[遊記]慢慢打，希望唔好爛尾 - 日本(主要)東北睇櫻花之旅

之前遊記：
第一次打遊記，慢慢打，希望唔好爛尾：第一次(主要)起北海道睇雪記
https://lihkg.com/thread/3336882/page/1

[遊記] 慢慢打，希望唔好爛尾：京都東京梅雨季睇花hea玩之旅
https://lihkg.com/thread/3433882/page/1

距離上次夏天繡球花之旅，其實中間都主要去左一次京都、河口湖、東京睇紅葉銀杏，不過京都之旅太chur都係日日行行行好多好多寺狂影相就唔似會有遊記咁寫咁多野所以就無打到啦。
一直都少睇櫻花，主要都係睇紅葉為主，咪當補下櫻花相嘅貨，所以就規劃左呢一次嘅東北櫻花之旅，貪東北應該會少人啲啲，應該都可以比較寫意咁避開一大堆人頭掛。

由於自己就鐘意影風景相多，所以相方面，可能中間啲隨影啊，野食相會少啲。大致上講下個行程表先：
D1：東京->仙台（白石川堤一目千本）
D2：仙台，山形（白石川堤一目千本，霞城公園）
D3：福島（觀音寺川，日中線）
D4：北上，角館
D5：青森 - 弘前
D6：青森 - 蘆野公園、弘前
D7：青森 - 十和田、弘前
D8：小岩井農場
D9：茨城常陸海濱公園、栃木足利花卉公園
D10：大阪走人

慢慢打啦，唔知會唔會爛尾。因為都比較多野搞，同堆相其實都仲執緊 。可能之後都只會抽啲重點出黎打，唔會記錄曬日日嘅行程。

貼住十鬆張相先：

LM，啲相好靚

樓主啲相影得好靚

D1：一切從機場開始

呢次除左補下櫻花相嘅貨之外，其實都係想輕鬆下嘅，返工返到累，心情麻麻地，都要停下休息下嘅。依家 miles 漲價，飛短途其實搭經濟(Y Class) 都夠，不過想坐得舒服少少所以最後都係換左 PEY。


例牌動作。今次搭 CX 526。如果國泰有凌晨機落羽田就好啦。


是日飛機，A350一架。


呢部機個娛樂系統介面換左。A350 最吸引就係有兩個鏡頭望下。


PEY 凌晨機都有餐飯食下，我記得呢個麻麻地好食，不過唔浪費食物都清到嘅。入面果個四方形嘅係粒朱古力。Y Class 嘅話就應該係得月光寶盒。

本來想好好訓下啦，點知手痕開左套《年少日記》黎睇，睇到都無訓 。睇到最後，然後聽聽下歌，玩下個娛樂系統，天都光啦，準備降落成田。



一個人飛有乜行李，所以去程都只係得個背囊同個隨身行李gip，所以都可以好快速 咁入到日本境。換埋 JR Pass，整理下行李，換下 sim card，搞完一大輪先見到同機其他乘客入境。

其實本來想上東北之前就去左茨城個常陸海濱公園先，不過聽人講好似未係最好嘅觀賞時間，所以都係搭出東京之後，草草咁食個包就搭新幹線上仙台啦。


上到去去酒店放好啲行李，行下街（最後去左仙台間 montbell，不過都係上野果間大間好多），都十一二點啦。就去第一個點睇下櫻花先啦，搭到去船岡站落車。


第一站：船岡城址公園、白石川堤一目千本櫻

起車站攞左啲簡介地圖，就跟住地圖咁行啦。成個公園最出名應該莫過於呢架車仔。



行到最頂就有個觀景台有個觀音像，而觀景台一方則可以睇到下面成個河邊都係櫻花樹嘅景色。


不過其實呢次去仙台呢個位都已經遲左啦。所以櫻花個狀態都開始麻麻，而就會見到成條路上面都係櫻花花瓣。

所以都把握機會去下白石川堤一目千本櫻果邊，慢慢跟住河邊咁行去大河原站。

呢幅相見到其實遠處山果度都背曬光，所以如果要影到雪山就要早上黎啦。所以之後果日都黎多次呢一度。

黎呢一度啲人都會去影火車，不過班次就當然唔係話好密，所以我都無好刻意咁等啦。




一路行都係呢啲大大棵櫻花嘅景色



行行下都開始去到黃昏時間啦。櫻花樹被陽光染成黃黃地色都幾正。


最後睇埋個鹹蛋黃

呢一度成個感覺就好似京都個背割堤，不過京都背割堤就路兩邊都係櫻花樹，櫻花隧道感會多啲。當然呢一度就少人好多，同櫻花就大棵好多同高好多，所以起呢度吹下風，停下，聽下流水聲都好舒服。睇簡介話呢一度好似夜晚會點燈，不過我等到六點七八都好似唔覺得會點燈咁，同你估自己仲係十八歲咩，成晚無訓真係頂唔順，所以最後都係無等落去，搭車返返去仙台返酒店訓算啦


去到仙台點都要去食下牛舌！都係亂咁起仙台站入一間食。如果講究啲應該會去其他店同其他分店度食掛。

LM，A350 我坐eco、個USB位壞嘅、充唔到電比iPhone
人大左、坐凌晨真係挑戰自己

無錯，宜家諗返都唔知以前點可以飛歐洲訓唔到但都可以直落玩到成日

btw 比對返你 18-21 /4 好似同我差唔多行程 應該同你同一部巴士入十和田市

一日得兩班JR BUS、好大機率撞到

Lm
我都係睇年少日記

留名

爸打無人弘前天守閣點影的
me喺本丸嗰時長期有人好難捕放棄咗

支持+追返POST先
巴打介唔介意分享吓櫻花期\ ASIA MILES點換到
我睇緊 2025 櫻花期，早360日換都冇CX機換
得返 JAL，要 17500 + $900 一程

國泰都叫update 得新啊，果排講緊電影金像獎佢就有個session 起度擺曬啲戲

咦？唔係啊，我記得果個路口位望去本丸相對黎講唔係好多人

lm
好多櫻花遊記

我臨飛前一個月左右換

可能係起復活節假期後同日本黃金週前，所以啲機票鬆動啲 成田好似容易過羽田有位

巴打真係好運
我前排搶 2025 櫻花期
一出已經俾人搶晒
有時有啲加班機出冇咩人知先有機會搶到咁近櫻花期
BTW繼續等相

可能我黃昏時間喺嗰個位最多人
夜晚落咗西濠冇返上去

D2：仙台，山形（白石川堤一目千本，霞城公園）

話說 D1 見唔到遠處嘅藏王連峰雪山，而其實一開始都排行程都排得唔係好密，想慢慢玩去玩東北，，所以就一開始去多次仙台個白石川堤 hea 下先。呢一日一開始好天，所以都見到。


除左櫻花之外，河邊都有個地方起左個公園，入面種左其他花，都起呢個時候開。所以行呢度果時候都見到幾次蜜蜂果類嘅昆蟲。


行到條行人天橋，上到去船岡城址（？）果個位，就可以見到幾層櫻花同遠處嘅藏王連峰！呢個位啲人會等電車，不過見班次搭過黎都覺得唔係好密，咁就放棄左等啦。


跟住行到去韮神堰果樹就可以再一次聽住流水聲又睇住堆櫻花樹又睇住藏王連峰～ 睇網上資料好似會有船仔咁，不過好似呢兩日都見唔到。


隔離都有少少農田咁。而就見到一浸油菜花，加埋起個畫面度就覺得好正！


其實近睇呢度啲櫻花都開始散散地。不過勝在少人可以 hea 好耐。

D2（二）
咁之後就搖電車咁搖返去仙台站再搖 仙山線 電車上山形啦。因為霞城公園隔離就係軌道，起櫻花季節嘅時候列車行近山形站果陣時候好似會特別慢車，比乘客起車入面都欣賞下櫻花。


車站自動售賣機買到嘅水，個樽蓋咁整又幾聰明。

一到山形，記得上次冬天黎果陣都搵過山形站隔離有山形市最高嘅建築物 霞城セントラル，上面有一個免費嘅觀景台，所以首先就上左黎先。要上個觀景層指示都好方便。


山形站附近就有霞城公園，睇過都係會見到櫻花嘅地方，所以起呢一度都會見到。如果有耐性等嘅話應該可以影到從高空望山形新幹線嘅列車嘅相。
btw 其實本身行程個設計都唔會上黎山形，不過見得閒又有火車到所以先上埋黎。


果期都興 starbucks 呢一杯哈密瓜星冰樂，咁起 facebook 見到記得行過就買返杯試，正 杯下面有哈蜜瓜果肉。


跟住行去霞城公園啦。霞城公園外圍都有條河，上面都見到櫻花跌曬落河嘅樣，不過可惜搵極都唔係點搵到影得好樣嘅角度。同埋夜晚唔太有正嘅點燈效果。





咁主要係個公園，就當然有公園會見到嘅設施啦。個公園外圍好似有條高左嘅圍牆，應該係以前個城留低嘅結構掛，而上面就有條行人道，兩邊就種左櫻花。



起某個位就會見到列車經過！都好多人黎呢個位度影車。都隱約聽到有香港人特登從熱海果邊搭新幹線走上黎山形度影櫻花同火車。因為山形新幹線係迷你新幹線，所以起呢條軌道上面你會見到新幹線嘅列車。


其實偶然都飄起雨黎。好彩都唔算大雨。雨後就有一抹彩虹。


櫻花都跌到周圍都係，不過都有另外一番嘅情調。另外起公園入面有個武道館，入面搞緊比賽定訓練，離遠都聽到啲人練武果時候啲大聲叫喊聲


夕陽之下就有另外一番嘅感覺。


夜晚就有另外一種感覺。不過你見到啦，其實都叫遲左到呢一個位架啦，啲櫻花都開始出葉。不過都算啦，反正黎到咪感受埋夜晚呢個公園係點先走啦。


最後起車站隔離搵間鋪頭食下野。黎得山形都要試下山形牛嘅。呢個係連埋飯嘅set，雖然盤山形牛嘅賣相好似麻麻地，但係燒完之後真係好食，入口即溶，又唔老，真係好食 所以最後都再 encore 叫多一碟牛黎燒黎食 （不過果碟就真係搵個碟咁上檯嘅 ）


去到日本當然要幫襯下便利店嘅甜品啦，咁便宜當然要食下haagen dazs。呢款上面鋪滿曬朱古力脆脆同曲奇，夠曬足料好值得食！

食完之後又搖 仙山線 落返仙台啦。待續。

咁唯有得閒走去睇下有無心儀時間嘅機票放左咁啦
咁多次換，感覺越接近好似會多啲機票換到咁。

D相好靚

我12號去船岡已經開始出葉 呢度好似特別早