我鍾意咗個網故女作家，但佢真人好樣衰。

快樂係一下 唔快樂係耐啲

王子真係好黑人憎

王子呢啲人，做朋友都唔得喎
下下踩低人係咩意思

無聊一問：我應唔應該識四朵鮮花其他三個？

淨係記得雅君同冬冬

恩係唔係家姐？

推推推

但感覺家姐故唔係同一個宇宙
所以排除咗
但我嘅感覺有機會錯

最憎嗰啲人

王子真係好噁心
佢連當女主角係朋友既心態都無
見到人地有男仔追唔祝福仲講埋啲咁既野

但翩翩都唔好得去邊，一個願打一個願捱

覺得翩翩自己迷惘緊有咩好鬧

翩翩出緊黎架啦
擺明已經無咩好感

差2個正皮

好想打死王子咁樣hurt我地翩翩

300正皮

係啊

應該醒喇下嘛
王子有啲仆街

八、濕

翩翩摘下耳機，回到家。

王子一上車便戴上耳機，於是，她也戴上耳機。自己戴自己的是正常不過的事，然而把兩隻白色掛件塞在耳洞上方，卻似將所有人隔絕。她突然覺得和他的距離很遠，他之前是會上車後、便不發一言的人嗎？她不知道。

太糟糕了，畢業後二人即使見面，都只在家附近的商場外、坐在長椅上，她聽他訴苦。她覺得他孩子氣，生起憐惜之情。但除此之外，他們沒有什麼交流了。

可是，今天，除了一點委屈，她沒有感到難過。

她覺得自己是一塊隨手找來的小卡片，被人當是書籤，無論她本身是什麼都不重要了，只要看書的人能將未完的文字讀下去。不、不，她這麼偉大嗎？應是——反正，都只是一張小卡片，能被夾在書裏，也是一種意義；反正，都已經夾住了。書有看完的一天，紙黃字褪。

翩翩將黑色皮褸丢在沙發上，她都不用試，已覺得與自己不合襯。

閱讀是好習慣，然而一本書拖太久來讀，又是不好的。她之所以在現實世界中感到自卑，確有原因；她年少時期的心上人總是批評她身上的碎片，例如外觀、衣着、能力。她覺得自己不會被愛，不只是外觀沒有其他人美麗——所以，王子還能在她身邊做朋友，她已覺得難得。

哇，她那樣清醒。

Oh my god，呢條仆街PUA我。她沒有恍然大悟的快感，只有心裏忽然空蕩蕩的虛幻。明明她一直知道，他的說話總是很傷人，何解今天突然肯定他在精神控制她呢。

出乎意料地，她沒有很傷心。

也許是因為翩翩明瞭，王子不是所謂好人。她以為她喜歡他的不完美，也以為愛着這份殘缺的她是特別的一個。

沙發上的黑色皮褸忽然又往下滑了一點，像是誘惑她、吸引注意。

*

「點呀？仲記得嚟我度食飯喎。」

阿謙將鐵門打開，讓翩翩內進，臉上縱有笑意，但掩飾不住語氣中的酸溜溜。

他的心意——其實已很明顯，她一眼便看穿；但既然他從不表白，那麼，她也不會直接揭破。大家都年過十八了，有事的話，應該自行表達出來；她如此緊守成年人法則。

「當然啦，應承咗㗎嘛。」她說。

「玩得開唔開心？」

他故作不在乎地問；看到她回來，竟已有種快樂的心情被點亮。

「唔開心，原來同佢行街係唔太開心，哈哈。」她坦然，又往廚房探了探頭：「我今朝都係自己食咋，去咗靚記。等間食咩呀？」

「你自己食？同我講吖嘛，都係加雙筷。」阿謙驚訝。

「我估到你會咁講啦，唔想係佢甩我底先約你，唔尊重嘛！」

阿謙端出蜜糖雞翼、蒸水蛋、肉眼扒、豆鼓鯪魚炒生菜，又把翩翩從廚房中驅逐：「未洗呀啲嘢，咪望啦。」

坐在飯桌上，二人起筷，阿謙問：「點解唔開心嘅？」

「嗯，都冇咩原因，就係唔太開心。好悶，好似淨係得個軀殼行緊咁，但靈魂出晒竅。」翩翩把身前傾，更近餸菜。

「佢男神嚟㗎喎……你唔係話鍾意佢咩？同鍾意嘅人一齊，點解會唔開心？」

他不解；但她未能解答。這種爛俗的問題流傳千年，永遠有新的解法。

「我都唔知道喎。」

阿謙注意到她的外套：「話說——你着皮褸，轉新style？」

翩翩從沙發上拿起皮褸，再穿上身，她頗好奇別人怎樣看待這個造型——或者，只有她覺得不適合？

「好唔好睇？諗住未試過吖嘛，就買嚟試試，都幾型吖可？」

「都OK吖，係幾型。」他點頭。

「咁我以後都轉呢個款好冇？」但她並不喜歡。

「Umm……呢個都係新嘗試，但係我私心咁講，就鍾意你平時隨意啲嘅，好似襯你多啲。但係你鍾意都冇所謂嘅，最緊要着得舒服啫。」

翩翩和阿謙相處舒適的原因，不在於他會奉承她，或者說些討喜的話、完全配合她意見，而是他從來都打從心底覺得她很好，不應該被任何言行打擊。他真為她着想。

這種真誠的溝通，本身，就是快樂。

「你真係覺得我襯呢件褸？咁大件，好似可以食咗我咁。」她失笑。

「新嘗試啫……咁你又買？」他不懂她的態度轉變。

「王子買，然後送畀我，但根本唔襯我。」她馬上脫下皮褸：「人哋着得好睇嘛，又唔係我。」

「咁你原先適合其他風格吖嘛。」

「你真係冇一刻覺得——我又唔夠骨感、又唔夠高挑、樣又唔夠靚、淨係可以着平衫？」她將王子的話背出來。

「咪癲啦你，點會咁樣覺得㗎，世界上咁多衫淨係賣畀一種人嘅話，大把舖頭要執笠。平唔一定冇靚嘢，貴唔一定係好貨。」

阿謙的回答貼心得令她懷疑自己的耳朵，她只能連忙點頭。現實中的男生，不是應該都如王子那樣？她不是只有王子這個朋友，但是王子既知道她的心意，又嫌棄她的條件，卻仍與她交好——實在大恩大德；她身邊還有如此體貼而又與她親近、唯獨不挑剔她缺點的人？

翩翩開啟小說人物分析——噢，他也曾因肥胖受人冷待，性格含蓄而不敢進取地表達，以免他人後退；所以，他相對地不計較條件？

她呼氣，還是不要想了，因無論如何都只是「她覺得」，但人不是寫在紙上的角色，性格、心理都不應有公式計算；就像她也不能要求自己在一晚之內理清自己的感情。

「雞翼好食！」翩翩誇讚。

「隻蜜糖OK呢，貴嘢嚟。」阿謙又多夾一隻進她的碗裏。

「甜得嚟唔會好假。」

「你要試吓食新鮮嘅花蜜啦，都係甜得嚟唔會死甜，仲好清新。」

以前，他看了書本，知道花中有蜜，便去摘花，將蜜糖推出來；這是他的小秘密，因不想別人覺得他很怪。但他知道翩翩不會過分驚訝，因她對事物充滿好奇。

「無啦啦點會有花蜜食？」她問。

「無啦啦就冇，但以後有機會帶你去玩囉，我以前成日都食花蜜，路邊摘完即食。」

「不慨係食家。」

她已在心中期待，因她很想嚐嚐新鮮的花蜜。

「咪潤我，食嘢啦，你食嚟食去都仲咁瘦，驚你唔健康。」

「我肥咗好多啦喎，你唔覺第一次見我時瘦好多咩？」她沾沾自喜於他說她瘦，雖然不是讚賞。

「係，但都好瘦，」他故作凝重：「你知唔知病人臨死之前都好瘦？」

「喂喂，有啲人天生瘦底，唔通佢哋又有問題咩？不知幾好，着衫勁好睇。」

「咁我講緊你嘛，你食多啲啦，唔好刻意控制食量。」

他將話題拉回她身上。他知道她常在吃到「大約差不多」之後，便會控制自己不要再吃下去，所以常以捨不得的眼神離開餐桌，過後又嗌肚餓。她怕胖，默默自我約束。

「我幾時有喎。」

翩翩死不承認，阿謙也不說破，只是將餸菜夾給她；吃飯後，她去洗碗，因他已煮飯，分工明確。

自見他開始，她便說了很多、很多的話，雞啄唔斷。

如果遇上甩色的書，卡片上便能沾到句句真理，到時她就是名句卡片；她又想，可是甩色的書，實在千載難遇。

**

已屆初夏，但翩翩時常覺得入夜以後很涼，但要說這是秋意，好像又太遠了。明明是走過了生意盎然的春，才有夏花的盛放。

「Sem尾啦，嗚嗚嗚，好多嘢做……」阿謙發出哀嚎。

「Chur多幾個星期就完！」翩翩鼓勵。

「唔濟，我要姐姐陪我玩先，」他拿出兩個盒子：「今日鬥快分開白米同紅米！」

「WTF……你又幾好創意喎。」

「古語有云：功課是做不完的！不如玩咗再做。」

「好啊，睇吓邊個輸？」

兩個盒子裏，都有白米和紅米，他們將紅米挑出來，放在長型蓋子上。

結果，這是他們難得安靜的時間，翩翩在沉默之中噗哧一笑。

阿謙問：「笑咩？擾敵呀？」

「我哋好似除咗各自做嘢之外，一直都好多嘢講咁。」

「你多嘢講吖嘛。」

「有啲咁嘅事？」她幼稚地推撞了他沉在米堆裏的手：「平時我不知幾靜。」

「咁啫係我令你多嘢講啦？係咪都犀利先？」

「係係係。」

為什麼呢，和他相處真如此愉悅？她完全褪去網絡上的正經和成熟面具，與他隨意地傾閒偈——而他，竟然還覺得這個她很真實！

「王子呢，你同佢一齊，多唔多嘢講？」阿謙問。

「原來冇咩可以同佢傾到，成日都係佢講、我聽，除咗心事之外，我仲要唔太想同佢相處。我竟然係咁樣，以前都唔覺。唔通，我唔係鍾意佢？唔係搞笑吖嘛，咁多年喎！我成日都用佢嚟寫我啲男主角喎！佢叫我出嚟我都會出嚟喎！個個都話我好鍾意佢喎！」

翩翩說出自己這陣子的真實感受，除了隱藏一句：「同你一齊嘅我，好似似我多啲，開心好多。」

「雖然我對王子一啲好感都冇，」阿謙停下手上的動作：「但你可以諗清楚你鍾唔鍾意喺佢面前嘅自己，又鍾意幾時嘅自己。」

雖然他承認，聽到她這樣說，確實開心了一下。

翩翩不自覺地瞪大了眼：「我以為你會直接話佢係垃圾、然後勸我唔好再見佢。」

「我都想啊，我根本就係咁諗，佢對你唔好嘛，我一定覺得佢係垃圾……不過如果你真係鍾意呢？你本人諗清諗楚、唔會囉囉攣，先係最緊要。唉，聽落好假添，但總之自己諗咩最重要。當然，重複一次，我覺得佢係垃圾！」阿謙說。

「Wow，大道理之鬼。」

「咪笑。」

此時，有人來。

噢，翩翩今早才向王子提過她的名字——麥嘜。

來者腳步飛快，似一陣夏夜的涼風，拂過了翩翩；她心想——小姐，你住得好近？定係屋企附近冇士多、要特登搭幾蚊車入嚟買嘢？成日都走過嚟做咩？唔好同我講嘢啊，如果只係關於某個男人。

麥嘜拿了包牛仔片向翩翩付款，但二人只是對望了幾秒，麥嘜眼泛淚光。

翩翩看到，雖然想關心一下，但又不想多管閒事，對方就算嚎啕大哭，都與人無尤。

多管閒事是偽善，多管閒事是造作，多管閒事是太過得閒——王子的聲音響起，變成彩色大字蓋在麥嘜臉上。

倒是阿謙看到，然後問麥嘜「你冇嘢呀嘛？」

他認得她，猜到她的來意，又見到她眼含淚水，便說了一句開場白，讓她更易開口，向翩翩說話。

麥嘜正眼看着翩翩，豆大的眼淚連續滴落，翩翩馬上慌亂，急忙將紙巾遞給麥嘜。

「嗱，Hold住、暫停！你唔好偷雞吖。」翩翩無奈地對阿謙說。

她最大的弱點是看不得人哭，還要是哭得如此隱忍而非哇哇大叫惹人注目，她想起自己曾經也因被王子當眾取笑配不上他，而又不能發難表現出很在乎的樣子，只好忍到回家才偷偷地哭泣。她輕易地與傷心的眼淚共情。

他也停下手上的工夫，與她一同看着麥嘜。

麥嘜的聲音有點顫抖，她貼了雙眼皮貼的眼睛眨得極快，波浪捲的髮尾黏在了一起；說：

「佢拒絕咗我……」

她甚至沒有明確指出主語，但現場三人都知那是誰。

這是很不舒服的感覺，像王子是一個傳說，既被忌諱，又被頌揚；翩翩很不自在——她和麥嘜此刻的共聚更似在突顯他人地位。

「哦……」

翩翩的反應十分貧瘠，絕對是喂不飽麥嘜前來造訪的意欲。

「你話如果我再努力啲得唔得，佢同我講話好鍾意同我相處，唔希望冇咗我呢個朋友。」麥嘜急切地說。

「咁你可以努力啲做佢朋友嘅。」

「我唔係想要呢啲。」

「冇㗎啦，我唔理啦。」翩翩的心不斷往下沉，她覺得麥嘜很可憐，但又不知說什麼好；難道和她說「王子不嬲都係收兵格」？那麼，可能麥嘜會認為翩翩純粹是想揶揄情敵？然後反過來嘲諷她痴心妄想？

她就是想太多，結果說出冷漠的話。

「你幫吓我……我已經變咗好多，佢會越嚟越鍾意我㗎係咪？我咁大個女，第一次咁鍾意一個人。」麥嘜近乎哀求。

「你鍾意佢啲咩？」翩翩問。

「冇原因㗎——鍾意係冇原因㗎，feel囉。」

「點解會有feel？如果佢矮廿cm但一切不變，你仲有冇feel？我就係問緊你鍾意佢啲咩特質咁——嘅呢啲原因。」

「但鍾意可以純粹係feel嘛……」麥嘜嘀咕：「講嘢好笑啦、遠離一眼就見到佢啦，有時又好man，又對女朋友好喎。」

「有女朋友仲周圍撩女仔，都叫好？」

「朋友唔係男就係女，雖然佢係有少少呢個傾向嘅……」

「你講得啱，佢對女朋友好，今日下奏，佢叫我幫佢女朋友揀衫。佢對女朋友係幾專一吓，你唔好諗啦。」翩翩說出她原本不想開口的事。

「咁佢真係好好……佢女朋友咁衰，仲成日同佢嗌交。佢值得一個更加對佢真心嘅人！」

「你唔係講緊自己呀嘛？我話你知，Sorry我咁講會好hurt，但佢淨係會打從心底咁鍾意typical靚女，大眼、高鼻、臉細細、身材有前有後嗰隻；我都用咗好長時間去接受呢個事實，但你都可以，好冇？」翩翩有些替麥嘜生氣。

麥嘜看了翩翩幾眼，帶點疑惑地說：「明明就唔係……」

「咩唔係，你死心啦！收兵㗎條友，你仲諗住可以補位做佢女朋友？真係咁難頂嘅，佢咁大個人自己識掟煲，唔使你我操心！」

「佢真心當你係朋友㗎，成日提住你，你點可以咁cool？」

「唔係我cool，而家係佢明明喺度派卡，但你仲想繼續追佢——你鍾意點就點啦，但我唔識教你。我同佢只係朋友。」

「朋友？你黑心呀你，唔想見到朋友畀人鍾意。」

「你會受傷，我見到佢畀人鍾意——已經太多次，冇人開心㗎！我原本唔會理你，但你嚟搵我……」

翩翩無名火起，為什麼麥嘜一定替王子說話？她反問自己，有過這些時候嗎——

幸好沒有。

她為他哭過很多次，但從未修飾他這人，在她的愛情裏。

「咁佢多人鍾意，唔一定係收兵啫。」麥嘜反駁：「你我都唔會明受歡迎嘅人係點！咁啱佢就係！」

翩翩生氣，只想問她腦袋是否裝滿了糞便？

她語氣冷靜，但語調急促：「收兵唔夠惡頂，OK！佢仲會成日講啲好傷害人嘅說話，搞到人冇自信，佢實有講過你轉look靚啲啦！佢仲覺得自己好撚正、世界第一嗰種正——Well，其實我有時都係咁，但唔係靠喺現實中踩低人、抬高自己囉！覺得自己正係冇錯，你都正㗎，咁勇敢踩上嚟搵我。你仲咁後生，嘥青春喺呢啲人身上做乜鳩啫？真係有心對你好，唔會咁樣對人，佢連做朋友都好撚bad呀。」

她說得似缺氧，續道：「佢會讚我某啲性格，但係後尾又會踩返轉頭。佢話我幫人時好charm，後尾又話其他人會覺得我多事，叫我唔好做咁多嘢——話得佢會接受我咁樣喎。仲有，以前我鍾意佢，係佢係咁周圍提、周圍唱，我畀人係咁笑呀。屌佢含撚啦，又雙面又八公。」

「你講到佢咁差，你又鍾意佢？」麥嘜似被她嚇怕，說話有哭腔。

「邊個話我鍾意佢？我咁bad taste？」

翩翩衝口而出，然後忽然呆住；但麥嘜早就低頭抹淚，看𣎴見翩翩突兀的停頓。

她這樣罵了王子？

雖然她一直知道王子不是完美的人，但是她口中的他，也未免太惡劣了吧？

這是她的真心？

其實她是不是有思覺失調之類的？她不是喜歡他嗎？

此時，阿謙不小心笑了出聲，又對麥嘜說：「唔好喊啦，但我哋有好多紙巾。」

「多謝……我走先。」

麥嘜滿面通紅，深深地看了翩翩一眼後離去。

翩翩的心跳加速得很厲害，有一種恐懼在體內揮發，終流於震顫的雙腳，她急急坐下。

王子說：「你啱啱講嘢嗰陣，勁似當年幫我趕走啲惡霸。」

「係咪太惡？佢細過我哋……」

「唔通你又唔理，跟住眼見佢沉迷咩？」

他笑意盈盈，像很高興，對上她垂頭喪氣、一時間霸氣盡失的臉。

「我驚我講得太多咋，有啲嘢佢知嚟做咩啫？同埋佢遲早都要面對㗎啦，使咩我多事，仲要好霸道、逼佢咁樣，其實勁衰喎。但我hold唔住，真心得濟，好嬲。」

她總是在事後感到後悔。

「係有啲惡嘅，」阿謙取笑她：「咁好過佢以為心上人好好嘛。」

「但關我咩事先，個個人都——」

他打斷她的話：「唔好講呢單住，你啱先話，你而家唔鍾意王子，係咪真？」

那兩盒米像被遺棄了，在空氣中聽男女對話，默默發酵。