First slam dunk令我遺憾

我係一個好鍾意slam dunk既人
動畫漫畫都睇過 出電影前仲特登拎番套漫畫出來由頭睇一次
前日睇完電影，雖然見到好多評價都話好好
但我真係忍唔住要出來講 我係覺得失望同遺憾

先講好既地方
動畫既表現，人物動作流暢、自然，配樂襯托到比賽緊張節奏，拍波聲 跑步聲 身體撞擊聲都好真實 表達到臨場感
比起以前動畫版 ，電影版更加有真實感
如果唔係fans ，作為一個第一次接觸既人，會覺得呢套係一部好出色既運動電影

但作為一個fans 就覺得電影版忽略左太多其他角色既描寫
同埋比賽中每個人既心境描述（只係一直集中講宮城）
呢度就係我最失望同遺憾既地方

以漫畫單行版新裝版共20本來計
對山王比賽係由第16期中段開始，足足用左4.5本書既份量來描述呢場比賽
除左比賽本身、漫畫中都有好多人物內心描寫
由一開始上半場勢均力敵、好有信心
到下半場一開始就被壓迫 一直落後20分以上
然後再講點樣一步步克服心理壓力 同埋點樣一步步破解對方戰略 一分分咁追番上來個種熱血

可惜電影版就係忽略左宮城以外既人既心理描寫同埋回憶
變左新觀眾好多背後既含意都理解唔到

例如、
1.理解唔到三井個種永不放棄既毅力
電影中對於三井過去雖然有提到係由不良少年回歸，但無描寫到其實佢一直都覺得自己離開左兩年唔打波 荒廢左時間個種內疚 同後悔 ，所以見番安西番來籃球隊後、佢好希望盡自己能力 打好每場比賽 、幫湘北贏 、幫湘北進軍全國冠軍，就算佢體力唔夠已經無咩氣都堅持留係場上，
漫畫中亦因為描寫到佢呢種心境，更加突顯到佢臨尾射三分加一個罰球個球 係表達出佢用行動來表現到佢永不放棄既精神

但電影中好輕描淡寫呢部分 令觀眾唔太感受佢個一下為球隊緊要關頭一舉追4分個種激動

2.欠缺對流川既描述 新觀眾入場睇電影 只會覺得流川表現平淡無奇。我諗觀眾好大程度上只會感受到流川係一個技術唔及澤北既隊員、如果可以加番多啲回憶去描述流川，咁起碼觀眾就會知其實佢一直都係重牌球員

另一邊 流川比賽中一直輸比澤北 最後佢肯為左超越對方 而作出改變 傳波比隊友、打破困局之餘 ，更因為呢種改變、影響到澤北判斷力、最後終於成功單對單突破澤北防守 另讀者為之歡呼既感覺 。呢種感覺又係電影版沒表達出來

3.赤木一直以進軍全國冠軍為目標 ，如果電影中多啲對佢呢種心態上既描寫 由其係佢最後一分鐘封到河田個上籃時表達出來、應該可以令人了解到佢對勝利係幾咁執著同努力。電影中表達唔到

4.作為系列主角櫻木 如果電影多啲講下佢其實只係打左幾個月波，由一開始淨係識入樽、到學識搶籃版、走籃、跳射、一直努力一直進步、唔怕失敗 ，對比賽拼盡全力
咁樣觀眾就唔會覺得佢只係一個製造笑料既人
同埋可以感受到佢飛身救波個下 係幾咁盡力

連漫畫中背痛後起番身同晴子講好鐘意打籃球呢幕都cut左，作為fans真係有回遺憾

————
總結來講 就係覺得對宮城過多描寫
但其實唯一有聯繫到呢場比賽既 我覺得只係講佢哥哥都以打倒山王為目標呢一樣而已
而對其他人既描寫同回憶咁少
搞到現著中好多感動位 激動位 ，新觀眾都唔會感受到

另一樣就係我覺得佢係比賽中實在加插太多回憶片段
感覺就係睇一分波 就要睇一分鐘回憶
但個d回憶 睇多幾次已經好厭
我睇電影時只係心諗 可唔可以播多少少比賽 加多啲比賽中全隊人既心理描寫呢？
一睇到轉去回憶宮城過去 我就會覺得 「又睇回憶？夠未呀？好悶呀、快啲去播番比賽啦」

套戲 我應該會睇多次
但我覺得佢忽略左太多原著中人物比賽時既心境描寫
令好多名場面都失左個種味道同意義

今次山王戰電影化 雖然補完左動漫睇唔到既最後比賽
但佢唔係以我心目中既形式再現
我只能夠講 真係令我感到遺憾

電影得兩小時，做晒可能要分上下集了

唔使，講少d宮城已經夠

First slam dunk令我哭？

宮城部份反而我覺得好完整，如果減1/3可能又變咗兩頭唔到岸

電影一開始就用宮城做主角，所有視點都由宮城睇到既野為主，用咁既角度又點會講到其他人既心路歷程呢
我覺得合情理過講晒全部人
到時每個人到喉唔到肺仲因此失彼

講真，宮城嘅故事真係好差，尤其佢同佢老母之間嘅描寫

我情願佢寫多啲佢對佢阿哥既感覺啦，個老母都表達唔到啲咩，不過都算叫做完整既

套電影版計得好準，你一睇到開始熱血果時，就播成長片段淋熄你團slam dunk 之火

講得幾岩
真係講得太多宮城

睇完覺得好失望，經典場面冇哂咁濟，想講宮城開套外傳啦，完全同山王一戰唔夾

唔係話唔講回憶
你要講回憶
將宮城既時間 分啲比其他人仲好
我想睇既係全隊人既心路描述
即係原作咁

唔係集中哂宮城但有好多其實都同比賽唔關事

其實確實係有啲奇怪
一開始講佢細個，無啦啦就跳去打全國大賽

場波好多位都好感動
但亦有好多位畫得唔夠喉
個處理手法亦都破壞左個感動位
例如最後果幾秒，用靜音好似飛漫畫咁 flip 過完全感動唔到我
bg music都係，出新野一定有新歌，但係1，2個位出返舊歌，成件事昇華哂
例如最後去美國播主題曲
某幾球3分／回憶播 世界盡頭


不過又咁講，主角係宮城，主題唔係打山王
成件事係宮城同佢家人，所以山王唔係重點可以理解
而家有山王睇已經好滿足

就好似驚爆危機，如果有生之年可以睇埋最後一幕就好 Season 3等左13年

用fans身份但用新觀眾角度剖析 cls

漫畫寫齊其他人心路歷程
係差宮城，今次補翻都正常
不過寫到佢故事背景好老土

無插曲真係差好遠
直到世界的盡頭等同數碼暴龍既Brave Heart
令到成場戰鬥既熱血程度昇華幾百倍 係成場戰鬥既靈魂所在
一無咗就成件事平凡晒

因為宮城嘅性格塑造成係不擅言辭
而佢老母就因為好避忌，成日避而不談阿哥
最後攞返晒啲合照出嚟，代表成家終於肯坦然面對現實

明白佢想創新, 整體ok, 如最後整番首世界盡頭就正. 畢竟老Fans都到四十, 有D經歷、體會.
不過唔緊要啦無就自己播

佢就係突登唔想咁商業化放晒啲經典野入去

正因為咁先要增加反映佢想法既行動

又講三井又講流川只會搞到四不像

似係作者覺得當年畫到其他4 個都各有特色同fans
唯獨是宮城最平凡
想俾佢反cup

覺得少左咩經典場面對白既可以睇下井上既訪問了解下點解佢有咁既取捨

都有啲嘅，由問題兒童，死日惹麻煩又唔願同人溝通，變到開始肯承擔隊長責任，幫手激勵隊友同埋發號施令

佢想繼續出電影版咪會咁