【pH值介乎於7飄浮的愛情故事】《一腳踏兩船》(7)

我眼仔碌碌...唔係好明...

「即係...」Mark導見我好似唔多明，就諗諗點再解釋，「拖住對方...但個心就冇對方...唔知去咗邊度咁...」

『哦哦！即係好似同床異夢咁！』我諗應該係咁啦！

「冇錯冇錯！」Mark導點晒頭！「有墨水～有墨水～」

其實都唔係有啲咩墨水啦...

「咁一路行啦...」Mark導再指指條街，「唔望對方...可能各自各咁望吓馬路吖～望吓啲舖頭吖～」

我同LB又點點頭...

「都係試一次先～」Mark導指住前面，「你哋就由嗰度開始～」

我同LB就行前少少...然後...拖住...

LB主動拖住我...

我個心就跳咗一大跳！

成朝都冇交流...一嚟就拖手...

「好...準備...」

我都冇時間調整心情...

「Action！」

LB就拖住我行...

我就望望旁邊啲店舖...都仲係未開門做生意...

LB就望望停泊喺馬路旁邊嘅車輛...

我哋都係拖住手咁行...冇望過對方...

「啱喇！繼續...慢慢行...」

我哋就行得慢啲...

應該都跟到Mark導想要嘅...

然後Mark導就帶住Cam Man行出馬路：「繼續行...LB留意多啲啲車...」

LB就跟住Mark導所講咁做...

我就繼續望啲店舖...睇吓有冇邊間開咗門做生意...

係去咗食飯？啲小店唔係一路做生意一路食㗎咩？

其實我平時都有FF自己第時會開舖頭～

一個人做～一個人搞掂晒～一個人自由自在～

一個人會唔會好寂寞？冇諗到喎～

話明FF吖嘛～FF總是美好的～

行咗一陣...Mark導都帶住Cam Man影咗我哋一陣...

然後Mark導就帶住Cam Man行到勁前：「啱喇！Joanne繼續望望啲店舖！」

我就繼續望...終於望到間開咗門做生意嘅！

「好！Cut！Good Take！」Mark導帶住Cam Man行過嚟。

我就立即鬆返開手先！

都Cut咗啦...唔好拖住好啲...

Mark導就指指入面：「一陣你哋行後少少咁拖住行過嚟～Joanne就好似頭先咁，一路望住啲舖頭咁行過嚟...行到過嚟就企定望入去～我哋頭先同店主講咗㗎喇～會喺入面影返出嚟嘅～咁你就喺出面睇睇裡面啲擺設咁啦～」

『嗯嗯～』都唔係好難姐～

Mark導繼續講：「咁LB就鬆開手繼續向前行...一路慢慢向前行...」

「OK～」LB都點點頭～

「OK咁試試先喇～」Mark導再指指後面，「你哋去咗嗰邊拖手先～」

我同LB就行後少少...拖返手...

「好喇準備喇！」Mark導就行入店舖裡面，「準備...準備...Action！」

LB就拖住我行...好似頭先咁...佢望右...我望左...各有各望...

然後行到嚟店舖櫥窗外...我就企等咁望...同時LB都鬆開手...繼續向前行...

「啱喇！」Mark導喺裡面嗌出嚟，「睇睇啲擺設！」

我烏前少少咁望住啲擺設...

「好好！就係咁！」Mark導點晒頭，「OK Hold住吖！」

然後Mark導就帶住Cam Man行返出嚟，企定繼續影...

Mark導同Cam Man都踎一踎：「LB繼續向前行！係喇冇錯！Joanne繼續睇擺設！」

我唔知LB有冇跟住做啦～望佢唔到～我就好聽話咁繼續睇擺設～

「好好！」Mark導帶住Cam Man繞到去我同LB之間，「Joanne擰過嚟...望去LB嗰邊！」

我就望過去...望住LB嘅背影...

「冇錯喇！就係呢種感覺！」Mark導點晒頭，「Keep住！Keep住！好LB停一停低先！」

LB停低咗，Mark導又帶住Cam Man行過去LB面前...

企定晒之後，Mark導又繼續講：「Joanne繼續望住呢邊！LB繼續行！」

LB就望住馬路咁行...慢慢咁行...

我就望住LB嘅背影越行越遠...越行越遠...

「好！好好！Cut！Good Take！」Mark導拍晒手！「拍得好好吖！」

真係好？我都唔知...

我都總係好似唔自覺係拍緊嘢咁...

「大家嚟睇返Playback先～」

我哋又圍埋一齊睇～

今次LB就企咗喺我身邊...不過都唔係貼住企...仲有半個人嘅身位咁囉...

望住Mon裡面嘅我倆...雖然拖住...但各有各咁...真係好有同床異夢嘅Feel...

唔知LB嗰陣係諗緊咩㗎呢？

我自己又係諗緊咩呢？

我都唔知...唔知自己諗緊乜...經常都唔知自己諗緊乜...

好似好多嘢諗咁...諗嚟諗去都唔知自己諗乜...

諗乜都好啦～諗唔諗都係咁㗎啦～

「好吖～拍得好好～」Mark導拍拍手，「咁我哋再拍多幾個～」

繼續跟住Mark導嘅指示...

「冇錯喇！左望右望...」

我喺店舖裡面睇嘢...

「拎起件飾品！」

LB就企喺出面背住我咁等...

我又望出去一眼...又擰轉身...

我擰轉身嘅同時...就到LB望入嚟...

都係嗰啲啦～陰差陽錯又好～這麼近，那麼遠又好～

總之就係感情出現危機咁嘅樣啦～

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

拍得差唔多，要補嘅鏡都補晒...

「好喇...」Mark導睇睇手錶，「差唔多喇...可以去下個景～」

下個景又係去邊㗎呢？

諗下自己拖住Jeff但個腦諗緊LB咪已經中哂feel
依家good take唔通已經中哂

所以戲裡戲外
根本就唔係做戲 係做緊自己

人生如戲 戲如人生

咁先可以本色演出
比觀眾欣賞到最精湛嘅演技

下個景就係酒店！

都分唔清邊度係戲 邊度係人生

完全係度身訂造

咁咪好入戲

直情入埋去添啦