返新工前去咗兩星期北海道～非自駕遊記

間舖有畀埋ecopy我 直接upload入google drive自己download

出咗Day 7了 每晚都會update一日行程

我本身都驚太靜 同乜都無 結果好愉快過咗幾日
其實都係靜幾日 熱鬧得多可以去稚內靜下思考人生

下星期去日本，有8日係北海道
可以抄考下你行程

黃金神威

Day 8 行程概要
- 上野農場
- 常盤旋轉塔、平和通買物公園、5.7小路Furarito、旭川平和通
- 上川神社
- 北彩都花園

Day 8原定係去層雲岬一日遊，不過因為行到太攰所以留喺市中心就算 原本預去層雲岬要好早起身，所以今次旭川酒店要咗早餐package。餐廳喺頂樓，望出去係旭川站，天氣算一般。


自助餐形式，入場會畀個牌仔你，一面係話「出咗去拎嘢食」、另一面就係「我食完走咗啦」，你出去拎嘢食時show「出咗去拎嘢食」就得。個buffet都幾豐富下，餐廳門口左邊係飲品bar，有外賣杯畀你拎走。餐廳正中就係自助區，有魚生飯區（4款魚生）、熟食、沙律、麵包、雪糕生果甜品，印象中係咁多。最吸引一定係勝手丼，北海道有唔少酒店嘅早餐都有，嚟之前睇blogger好多人會特登book有勝手丼嚟食。

今日有4款魚生：甜蝦、三文魚子、三文魚，仲有款好似係墨魚個啲，我唔食所以無拎。新鮮嘅，同埋refill速度都好快，所以唔會無得食熟食其實有十幾款，正常嘅腸仔雞蛋或日式食物都有。個八爪魚腸仔好難食，煎三文魚、炸雞同蛋就正正常常。車里茄非常甜，剩返個堆係芝士焗海鮮個類，熟食裡面最好食個樣，所以最後refill咗。


第二輪，加多兩舊炸雞同炸薯角，同埋沙律。沙律有整好嘅薯仔沙律，仲有兜好碎、好水嘅牛油果。最後去生果櫃拎啲菠蘿，同食咗兩球雪糕；每次提供兩款味，今日係雲呢拿同冧酒提子。早餐都好豐富下，收貨。

天氣好差嘅上野農場
食飽飽就出發去上野農場啦，今日繼續用尋日張大型交通Pass，車程大概45分鐘。上野農場特色係係有好多花，不過唔知係天氣問題定啲花問題，唔會好impressive。同埋花嘅種類係好多，不過每種都係得少少，加上天陰陰，感覺好無睇頭。


上野農場唔係話好大，所以只係留咗一個鐘左右。農場有得行5分鐘斜路上高位，望返落啲田到，而呢個山頂仔都有一堆打卡位。一邊係7張彩虹凳，另一邊係一座韆鞦，我去咗玩咗陣韆鞦，不過唔敢太大力，廢時一陣唔好彩仆街。



農場入面擺咗好多太陽凳畀你坐，不過好污糟，好多都有雀屎，你唔會想坐的 喺度留得一陣，建議睇定天氣，天陰真係無嘢睇。


行完就準備去食午餐，今餐食西餐，由上野農場過去要坐大概45分鐘，仲要轉一次巴士，不過有pass任搭同埋今次多的是時間，慢慢過去。離開農場後開始出太陽！

Day 8午餐——西餐——マルコ ビストロ&ジェラテリア （maruco Bistro＆Gelateria）（Tabelog 3.50分）
（https://tabelog.com/hokkaido/A0104/A010401/1061064/）

呢間tabelog分類叫「法式小酒館」，其實我係為咗個gelato而嚟 餐廳有兩層，店員安排我上二樓窗口位，有個窗簾望到出面不過拉唔起。午餐有意粉、飯同扒揀，加錢要set仲有飲品同甜品。最後叫咗個人氣No. 1，係一個茄汁蝦意粉個類，要咗杯Latte。落單話要甜品時店員拎咗張紙過嚟，話今日個甜品係Brownie配雪糕有無問題，我ok就落單了。



先上嘅係焙茶Latte，好甜好甜。食埋沙律同麵包，之後就上意粉啦。




意粉有兩隻大蝦，個汁算係好稀個啲，茄汁加Cream去整，唔係好掛到上意粉上，所以會剩返好多汁。兩隻蝦我覺得幾好食，幾彈牙，剝埋殻先上會更好。


最後甜品Brownie同雪糕都不過不失啦，佢一入餐廳門口其實有個雪糕櫃，有十幾款雪糕，有啲後悔無就咁叫雪糕食，或走時叫一份走呢餐¥2,200，西餐價錢好合理。

《First Love》取景地：常盤旋轉塔
食飽又返咗酒店洗衫，今個trip其實帶咗3件褸、3件衛衣、2件heattech、2條褲。原本唔出汗諗住轉一次酒店先洗一次都得，但個天氣日頭20幾度，夜晚10度左右，搞到唔係好識著衫。著heattech日頭係一定勁出汗，遇著20幾度有太陽，齋著衛衣都會成身汗，所以洗衫真係要隔日洗


洗完就行埋市內景點，先去之前睇《First Love》嘅取景地點——常盤旋轉塔。圍住常盤旋轉塔係一個迴旋處，有睇《First Love》嘅一定會記得天上影落去個幕。


常盤旋轉塔其實同旭川JR站，只係一條旭川平和通駁住，所以由旋轉塔行返出去，係會經過哂平和通買物公園、5.7小路Furarito等地標，終點就係旭川車站。平和通買物公園唔知係咪因為平日，所以乜都無，官網見到有啲日子係會搞市集。（呢條路都好歐洲feel）


5.7小路係一條美食街，應該夜晚先熱鬧。行下行下就會出返去車站，呢個時候只係下午3點幾，所以搵下附近有咩去，最後用Pass搭車去咗上川神社。

上川神社散步至北彩都花園
要上去上川神社，一係就揸車直達，行路就要行超長樓梯，仲要係石春路，對鞋薄啲都搞唔掂 上到去有個風車陣，有風就會不斷轉，都治癒嘅。


上川神社會有條路行去北彩都花園，會途經好多個公園，先係神楽岡公園，過條橋就係宮前公園，有河、有柴犬。勁多人喺度放狗，同埋都有啲遊樂設施，所以都好多小朋友喺度玩


行到最盡就到北彩都花園，然後又返到旭川車站，日行2萬步好輕鬆


之後打算早啲去食晚餐，係一間拉麵店——旭川らぅめん青葉 本店 （あおば）（Tabelog 3.69分）（https://tabelog.com/hokkaido/A0104/A010401/1000314/），佢收5點半，我差唔多5點去到佢已經閂緊門，所以轉場去另一間。

Day 8晚餐——拉麵——らーめんや天金 四条店 （てんきん）（Tabelog 3.66分）
（https://tabelog.com/hokkaido/A0104/A010401/1000090/）

旭川第一名嘅拉麵係上面間青葉，呢間天金就係第二名，乜拉麵都有，醬油、味噌、鹽等等，我就直接叫咗餐牌最大張相個個醬油拉麵，同埋叫咗6隻煎餃子。餃子好食過拉麵，平時香港都會自己整大阪王將食，今次呢個好juicy，外脆內軟，個皮煎到脆卜卜但個饀就仲好juicy，小心會爆汁 今餐¥1,400。

靚景嘆Starbucks Frappuccino
食飽都未6點，頭先喺北彩都公園個頭其實有間Starbucks，個景係望到日落、湖同草地。香港飲唔到，嚟日本一定要飲，最愛Frappuccino我記得以前係有一隻純朱古力版，唔知係無咗定其實唔存在，剩係見到mocha版，唔想飲咖啡所以就叫咗個綠茶，¥635同香港差唔多啦。



間Starbucks有分室外同室內位，室外有幾張圓枱，買完咁啱見到有人走就去咗霸位。天氣好好，所以又坐咗成粒鐘，真係要自己一個人先可以咁hea。聽住舖頭啲歌、望住啲人放狗同行過、個太陽慢慢落，好舒服人到咗一個年紀就好鍾意睇呢類大自然嘢，真係老了。

旭川篇完結
夜晚便利店買埋雪糕，試呢個新版，無特別，Day 8完！



嚟到呢度，旭川行程就完啦，聽朝一早就會搭JR落滝川，同日落埋札幌。由稚內出到嚟去旭川，好有返返去大城市嘅感覺。呢度最鍾意就係旭川動物園，冬天想再嚟睇班企鵝on99行出嚟 當然北海道好多地方都未探索，同埋自己其實未滑過雪，所以相信未來有一個冬天，我係會返嚟嘅！

旭川篇，完！

應該星期一會出到last day
Day 9係我最愛行程 聽晚睇

北海道咁多地方都係覺得札幌最正

高質 會越嚟越多人睇㗎，加油

湯之川既話渚亭唔錯

support

Day 9 行程概要
- 滝川油菜花田祭、滝川天空公園滑翔機
- JR落埋札幌
- 札幌工廠、北海道廳本廳舍（紅磚廳舍）、札幌市鐘樓

Day 9一早搭JR落瀧川，所以晨早喺酒店食完早餐就起行，早餐同前一日大致一樣，所以就唔再講了。我覺得係少數我會肯試嘅酒店早餐。


瀧川應該係一個無乜人會揀去嘅地方，佢唔係一個大城市，JR站直頭locker都無，Google搵佢嘅資訊就只得一年一度嘅油菜花田祭。今次去嘅日子撞正呢個油菜花祭，當然要去會一會佢，同埋資料搜集期間發現瀧川市另一重點係玩滑翔機。本身自己唔好呢類「刺激」嘢，不過見人一世物一世，睇完資訊我嘅理解係超級安全，所以就報咗名。去之前有啲驚亦有啲期待、興奮，係我成個trip最期待嘅行程。

寄存行李唯一地方：瀧川觀光中心
如果搭JR由旭川去札幌，係會經過瀧川呢個站，所以我就將瀧川做一個中途站，日頭由旭川JR去瀧川，玩完就夜晚直落札幌瞓，慳返交通時間。出發前我得知自己要寄存行季，所以就網上搵呢個站有無locker，搵唔到資訊。喺旭川我就去多次觀光中心，confirm多次個站有無locker，因為如果去到無嘅話應該係會好kick；假設事前知道個站真係無locker，最壞打算會係放喺旭川返轉頭拎、或者去咗札幌放低先。

最後職員話我知呢個JR站係無locker嘅，不過一出車站左邊幢樓有個觀光中心，係可以寄存行李，但有開放時間，平時09:30至16:30，今次撞正油菜花田祭，就會開到17:00。我原先安排嘅行程係先去油菜花田祭，再去滑翔機（book咗3點），所以就決定將行李放喺呢個觀光中心，每放一件要¥500。

滝川年度盛事：油菜花田祭
觀光中心放完行李之後，搵職員姐姐問埋啲交通，雞同鴨講咗一陣拎咗堆資料，佢完全唔識英文但都好畀心機解釋，超好人。瀧川市重點之一係油菜花田祭，其實係分咗好多個塊田，睇個地圖係有18塊田，其中最大塊個塊，係要另外轉車先去到。詳情可參考官網：https://www.takikawa-nanohana.com/


由滝川站去油菜花田祭個主要會場，係要搭一程巴士，去到道の駅；要再去最大個塊田，就要搭觀光社特登預備嘅巴士先去到。喺JR站上巴士，沿途已經會見到好多油菜花田，細細塊個啲已經勁靚。


搭咗30分鐘左右就會到道の駅。回程返JR嘅巴士就喺對面馬路，所以慣例去影低車牌先。班次好少，加上我又book咗15:00滑翔機，而滑翔機個公園離JR站要20分鐘路程，所以最遲我14:09就要喺呢度上車走人。

大型會場：小食檔、盆栽店舖
一落車個刻其實就會見到呢個主要會場，因為勁多黃色氣球好搶眼，行入去就會去到會場。個會場係有好多小食檔，不過我10點鐘到就只係準備緊開門，仲有好多賣盆栽嘅舖頭。



再行入啲就會係觀光社個架接駁最大塊田嘅巴士站，10:00開始每15分鐘就會有一班由道の駅（主要會場）出發，10分鐘就會到達菜の花畑（最大個塊田），唔揸車係完全無問題。由菜の花畑回程去道の駅都係15分鐘一班，留意去到16:01尾班車返道の駅就得。來回車費¥600，買完個reception靚女就會幫你帶黃色手環，代表你買咗車飛，記得唔好除。佢仲會畀一個鞋套你，最大個塊田係畀人行入去，入去前著鞋套就可以。過去排隊已經勁多人，所以搭唔到第一班，要搭第二班。

天氣唔好下嘅黃色花海
今日天氣唔好，晏晝會落雨，睇相都天陰陰 道の駅搭去菜の花畑，沿途10分鐘都會見到好多油菜花田。一落車跟大隊行就得，記得著上你個鞋套先行入去。入場個位有一個高台，可以畀你行樓梯上高啲影。


地面位置就畀個隨意門吸引咗眼球，所以就行咗下面先。天氣好一定會勁靚，不過少少陰都已經好震撼，我覺得無落雨就可以嚟



塊田有啲位係好明顯一條路，所以可以行入去同個花海影相。唔知有無得再行入啲，我就無行到咁入。隨意門嘅另一邊就無乜佈置，但就可以再行入啲，影咗好多花相。