十幾年前有一日起身,聽到有規律的風聲(呼...呼...呼...)
第一下以為係電腦風扇壞左,之後發現原來係耳仔入面有聲
.因為啱啱傷風好番無耐,以為過兩日會無事.點知一兩日之後唔只有風聲,有時聽野會走音,或者會聽到多一個音,同埋自己講野有回音......於是走去睇普通科醫生,醫生話應該都係傷風後遺症過多幾日無事.
又過多幾日都係無好轉,再睇,醫生話耳鳴咁耐唔正常,於是轉介耳鼻喉.咁啱診所個耳鼻喉醫生一星期先黎一日,於是又等左幾日先睇到.....
見到耳鼻喉醫生,佢做左一個測試:一邊用手捽我一隻耳,一邊同我講野.
被捽嗰隻耳會因為嘈音會聽唔到,咁就可以大約試到另一邊聽力.一試先發現原來我有一邊耳已經差左好多
(另一邊正常),即刻開類固醇俾我.聽力如果出現問題,頭一兩星期食類固醇有機會保得住D聽力.但我因為之前拖左太多日,食完都無乜改善......我有試過再搵其他耳鼻喉醫生睇,做埋磁力共振掃下個腦有無事,好彩無野.但醫生都俾唔到乜野幫助,剩係提議去配助聽器.雖然我另一隻耳仲用到,但理論上有助聽器俾隻弱耳聽,可以減慢衰退.
去配助聽器時,要先做聽力測試,睇下對唔同頻率嘅聽力有幾多,再調校番個助聽器對唔同頻率作出相應嘅放大.理論好似幾好,但實際用起嚟對我就唔係好ok.就算戴咗助聽器,人地如果係右邊同我講野都係聽唔清楚.而且有時個助聽器會將某D聲音放到好大,例如港鐵入閘個嘟聲,如果我入閘時剛好右邊有人入閘,個嘟聲會大到我會失左神半秒郁唔到.....因為攪極都攪唔掂又無乜幫助,用左幾年就無用.只係keep住做聽力測試,隻耳聽力一直變差,到幾年前終於全聾了:個測試開到100分貝俾我聽,我都無聽到聲音,但係我仲會感覺到聲音嘅"衝擊感".
聾左一隻耳,有乜問題呢?有兩個
第一,分辨唔到聲音方向.原來分辨聲音方向係要有兩隻先做到....有時屋企有D電子設備響我又唔知係邊就要慢慢搵.勉強有個方法就係原地慢慢轉一個圈,留意下聲音變得最大/細時去估邊個方向.同埋人地係右邊叫我時,因為我係左耳聽到,我都係會擰左頭去左邊....
第二,無左"雞尾酒效應".雞尾酒效應係指人可以係嘈環境聽到特定對話嘅能力,又係要有兩隻先做到.無咗呢個能力,只要background noise一大我就好難聽清楚人地講乜.我只會聽到好散嘅聲音夾雜住啲嘈音.所以公司一有啲大型social場合我就要摺埋,因為聽唔到人講乜,成日要人重覆三四次個氣氛會好尷尬.......
其實仲有一個可能嘅問題,之前睇到有研究話,聽力有問題時老左大D機會有腦退化....
因為親身體會到聽覺有問題幾唔方便,每當見到有人戴headset重要大聲到我都聽到係乜野歌時,就會好感嘆點解會有人咁唔愛惜自己聽覺....祝大家身體健康.
