【重甜】【明就明唔明就黎明】《XG快落》(5)

1001 回覆

6 Like 2 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

飛揚 2024-09-05 18:12:36

飛揚 2024-09-05 18:13:11

飛揚 2024-09-05 19:00:14

上回講到綽廷見話去日本會有危險，就諗住去其他地方啦！
點知系統話度度都好撚危險，就只有國內最安全！
屌你啦！唔撚係想去國內吖！要出國吖！
既然度度都咁危險，都係去返大阪啦！
買好機票Book埋酒店（當然都係有勁多警告提示）！然後返去執埋行李Send返個錄音俾晴晴就去機場！
出面落起大雨！路上又越嚟越少車！
因為都冇乜人會出國旅行～返國內都搭高鐵！
去到機場，諗住唔用自助登機唔使睇咁多警告～
點知個女服務員都係要講幾句！
『得喇知喇好危險吖嘛盡量唔好去當地吖嘛唔喺現場就冇事吖嘛建議都係返內地吖嘛我明㗎喇知㗎喇睇咗好多次警告㗎喇我！』綽廷受夠喇！
「我...我都係溫馨提示姐～既然你一意孤行...咁我都唔阻止你喇～」女服務員終於都肯幫綽廷搞埋啲手續。
屌...係要人發老脾嘅...
等到女服務員幫綽廷辦理好晒手續：「祝你有個愉快嘅旅程～」
行李都寄埋倉，綽廷就行去買杯咖啡...搵個位坐坐先...
坐喺落地大玻璃前...望住窗外嘅雨景...
仲係好大雨呢...仲閃咗幾下電...不過仲見到有飛機起飛～
望住大大架客機劃破雨簾！直飛天際！
都話㗎啦～仲飛到～又冇話延遲～一定可以照原定時間飛～
飲啖咖啡...望多兩望...望住窗外嘅雨景...就望到好似有個倒影行緊埋嚟...
綽廷望住落地大玻璃之中...一個熟悉嘅嬌小身影...差唔多行到嚟佢身後...
綽廷回頭一望：『晴晴？』
跟住既劇情發展又會係點呢？

準備出文

飛揚 2024-09-05 19:00:28

[Day 09－試圖離開] PART 02

晴晴行到嚟我面前。

『晴晴！你嚟咗吖？係唔係諗過之後都想同我去旅行呢？我立即幫你買埋機票先！』我拎部電話出嚟，『不過都幾麻煩㗎...又多警告又宣傳...』

我就拎拎部電話...

「既然你認到而家嘅我...」晴晴行前一步，「有冇諗過一直喺你身邊嘅晴晴已經唔係原本嘅晴晴？」

一直喺身邊嘅晴晴...已經唔係原本嘅...

『哈哈...你講咩吖？』講到咁深咁嘅？

「我嚟係要阻止你...」晴晴帶住微笑擰擰頭，「應該話係嚟救你。」

飛揚 2024-09-05 19:02:05

『救...救我？哈講咩吖？奇奇怪怪咁嘅你？』我打量眼前嘅晴晴...先發現佢唔係著住校服...而係一條黑色吊帶連身短裙...

咁快就返咗屋企換埋衫過嚟？

「睇清楚出面。」晴晴指住落地大玻璃窗。

我就跟住晴晴隻手指仔望出去...落地大玻璃窗出面...

好大雨...仲係勁大雨...唔係好睇得清楚...睇唔清楚飛機...應該話冇飛機...隱若見到...建築物？！

睇清楚啲...行近啲再睇清楚啲...喺雨簾之間...原本係機場跑道...停泊咗唔少巨型客機嘅停機坪...而家係一棟棟大約有三層高嘅建築物！

再遠啲...好似仲見到有圍牆...太大雨睇得唔清！

飛揚 2024-09-05 19:03:08

『點會咁㗎...跑道呢？飛機呢？唔係㗎...一定唔係...一定係幻覺...一定係幻覺！』我立即摷返樽藥出嚟！『食藥！食藥就冇事！冇事㗎！』

我食返粒藥！定定神...再望返出去窗外...

都係咁...唔見有跑道...唔見有巨型客機...喺雨簾之間就只有一棟棟大約有三層高嘅建築物！

『點會㗎...咩事吖...』呢啲幻覺...眼前所見嘅...幻覺...

我本來打算望返晴晴...但就望到周圍嘅環境...殘殘舊舊咁？

原本光鮮嘅客運大堂...而家變得...殘殘舊舊...

燈光又暗又淡...啲凳...係木凳？仲要爛㗎添？！

點會咁㗎？機場嘅客運大堂...點會...

飛揚 2024-09-05 19:04:12

我仲見到有幾個人...三幾個...三幾個唔算多...佢哋都係衣衫襤褸咁...仲要發育不良勁瘦...又污糟邋遢...個樣又勁攰但又笑住咁...好匪夷！

咁都笑得出？

你覺得咁樣就叫奇怪？未算！

最奇怪嘅係...喺佢哋身邊...有啲著住綠色大褸...戴住防毒面具嘅人！

一左一右咁...著住綠色大褸戴住防毒面具嘅人喺三幾個三幾個衣衫襤褸嘅人身邊...行...好似護送佢哋？定係押解佢哋吖？

我都唔知...我只係知佢哋一直向住閘口方向行過去...行入去！

佢哋係去邊吖？出境？但冇飛機喎！出咗境點飛吖？

飛揚 2024-09-05 19:05:27

喺閘口旁邊都企咗兩個防毒面具人！好似守住咁！

都唔止喺閘口...遠少少又有兩個防毒面具人行緊...喺櫃檯旁邊又企咗個防毒面具人...喺三幾個衣衫襤褸又成身濕晒嘅人身邊又企咗兩個防毒面具人！

啲防毒面具人係咩人嚟㗎？咁奇怪...其他人唔覺㗎咩？點解好似...睇唔到佢哋咁嘅？！

幻覺嚟㗎姐...一定係幻覺嚟㗎姐！嚇我唔到嘅！

我再倒多幾粒...倒到成手都係藥咁一次過啪晒落肚！

大大啖咁吞！再大大啖飲杯咖...啡...

『潑嘔！』我噴都噴唔切出嚟！

咩嚟㗎？咁難飲嘅？都唔係冇咖啡味咁簡單...又酸又澀咁！仲苦苦地添！

飛揚 2024-09-05 19:07:16

我望住自己手上杯咖啡...紙杯...仲要勁多污漬...黃黃地色...好似翻用過好多次咁...仲有點解我半邊身好似咁濕咁㗎呢？！

正當我想嚟手就掉走杯咖啡...

「唔好咁大動作...」晴晴捉住我隻手，「會吸引到佢哋嘅注意...」

會吸引到佢哋嘅注意？

佢哋係指...防毒面具人？

我望一眼其中兩個防毒面具人...佢哋就擰咗過嚟...好似望住我...

「唔好望...」晴晴對手仔撳住我塊面，望實佢，「你都唔想俾佢哋捉住你...戴頭箍...又捉你唔知去邊度㗎啦...」

戴頭箍...捉我唔知去...邊度...

飛揚 2024-09-05 19:07:50

「跟我嚟...」晴晴錫啖我個嘴...然後就拖住我行...

一路行...同衣衫襤褸人擦身而過...

「唔好望佢哋...」晴晴帶住微笑～

我就冇望...

「自然啲...就好似見佢哋唔到...」

扮得自然啲...

「當班防毒面具人透明...」

我就扮到睇唔到班防毒面具人...就算佢哋望住我...

飛揚 2024-09-05 19:09:38

「笑吓～」晴晴笑住咁細細聲講～

『笑？點笑得出吖？』而家咁嘅環境...喊出嚟啦！

「笑唔出都要笑～」晴晴保持微笑，「唔係佢哋就會懷疑～」

只見有兩個防毒面具人望住我哋...又好似想行過嚟...

我都立即笑笑口～

但嗰兩個防毒面具人仲想行過嚟咁...

「我哋都係返去咯～」晴晴好自然咁同我十指緊扣～

『好吖好吖～』我保持住面帶笑容，『返去喇返去喇～』

嗰兩個防毒面具人又冇理我哋咁多...

除咗呢兩個...仲有嗰兩個...仲有其他人防毒面具人！

要唔俾佢哋懷疑...要扮晒睇佢哋唔到...當佢哋透明！

飛揚 2024-09-05 19:10:24

好唔容易先俾我哋行出大門！

一出到嚟，附近都冇防毒面具人...

『跟住...跟住我哋去邊？』我望望...馬路...殘殘舊舊日久失修咁...

「攞返架車先。」晴晴拖住我行。

『攞...攞返架車先...』我拎部電話出嚟，打算開返個停車場App Call返架車出嚟...

但個Mon都裂晒咁...睇唔清楚...

我部電話...點會殘舊又爆Mon嘅？！

「唔使撳電話喇...你架車喺嗰邊...」晴晴一指...

我跟住晴晴隻手指仔望過去...一個露天嘅地方...一架淋緊雨嘅...爛車？！

飛揚 2024-09-05 19:10:52

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～