返新工前去咗兩星期北海道～非自駕遊記

我直頭唔鍾意 啲料好奇怪 原本睇相以為只係正常拉麵但多咗粟米牛油 無諗過係雜菜肉碎

Day 11 行程概要
- 鐵板燒
- 買手信
- 大倉山跳台競技場
- 狸小路
- Omakase

Day 11繼續天陰陰，今日第一樣嘢係食鐵板燒，喺香港已經用Tablecheck預約咗同揀好餐，準時去到就得。落街個時feel到凍過平時好多，原來今日得12度，平時都20度

Day 11早餐——鐵板燒——鉄板焼 やまなみ（Tabelog 3.63分）
（https://tabelog.com/hokkaido/A0101/A010101/1052356/）

餐廳喺京王廣場酒店22樓，預先book咗¥27,950嘅course（HK$1,677），係一個有鮑魚、鵝肝同知床牛肉嘅餐。準時行到去酒店，去到餐廳得我一個客，畀咗個英文menu我睇，之後大廚就出嚟準備食材。




侍應呢個時候上前菜，係一款叫橢斑馬鮫嘅魚，煮熟但凍食。之後就係刺身拼盤，有隻蝦、吞拿魚、三文魚同北寄貝（我估），蝦幾好食又彈牙。



第一道熟食係用鵝肝整嘅，叫「Foie gras flan」，搵唔到中文，但成餐最好食我覺得係呢兜嘢 最頂個啲係鵝肝，底層係一個蒸蛋咁款，但完全唔會熟到好似一般茶碗蒸個形態，而係半流質狀態。個汁都好食，成碗溝埋一齊好好食，剩係計蛋個部分我覺得好食過茶碗蒸太多倍

繼續：鐵板燒
大廚全程密密處理食材同整嘢食，下一度就係燒鮑魚，配白蘆筍，蘆筍一樣無得輸，鮮甜爽口。鮑魚加牛油整，無乜特別。之後燒野菜就好高質，冬菇、蘆筍同紫薯，三樣都好好食，北海道啲菜好ok。




知床牛扒配炸蒜，更加無乜特別。最後個炒飯就一舊舊，炒到有啲奇怪，係一個唔好食嘅飯甜品係雜莓泡芙，正常發揮。最後飲埋杯啡，今餐我覺得水平之下，唔值呢個價性價比同味道都好一般，有得揀過我唔會食佢。


離開前見到出面開始有少少藍天，希望返香港之前個天氣會係好好啦。

北海道人氣手信舖：六花亭
今日係喺札幌、甚至北海道最凍個日，得12度。經過兩星期日頭熱死嘅情況下，今日我係第一次無著heattech，表示好撚凍

乜手信都未買，所以行咗去附近嘅六花亭同北菓樓買嘢先。先去六花亭，因為近啲，而今次去嘅係札幌本店。本店二樓係一間Cafe，有好多限定餐目，例如六花亭名物之一嘅「葡萄奶油夾心餅乾」，喺Cafe係有雪糕版試食。不過實在太多人嘅關係，一見到就落返一樓買嘢算。


買葡萄奶油夾心餅乾就無死啦，話晒最出名係佢。佢分咗好多包裝，有包裝到一盒8至10件，個盒會精美啲，適合成盒送；如果係送一粒畀人，可以買普通包裝（透明袋、一袋4件），個價錢係平啲嘅，自己格價啦。佢都有一包有齊六花亭唔同食品嘅禮品包，有五樣嘢係入面，包到好靚，¥500一包，做大份少少嘅手信係好適合

另一間北海道手信店：北菓樓
六花亭買完就去咗北菓樓，北菓樓出名啲嘅係開拓米果，同埋泡芙。呢度2樓都同樣有Cafe，去前睇Blogger話呢間Cafe係平靚正，¥917有兩件cake、一份雪糕加杯嘢飲，又真係幾抵。原本都想食，不過有係見到太多人所以卻步，未去到會排隊食嘅程度。



落返2樓買手信，對比六花亭弱好多，同埋全部係好多空氣嘅包裝，唔啱放入行李箱 所以只係買咗盒五隻味嘅開拓米果，食後感係好「痴牙」 走前買咗個夢不思議泡芙返酒店食，因為一陣都係返酒店放低手信先。得返最後一粒，¥250正正常常嘅味道。


返酒店放低嘢之後，就出發去大倉山跳台競技場，由狸小路去要先搭市電去到円山公園，然後再轉巴士。去到円山公園因為搵唔到出口，所以去到車站目送架巴士走咗，下一架要等一個鐘，咁就去附近一間bookmark咗嘅cafe食tea啦。

Day 11午餐——Cafe——森彦 （MORIHIKO もりひこ）（Tabelog 3.63分）
（https://tabelog.com/hokkaido/A0101/A010105/1000080/）

呢間Cafe叫森彦，由円山公園站行去大約五分鐘，去到要喺門口寫低你個名，然後等叫名。坐咗陣職員會拎menu出嚟畀你睇，等咗半個鐘就入得去。等位個陣遇到個獨遊巴打，喺香港落機等行李見返佢，先知佢係香港人


入面都係有兩層，上咗二樓一個窗口位，入嚟前喺門口叫定嘢食，叫咗份藍莓蛋糕同咖啡，所以好快就送到。食物正正常常，環境幾舒服，所以坐喺度睇咗陣風景。



等咗半個鐘再食咗半個鐘，原先要搭個架巴士又走咗 最後就揀搭的士去大倉山跳台競技場，¥1,390都ok啦。

奧運主題：大倉山跳台競技場
大倉山跳台競技場，成座嘢你當係一個滑雪枱啦，搞冬奧會用到，入面可以搭纜車上去展望台。競技場隔離係札幌奧林匹克博物館，你要先去博物館買咗纜車飛先，先可以去搭車。買飛會問埋你去唔去博物館，我就無要到，直接上纜車。



見到奧運五環其實自己有啲激動，因為2021做緊份奧運相關嘅工作，對香港運動員嘅認識多咗好多，個期仲會落商場睇live撞正香港運動員拎咗好多牌，係好難忘嘅一個月，所以見到五環係會感動。入面有個紀念品店，可以買吓嘢。

好得人驚嘅露天纜車
之後出發去搭纜車，呢度嘅纜車係露天個隻，單程都要5分鐘。搭呢架纜車有啲恐怖，驚過玩滑翔機，可能太露天，所以個人坐到定一定，見到隔離前後啲人勁放鬆，覺得自己有啲柒


上到去就係展望台，望出去大概係札幌市景色啦，天氣原來唔算好好，有啲位有陽光曬落去，但好多位都係有雲，留咗10幾分鐘就走人。


落返去都係搭纜車，呢款纜車係要你坐上去之後，手動將個「安全帶」拉落嚟。落山個時我拉咗個「安全帶」之後佢彈返上去，但架纜車已經行咗咗出去，即刻拉返個安全帶落嚟㩒實，又嚇一嚇 搭呢種露天纜車真係搞唔掂，全程都好驚嘅狀態 落到去撞正有巴士落山，就搭咗了。

終於行狸小路
之後返咗去行狸小路，由1行到7。去到狸小路1，當時搞緊一個啤酒市集，但唔知天氣差定真係無人，個度係無乜人流嘅。


開始行狸小路，1至7有唔同舖頭，以餐廳、手信舖（藥妝、食物）為主，仲有啲賣衫舖、夾公仔同扭蛋舖。我就去咗夾公仔同玩扭蛋，fing咗¥2,300。

之後就返酒店hea到咁上下，就去食預先book好嘅晚餐Omakase。預約咗20:30，位於円山公園站隔離，無錯，就係晏晝去完個度，夜晚再去多次。

Day 11晚餐——Omakase——鮨菜 和喜智 （すしさい わきち）（Tabelog 4.28分）
（https://tabelog.com/hokkaido/A0101/A010105/1000645/）

成個trip最高分個間餐廳就喺呢度，亦係日本食過最高分嘅餐廳。去之前半個月左先book，以往4分以上都已經極難book，今次竟然勁輕鬆就book到，都有啲擔心會唔會少伏，不過Tabelog個分就係信心保證，所以無嘢好驚 今次同樣喺Tablecheck上book，得一個¥31,200嘅餐揀。


當日book咗20:30，我20:10分左右早到咗，但上一round係會食到20:30先走，所以個店員姐姐就開咗另一邊畀我坐住等，之後其他早到嘅都喺度等，開餐先過返去另一邊食。等嘅時候仲有熱綠茶飲，個日得12度所以暖晒。



用餐區得4個位，由右至左坐，分別係我、一個日本男士、同一對大陸情侶。上餐會係右至左先，即係上我先，而上完仲會有店員放張圖文並茂嘅圖，去講返你食緊咩嘢，中英日文有齊，仲要有埋公仔，真係第一次見，所以at least知自己係食緊乜



上餐前會問你飲咩，唔飲酒都有熱茶，我就要咗熱茶。成餐飯對大陸情侶無停過講嘢，仲要係大聲個隻，勁尷尬

Omakase上半場：7款菜式
講下今餐食咗乜，呢個¥31,200嘅餐包咗7樣菜加12款壽司，先講咗呢7樣先：
1. 八爪魚刺身


2. 比目魚、海鼠腸刺身


3. 燒喜知次刺身（呢間舖名係用佢命名）


4. 毛蟹茶碗蒸


5. 鮑魚海膽撈飯


6. 燒太刀魚、烏魚子


7. 螺貝刺身


個鮑魚海膽撈飯係最難忘，呢啖海膽係今次北海道食過最甜嘅一次，入口真係好驚人啲飯唔肯定係用咩撈過，你會見到有個汁，少少酸但好夾，勁好食

另外個毛蟹茶碗蒸勁足料，啖啖蟹肉；燒喜知次、燒太刀魚都好好食，後者魚肉燒完仲好嫩，上半場已經好滿足

Omakase下半場：12款壽司
1. 縞鰺


2. 中拖羅


3. 竹筴魚


4. 燒鰻魚


5. 馬面剝


6. 燒北寄貝


7. 馬糞海膽、紫雲丹海膽


8. 牡凡蝦



9. 金目鯛


10. 吞拿魚蓉卷


11. 味噌湯


12. 玉子


下半場好多魚都係唔知咩嚟，燒鰻魚平時我唔太鍾意食嘅，主要因為有骨。呢個無骨、夾起唔會散，醬料唔重手

兩款海膽都好食，呢度啲海膽好過晒啲海膽丼 牡凡蝦佢會分兩次上，其中一個係刺身咁食，之後就壽司，個色水好靚；最後個玉子都有驚喜，似雪凍咗嘅蒸蛋，凍食嘅但作為最後一道我覺得幾好

Omakase值得一試
¥31,200即係港紙$1,800咁上下，日元低水真係抵到爛，位又易book好推薦老闆好nice，keep住同隔離日本人吹水，識日文就好；同埋有個靚女會幫下手廁所係用aesop，果然有啲taste！臨走前會問下使唔使幫你call的士，我就地鐵一程返去算，加上要去便利店，所以就自己走。


今晚喺便利店見到Glico另一隻味，返到去食先知係咖啡味，都係薄荷朱古力好食好多；另一個牛奶布甸就唔得啦，聽日就係最後一日full dayDay 11完！

Day 12 行程概要
- 二条市場
- JR TOWER展望室T38
- 札幌電視塔

Day 12，行程都嚟到尾聲，好感動今日好好天，即刻去返晒堆乜塔物塔睇景


今日嘅早餐去咗二条市場，食海鮮丼，大概11點幾先去到，一樣揀咗Tabelog最高分個間。

Day 12早餐——海鮮丼——海鮮処 魚屋の台所 本店（Tabelog 3.63分）
（https://tabelog.com/hokkaido/A0101/A010102/1047834/）

餐廳門口已經有menu，其實叫最多嘢個個應該最合理，但又驚有啲唔想食嘅魚，所以決定叫其他，揀個一定樣樣食材都食嘅丼。入到去會有英文menu，同埋佢會話你知一份menu係大碗、另一份係細碗。


最後叫咗個細嘅丼，有三文魚、帶子同三文魚子、加多咗份海膽同帶子（加帶子係因為我唔知點解無留意到我叫個個有帶子）。唔係好記得點解我會無叫大，因為宜家睇menu覺得大嘅三文魚子加海膽、或帶子加海膽，會係我想食嘅嘢。


嚟到個碗就唔大，但啲料就塞到好滿，要食好多料先可以開始食飯。三文魚子唔會太鹹、帶子新鮮大件、海膽就尋日個個太難忘，所以今日就唔覺太特別，三文魚就好正常。轉個頭就食完，盛惠¥3,740，我覺得好過函館食個間，價錢都平一半

日本夾公仔唯一收穫
天氣好就心情好，又去咗TAITO夾公仔 事緣係前一日用咗¥2,300去夾呢個星之卡比杯，夾咗藍綠色，但既然紅黃色係一對，點可以唔夾。經過前一日嘅經驗，今日用¥1,600就夾到，儲齊全款！


心情好除咗要夾公仔，就係食甜品，下一站去附近嘅芭菲店食嘢。去呢間甜品店其中一個原因係《First Love》喺度拍過，晴道同埋佢個妹同佢個外甥女食個間，所以就揀咗佢，潮聖下（天氣真係好好）

Day 12午餐——甜品——Sapporo Pancake&Parfait Last MINT （ミント）（Tabelog 3.49分）
（https://tabelog.com/hokkaido/A0101/A010102/1041931/）

門口就已經都有《First Love》海報，入到去坐低就睇menu，呢間餐廳係手機自助落單，日本嚟講我好似無見過。間舖個名其實都透露到，佢係食Pancake同芭菲，而在場有唔少日本妹自己嚟食Pancake，Pancake相對出名啲。


我由睇套劇個時已經想食晴道食個個薄荷朱古力芭菲，所以要咗個有埋飲品嘅set個芭菲好唔特別，普通過Dreyers，滿足唔到我呢啲薄荷朱古力控上高係一粒馬卡龍、底下係啫哩，塊Oreo同所有cream都好唔夾。呢件嘢要¥1,930，可能間舖Pancake會好啲，大家剩係想食雪糕就唔好嚟了

JR TOWER展望室T38
食飽就出發去JR TOWER展望室T38，直接去JR札幌站就得，因為早兩日喺Stellar Place見到有個位係直去。去之前TOKYU HANDS行咗陣，本身今個trip其中一樣嘢就係想換咗個喼，因為有個碌爛爛哋，不過後都無換，仲帶返返香港，都唔知幾時先換到


望住啲水牌，就會行到去T38，樓下買完飛就可以上去。

全日本最靚景尿兜（？）
上到去果然萬里無雲，可以瘋狂影相，啲窗好乾淨所以啲相都好靚，去相。


呢度有個打卡位，就係男廁入面呢個最靚景嘅尿兜，先入去痾督靚尿先，個景真係好屈機洗手個時有另一個人走咗入嚟痾尿，我之後返轉頭影多次相見到佢，所以就企喺後面等，佢痾完之後企咗喺度影相，到走個陣先望到我又係影相，成件事勁搞笑


喺度坐咗差唔多一個鐘就走了，下一站又去食嘢了。

Day 12下午茶——Cafe——板東珈琲（Tabelog 3.58分）
（https://tabelog.com/hokkaido/A0101/A010102/1002237/）

下一站係去食tea，要搭一程車先去到，JR TOWER樓下有個巴士站，所以都好方便。間Cafe好文青打卡feel，入去有啲窗邊一人位，老闆就叫我坐中間張大枱。餐廳menu就用google translate翻譯啦，記得望下牆上塊牌，會有今日限定menu。未正式食正餐嘅我，就叫咗份芝士厚多士、一杯咖啡、同埋一個布甸。




等嘢食個陣keep住有人入嚟，佢哋係嚟買咖啡豆同奶，買完就走，所以呢度啲啡應該係唔簡單嘅 份多士一上已經覺得好吸引，咬咗啖，好撚好食，個包鬆軟到一個點，配埋勁厚芝士，仲識拉絲，我覺得係成個trip食過最難忘嘅食物之一 咖啡同布甸相對下就無咁突出，鍾意食芝士嘅不妨嚟試吓，呢餐¥1,480。




食飽又返咗狸小路，因為醒起有啲手信未買，之後返酒店抖咗陣，就出發去札幌電視塔睇夜景。

札幌電視塔夜景
札幌電視塔樓下買飛，之後排隊等電梯上去，上到去觀景台係無廁所，記得去咗先上去。


上到去差唔多7點，呢個時候嘅日落係7點0X分，所以開始日落緊。想影相，但玻璃好污糟，同埋反晒光，解決方法係將個鏡頭貼住個窗感恩last day天氣非常之好，所以個日落好靚，好有feel。呢度有啲凳畀你坐，我都坐喺度睇咗陣日落，所為最後一日嘅天氣我表示好滿意。





個天開始黑我就走了，今晚去食甜品做晚餐。

Day 12晚餐——甜品——パフェ、珈琲、酒、佐藤（Tabelog 3.59分）
（https://tabelog.com/hokkaido/A0101/A010102/1051961/）

今晚去咗食聖代，間嘢喺巷仔嘅一角，門口圍晒欄杆畀你排隊，好好彩個個鐘數去到無人排，可以直入。入面有分Bar枱、普通餐枱、同埋要除鞋坐地下嘅位，我就要坐地下，坐到好攰，所以食完就走咗


叫咗個係鹽味焦糖配開心果，好撚好食，個塊脆餅係焦糖味，成功成為我喺北海道最愛嘅甜品佢仲有好多唔同味，好想試多幾款臨走前見到有手信買，所以買咗set，事後係新千歲機場都見到有得買，不過呢間舖就平少少。食後感係白朱古力味百力滋，唔好食食完甜品就去咗食晚餐（宵夜），食酒店樓下一間高分拉麵店。