- 當年郭富城已經講笑話送埋個仔比古天樂,又係古天樂親手殺死佢,最後郭富城遺願係送佢老婆同仔出香港,後尾見返林峯佢又好打又勤力又老實一心淨係想整身份證留喺香港,古天樂又冇家庭,跟本已經當係佢係自己個仔嚟教。
- 十二少細個食白粉比古天樂救番;四仔應該之前撈黑跟住老婆比人賣走咗同埋自己毀容,跟住撈番正路,成日講「仆街黑社會」;信一就少啲背景。四個知道朱康推女人落街,所以去打獲佢,知大家都係「好人」,咁咪一齊。
- 王九咪為上位為錢,做到第二把交椅,都要比洪金寶串/打,最後洪金寶內傷,都唔等佢自然死,要去殺佢搶個位番嚟。本來九龍城寨係有古天樂維持平衡,有黃/毒但係大部份都係過正常生活嘅人,唔會話逼啲人吸毒做雞,所以林峯攞啲粉過嚟換錢先比佢打,但係王九搶咗城寨之後就一味製毒同想搞脫衣舞,最後仲有埋軍火同搞盂蘭晚會(應該係想收𡃁),雖然係典型反派,但係有動機有目的。
- 套戲都講到明係武打片㗎啦
- 任賢齊咪成套戲終極搞屎棍,成件事都係佢搞出嚟,點可有可冇。佢為咗同老婆仔女報仇,本來已經金盤洗手、收租過日子,都要出番嚟,去搵洪金寶話只要殺到林峯都咩都得,咁先比位洪金寶入。洪金寶入去嗰陣係得古天樂嘅人守住,虎哥嗰邊淨係十二少去,任賢齊啲人更加唔會去,所以古天樂先會輸到咁,冇林峯出現洪金寶唔會夠佢地三個加埋打,如果佢一路就夠抽咁一早就搶咗塊地番嚟啦。
- 林峯咁啱跑入城寨係巧合咁但係故事一定要咁㗎啦,唔通話佢偷渡落嚟冇身份證,啲人就介紹佢去城寨打工咩,咁係合理啲但邊有野睇。另外佢比過好多人收養,但係堅持留番個名冇改姓,講到廣東話,又一定要落嚟香港,又話一定唔做黑社會,可以猜測佢呀媽死前應該有同佢講過少少關於香港同佢呀爸嘅野。
- 點講粗口法個個都唔同嘅,粗口精粹就係冇意思但係你中意加隻字喺邊點講都得,有啲人講得順口啲,有啲冇咁順。
講返自己感想
反而覺得遠景好濛好假,睇多半秒就feel到係假,係睇到演員同前景係真,跟住後面係假嗰隻,飛機應該都係特效但係又冇咁假。實景真係搭出嚟嗰啲就幾有feel,最後加少少場景shot/日常生活shot收尾幾好。
冇睇trailer就入場,一開始兩個人打嗰陣都唔知一個係林峯,完全係配角衣著,由當年chok到宜家演偷渡客,幾意外。
林峯比起另外三個老咗少少,四兄弟感覺弱咗少少,不過算好戲。
講到個個主角都勁好打,又氣功,揸槍又下下打唔中,係少少出戲,不過諗番當年香港興功夫嗰陣啲故事都係咁。
王九個氣功可以保埋件衫,打完一輪又刀又鎚可以連衫都唔爛,演員本身有肌肉有身材應該好好利用埋。
古天樂死咗唔明點解要用鋸,啱啱死條屍唔會硬住,應該搬開佢隻手就得。同埋叉燒舖有木鋸得咁點解唔可以有埋鐵鍊同鎖,臨死鎖起個閘跟住吞鎖匙/扔出去,真係要斬咁攞豬肉刀都合理啲。
好多角色嘅背景都比較少,林峯作為主角偷渡時得一個scene,之前嘅野都係兩句帶過,信一完全冇提,虎哥/洪金寶都少。
三條友打輸王九之後,見番林峯又唔提佢有氣功,番去打嗰時都冇特別準備/應對,喺上到天台先好似醒起打佢唔死要諗計,咁樣送死法好難想像係黑社會接班人。
電單車車牌勁新。
最後龍捲風、風箏咁飛上去。
最後首歌幾出戲下,估唔到哩首歌竟然係會配落武打片。
全部演員都冇突登練番當年嘅口音同用字,聽落完完全全係宜家嘅用法,如果睇番當年今日/鏗鏘集嗰啲,其實2000年初已經明顯係聽到有分別,更何況係城寨時期(90左右?)。
少少彩蛋(唔太肯定)
王九比洪金寶煙頭辣親,已經留咗伏筆佢右邊耳係罩門,最後林峯咬佢右耳破咗佢功。
一開始林峯打完比洪金寶叫佢過嚟嗰下講咗名,所以佢嗰時應該已經去搵料睇下佢係咪占個仔。佢係有佢真身份證copy比任賢齊,應該真係幫佢整咗身份證,但係唔想比完佢之後佢可以走人,之後搵番佢就難。後來係知政府想收地,有利用價值先爆比任賢齊知。
古天樂一早已經叫林峯唔好喺城寨長住,搵到路就好走,但係後尾有講,喺城寨生活係唔需要身份證嘅,所以佢應該一早知林峯身份。無留意林峯幾時講,但係第一次見比佢打一定冇時間講,應該係講完名古天樂先會攞番啲粉幫佢還錢,之後仲一直留意佢,普通人攞袋粉入到去未必有林峯咁好照顧,又還錢又比閣樓又叉燒飯咁。