返新工前去咗兩星期北海道～非自駕遊記

稚內景點第一站：北門神社
食飽之後就行去附近嘅景點啦，我自己將稚內景點分咗做3 part。第一part係JR稚內站附近嘅：稚內公園、冰雪之門、北門神社、稚內防波堤呢啲；第二堆係野寒布岬，個度有稚內第一名嘅餐廳樺太食堂，同埋有個寒流水族館；第三個就係宗谷岬。上面呢堆都去晒，加多個無乜人講嘅夕日之丘同稚內溫泉 童夢。我留咗喺稚內有兩個full day，時間非常夠使，但原本plan咗想去嘅利尻島就無去啦，因為要太早起身，最後放棄。

第一站先去北門神社，喺行去嘅時候見到好多鹿，唔知頭唔知路嘅情況下會有啲驚佢衝上嚟 後尾search返先知稚內係周街都係鹿，路上都係牌提自駕人士要小心啲鹿會沖出嚟。


喺北門神社買咗個蟹御守（北海道唔同地方嘅神社，都有蝦夷神籤，呢個係其中一個，有興趣大家可以去儲，total有10幾款的）


天氣真係好好，所以其實我係出哂汗，因為著咗heattech，但唔著又驚凍，又唔想手度拎住件褸，結果全日都處於出汗階段。

稚內公園：冰雪之門
北門神社有條路行上去冰雪之門，同埋都係個句，好曬又好熱，行到成身汗 加上好多樓梯，行到上去都真係攰死，所以原本想再行多20分鐘上去「開基百年紀念塔」，最後都放棄，我驚行到上去會攰到返酒店抖一日。


冰雪之門都係打卡位，呢個位望返落去都叫見到晒成個稚內市景，再上應該再靚景啲。有啲souvenir shop，稚內好多嘢都用「最北」去命名，所以我最後買咗勁多「最北」嘅嘢返香港



搞掂晒行返落山時，有班幼稚園學生行緊上嚟，佢哋竟然係行頭先我行到死個條長命樓梯，真心勁。班小朋友同Miss會一路行一路同我講「Kon ni chi wa」，呢刻我先醒起「Kon ni chi wa」係Hello，我過去幾日一直將「Su mi ma sen」當Hello用，不過無所謂啦，都係個啲Greetings啫。

野寒布岬：稚內必食「樺太食堂」
下一站係去野寒布岬，成個稚內行程重點餐廳就係「樺太食堂」。望住個無GPS話畀我知我喺邊嘅2D地圖，都順利行咗去車站，等咗陣車就有巴士。巴士站同時間表大概係咁嘅樣：


未落車就會見到利尻富士山，天氣好所以輕鬆睇到。另一日中午有少少雲，就算去同一個地方都睇唔到了。


食完早餐無耐，不過照去「樺太食堂」食lunch啦，過去幾日日行20,000步隻腳已經開始攰，順路更重要，因為去咗野寒布岬先就要行返轉頭食lunch，所以食咗先。

Day 5午餐——海鮮丼——樺太食堂（Tabelog 3.56分）
（https://tabelog.com/hokkaido/A0109/A010901/1004013/）

成個稚內最高分就係呢間嘢，只會開到下午3點，唔好太晏嚟原本係一心想嚟食三文魚子加海膽加帶子丼，不過竟然轉咗menu。最後叫咗第一個三色丼，三文魚子變咗蟹肉，仲有雙色帶子。店員會畀將紙畀你寫下字，會貼上天花板，我寫咗句「稚內係個好地方」，唔知會唔會有人睇到呢。



個Set仲有少少漬物嘅嘢，有碗麵豉湯，個飯最大特色我覺得係醬油帶子，以前未食過。本身驚醬油帶子會太鹹，放入口又啱啱好，完全唔覺鹹原味就好鮮甜，仲要全部都大大粒 海膽好正常，但同啲蟹肉一樣無乜記憶了。埋單¥3,630，我覺得抵到爛，好過尋晚件扒多多聲。

寒流水族館、稚内市青少年科學館
食飽之後向前行，會有一個「寒流水族館」同「稚内市青少年科學館」，兩個都有去。先去寒流水族館，入場費¥500，一入去就見到一堆海豹（？）喺度曬太陽，另一邊就係企鵝，咁大個仔其實第一次親眼見到企鵝，真心好得意。（之後去旭川動物園有企鵝放題，更加正）


本身想去個廁所，但勁污糟，個門口勁多污蠅，即刻唔想入去同即走隔離個稚内市青少年科學館有啲似香港科學館，好多嘢玩。唔使入場費，兜咗個圈就走咗了。

野寒布岬打卡位、遠望利尻富士山
下一站再向前行，就係野寒布岬，地標打卡位係呢隻海豚。天氣好好所以仲望到呢個利尻富士山，個影相角度真係無得輸。



呢個時候只係中午12點幾，但照坐埋一邊望住個海hea咗陣，人少少勁chill。之後就去「稚內溫泉 童夢」啦，其實可以行返出去樺大食堂個邊搭巴士，不過覺得自己有嘅係時間，Google map又話行40分鐘，所以揀咗行。

驚足40分鐘嘅路程...
介紹下「稚內溫泉 童夢」，佢係稚內一個出名嘅溫泉景點，亦係日本最北嘅溫泉，我喺稚內呢三日都去咗兩日 一路行嘅時候成條路勁荒蕪，無人之餘仲要無車，見得最多就係鹿群，加上前兩日先喺連登見到有個新聞話有人畀熊襲擊，愈行真係愈驚，個陣心諗早知搭巴士算


中間見到有間酒店，不過應該荒廢咗


驚住行咗40分鐘，13:10終於到童夢溫泉，門口有得搭巴士，可以直接出返去稚內市中心，影低咗先。兩條路線都會去到稚內，不過兩條行相反方向，時間都唔差得遠，建議夾自己時間就算。

日本最北溫泉：溫泉童夢
溫泉童夢係有定休日，記得上官網睇定（https://onsen-domu.com/）。入場費¥600，任你留幾耐都得，間嘢開朝10晚10，之前research係有唔少旅客夜晚嚟浸，我去個兩日都只係見到一大班公公婆婆去（係繼朝早稚內公園見到勁多小朋友後，再次見到勁多人嘅地方）成間溫泉真係好大，分咗兩層，下層得啲鞋櫃，溫泉要上2樓。

呢度完全唔係普通溫泉設施，我覺得形容係溫泉樂園都唔過份分咗男女兩邊，各自有露天風呂。浴場剩係沖涼位我估都有30個位，另外仲有幾個大溫泉、水中按摩設施（唔識叫咩）、按摩浴缸、桑拿，仲有每日唔同嘅藥浴，大到癲


最鍾意係個露天風呂，呢日天氣好係可以望到利尻富士山，天氣唔凍加上勁好太陽，我就喺度望住利尻富士曬咗半粒鐘太陽，爽到傻，所以第二日無乜嘢做嘅情況下，我再嚟多咗次。


浸晒之後就出去買牛奶飲，係雪印牛乳，佢仲有朱古力味同乳酪揀，一支¥140。買完去個休息室攤抖吓，係舒服到可以瞓著個啲，望住出面個藍天，feel到真係放緊假隔離房仲有按摩椅畀你玩，¥100按10分鐘身or腳，真心物超所值中途望下巴士時間表，決定搭14:44個架出去南稚內個頭行下。



補圖：整理券嘅數字對照車頭個mon，就係你要畀嘅車錢

稚內（唯一？）商場：Saijo 西條 稚内店
南稚內個頭有個大型百貨公司，叫「Saijo 西條 稚内店」，有超市同一堆餐廳，我就去去Mister Donut食咗啲嘢。綠茶加Cream嘅冬甩，又幾好食喎，不過坐咗半個鐘左右店員就話we are closing，原來堂食只係去到4pm，外賣就去到7pm，本身仲諗住喺度hea多咗先走。


行上二樓有勁多扭蛋機，仲有得夾公仔，之後落一樓都有一堆扭蛋機，所以喺度玩咗陣，扭咗堆扭蛋，夾公仔夾咗¥1,400但乜柒都夾唔到，理性話畀自己知要停手。

夕日之丘睇日落
今日最後一站係去夕日之丘睇日落，巴士係可以去到嘅，但今次巴士站搵得有啲耐。絕大部分兩個方向嘅巴士站都係喺馬路對面，係呢個「大黑3」唔係，所以要望住張地圖搵 搭15分鐘去到「坂の下」站，一樣落車搵咗回程車先，尾班車係19:21，過咗就無啦，的士都無乜會入嚟，非自駕真係要睇好時間。

落車仲要行多10分鐘左右，係上斜路段嚟，Google Map畀咗一條正常行人路畀我，但我見有條樓梯直接上去近好多，所以就行樓梯。行行下有隻鹿喺面前跑過，真係又驚一驚，所以落返去車站個時我行返大馬路算 好多鹿真係



上到個觀景台，有個停車場畀自駕遊用，我就搵張長凳坐低慢慢睇日落，一樣望到利尻富士山，唔知天氣好嘅稚內係咪好難得嘅事，呢個trip整體天氣都算好好。


之後望多次個時間表，原本係plan坐19:21班車，但由於有啲擔心會miss咗㗎車，或者佢突然少咗班車，咁我真係要摸黑行返出去，淆底嘅情況下我揀咗搭18:34嘅車出去 夕日之丘睇日落呢個目的已達成，個日落好收貨，之後搭車出返去沿途個view都好正，原來唔識揸車去北海道都唔係好艱難啫 搭返去南稚內個頭，今晚plan好係食居酒屋嘅天婦羅。

Day 5晚餐——天婦羅——はるき茶屋（Tabelog 3.51分）
（https://tabelog.com/hokkaido/A0109/A010901/1005187/）

はるき茶屋入去係要除鞋，Menu有好多相，無相都可以Google translate，因為啲日文字好正體，成間嘢點餐唔成問題一心嚟食天婦羅，所以都無點睇menu，叫咗天婦羅定食，盛惠¥1,750。佢有冷蕎麥麵揀，但我夜晚會食Dormy Inn嘅拉麵，所以唔想食兩餐麵，就叫咗飯了。


上菜，有兩隻蝦、兩條蘆筍、茄子、青椒、冬菇各一，都好夠食。最好食我覺得係蘆筍，呢個時間蘆筍當造，平時食蘆筍勁驚批唔晒層皮，呢兩條都好perfect，爽口；其他食物都一樣水平之上，值得一試嘅餐廳

Dormy Inn醬油拉麵初體驗
食飽都已經8點鐘，出去唔夠十分鐘，個天已經黑晒，仲要無乜街燈。呢個時候搵唔到「大黑3」個車站，所以行咗去南稚內等車，搞咗陣先返到酒店。


沖完涼10點咁上下就落去食拉麵，醬油拉麵即叫即整，真係幾好食，你想食幾碗其實都得，不過我一碗就夠啦，之後返去瞓覺。



Day 5完！

留名
支持樓主繼續

稚內好似唔係好值得去

7仔atm撳錢係咪唔洗收手續費[sosad
citibank個rate如何

留名

Lm

你一早打定？

唉, 又會天氣甘差

唔好灰心, 加油, 最少我有睇家

樓主個行程值得參考
遲啲可能都去北海道

有機會試下La Vista Hakodate Bay
早餐正
溫泉正
窗景正

睇到都想食