【波瀾壯闊嘅香港史】咩話 我返左去二戰時候嘅英軍堡壘？！

第一次係連登寫歷史故，上個星期出左個post 但睇返有D位寫得唔太好，趁岩岩開始及時重製，希望可以睇得舒服D，冷門題材，但都希望大家多多支持。
--------------------------------------------------------------------------------
故事背景 :
三個初出茅廬嘅青年，係一次毅行者訓練途中誤入1941年，二戰前夕嘅香港，到底三人可唔可以生存落去，佢哋又會對歷史有咩改變？故事由二戰橫跨近代，連登首部寫實系歷史小說，一齊經歷波瀾壯闊嘅香港烏有史。



主要角色:
1) 肥仔黃俊傑，成日自稱係塵世中嘅engine狗，當年讀書唔夠人叻，又唔想乞食，誤打誤撞入咗呢條不歸路。畢業之後頭兩年，平均每日OT到九點，經過一番努力，去到第三年，終於有一次可以OT到見到第二朝嘅日出，肥仔有句口頭禪，早知當年讀education，而家就可以做一隻每日準時3:30收工嘅教畜。

2) 醫生李偉文，本來細個志願係做偉大嘅科學家，可惜家境問題讀左medic, 現為新扎伊利沙伯醫院急症室醫生

3) 大隻仔陳浩明，人稱陳總，同樣都係中學時期嘅學霸，大學HKU 神科之後出嚟創業，但係做咗三年，好似都仲係梅下梅吓，但點都好，大家都會叫佢做陳總。

三人都係中學同學，到底以佢哋嘅有限嘅知識可以點樣改變戰局，戰後又可以點樣闖出一片天 ?! 有興趣記得比個正皮

逢星期二六出文！ 100正皮加更一次!!!

女版連登同步出 post
https://www.threads.net/@storyteller_9527

如是者，三個人等咗半個鐘，由一開始大家都企喺度，跟住變咗挨係埲牆，到最後都唔理得污糟，各自搵咗夠頂住pat pat嘅石仔勉強坐低。

「我哋等咗半個鐘，而家點呀」陳總問

「走唔到啊，你睇吓，夠雲仲喺我哋上面，等多陣先啦。」肥仔答。

「鬼唔知舊雲係我哋上邊咩，都叫咗你哋帶遮，係咪衰呢，我坐到腳軟啦，不如我哋反正都要等，入去碉堡入邊行吓好過，分分鐘仲有地方坐添。」醫生插嘴。

「但係而家出邊陰陰沉沉，入邊好黑喎。」肥仔答。

「怕咩，都話咗我有頭燈，入去兜個圈，出嚟應該差唔多停雨掛。」陳總答。

如是者，三個人由陳總帶頭，開住頭燈探索碉堡。出邊落住滂沱大雨，令到地道入邊都十分之陰暗潮濕，越向地道深處行去，雨聲漸漸消失，入口嘅天然光開始變做一點睇唔清外界情況嘅光門，大家都忍唔住開始心跳加速，更加貼近對方。

隊伍前邊嘅陳總將頭燈轉做散射模式，雖然視野廣闊咗，但係就睇唔到更加深處嘅地道，不過其實影響都不大，因為地道本來就九曲十八彎，一個轉角位，就已經令你睇唔到前邊條路。行咗冇幾耐，就已經去咗一段見唔到陽光，幾乎完全黑暗嘅道路，地道兩邊有塗鴉，地面有積水，更加令人覺得陰森恐怖。

「喂，前面有兩條路喎，轉左定轉右啊？」陳總問。

「是但啦，兩邊一樣啫，轉左啦。」醫生答。

「其實有冇諗過……我哋可以沿路折返……」肥仔出聲。

「你條仆街，明明係你提議要嚟，嚟到你又淆底，呢度城門水塘嚟㗎，你驚條毛咩。」醫生答。

「最多咁啦，我哋喺度影張相，做個記號，咁我哋最多有咩事咪沿路折返。話時話，不如你上網睇吓有冇地圖好過啦。」醫生補充。

肥仔打開手機，雖然地圖入邊收唔到訊號，但係靠之前留低嘅cache 果然就像城門碉堡地圖喺度，不過可惜，地圖上邊顯示幾個入口，都唔知自己係邊個入嚟。


「根據地圖，碉堡入邊應該好似個迴旋處咁，中間一個圈，之後每邊又唔同嘅出入口，如果我哋蕩失路，往返中間個圈，應該就可以兜返個圈返嚟呢度㗎啦。」肥仔出聲。

「咁行㗎啦。」陳總將頭燈轉做集中模式，向着左邊嘅道路照去，三人呢個時候全身已經濕晒，塊面佈滿水珠，已經分唔出係雨水定係汗水。

三個人向前行咗十幾米，又係一個轉彎。

「唉，屌！」陳總大叫一聲。地道將將陳總嘅大叫聲放大再迴盪，好似一個無盡深淵。

「咩事！」肥仔同醫生嚇了一大跳。

「仆街，有水嘅。」肥仔向下一照，前面嘅地道充滿積水，唔知有幾深。

三個人冇辦法，唯有掉頭，返到啱啱嘅交叉路口，對望一眼，然後大家好有默契，沿路折返。


「希望而家落完雨啦掛。」肥仔講。

「你諗多咗啦，睇吓，地下仲有水流緊落嚟。」醫生答話。

三個人繼續向前行，但係行咗一陣，又嚟到一個分叉路口

「我哋啱啱有經過多一個分叉路口咩？」陳總問。

「好似冇，但我唔肯定。」醫生答。

「印象中都好似冇。」肥仔再次確認。

「撞鬼咩，咁而家左定右啊？」陳總開始緊張。

「左邊好似有啲光，不如我哋去左邊啦。」肥仔答。

地道唔係好長，好快，三個人就到咗出口。雖然天空仲係有少少雲，但係已經隱約見到陽光，地下都完全冇積水嘅痕跡。

「嚇死人咩，都話咗呢邊㗎啦，總算重見天日又停雨。」肥仔放下心頭大石，長舒一聲。

「你咪咁開心住先啦，你睇吓，呢個都唔係我哋原本個出口，我哋原本嗰度有寫住『若林隊佔領』，同埋我哋嚟嗰陣好多時好多草勁多樹，呢度荒山嚟㗎喎，草都冇一棵。不如你睇吓地圖我哋喺邊。」醫生通常係最心水清嘅人。

肥仔打開地圖，淨係見到頭上嘅GPS位置喺隧道口定格成灰色一點，完全冇訊號。

「即係唔係呢個位啦，不如我哋返番入去，試吓另一邊出口，都唔係好遠啫。」醫生講。

「我同意。」陳總和議。

三個人再次進入地道，好彩，地道唔係好長，大家都行咗唔係好耐就係另一邊出黎，但係望到嘅，就係同一番映像：出口係荒山入邊，漫山遍地都係黃色枯草，幾乎見唔到一棵綠色嘅樹，然後依然係收唔到任何訊號。

「肥仔，呢個位有啲熟口面，你開返我幫你影嗰張相睇吓。」醫生話。

相入邊肥仔同『若林隊佔領』嘅字樣合照，成個建築的確同而家呢個出口有少少相似。

「你睇吓，相入邊埲牆隔離有個大石，同我哋而家呢個位見到嘅位置一樣，跟住想入邊嘅角落有條裂痕，雖然比我哋而家見到嘅闊，但係成個位置同埋走向都係一樣嘅。」

「你再睇吓邊度嘅山，問心，大家喺香港行咗咁多年，你有見過咁光禿禿嘅山咩？你再睇吓嗰度嘅城門水塘，你有冇印象我哋嗰陣大約七成滿，都仲有啲人喺度釣魚，但係而家少水好多。」

「如果你再望遠少少，嗰邊隱約可以見到有個大海，但係如果計返角度，呢個位應該差唔多望到沙田同大圍。」



「你嘅意思係，我哋而家去左另一個香港？」陳總問。

「甚至有可能係戰前嘅香港。」醫生答。

「其實醫生都講得啱，香港大部份嘅樹都係戰後種嘅，我記得啱啱睇過，之前為咗確保英軍視野，當時佢哋係斬晒成個香港嘅幾乎所有樹。」

「你哋有冇睇過一套日本動漫叫做似次元艦隊？佢係講日本一首最先進嘅驅逐艦經過風暴之後穿越咗佢二戰時期嘅日本。」

「可能而家我哋就係呢個情況，不過我哋要首先知道我哋確實係咩年代。」肥仔答。

「你哋有冇留意一樣嘢，我哋入去嗰陣成條地道都係充滿塗鴉，但係我哋見到積水掉頭之後去返分叉路開始就好似再冇見過。其實當時我已經覺得奇怪，但係費事嚇親你哋，所以冇講。」陳總補充。

「不過我哋而家都係靠估，我哋而家首先要確定而家嘅年代，跟住要盡量節省手頭上嘅資源，頭燈同埋電話要盡量少用。我哋淨係喺必要嘅時候先至開機，只要我哋捱多80年，就可以返去我哋嘅世界㗎啦。」醫生講。

「我屌你啦，衰過唔講。」肥仔忍唔住出聲。

「而家訊號就收唔到㗎啦，睇吓我手機入邊仲有幾多cache可以喺度。」肥仔補充。

好彩嘅係，肥仔手機入邊開咗一堆關於香港二戰史嘅wiki。因為大家都冇帶紙筆，所以盡量用個腦將所有細節記低，做得醫生同讀神科，記憶力都唔會差，過咗半個鐘左右，大家都已經大致知道香港保衛戰發生咩事。

「我history 5**架，嘻！」陳總說道。

「有春用咩，你諗吓我哋點樣捱過今晚先算啦。」醫生講。

「咁我哋而家即係咩年代啊？」肥仔問。

「如果呢度真係『若林隊佔領』嘅出口，根據wiki, 若林隊係係1941年12月9日偷襲城門碉堡成功，突破醉酒灣防線，即係我哋最少應該係呢一日之前，但照道理呢個位應該早一段時間就已經喺度駐守，點解我哋仲未見到有人嘅。」

「但係點都好，我哋今晚都要先搵個安全嘅地方，好彩有帶錶，而家三點左右，仲有時間俾我哋落山，但係我哋應該出返九龍定係去沙田呀？」醫生問。

「但係我哋而家嘅目標係點先？如果我哋要幫英軍，就應該去九龍同佢哋講要加強呢個位嘅部署，但係同樣地，去九龍區日軍佔領之後會有一連串嘅暴亂，我哋會好危險，去沙田就會相對安全，但係就改變唔到任何戰局。」肥仔話

「你冇聽過蝴蝶效應咩？我哋改變歷史嘅少少，連鎖反應係預計唔到㗎，何況根據歷史，入侵嘅日軍四萬人，防守嘅英軍只有一萬 ，仲要大部份係加拿大新兵，就算我哋提咗英軍，都冇可能可以防守到香港，我哋都係行落沙田算啦。」醫生答。

「我同意呀，我哋要捱過二戰，先至可以見證香港經濟起飛，我先可以做李嘉誠㗎嘛。」陳總搭話。

「你捱得過三年零八個月先算啦。」醫生話

城門水塘正好係位於沙田同埋九龍之間，三個人向下一望，一邊係葵涌，遠少少係九龍。但係當時葵涌尚未發展，仲係一片荒蕪嘅水田同埋濕地，另一邊望住沙田海， 21世紀嘅馬鞍山、城門河都唔喺度，甚至連最近嘅大圍，都依然係一片黃泥色嘅田地同埋低矮村落。

三人經過一番商議，最後因為葵涌太荒蕪，擔心補給困難，而決定向仲係一片農田濕地嘅沙田方向行。

「但係我哋就咁行落去，會唔會蕩失路㗎，當年仲未有麥理浩徑個喎。」肥仔問。

「你驚條毛咩，你而家座山，樹都冇一棵，所有嘢都一眼望晒，你方會蕩失路咩。」醫生答。

話雖如此，三人嘗試沿路折返，雖然沿路唔太多樹，但就有更加多嘅搭草，着住短褲嘅肥仔同埋陳總一路行一路伊娃鬼叫。

行吓行吓，大地傳來一陣震動，向前望去，有一大架黑色火車噴着滾滾白煙穿出山窿，向住沙田方向駛去。

「估唔到二戰時候已經有東鐵綫，嗰陣嘅火車仲大過依家。」肥仔忍不住讚嘆。

三個人體能都不算太差，但係始終人生路不熟，加上冇電話地圖嘅輔助，每隔一段時間都要確定方位，行得比預期慢，去到五點幾鐘，天已經慢慢暗落嚟。

「5點幾鐘就已經天黑，即係代表而家接近全年日照時間最短嘅日子，即係接近12月21號冬至，換言之，如果我今日真係1941年，我哋距離開戰時間唔會太遠。」醫生話。

「我夠知咯，我當年Geog都係5** 㗎，但係而家就嚟日落，我哋又仲未行到落山，好肚餓啊，我淨係帶咗一支水同埋一支energy bar 渣。」陳總回應。

「放心啦，人就算冇食物都可以捱到三個月，你死唔去嘅。」醫生回應。

三個人繼續行，，終於係日落之前，出到一條睇起上嚟係比車行嘅泥路。

冬天嘅陽光好似熄滅得特別快，夜色好快龍罩住整片大地，估唔到嘅係，呢個時候嘅香港唔單止冇光污染，甚至連一啲光都冇，日頭見到嘅村莊，喺夜幕光臨嘅時候，燈光都隨之熄滅，喺朦朧嘅月色之中，勉強可以見到沙田海嘅倒影，白屋嘅殘影，除此之外，就只有眼前睇唔清嘅泥路，雖然大家都有電話，但為咗慳電，都唔夠膽拎出嚟用，依靠陳總嘅頭燈，開着最弱嘅光線前行。

泥路帶住三個人落山，沿路一片荒蕪，除咗幾條橫過小溪嘅橋，同埋似乎係引水道嘅設施，幾乎一無所有。

正大家慶幸終於去到平路嘅時候，眼前又出現一個分叉。

「又有分叉路，我屌，左定右啊？」陳總不耐煩地講。

「上次我揀完之後中伏，今次到你決定。」肥仔射個波比醫生。

「係咪都會中伏，是但啦，左邊。」醫生回答。

三個人向左邊行吓行吓，開始聽到有狗吠聲。肥仔正自慶幸，心諗有狗即係有人，有人就可以搵到接濟我哋嘅村落。但係陳總就唔係咁諗，佢之前曾經比狗咬傷，至今依然心有餘悸，於是，藉口行到攰，將頭燈塞咗俾醫生，由行第一，變咗行到兩個人中間。

可惜嘅係，人生就係充滿意外，三個人行行下，慢慢由平路開始變成緩慢嘅上坡路，再行咗一陣，變成明顯嘅一連串彎曲上山路。

「啦，係咪啊，都話咗我哋一定中伏㗎啦。」醫生將個頭燈開到最大，嘗試向下照，但就算頭燈射程有幾十米，照落去依然咩都睇唔清，除咗隱約嘅沙田海倒影，同埋村莊暗影，幾乎咩都冇。

「你冇聽過咩，王家衛講過，有路就有人，魯迅亦都講過，路係人行出嚟嘅，既然有條大路，無論去邊，我哋都一定可以見到有人嘅。」肥仔嘗試安慰大家。

「你食屎啦，王家衛講嘅係有燈就有人，同埋兩樣野有關係咩，不過我同意，我哋都已經行咗大半日，水同糧食都差唔多冇晒，點都一定要搵個地方補給，同埋搞清楚我哋而家到底係咩時代。」醫生回應

如是者，三個人繼續向前行，慶幸嘅係，行多半個鐘之後，見到一個似乎係大戶人家嘅中式庭園，似乎由磚塊建成，樓高兩層，上下層有條石級樓梯連接，成個建築睇落非常新淨，白色嘅牆身幾乎冇半點污跡，紅柱黑簷，配合圓拱形嘅門，長方形嘅窗，中西之間，頗具氣派。



三人雖然唔知道庭園入邊住咩人，但係飢寒交迫之下已經冇辦法，正打算敲門之際，身後突然傳來一句唔鹹唔淡嘅廣東話：「泥地系道造乜野。」

向後望去，竟然係一個身穿黑袍嘅鬼佬。

第二章 夜闖山莊

喺前面嘅係一個冇頭髮嘅鬼佬，身型魁梧，雖然睇落都幾老，但十分健壯，喺呢個時候，三個人先突然醒起，佢哋未夾口供點解自己會出現喺呢度，諗到此處，肥仔同埋陳總推咗醫生出去回應。

「我哋冇惡意㗎，我哋喺其他地方過嚟，但係蕩失咗路，見到呢度有個山莊，想睇吓先生可唔可以借個地方俾我哋借宿一宵，如果山莊入邊有任何嘢可以幫手，我哋都會盡力幫忙。」醫生嘅回應果然得體。

但係，黑袍鬼佬當然唔會咁容易放過三人：「離地口音又啲奇怪，離地喺邊度過呢，仲有，離地著買啲咁古怪嘅衫，仲要擰珠果咁奇怪嘅電筒，而家燈科管制，離地之唔之咁樣會俾差人拉。」

估唔到，三個人喺香港生活咗幾十年，竟然有一日會俾個鬼佬形容口音奇怪，不過細諗一下，唔好話四十年代，就算係八九十年代嘅口音都同而家有少少唔同。

於是，醫生嘗試模仿80年代電視廣東話字正腔圓嘅讀法，去到回應鬼佬：「先生，我哋係九龍嗰邊過嚟，家父係佛山人，所以講嘢口音可能有少少唔同，我哋三人原本想去沙田搵朋友，點知蕩失路，所以到達此處，手中嘅電筒係家父俾我嘅最新美國產品，至於燈火管制，實在抱歉，因為我哋喺山上面太過驚慌，一時冇留意，還請先生見諒。」至於身上衣服問題，醫生自知點都兜唔到，所以選擇性無視。

「離地真係好奇怪，我係艾牧師，呢度係道風山莊，而家夜晚燈火管制，你冇電筒出去好危險，今晚你哋先住喺書房，不過你哋來歷不明，而家局勢太緊張，所以今晚我要先鎖住你哋，聽朝起身之後我哋再傾吓偈，夜少少我會派人送啲嘢食俾你，今晚有啲凍，但係我哋得返兩張被，你哋用住先。」

估唔到，誤打誤撞之下，竟然嚟到咗道風山，不過點都好，佢哋三個一身裝束如果落村入面一定顯得好奇怪，喺呢個山上僻靜嘅教會入邊，似乎反而比較安全。

三人去到書房入邊長舒一口氣，幾個鐘前，佢哋仲喺東鐵綫上談笑風生，有邊個會估到，幾個鐘之後，佢哋竟然會穿越到不知時代嘅香港，可能之前一路都太過緊張，腎上腺素飆升，而家坐低，一股濃厚嘅疲倦感馬上來，三個人互相依偎，坐咗喺地面，去到入夜之後，天氣凍咗好多，加上寒冷嘅地板，之前嘅侃侃而談，大言不慚早已不見蹤影。

過咗大約一個鐘，有個一身素白嘅中年男人敲門，身形黑實而短小，捧咗三碗白粥入嚟，每碗粥上面再有少少鹹菜。

醫生即刻捉住男人問咗幾句，得知而家係1941年11月30日，即係大約日軍入侵前10日，至於艾牧師，係嚟咗中國好多年嘅挪威牧師，大約10年前來香港，並且選擇咗沙田片小山丘建立道風山神學院，但係而家局勢混亂，人人風聲鶴唳，山莊入邊只係得返牧師同埋少數心腹信眾，艾牧師懷疑三人係日本間諜，所以要暫時將三人鎖住，等到聽朝再問過詳細。

三個人望住前面嘅食物，心諗都唔知幾多年未食過鹹菜同埋白粥呢兩樣嘢，今朝食緊沙嗲牛肉麵嘅時候仲喺度嫌棄沙嗲牛肉太多油，去到呢一刻終於知道21世紀富足生活有幾咁珍貴。呢碗粥，可能連今日消耗嘅卡路里都補充唔到。肥仔本來打算開埋條energy bar，但係比醫生阻止咗，今時唔同往日，呢啲咁重要嘅食量一定要留返最危急嘅時候先至可以使用。

除咗食物不足，三人行咗一日，早已經滿身污泥，雨水同汗水交雜，成件衫乾咗又濕，濕咗又乾，雖然係冬天，但係黐立立嘅咁就始終唔好受，最難忍受嘅係塊油淋淋嘅面，同埋開始痕癢嘅頭皮，回到過去記掛嘅唔單只係食物，仲有每日視作理所當然嘅水同花灑。雖然道風山上邊應該不缺水，但時間已經九點幾，對於從前嘅香港已經算頗為夜，加上寄人籬下，大家都唔夠膽有太多要求。

書房入邊嘅兩張被都係唔知幾多年冇見過嘅厚綿皮，質地非常之硬，而且頗為重秤，上邊佈滿污跡，令到本來應該係白色嘅棉被變成接近灰黑色，但係都冇辦法，唯有將就咁使用，三個人用兩張被明顯唔夠，唯有一張鋪喺地下，再將另一張用嚟冚，醫生最瘦，瞓喺中間，大隻嘅肥仔同陳總一左一右，都冇辦法冚住成個身體。

更加慘嘅係，雖然大家都拎咗兩本書當係枕頭，但係都瞓得非常唔舒服，張被比三個人用，導致無論係鋪地下嗰張，定係用嚟冚嗰張，都只能夠覆蓋上半身，而且質地太硬，冇辦法封實邊緣，成張被四處漏風，肥仔同陳總唯有向醫生中間擠壓，醫生個位雖然理論上最暖，但亦都俾人壓迫得好唔舒服，三個人就係咁聞着對方嘅臭味互相取暖。

雖然全日非常疲累，但係時間始終仲係九點幾，三人都未有太多睡意，開始商討聽日嘅安排。

三人最難解釋嘅就係身上完全不符合時代嘅奇怪裝束，陳總提議直接向艾牧師坦白，因為呢個年代願意離開歐洲，去到極度貧困落後嘅亞洲宣教嘅傳教士都必定係有理想同埋勇氣嘅人，人品可以信賴，除此之外，根本冇辦法解釋，而且離開道風山，都好難可以搵到第二個地方俾佢哋落腳，倒不如直接坦白。

肥仔始終覺得咁樣做風險太大，唔係話信唔過艾牧師嘅人品，但係成件事實在太過荒誕離奇，如果有人咁樣同佢講，佢一定當呢個人黐線。醫生雖然好同意肥仔嘅講法，但係，就算用佢嘅聰明才智，都冇辦法諗到任何可以自圓其說嘅故事解釋，三人商討一番，最後決定聽朝由口才最好嘅陳總做代表，平時佢間Startups要做唔同嘅present都係一手包辦，今次可能係佢一生之中最重要，亦都係最不容有錯嘅一次pitch。

就係咁，三人喺解決問題之後都開始慢慢休息，但係夜晚嘅風勢非常凌厲，吹到書房嘅木窗不停震動，寒意喺四方八面不停湧入，棉被喺呢個時候就好似裝飾品一樣，凍到三個人不停打冷震，鼻水直流，冇紙巾嘅佢哋，唯有不停用衣領擦拭。第一晚，大家都好掛住屋企張床。

p牌仔推唔郁，希望大家見到幫推一下咁大把 等我知道有幾多人睇緊

隔離post過嚟支持

支持！

答返隔籬 post 嘅問題：資料方面主要來自 <孤獨前哨> (2013 版) [1] 同埋維基相關條目。屋企仲有本 <Not The Slightest Chance> (Tony Banham)、<Hong Kong Volunteers in Battle> (Evan Stewart) [2]、同埋 <東江縱隊 - 抗戰前後的香港游擊隊> (陳瑞璋)，仲有一堆唔記得邊度搵返嚟但望落應該係左派出版社講東江縱隊嘅小冊子。

我本身諗住等我自己個故遲吓要講平行時空香港保衛戰先開始睇，但似乎計劃要提早進行了...

[1] 最近出咗新版，樓主如果未買可以去買
[2] 唔係望望書櫃都唔醒起，史伊尹曾經係 St. Paul's College (堅道尾近 Kong U 嗰間) 校長，三人組如果有 St. Paul 出嚟嘅有機會記得老校長指揮過義勇軍第三(機槍)連

多謝巴打，你真係好熟書

真係搵到賴 sir

本身都諗住搵義勇軍，因為係佢地唯一可以join到嘅軍團，不過賴sir 條線make sense好多，加上本身有醫生，match 曬！

好正支持

穿過完地道去咗第二個時空可以一啲驚慌失措都冇，仲要即刻斷定自己喺戰前香港，仲要完全唔驚日軍入侵有生命危險，俱俱幾個普通人居然第一時間諗幫英軍，離地到

咁理論上仲可以 join 防空署嘅 (同民國女文青 Eileen 瘋狂交流 )...

認真嘅，賴 sir 聽完如果又信嘅話，好 likely 佢哋會被安排到某 HQ 單位而唔會俾佢哋上前線 (一係就跟 VDC，一係直接上到駐港英軍總部同莫德庇做朋友)，再唔係 (which 我覺得係最有可能發生嘅事) 就係直接被夾上飛機送到大大大後方 (例如印度某處甚至澳洲)

其實都有啲唔make sense，就算知道係戰前，都冇可能估到係開戰前幾日不過又咁講，穿越故就係咁，同埋去返舊時代，好過去異世界

三人組最初估一定係 1941 年 12 月 9 號前 (因為仲未有 "若林隊佔領" 嘅 marking)，後來誤打誤撞去到道風山搵到艾牧師，嗰陣就 firm 係 1941 年 11 月 30 號

若林隊佔領最多係知道係當日之前，但係可能係20年代， 30年代，佢哋一返到去就知道係開戰之前幾日根本唔撚make sense

又唔洗咁武斷
有啲人個性格天生就係咁冷靜

已lm

此言差矣
首先年代冇可能太久遠，因為個碉堡37年先有，咁所以一開始主角群都係淨係估係佔領前
然後主角走去問過牧師先firm係幾號
所以其實主角知仲有幾日係好合理