蘇雅琳沚羿
2022-09-17 15:59:02
聲夢小花姚焯菲(Chantel)將於9月22日16歲生日,今日(17日)獲其官方後援會於主題公園的酒店內舉辦驚喜生日會及粉絲見面會,除了Chantel的父母及妹妹外,現場有大約160名粉絲參與,Chantel跟粉絲大玩遊戲及唱歌,並在她至愛的卡通人物陪同下與生日蛋糕合照。
Chantel透露正日要返學,之後跟After Class成員一齊上堂,預計晚上會與家人食飯慶祝,講到今次驚喜生日會,她坦言事前全不知情:「我入到場仲係半醒狀態,以為自己發緊夢。一開始爸爸媽媽同我講今日嚟補拍MV,但個MV已經出咗街,所以我都有少少奇怪,覺得我父母好可疑,後來公司出咗個行程表,真係話補拍MV,我仲打埋畀張馳豪問佢,佢都話係拍MV,原來好多人夾埋一齊呃我,嚟到門口嘅時候好感動,估唔到有咁多粉絲出席,上年粉絲都有同我搞生日會,但就冇咁大型。」