【重甜】【明就明 唔明就黎明】《XG快落》(5)

『咁都唔使殺人㗎！！！』人命嚟㗎！

「睇嚟你仲未清楚而家嘅情況喎...」晴晴擰擰頭...

『我唔清楚？我唔清楚？！你哋係咩人？點可以隨便殺人？仲好似冇乜咁大不了咁！』呢個社會講法治㗎！點可以視法律為無物㗎？！

「我哋係...」晴晴未講完...

「要等你加入我哋先可以話你知...」就有把男人聲由房門傳過嚟...

我望一望房門...寸頭男人就正正企咗喺度！

『加入你哋？加入你哋做咩吖？加入你哋殺人呀？！』犯法嘅嘢我唔會做！

「你冇得揀...」晴晴左手拎起支槍指住我！「莫講話你係被選中嘅人...國安班人都唔會放過你...」

『國安...』我做錯啲咩吖？

「你一早就已經被國安盯上...」晴晴仲係用槍指住我個頭！「唔係嘅話佢哋又點會搵個專員監視你吖？」

『專員...唔係㗎...唔係真㗎！所有嘢都唔係真㗎！』幻覺嚟㗎姐！！！

「你睇吓你自己個衰樣先啦！」寸頭男人一手捉住我個頭！隊埋去塊鏡面前！「呢個就係現實喇！」

我望住鏡中嘅...自己？

鏡裡嘅人...又殘皮膚又暗啞...眼袋又黑又大對眼冇神勁憔悴...滿面鬍鬚仲要勁瘦！營養不良咁嘅款！

真係我嚟㗎咩？我點會係咁嘅衰樣㗎？！

「我哋一向都唔迫人嘅～而家有兩條路俾你揀...」晴晴仲係用槍指住我個頭！「一係加入...一係一槍打死你...」

『加入囉...』咁叫唔迫人吖？有得揀咩？

寸頭男人拍拍我膊頭：「早又要加入～遲又要加入～早啲加入咪好囉～」

何必呢？何必偏偏選中我呢？！

「唔好講咁多住～幫手搬嘢先～」寸頭男人行出房，「我哋趕住搬竇吖～」

『搬竇？』我問聲晴晴，『搬咩竇？』

「都係因為你囉...」晴晴拍拍我膊頭，「唔係為咗救你...國安都冇咁容易追蹤到我哋...」

『咁...咁係唔係即係好危險吖？』

「再唔快啲幫手搬就真係危險喇～」

同晴晴行去隔籬間房...有一箱箱紙皮箱...

都有十箱八箱...就唔算話好大箱...

「快啲幫手搬落樓下啦～」晴晴一手就拎起兩箱，「新哥揸定架車喺樓下等我哋～」

『新哥？』係頭先嗰個...

「頭先嗰個咪新哥囉～」晴晴就行咗出門～

果然...寸頭男人就係新哥...

但係呢啲一箱箱...裡面載咗啲咩呢？

我就隨便打開一箱嚟睇睇...就睇到裡面係...

『藥？』我拎起一樽...有啲似我哋平時食開...

點解會有咁多藥？

「快啲啦！」晴晴喺出面嗌入嚟！「唔好發呆喇！冇時間喇！」

『哦！嚟喇！』都係唔好理咁多！搬咗先！

我就同晴晴夾手夾腳咁搬一箱箱藥落去！

新哥都泊咗架車喺路邊！係一架輕型貨車！

架輕型貨車又殘殘舊舊...甩皮甩骨咁...都唔知行唔行得...

「喂唔好望喇！」新哥幫手搬啲箱上車！「快啲上去搬啦！仲有唔少㗎！」

『係係...』去緊囉...你係大佬我唔係...

喺搬嘅過程...雨粉粉...而且仲見到防毒面具人喺街上行嚟行去！

「保持笑容～」晴晴帶住天真無邪嘅微笑咁搬～

『唔怕㗎咩？』我都強顏歡笑咁搬，『唔會俾佢哋懷疑㗎咩？』

其實我都幾驚...

離遠就有兩個防毒面具人望咗過嚟...望住我同晴晴搬住一箱箱！

「只要保持笑容就得～」晴晴將兩箱藥放喺地上，「佢哋都係冇腦㗎～只會對唔笑嘅人同察覺到佢哋嘅人起疑～」

係咁㗎咩？！

「你睇我哋嘅外表都比較正常都冇起疑...」晴晴指指自己身上，「就知佢哋幾冇腦～」

我打量晴晴...由頭到腳趾尾...又掃視返上頭...又係喎！

晴晴嘅衣著...成個人都好正常喎！

比起街上啲皮黃骨瘦...污糟邋遢...

唔好話啦！我自己咪又係衣衫襤褸！又殘又憔悴！

「喺佢哋眼中只有唔開心嘅人就係有問題嘅人～」晴晴帶住天真無邪嘅微笑點點頭～

只有唔開心嘅人...就係有問題嘅人...

兩個防毒面具人見到我哋笑笑口咁，就冇再理我哋...走去觀察其他人...

「除非國安已經落Order...」晴晴帶住我行，「就係趁住佢哋未有行動好快啲走～」

國安...真係發夢都冇夢見過自己會得罪國安...

我一直都奉公守法...過馬路都未試過衝燈....點會突然就...

「喂快啲啦～」晴晴向我招招手，「有𨋢喇～」

『哦！嚟喇嚟喇～』都係唔好諗咁多住...

再搬埋最後兩箱藥上車之後...

“吱...吱...”我哋就上車走人！

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

坐喺輕型貨車後座...Un吓Un吓...

唔算快...應該話新哥揸得好慢...

係因為架車開唔得快？定係新哥手車屎？

果然係一齊做二五仔

都冇得揀嘅

班曱甴果然無腦

btw呢個故係咪應該會長篇啲？