眾人告別後，返到熟悉嘅道風山，雖然只係過咗幾日，但又恍如隔世，幾日之間，佢哋已經由懵懵懂懂嘅少年，變成經過真正戰鬥嘅人。道風山幾乎冇變，佢哋再次返到去嗰一間屬於佢哋嘅客房，經歷咗一日嘅戰鬥，大家都冇再講啲咩，就咁瞓覺。
第二朝，一切都如同往時一樣，山上面僅餘嘅信眾繼續各施其職 : 煮飯、清潔、甚至仲有人繼續喺度研習聖經，唯一唔同嘅係，可能大家都預計將來落沙田補給會有困難，喺山莊旁邊嘅土地上邊開闢左一小塊田地，嘗試種植。
尼采講過，人生就係無聊同埋痛苦之間搖擺，經過咗咁多日嘅刀光劍影，突然回歸如此平靜嘅生活卻又不太習慣，更加重要嘅係，你永遠唔會知道呢一刻嘅戰友到底喺邊，Perry, Nelson, Terry 佢哋到底可唔可以順利返去檢查站，個位受傷嘅印度兵唔知最後能唔能夠救得返，一切都係未知之數。
今日，肥仔負責打掃聖堂，醫生負責喺廚房切菜，而老細就喺度研究緊用唔同嘅植物整條堅固啲嘅繩綁住乳豬仔，等佢唔好喺菜田入邊搞破壞，費時佢變成燒豬。
去到黃昏，山下開始響起連串槍聲同埋炮聲，雙方軍隊已經開始硬碰。亦正係此時，艾牧師拎住一碟熱氣騰騰嘅水煮白菜去客廳，大叫：「戴家快啲過嚟色飯啦。」
今日有啲特別，艾牧師除咗將所有信眾聚埋一齊食晚飯外，仲叫嚟咗幾個附近嘅佛寺住持。
原來沙田本身係佛教寺廟林立之地，牧師專登選中呢個地方建立中式建築嘅教堂，正正就係鼓勵宗教交流，當時嚟講，思想可謂頗為先進，因為咁，佢同附近寺廟關係都幾好。不過，為咗遷就幾位住持，今日嘅飯餸只有米飯同埋水煮白菜。
艾香德牧師與佛教僧侶
大家都係遠方隱約嘅炮火聲之中食飯，艾牧師見氣氛尷尬，開始喺度講：「佛家又謂一期一會，鵝哋係呢個毛限長嘅是空之間交集刀係緣分，鵝哋今日有緣一齊坐低，就要浩浩咁樣食飯，但同時，緣起性空，一切皆市無常，又或者浩似鵝哋主耶穌基督所講，鵝哋遇到嘅一切都有上帝嘅安排，希望上帝祝福鵝哋，祝福杜風山，祝福香港，祝福呢個世界，我哋要相信佢嘅一切安排。」接下來，就開始帶領信眾祈禱。幾位主持雙手合十，口中默念南無阿彌陀佛。三人本身並唔信耶穌，但係經過多年天主教學校洗禮，對呢一切都已經行禮如儀，但係今次，佢哋竟然跟住一齊祈禱，左肩，右肩，額頭，心口，大家誠心咁樣畫出一個十字聖禮：「阿門。」
喺飯局上邊，大家分享今日嘅情報，是日為1941年12月9日，戰爭已經開打兩日，小部分先頭部隊已經滲透入沙田，而大埔隊亦都去到馬料水，兵分兩路，分別進軍沙田同埋馬鞍山。但係附近嘅寺廟都暫時仲未見到有日軍，但係呢份寧靜可能隨時都會被打破。
日軍經過大埔廣福橋
黃昏時，牧師告別各位主持，但今次就冇再飲酒。
槍聲從遠方傳來，一開始都仲係喺馬料水嗰邊，但係慢慢逐漸向山下沙田推去，可以聽得出戰線嘅變化。而去到夜晚，喺城門九龍水塘方向都傳嚟唱聲，照返歷史時間，應該就係差唔多228聯隊偷襲城門水塘嘅時間。歷史上， 228聯隊嘅長官喺探路期間偶然發現城門水塘機槍堡防禦薄弱，於是抗命帶領隊員一舉攻破城門碉堡，導致整條城門防線失守，但係而家，只見水塘方向槍聲不絕於耳，似乎係一場惡戰。
炮火聲持續咗兩三個鐘，之後先慢慢平息，又過咗一段時間，有一大班人係山頭大吵大鬧，從山上衝落道風山，牧師早已料到呢一刻，一早已經叫信眾準備好熱茶同埋零食喺門口等候，佢就着住一身牧師袍出嚟迎接。
只見一大班日本兵，衣衫襤褸，滿身污泥，似乎啱啱經過一場惡戰，牧師隨即上前打招呼：「你好，我係挪威艾牧師……」仲未講完，已經比帶頭嘅日本兵推向一邊，其他人亦如入無人之境咁樣進入道風山，而喺隊伍後邊，帶住一大班傷兵，有個人嘅左邊面同埋眼睛被白色繃帶包住咗，但阻止唔到嗰個位血流如注，血紅色已經染到成個繃帶變成紅布，再滲出繼續向下流。仲有一個人攤喺擔架上面，不停痛苦呻吟，左手拎住右手，右手好似斷咗一樣無力地吊喺擔架床嘅一邊。後邊仲有幾十個人，好多人步履蹣跚，靠隔離嘅同袍互相扶持，勉強行走。醫生就算做過急症室，但係又何嘗遇見過如此嚴峻嘅情況。
帶頭嘅士兵幾乎無視道風山的人，直接闖入房間，將所有枱櫈搬出嚟，將傷者平放喺上邊，一個類似軍醫嘅人不停來回走動，檢查傷兵情況。
<第13章完>
－－－－－－－－－－－
每星期逢二／六出兩篇，p牌仔推唔郁，希望大家見到幫推一下咁大把
