宇宙天團 #ERROR 下月舉行《明星生活ERROR Live Show 2022》原本高高興興,結果因為一張poster引發抄襲疑雲,本地Rapper組合「#米奇老味神奇屋」(The Low Mays/老味)前日指摘ERROR抄襲其歌名《明星生活》,並出post點名ERROR:「冇問過我哋就直接用咗我哋《明星生活》呢條橋。下次抄咗功課,記得要改咗先交。」
不過回力鏢一擲出,自己亦成為被聲討的對象。有網民指,老味的《明星生活》MV,本身已跟足F4《流星雨》方式拍攝,令人聯想起今年3月「見字飲水」四字被發現遭人註冊一樣,將普遍使用的四個字據為已有。
另外老味與hip hop組合Bakerie的專輯亦與古天樂主演的電影撞名,被質疑「有口話人,冇口話自己」。(老味於2019年5月舉行《G風暴》演唱會、2019年7月推出專輯《G風暴大碟》;電影《#G風暴》2019年4月宣佈開拍,2021年上映,為該系列第五部電影)
今次風波主因出於「明星生活」四字撞到應,不過娛樂圈有時都會出現同名情況,例如張惠妹、劉浩龍、林家謙都分別有歌曲叫《記得》。有網民形容老味在地下界好紅:「娛樂圈創作人,如果唔識老味同《#明星生活》,都真係好出奇。」亦有兩邊都愛的fans希望風波平息:「兩邊都鍾意,但覺得單憑『明星生活』四隻字,又未足以話『呢條橋』,希望兩邊可以和平共存。」