返新工前去咗兩星期北海道～非自駕遊記

羊蹄パノラマテラス 又係
唔知係行錯路定真係咁樣入
一渣入去又係 成排墓碑
都係掉頭走左

如果得少少應該都會渣上山
但佢係一排排 排到上山
最後係Lake Hill Farm影完就算

呢間啲海膽冇加明礬

即棄菲林相機d相 你曬左出黎再scan都咁靚?

都係，睇下你要d 乜

函館一日落條街已靜到癲，我估稚內仲靜

Ching 冇去防波堤嗰邊？

岩岩北海道返黎留名
利申:自駕遊

多謝樓主分享.

我都試過去到阿佐利壽喜燒但無得食
佢係連日本人都book爆

留名

live 左

睇完覺得稚內會幾啱我

我都試過

Day 7 行程概要
- 稚內搭JR去旭川
- 旭川動物園
- 行旭川大大間AEON

Day 7一早就會坐JR，由稚內出發去旭川，事先上網book定就得。06:36出發搭4個鐘，10:19會到旭川，車費¥8,890。再見稚內


離開稚內當日嘅清晨，依舊好好天。喺函館個JR站已經拎定張JR車飛，揀咗右排窗口位，貪佢望到個海，果然望到利尻富士，望到即係天氣好無買早餐上JR食，打算落旭川食M記pancake包 4個鐘車程聽吓我個旅行歌list，望下風景，其實好快就到旭川。張電話卡喺中途有試過收唔到，之後都真係無嘢，收貨。


去到旭川就表示旅程已經過咗一半，得返一半了，好快就要返香港

溫馨提示：日本M記早餐只到10:30
去到旭川，先去酒店放低行李，今次喺旭川會留兩晚，住「旭川站前永安國際酒店」，盛惠¥18,631（HK$1,117.86）。今次特登揀咗早餐package，亦係成個trip唯一揀咗要早餐嘅酒店，因為原先plan咗未來兩日都係晨早出發（一日去層雲岬、一日一早出發落滝川），加上北海道酒店出名食勝手丼，所以就book嚟試試 後來轉咗行程，無去層雲岬，但個早餐都剩得一試，Day 8再講。牙刷個啲一樣喺大堂任你拎，酒店隔離係個開到22:00嘅AEON Mall，所以唔驚無嘢做，終於有少少大城市feel


放低行李就行去AEON，本身係打算去麥當勞食Pancake包，但因為以為早餐到11:00，結果係10:30就完，我10:40分左右去到就食唔到了

最後行咗一個圈，揀咗食MOS BURGER。叫咗個蝦堡餐，MOS嘅蝦堡其實香港食都覺得好高質，日本一樣。個餐有塊「枝豆粟米薯餅」嘅物體，即係青豆，唔難食不過都唔好食（利申對青豆係無恐懼，我炒飯會落三色豆的），盛惠¥870。

旭川必買交通Pass
食完嘢先去觀光中心買交通Pass，旭川交通券都有網上版，但想儲嘅關係我去咗買實體版上網research定知道我去嘅地方一定會cover到，所以就買咗2日pass，¥1,800任坐旭川電氣軌道同道北巴士，想去嘅市內地點基本上都包（其實計過係肯定回本，推介大家非自駕就買啦）官網有suggest你行程同講大路景點去唔去到，大家可以上網睇。（https://ticket.jorudan.co.jp/asahikawa/ja/）

搞笑嘅係張pass A5 size，同平時其他地方用嘅交通pass size差勁遠，仲要硬卡，每次都要開背囊拎出嚟都幾麻煩。

旭川必去：旭川動物園
第一站——旭川動物園。原先旭川個行程係無諗住去旭川動物園，因為對動物唔大興趣，但後尾因為cut咗層雲岬，留喺市內兩日，所以加返動物園，好彩最後有去，好值得去旭川JR站搭巴士去，大概45分鐘，呢程巴士來回要近¥1,000，所以個Pass係一定會回本，推介買。

今日旭川天氣都係好好，藍天白雲，以戶外景點為主嘅旭川簡直絕配。旭川動物園入場費用¥1,000，喺度買咗好多動物公仔做手信。入場時拎張地圖，個動物園都幾大，玩大半日真係唔係問題。最近門口嘅動物館係唔知咩雀，我就直接殺入去企鵝區


旭川動物園每個動物區嘅門口，都用上個種動物做設計靈感。企鵝館入去係一條透明水路，天氣咁好所以入面係勁靚，近距離見到啲企鵝喺度游水，好鬼可愛真係




行到盡頭係石地，呢度係有一堆企鵝，真係任影唔嬲 佢哋會喺入面跑嚟跑去，左搖右擺個on9步姿真係好得意。行返出去館外，係一個戶外區，啲企鵝會走晒出嚟，真係勁近距離，勁多人企喺度睇班企鵝，狂影佢哋。企鵝館係必去

動物放題後再去睇企鵝
睇完企鵝，去睇埋其他動物，呢度嘅動物唔係平時睇開個啲，見到好多從未見到嘅動物，當然正常個啲獅子老虎都一定會有。成個動物園你無論順時針或者逆時針，都可以行得哂所有館，所以唔驚會miss。北極熊、浣熊、貓頭鷹、狼、黑熊、水瀨，連雞鴨個啲都有，真係大開眼界，宜家一路寫會諗起《荒失失奇兵》呢套電影。




最後去多次企鵝館，再望多次班傻企鵝，真係好on9。冬天嚟嘅話，啲企鵝係會行出嚟，我覺得我冬天好大機會會為咗睇而再嚟。旭川動物園真係嚟旭川必去景點。


喺旭川動物園無食過嘢齋行，都行到兩個鐘，之後就出去等車返旭川站。巴士站好多人等，當日有一班小學生集體嚟，所以好爆，有時間就早啲去排隊啦，如果唔係就要企45分鐘車程，我都因為太遲排所以企足全程。出返去就去咗食飯，搵咗間壽喜燒，補償函館食唔到個次。

Day 7午餐——壽喜燒——すき焼 三光舎 旭川店 （さんこうしゃ）（Tabelog 3.53分）
（https://tabelog.com/hokkaido/A0104/A010401/1004849/）

由旭川動物園去呢間嘢，唔使搭到旭川JR總站，早兩三個站落車會近啲，自己睇Google Map都搞得掂。今次壽喜燒同樣係walk in，本住一個人唔知食唔食到嘅心情去，最後餐廳接受一個人仲要有房仔，私隱度十足。佢除咗壽喜燒，仲有Shabu Shabu、鋸扒揀，我就當然揀壽喜燒啦，叫咗特選加杯可樂，盛惠¥6,310（HK$378.60）。落Order時就要飯，個姐姐仲提我有烏冬揀，好啦就烏冬啦



送餐啦，有三件牛，同埋豆腐、洋蔥、芋絲，仲有啲芫荽物體，放落去即lur返出嚟 店員會幫手燒第一輪，放晒啲菜同幫你settle第一件牛，夾埋落你蛋個碗度就撤退，自己慢慢玩剩返兩舊肉同烏冬。姐姐預咗你會影相，所以會擺靚啲嘢等你影晒先。烏冬其實望落唔似烏冬，係扁身麵嚟，口感又幾得意。今餐旨在滿足食壽喜燒嘅慾望，收貨！

酒店Checkin篇
食飽大概4點就返酒店Check in，今次單人床，酒店無大浴場，所以有個浴缸。房內明明裝修都好新淨，不過個廁所就好老套，個feel同出面格格不入 大堂都有牙刷個啲任你拎，我呢個鐘數就去洗埋個衫，襯佢無人同我可以抖抖。




BTW今次個窗簾終於可以遮哂所有光，我可以一覺瞓天光啦！大概6點左右就出發去Dinner，今晚係食釜飯。

Day 7晚餐——釜飯——晚餐 甘味茶屋ぶんご （Tabelog 3.65分）
（https://tabelog.com/hokkaido/A0104/A010401/1010037/）

嚟呢間原意其實唔係為咗釜飯，係為咗個甜品，Tabelog一望就畀佢個乘品吸引咗。門口係極唔起眼，開門入去見到滿座，有個姐姐行出嚟，佢知我唔識日文就講咗句「Sorry I don’t know English」，不過其實佢講到，因為佢叫我等「30 minutes」 一場嚟到當然等啦，其實等咗10分鐘就有位。


一睇Menu，我想食個個甜品原來6月先有不過都有其他甜品，所以叫咗個飯加甜品後上。除咗釜飯，見唔少人係食烏冬，烏冬餐都有個迷你釜飯，啲人食唔切老闆娘會幫你包成飯糰拎走 我自己就睇咗Tabelog同Instagram，係推介「海鮮三種」釜飯，有蟹肉、帶子同蝦，所以就揀咗佢。由於即叫即整，所以要等半個鐘。

上枱打開好吸引，似煲仔飯，一來個煲、二來一樣有飯焦。海鮮底下會有啲菇同蘿蔔絲，勁足料！呢個飯真心好好食，我會話係成個Trip Top 3嘢食之一，極推介仲要個壺都幾深下，份量都唔少，食咗幾碗都仲有，飽到差啲食唔落個甜品。


無得叫原本個個，就叫咗個廢嘢，雲呢嗱雪糕加紅豆蓉，建議叫呢個嘅話可以慳返個胃，太普通 成餐有主食加甜品只係¥1,990，又抵又好食，個飯無得輸。如果唔係第二日唔開，我好大機會會返嚟食埋個烏冬。

旭川超巨型AEON
食飽搭車返旭川站，天已經黑黑哋。


返酒店前去咗行AEON，有好多衫舖，同埋都有扭蛋機。今朝5點幾就醒咗，所以玩咗陣扭蛋就返酒店瞓覺了。


Day 7完！