返新工前去咗兩星期北海道～非自駕遊記

第一次寫遊記，斷斷續續已經寫晒成個遊記喺word，差啲相未揀。如無意外會每晚更新一日，假期就可能更新密啲

背景：因為啲Asia Miles就過期，所以要快快手去換機票，㩒㩒下見到北海道20,000里幾抵，就咁買來回都唔平，5、6千走唔甩；時間靚、又未去過北海道，所以即刻決定。本身個人驚凍，5至6月嘅北海道唔會好凍，日頭仲可以20幾度，有幾日我真係熱到出汗，氣溫非常適合自己。稅同附加費只需要HK$980，抵到爛。

兩星期行程主要分咗4個地方，酒店book咗4間，先後次序分別係：函館、稚內、旭川同札幌。非自駕遊，所以4個城市之間嘅交通就用上咗內陸機同JR（無買JR Pass，因為計過搭唔到咁多程）；而城市內嘅交通就依靠市內交通，都尚算方便，plan好行程、做好準備就問題唔大。

本身有mark使費嘅習慣，所以返咗嚟香港計咗次使費，總共用咗HK$35,000左右。去之前都無特別預budget，錢就返香港再搵啦。疫情後去日本都係用citibank唱定円，去到就7仔atm禁錢，非常方便。去前仲有大概20萬円，上年去東京用剩；今次就唱多咗40萬円，家下戶口再次剩返20幾萬円，留返下次用。

Post少少相先，旅程開頭買咗部即棄菲林相機玩下

稚內：



旭川：



瀧川：



札幌：

點解我會估你去到稚內但冇去埋礼文利尻

講吓$35,000大概使咗乜

去前準備：
1. 保險：揀咗AXA，揀咗Superior，HK$441，佢有平啲嘅plan，不過覺得差唔係好多就揀咗Superior
2. 電話卡：由於去兩星期，所以一般7/8日個啲就用唔到，有追過post，最後買咗呢張（https://www.kkday.com/zh-hk/product/134415-japan-sim-card-500mb-2gb-unlimited-high-speed-4g-sim-card-delivery-pickup），HK$282。電訊商係Softbank，旅程中途都收得好好，主要都係用Google Map，當然social media都用到無問題。唯一係稚內去旭川嘅JR車程，中途斷斷續續加埋有10分鐘上唔到網，不過完全收貨，下次去日本去10幾日我應該會揀返佢

當地消費：（有啲餐廳香港book定，之後會講）
1. 食：HK$9,000，事前book咗3間札幌餐廳，一間意大利菜、一間鐵板燒、一間Omakase，會逐間再寫（識用tabelog之後基本上都喺tabelog搵定食乜）
2. 酒店：HK8,696，最貴個間喺稚內，仲要係dormy inn，要過千港紙一晚
3. 買：買吓衫褲鞋襪，盛惠HK$4,869；另外買啲on9嘢、手信等等，中間玩下扭蛋、夾下公仔，就使咗HK$3,594
4. 交通：HK6,292，坐咗3程內陸機、一程4個鐘JR，其他就市內交通
5. 景點：HK$998，其實好多欣賞大自然嘅免費景點，所以無乜入場費
6. 雜費：HK$200，好似洗衫個啲咁，同埋行路行到對鞋墊爛咗，所以買咗塊新嘅

真係無去
原先plan咗去利尻，不過太攰同要早醒，所以cut咗

行程共13日，行程表如下：

函館篇
Day 1：香港直航去新千歲 –> 內陸機去函館 –> 宿3日函館
Day 2：五稜郭 –> 明治館、金森紅磚瓦倉庫、八幡坂、元町區 –> 函館山夜景
Day 3：恵山杜鵑公園 –> 立待岬 –> 夜晚上多次函館山

稚內篇
Day 4：函館內陸機去稚內（分兩程，要先去新千歲） –> 宿3日稚內
Day 5：稚內公園、冰雪之門、北門神社、稚內防波堤、野寒布岬、溫泉童夢、夕日之丘
Day 6：宗谷岬 –> 溫泉童夢again（原定呢日去利尻島，不過cut咗）

旭川篇
Day 7：JR去旭川 –> 旭川動物園 –> 宿2日旭川
Day 8：上野農場、北彩都花園、常盤旋轉塔、平和通買物公園（原本去層雲岬一日遊，又係太攰cut咗）

札幌篇（有半日瀧川，放埋喺度）
Day 9：滝川油菜花田祭 –> 滝川天空公園滑翔機 –> 札幌工廠 –> 宿4日札幌
Day 10：三井OUTLET PARK 札幌北廣島 –> JR札幌站頂商場
Day 11：大倉山跳台競技場 –> 狸小路
Day 12：二条市場 –> JR塔大樓觀景台T38 –> 札幌電視塔（原定小樽一日遊）
Day 13：返香港

Day 1 行程概要（飛機一日遊）
- 香港出發去新千歲機場
- 新千歲轉內陸機直落函館
- 酒店check in、晚餐食拉麵、洗埋衫就瞓覺了

香港出發去新千歲機場
香港去札幌班機係09:15起飛，機程大概五粒鐘。機鐵去到機場大概7點50分，寄完行李就入去，買杯咖啡等咗陣就final call。


揀咗算前排嘅位，因為唔預要痾屎痾尿，所以揀咗窗口位，唔會阻住人又唔會畀人阻。準時起飛，10:30左右就派早餐，睇咗兩套戲《日麗》、《闔家辣》。前者本身見到好多人讚，香港好似啱啱先上，但見飛機已經有就揀咗佢嚟睇，值得一睇。後者正正常常，其實幾好笑，打發下時間係ok嘅。


最後聽晒林家謙三隻碟，今次係隔咗近7年後再次獨遊，一個人聽《一人之境》好有feel、飛機聽《在空中的這一秒》又夠貼題（利申打手）。

到達新千歲機場，轉內陸機去函館
新千歲機場Land都非常準時，之後就去轉內陸機落函館啦。去之前plan行程，有研究過點樣會順路啲，香港去只係得新千歲機場揀，所以我去個4個地方都好難順路。最後Day 1決定直落函館，之後再內陸機上稚內，用JR玩返落旭川、最後札幌，搭完覺得自己安排得算係咁。

新千歲去函館坐ANA，HK$671包埋行李。今次第一次坐內陸機，原本香港去新千歲係15:25 land，之後新千歲去函館係17:45，未搭過日本內陸機嘅情況下，有擔心過兩個鐘夠唔夠。內陸機過關好簡單，去搞掂寄艙行李，就可以過海關了。最後搞掂晒去到登機口都只係16:05（我仲買咗嘢食同嘢飲），時間超充裕。


機程唔使一個鐘，但都有粒糖食，空姐係上機個陣會拎住個兜畀你拎。班機應該50至60人左右，飛得唔高，撞正黃昏時間，坐窗邊位嘅我表示狂影相。雲又靚、海又靚，仲要有日落睇，當遊機河都抵啦。坐咗陣仲要有嘢飲，揀咗蘋果汁，內陸機體驗真係一流，下次去日本有長車要坐，我應該都會search下有無內陸機。

抵達函館Check in：WBF函館海神溫泉酒店
日本時間18:20左右攞晒行李，就去等巴士。函館機場離市區好近，book咗嘅酒店喺JR函館站隔離，要行3至4分鐘，車程唔使半個鐘就到，車費¥500。（天氣好好，日落好靚）


今次喺函館會瞓三晚，揀咗住「WBF函館海神溫泉酒店」，Agoda book、去到先畀錢，兌返港紙大概$2,242，$700一晚其實都唔平，不過因為稚內間dormy inn要成千銀一晚，所以個陣覺得無乜嘢。雙人房唔包早餐，必要個啲牙刷等都有齊。入去一眼睇哂，有床、枱、雪櫃，酒店有大浴場，所以得個企缸；無記錯呢間酒店每日都會畀支水。

Day 1晚餐——拉麵——龍鳳 大門横丁店（Tabelog 3.56分）
（https://tabelog.com/hokkaido/A0105/A010501/1002569/）

放低行李就衝咗出去食飯。自從學識用tabelog之後，基本上去親日本都會搵定有咩餐廳，然後行程基本上係餐廳優先，今次都事先搵定有咩餐廳食。

出發前見到天氣凍凍哋，所以一早揀定食拉麵，今晚食函館評分第三高嘅拉麵店。最高分嘅滋養軒收7點，所以無緣；第二高分嘅あじさい 本店要去到五稜郭，太遠，所以最後揀咗龍鳳 大門横丁店，因為最近酒店。


舖頭得6個位，我去到有2個人喺度，我入完去好快就有另外兩個人到，咁就full咗啦。函館最出名嘅就係鹽味拉麵，所以就叫咗左上角個個黃金鹽拉麵，只叫咗一樣食物。一上就飲啖湯先，即場暖哂。雖然叫鹽味拉麵，但湯底一啲都唔會係死有兩塊叉燒，綠色個啲唔係葱，似係一棵菜個個芯切出嚟個啲，唔知叫咩。第一餐嚟講好滿意，盛惠¥750，抵到爛。

7仔㩒錢、Day 1完
食飽就去攞錢先，7仔atm其實周街都有，不過原來呢個trip第二個地方稚內係無，好彩搵定先，如果唔係一陣無錢使都唔知點。因為戶口已經唱定錢，所以開海外提款就拎得，非常方便。搞掂去Lawson買炸雞加布甸就返酒店。（圖中第三排綠色個個係蘆薈yogurt，好好食，成個trip買咗幾次）


返酒店食完炸雞，就去咗大浴場。其實嚟過咁多次日本，第一次去大浴場。有5至6個沖涼位，室內有兩個大池、兩個桑拿；室外有一個大池、兩個類似浴缸嘅叫「壺湯」。浸完出面仲有無限供應嘅雪條，之後就返去瞓覺！大浴場官方相：



Day 1完。

留名支持
好多年前冬天去過北海道，想夏天都去一次

我會想冬天去下 但覺得去之前要學識揸車
盡力出埋day 2先瞓

Day 2 行程概要
- 函館朝市食早餐
- 市內景點：五稜郭、湯倉神社、明治館、金森紅磚瓦倉庫、八幡坂、元町區
- 函館山（天氣太差、無嘢睇）
- 小丑漢堡

天氣好差、臨時轉行程
呢個季節嘅北海道日出勁早，係朝早4點鐘左右，間房個窗簾擋唔晒，每朝都會醒一醒先，有光瞓唔到嘅人可能要留意下。

Day 2一早8點幾起身（之後每一日都咁上下，最遲都唔會過10點，旅行自己基本上係早起），打開窗簾，天氣好差，晏晝仲要落雨、大霧。原本plan好今日係去恵山杜鵑公園，所以臨時同Day 3行程調轉，玩咗市內先。

Day 2早餐——海鮮丼——うに むらかみ 函館本店（Tabelog 3.69分）
（https://tabelog.com/hokkaido/A0105/A010501/1000136/）

去之前做功課，個個都話函館朝市必去食呢間，所以揀咗食佢；開8點半，我35分左右去到都近乎滿座。出名食海膽，但自己唔係極鍾意海膽，所以揀咗二色丼，見佢menu話「新鮮生金槍魚今日進貨」，所以揀咗金槍魚加海膽。上枱同官方相好唔同下，都唔滿嘅但後尾望返原來同坊間食評相差唔多，盛惠¥5,940。成$350蚊港紙，但兩樣食材都唔覺有幾特別海膽就唔腥嘅，應該叫合格，快手食完就走咗。（札幌食咗間Omakase嘅海膽我覺得好食好多，之後會講到）

五稜郭公園
第一個景點：五稜郭公園。食完早餐我去咗JR函館站買「市電1日券」，事前大概計過會回本，車站有個細counter有人坐喺度賣。其實宜家有得用電話版，online買完就咁用，但有儲開旅行啲車飛個啲嘅習慣，所以就行咗去買實體飛，¥600當日任搭市電。

市電落車會係「五稜郭公園前」呢個站落，落車要再行10分鐘左右，落車跟住大隊行都得，呢個站落車基本上都係去五稜郭。上座塔要¥1,000入場費，上到去就影到個五星打卡位，點都要上去影吓嘅。



啱先落車見到好多𡃁仔一人拎住一部相機仔，上到嚟發現原來喺度買，買咗部，幫自己個旅行好好記錄下（#1啲相就係咁嚟），好似¥1,700左右。最後落返樓下買啲磁石貼個啲廢嘢，就出發去食甜品。

Brunch——甜品——シュウェットカカオ （Chouette Cacao）（Tabelog 3.55分）
（https://tabelog.com/hokkaido/A0105/A010501/1001215/）

事前搵嘅餐廳，係包括甜品小食呢啲嘅，呢間喺五稜郭公園隔離行5分鐘就到，所以就安排咗去到。Tabelog寫係「朱古力」類型嘅食物，但我完全無留意係食朱古力，著眼係「蛋糕甜品」 自己麻麻地朱古力，所以最後無食朱古力食物。


間舖得外賣，所以只可以買走食。個陣出面落住雨，拎住遮都幾煩，所以只係買咗呢個泡芙，同少少pack好嘅零食就算。最後由於太大雨，我喺門口企埋一角食咗佢就算，係幾好食嘅，中間啲cream真係有粒粒雲呢拿籽，個皮又脆，香港個啲真係拍馬都追唔上。但除非買完返酒店放低、或有自己車可以方便自己食，否則唔好特登嚟

留名

湯倉神社、開始遊覽函館市內景點
食飽又去下個景點：湯倉神社。原本無plan去呢度，係因為買咗一日市電券，時間尚早所以去得唔好嘥 搭到去尾站「湯の川」行2分鐘就到。神社幾靚，兔仔佈置為主，幫成家一人買咗一個御守。喺呢度無啦啦落大雨，所以避咗陣雨先走，成個函館trip天氣都唔好，走個日先有太陽。


停咗雨就搭返市電去函館站，開始呢個市內景點一日遊。函館市內主要堆景點其實都算集中，明治館、金森紅磚瓦倉庫、元町區、八幡坂，都係步行距離可以到達。由「湯の川」站出發，搭到去「魚市場通」，落車行去明治館，之後去埋金森紅磚瓦倉庫，又夠鐘搵嘢食。

午餐——甜品——プティ・メルヴィーユ 函館駅前店 （PETITE MERVEILLE）（Tabelog 3.42分）
（https://tabelog.com/hokkaido/A0105/A010501/1063562/）

其實原先無預食嘢，但諗起下一餐要等多幾個鐘，同埋又大雨，就搵咗呢間坐低Cafe食啲嘢。呢間PETITE MERVEILLE最出名係芝士蛋糕，本身search過唔少人買嚟做手信，但由於仲喺旅程開頭，無理由咁快買手信，仲要係食得嘅嘢，所以就無買 門口有人企喺度幫手搞試食，我就直接入去食，叫咗杯咖啡、一粒原味芝士蛋糕、一件栗子撻。

咖啡好正路，個芝士蛋糕無乜特別，食過LeTAO已經迷上，不過細細件過下口癮係OK嘅。仲有其他味，個counter有五隻色，有機會大家可以去試嘅，反正有免費試食 個栗子就好好食，佢入面有啲脆脆好正，仲要有少少爆炸糖嘅口感，自己作為粟子控表示好滿意。

金森紅磚瓦倉庫、函館最滿意甜品
金森紅磚瓦倉庫有好多玻璃製品，真心好靚，所以自己都買咗唔少，仲買咗個音樂盒，最鍾意就係買啲唔等使嘅嘢 行完之後就去八幡坂，函館必去打卡位，但個天氣真係好差，向海個邊無嘢影，但向山就幾有feel。今日除咗落雨仲好大霧，望過去其實有個迷幻feel，好天就留返下次再嚟啦。沿住個海傍一路行，又去食嘢啦。



下午茶——甜品——アンジェリック ヴォヤージュ （Angelique Voyage）（Tabelog 3.63分）
（https://tabelog.com/hokkaido/A0105/A010501/1026155/）

成個函館甜品類型最高分就係佢，Tabelog最多人Po就係一盒朱古力，當日去到有得買，不過唔好朱古力，一大盒真係搞唔掂。門口有班日本妹一人拎住一份Pancake喺門口打卡，所以一於就買Pancake啦，¥800即叫即整。


呢樣絕對係我其中一樣函館（或者北海道）食過最好食嘅嘢，Pancake入面有忌廉、焦糖脆脆同士多啤梨。焦糖脆脆好好食，即整Pancake熱辣辣好正，最重要係食到最後一啖都仲有士多啤梨，超足料。星期一、二唔開門，想食嘅記得要留意，好推介呢間。

函館山睇霧、晚餐食唔到
食飽就向山上進發，即係元町區，啲景點真係好集中，順住行係可以去埋搭纜車上函館山。去到纜車售票處，同個姐姐話想要張飛，佢即刻指住個mon話「宜家上面個view係咁」


我無理照上去，最後勁似入咗結界，乜柒都睇唔到，早知聽佢講，咁嘅情況只好返返落去啦。


落返山個陣大概4點幾，其實仲好早，但因為落雨唔知去得邊，所以就出發去食晚餐。本身bookmark咗間壽喜燒——阿佐利 本店 （あさり ほんてん）（Tabelog 3.69分）（https://tabelog.com/hokkaido/A0105/A010501/1003362/）。纜車站行過去10分鐘內，無得網上預訂（電話可能得，但唔識日文所以無試）。原先擔心佢唔畀一個人食，因為又開爐又剩都幾煩，不過一場嚟到照行過去問。店員聽到一個人之後就去咗睇有無位，即日已full晒；問有無得book聽日，佢問完都係話無，所以食唔到。

晚餐——快餐店——ラッキーピエロ ベイエリア本店 （LUCKY PIERROT）（Tabelog 3.48分）
（https://tabelog.com/hokkaido/A0105/A010501/1000019/）

無得食壽喜燒就只好去小丑漢堡，原本係聽日晚餐，聽日食乜就再算。小丑漢堡係函館先有嘅快餐店，有唔少分店，本身上網見到有間「碼頭末廣店」係海邊分店，窗口座位望出去就係個海，所以就plan咗去呢間。點知原來我個Map一直mark錯咗做另一間，點解我入門口見到無海景個陣會發現唔到去錯。（寫呢篇嘢時睇返Tabelog，原來我去呢間係「海灣地區本店」，高分過碼頭末廣店，應該係因為咁而去錯咗）


小丑漢堡除咗有漢堡，仲有咖哩飯，不過無理由唔食漢堡，叫咗個人氣No. 1嘅「中華雞腿漢堡」，揀要Set就包埋一份薯條同一杯飲品，盛惠¥968。買完嘢食搵位坐，有啲係鞦韆位，又幾有特色，不過廢時搖下搖下就無坐個啲。


張紙有個number，我估應該係要自己出去拎，不過唔識日文可能叫咗我都留意唔到，所以有人送個餐畀我 薯條係芝士肉醬，粗薯又幾好食。飲品以為快餐店一定default畀可樂汽水，呢杯係烏龍茶個類嚟，食熱氣嘢配茶又幾好，好似健康啲。嚟到重點「中華雞腿漢堡」，啲雞大大舊，有4粒定5粒，個size一啖真係咬唔哂，所以食食下我拮住啲雞嚟食算。食後感係有少少似韓式炸雞feel，叫做嚟到函館無理由唔食咁囉。

返酒店休息、必食Glico薄荷朱古力雪糕
食完餐飯只係下晝5點左右，不過朝早早起，加上天氣差都唔知去邊好。如果市中心有大型商場我可能會去行，不過Google Map最近都要去到JR五稜郭站個邊，所以就返咗酒店。去大浴場勁早沖咗個涼，同洗咗一次衫，搞掂晒只係7點幾。

由於未正式食晚餐嘅關係，就換返衫落Lawson買嘢食。N Call炸雞，同前一晚一樣好好食，好過個中華炸雞好多倍 買咗個辛口明太子飯糰，無乜特別（香港華御結個明太子沙律好啱我口味）。

最後重點係呢個Glico薄荷朱古力雪糕，本身勁鍾意食薄荷朱古力雪糕，上年去東京係第一次食，今次見到即買。加咗大量朱古力脆片，所以口感勁正，啖啖都有朱古力；薄荷味都唔會係牙膏味，鍾意薄荷朱古力雪糕嘅人一定唔可以錯過 食完再執整埋Day 3行程就瞓覺了，Day 2完！

Day 3 行程概要
- 麥當勞食Pancake包
- 恵山杜鵑公園
- 北海道名物——根室花丸迴轉壽司
- 立待岬睇日落、函館山睇夜景

日本麥當勞必食：鬆餅漢堡
今日瞓晏咗啲，不過都10點前出門口，早餐去咗食日本麥當勞限定嘅鬆餅漢堡。溫馨提示，日本M記早餐供應去到10點半就完，大家想食要留意（因為之後有日想食，以為同香港一樣去到11點，結果食唔到）。

Day 3早餐——快餐店——麥當勞（唔加Tabelog了）

叫咗豬柳蛋鬆餅漢堡，要咗Set，唔同香港得薯餅，呢度係可以4揀一：薯餅、蘋果批、麥樂雞同沙律（原先唔知所以當個收銀同我講嘢時，我好直接講咗「大丈夫」，最後先知要揀）。

M記Pancake包真係嚟日本必早餐之一，我成個trip食咗3次定4次。首先塊餅唔係熱香餅早餐個塊嘢，呢塊厚身得嚟再有糖漿嘅少少甜味，勁好食。雖然同香港一樣用紙包住的包，但塊芝士唔會融到痴實張包裝，好撚好食，盛惠¥540！