【重甜】【明就明 唔明就黎明】《XG快落》(5)

上回講到綽廷瞓得好差！
又熱又焗又冇冷氣！窗都爛晒飛晒啲蚊入嚟都仲係咁熱嘅？
郊外咩？啲空氣好差喎！
十足十荒廢咗嘅垃圾場！
綽廷都係睇日出睇天光㗎喇～
去用臭水梳洗～出返嚟咁啱就撞到晴晴都醒咗～
明明之前朝朝都攬住佢瞓...事實係攬住個老肥婆瞓...
晴晴叫綽廷落樓下坐住等佢～
又話好快，點知等咗好耐，晴晴落返嚟俾個爛蘋果綽廷做早餐～
仲話食飽開工喎！
點食得飽吖？又開咩工吖？
食完上到間房，晴晴俾部電話綽廷，話冇連上政府嘅伺服器喎～
原來全XG市民嘅電話都俾政府監控住㗎？！
大佬完全係赤裸裸任人睇喎...
「所以呢...」晴晴都拎起自己部電話，「我哋部電話繞過咗政府...翻咗牆～定位都係用外國嘅～」
『外國？唔準㗎喎！又唔安全！咪又係俾晒啲資料外國！』啲新聞都成日講㗎啦～
「唔好再信由政府作出嚟嘅新聞啦～」晴晴又半帶恥笑咁擰擰頭～
『吓？作㗎咩？』新聞喎...都可以作？
「可以俾你接觸到嘅新聞...」晴晴坐喺檯邊，「全部都係作㗎咋～好似話咩日本受輻射影響...」
『唔係喎！啲海產變晒異形怪物咁㗎喎！』綽廷有睇過啲相㗎！
「P圖嚟㗎咋～咁多年日本人都係繼續食～啲海產完全冇問題～仲出口到其他國家～係我哋先禁咋嘛～」晴晴撳撳部電話...遞俾綽廷睇...
綽廷一睇...係大大條三文魚！
好新鮮！好靚仔添喎！
『喂呢啲係我哋本地養殖㗎嘛？』綽廷之前都成日食㗎啦！
「大大隻字寫住豐洲市場吖！」晴晴指住個Mon！「睇吓張相入面！日文字嚟㗎！」
綽廷貼近啲睇清楚...又係喎...相入面嘅價錢牌...門牌...都係日文字嚟㗎喎！
跟住既劇情發展又會係點呢？



準備出文