【重甜】【明就明唔明就黎明】《XG快落》(5)

1001 回覆

6 Like 2 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

飛揚 2024-09-09 18:30:35

飛揚 2024-09-09 19:00:25

上回講到綽廷嘅靚車變咗爛車！
唔好理喇！快啲去拎返架車先啦！唔係俾人夾走㗎喇！
綽廷同晴晴跑過去上車！但個Mon就爛咗！連個聲控都壞鳩埋！
好彩晴晴部手機控制到架車姐～
有同綽廷生活過㗎嘛～雖然好短暫～
半邊身冧住雨咁！綽廷好唔慣！
但晴晴叫佢要扮到冇俾雨冧咁！因為佢哋仲未脫離危險！
天空上有無人機！
而路上嘅其他車輛都係甩皮甩⻣！
唔好理人咁多喇！顧掂自己先啦！
而喺天空之中，都仲係有Drone...係少咗好多囉...
『我哋而家究竟係去緊邊？』綽廷真係睇唔出佢哋而家條路係去緊邊...
完全係陌生嘅公路...
「咁心急做咩？」晴晴對綽廷莞爾一笑，「去到你咪知囉～」
做咩吖？驚喜吖？
可唔可以唔好太多驚喜？而家已經太過驚喜...
“吱...吱...”繼續任由自動駕駛系統，喺又窄又爛嘅公路上...同一架又一架大大小小嘅殘舊爛車之間一齊行駛...
都唔知過咗幾耐...好似過咗幾個世紀...綽廷都勉強叫做平靜落嚟...
然後佢哋就駛到嚟...市區？
綽廷都唔知叫唔叫市區...一定唔係叫繁榮城市...係又殘又舊嘅舊區咁囉...
“吱...吱...”佢哋架車就停泊喺路旁...
晴晴就落車...綽廷都跟住落車...一齊企喺路邊淋住雨咁睇清楚條街...
『呢度係...邊度？』完全認唔出...以綽廷認知嘅XG...根本就冇眼前呢個地方...
「你唔認得...」晴晴行前兩步，「都唔怪得嘅～」
綽廷唔認得？佢應該會認得㗎？
跟住既劇情發展又會係點呢？

準備出文

飛揚 2024-09-09 19:00:41

[Day 09－試圖離開] PART 03

跟住晴晴身後行，喺橫街窄巷之間...

“灑！！！轟隆！”雨勢冇減弱過...不時仲會行雷閃電...

就算有簷蓬...都唔係遮得好多...

因為大多數都係爛...穿窿...仲要唔知幾時會冧一忽落嚟咁...

雖然係咁，但晴晴都若無其事咁喺簷蓬之下行...

避唔唔避雨又好...會唔會有石屎冧落嚟又好...都唔多在乎咁...

而條街都好污糟邋遢...又多水氹...

大大個水氹就喺正我哋面前...晴晴避都唔避就一腳踩落去！繼續向前行！

飛揚 2024-09-09 19:02:19

都唔止係水氹...仲有貓咁大隻老鼠喺後巷跑出嚟！喺我同晴晴面前停低...同我哋Say個Hi又Say個Bye先走過！

嘩屌養到肥肥白白咁...好食好住咁喎！

難怪啦～都話條街好污糟咯！又多垃圾喺路邊！啲紙皮都濕晒！溶溶爛爛咁！仲好似有...味...

我索多兩索...先開始聞到陣陣臭味！

「記得要保持自然...就算見到咩...聞到咩...」晴晴好自然咁帶住我行...

保持自然...好似街上啲人咁吖？

而家街上都有唔少人...個個都有擔住把遮...

不論係把遮穿咗窿...定係直頭爛淨把骨架...淋住大雨嘅佢哋雖然一面憔悴...都笑得好幸福咁～

好匪夷...望住街上嘅人...一個又一個又殘又憔悴...衣衫襤褸骨瘦如柴咁...都係笑得好幸福...成件事好匪夷！

飛揚 2024-09-09 19:03:13

「我叫你自然啲吖...」晴晴都保持住天真無邪嘅笑容～

太過強人所難喇掛？！

不過就算有幾強人所難都好...我都要盡力扮！

因為...我見到有幾架Drone！

幾架細細部白色三角形Drone仔...有紅藍燈仔喺左右角一閃一閃咁...飄浮喺空中...好似想飛埋嚟咁！

係發現我唔對路？而家邊個唔對路吖？！

我都笑晒口咁～好似街上啲痴線佬咁笑～

痴撚線咩...咁都要笑...痴撚線先笑得出...

飛揚 2024-09-09 19:04:22

嗰幾架Drone就冇飛過嚟...但同時我就見到前面不遠處有幾個綠色身影！

喺雨簾之間睇得唔係好清晰...但越嚟越清晰...清晰見到有兩個著住綠色大褸戴住防毒面具嘅人！

我仲係笑到成個痴線佬咁...

你睇我唔到...我睇你唔到...我係痴線佬...

同兩個防毒面具人擦身而過後...都唔可以鬆懈！

因為成街都係防毒面具人！

一個又一個...兩三個一隊又有...四五個一隊又有...行緊嘅又有...企定定望嚟望去又有...

好似留意緊啲唔知咩咁...好似留意緊街上嘅人...包括我哋！

飛揚 2024-09-09 19:05:24

望住有兩個防毒面具人跟住喺一對擔住骨架嘅情侶身邊...

個女仔又係衣衫襤褸...淋到成身濕晒又露咗半邊乳房出嚟！

不過佢骨瘦如柴咁都冇乜睇頭...呢個唔係重點！

重點係兩個防毒面具人跟住喺對情侶身邊！留意住佢哋個樣咁！

對情侶一面憔悴但笑得好幸福咁～甜甜蜜蜜咁～

兩個防毒面具人就走入一間...超市？

係啦...雖然塊招牌都爛晒又甩晒色咁...都仲見到“仆佳”呢兩隻字嘅...

突然！晴晴喺欄杆上拎起把爛遮打開！擔住嘅同時又翹住我手臂！

飛揚 2024-09-09 19:06:37

做咩吖？做咩咁突然吖？

更突然嘅係有兩個防毒面具人行到嚟我哋兩個面前！

仆街喇！

晴晴完全唔覺有咩咁～就好似睇佢哋唔到咁繼續行～

冇錯！睇佢哋唔到...睇佢哋唔到！

兩個防毒面具人就跟喺我哋面前！一路留意住我同晴晴！

晴晴就甜絲絲咁：「我哋一陣食咩好吖？」

『我...我哋吖？』只見兩個防毒面具人再貼埋啲...貼塊面埋嚟！『食咗你先啦梗係～』

飛揚 2024-09-09 19:07:58

「咦好衰㗎！」晴晴一手拍落我手臂！「成日都咁想要㗎咩？」

『對住你好難唔想㗎喎？』亂噏都要㗎喇！

「係咩係咩？」晴晴古古惑惑咁打量住我，「有幾想吖？」

『想就地正法你添喇！』我避開防毒面具人嘅同時，一手攬住晴晴條小蠻腰！

「哈喂吖！」晴晴一縮！撞埋去防毒面具人身上！「返去先啦心急到死～」

『好好～返去先～』我不經意咁撞一撞身邊個防毒面具人，『搞到你腳仔軟～』

只見兩個防毒面具人見我哋冇乜異樣，擰擰頭就行咗去。

呼...好彩...嚇撚死吖！

飛揚 2024-09-09 19:08:48

我哋繼續行...好似對情侶咁...

無視身邊啲防毒面具人...就算係行緊又好...跟住人哋行又好...企喺一邊又好...望住我哋都好...

當佢哋唔存在...從來都唔存在！

然後...晴晴就帶我嚟到一層住宅嘅大堂...

個大堂又細又暗...啲燈仲要閃閃吓...

點都好啦...終於唔使再淋雨...（有分別咩？底褲都濕埋啦已經...）

只見個大嬸保安勁憔悴咁，同我哋揮揮手～

晴晴放低把爛遮喺遮架上，同大嬸保安揮過手後，就同我入𨋢...

飛揚 2024-09-09 19:10:19

部𨋢又係勁殘勁舊...都唔知會唔會困𨋢...都好啲吖！最怕會跌落去咋！

痴撚線㗎！我咁大個仔都未搭過啲咁恐怖嘅𨋢㗎！

好彩唔使幾耐...只係要去六樓姐...總算平安上到嚟！

一出𨋢條走廊又係殘殘舊舊！盞燈又係閃吓閃吓！有幾盞仲要壞咗嘅！

十足十十年都冇人嚟清潔過！維修過！

晴晴就帶住我喺呢條又殘又舊又多垃圾燈光閃燦閃燦嘅走廊行...行到嚟一個單位...鐵閘前...

“啪...啪啪啪...啪啪...”晴晴拍咗幾下鐵閘後...

就有人開門！

背住光之下...喺鐵閘之間...我只係見到有個黑黑實實...寸頭髮型嘅男人？！

飛揚 2024-09-09 19:10:47

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～