返新工前去咗兩星期北海道～非自駕遊記

滑翔機通知話「天氣好差，請快啲嚟！」
呢個時候10:30，收到email，原來係滑翔機個邊搵我：
「Dear XXX,
You have a reservation today.
Unfortunately the weather forecast says that it will rain.
Can you come a little earlier?」

我秒覆：
「Dear sir,
I am now at 瀧川油菜花祭, and I should take bus from 江部乙 station back to Takikawa station at 12:39. The earliest I can arrive at skypark should be around 13:10, will this be alright?

Please let me know if the weather at that time is not okay for glider, thanks a lot.」

對方又秒覆：
「The forecast seems okay but it's just a forecast.
It is certain that you should do it as soon as passible.」

機師英文真係好好最後由於太想玩滑翔機，係我成個trip最想玩嘅嘢，所以我覆佢我會即刻嚟 下一班車係11:09，即刻衝上2樓影相，然後搭shuttle返道の駅，之後搭11:09班車返JR站。


返去時經過咗也英屋企，唔係趕時間我應該會落車影相

順利抵達Skypark、有得玩
返到JR站大概11:30，行過去公園要20分鐘，因為太攰所以搭的士算，¥710。順利去到，即刻入去登記，順利有得玩！（舊灰雲大到傻，當日晏晝真係落雨，好彩有早啲嚟）


幫手登記個個人畀咗張紙我填，要填emergency contact個啲，去之前會諗玩呢啲係咪要簽生死狀，不過個張又唔係生死狀。無同香港任何一個人講過個trip會玩呢啲，所以填咗家姐個電話，touchwood有咩事佢都應該冷靜面對嘅，其他嘢就交畀個天啦 即場畀埋錢¥8,500，港幣$500我覺得係好抵，尤其係全新體驗。個天咁啱有人玩緊：


登記個個哥哥之後返嚟畀咗張boarding pass我，就帶我行去搭飛機了。

行過去glider個位，大概都要行5分鐘，中途停低影下相。去到有間control room嘅物體，放低書包就準備上機，今次肯定係我人生最大膽嘅一次體驗

Glider是甚麼？
我填個陣有一對夫妻等緊，中間就走咗出去了，佢哋玩先，望住個太太上機加安全降落。


（不專業解釋）講解下滑翔機係咩嚟，佢係一種無動力嘅飛行工具，你可以理解做無引擎，然後「起飛後僅依靠空氣作用於其升力面上的反作用力進行自由飛行」（from wiki）。滑翔機前面會有一架小型飛機，起飛時會有條繩駁住兩架機，靠佢用動力帶上天先，穩定作之後條繩就會被整斷，然後就glider機師控制自由發揮。


架機分前、後兩個位，一定會有機師坐前面，幫你control所有嘢，呢個機師英文勁流利。後面個位其實都有手掣、腳掣可以control嘢，前後係同步嘅，所以機師一玩個手掣，我都會見到個效果。



飛之前，全世界都會溫馨提示你千祈乜都唔好掂 出發前搵資料，見到台灣有人玩過，話個機師去到一半係會喺半空demo教你點control，然後交畀你控制，個刻都諗會唔會畀我試。

在空中的這10分鐘
飛行過程大概10分鐘，會大概喺滝川市上空飛，最遠會去到油菜花祭最大個塊田。全程機師會keep住話你知，唔同方向嘅嘢分別係咩嚟。


起飛個一刻一定會有少少緊張，但我想講搭完之後，可以話你知glider係穩定過平時搭飛機十萬倍！當然機師keep住同你講嘢，一定會放鬆好多，仲要係傾閒計個隻。搭飛機有時會chok到飛起，但今次穩嘅程度係完全feel唔到離心力個啲，所以都由少少緊張變到放鬆晒。最深刻係佢將架機扭到360度自轉咗一個圈，個下係最有離心力，少少驚但又好撚爽。


去到中段，機師就問我有無揸過飛機，仲開始demo教我點控制個手掣個下我好明顯淆底，都真係驚佢叫我控制，但其實就真係碌棍向左就架機會偏向左，向右就向右，所以都有打醒十二分精神等佢下令叫我控制 但唔知係咪佢feel到我對答有啲緊張，所以最後係無畀我試，我覺得如果個秒我主動有問「can i try」，佢應該真係會畀我試


10分鐘之後就降落，降落體驗就同搭飛機差唔多，不過滑行距離就短好多。臨尾機師主動話幫我影張相，所以就坐喺glider入面影咗張，亦成為成個北海道trip入面，有我人樣嘅相

極力推薦超難忘滑翔機體驗
成個滑翔機體驗，到呢度就完結啦，慢慢行返出去登記個間屋仔。


登記櫃檯隔離其實有個展覽仔，會擺晒唔同機出嚟，可以參觀下。而其實呢度同時係一間餐廳，你想可以食埋嘢先走，個陣有人食緊咖哩又幾香。門口仲貼咗唔同banner，原來附近有得玩獨木舟，其實北海道好多地方都有呢啲得意嘢玩，大家有興趣可以search下


嚟到呢度，短短幾粒鐘都無嘅滝川行程，亦告一段落。如果可以有時間油菜花祭個會場食埋嘢就好，應該幾有氣氛，不過唔想再搭返巴士入去，所以都直接攞行李落埋札幌就算

呢個glider體驗係成個trip最鍾意嘅部分，去之前難免會擔心安全，但其實呢度係亞洲第一嘅「世界頂尖大型專業無動力滑翔機基地」（source：台灣blogger），自己搭完都無穿無爛，有興趣試嘅可以上官網睇詳情，入面有form填去報名。（https://www.takikawaskypark.jp/tic_tw）

瀧川篇，完！

北海道之旅最後一站：札幌
下一站：札幌，由滝川搭JR去大概一個鐘車程。今次酒店會住4晚，原先其實係book咗「札幌東急Stay酒店」，最大優點係房內有洗衣機，任你點洗衫都得 後尾搵到間平啲又好似正啲嘅，狸小路「唐草飯店札幌」，港幣$1,530.35，比起東急Stay要HK$2,000仲平啲添，所以free cancel咗轉呢間。


酒店最近嘅地鐵站係薄野站，由JR札幌站去係需要轉乘地鐵。去到薄野站都搵唔到扶手電梯上去，所以都係手抽個喼上樓梯。上到地面就毛毛雨，開頭我仲要行錯路，行咗酒店相反方向，搞到要行返轉頭，所以去到酒店真係又濕又攰，驚凍親就即刻換咗件衫。

唐草飯店札幌Room Tour
酒店極international，住個幾日係超多外國人，仲要遇過有班好似中學生嘅外國細路，好爽咁細個一齊嚟旅行 Book咗雙床房，係今次個trip 4間酒店最大個間，有個環保袋畀你拎衫落去大浴場，寫明可以拎走，我都帶咗返香港。各樣牙刷個啲物品就大堂任你拎。





下午4點，Settle完就落街食lunch，因為今朝8點食完之後其實就無食過嘢，去咗附近一間拉麵店。

Day 9午餐——拉麵——けやき すすきの本店 （欅）（Tabelog 3.68分）
（https://tabelog.com/hokkaido/A0101/A010103/1000150/）

呢間都係事前搵過嘅拉麵店，直接揀咗佢部機寫嘅No. 1拉麵——粟米牛油拉麵，另外加咗隻蛋，¥1,250。粟米牛油拉麵係其中一樣research成日見到嘅款，個麵底會有好多炒雜菜，而個口味就唔太啱我啦佢係有啲肉碎喺入面，我都係鍾意平時食開個啲大大舊肉嘅拉麵，豬骨或醬油底更啱我口味。

落大雨所以去咗札幌工廠
呢一日天氣唔好，keep住會落毛毛雨，所以室外地方都去唔到。其實當時身處狸小路，最理所當然就係行狸小路，有瓦遮頭，但酒店咁近可以隨時行，就選擇搭車去札幌工廠。札幌工廠令我諗起函館個金森紅磚瓦倉庫，外形差唔多之餘，都係一個商場仔。



札幌工廠入面咩舖頭都有，亦分咗幾個館，館與館之間係有條路駁埋一齊。個陣有個新海誠展，不過原來開到5點就收，5點幾先到嘅我就無得睇了。入面有間包好多人排隊買，我唔想食嘢就走了。樓上有間namco，上去又玩咗陣打發吓時間。



今晚因為book咗20:00先食飯，所以就要周圍行到個個鐘數，但個人已經好攰 本身以為20:00食飯會係好正常，又唔使驚自己要趕頭趕命，但經過一星期後，發現我係好早dinner，下次獨遊我會記得book早啲。

Day 9晚餐——意大利菜——セミーナ （Semina）（Tabelog 3.85分）
（https://tabelog.com/hokkaido/A0101/A010102/1055732/）

今晚食嘅餐廳叫「Semina」，離札幌工廠大約半個鐘路程，呢個時候望到間餐廳Google Map話收8點，但我book咗8點，都驚會唔會係有咩錯咗。個陣只係6點鬆啲，所以選擇慢慢行過去。7點左右行到餐廳，同佢講我book咗8點，但太大雨同埋早咗到，所以睇下有無得入去等，佢勁好人畀我入去等 我下次會識預時間㗎啦


呢間餐廳係Tabelog搵到，個分類其實仲有好多高分啲嘅餐廳，但一來唔想成日食海鮮、日本嘢、二來好多高分都唔受毒撚食，所以睇完menu就book咗呢間，Tabelog上可以預訂到。Tabelog上有得揀要¥6,000定¥8,500嘅course，個分別係後者寫用「北海道新鮮食材」，一場嚟到個價錢又唔係差得多，所以就book咗¥8,500。

個侍應唔識英文，所以我哋用文字溝通，佢會手寫啲字喺紙上，我就用Google translate影低翻譯。


因為我都早咗成個鐘到，所以佢都話我知食物要等耐啲，但可以先叫嘢飲，都問埋我有無食物敏感。今晚食西餐覺得應該要揀酒，所以就menu求其揀咗支，我都唔記得咩嚟了。

超高質乳酪配火腿配士多啤梨、炸銀鱈魚
好快19:30就上菜了，多謝佢哋佢上完菜之後會喺張紙寫低咩嚟，所以都大概知道係食緊咩，抵讚。第一道係一份乳酪配火腿配士多啤梨（全部照字面譯），好好食！個ham嘅鹹配凍yogurt嘅少少酸甜，好夾，仲要個粒士多啤梨勁甜。第一道菜已經好驚喜。


第二道前菜係芝士配乳酪，由於頭個個太精彩，所以就覺得呢份普通咗，不過都係好食嘅。


之後就熟食了，第一份係蘆筍配火腿。上面有講過呢個季節蘆筍當造，可能因為咁所以會有蘆筍嘅出現。落咗啲黑椒調味，略嫌有少少重手，因為本身條蘆筍自己已經夠高質，加火腿又有鹹味，所以其實唔點調味都應該會好好食。


另一道係炸銀鱈魚，好撚好食 外脆內軟，最開心係無骨，啱哂我呢啲麻煩友，底下啲炸蘆筍同樣高質

（正）無芫荽味嘅芫荽料理
下一碟到意粉，係積丹海膽配芹菜去整。勁憎芹菜類食物嘅我，竟然覺得呢兜嘢無個陣味，放入口可能有海膽嘅關係，會無咗芹菜味，即使你見到成兜都係綠色嘢。


去到呢一刻，個侍應就開始無寫菜式名了，以下就係靠推斷去估我食緊咩 呢個入面係意式粉糰，一絲絲個啲係蟹肉、綠色唔係臭香菜，似蔥，無乜特別。


之後上咗舊包，同埋有舊肉，啲肉一切就會分得開，口感夠稔，我估係牛肉掛，但呢種太多汁嘅煮法個人一般般。




最後有甜品，今餐係Tiramisu，好好食；同埋餐飲，揀咗要茶，好好飲。



成餐飯最難忘係開頭個個士多啤梨火腿乳酪，同最後嘅甜品同茶，最後要畀埋酒錢，成餐飯¥9,600（HK$576），個人覺得好值得一試。

酒店抵讚位：大浴場擠迫度網站
食飽返酒店，間餐廳離酒店行10分鐘左右。行行下無啦啦流鼻血，落住雨嘅情況下要係街頭止血，成個人勁狼狽 不過照去便利店買少少嘢返酒店，要咗個檸檬奶布甸，好難食


成間酒店有樣唔好，就係得兩部洗衣機，仲要有部第二日去見到壞咗。成堆人要企喺到mon住排隊，第一晚仲要我排到就完時，拎衫個個人帶咗佢一個friend嚟，好明顯係諗住一個洗完就畀一個人洗，好彩最好佢好醒目咁話我先，如果唔係真係第二朝都洗唔完 但間酒店仲有樣嘢抵讚，有個網會show大浴場多唔多人，畀你參考完先落去。


沖完涼等洗完衫時，排下未來3日嘅行程，決定聽日去Outlet先，同埋cut咗小樽一日遊，因為嚟北海道去小樽難度應該極低，所以下次先去。洗埋啲衫都凌晨2點，瞓覺，Day 9完！

我最難忘係瀧川 唔係札幌
札幌正常大都市 可能都關我去嘅景點事嘅

寫完大家反應ok而我又有時間 我有少少想寫返上年去東京個trip上次真係食嘢為主
寫得幾開心 有意見大家可以隨便講低

有elevator架
睇清楚先好行

Day 10 行程概要
- 三井OUTLET PARK 札幌北廣島
- 札幌JR站Stellar Place

今日行程好簡單，就係去行街買衫褲鞋襪，所以瞓晏咗少少，趕到食早餐就夠。今朝返去麥當勞食Pancake包，酒店行5分鐘就有一間分店，兩層高，下層買完食物就上樓上食，日本最愛早餐之一。望住啲車係到行又幾chill，個景幾好，但今日天氣依舊一般，食飽就起行。

三井OUTLET PARK 札幌北廣島
札幌有兩個Outlet，一個係今日要去嘅「三井OUTLET PARK 札幌北廣島」，另一個係喺新千歲機場隔離嘅「千歲暢貨中心Rera」。去之前上官網睇定有咩brand，就決去去北廣島個個。Rera之前睇YouTuber，好多人話疫情下執咗好多舖，上官網睇個平面圖都真係好多都空舖，所以就算行程安排上應該會易啲（唔少人去機場走個日，就係去Outlet），都果斷捨棄。

去北廣島Outlet好簡單，官網都有好詳盡嘅交通攻略，Google Map都有，今日就揀咗搭巴士。用Google Map帶路，點知行到去個車站竟然搵唔到架車，勁緊張咁周圍望，因為一miss就要等多一個鐘。後尾上官網搵返個平面地圖，發揮睇地圖能力，去返啱個車站，個Google Map錯到隔咗條街GPS個點先係車站正確位置：


今日天氣一般，所以呢個室內Outlet可以話係最佳行程。巴士單程¥320，搭半個鐘多啲就到。KKday有個Coupon，喺呢個outlet買嘢後可以有折，但細brand為主，同埋會送塊休足時間，有需要搭車時先買都得，會即刻有redemption code，去到outlet show畀職員睇就得。

落雨好去處：室內Outlet
三井OUTLET PARK 札幌北廣島係一個室內Outlet，分咗兩邊，一邊雙層、一邊單層，畀一條行人隧道接駁住。個Outlet我覺得唔算大，或者可能身邊無其他人同行，我唔啱就可以直接skip，所以行得一啲都唔攰。Outlet入面有好多入錢locker，買得多嘢去放低就可以。

今次行咗好多大路嘢，全部都係買自己衫，主要就夏天衫，可能撞啱轉季，有啲長袖衫都抵所以都買咗幾件。最穩陣而又多人識嘅三個brand：BEAMS、GLOBAL WORK同URBAN RESEARCH，分別都買咗唔少嘢。呢三個brand對我而言係差唔多風格，所以先去個間會買得多啲，大家得閒行晒三間再決定邊間買咩都得嘅。




有兩間自己以前無買過嘢嘅，今次都睇啱而買咗啲衫：JUN同BANANA REPUBLIC。前者覺得有mix咗少少韓風，後者就似zara個啲。


運動鞋舖無去，因為上年去東京買咗兩對波鞋，仲有對未開封。搞掂之後就去咗食嘢，開Tabelog見到最高分個間係豚丼，北海道名物之一、今個trip又無食過，就食你啦。

Day 10午餐——豚丼——豚丼のぶたはげ 三井アウトレットパーク札幌北広島店（Tabelog 3.48分）
（https://tabelog.com/hokkaido/A0107/A010703/1028092/）

Outlet入面有唔少嘢食，而呢間豚丼係喺入面嘅food court。叫咗一個普通嘅豚丼，有三塊肉，加咗杯可樂。畀完錢拎個震震機，一震出去拎就得。


豚丼啲肉似豬柳但又唔會過瘦，有少少脂肪位，憎食全瘦肉嘅我表示滿意。個醬就似好正常嘅燒汁，送飯一流個款。個漬物好似係酸蘿蔔，幾爽口，¥1,080收貨啦。

Day 10下午茶——雪糕——MIL PRESSO （ミル プレッソ）（Tabelog 3.47分）
（https://tabelog.com/hokkaido/A0107/A010703/1059141/）

食飽之後行埋別館就完，11:40左右到Outlet，最後係搭4點鐘巴士走，走前見仲有大半個鐘，食咗支雪糕。呢間雪糕喺Outlet入口隔離，牛奶味為主，亦可揀加咗雪糕嘅扭紋款式，連珍珠奶茶都有添。士多啤梨應該最受歡迎，下午3點幾已經無晒，我就叫咗個哈密瓜溝牛奶，¥450。


收銀隔離有個位畀你打卡，擺明叫你買哈密瓜溝牛奶，啲日本妹原本對住個櫃枱影完就走佬，之後見我影佢又影。


食飽等多陣車就走了，返去酒店放低嘢先，因為都手持太多個紙袋。返到酒店之後成身汗所以沖咗個涼成個Outlet只計買衫，使咗¥48,337，港幣$2,900，今年應該又可以唔使買衫了。

Day 10晚餐——炸豬扒——とんかつ檍 札幌すすきの店（Tabelog 3.62分）
（https://tabelog.com/hokkaido/A0101/A010103/1060980/）

酒店抖完又出去食嘢，食個early dinner。每一次去日本都一定會食炸豬扒，對上兩次去日本，都分別食咗大阪No. 1嘅とんかつ マンジェ（Tabelog 4.18分）（https://tabelog.com/osaka/A2707/A270705/27013624/）、同埋東京No. 1嘅とんかつ成蔵 （ナリクラ）（Tabelog 4.21分）（https://tabelog.com/tokyo/A1319/A131905/13236380/），兩間分別係全國第一同第二。食過呢兩間之後，呢間檍一食就真係知道低勁多班 就算有3.62分都係差好多皮（我最鍾意係大阪個間，個次食咗個鵝肝做餡嘅炸豬扒真係一世難忘）



檍有得揀要正常炸豬扒加白飯，或者咖哩飯，今日食嘅係「上級肩部腰部和套餐」。有白飯同味噌湯，炸豬扒就配椰菜。炸豬扒勁難咬，完全唔掂，真係無比較無傷害，今餐¥2,200但性價比覺得好差，以後要食炸豬扒我都係留返去東京、大阪先食啦

札幌JR站商場
食飽就出發去Stellar Place，上年嚟日本已經想買銀包，不過買唔到，今次終於買到。個銀包喺5、6年前去英國個陣買，已經用到爛晒，趁旅行有得退稅所以買咗了。


買完喺Stellar Place行咗陣Uniqlo，撞正有感謝祭，不過睇唔啱。適逢把遮爛咗，所以去買返把，買埋啲底褲同襪就畀錢，事後諗返都唔明點解我要去買呢啲嘢


7點幾行完就走咗，又返酒店，開始準備執下嘢，同睇下有無嘢未買。呢個時候見到個天終於無乜雲，聽日一定會好天㗎，係咪啊哈姆太朗



Day 10完！