唔可以咁㗎!好易俾LB發現㗎咋!
搞掂晒就出返去,咁啱Marco同LB都行過~
不過LB就連半眼都冇望過Joanne!
真係唔理Joanne喎!
今次個MV係講Joanne同LB拍拖拍耐咗有意見分歧!
Joanne都冇乜點聽,不過應該難唔到佢嘅~
首先係喺走廊相遇,但要扮陌路人咁~
Joanne同LB又係拍到勁有Free~一Take搞掂~
梗係有Feel啦!Joanne而家真係唔想理LB吖嘛!
明明話鍾意Joanne!知佢有男朋友就完全唔理佢?
男仔可以咁㗎咩?控制感情方面可以唔係一就係零㗎咩?
有啲女仔Friend(唔係Crystal)知到個男仔有女朋友,口講就話放棄,實際又要生又要死咁啦!
即係Joanne就唔係話明知人哋有男朋友都仲要死纏爛打...都唔係可以一下子就放低晒掛?
放得咁低即係唔係好重啦?
咁唔重就唔好隨便講話鍾意啦!
Joanne係有少少嬲!但其實又唔知嬲啲乜...
應該話理性好似唔應該嬲...但感性又控制唔到...
「好喇咁我哋轉轉場...」Mark導睇睇份劇本,「去圖書館~」
佢哋一行人就由阿Da帶住咁行上樓梯,行上圖書館。
冇人嘅圖書館就只有圖書...書卷味特別重...
「咁Joanne就坐呢度先...」Mark導指住張長檯,「阿Da幫我拎啲書嚟~」
Joanne就坐低先...其實個感覺都好似平時咁~
早排都係唔想俾咁多人見到,一小息就同Crystal走嚟圖書館避避。
係呢排開始習慣成為焦點...又公開咗Joanne同Jeff拍緊拖...所以就唔使點避囉...
聽過一句話“習慣其實係好可怕”...
Joanne暫時都未體會到習慣嘅可怕之處喺邊...或者體會就係要埋到身先會體會到啦...
跟住既劇情發展又會係點呢?
準備出文
今晚出完
鍾意嘅朋友記得Like同Share俾身邊嘅朋友一齊追~
有咩記得喺下面留言講~我會一一回覆~