【重甜】【明就明 唔明就黎明】《XG快落》(5)

由破爛嘅車窗望出出面街...已經停咗雨...不過仲係烏雲蔽日...

成條街都灰灰暗暗...同殘殘舊舊嘅街道非常合襯...

係街上嘅行人比較奇怪...

衣衫襤褸...皮黃骨瘦...又殘又憔悴...但就笑到好幸福咁...

佢哋本身就反差大...同成個環境更形成強烈對比...

仲有啲防毒面具人呢...跟喺啲途人身邊...死死咁盯實佢哋...貼到勁埋...觀察住佢哋...

就算係情侶又好...老人家又好...甚至小朋友都好...全部都係佢哋嘅監視目標...

當我哋架車停喺交通燈前...有兩個防毒面具人行咗過嚟！

兩個防毒面具人就一左一右咁...望入嚟！望住晴晴同新哥！

晴晴同新哥都扮晒冇嘢咁～睇佢哋唔到咁～望住前面！

兩個防毒面具人仲要探頭入嚟！其中一個仲貼到新哥勁埋！

新哥就笑笑口咁吹住口哨～

另一個又貼近晴晴！

但就算貼到幾近，晴晴都係帶住天真無邪嘅微笑望住交通燈～

兩個防毒面具人見新哥同晴晴都冇乜異樣...就同時擰咗個頭過嚟！望實我！

我都笑晒口咁！望住塊爛咗嘅倒後鏡！

其中一個防毒面具人就行到埋嚟我旁邊...由破爛嘅車窗伸個頭入嚟！勁近咁望住我！

我望到防毒面具上...兩塊圓圓嘅玻璃鏡片中...笑到勁痴線嘅自己...

要笑得自然啲...越係想笑得自然啲就越係笑得痴線...

就喺我快要頂唔順...想縮開之時...

交通燈號開始轉！

兩個防毒面具人都縮返開...

“吱...吱...”新哥都開車...

「唔錯吖～」晴晴由破爛嘅倒後鏡中望望我～

『吓？笑到咁奇怪都叫唔錯？』仲差啲忍唔住想縮...

「差唔多啦～」晴晴帶住天真無邪嘅笑容點點頭，「啱啱先返翻嚟現實～」

『現實？我覺得呢度係地獄多啲...』望住我哋架車開始駛上高速公路...駛離舊區...

望住身邊嘅舊區...同而家身處嘅高速公路...其實都冇乜分別...都係殘殘舊舊...

條路仲要勁爛...架車嘅避震又好似打咗柴咁...Un到屎忽開花...

仲要條路勁窄呢！唔係上咗天橋都唔覺得似係高速公路！

再加上勁多車呢！仲殘舊過我哋架輕型貨車嘅巨型貨車又有！甩皮甩骨冇咗車門同車頂嘅房車又有！

架架都行得勁慢...好似就快死火咁！

望住坐喺裡面嘅乘客仲笑到鬼咁幸福...肉體同靈魂就好似分開咗喺天堂同地獄咁...

痴撚線...真係痴撚線...

點解我會突然嚟到呢個地獄？人間地獄...

明明尋日都唔係咁...尋日我仲係喺天堂...

只係一剎那...由天堂跌到落嚟地獄...

我而家又係去緊邊呢？

我都唔知...呢個方向係去緊邊...

一個陌生嘅世界...陌生嘅地獄...

呆呆滯滯咁坐定定...望住出面...地獄一樣嘅世界...

望住有一棟棟大廈勁殘...又好似已經荒廢咗一段時間...

然後又望到有棟拆緊...

“轟隆！”成棟直冧落低！大量灰塵飛揚！

然後就越嚟越僻...啲大廈越嚟越矮...都係咁殘殘舊舊...好似等緊拆咁...

然後...然後...我哋又駕到嚟另一個舊區...

坐咗幾耐先過到嚟？

我諗冇兩個鐘...都有個幾鐘...

“吱...吱...”駛到過嚟...其實都同頭先個舊區差唔多...

都係殘殘舊舊咁...死氣沉沉咁...

唔同嘅係條街少啲人囉...唔見有防毒面具人囉...仲有天空唔見有Drone囉...

係喇...啲Drone幾時唔見晒呢？明明頭先上高速公路嗰陣都仲見到！

有一兩架仲低飛到我哋車頭！監視住我哋一段路程！

而家又唔多覺眼喎...

『呢邊...唔會俾人監視？』我都係忍唔住要開口問...

呢啲咪機會囉～久唔久先問一句...唔會俾人覺得我煩吖嘛～

新哥擰擰頭：「冇一個地方唔會俾人監視...」

晴晴接住講：「只係呢邊比較少姐～」

呢邊比較少？

晴晴見我唔多明咁，就再講多少少：「佢哋嘅人手又未到可以無處不在～唯有喺啲重要嘅地方放置多啲人手～冇咁重要就放少啲咁囉～」

『哦～』其實我就唔多明嘅～只係扮明姐～

重要係點重要法呢？有幾重要呢？

唔重要又點解唔重要呢？點先為之唔重要呢？

雖然唔明...但又唔想再問落去...

都係嗰句啦～唔想俾人覺得我問題多多鬼死咁煩吖嘛～

或者...等再有機會先...

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 10－來到地獄] PART 02

“吱...吱...”我哋架車轉幾個彎...又轉幾個彎...喺橫街窄巷穿穿插插...

然後就駕到過嚟...一條村？

已經將[Day 10－來到地獄] PART 01 Upload上Penana

笑啦
做咩唔笑呀

笑一波

好難笑得出喎

笑得好大聲喎

笑得自然啲

好好
笑得再燦爛啲

你！
你做咩唔笑！

仲要J左咁耐先知

啲虛假嘅嘢永遠都係美好

要由心發出嚟

笑得好開心啦

都叫做曾經開心過

咁先呃到人 人先會落搭