返新工前去咗兩星期北海道～非自駕遊記

整理券搭巴士簡單教學
食飽就去原本Day 2要去嘅「恵山杜鵑公園」，今日都係天陰陰，但就無落雨，所以照去啦。每年五月尾到六月頭都係杜鵑花季，今年5月13日至28日就係「第５４回恵山つつじまつり」，撞啱時間無理由唔去。由函館市中心出發係有巴士直達（91A號），單程¥1,550，要搭2小時，來回坐4小時。班次唔密，所以一定要search定搭幾多點車，上車要拎整理券。可能有人唔知點計車錢，所以簡單講講。

車頭會有個電子屏幕，會有堆數字，數字代表第幾個車站上車，落車時望一望個牌，對返你上車時拎個張整理券（唔記得影）個數字，畀返個個錢就得。例如我呢程整理券有個「1」字，即係我係呢條路線第一個站上車，落車個陣我望返個電子屏幕，畀返「1」字下面列個個車錢就得。車錢不設找續，但有個位可以唱散紙的，驚就唱定散紙啦～

杜鵑花季：恵山杜鵑公園
車程兩小時，沿途都天陰陰，去到咁上下就會靠海邊條路開，如果好天一定好靚。聽下歌睇下風景，兩個鐘其實好快過。


巴士會喺山腳停，要再行20分鐘左右先上到去好多杜鵑花個位，沿途有啲係斜路，都行到幾攰下。一路行都見唔到其他人，仲要見到個牌有個熊字，應該係講熊出沒過喺附近，即刻有啲淆（成個北海道之旅見過4、5次呢塊牌，次次都會驚一驚先），個人都即刻周圍望，不過真係有熊撲出嚟應該死硬。


行到上公園，終於見到有人，同埋開始出太陽！恵山杜鵑公園唔係得紅色杜鵑花，有紫色，有啲已經禿禿哋，應該過咗全盛期，不過都好多打卡位畀你影靚相。成個「第５４回恵山つつじまつり」歷時半個月，有其中三日係會有啲攤檔，有一日就會有表演睇；不過我去個日已經無晒呢啲嘢，所以得杜鵑花睇。來回4個鐘巴士睇杜鵑花，大家去唔去就自行考慮啦。

搭返兩個鐘出函館市中心，盛惠¥1,550，出到去都差唔多5點鐘。原定喺函館呢三日，晚餐分別係食拉麵、小丑漢堡同壽喜燒，壽喜燒食唔到，最後喺車站附近原來有間根室花丸，所以就揀咗食佢。

Day 3晚餐——迴轉壽司——回転寿司根室花まる キラリス函館店（Tabelog 3.38分）
（https://tabelog.com/hokkaido/A0105/A010501/1057213/）

原本係plan喺札幌先食根室花丸，但一來函館未諗到食乜，二來札幌一定勁多人等，所以就去咗函館呢間度食。去到舖頭完全唔使等位，有得直入，所以北海道想食而又會嚟函館，不妨揀嚟呢間好過去札幌排長龍。


根室花丸落單要手寫，Menu分咗本日精選/限定，只得日文，靠Google Translate翻譯都叫睇得明。另一份就係regular餐單，有齊中英日韓。落單只需要拎枱面張紙寫，然後畀師傅或店員就可以；regular個啲可以寫數字，限定個啲就要抄個日文落去啦。


中文翻譯其實好準確，自己都叫咗好穩陣嘅食物。唯獨有一樣發雞盲，我想叫魚子但唔知點解會叫咗呢個「鯡魚卵」，上枱心諗咩嚟。放入口係硬嘅一條嘢，口感好差，完全唔鍾意，不過覺得食剩有啲肉酸所以放入口就搵茶吞咗佢算


雙層帶子、牡丹蝦、雞蛋三文治（好似係咁叫），呢三樣就幾鍾意。手寫日文order咗個三文魚子，都係好正常，其他都好正路嘅壽司，成餐¥3,707（11份壽司加一個茶碗蒸）。

立待岬睇日落
食飽出嚟未6點，啲灰雲終於散晒，叫做好好天，出發去立待岬睇日落。市電最近立待岬個個站係「谷地頭」，落車沿住Google Map行多15分鐘左右就到。沿途會經過一堆墓碑，行到盡頭就係立待岬。


成個立待岬應該大概睇到300度海景，個天氣又幾好，所以開始日落又幾靚。有啲長凳同有個涼亭畀人坐，自己坐咗喺長凳近一個鐘，有啲海風又唔凍真係勁Chill。



出返去已經少少天黑，好多墓碑

天氣好，上多次函館山睇夜景！
尋日天氣差上函館山乜都睇唔到，今日天氣好所以決定去多次。立待岬行返出谷地頭站，其實可以搭兩個站市電，去到「宝來町」再行去纜車站，不過見有時間又唔係要行好耐，最後由立待岬行咗去纜車站，需時大半個鐘。（條路好黑）

去到發現今日勁多人，應該係我喺函館見到最多人嘅一次 天氣好真係唔同啲，纜車影出去都已經幾靚。


函館山夜景係「世界三大夜景」之一，另外兩個係香港同意大利Naples。2012年有個「世界新三大夜景」，就踢走咗函館同Naples，加入咗長崎同摩納哥。天氣好係幾靚，不過太多人逼係個展望台，加上香港睇得多其實真係會覺得無乜feel。


影咗陣相就落返去，呢度有手信舖畀你買嘢，不過前一日天氣差上嚟已經行咗，所以今日無再行。頭先搭纜車上到山頂，一出見到右手邊仲有個觀景台，所以落山前就去睇一睇。

官方介紹：「位在纜車下車出口處左手邊的漁火公園是比較鮮為人知的觀景點。天氣好的話，可以眺望在津輕海峽對面的下北半島和津輕半島；夏天到秋天的夜晚裡，還可以看到魷魚釣船的漁火。」隱世打卡位果然無乜人，得個幾條友，啲人全部都湧晒上天台，所以呢度就任你影。老老實實個景同樓上我覺得無乜分別，影相唔驚影到好多人頭，贏在無乜人，大家記得嚟望望。


落返山就返酒店沖涼，之後執行李，因為第二日就要飛去稚內，Day 3完！

呢度都真係幾遠下

想請教你內陸機既機票
係去到先買？定香港一早買定

一定香港買定 都係jal / ana

Day 4 行程概要
- 函館內陸機去新千歲先，再轉另一程去稚內
- 晚餐——Vin Steak house

Day 4都係交通日，搭飛機去到稚內酒店check in完都5點幾。呢日都同過往兩日一樣，畀個太陽光醒咗，今日好撚好天！其實我有諗過搵日早啲起身睇日出，不過嚟之前無諗過日出係4點鐘，要睇就要3點幾醒，所以最後無咁做，瞓到9點幾就準備check out去機場。


行返去函館站搭巴士，由於已經有一次內陸機經驗，知道真係唔使太早去。函館去稚內係無直航，要先由函館飛去新千歲，再由新千歲飛去稚內，兩程機HK$1,507.00。函館飛去新千歲只需要40分鐘，12:10起飛、12:50就降落。新千歲飛去稚內就只有15:35至16:30個班，所以中間都有兩個幾鐘喺新千歲機場度hea，連埋食午餐。

因為想早啲入函館機場行下，同埋食個早餐，所以12:10嘅飛機，我搭10點鐘巴士，10點半咁上下就到咗。搞掂寄艙行李之後就搵間嘢食個早餐，因為自己係分兩程機，所以個陣都問咗櫃位使唔使新千歲拎返行李再登記過，佢就話行李都直接送到稚內。今次之後幾鍾意坐內陸機，當遊飛機河真係幾好。

Day 4早餐——Cafe——カフェ 美鈴 函館空港店（Tabelog 3.48分）
(https://tabelog.com/hokkaido/A0105/A010501/1006182/)

函館機場都幾多餐廳，揀咗成個機場最高分個間，係一間連鎖咖啡店，叫MISUZU COFFEE。入去坐低叫嘢食就得，最後出去收銀畀錢。叫咗份雙拼三文治，估唔到係有兩份全份嘅三文治，份量真係好夠 一份係芝士火腿加蕃茄醬、另一份係薯仔沙律加芝士，後者薯仔沙律係凍食嚟，個底鋪咗啲生菜，成份嘢仲要整咗飛碟幾好食，盛惠¥1,230。


食飽就行下函館機場，有個兒童遊樂場，仲有貼紙相機同夾公仔，我就出咗去觀景台。天氣真係好好，你可以望到飛機升降，曬下太陽等起飛。


去到呢度函館篇就正式完結啦，因為天氣唔好所以我覺得有個藉口畀自己下次再嚟。成個函館都好歐洲feel，我好鍾意，如果有機會我會想去住下「湯の川温泉」個頭 今次函館住個間WBF真係收貨，我會話係今次呢個trip 4間酒店最好個間，個大浴場都係最大最唔逼。

函館篇 完

新千歲機場食lunch
去到新千歲機場都就去咗食lunch，新千歲機場非常之大，喺香港做功課個陣見台灣blogger會話呢個機場行一日都得，認真係可以喺度hea好耐，所以呢兩個幾鐘轉機時間其實唔驚無嘢做。

午餐——拉麵——えびそば一幻 新千歳空港店 （いちげん）（Tabelog 3.59分）
（https://tabelog.com/hokkaido/A0107/A010701/1034338/）

Tabelog入面新千歲機場最高分個三間都唔係主食，排第四就係呢間一幻拉麵。機場入面有條拉麵街，一幻係少數要排長龍嘅拉麵店，不過今日有嘅就係時間，所以照排。下午1點10分左右排，大概1點半就入得，入去之前會叫你order定食咩，揀咗鮮蝦味噌湯底、原味。見前面啲人會叫個「鮮蝦飯糰」，不過唔係好餓所以就無叫。等多5分鐘就上咗碗拉麵，個湯唔會過鹹，粒蛋唔會太熟，對拉麵要求唔高嘅我，覺得幾好食，盛惠¥900。




題外話：新千歲機場最高分嘅係「美瑛選果」，Tabelog 3.64分，最出名嘅係「粟米麵包」。每日有指定出爐時間，會有勁多人排定隊等個啲。個陣13:50分左右去到，14:10出爐已經係排晒，再下一輪就要15:10，所以無排。

Day 4下午茶——甜品——ミルク&パフェ よつ葉ホワイトコージ 新千歳空港店（Tabelog 3.64分）
（https://tabelog.com/hokkaido/A0107/A010701/1034629/）

之後走咗去食機場排第二嘅雪糕店，其實呢間嘢同「美瑛選果」同分，不過個rank就排第二，有軟雪糕同芭菲，仲有類似M記個啲新地樂嘅飲品。我就叫咗個芒果味芭菲，¥500，有條餅乾條，勁唔夾，我覺得可以唔放。個底有啲蛋糕仔，最sad係中間竟然係空氣，不過$30港紙就算啦



食飽去咗閘口等，新千歲機場飛去稚內，起飛時間係15:35，16:30會到稚內。㗎機都係滿晒人，事前揀定窗口位，好天所以再次瘋狂影相。呢程飛機河都有杯茶飲，影下相、飲杯茶，好快就到咗稚內啦。今個旅程嘅所有內陸機已經坐晒，非常方便，以後如果要坐3個鐘以上嘅車，我覺得我好大機會會再揀內陸機。



稚內篇開始～

抵達稚內
一到稚內機場真係狗衝出去等行李，因為事前搵定出市區嘅機場巴士，16:35就會出發，我班機16:30先land，原本都諗5分鐘點樣出到去最後拎完行李16:40左右，即刻出去車站，出機場轉左行幾步就到。


最尾上網睇返先知呢啲細機場巴士時間係會夾飛機降落時間，所以行李未出晒係一定唔會開車，最後時間表寫16:35機場開，實際都16:45先開，所以唔使太擔心。當然細機場落機之後，你唔好再周圍去，建議尿可以痾、屎就真係唔好啦，一陣巴士走咗真係的士都唔知有無得你坐 車費盛惠¥700。

稚內住宿：Dormy Inn酒店 - 稚內天然溫泉
今次喺稚內住嘅係「Dormy Inn酒店 - 稚內天然溫泉」，呢間係4間入面最早book個間，因為成個trip大概早一個月前開始book嘢，當時search稚內已經無乜酒店呢間係少有近稚內車站嘅酒店。但竟然要成HK$1,100一晚，今次喺稚內住三晚，加埋都HK$3,400，順利成為咗成個trip住得最貴嘅酒店。

「Dormy Inn」呢個品牌聽得多，但其實今次第一次住。個陣最平已經係雙床房，所以都直接揀咗佢。一般用品個啲牙刷全部大堂拎；窗簾同樣拉唔實，所以每日都會清晨4點光醒咗先。


酒店有大浴場，所以房入面都係得企缸。大浴場有室內同露天，不過勁多人下。Dormy Inn其中一個特色係夜晚會有免費宵夜，逢21:30至23:00都會有醬油拉麵食，我食咗一晚，聽講全日本Dormy Inn嘅呢碗麵都一樣味，浸完溫泉落去食一碗真係幾爽。（下一晚先有相）

稚內觀光中心交通查詢
Check in完大概下晝5點半，因為今晚食嘅Vin Steak house 6點鐘先開，所以就行咗去車站個邊。車站係一幢兩層嘅大樓，其實係稚內JR車站嚟，有手信舖，最估唔到係竟然有戲院。


先去觀光中心拎咗張「最北端 出發·訪問·到達 證明書」，免費嘅寫低你個名就拎得，大家記得拎然後問埋稚內交通，因為稚內公共交通個人覺得係複雜到癲，仲要班次真係算疏，所以一定一定要事先好好了解市內交通！自問本身睇Google Map同方向感算好，但都用咗好多時間去study，觀光中心個姐姐唔識英文，但都好好慢慢用字筆解釋畀我知，雞同鴨講嘅情況下我拎咗堆時間表返酒店，夜晚慢慢睇。

稚內交通簡單教學
因為實在太複雜，所以想解釋一下，方便下非自駕人士。稚內市內巴士係叫宗谷巴士，要注意交通卡係用唔到，所以一定要有現金喺身，上車請記得拎整理券。（整理券搭巴士教學可參考#26，巴士大概係咁嘅樣）


Google Map係唔會show到稚內市內巴士路線的，有試過乘換案內app，會有路線但無得好似Google Map咁有GPS教你去；所以我係完全依靠睇2D地圖嘅能力（如果有App睇到稚內市內巴士點搭大家可補充）

官網：http://www.soyabus.co.jp/（靠佢睇時間表同地圖）
首先係時間表，佢係唔會show晒每個站，只會有大站嘅時間，所以非去大站嘅話你要自行推算大概到達時間。同埋班次真係唔算密，所以記得要plan好搭咩時間，同埋尾班車，無車而又喺山旮旯就真係唔知點幫你難睇到媽媽聲：


之後係巴士路線圖，真係好似以前旅遊書個啲，要zoom大再對比Google Map去睇自己喺邊，然後去搵個車站，所以一定要識睇2D地圖真係要zoom大去數沿岸第幾條街：

稚內天氣好好、買定宵夜
觀光中心Settle好晒之後，就行返出去，好撚好天。嚟之前research勁驚稚內係沿海城市，會日日落雨又天氣差，我喺稚內呢三日都勁好天。



行下行下去咗北防波堤個面，再行去一間事先搵定嘅甜品舖，買定今晚宵夜。拎返酒店雪住佢，就去食晚餐。

Day 4晚餐——牛扒——ヴァン（Vin Steak house）（Tabelog 3.40分）
（https://tabelog.com/hokkaido/A0109/A010901/1022840/）

講一講點解揀呢間，Tabelog搵稚內由高至低分排序，其實呢間嘢排到第16名。但因為成個trip唔想都係海鮮、海鮮同海鮮，所以最後揀咗呢間嘢

Vin剩係得晚市，仲要係得18:00至20:00，我18:20左右walk in入時有一枱人，隔咗陣有另外一對香港人入嚟（其實稚內見到都幾多香港人，我新千歲飛稚內係有對望落60歲嘅香港夫妻一齊搭）。


Vin有3個Set，去之前都做咗功課，Set C有海鮮，但要預約所以食唔到。Set A同B嘅分別係唔同肉，一個係西冷、一個係里脊肉，我就揀咗Set B。一個Set除咗有肉，仲有一杯酒、一碗牛清湯、一份沙律、一份飯或麵包、同一杯咖啡。


樓面有個婆婆，同埋一個女仔，佢哋安排咗我坐Bar枱。本身唔好飲酒，品評唔到，但杯紅酒細細杯，好似我啲唔係好飲嘅就啱啱好。


好快就上咗碗湯，個幾粒好似係紫洋蔥，入口都幾濃，冬天飲應該好暖胃。


沙律無特別。


然後就上埋塊扒，其實之前追po見到有好多巴打話呢間唔抵食件扒係幾靚仔嘅，但的確無乜特別，唔知點解無影切開後個樣，所以入面咩樣都唔記得了。


佢上完肉再上麵包，最後仲有啡，埋單¥8,030，強烈建議大家真係食其他餐廳。

食飽就走人，去便利店買少少嘢。Seicomart係北海道先有嘅便利店，喺北海道分店係多過FamilyMart、Lawson同7-11，而稚內呢度就得Seicomart，所以亦係我喺函館7仔要禁定錢嘅原因，因為稚內無得禁。 賣啲嘢同普通便利店都係大同小異，但就第一次見到有煙花買。買咗少少零食就返酒店沖涼，之後就要研究下一日嘅交通，同埋食晏晝買定嘅甜品宵夜。


Day 4宵夜——甜品——御菓子司 小鹿（Tabelog 3.46分）
（https://tabelog.com/hokkaido/A0109/A010901/1016543/）

呢間係稚內最高分嘅甜品店，除咗勁多蛋糕，仲有布甸、和菓子個啲，一盒盒手信都可以呢度買。



今次買咗三件（第二日有再嚟），分別係一件士多啤梨撻、一件巴斯克芝士蛋糕同一個Tiramisu。件士多啤梨撻好唔得，白色個啲好似益力多咁，勁唔夾。Tiramisu買嘅原因，純粹因為個碗好靚，所以食完我都洗乾淨帶咗返香港巴斯克芝士蛋糕就高質，可以一試，三件蛋糕¥1,382。


食完呢三件嘢已經好飽，唔知點解仲會食埋Seico買嘅白桃Yogurt。


同埋雪櫃有兩個白桃啫哩，有張紙話係入住禮物，又幾好食。今晚無再食Dormy Inn嘅拉麵，留返聽晚，搞掂下一日去市內景點、野寒布岬同溫泉童夢嘅交通就瞓覺了，Day 4完！

留名跟進
嚟緊都會去北海道

新千歲機場上裝睇好似好多野行

呢間好似無咩特別都咁貴
房又唔算大

可能太遲book 加上無乜酒店揀
我啱啱search多次稚內dormy inn 篤個11月weekend都係$750晚 平幾舊水

等緊你update

Day 5 行程概要
- 稚內市內景點（稚內公園、冰雪之門、北門神社）
- 午餐樺太食堂、野寒布岬、寒流水族館
- 稚內溫泉 童夢
- 夕日之丘睇日落
- 晚餐天婦羅

Day 5天氣一樣勁好，間房望出去好好天 9點幾鐘就出門口，第一站係去步行距離都去到嘅Cafe。揀嘅原因係附近真係無乜早餐好揀，所以揀咗呢間。


Day 5早餐——Cafe——北門館 （ほくもんかん）（Tabelog 3.12分）
（https://tabelog.com/hokkaido/A0109/A010901/1015715/）

一入門口得一個伯伯，一個人負責哂成間舖所有嘢，雞同鴨講嘅情況下叫咗份三文治同咖啡。間舖裝修幾有特色，三文治幾好食，同尋日係函館機場食嘅份量一樣咁多，係香港double size，記得上年去東京叫三文治明明係一份，北海道食兩次三文治都係雙倍份量一份係青瓜火腿、一份係青瓜雞蛋沙律，幾好食，盛惠¥900。